ပြည်တွင်းကုန်သွယ်မှုသတင်း

       ရွှေတောင်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ တာဝန်ရှိဝန်ထမ်းများသည် (၉-၁၀-၂၀၂၄)ရက်နေ့၊ နေ့လယ်(၁၃:၃၀)နာရီအချိန်တွင် မိုးမြေပဲများထွက်ရှိနေပြီဖြစ်သော ကသစ်တိုင်းကျေးရွာအုပ်စု၊ ကသစ်တိုင်းကျေးရွာရှိ တောင်သူဦးဟန်ဝင်း၏ နုတ်သိမ်းနေပြီဖြစ်သော မိုးမြေပဲ(၅)ဧကစိုက်ခင်းသို့ သွားရောက်လေ့လာခဲ့ပါသည်။

          မြေပဲသည် (၃)လသက်တမ်းရှိသောသီးနှံဖြစ်ပြီး ရွှေတောင်မြို့နယ်အတွင်း (၈၈၀၆)ဧကစိုက်ပျိုးထားရှိ၍ ကသစ်တိုင်းကျေးရွာအုပ်စုတွင် (၁၈၅) ဧကစိုက်ပျိုးထားရှိပါသည်။ အထွက်တင်းအနေဖြင့် ယခင်နှစ်တွင် (၁)ဧကလျှင် (၅၅)တင်းနှုန်းထွက်ရှိပြီး ယခုနှစ်တွင် (၁)ဧကလျှင် (၆၀)တင်းနှုန်းထွက်ရှိပါသည်။ ယခင်နှစ်တွင် မြေပဲဆန် (၁)ပိဿာလျှင် (၆၃၀၀)ကျပ်ဖြင့်ရောင်းချခဲ့ပြီး ယခုနှစ်တွင် (၇၅၀၀)ကျပ်နှုန်းဖြင့်ရောင်းချရပါသည်။ ကုန်ကျစရိတ်အနေဖြင့် ယခင်နှစ်တွင် (၅)သိန်းကျပ်ကျော်ကုန်ကျခဲ့ပြီး ယခုနှစ်တွင် (၆)သိန်း/ (၇)သိန်းခန့်ကုန်ကျကြောင်းသိရှိရပါသည်။ သီးနှံ‌ရောင်းရငွေအဖြစ် ယခင်နှစ်တွင် တစ်ဧကလျှင် အကျိုးအမြတ်(၁၂)သိန်း‌ကျော်ရရှိခဲ့ပြီး ယခုနှစ်တွင် (၁၅)သိန်းကျော် အကျိုးအမြတ်ရရှိခဲ့သည်ကိုလည်း လေ့လာတွေ့ရှိရပါသည်။ အဆိုပါထွက်ရှိသော မြေပဲဆန်များအား မြို့ပေါ်ရှိဆီစက်များနှင့် ပြည်မြို့ရှိပွဲရုံများသို့ တင်ပို့ရောင်းချလျက်ရှိကြောင်းသိရှိရပါသည်။

DOCA(ပဲခူး)

     မကွေးတိုင်းဒေသကြီးသည် နှမ်း၊ မြေပဲ၊ ဝါ၊ နေကြာနှင့် ပဲမျိုးစုံတို့ကို အဓိကစိုက်ပျိုးထွက်ရှိသည့် ဒေသတစ်ခုဖြစ်ပါသည်။ စားဖိုဆောင်သီးနှံဖြစ်သည့် အာလူးကို ဆင်ဖြူကျွန်းမြို့တွင် စိုက်ပျိုးလေ့ရှိသော်လည်း အာလူးထွက်ပေါ်ချိန်မဟုတ်သည့်အတွက် ဈေးကွက်အတွင်း ရှမ်းပြည်နယ်၊ အောင်ပန်းမြို့မှ အာလူးများဝင်ရောက်အရောင်းအဝယ်ဖြစ်ကြောင်း သိရသည်။

     ၂၀၂၄ ခုနှစ်၊ အောက်တိုဘာလ (ပထမပတ်)တွင် အာလူး(ကြီး) တစ်ပိဿာလျှင် ကျပ်(၇၀၀၀)၊ အာလူး(လတ်) ကျပ် (၅၀၀၀)၊ အာလူး(သေး) ကျပ်(၄၀၀၀)ဈေးဖြင့် အရောင်းအဝယ်ဖြစ်လျက်ရှိပြီး စက်တင်ဘာလ(စတုတ္ထပတ်)တွင် အာလူး(ကြီး) တစ်ပိဿာလျှင် ကျပ်(၆၅၀၀)၊ အာလူး(လတ်) ကျပ် (၄၅၀၀)၊ အာလူး(သေး) ကျပ်(၃၈၀၀)ဈေးရှိခဲ့၍ ဈေးနှုန်းနှိုင်းယှဉ်ပါက အာလူးတစ်ပိဿာလျှင် ကျပ် (၂၀၀-၅၀၀)ခန့်ထိ ဈေးနှုန်းမြင့်တက်ခဲ့ကြောင်းသိရသည်။

   လမ်းပန်းဆက်သွယ်ရေးခက်ခဲသောကြောင့် သယ်ယူစရိတ်မြင့်မားခြင်းကြောင့်လည်းကောင်း၊ ဈေးကွက်တွင် ဝင်ရောက်မှုနည်းသောကြောင့်လည်းကောင်း ဈေးနှုန်းမြင့်တက်ရခြင်းဖြစ်ကြောင်း သိရှိရပါသည်။

DOCA(မကွေး)

        ပဲခူးတိုင်းဒေသကြီးအနောက်ပိုင်း၊ ပြည်ခရိုင်ဒေသအတွင်းရှိသော မှော်ဇာရွာ၊ တောင်လုံးညိုရွာ၊ ပုတီးကုန်း၊ သဲကုန်းဒေသများတွင်  မုန်လာဥဖြူများလှိုင်လှိုင်ထွက်ပေါ်နေပြီး ယခင်နှစ်ထက်ပို၍ ဈေးကောင်းရရှိကြောင်းသိရပါသည်။ စက်တင်ဘာလတွင် မုန်လာဥဖြူများ ဈေးကွက်အတွင်း၌ ရောင်းချနေသည့်ဈေးနှုန်းများမှာ အလုံးချော (၅)လုံးပါ တစ်တွဲလျှင် (၂၀၀၀)ကျပ်နှင့် အလုံးအလတ် (၅)လုံးပါတစ်တွဲလျှင် (၁၅၀၀)ကျပ်၊ အပင်အသေးအညှပ်များမှထွက်ရှိသည့် မုန်လာဥများအား ချဉ်ဖတ်အဖြစ် ပြုလုပ်ရောင်းချသည့်အနေအထားများမှာ အစည်းတစ်စည်းလျှင် (၅၀၀)ကျပ်နှုန်းဖြင့် ဈေးကွက်အတွင်း ရောင်းချနေကြောင်းသိရှိရပါသည်။

          မုန်လာဥများသည် စတင်စိုက်ပျိုးပြီး (၃၀)ရက်ခန့်အကြာတွင် ဥများထွက်ပေါ်လာပြီး နုတ်သိမ်းရပါသည်။ မုန်လာဥအမျိုးအစားလိုက်၍ တစ်ဧကလျှင် ပေါင်(၅၀၀၀/၆၀၀၀)ခန့်ထွက်ရှိကြောင်းသိရပါသည်။

DOCA(ပဲခူး)

          ပြည်မြို့ရှိ သစ်သီးဝလံဈေးကွက်တွင် ရာသီစာသီးနှံတစ်မျိုးဖြစ်သော သြဇာသီးများ အရောင်းအဝယ်ဖြစ်နေကြောင်းတွေ့ရပါသည်။ သြဂုတ်လမှစ၍ ပြည်တစ်ဖက်ကမ်း ပန်းတောင်းမြို့နယ်နှင့် ပြည်မြို့နယ်ရှိ မှော်ဇာ၊ တောင်လုံးညိုကျေးရွာများမှ အများဆုံးလာရောက်ရောင်းချမှုရှိကြပါသည်။  သြဇာသီးများစတင်ထွက်ပေါ်ချိန်တွင် ရာသီချိန်ဖြစ်သည့်အတွက် အလုံးအရွယ်အစားပေါ်လိုက်၍ (၅၀၀-၁၀၀၀)ကျပ် စသောဈေးနှုန်းအလိုက် ဝယ်ယူစားသုံးကြကြောင်းသိရပါသည်။ ယခုစက်တင်ဘာလ နောက်ဆုံးပတ်တွင် ဩဇာသီးများ  အထွက်လှိုင်လာချိန်ဖြစ်သည့်အတွက် သစ်သီးဝလံဈေးကွက်အတွင်း ဩဇာသီးတစ်လုံးလျှင် ၅၀၀ကျပ်၊ ၇၀၀ကျပ်၊ ၈၀၀ကျပ်ဖြင့် အကြီး/အသေးပေါ်မူတည်၍ ဝယ်ယူကြကြောင်းသိရပါသည်။ ရာသီစာ ပြည်ဒေသထွက်လက်ဆောင်ခြင်းများဖြင့်ထည့်၍လည်း ရောင်းချမှုများရှိကြသောကြောင့် အလုံး(၃၅)လုံးတစ်ခြင်းလျှင် (၂၀၀၀၀)ကျပ်နှုန်း၊ အလုံးအရေအတွက်နှင့် အရွယ်အစားပေါ်မူတည်၍ ဈေးအမျိူးမျိူးကွာခြားမှုရှိကြကြောင်းသိရပါသည်။ ထို့ကြောင့် ယခုကာလအတွင်း ပြည်ဒေသထွက်သီးနှံတစ်မျိုးဖြစ်သည့် ဩဇာသီးသီးနှံသည် ဈေးကွက်အတွင်း ရောင်းသူ၊ ဝယ်သူများ၊ စားသုံးသူများဖြင့် အရောင်းအဝယ် ဖြစ်နေကြောင်းသိရပါသည်။

DOCA(ပဲခူး)

          ပြည်ဈေးကွက်အတွင်း နံနံပင်ဈေးနှုန်းများမှာ အဆမတန်မြင့်တက်လျက်ရှိပြီး စိုက်ပျိုးသော နံနံပင်အခင်းများ ရေဝပ်၍ အထွက်နှုန်းနည်းကာ ရှားပါး၍ ဈေးမြင့်တက်ရခြင်းဖြစ်ကြောင်းသိရပါသည်။ ပြည်အနီးတဝိုက်ရှိကျေးရွာများနှင့် ဝက်ထီးကန်၊ ရွှေတောင်၊ ပေါင်းတလည်၊ ဆင်တဲ စသည့်နယ်များတွင် စိုက်ပျိုးမှုရှိသော်လည်း မိုးများ၍ရေဝပ်သဖြင့် အထွက်နှုန်းနည်းကာ ဈေးကွက်သို့ ရွှေတောင်မြို့နယ်၊ ဘို့လယ်ကုန်းရွာဘက်မှသာ အဝင်ရှိကြောင်းသိရသည်။ တစ်ပတ်လျှင် (၂)ကြိမ်အဝင်ရှိကာ တစ်ကြိမ်လျှင် ပိဿာချိန်(၁၀)ခန့်သာဝင်ရောက်မှုရှိပြီး နံနံပင်(၁၀) ကျပ်သားလျှင် ကျပ်(၂၀၀၀)နှုန်းခန့်ရှိကြောင်းသိရပါသည်။ ဈေးကွက်အတွင်းရှိ လက်လီဈေးနှုန်းများတွင် (၅)ပင်စည်းတစ်စည်းလျှင် ကျပ်(၃၀၀)နှုန်းခန့်ဖြင့်ရောင်းချမှုရှိပြီး ယခင်ဆောင်းရာသီ ဇန်နဝါရီလအတွင်းတွင် နံနံပင်တစ်ပိဿာလျှင် (၁၃၀၀-၁၅၀၀)ကျပ်နှုန်းရှိခဲ့ကြောင်းသိရသဖြင့် ဈေးပိုမိုမြင့်တက်လျက်ရှိကြောင်းသိရပါသည်။

DOCA(ပဲခူး)