ပြည်တွင်းကုန်သွယ်မှုသတင်း

    မလှိုင်မြို့နယ်ရှိ သပြေပင်ကျေးရွာနှင့် ဆည်ကြီးကျေးရွာများသည် ကြက်သွန်နီကို နှစ်စဉ် မိုး/ ဆောင်း စိုက်ပျိုးသောဒေသများဖြစ်ပြီး၊ ယခုနှစ်အောက်တိုဘာလတွင်လည်း မြှိတ်စားကြက်သွန်နီ ထွက်ရှိနေပြီဖြစ်ကြောင်းသိရသည်။ သပြေပင်ကျေးရွာအနေဖြင့် ရေချိုချောင်း (ခ) သပြေပင်ချောင်း ကမ်းဘေးရှိ သဲသောင်များ၊ ဆည်ကြီးကျေးရွာအနေဖြင့်လည်း သင်ပုန်းဆည်ရေဝင်ဧရိယာအနီးရှိ မြေများတွင် ကြက်သွန်နီကို အဓိကထားစိုက်ပျိုးကြပါသည်။ ၎င်းကျေးရွာများအနေဖြင့် မိုး/ဆောင်း ကြက်သွန်နီများအပြင် မြှိတ်စားကြက်သွန်နီ ဇော်မွှားကြက်သွန်မျိုး၊ ဆောင်းကြက်သွန်နီ စိုက်ပျိုးရန် မျိုးပင်များကိုပါ စိုက်ပျိုးရောင်းချကြရာ ယခုနှစ် ဇော်မွှား (၁) တင်း လျှင် (၂၀၀၀၀) ကျပ်၊ မြှိတ်စား ကြက်သွန်နီမှာ တစ်ပိဿာ (၇၀၀-၈၀၀) ကျပ်များဖြင့် ရောင်းချရကြောင်း သိရသည်။ ယခုနှစ် ကြက်သွန်နီဈေးကျသည့်အတွက် တောင်သူအကျိုးအမြတ်နည်းသော်လည်း ဒေသရေမြေအနေအထား နှင့် မိရိုးဖလာစိုက်ပျိုးလာသော သီးနှံဖြစ်၍ ဆက်လက်စိုက်ပျိုးကြကြောင်း တောင်သူများထံမှ သိရ သည်။ ယခုထွက်ရှိသောမြှိတ်စား ကြက်သွန်နီမှာအလုံးမကြီးသော်လည်း အသစ်ဖြစ်၍ အချိုဓါတ်၊ အမွှန်အစပ် ပိုမိုသဖြင့် ကြက်သွန်နီအစိမ်းသုပ်စားရန်၊ တို့စားရန်ကြိုက်နှစ်သင်သူများအတွက်အထူး သင့်လျော်သည်ကို တွေ့ရသည်။

DOCA(မန္တလေး)

      ရှမ်းပြည်နယ်(မြောက်ပိုင်း)၊ လားရှိုးမြို့၊ မြို့မဈေးတွင် အသား/ငါးများ၊ သစ်သီးဝလံများ ၊ အသီး အရွက်များရောင်းချလျက်ရှိရာ ရာသီစာထောပတ်သီးများ ဈေးကွက်အတွင်းရောင်းချ နေကြောင်း တွေ့ရှိရပါသည်။ ထောပတ်သီးများကို တောင်ကြီး၊ အောင်ပန်း၊ ကလော စသည့်မြို့များ မှ သယ်ယူရောင်းချသလို ဒေသထွက်အသီးများကိုလည်း ရောင်းချနေကြောင်း သိရှိရပါသည်။

      ထောပတ်သီးဈေးနှုန်းများမှာ  အသေး(၁)လုံးလျှင် (၅၀၀)ကျပ်မှ (၈၀၀)ကျပ်အထိရှိပြီး၊ အကြီး(၁)လုံးလျှင် (၁၀၀၀)ကျပ်မှ (၁၅၀၀)ကျပ်အထိ ရောင်းချကြကြောင်း သိရှိရပါသည်။ Hass သီး  (1)kgလျှင် (၅၀၀၀)ကျပ်မှ (၇၀၀၀)ကျပ်အထိရှိပြီး ဈေးကွက်အတွင်း ရောင်းချလျက်ရှိကြောင်း တွေ့ရှိရပါသည်။

DOCA(ရှမ်း)

            မန္တလေးတိုင်းဒေသကြီး၊ ကျောက်ဆည်ခရိုင်အတွင်းတွင် သီးနှံမျိုးစုံကို ရာသီအလိုက် စိုက်ပျိုး ကြပြီး၊ စားဖိုဆောင်သီးနှံများအပြင် ဈေးကွက်ဝယ်လိုအားရှိသော ကွမ်းရွက်သီးနှံကိုလည်း စိုက်ပျိုး လာကြပါသည်။ ကွမ်းရွက်စိုက်ပျိုးမှုအနဖြင့် ခရိုင်အတွင်း (၅၈၂)ဧက စိုက်ပျိုးထားကြောင်း၊ သက်ဆိုင်ရာဌာန၏ စာရင်းများအရ သိရှိရပါသည်။ စိုက်ပျိုးမှု မျိုးအနေဖြင့် ကွမ်းနုဝါ၊ ကွမ်းစိမ်း၊ ကွမ်းကြွပ်မျိုးများဖြစ်ကြောင်း၊ အများဆုံးစိုက်ပျိုးသော မျိုးမှာကွမ်းနုဝါမျိုးများဖြစ်ပြီး စိုက်ပျိုးမှု ပုံစံမှာ အနွယ်ပင်ဖြစ်သောကြောင့် တိုင်ထောင်၊ ခြံခတ်၍ စိုက်ပျိုးရပြီး လေဝင် လေထွက်မှုနှင့် လေဒဏ်ခံနိုင်ရန်အတွက် အုန်းလက်များကာပေးရကြောင်း၊ တစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၂၀၀၀၀၀၀/-) ကျပ်ခန့် ကုန်ကျကြောင်း၊ အများဆုံး စိုက်ပျိုးသော ရွာများမှာ သံရွာ၊ ရှေ့သပြေသာရွာ၊ ရဲကြီးရွာနှင့် ရွာခိုင်ကြီး ရွာများတွင် အများဆုံး စိုက်ပျိုးကြကြောင်း၊ ကွမ်းစိုက်ပျိုးမှုအနေဖြင့် တစ်နှစ်ပတ်လုံးတွင် မိုးရာသီ စိုက်ပျိုးပါက အပင် အသေအပျောက်နည်းပြီး စိုက်ပျိုးပင်အားလုံး ရှင်သန်နိုင်ကြောင်း၊ စိုက်ပျိုးပြီး (၃)လအကြာတွင် စတင်ခူးဆွတ်နိုင်ပြီးဖြစ်ကြောင်း၊ ကွမ်းခြံတစ်ဧကတွင် တစ်ထောင်ပင် စိုက်ပျိုးပါက တစ်ပတ်လျှင် အချိန် (၁၅-၂၀)ပိဿာအထိ ထွက်ရှိကြောင်း၊ တစ်လကို နှစ်ကြိမ်သာခူးဆွတ်ကြောင်း၊ မိုးနှင့်နွေများ တွင် ကွမ်းရွက်အထွက်အားကောင်းပြီး ဆောင်းတွင်းပိုင်းတွင် အထွက်နည်းကြောင်း၊ ကွမ်းခြံတစ်ခြံ စိုက်ပျိုးထားလျှင် (၅-၆)နှစ်အထိ ခူးဆွတ်ရောင်းချ၍ရကြောင်း၊ ကွမ်းဈေးနှုန်းအနေဖြင့် ကွမ်းနုဝါ အချော တစ်ပိဿာလျှင် လက်ကားဈေး (၆၀၀၀/-)ကျပ်၊ အလတ်တစ်ပိဿာလျှင် (၄၀၀၀/-)ကျပ်၊ အသေးတစ်ပိဿာလျှင် (၃၀၀၀/-)ကျပ် ဈေးများဖြင့် ရောင်းဝယ်လျက်ရှိပြီး၊ ကွမ်းအရော လက်ကား တစ်ပိဿာလျှင် (၅၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ ကွမ်းရွက်များကို ခြင်းများဖြင့် ထည့်ကာ ကွမ်းပွဲရုံများသို့ တိုက်ရိုက် တင်ပို့ရောင်းချရကြောင်း၊ ထွက်ရှိမှုအနေဖြင့် တစ်နှစ်လျှင် ပျမ်းမျှပိဿာ (၁၃၂၀)ခန့် ထွက်ရှိကြောင်း၊ တစ်နှစ်ကို စိုက်ပျိုးစရိတ်နုတ်ပြီး (၄၆၀၀၀၀၀/-) ကျပ်ခန့် မြတ်ကြောင်း၊ ကွမ်းသက်တမ်းကြာရှည်အောင်နှင့် အထွက်နှုန်းမကျအောင် သွင်းအားစုများ ထည့်သွင်း ပေးရကြောင်း၊ ကွမ်းဈေးနှုန်းအတက်အကျရှိသောကြောင့် ဈေးကောင်းရချိန်တွင် အကျိုးအမြတ် ပိုမိုဖြစ်ထွန်းပြီး ဈေးနှုန်းကျဆင်းချိန်တွင်လည်း အရင်းမရှုံးသော သီးနှံဖြစ်သော ကြောင့် ကွမ်းစိုက်ပျိုး ခြင်းဖြင့် စီးပွားဖြစ်ဝင်ငွေတိုးကြောင်း ကွမ်းစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA (မန္တလေး)

             ကျောက်ဆည်မြို့နယ်အတွင်း ပင်တလည်ကျေးရွာတွင် ပန်းမျိုးစုံစိုက်ပျိုးသည့်အနက် မေမြို့ပန်းများလည်းစိုက်ပျိုးလျက်ရှိကြောင်း ၊ မေမြို့ပန်းများသည် အစုလိုက်၊အခိုင်လိုက်ပွင့်သော ပန်းဖြစ်ပြီး အရောင်အားဖြင့် အဖြူ၊အနီ၊ပန်းရောင်၊ဗေဒရောင်ဟူ၍ ရှိကြပြီး ရိုးစိမ်းအဖြူ၊ ကျောက်နီ၊ ချင်းမိုင် စသည်ဖြင့် အပွင့်အရောင် ပန်းပွင့်ပုံကို မူတည်၍ အခေါ်အဝေါ် အမျိုးမျိုး ရှိကြပါသည်။ မည့်သည့်မြေအမျိုးအစားတွင်မဆို ရှင်သန်နိုင်သော်လည်း ပန်းပွင့်အထွက်ကောင်းစေရန်၊ အရည် အသွေးကောင်းမွန်၍ ပန်းအရောင်များလှပစေရန်အတွက် သဘာဝမြေသြဇာများကြွယ်ဝသော မြေဖြစ်ရန်လိုအပ်ပြီး ရေမဝပ်စေဘဲ ခြောက်သွေ့သော ရာသီဥတုတွင် ပုံမှန်ရေလောင်းပေးရန် လိုအပ်ပါသည်။ ပန်းမျိုးစေ့များအား ပန်းများအများဆုံး ထွက်ရှိရာ ပြင်ဦးလွင်မြို့မှ မှာယူရကြောင်း၊ ပျိုးထောင်ပြီး ပျိုးသက်(၆)ပတ်ခန့်ရှိသော ပျိုးပင်များကို စိုက်ဘောင်များသို့ ပြောင်းရွေ့စိုက်ပျိုးရ ကြောင်း၊ ပျိုးပင်များကို မေလဆန်းတွင် စတင်စိုက်ပျိုးပါက ဇွန် ၊ ဇူလိုင်များတွင် ပန်းပင်များကို စတင်နှုတ်ယူရောင်းချနိုင်ပြီဖြစ်ပြီး အပင်အရေအတွက်၊ အရွယ်အစား ၊အရောင်ကိုလိုက်၍ ဈေးများ ကွာခြားချက်ရှိကြောင်း၊ မေမြို့ပန်းအရိုင်းစည်းတစ်စည်းလျှင်(၃၀၀၀/-)ကျပ်၊ (၁၀)ပင် တစ်စည်း လျှင် (၁၀၀၀/-)ကျပ်နှုန်းဖြင့် ဈေးများအတွင်းရောင်းချလျှက်ရှိကြောင်း၊ တစ်ဧကကုန်ကျစရိတ် အနေဖြင့် မျိုး၊သွင်းအားစု၊ လုပ်သားခအပါအဝင် (၁၀)သိန်းကျပ်ခန့်ကုန်ကျကြောင်း၊ အကျိုးအမြတ် အနေဖြင့် (၈)သိန်းကျပ်ခန့်အမြတ်ရရှိကြောင်း ၊ ပန်းဈေးတည်ငြိမ်မှုရှိသောကြောင့် ပုံမှန်အကျိုး အမြတ်ရရှိကြောင်း၊ မေမြို့ပန်းစိုက်ပျိုးခြင်းဖြင့် စီးပွားဖြစ်ဝင်ငွေတိုးကာ စားဝတ်နေရေး ပြေလည် သောကြောင့် မေမြို့ပန်းများ စိုက်ပျိုးသင့်ပါကြောင်း ရေးသားတင်ပြအပ်ပါ သည်။

DOCA (မန္တလေး)

          ကျောက်ဆည်မြို့နယ် ၊ ထားဝယ်ကျေးရွာတွင် နေ့စဉ်ဝင်ငွေရရှိပြီး မိသားစုစားဝတ်နေရေး အဆင်ပြေရန်အတွက် ဂန္ဓာမာပန်းမျိုးစုံကို နှစ်ပတ်လည် စိုက်ပျိုးရောင်းချသည့် မိသားစုများ ရှိကြောင်း၊ စိုက်ပျိုးထားသော ဂန္ဓာမာပန်းခင်းများ အောင်မြင်ဖြစ်ထွန်းလျက်ရှိပြီး နေ့စဉ်ခူးဆွတ် ရောင်းချရသဖြင့် မိသားစုစားဝတ်နေရေး အဆင်ပြေလျက်ရှိကြောင်း၊ ပန်းမျိုးအနေဖြင့် ရွှေစိမ်းအနီ၊ ခိုင်ချူး၊ စပယ်အဖြူ၊ စပယ်အဝါ၊ ကျောက်စိမ်း၊ရွှေဝါဝင်းစသည့် ပန်းမျိုးကွဲများစွာရှိကြောင်း၊ ပန်းပျိုး ပင်များကို ပြင်ဦးလွင်မြို့အနီးစခန်းကျေးရွာများမှ တစ်ပင်လျှင်(၂၅-၃၀)ကျပ်အထိ ပန်းအမျိုးအစား အလိုက် ဝယ်ယူစိုက်ပျိုးကြကြောင်း ၊ တစ်ဧက စိုက်ပျိုးမည်ဆိုပါက ပန်းပျိုးပင်ရေ(၆)သောင်းခန့် စိုက်ပျိုးနိုင်ကြောင်း ၊ စတင်စိုက်ပျိုးပြီး (၄)လခန့်အကြာတွင် စတင်ခူးဆွတ်ရောင်းချရကြောင်း ၊ ရောင်းချရာတွင် ပန်းခိုင်(၁၀)ခိုင်ခန့် ပါဝင်သောပန်းတစ်စည်းလျှင် ပန်းလှပမှုနှင့် ပန်းအမျိုးအစား ပေါ်မူတည်၍ လက်လီဈေးနှုန်းအနေဖြင့် (၃၀၀၀)ကျပ်နှုန်းခန့် ရောင်းချရကြောင်း၊ ပန်းစတင် ခူးဆွတ်ချိန်မှ အပြီးရိတ်သိမ်းချိန်အထိ ပန်းအစည်းပေါင်း (၂၅၀၀)ခန့် ထွက်ရှိပြီး၊ လက်ကားဈေး တစ်စည်းကို (၁၉၀၀/-)ကျပ်ဖြင့် ရောင်းချရသောကြောင့် တစ်ဧကကုန်ကျစရိတ်အနေဖြင့် မျိုး၊ သွင်းအားစု၊လုပ်သားခအပါအဝင် (၂၅)သိန်းခန့် ကုန်ကျပြီး အကျိုးအမြတ်အနေဖြင့် (၂၀)သိန်းကျော် ကျပ်ခန့်အမြတ်ရရှိကြောင်း၊ ဂန္ဓာမာပန်းများကို နှစ်ပတ်လည်စိုက်ပျိုး ရောင်းချ သူများ အနေဖြင့် နေ့စဉ်ဝင်ငွေရရှိပြီး အဆင်ပြေလျှက်ရှိကြောင်း သိရှိရပါသည်။

DOCA (မန္တလေး)