ပြည်တွင်းကုန်သွယ်မှုသတင်း

              မကွေးတိုင်းဒေသကြီး၊ ပခုက္ကူခရိုင်တွင် သီးနှံမျိုးစုံစိုက်ပျိုးရာမှ အစေ့ထုတ်ပြောင်း(CP) သီးနှံ ကိုလည်း ဒေသစီးပွားဖြစ် စိုက်ပျိုးလျက်ရှိသည်။ ပခုက္ကူ၊ မြစ်ခြေ၊ ကမ္မ၊ ပေါက်၊ ရေစကြိုမြို့များတွင် စိုက်ဧကအများဆုံးစိုက်ပျိုးထွက်ရှိသော မြို့နယ်များဖြစ်သည်။ နှစ်စဉ်စိုက်ဧက(၁၅၀၀၀)ခန့် စိုက်ပျိုးကြောင်း သိရှိရသည်။

              အစေ့ထုတ်ပြောင်း(CP)ကို ပြည်တွင်းမွေးမြူရေးလုပ်ငန်းများမှ ကုန်ကြမ်းတိရိစ္ဆာန် အစား အစာအဖြစ်အသုံးပြုပြီး အပင်များကိုလည်း ကျွဲနွားများအတွက် အစာအဖြစ် အသုံးဝင်သည့်အပြင် ပြည်ပပို့ကုန်အဖြစ် ထိုင်း၊ တရုတ်နိုင်ငံများသို့လည်း နှစ်စဉ်တင်ပို့နိုင်၍ ပြည်တွင်းဈေးကွက်ခိုင်မာပြီး အရောင်းအဝယ်ဖြစ်လျက်ရှိကြောင်း သိရှိရသည်။ ပခုက္ကူဈေးကွက်၌လည်း နေ့စဉ်အရောင်းအဝယ်ဖြစ် လျက်ရှိသည်။ ၂၀၂၅ခုနှစ်၊ မတ်လ(ဒုတိယပတ်)တွင် အစေ့ထုတ်ပြောင်း(CP)ဝင်ရောက်မှုအနေဖြင့် နေ့စဉ်တစ်ရက်လျှင် ပိဿာ(၃၀)ဝင်အိတ်(၃၀၀-၅၀၀) တစ်ပတ်အတွင်း အိတ်ရေ(၃၀၀၀)ခန့် အရောင်း အဝယ်ဖြစ်ကြောင်း သိရှိရသည်။ ယခုအချိန်တွင် ဒေသတွင်း သီးနှံပေါ်ချိန်ဖြစ်၍ ဈေးကွက်သို့ ကုန်ဝင်ရောက်မှု များ၍ ဈေးအေးပြီး အရောင်းအဝယ်ဖြစ်ကြောင်း သိရှိရသည်။

              ဈေးနှုန်းအနေဖြင့် သီးနှံပေါ်စ ဖေဖော်ဝါရီလတွင် ဒေသပေါက်ဈေး အစေ့ထုတ်ပြောင်း(CP) တစ်တင်းလျှင် ကျပ်(၂၅၀၀၀-၂၆၀၀၀)ဈေးဖြင့် အရောင်းအဝယ်ဖြစ်ခဲ့ရာမှ မတ်လ(ပထမပတ်)တွင် ပြည်ပဝယ်လိုအားကောင်း၍ တစ်တင်းလျှင် ကျပ်(၂၇၀၀၀)ဈေးဖြင့် အရောင်းအဝယ်ဖြစ်ပြီး မတ်လ (ဒုတိယပတ်)တွင် တစ်တင်းလျှင် ကျပ်(၂၅၀၀၀)ဖြင့် ဈေးပြန်လည်ကျဆင်း အရောင်းအဝယ်ဖြစ်ကြောင်း၊ အစေ့ထုတ်ပြောင်း(CP)ကို ပြည်တွင်းသုံးစွဲမှုနည်းသော်လည်း ပြည်ပပို့ကုန်အဖြစ် အများဆုံးတင်ပို့ပြီး ထိုင်း၊ တရုတ်နိုင်ငံမှ တိရိစ္ဆာန်အစားအစာကုန်ကြမ်းအဖြစ် ဝယ်ယူမှုများ၍ ဈေးကွက်ခိုင်မာမှုရှိကြောင်း သိရှိရသည်။

              စိုက်ပျိုးမှုအနေဖြင့် အစေ့ထုတ်ပြောင်း(CP) တစ်ဧကလျှင် ကုန်ကျစရိတ် ကျပ်(၁၁)သိန်းခန့် ကုန်ကျကြောင်း၊ အထွက်နှုန်းမှာ ပျမ်းမျှတင်း(၈၀)ခန့် ထွက်ရှိ၍ တစ်တင်းလျှင်ပျမ်းမျှဈေး ကျပ် (၂၅၀၀၀) ဖြင့် ရောင်းချရ ပါကတစ်ဧကဝင်ငွေမှာ ကျပ်သိန်း(၂၀)ခန့်ရရှိပြီး အကျိုးအမြတ်အနေဖြင့် ကျပ်(၉)သိန်းခန့်ရရှိကြောင်း၊ ယခင်နှစ်သီးနှံပေါ်ချိန်တွင် တစ်တင်းလျှင်ကျပ်(၂၀၀၀၀)ဈေးဖြင့် ရောင်းချ ရ၍ ယခုနှစ်တွင် သီးနှံပေါ်စ ဒေသပေါက်ဈေး ကျပ် (၂၅၀၀၀-၂၇၀၀၀) ဈေးဖြင့် ရောင်းချရခြင်းကြောင့် ယခင်နှစ်ထက် ဈေးပိုရရှိကြောင်း စိုက်တောင်သူများ အဆင်ပြေလျက်ရှိကြောင်း သိရှိရသည်။

              ပြည်ပပို့ကုန်သီးနှံတစ်မျိုးဖြစ်သည့် အစေ့ထုတ်ပြောင်း(CP)သည် ပြည်တွင်းသုံးစွဲမှုနည်းသော်လည်း ပြည်ပပို့ကုန်သီးနှံတစ်မျိုးဖြစ်၍ ဈေးကွက်ခိုင်မာခြင်းကြောင့် စိုက်တောင်သူများမှ အကျိုးအမြတ်ရရှိ၍ နှစ်စဉ်မပြတ် ဒေသစီးပွားဖြစ် စိုက်ပျိုးကြောင်း သိရှိရပါသည်။

DOCA(မကွေး)

 မတ်လဒုတိယပတ်အတွင်းမန္တလေးစျေးကွက်သို့  စားတော်ပဲ များဝင်ရောက် လျက်ရှိပြီး၊စားတော်ပဲမှာ ပြည်တွင်းစားသုံးမှုများပြားသည့်ပဲတစ်မျိုးဖြစ်ကြောင်း သိရပါတယ်။ စားတော်ပဲ သီးနှံအား စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ဧရာဝတီတိုင်း ဒေသကြီးနှင့်  ရှမ်းပြည်နယ်တို့တွင်အများအပြား  စိုက်ပျိုးပြီး၊ ကျန်ဒေသများတွင် လည်း စိုက်ပျိုး ကြောင်း  သိရပါတယ်။ ပဲမျိုးစုံစိုက်ပျိုးထွက်ရှိသည့်   မန္တလေးတိုင်းဒေသကြီးအတွင်း အမရပူရ၊  ပြင်ဦးလွင်၊ မိုးကုတ်၊ တကောင်း၊ စဉ့်ကူး၊မတ္တရာနှင့်မြင်းခြံမြို့နယ်တို့တွင် စားတော်ပဲများ စိုက်ပျိုး ပြီး၊၂၀၂၄-၂၀၂၅ ခုနှစ်တွင် စားတော်ပဲအပါအဝင် ပဲမျိုးစုံစိုက်ပျိုးမှု ၁၀၁၉၄၇၇ ဧကဖြစ်ကြောင်းသိ ရပါတယ်။ မန္တလေးပွဲစား၊ကုန်သည်စက်ပိုင်များမဟာကထိန်တော်အသင်းတွင်  ၂၀၂၅ခုနှစ်မတ်လ ဒုတိယပတ်အတွင်း ဖြစ်ပေါ်သည့်ပေါက်စျေးမှာ  ၃တင်းဝင်တစ် အိတ်လျင် စားတော်ပဲ (ကနေဒါ) ၃၃၅၀၀၀ ကျပ်နှင့် ၃၄၀၀၀၀ ကျပ်၊ စားတော်ပဲ(ကျွန်း) ၃၄၅၀၀၀ ကျပ် နှင့်  ၃၅၀၀၀၀ကျပ်၊ တစ် ပိဿာလျှင်စားတော်ပဲ(ကနေဒါ)  ၅၆၅၄ကျပ်နှင့်၅၇၃၈ ကျပ်၊ စားတော်ပဲ (ကျွန်း) ၅၈၂၃ကျပ်  နှင့် ၅၉၀၇ကျပ်တို့ဖြစ်ကြောင်း သိရပါတယ်။ယခင်နှစ်ကာလတူပေါက်စေျးမှာ၃တင်းဝင်တစ်အိတ် လျှင် စားတော်ပဲ(ကနေဒါ) ၂၄၆၀၀၀ကျပ်နှင့်၂၄၇၀၀၀ ကျပ်၊စားတော်ပဲ(ကျွန်း) ၂၈၀၀၀၀ကျပ် နှင့် ၂၉၀၀၀၀ကျပ်၊တစ်ပိဿာလျှင်စားတော်ပဲ(ကနေဒါ)၈၄၁၀ ကျပ်နှင့်၈၄၄၄ကျပ်၊စားတော်ပဲ(ကျွန်း) ၄၇၂၆ ကျပ်နှင့် ၄၈၉၅ ကျပ်ဖြစ်ပြီး၊ ယခုနှစ်နှင့်ယခင်နှစ် ကာလတူ ပေါက်စျေး နှိုင်း ယှဉ်ချက်အရ တစ်ပိဿာလျှင်   စားတော်ပဲ (ကနေဒါ) ၁၅၇၀ ကျပ်နှင့်စားတော်ပဲ(ကျွန်း)၁၀၁၂ကျပ်တို့ဖြင့်စျေး ပိုရရှိကြောင်း သိရပါတယ်။သီးနှံပေါက်စျေးမှာအချိန်နှင့်လိုက်၍ပြောင်းလဲမှုအနည်းငယ်ရှိကြောင်း သိရပါတယ်။

DOCA(မန္တလေး)

မုန်ညှင်းဖြူသည် မြန်မာနိုင်ငံသမပိုင်း ဒေသများတွင် စိုက်ပျိုးလေ့ရှိသော အပင်မျိုးဖြစ်ပြီး၊ စိုက်ပျိုးရန်လွယ်ကူပြီး၊ လယ်မြေများတွင် သစ်စိမ်းမြေဩဇာများဖြင့်စိုက်ပျိုးကြသည်။

မြင်းခြံမြို့နယ်အတွင်းရှိ ကုန်စိမ်းဈေးများတွင် ရောင်းချနေသောမုန်ညှင်းဖြူ လက်လီ တစ်ပိဿာလျှင်(၂၀၀၀)ကျပ်ဖြင့် ရောင်းချလျက်ရှိပြီး၊ ပွဲရုံများတွင် လက်ကားဈေးတစ်ပိဿာလျှင် (၁၅၀၀)ကျပ်ဖြင့် အသီးသီးရောင်းဝယ်လျက်ရှိသည်။ မြို့နယ်တွင်းဝင်ရောက်မှုအနေဖြင့် ရှမ်းပြည် နယ်တောင်ကြီးမြို့နှင့်ပြင်ဦးလွင်မြို့များမှ တင်သွင်းကြောင်းသိရသည်။ အမျှင်ဓာတ်ကြွယ်ဝသော ကြောင့် အစာချေစနစ်ကို ကောင်းမွန်စေပြီး အူလမ်းကြောင်းကျန်းမာရေးကို ထောက်ပံ့ပေးသည်။ မျက်စိကျန်းမာရေးအတွက် အထောက်အကူပြုပြီး ကိုယ်ခံအားစနစ်ကို မြှင့်တင်ပေးကာ အာဟာရ ဓာတ်ကြွယ်ဝသော ဟင်းသီးဟင်းရွက်တစ်မျိုးဖြစ်သောကြောင့် နေ့စဉ်စားသုံးသင့်သော အစားအစာ တစ်ခုဖြစ်သည်။

DOCA(မန္တလေး)

    ပူပြင်းသောနွေရာသီသို့ ကူးပြောင်းရောက်ရှိလာတော့မည်ဖြစ်သည့်အတွက် ရေအိုးရောင်း ဝယ်မှုဈေးကွက်များ သွက်လာပါသည်။ ကျွန်တော်တို့လူမျိုးများသည် သောက်ရေကို ရွံ့မြေနှင့် ပြုလုပ်သော မြေအိုးများဖြင့်ထည့်သွင်းသိုလှောင်သောက်သုံးကြသည်မှာ အစဉ်အလာတစ်ခုဖြစ် ပါသည်။ မိရိုးဖလာအစဉ်အလာအတိုင်း သန့်ရှင်းသောရေကို ရေအိုးထဲထည့်၍ အိမ်တစ်အိမ်၏ သန့်ရှင်းသော နေရာ၊ အေးသောနေရာတွင်ထားရှိ၍ မြတ်နိုးနှစ်သက်စွာသောက်သုံးကြသည်မှာ မြန်မာလူမျိုးတို့၏ ချစ်စရာကောင်းသော ပုံစံတစ်မျိုးဖြစ်ပါသည်။ အိမ်တစ်အိမ်၏ သန့်ရှင်းသပ်ရပ် စွာနေထိုင်မှု၊ ကျန်းမာရေးလိုက်စားမှု၊ စည်းကမ်းကောင်းမှု၊ အိမ်သူအိမ်သားများ၏ စိတ်နေစိတ်ထား များအား သောက်ရေအိုးစင်ထားရှိမှု၊ ရေအိုးရေခွက်များသန့်ရှင်းမှု၊ ရေအိုးနှင့်ရေအိုးဖုံးများကြည့်၍ သိနိုင် ဖတ်နိုင်ပါသည်။

ခေတ်မီဖွံ့ဖြိုးတိုးတက်လာသည်နှင့်အမျှ ရေကိုလည်းပုံစံအမျိုးမျိုး၊ နည်းလမ်းအဖုံဖုံဖြင့် ထည့်သွင်းသောက်သုံးလာကြလျက်ရှိရာ မြို့ကြီးပြကြီးများနှင့်အချို့သော ကျေးရွာဒေသများ၌လည်း ရေခဲရေကို သောက်သုံးမှုများလာကြပါသည်။ ရေခဲရေသည် သောက်သုံးစဉ်တစ်ခဏတာသာ ကောင်းပြီး ကျန်းမာရေးရှု့ထောင့်ကကြည့်လျှင် ကျန်းမာရေးကိုထိခိုက်စေပါသည်။ မိမိတို့နိုင်ငံတွင် အိမ်တိုင်းလိုလို သောက်ရေအိုးများထားရှိကြသော်လည်း ဒီဘက်ခေတ်၌ ရေအိုးထဲကရေကို သောက်သုံးမှုနည်းလာကြပါသည်။ ရေသည်မရှိမဖြစ်သော အရာတစ်ခုဖြစ်၍ ရေကိုထည့်သွင်း သိုလှောင်သည့်အရာများသည် သဘာဝဆန်ပြီး သန့်ရှင်းစင်ကြယ်ဖို့လိုပါသည်။ နေရောင်ခြည်နှင့် ထိတွေ့လျှင်ဓာတ်ပြုပြီး လူကိုဘေးဥပါဒ်ဖြစ်စေနိုင်သော ပစ္စည်းများအစား မြေအိုးများသည် သင့်လျော်ကောင်းမွန်သောအရာဖြစ်ပါသည်။ ပူးပြင်းသောနွေရာသီသို့ ရောက်ရှိကူးပြောင်းလာပြီ ဖြစ်သည့်အတွက် ရေခဲရေမဟုတ်ပဲ သဘာဝအတိုင်းအေးသည့်ရေကို သောက်သုံးချင်သူများအတွက် ရေအိုးဝယ်ယူခြင်းများ၊ ရေအိုးသစ်လဲလှယ်ခြင်းများရှိလာ၍ ရေအိုးဈေးကွက်မှာလည်း အရောင်း အဝယ်သွက်လာပါသည်။ မြင်းခြံမြို့ အေးမြသီတာဈေး ရေအိုးတန်းတွင် ရောင်းချလျက်ရှိသော ရေအိုးများမှာ နွားထိုးကြီး၊ သာစည်၊ ရန္တပိုများမှထွက်သောရေအိုးများဖြစ်ပါသည်။ သာစည်အိုးမှာ အကြမ်းခံ၍ လူကြိုက်များကြောင်း၊ အသုံးပြုမှုများသည့်ပုံမှန်ဆိုဒ် သာစည်ရေအိုးတစ်လုံး၏ ဈေးနှုန်းမှာ(၅၅၀၀)ကျပ်၊ နွားထိုးကြီးအိုးတစ်လုံးမှာ(၅၀၀၀)ကျပ်၊ ရန္တာပိုရေအိုးတစ်လုံးမှာ (၆၀၀၀)ကျပ်များရှိကြောင်း၊ ရန္တပိုရေအိုးမှာ ပုံသဏ္ဍာန်လှပြီး အရည်အသွေးကောင်း၍ ဈေးနှုန်းမှာ လည်းပိုကြောင်း၊ ရိုးရိုးအိုးများအပြင် ရေဘားတတ်ဆင်ထားသော ရေအိုးများနှင့်ဆိုဒ်စုံ အရွယ်စုံ ရေအိုးများလည်း ရောင်းချလျက်ရှိရာ အမျိုးအစားစုံ ဈေးနှုန်းစုံစွာဖြင့် ရောင်းချလျက်ရှိကြောင်း သိရသည်။ သန့်ရှင်းစင်ကြယ်သော ရေအိုးထဲမှ သန့်ရှင်းသောရေသည် ကျွန်တော်တို့လူသားတွေ အတွက် ကောင်းမွန်သောဆေးဝါးဓာတ်စာတစ်မျိုးပင်ဖြစ်ပါသည်။

DOCA(မန္တလေး)

ဂွေးတောက်ပင်ကို အင်္ဂလိပ်လို Green wax flower လို့ခေါ်ပါသည်။ ခွေးတောက်ပင်သည် မြန်မာနိုင်ငံမှာ အလေ့ကျပေါများစွာ ပေါက်ရောက်လေ့ရှိသည့် နှစ်ရှည်ခံနွယ်ပင်မျိုးဖြစ်ပါသည်။ ယခု အခါမှာ စီးပွားဖြစ် စိုက်ပျိုးရောင်းချနေပြီဖြစ်ပါသည်။   အပွင့်မှာစမ်းဝါရောင်ရှိသော အပွင့်ငယ်များ စုပြုံပွင့်ပြီး ပန်းခိုင်မှာကြားထွက်ပန်းခိုင်ဖြစ်ကာ ငိုက်ကျနေပါသည်။ ခွေးတောက်ရွက်ပုံစံသည် ရွက်ထိပ်ချွန်ပြီး နှလုံးပုံစံ(Heart shape)ရှိပါသည်။ ခွေးတောက်ပင်မှာ Polydhydroxy pregneres glycosides, volubiloside A, B, C, drevogenin D စသည့် ဓာတ်တွေများစွာ ပါဝင်ပါသည်။ ခွေးတောက်ပင်၏ အရွက်နှင့်အမြစ်ကို ဆီးချိုဆေး၊ သန်ချဆေး၊ အသည်းအားဆေး၊ အယောင်ကျဆေး၊ ပြည်တည်နာပျောက်ဆေး စသည့်ဆေးတွေ ဖော်စပ်ရာတွင် ထည့်သွင်းသုံးလေ့ရှိပါသည်။

ခွေးတောက်ရွက်ကို စားသုံးရာတွင် အများအားဖြင့် ကြက်သားနှင့်ရောပြီး ဟင်းရည်ချက်သောက် လေ့ရှိပါသည်။ ကြက်ဥနှင့်ဖြစ်စေ၊ ဘယာကြော်နှင့်ဖြစ်စေ ရောပြီးကြော်စားလေ့ရှိပါသည်။ ခွေးတောက်ရွက် စားသုံးခြင်းဖြင့် ဆီးချုပ်ရောဂါကို သက်သာပျောက်ကင်းစေနိုင်ပါသည်။ လေကို သက်စေပြီး သလိပ်ကို ကြေစေနိုင်ပါသည်။ လေရောဂါ၊ ညောင်းကျနာ၊ ပန်းနာရင်ကျပ်ရောဂါတို့ကို သက်သာစေပါသည်။ ခွေးတောက်ရွက်သည် အနာစိမ်းတွေ၊ သွေးစုနာတွေဖြစ်လာသည့်အခါ ခွေးတောက်ရွက်ကို ကင်ပြီး အနာကို ကပ်ပေးခြင်းဖြင့် သက်သာပျောက်ကင်းနိုင်ပါသည်။ အဖုအကြိတ် တွေဖြစ်ပါက ခွေးတောက်ရွက်ကို ကြိတ်ပြီး အုံထားပေးခြင်းဖြင့် အဖုအကြိတ်တွေ သက်သာ ပျောက်ကင်းနိုင်ပါသည်။ ဒူးနာခြင်း၊ ခါးနာခြင်း၊ ခြေလက်ကိုက်ခဲခြင်းများအတွက် ခွေးတောက်ရွက်ကို ထောင်းလို့သော်လည်းကောင်း၊ ညှစ်လို့သော်လည်းကောင်းရလာသည့် သတ္ထုရည်နှင့် သနပ်ခါးကိုသွေးပြီး ဒူးကနေခြေဖျားထိ  လိမ်းပေးပါက ကိုက်ခဲနာကျင်ခြင်းတွေ သက်သာလျော့ပါးနိုင်ပါသည်။ လေထိုး လေအောင့်၊ ဆီးချုပ် ဖြစ်ပါက ခွေးတောက်ရွက်ကို ဟင်းချိုချက်သောက်ခြင်း၊ ကြော်စားခြင်းအားဖြင့် သက်သာပျောက်ကင်းနိုင်ပါသည်။ အရက်သောက်တတ်သူများဆိုလျှင် ခွေးတောက်ရွက်ကို မကြာခဏ စားပေးခြင်းဖြင့် အရက်၏ ဆိုးကျိုးတွေကြောင့် ဖြစ်နိုင်သည့်၊ ခံစားရနိုင်သည့် ရောဂါများကို လျှော့ချပေးနိုင်ပါသည်။

ဂွေးတောက်ရွက် ဈေးနှုန်းအနေဖြင့် တစ်ပိဿာလျှင် (၈၀၀၀)ကျပ်၊ တစ်ဆယ်သားလျှင် (၁၀၀၀) ကျပ်နှုန်း ရောင်းချလျက်ရှိကြောင်း သိရှိရပါသည်။

DOCA(မန္တလေး)