၁၂.၃.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
၂၀၂၄ ခုနှစ်၊ ပွင့်လင်းရာသီ မတ်လတွင် ကရင်ပြည်နယ်၊ ဘားအံမြို့ဒေသထွက် သခွားမွေးသီးများ ဈေးကောင်းရလျက်ရှိနေကြောင်း သတင်းရရှိသည်။ သခွားမွေးသီးကို ဘားအံမြို့အနီး တဝိုက်ကျေးရွာများတွင် တနိုင်တပိုင်စိုက်ပျိုးကြသည့်အပြင် စီးပွားဖြစ်လည်း စိုက်ပျိုးကြပါသည်။ သခွားမွေးသီးများ ရောင်းချဝယ်ယူရာတွင် အရွယ်အစားလိုက်ပြီး ဈေးနှုန်းကွာဟမှုရှိပါသည်။ သခွားမွေးသီး အလုံးကြီးတစ်လုံးလျှင် (၃၀၀၀၊၅၀၀၀) ကျပ်၊ သခွားမွေးသီး အလုံးလတ်တစ်လုံးလျှင် (၂၀၀၀၊ ၃၅၀၀) ကျပ်၊ သခွားမွေးသီး အလုံးသေးတစ်လုံးလျှင် (၁၀၀၀) ကျပ် တို့ဖြစ်ကြောင်းနှင့် သခွားမွေးသီး စိုက်တောင်သူများအနေဖြင့် ယခုနှစ်တွင် သခွားမွေးသီး ဈေးကောင်းရ၍ တွက်ချေကိုက်လျက်ရှိကြောင်း သတင်းရရှိပါသည်။
DOCA(ကရင်)
ကျွန်တော်တို့မြန်မာနိုင်ငံတွင် နွေး၊မိုး၊ဆောင်းဟူ၍ ဥတုသုံးပါးရှိပြီး ယခုအခါ ဆောင်းအကုန် နွေဦးပေါက်ချိန် ဖေဖော်ဝါရီနှင့်မတ်လများတွင် လက်ပံပွင့်များ ဖြိုင်ဖြိုင်ပွင့်ကြပါသည်။ လက်ပံပွင့် ချိန်နှင့်ပေါက်ပန်းတို့ပွင့်သောရာသီဖြစ်သောကြောင့် အညာဒေသတွင် ပန်းချီကားတစ်ချပ်ရေးဆွဲထားသကဲ့သို့ နီနီဆွေးဆွေးလက်ပန်ပွင့်နှင့်ပေါက်ပွင့်များကိုတွေ့ရှိနိုင်ပါသည်။ အညာဒေသ အမှတ်အသားဖြစ်သည့် လက်ပံပွင်လျှင်နွေရောက်ပြီဟုသိရှိရပါသည်။ထိုအချိန်အခါမျိုးတွင် ဆက်ရက်ငှက် များအပါအဝင် ကျေးငှက်အပေါင်းတို့သည် အအုပ်အသင်းဖွဲ့ကာ ပန်းဝတ်ရည်၊ဝတ်ဆံတို့ကိုလည်းကောင်း၊ ပန်းပွင့်အတွင်းရှိပိုးမွှားများကိုလည်းကောင်း၊ ဆူဆူညံညံအလုအယက်စားသောက်လေ့ရှိရာ လက်ပံပင်ဆက်ရက်ကျသလိုဟု ဆိုလေ့ဆိုထရှိကြပါသည် ။ ယခုအခါ လက်ပံပွင့်တို့ကြွေနေပြီဖြစ် သောကြောင့်လက်ပံပွင့်များကောက်ယူ၍ နေလှမ်းကာ မြေအိုးများတွင် ထည့်သွင်းသိမ်းဆည်းပြီး စားသုံးကြပါသည်။လက်ပံပွင့်ချိန်ရောက်ရှိနေသောကြောင့် လက်ပံပွင့်နှင့်ဗူးသီးရော၍ လက်ပံပွင့် အချဉ်ရည်ဟင်းများ ချက်ပြုတ်စားသောက်လေ့ရှိကြပါသည်။ လက်ပံပွင့်ကို ခရမ်းချဉ်သီး ၊ကြက်သွန်နီ၊ ငရုတ်သီးစိမ်းလေးများဖြင့် အစပ်ချက်၊ဆီပြန်ချက်အဖြစ်လည်း စားသုံးကြပါသည် ။ လက်ပံပွင့်တွင် ပရိုတင်းဓါတ်၊ရေဓါတ်၊အမျှင်ဓါတ်နှင့် ဗီတာမင်အေနှင့် စီဓါတ်တို့ပါဝင်သောကြောင့် လက်ပံပွင့်ကို ချက်ပြုတ်စားသုံးပေးပါက လိပ်ခေါင်းရောဂါ ၊ ဝမ်းပျက်ဝမ်းလျော ရောဂါများသက်သာစေပြီး အပူလောင်နာ၊ အဖုအကျိတ်များကိုလည်း ပျောက်ကင်းသက်သာစေပါကြောင်း ၊ တစ်နှစ်တစ်ခါပေါ်သော ဆေးဘက်ဝင်လက်ပံပွင့်အခြောက်များကို မိမိတို့စားသုံးချင်သလို ချက်ပြုတ်စားသုံးသင့်ပါကြောင်း ရေးသားတင်ပြအပ်ပါသည်။
DOCA(မန္တလေး)
မန္တလေးတိုင်းဒေသကြီး ၊ ကျောက်ဆည်ခရိုင်အတွင်းတွင် သီးနှံမျိုးစုံစိုက်ပျိုးလျက်ရှိရာ ဖူးစားပြောင်းများကိုလည်း တောင်သူများဝင်ငွေတိုးရန်အတွက် စီးပွားဖြစ်စိုက်ပျိုးကြပါသည်။စိုက်ပျိုးမှုအနေဖြင့် ၂၀၂၃-၂၀၂၄ဘဏ္ဍာနှစ်တွင် ကျောက်ဆည်မြို့နယ်တွင်(၂၀၃၃)ဧက၊ စဉ့်ကိုင်မြို့နယ်တွင် (၃၇၄)ဧက၊မြစ်သားမြို့နယ်တွင်(၂၈၄၆)ဧက၊စုစုပေါင်း(၅၂၅၃)ဧက စိုက်ပျိုးနိုင်ခဲ့ပြီး ယခုအချိန်တွင် စဉ့်ကိုင်မြို့နယ်၌(၃၇၄)ဧက ရိတ်သိမ်းပြီးဖြစ်ကြောင်း လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏စာရင်းများအရ သိရှိရပါသည်။ ဖူးစားပြောင်းစိုက်ပျိုးမှု (၁)ဧက ကုန်ကျစရိတ်အနေဖြင့် မျိုး ၊ သွင်းအားစု၊လုပ်သားခအပါအဝင် စုစုပေါင်း(၂၆၀၀၀၀/-)ကျပ်ခန့်ကုန်ကျကြောင်း၊အများဆုံးစိုက်ပျိုးသောမျိုးမှာ သကြားပြောင်း၊ထောပတ်ပြောင်းများကို စိုက်ပျိုးကြပါသည်။(၁)ဧက အထွက်နှုန်း အနေ ဖြင့်(၄၀၀၀)ဖူးခန့်ထွက်ရှိကြောင်း၊ သကြားပြောင်းမှာ လူကြိုက်များသောကြောင့် အရောင်းသွက်ပြီး စျေးကောင်းရကြောင်း၊ သကြားပြောင်းဖူးစျေးနှုန်းမှာ အရွယ်အစားပေါ်မူတည်၍ စျေးနှုန်းကွာခြား ကြောင်း၊ ယခင်နှစ်ပြောင်းဖူးပေါ်ချိန်တွင် သကြားပြောင်းအလတ်(၄)ဖူးလျှင်(၁၀၀၀/-)ကျပ်နှင့် (၃)ဖူးလျှင်(၁၀၀၀/-)ကျပ်ရောင်းရကြောင်း ၊ ပြုတ်ပြီးပြောင်းဖူး(၁)ဖူးလျှင်(၅၀၀/-)ကျပ်စျေးနှုန်း များဖြင့် လည်းကောင်း၊ ဖောက်သည်စျေးအနေဖြင့် အခင်းထဲအရောက် ဝယ်ယူရာတွင် (၁)ဖူးလျှင် (၁၅၀/-)ကျပ် ဖြင့်ရောင်းချခဲ့ရပြီး ယခုနှစ်ပြောင်းဖူးပေါ်ချိန်တွင် ဖောက်သည်စျေးအနေဖြင့်(၂၅၀-၃၀၀)ကျပ်အထိ ရောင်းချရပြီး ပြောင်းဖူးပြုတ် (၁)ဖူးလျှင်(၇၀၀-၈၀၀)ကျပ်အထိ ရောင်းချရသည့်အတွက် ယခင်နှစ် ထက်စျေးနှုန်းပိုမို ကောင်းမွန်သဖြင့် တောင်သူများ အကျိုးအမြတ်ပိုမိုဖြစ်ထွန်းကြောင်း သကြားပြောင်း စိုက်ပျိုးသူတောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)
မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကိုအခြေခံ၍ နွေ၊မိုး၊ဆောင်း ဥတုသုံးပါးနှင့်အညီ ရာသီအလိုက်သီးနှံမျိုးစုံ စိုက်ပျိုးသည့်ဒေသဖြစ်သည့်အလျှောက် တောင်သူများအနေဖြင့် ငရုတ်သီးနှံကိုလည်း အားထားစိုက်ပျိုးလာသည်ကို တွေ့ရှိရပါသည်။၂၀၂၃-၂၀၂၄ ဘဏ္ဍာနှစ်တွင် ကျောက်ဆည်မြို့နယ်တွင်(၂၁၀၈)ဧက ၊ စဉ့်ကိုင်မြို့နယ်တွင် (၇၁၃)ဧက ၊ မြစ်သား မြို့နယ်တွင် (၂၉၈၉)ဧက၊ စုစုပေါင်း(၅၈၁၀)ဧကစိုက်ပျိုးပြီးစီးကြောင်း လယ်ယာမြေစီမံခန့်ခွဲရေး နှင့်စာရင်းအင်း ဦးစီးဌာန၏စာရင်းများအရ သိရှိရပါသည်။ ငရုတ်မျိုးများအနေဖြင့် သာမို ၊ ဒီမွန် ၊ အက်စတာ ၊ ၆၉၂ ၊ ကျားခေါင်းနှင့် တိုးတိုးအောင် ငရုတ်မျိုးများကိုစိုက်ပျိုးကြပြီး ၄င်းမျိုးများအနက် တိုးတိုးအောင်ငရုတ် မျိုးများအား နိုဝင်ဘာလနှင့် ဒီဇင်ဘာလများတွင် စိုက်ပျိုးကြပြီး ယခုအချိန်တွင် အသီးအပွင့်များ ဝေဝေဆာဆာဖြင့် အပင်များ အောင်မြင်ဖြစ်ထွန်းလျက်ရှိပါသည်။ စိုက်ပျိုးရာတွင်(၁)ဧကလျှင် မျိုးစေ့ (၁၀)ထုတ်စိုက်ပျိုးရကြောင်း ၊ မျိုးစေ့တစ်ထုတ်လျှင်(၃၅၀၀၀/-)ကျပ်စျေးနှုန်းရှိကြောင်း ၊ (၁)ဧက ကုန်ကျစရိတ်အနေဖြင့် မြေပြင်စရိတ်၊ သွင်းအားစု၊ လုပ်သားခ၊စုစုပေါင်း (၈၀)သိန်းခန့်ကုန်ကျကြောင်း ၊ ယခင်နှစ်တွင် တိုးတိုးအောင်ငရုတ် အထွက်နှုန်းအနေဖြင့် (၁)ဧကလျှင် ပိဿာ(၈၀၀၀-၁၀၀၀၀)အထိထွက်ရှိပြီး ငရုတ်စျေးနှုန်းအနေဖြင့် ငရုတ်အစို(အစိမ်း) (၁)ပိဿာလျှင်(၈၅၀၀/-)ကျပ်၊ ငရုတ်အစို (အမှည့်)(၁) ပိဿာလျှင်(၆၀၀၀/-)ကျပ်စျေးနှုန်းများရှိခဲ့ပြီး ယခုအချိန်တွင် တိုးတိုးအောင် ငရုတ်များ ထွက်ပေါ်သေးခြင်းမရှိသေးဘဲ ငရုတ်သီးပေါ်ချိန်တွင် အထွက်နှုန်းနှင့် စျေးနှုန်းများ ကောင်းမွန်ပါကအကျိုးအမြတ်များ ရရှိနိုင်မည်ဖြစ်ကြောင်း တိုးတိုးအောင်ငရုတ် စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)
မန္တလေးတိုင်းဒေသကြီး ၊ ကျောက်ဆည်ခရိုင်တွင် သီးနှံမျိုးစုံစိုက်ပျိုးလျက်ရှိရာ စားဖိုဆောင် သီးနှံတစ်မျိုးဖြစ်သည့် ကြက်သွန်ဖြူသီးနှံကိုလည်း စိုက်ပျိုးလျက်ရှိပါသည် ။ ခရိုင်အတွင်းတွင် ကြက်သွန်ဖြူ စိုက်ဧက(၁၈၆)ဧက စိုက်ပျိုးထားရှိပြီး ယခု မတ်လဆန်းမှစတင်၍ ရိတ်သိမ်းလျက်ရှိပါသည်။ကြက်သွန်ဖြူစိုက်ပျိုးမှု (၁)ဧက ကုန်ကျစရိတ်အနေဖြင့်မျိုး၊ သွင်းအားစု၊ လုပ်သားခအပါအဝင် စုစုပေါင်း(၁၂၃၀၀၀၀/-)ကျပ်ခန့်ကုန်ကျကြောင်း ၊ မျိုးအနေဖြင့် ဗမာ ကြက်သွန်ဖြူ မျိုးများကိုသာ အများဆုံးစိုက်ပျိုးကြပါသည်။(၁)ဧက ကြက်သွန်ဖြူစိုက်ပျိုးရာတွင် မျိုးအနေဖြင့် ပိဿာ(၆၀)ခန့် ကုန်ကျကြောင်း၊ ဝယ်ယူပြီး စိုက်ပျိုးမည်ဆိုပါက ကုန်ကျစရိတ် ပိုမိုကုန်ကြမည်ဖြစ်ကြောင်း၊တောင်သူ အများစုမှာ မိမိလယ်တောအတွက် စိုက်ပျိုးရန်မျိုးကို အမြဲချန်ထားရကြောင်း၊ အထွက်နှုန်းအနေဖြင့် (၁၅၀၀)ပိဿာခန့် ထွက်ရှိကြောင်း၊ စျေးနှုန်း အနေဖြင့် ယခုနှစ် ကြက်သွန်ဖြူထွက်ပေါ်ချိန်တွင် အကြီး (၁၅၀၀၀/-)ကျပ်၊ အလတ်(၈၀၀၀/-)ကျပ်၊ အသေး(၆၀၀၀/-)ကျပ်စျေးနှုန်းများဖြင့် ရောင်းဝယ်လျက်ရှိပါသည်။ ယခင်နှစ်တွင် ဗမာကြက်သွန်ဖြူပေါ်ချိန်တွင်(၁)ပိဿာလျှင်(၈၀၀၀/-)ကျပ်၊ ရှမ်းကြက်သွန်ဖြူ (၁)ပိဿာလျှင် (၇၀၀၀/-) ကျပ်ဖြင့်ရောင်းဝယ်ခဲ့ပြီး ယခုနှစ်ပေါ်ချိန်တွင် ဗမာကြက်သွန်ဖြူ(၁)ပိဿာလျှင် (၁၈၅၀၀/-)၊ ရှမ်းကြက်သွန်ဖြူ(၁)ပိဿာလျှင်(၁၄၅၀၀/-)ကျပ်ဖြင့် ရောင်းဝယ်လျက်ရှိကြောင်း၊ အိမ်ရှင်မများအနေဖြင့် ကြက်သွန်ဖြူကို ရွေးချယ်အသုံးပြုရာတွင် အခွံပါး၍ ပိုမိုမွှေးသောကြောင့် ဗမာကြက်သွန်ဖြူကို အသုံးများပါသည်။ ကြက်သွန်ဖြူသည် အိမ်ရှင်မများ ကြော်လှော်ချက်ပြုတ်ရာတွင် မပါမဖြစ်သောသီးနှံတစ်မျိုးဖြစ်ပြီး တောင်သူများအတွက်လည်း ယခင်နှစ်ထက် စျေးနှုန်း ကောင်းမွန်သောကြောင့် အကျိုးအမြတ်များပိုမိုရရှိကြောင်း ကြက်သွန်ဖြူစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)
မန္တလေးတိုင်းဒေသကြီး ၊ ကျောက်ဆည်ခရိုင်သည် အညာမြေဒေသဖြစ်သည်နှင့်အညီ အညာဒေသထွက် နွေဦးရာသီတွင် ထွက်ပေါ်လေ့ရှိသော ညောင်ရွက်၊ဂွေးတောက်ရွက်၊သရက်ကင်းနှင့်ထနောင်း ရွက်နုများထွက်ပေါ်သောအချိန်ဖြစ်ပါသည်။ ရာသီစာဖြစ်သည့်အတွက် ပေါ်ဦးပေါ်စ ထနောင်းရွက် နုနုကလေးများကို ပြုတ်၍ ရောင်းချလျက်ရှိပါသည်။ အညာဒေသဖြစ်သည့်အတွက် ထနောင်းရွက် တစ်ပုံလျှင်(၅၀၀)ကျပ်ဖြင့် ရောင်းချပါသည်။ ထနောင်းရွက် တစ်ပုံလျှင်(၅၀၀)ကျပ်ဖိုးရရန်အတွက် ခူးရသည်မှာ မလွယ်ကူလှပေ။ထနောင်းပင်သည် ဆူးပါသည့်အတွက် လက်များထိခိုက်နိုင်ပါသည်။ ထနောင်းရွက်နုနုကလေးများကိုခူး၍ ရေနွေးဖျောရပြီး ရေနွေးဖျောပြီးသော အရွက်နုကလေးများကို အနေတော်အပုံလေးများပုံ၍ ရွာထဲ ၊ ရပ်ထဲ နှင့် စျေးများတွင် တစ်ပုံလျှင်(၅၀၀)ကျပ်ဖြင့် ရောင်းချလျက်ရှိပါသည်။အရွက်ခူးရန်မလွယ်ကူသောကြောင့် အရွက်ခူး၍ရောင်းချသူအလွန်နည်းပါးပါသည်။ ပေါ်ဦးပေါ်စ ထနောင်းရွက်များကို အသုပ်သုပ်၍ စားသုံးကြသလို အတို့အမြုပ်အဖြစ်လည်း စားသုံးကြပါသည်။ ထနောင်းရွက်စားသုံးခြင်းဖြင့် လူကိုအကျိုးပြုစေပါသည် ။ ထနောင်းရွက်သည် တစ်သျူးရောင်ရမ်းခြင်းကို သက်သာစေ၍ သွေးတွင်းသကြားဓါတ်များ လျော့နည်းစေပြီး အစာအိမ်အူလမ်းကြောင်းကို ရှင်းပေးပါသည် ။ ထနောင်းခေါက်ကိုပြုတ်၍ ရလာသောပြုတ်ရည်ကို တစ်နေ့(၃)ကြိမ်ငုံပေးပါက သွားဖုံးအတွင်း သွေးယိုစီးခြင်းကိုကာကွယ်ပေးကြောင်း လေ့လာသိရှိရပါသည်။အစာလည်းဆေး၊ဆေးလည်းအစားဆိုသည့်အတိုင်းဆေးဘက်ဝင် ထနောင်းရွက်ကို ရာသီပေါ် ချိန်တွင်ဝယ်ယူ၍ သုပ်စားသင့်ပါကြောင်း ရေးသားတင်ပြအပ်ပါသည်။
DOCA(မန္တလေး)
မန္တလေးတိုင်းဒေသကြီး ၊ ကျောက်ဆည်ခရိုင်အတွင်းတွင် သီးနှံမျိုးစုံ စိုက်ပျိုးလျှက်ရှိရာ ကျေးလက်နေတောင်သူများသည် မိသားစုအပိုဝင်ငွေ ရရှိရေးအတွက် ဆောင်းသီးနှံဖြစ်သော ပဲချဉ်ပေါင်ကို မိုးစပါးများရိတ်သိမ်းခါနီးချိန်တွင် လယ်မြေများ၌ စတင်စိုက်ပျိုးကြပါသည်။ စိုက်ပျိုးရာတွင်ပတ်ကြဲစနစ်ဖြင့် စိုက်ပျိုးကြပြီး မျိုးအနေဖြင့် (၁)ဧကလျှင်(၁)တင်းခန့် ကုန်ကျကြောင်း ၊ မျိုးစျေးနှုန်းအနေဖြင့် တစ်တင်းလျှင်(၅၆၀၀၀/-)ကျပ်စျေးနှုန်းပေးရကြောင်း၊ နိုဝင်ဘာလတွင် စတင်စိုက်ပျိုးခဲ့ပြီး ယခုအချိန်တွင် ရိတ်သိမ်းနေပြီ ဖြစ်ကြောင်း၊ ယခင်နှစ်တွင် (၁)ဧက အထွက်နှုန်းအနေဖြင့် ပဲချဉ်ပေါင်စေ့ (၈)တင်းခန့် ထွက်ရှိခဲ့ပြီး ယခုနှစ်တွင် ပဲချဉ်ပေါင်စေ့(၈-၉)တင်း ဝန်းကျင်ခန့်ထွက်ရှိကြောင်း၊ယခင်နှစ်တွင် ပဲချဉ်ပေါင်စျေးနှုန်းအနေဖြင့် ပဲချဉ်ပေါင်စေ့တစ်တင်းလျှင်(၄၅၀၀၀-၅၀၀၀၀) ကျပ်စျေးနှုန်းများရှိခဲ့ပြီး ယခုလက်ရှိ ပေါက်စျေးအနေဖြင့် ပဲချဉ်ပေါင်စေ့ တစ်တင်းလျှင် (၄၂၀၀၀- ၄၅၀၀၀)ကျပ်စျေးနှုန်းများဖြင့်သာ အရောင်းအဝယ်ဖြစ်နေကြောင်း ၊ ပဲချဉ်ပေါင်စေ့ကို ကြိတ်ခွဲပြီး ရရှိလာသော ပဲချဉ်ပေါင်ဆံကို ချက်ပြုတ်၍သော်လည်းကောင်း ၊ ကြော်၍သော်လည်းကောင်း စားသုံးကြပါသည် ။ စျေးကွက် အတွင်း၌ ပဲချဉ်ပေါင်ဆံ တစ်ပြည်လျှင်(၄၀၀၀/-)ကျပ် စျေးနှုန်းများ ဖြင့် အရောင်းအဝယ်ဖြစ်နေပြီး တစ်ဧကကုန်ကျစရိတ်အနေဖြင့် မျိုး၊ သွင်းအားစု ၊ ရိတ်သိမ်း ၊ ချွေလှေ့ ၊ အလုပ်သမားခအပါအဝင် စုစုပေါင်း(၁၀၀၀၀၀/-)ကျပ်ဝန်းကျင် ကုန်ကျကြောင်း ၊ (၁)ဧကအကျိုးအမြတ်အနေဖြင့်(၂၃၆၀၀၀/-)ကျပ်ဝန်းကျင်ရရှိခဲ့ကြောင်း ၊ ပဲချဉ်ပေါင် စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)
၁၁.၃.၂၀၂၄ ရက်နေ့တွင် တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။
၁၁.၃.၂၀၂၄ ရက်နေ့တွင် တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။
