ပြည်တွင်းကုန်သွယ်မှုသတင်း

          ဧရာဝတီတိုင်းဒေသကြီး မြန်အောင်ခရိုင်၊ မြန်အောင်မြို့နယ်တွင် မိုးမြေပဲ (၇၂၀၂ဧက)၊ ဆောင်းမြေပဲ (၁၁၆၀၅ဧက)ကို နှစ်စဉ်စိုက်ပျိုးထုတ်လုပ်လျက်ရှိပါသည်။ မြန်အောင်မြို့နယ်အတွင်း ထူးခြားသော ရေမြေသဘာဝကောင်းမွန်သည့်အတွက် လယ်ယာကိုင်းကျွန်းလုပ်ကိုင်စားသောက်ကြသည့်တောင်သူများ တွက်ခြေကိုက်လျက်ရှိကြသည်။ အထူးသဖြင့် ပြည်တွင်းစားသုံးဆီဖူလုံရေးအထူးဇုန်အဖြစ်သတ်မှတ်ဆောင်ရွက်ပြီး စိုက်ပျိုးမှုကို မြေပဲသီးနှံကို အဓိကထား၍ နှမ်း၊ နေကြာတို့ကိုလည်း ပန်းတိုင်ရည်မှန်းချက်ထားရှိကာ စိုက်ပျိုးလျက်ရှိကြပါသည်။ ၂၀၂၃-၂၀၂၄ ခုနှစ်တွင် ဆောင်းမြေပဲ  ၁၁၆၀၅ဧကစိုက်ပျိုးခဲ့ပြီး တစ်ဧကလျှင် ပျမ်းမျှအထွက်နှုန်း ၆၇တင်းနှုန်းထွက်ရှိခဲ့ပြီး ရောင်းဈေးမှာ တစ်တင်းလျှင် ၂၇၀၀၀ကျပ်ထိရရှိခဲ့ပါသည်။

          ၂၀၂၄ခုနှစ် မိုးမြေပဲကို ၇၂၀၂ဧကစိုက်ပျိုးခဲ့ပြီး တစ်ဧကလျှင်  ကုန်ကျစရိတ် ကျပ်၁၃သိန်းခန့်ရှိပြီး၊ တစ်ဧကလျှင် ပျမ်းမျှ ၆၀တင်းခန့်ထွက်ရှိကြောင် သိရှိရပါသည်။ ယခုအခါ ရာသီမြေပဲပေါ်ချိန်တွင် ရောင်းဈေးမှာ တစ်တင်းလျှင် ၃၀၀၀၀ကျပ်ထိရရှိပြီး တစ်ဧကလျှင် အကျိုးအမြတ် ကျပ်( ၅သိန်း)ခန့်ရရှိပါသည်။ ဒေသထွက်မိုးမြေပဲများကို မြို့ပေါ်ပွဲရုံလုပ်ငန်းရှင်များကဝယ်ယူကာ ပြည်မြို့နှင့် ရန်ကုန်မြို့များသို့ တင်ပို့ရောင်းချကြောင်းသိရှိရပါသည်။   

DOCA(ဧရာဝတီ)

ဧရာဝတီတိုင်းဒေသကြီးရှိ အချို့မြို့နယ်များတွင် စိုက်ပျိုးပြီးစပါးပင်များနှင့်၊ဖုံးချိန်လုံးချိန် အချိန်များ၊ စပါးနှံများထွက်ရှိသည့်အချိန်များတွင် ဒေသအခေါ်အဝေါ်အရ(ဖြုတ်ပိုး)ဟုခေါ်သောပိုးများ ကျခြင်းကြောင့် စပါးပင်အရွက်များခြောက်သွေ့ပြီးသေသွားခြင်း၊ ထွက်ရှိနေသောစပါးနှံများအားစားသုံးကိုက်ဖြတ်ခြင်း၊ စပါးနှံတစ်နှံလျှင်အစေ့(၅၀)ရှိခဲ့သော်အောင်မြင်သောအစေ့မှာ(၅)စေ့မျှလောက်သာရရှိခြင်း၊ ထိုပိုးများအားပိုးသတ်ဆေးဖျန်းရာဆေးဖျန်းချိန်တွင်ရှိနေသောပိုးများသာသေပြီး ကျန်ရှိနေသော ပိုးဥများမှထပ်မံပေါက်ဖွား၍(၃)ရက်လျှင်တစ်ကြိမ် တစ်ပတ်လျှင် (၃)ကြိမ်ဖျန်း ရခြင်းကြောင့် ကုန်ကျစရိတ်များပြားခြင်း၊ ရရှိလာသောစပါးများမှာ ယခင်ကတစ်ဧကလျှင် (၈၀/၁၀၀)တင်းထွက်ရှိခဲ့သော်လည်း၊ ပိုးများဖျက်စီးမှုကြောင့်စပါးအထွက်မှာ တစ်ဧကလျှင် အများဆုံး(၁၅)တင်းခန့်သာရရှိခြင်းတို့ကြောင့် လယ်လုပ်သူတောင်သူလယ်သမားများမှာ အခက်အခဲများစွာရှိကြောင်းနှင့် ယခုနှစ်ဆုံးရှုံးမှု့များမှာ အလွန်များပြားကြောင်း တောင်သူလယ်သမားများထံမှသိရှိရပါသည်။
DOCA(ဧရာဝတီ)

          စစ်ကိုင်းတိုင်းဒေသကြီး၊ ကန့်ဘလူခရိုင်တွင် ကွမ်းသီးပင်များကို နေအိမ်ခြံဝင်းများ၌ မိသားစုဝင်ငွေရရှိသည့်အတွက် တစ်နိုင်တစ်ပိုင်စိုက်ပျိုးကြကြောင်း၊ ကန့်ဘလူခရိုင်တွင်ရောင်းချနေသည့် ကွမ်းသီးများကို ကန့်ဘလူခရိုင်အတွင်းမှလည်းကောင်း၊ ဘိတ်ဒေသမှလည်းကောင်း ဝယ်ယူ၍ ကွမ်းသီးမှ ကွမ်းသီးစိတ်များထုတ်လုပ်၍ ဖြန့်ဖြူးရောင်းချလျက်ရှိကြောင်းသိရသည်။

          ၂၀၂၄ခုနှစ်၊ အောက်တိုဘာလ တတိယပတ်တွင်ဖြစ်ပေါ်နေသော ကန့်ဘလူခရိုင်၏ ကွမ်းသီးစိတ်ဈေးနှုန်းများအနေဖြင့် အရည်အသွေးပေါ်မူတည်၍ ကွမ်းသီးစိတ် လက်ကားဈေးတစ်ပိဿာလျှင် ငွေကျပ်(၁၅၅၀၀)ဖြင့်လည်းကောင်း၊ လက်လီဈေးတစ်ပိဿာလျှင် ငွေကျပ် (၁၆၀၀၀)ဖြင့်လည်းကောင်း၊ ကွမ်းသီးစိတ်(ပယ်)တစ်ပိဿာလျှင် ငွေကျပ် (၆၀၀၀)ဖြင့်လည်းကောင်း အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ကန့်ဘလူမြို့နယ်မှ ထွက်ရှိသည့် ကွမ်းသီးစိတ်များကို ကန့်ဘလူမြို့ပေါ်ရှိဆိုင်များ၊ ကန့်ဘလူမြို့နယ်၊ ထန်းကုန်းကျေးရွာနှင့် ကျွန်းလှမြို့နယ်များသို့ လက်လီ/ လက္ကားဖြန့်ဖြူးရောင်းချလျက်ရှိကြောင်း  ကန့်ဘလူမြို့၊ အမှတ်(၃)ရပ်ကွက်ရှိ ကွမ်းသီးစိတ်ရောင်းဝယ်ရေးလုပ်ငန်းရှင်၏ ပြောပြချက်အရသိရှိရပါသည်။

DOCA(စစ်ကိုင်း) 

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးတွင် ရောင်းချလျက်ရှိသည့် ကြက်ဥ၊ ဘဲဥများကို ဒေသတွင်းကြက်ခြံ၊ ဘဲခြံများမှ ဝယ်ယူရောင်းချလျက်ရှိပြီး၊ လိုအပ်ချက်အရ မန္တလေးမှလည်းဝယ်ယူရောင်းချကြောင်းသိရသည်။ ၂၀၂၄ခုနှစ်၊ အောက်တိုဘာလ တတိယပတ်အတွင်း ဖြစ်ပေါ်နေသော ကြက်ဥ၊ ဘဲဥ၊ ငုံးဥဈေးနှုန်းများမှာ ကြက်ဥကြီးတစ်လုံးလျှင် (၄၃၀)ကျပ်၊ ဥလတ်တစ်လုံးလျှင် (၄၀၀)ကျပ်၊ ဥသေးတစ်လုံးလျှင်(၃၈၀)ကျပ်နှင့် ဘဲဥကြီးတစ်လုံးလျှင် (၆၀၀) ကျပ်၊ ဥသေးတစ်လုံးလျှင်(၅၅၀)ကျပ်၊ ငုံးဥ(၉)လုံးလျှင် (၁၀၀၀)ကျပ်ဖြင့်အရောင်းအဝယ်ဖြစ်လျက်ရှိပြီး ယခင်လကာလတူဖြစ်ပေါ်ခဲ့သော ဈေးနှုန်းများထက် အနည်းငယ်မြင့်တက်လာကြောင်း၊ ကြက်ဥ၊ ဘဲဥ၊ ငုံးဥများကို စားသောက်ဆိုင်များ၊ မုန့်လုပ်ငန်းများတွင် အများဆုံးအသုံးပြုကြပြီး အိမ်ရှင်မများက မိသားစုထမင်းဝိုင်းအတွက် ဟင်းလျာအဖြစ်ချက်ပြုတ်ရာတွင်လည်း အသုံးပြုကြကြောင်း ကန့်ဘလူမြို့မဈေးအတွင်းရှိ ဈေးသည်များထံမှသိရှိရပါသည်။

DOCA(စစ်ကိုင်း) 

     ရှမ်းပြည်နယ်(အရှေ့ပိုင်း)၊ ကျိုင်းတုံမြို့၊ မြို့မဈေးအတွင်းရှိ ရောင်းချနေသော သစ်သီးဝလံ ဈေးနှုန်းများမှာ အောက်တိုဘာလ ဒုတိယအပတ်တွင် ပန်းသီးတစ်ကီလိုလျှင် (၆၀၀၀) ကျပ်၊ လိမ္မော်သီး တစ်ကီလိုလျှင် (၅၀၀၀) ကျပ်၊ နဂါးမောက်သီး တစ်ကီလိုလျှင် (၄၀၀၀) ကျပ်၊ ထောပတ်သီး တစ်ကီလိုလျှင် (၅၅၀၀) ကျပ်၊ ကြက်မောက်သီး၊ မင်းကွတ်သီး၊ နှင်းသီးနှင့် မက်မန်းသီး တစ်ကီလိုလျှင် (၈၀၀၀) ကျပ်၊ သစ်တော်သီး တစ်ကီလိုလျှင် (၁၀၀၀၀) ကျပ်၊ စပျစ်သီး တစ်ကီလိုလျှင် (၁၄၀၀၀) ကျပ် နာနတ်သီးအလုံးကြီး တစ်လုံးလျှင် (၅၀၀၀) ကျပ်နှင့် သခွားမွှေး အလုံးကြီး တစ်လုံးလျှင် (၉၀၀၀) ကျပ်ဈေးများဖြင့် ရောင်းချလျက်ရှိကြောင်း ကျိုင်းတုံမြို့မဈေး အတွင်းရှိ သစ်သီးရောင်းချသူများထံမှ သိရှိရပါသည်။

DOCA(ရှမ်း)