ပြည်တွင်းကုန်သွယ်မှုသတင်း

  မန္တလေးအစေ့ထုတ်ပြောင်းစျေးကွက်သို့    ရှမ်းပြည်နယ်မှ အများအပြား ဝင်ရောက်လျက် ရှိပြီး၊မန္တလေးတိုင်းဒေသကြီးနှင့် စစ်ကိုင်းတိုင်းဒေသကြီးတို့မှလည်းဝင်ရောက်လျက်ရှိကြောင်း သိ ရပါတယ်။ မန္တလေးတိုင်းဒေသကြီးအတွင်း ၂၀၂၄ - ၂၀၂၅ ခုနှစ်တွင် အစေ့ ထုတ်ပြောင်းစိုက်ပျိုးမှု  ၃၆၆၂၂ ဧက၊  ရိတ်သိမ်းမှု ၁၃၃၃၁ ဧက၊ အထွက်နှုန်း   ၄၉.၅၅   တင်း၊ အထွက်တင်း    စုစုပေါင်း ၆၆၀၅၉၁ တင်းဖြစ်ကြောင်းသိရပါတယ်။မန္တလေးပွဲစား၊ကုန်သည်စက်ပိုင်များ မဟာကထိန်တော် အသင်းတွင် ၂၀၂၅ ခုနှစ်မတ်လပထမပတ်အတွင်းဖြစ်ပေါ်သည့်အစေ့ ထုတ်ပြောင်းစျေးမှာ ၃တင်း ဝင်တစ်အိတ်လျင်ပြောင်းဖူးစေ့(ဗမာ)၈၃၀၀၀ကျပ်၊ပြောင်းဖူးစေ့(ရှမ်း)  ၈၄၀၀၀ ကျပ်နှင့် ၈၅၅၀၀ ကျပ်၊ပြောင်းဖူးစေ့(စီပီ) ၈၄၀၀၀ ကျပ်နှင့် ၈၅၀၀၀ ကျပ်၊ အထွက်တိုးပြောင်းနီ  ၇၆၀၀၀ ကျပ်နှင့် ၇၇၀၀၀ကျပ်၊  အထွက်တိုးပြောင်း(ဖြူ)  ၈၂၀၀၀ကျပ်နှင့် ၈၃၀၀၀ကျပ်၊ တစ်ပိဿာစျေးအနေဖြင့် ပြောင်းဖူးစေ့(ဗမာ) ၁၅၃၇ကျပ်၊ပြောင်းဖူးစေ့ (ရှမ်း)၁၅၅၆ကျပ်နှင့် ၁၅၈၃ကျပ်၊ ပြောင်းဖူးစေ့(စီပီ) ၁၅၅၆ကျပ်နှင့် ၁၅၇၄ကျပ်၊အထွက်တိုးပြောင်းနီ ၁၄၅၃ ကျပ်၊အထွက်တိုးပြောင်းဖြူ ၁၅၄၇ ကျပ် နှင့် ၁၅၆၆ကျပ်စျေးတို့ဖြစ်ကြောင်း  သိရပါတယ်။   ယခင်နှစ်ကာလတူ စျေးမှာ   တစ်ပိဿာလျှင် ပြောင်းဖူးစေ့(ဗမာ) ၉၄၄ ကျပ်၊ပြောင်းဖူးစေ့(ရှမ်း) ၉၄၄ ကျပ်နှင့် ၉၅၄ ကျပ်၊   ပြောင်းဖူးစေ့(စီပီ) ၉၅၄ ကျပ်နှင့် ၉၆၃ကျပ်တို့ဖြစ်ကြောင်းသိရပါတယ်။ ယခုနှစ်စေျးနှင့် ယခင်နှစ်စျေးနှိုင်းယှဉ်ပါက  တစ်ပိဿာလျှင် ၆၀၀ကျပ်နှင့်အထက် စျေးပိုမိုရရှိကြောင်းသိရပါတယ်။ပြောင်းသီးနှံမှာမွေးမြူရေး အစားစပ်လုပ်ငန်းတွင် သုံးစွဲမှုများပြားခြင်း၊ ပြည်ပတင်ပို့ ခြင်းတို့ကြောင့် မန္တလေးစျေးကွက်တွင် အရောင်းသွက်သည့် ကုန်စည်ဖြစ်ကြောင်း သိရပါတယ်။  ၂၀၂၅ခုနှစ် ဖေဖော်ဝါရီလအတွင်း  ရှမ်း ပြည်နယ်မှ အစေ့ထုတ်ပြောင်းဝင်ရောက်မှုမှာ ( ၂၂ဘီး/ ၁၂ဘီး/ ၆ဘီး)  ၂၁၆၃ စီး၊ပြောင်း  ၄၅၁၀၅ တန်ဖြစ်ကြောင်း (၁၆)မိုင်၊ထုံးဘိုဂိတ်ဖြတ်စာရင်းများအရ  သိရပါတယ်။

DOCA(မန္တလေး)

    မန္တလေးစျေးကွက်သို့ ရှမ်းပြည်နယ်ထွက်ပဲပုပ်သီးနှံများ မတ်လပထမပတ်အတွင်း ဝင် ရောက်မှုများပြားပြီး၊စစ်ကိုင်းတိုင်းဒေသကြီးနှင့်ကချင်ပြည်နယ်မှ လည်းဝင်ရောက်ကြောင်း  သိရ ပါတယ်။ ပဲမျိုးစုံအနက်ပဲပုပ်မှာ ပြည်တွင်း စားသုံးမှုများ ပြားခြင်း နှင့်ပြည်ပတင်ပို့ရောင်းချသည့် စျေးကွက်ဝင်ပဲအမျိုးအစားဖြစ်ပါတယ်။ မန္တလေးတိုင်းဒေသကြီးအနေဖြင့် ပဲသီးနှံမျိုးစုံစိုက်ပျိုးမှု များပြားသည့်တိုင်းတစ်ခုဖြစ်ပြီး၊ ၂၀၂၄-၂၀၂၅ ခုနှစ်တွင် ပဲပုပ်သီးနှံ အပါအဝင် ပဲမျိုးစုံစိုက်ပျိုးမှု (၁၀၁၉၄၇၇)ဧကဖြစ်ကြောင်းသိရပါတယ်။ မန္တလေးပွဲစား၊ ကုန်သည်၊ စက်ပိုင်များ မဟာကထိန် တော်အသင်းတွင် ၂၀၂၅ ခုနှစ် မတ်လပထမပတ်အတွင်း ပေါက်စျေးမှာ ၃တင်းဝင်တစ်အိတ် လျှင် ပဲပုပ်(ကာဘိုး)၃၁၀၀၀၀ကျပ်၊ပဲပုပ်(ဗမာ) ၂၉၀၀၀၀ကျပ်၊ပဲပုပ်(ရှမ်း) ၃၂၀၀၀၀ကျပ်နှင့် ၃၃၀၀၀၀ ကျပ်၊ တစ်ပိဿာပေါက်စျေးမှာ ပဲပုပ်(ကာဘိုး) ၅၈၂၂ကျပ်၊ ပဲပုပ်(ဗမာ) ၅၄၄၆ ကျပ်၊ ပဲပုပ်(ရှမ်း) ၆၀၀၉ကျပ်နှင့် ၆၁၉၇ ကျပ်တို့ဖြစ်ကြောင်း သိရပါတယ်။ ယခင်နှစ်ကာလတူ ပေါက်စျေးမှာ ၃တင်း ဝင်တစ်အိတ်လျှင်ပဲပုပ်(ဗမာ)၁၅၈၀၀၀ကျပ်နှင့် ၁၆၀၀၀၀ကျပ်၊ပဲပုပ်(ရှမ်း) ၁၆၀၀၀၀ ကျပ် နှင့် ၁၆၅၀၀၀ကျပ်၊ တစ်ပိဿာပေါက်စျေးမှာ ပဲပုပ်(ဗမာ) ၂၉၆၇ကျပ်နှင့် ၃၀၀၅ကျပ်၊ပဲပုပ် (ရှမ်း) ၃၀၀၅ ကျပ်နှင့်၃၀၉၉ ကျပ်တို့ဖြစ်ပြီးယခုနှစ်နှင့်ယခင်နှစ်ပေါက်စျေး နှိုင်းယှဉ်ပါက တစ်ပိဿာ လျှင် ပဲပုတ်(ဗမာ)၂၄၄၁ကျပ်နှင့်ပဲပုတ်(ရှမ်း)၃၀၉၈ကျပ်စျေးပိုမိုရရှိကြောင်း သိရပါတယ်။ ပဲပုပ်ဝင် ရောက်မှုပမာဏပေါ်မူတည်၍ ရက်အလိုက်ပေါက်စျေးအနည်းငယ်ပြောင်းလဲမှုရှိပြီး၊ ယခုနှစ် ပဲပုပ် မှာစျေးကောင်းရသည့်သီးနှံတစ်မျိုးဖြစ်ကြောင်း သိရပါတယ်။

DOCA(မန္တလေး)

  ပြည်တွင်းစားဆီကြိတ်ခွဲမှုကဏ္ဍအတွက် အရေးပါသည့်ဆီထွက်သီးနှံနှမ်းအား မန္တလေး တိုင်းဒေသကြီးအတွင်း ၂၀၂၄-၂၀၂၅ ခုနှစ်တွင် စိုက်ပျိုးမှု ၉၆၂၃၈၃ ဧက၊ရိတ်သိမ်းမှု ၈၈၉၄၂၈ ဧက၊အထွက်နှုန်း ၄.၄၆ တင်းနှင့် အထွက်စုစုပေါင်း ၃၉၆၂၈၆၉ တင်းဖြစ်ကြောင်း သိရပါတယ်။ ဆီထွက်သီးနှံဖြစ်သည့်နှမ်းသီးနှံမှာ ပြည်တွင်းစားသုံးခြင်းနှင့် ပြည်ပသို့တင်ပို့သည့်စျေးကွက်ဝင် သီးနှံဖြစ်ပြီး၊မကွေးတိုင်းဒေသကြီး၊ စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီးတို့မှာ အဓိကစိုက်ပျိုးလျက်ရှိကြောင်းသိရပါတယ်။ ဆီထွက်သီးနှံ မြေပဲ၊ နှမ်းနှင့် နေကြာသီးနှံ များအား  စားသုံးဆီကြိတ်ခွဲ၍ ပြည်တွင်းစားဆီဖူလုံမှုရှိစေရန်နှင့်စားဆီများတင်သွင်းမှု လျော့ချနိုင်ရန် အတွက် နိုင်ငံတော်မှတွန်းအားပေးဆောင်ရွက်လျက်ရှိကြောင်း သိရပါတယ်။ မန္တလေးပွဲစား၊ ကုန်သည်စက်ပိုင်များ မဟာကထိန်တော်အသင်းတွင် ၂၀၂၅ ခုနှစ်မတ်လပထမပတ်အတွင်း နှမ်းအမျိုးအစားအလိုက်ပေါက်စျေးများမှာ ၃တင်းဝင်အိတ် (၄၅ပိဿာပါ) တစ်အိတ်လျှင် နှမ်းဖြူ (ဂျပန်) ၄၀၅၀၀၀ ကျပ်နှင့် ၄၁၀၀၀၀ ကျပ်၊နှမ်းဖြူ(ဗမာ)၃၂၅၀၀ဝိ/- နှင့် ၃၃၀၀၀ဝိ/-၊ နှမ်းညို ၂၉၅၀၀၀ကျပ်နှင့် ၃၀၀၀၀၀ ကျပ်၊ဆောင်းနှမ်း ၅၄၀၀၀ဝိ/- နှင့် ၅၆၀၀၀ဝိ/-၊တစ်ပိဿာစျေးမှာ နှမ်းဖြူ(ဂျပန်) ၉၀၀၀ကျပ်နှင့် ၉၁၁၀ ကျပ်၊နှမ်းဖြူ(ဗမာ )၇၂၂၂ ကျပ်နှင့် ၇၃၃၃ ကျပ်၊နှမ်းညို ၆၅၅၆ကျပ်နှင့် ၆၆၆၇ ကျပ်၊ဆောင်းနှမ်း ၁၂၀၀၀ ကျပ်နှင့် ၁၂၄၄၄ ကျပ်၊နှမ်းဖတ်စျေးမှာ ၄၅၀၀ ကျပ်စျေးတို့ဖြစ်ပေါ်လျက်ရှိကြောင်း သိရပါတယ်။ ယခင်နှစ်ကာလတူပေါက်စျေးမှာ တစ်ပိဿာ လျှင် နှမ်းဖြူ(ဂျပန်)၉၁၁၁ ကျပ်နှင့်၉၂၂၂ကျပ်၊နှမ်းညို ၆၈၈၉ကျပ်၊ ဆောင်းနှမ်း  ၇၆၆၇ ကျပ်နှင့် ၇၇၇၈ ကျပ်တို့ဖြစ်ပေါ်ခဲ့ပြီး၊ ယခုနှစ်စျေးနှင့် ယခင်နှစ်စျေးနှိုင်းယှဉ်ပါက ဆောင်းနှမ်းစျေးမှာ ပိုမို ရရှိကြောင်း သိရပါတယ်။

DOCA(မန္တလေး)

ပြင်ဦးလွင်မြို့သည် မန္တလေးတိုင်းအတွင်းတည်ရှိပြီး အေးမြသည့်ရာသီဥတုကို ပိုင်ဆိုင် ထားသည့် တောင်ပေါ်မြို့လေးတစ်မြို့ဖြစ်ပါသည်။ တောင်ပေါ်မြို့လေးတွင်း နေထိုင်သူအများစု မှာ နှစ်ရှည်သီးနှံနှင့်ရာသီအလိုက်သီးပင်စားပင်နှင့် ပန်းများစိုက်ပျိုး၍ အသက်မွေးဝမ်းကျောင်း ပြုကြပါသည်။

နှစ်ရှည်သီးနှံအနေနှင့်ထောပတ်ပင်သည် စားသောက်ကုန်သီးနှံတစ်မျိုးကို ပြင်ဦးလွင် မြို့တွင် စီးပွားရေးလုပ်ရှင်များနှင့် ဒေသတောင်သူများအနေနှင့် တွင်တွင်ကျယ်ကျယ်စိုက်ပျိုး ကြပါသည်။ ပြင်ဦးလွင်မြို့နယ်အတွင်း ထောပတ်စိုက်ဧက ၃၀၉ ဧကစိုက်ပျိုးပြီး ၂၀၂၄ ခုနှစ်တွင် ခူးစွတ်ဧက ၁၅၀ ဝန်းကျင်ခူးစွတ်နိုင်ကြောင်း ထောပတ်အစုအဖွဲ့များထံမှ သိရှိရပါသည်။

ထောပတ်စိုက်ပျိုးရာ ၁ ဧကအပင် ၁၀၀ ပင်ကြားတန်း ၂၀ ပေ x၂၀ ပေ စိုက်စနစ်ဖြင့် စိုက်ပျိုးကြပါသည်။ ထောပတ်ပင်သည် စတင်စိုက်ပျိုးချိန်မှ ၃ နှစ်ကြာလျှင် ပန်းပြပြီး ၄ နှစ်တွင် အသီးစတင်ခူးစွတ်နိုင်ပါသည်။ ထောပတ်ပင် ၁ ပင်လျှင် အထွက်နှုန်း အလုံးရေ ၇၀ မှ ၈၅ လုံးထိ ထွက်ရှိပြီး သက်တမ်းရင့်လေ အသီးတင်နှုန်းအားကောင်းပြီး အထွက်နှုန်းကောင်းမွန်သည့် ထောပတ်ကို စိုက်ပျိုးမည်ဆိုပါက ပျိုးပင်အမျိုးအစားလိုက် ၁ ပင်လျှင် ၈၀၀၀ ကျပ်မှ ၂၀၀၀၀ ကျပ်ထိ ရှိပါသည်။ ၁ ဧကပျိုးပင် ၈၀၀၀ ကျပ်နှုန်းနှင့်စိုက်ပျိုးပါက ပျိုးပင်ဖိုး ၈ သိန်းကျပ်၊ စိုက်ကျင်းတူး၊ ရေသွယ်၊ ရေတွင်းတူးခြင်းအတွက် ကုန်ကျစရိတ် ၃၅ သိန်းဝန်းကျင်ကုန်ကျနိုင်ပြီး ပျိုးပင်နှင့် ပေါင်းပါက ၁ ဧက ၄၅ သိန်းဝန်းကျင် ကုန်ကျနိုင်ပါသည်။

ထောပတ်ပင်စိုက်ပျိုးသည့်မြေလွတ်နေရာများတွင်လည်း ရာသီသီးနှံများဖြစ်သည့် သီးပင် စားပင်နှင့် ရာသီပန်းမန်များကို စိုက်ပျိုးနိုင်ပါသည်။ ရာသီသီးနှံနှင့် ပန်းများမှာလည်း ဈေးကွက် ရှိသည့်အတွက် အပိုဝင်ငွေရရှိနိုင်ပါသည်။

ဒေသတောင်သူများအနေနှင့် ထောပတ်ပင်ကို ဒေသမျိုးကိုအဓိကထားစိုက်ပျိုးကြပါသည်။ ဒေသမျိုးသည် သီးနှံဈေးကွက်တွင် တစ်လုံးခြင်းရောင်းချပြီး နိုင်ငံခြားမျိုးအနေနှင့် ကီလိုနှင့် ရောင်းချကြပါသည်။ ယခုနှစ်အတွင်း ထောပတ်သီးရာသီတွင် ဒေသမျိုးများစတင်ထွက်ရှိသည့် အချိန်တွင် တစ်လုံးလျှင် ၅၀၀ ကျပ်မှ ၇၀၀ ကျပ်ထိဈေးရရှိပြီး လှိုင်လှိုင်ထွက်ပေါ်သည့်ကာတွင် တစ်လုံး ၃၀၀ ကျပ်မှ ၅၅၀ ကျပ်ထိ ဈေးရရှိကြောင်းသိရှိပါသည်။ ထောပတ်ပင်သည် အခြားသီးနှံပင်များကဲ့သို့ သွင်းအားစုအများအပြားသုံးစရာမလိုဘဲ အပင်အားဆေး၊ အသီးအပွင့် အားဆေးများကို ကျွေးရသည့်အတွက် သွင်းအားစုအနည်းငယ်မျှသာရှိပါသည်။ ထောပတ်သီးသည် စားသုံးသူများကြိုက်နှစ်သက်သည့်သီးနှံတစ်မျိုးဖြစ်ပြီး အခွံနှင့်အစေ့တို့ကိုလည်း အသားအရေ ပြုပြင်ထိန်းသိမ်းခြင်းတို့အတွက်အသုံးပြုကြပါသည်။ ပြင်ဦးလွင်မြို့သို့ လာရောက်လည်ပတ်သူများ အနေနှင့်ထောပတ်သီးရာသီရောက်လျှင် ထောပတ်သီးဖျော်ရည်၊ စတော်ဘယ်ရီရာသီရောက်လျှင် စတော်ဘယ်ရီဖျော်ရည်များကို နှစ်သက်မြတ်နိုးစွာ  သောက်သုံးကြပါသည်။ ရာသီဥတုနှင့်လည်း ကိုက်ညီ၊ မိသားစုတစ်ပိုင်တစ်နိုင်စိုက်ပျိုးနိုင်ပြီး အခြားရာသီသီးနှံများကိုလည်း သီးထပ်သီးညှပ် အဖြစ် စိုက်ပျိုးနိုင်သည့်အတွက် ထောပတ်သည် စိုက်ပျိုးသင့်သည့်သီးနှံဖြစ်ကြောင်း လေ့လာ သိရှိရပါသည်။

DOCA(မန္တလေး)

    ပွင့်လင်းရာသီရောက်ပြီဖြစ်၍   မန္တလေးစျေးကွက်အတွင်း  ဇီးသီးအခြောက်အများအပြား ဝင်ရောက်လျက်ရှိပြီး     အရောင်းသွက်လျက်ရှိကြောင်း   သိရပါတယ်။   မန္တလေးတိုင်းဒေသကြီး အတွင်း အမရပူရ၊ပုသိမ်ကြီး၊ကျောက်ဆည်၊စဉ့်ကိုင်၊မြစ်သားမြို့နယ်တို့တွင် ထိုင်ဝမ်မျိုးကိုင်းကူး ဇီးသီးနှင့် ဒေသမျိုးဇီးပဲလှော်ပင် အများအပြား စိုက်ပျိုးလျက်ရှိပြီး၊       စစ်ကိုင်းတိုင်းဒေသကြီး၊  မကွေးတိုင်းဒေသကြီး  နှင့် ကျန်ဒေသတို့မှလည်း  ဇီးသီးများဝင်ရောက်ကြောင်း    သိရပါတယ်။

မန္တလေးစျေးကွက်အတွင်းသို့  ဇီးသီးအစို/အခြောက်နှစ်မျိုးလုံးဝင်ရောက်လျက်ရှိပြီး၊ ဇီးသီး အစို ဝင်ရောက်မှုလျော့နည်းသွားကာ ဇီးသီးအခြောက်ဝင်ရောက်မှုများပြားကြောင်း    ဇီးသီးခြောက် ရောင်းချသူတစ်ဦး၏ပြောပြချက်အရ သိရပါတယ်။  ၂၀၂၅ ခုနှစ် မတ်လပထမပတ်အတွင်း ဇီးသီး အစို ထိုင်ဝမ်ဇီးသီး(ပုလဲဖြူ) တစ်ပြည်လျှင် ၄၀၀၀  ကျပ်နှင့် ၅၀၀၀ ကျပ်၊ဇီးကြက်ဥ ၁၀လုံးလျှင် ၃၀၀၀ ကျပ်နှင့် ၅၀၀၀ ကျပ်၊ဇီးပဲလှော်တစ်ပြည်လျှင် ၂၀၀၀ ကျပ်နှင့်    ၃၀၀၀ ကျပ်စျေးဖြစ်ပြီး၊ ဇီးသီးအခြောက်ပေါက်စျေးမှာ  အချိုသီးခြောက်(လုံးကြီး)တစ်ပြည်လျှင်  ၂၀၀၀ ကျပ်နှင့်  ၂၅၀၀ ကျပ်၊ အချို(လုံးသေး) ၂၅၀၀ ကျပ်နှင့် ၃၀၀၀ ကျပ်၊ဇီးချဉ်သီးခြောက်တစ်ပြည်လျှင်  ၂၀၀၀ ကျပ် နှင့် ၃၀၀၀ ကျပ်စျေးတို့ဖြင့် အသီးသီးရောင်းချလျက်ရှိကြောင်းသိရပါတယ်။  စျေးကွက်အတွင်း  ဇီးသီးခြောက်မှာ  ဝင်ရောက်မှုများသကဲ့သို့     စားသောက်ကုန်များဖြစ်သည့်  ယိုစုံလုပ်ငန်းနှင့် ဖျော်ရည်လုပ်ငန်းတို့မှ ဝယ်ယူမှုများပြားလျက်ရှိကြောင်း သိရပါတယ်။

DOCA(မန္တလေး)