ပြည်တွင်းကုန်သွယ်မှုသတင်း

          မန္တ‌လေးတိုင်းဒေသကြီး ၊ ကျောက်ဆည်မြို့နယ်သည် စပါး၊ပဲ၊ပြောင်း၊နှမ်း၊ငရုတ်၊ကြက်သွန် စသည့်စိုက်ပျိုးရေးလုပ်ငန်းကို အဓိကထားလုပ်ကိုင်ပြီး လယ်ယာထွက်သီးနှံများအပြင် ဥယျာဉ်ခြံ သီးနှံများကိုလည်း တစ်နိုင်တစ်ပိုင် စိုက်ပျိုးလျက်ရှိပါသည်။ ဥယျာဉ်ခြံသီးနှံများမှာ သရက်၊မာလကာ၊ သံပုရာနှင့်နဂါးမောက်သီးကိုအဓိကထားစိုက်ပျိုးကြပါသည်။ နဂါးမောက်သီးကို တောင်နောက် ကျေးရွာနှင့်သင်တောင်းကျေးရွာများတွင် စိုက်ပျိုးကြပါသည်။နဂါးမောက်သီးကို အဖြူသီးနှင့်အနီသီး  ဟူ၍(၂)မျိုးရှိပြီး အဖြူသီးမှာလူကြိုက်များကြောင်း၊ကျောက်ဆည်နယ်မှထွက်သော နဂါးမောက်သီး ကိုကျောက်ဆည်မြို့ရှိ မြို့မစျေး၊အေးမြကြည်လင်စျေးနှင့်သစ်သီးဆိုင်များသို့တင်ပို့ရောင်းချလျက်ရှိ ကြောင်း၊ အောက်တိုဘာလ ပထမပတ်တွင် နဂါးမောက်သီးစျေးနှုန်းမှာ တစ်လုံးလျှင်(၁၅၀၀-၂၀၀၀) ကျပ်စျေးနှုန်းများဖြင့်ရောင်းဝယ်ခဲ့ပြီး  အောက်တိုဘာလ တတိယပတ်တွင်နဂါးမောက်သီးစျေးနှုန်းမှာ တစ်လုံးလျှင်(၈၀၀-၁၀၀၀)ကျပ်စျေးနှုန်းများဖြင့် အလုံးအကြီး၊အသေးပေါ်မူတည်၍ စျေးနှုန်းကွာခြားကြောင်း ၊ စျေးကွက်အတွင်း နဂါးမောက်သီး အဝင်များလာသည့်အတွက် စျေးနှုန်းအနည်းငယ် ကျဆင်းလျက်ရှိကြောင်း ကျောက်ဆည် မြို့ရှိသစ်သီးရောင်းချသည့်ဆိုင်များမှသိရှိရပါသည်။

DOCA (မန္တလေး)

   နေ့စဉ်စားသုံးကြသောဟင်းလျာများတွင် ပဲပင်ပေါက်ကို ပဲပြားနှင့်ရော၍ကြော်စားခြင်း ကိုလည်း စားသုံးသူများနှစ်သက်တာကို တွေ့ရပါသည်။ ထိုသို့စားသုံးမှုများသော ပဲပင်ပေါက်၊ ပဲပြားတို့ကို အများအားဖြင့် တွဲဆက်ရောင်းချတာကိုတွေ့ရပြီး မိတ္ထီလာဈေးကွက်မှာတော့ အောက်တိုဘာလ ဒုတိယပတ် တွင်ပဲပင်ပေါက်(၂၅)ကျပ်သား လျှင်(၁၀၀၀)ကျပ်၊ ပဲပြား၂ခဲတွဲ တစ်တွဲလျှင်(၁၀၀၀) ကျပ်နှင့်ရောင်းချ လျက်ရှိပါသည်။ ပဲပင်ပေါက်ကို အများအားဖြင့် ပဲပြားနှင့်တွဲဘက်ကြော်စားနိုင် ကြသော်လည်း ရေနွေးဖျော၍သုပ်ခြင်း၊ အသုပ်စုံများတွင်ထည့်၍သုပ်စားခြင်း၊ ဟင်းချိုချက်၍ စားသုံးခြင်းစသည်ဖြင့် အမျိုးမျိုးစားသုံးကြပါတယ်။ ပဲပင်ပေါက်တွင် သံဓာတ်၊ အမျှင်ဓာတ်များ ကြွယ်ဝစွာပါဝင်တဲ့အတွက် သံဓာတ်ဟာသွေးအားကောင်းစေခြင်း၊ အမျှင်ဓာတ်က အစာခြေစနစ်ကို ကောင်းမွန်စေခြင်းစတဲ့အကျိုးကျေးဇူးများစွာရှိသော ပဲပြားနှင့်ပဲပင်ပေါက်အတွဲမှာ အရောင်းသွက်လျက်ရှိကြောင်း ဈေးကွက်မှသိရသည်။

DOCA(မန္တလေး)

          မန္တလေးတိုင်းဒေသကြီး၊ပြင်ဦးလွင်မြို့အခြေစိုက်(Unity Avocado Zone)ဆိုတဲ့ အဖွဲ့အစည်း တစ်ခုဖွဲ့စည်းပြီး ထောပတ်သီးနှံများစိုက်ပျိုးခဲ့ရာ အဖွဲ့ဝင်များရဲ့ စည်းလုံးမှု၊ ဇွဲ ၊ လုံ့လ ၊ စိတ်အားထက်သန်မှုများနဲ့ တည်ဆောက်ခဲ့ကြတာ ယခုအချိန်မှာတော့ အောင်မြင်မှု အသီးအပွင့် တွေကိုခံစားနေရပြီဖြစ်ပါသည်။ Unity ရဲ့ ထောပတ် စိုက်ဧကမှာ ဧက(၃၀၀)မှာ ဧက(၂၀၀) စိုက်ပျိုး ထားရှိပြီး အသီးခူးဆွတ်နိုင်သည့်ဧက(၁၅၀)ရှိကြောင်း ၊ စိုက်ပျိုးထားသည့် ထောပတ်မျိုးများမှာ ဒေသမျိုး၊ မြောက်ကျွန်းသူနှင့်အမရာမျိုးဖြစ်ပြီး နိုင်ငံခြားမျိုးဖြစ်တဲ့ Hass ၊ Bacan ၊ Pinkarhon မျိုးတွေကို အဓိကထားပြီး စိုက်ပျိုးထားရှိပါသည်။ထောပတ်(၁)ဧကတွင် အပင်ရေ(၈၀)ပင်စိုက်ပျိုးနိုင်ပြီး စတင်ခူးဆွတ်ချိန်တွင် တစ်ပင်လျှင် ထောပတ်သီး(၇၆)လုံးခူးဆွတ်နိုင် ကြောင်း သက်ဆိုင်ရာဌာနများ၏ စာရင်းများအရသိရှိရပါသည်။ ထောပတ်ပင်သည် နှစ်ရှည်သီးနှံပင် ဖြစ်သောကြောင့် နှစ်ကြာလျှင် အသီးရေရာနှင့်ချီသီးတာတွေ့ရှိရပါသည်။ယခုလက်ရှိ ထောပတ်သီး စျေးကွက်တွင် ဒေသသီး(၁)လုံး လျှင်(၃၀၀-၇၀၀)အထိစျေးရှိပြီး နိုင်ငံခြားမျိုးများမှာ ကီလိုစျေးများဖြင့် ရောင်းဝယ်ရာတွင်(၁)ကီလိုလျှင် (၈၀၀၀/)ကျပ်စျေးနှုန်းများဖြင့်ရောင်းဝယ်လျက်ရှိပါသည်။ တောပတ် မျိုးများမှာ အစေ့ပျိုးပင် နှင့် ကိုင်းကူးစပ်မျိုးဟူ၍ရှိပြီး အစေ့ပျိုးပင်မျိုးမှာ(၆)နှစ်မှ(၇)နှစ်တွင် အသီးရရှိပြီး ကိုင်းကူးစပ်မျိုးမှာ(၃)နှစ် ကြာလျှင် အသီးစတင်ရရှိပါသည်။ ကိုင်းကူးစပ်မျိုးပင်(၁)ပင်လျှင် ယခုစျေးနှုန်း (၁၅၀၀-၁၇၀၀)ကျပ်ဖြင့် Unity Avocado Zone တွင် လိုသလောက်ဝယ်ယူနိုင်ပြီး စိုက်ပျိုးမှုနည်းပညာနှင့် အပင်ထိန်းသိမ်းမှု များကိုမျှဝေပေးပြီး လိုက်လံစိုက်ပျိုးပေးလျက်ရှိကြောင်းသိရှိရပါသည်။

DOCA (မန္တလေး)

             မန္တလေးတိုင်းဒေသကြီး၊ပြင်ဦးလွင်ခရိုင်သည် အေးမြသောရာသီဥတုရှိပြီး တောင်ပေါ်မြို့လေး ဖြစ်သောကြောင့် ခရီးသွားများ၊အလည်အပတ်လာရောက်သူ ဧည့်သည်များဖြင့်အမြဲမပြတ် စည်ကား လျက်ရှိပါသည်။ခရီးသွားဧည့်သည်များလာသည်နှင့်အမျှဒေသထွက်ကုန်ရောင်းချသော ဆိုင်များတွင် ပြင်ဦးလွင်ဒေသထွက်ကုန်တစ်မျိုးဖြစ်သော မက္ကဒေးမီးယား (ခ)ချောကလက်သီးမှာလည်း အရောင်း အဝယ်ဖြစ်လျက်ရှိပါသည်။ မက္ကဒေးမီးယားအပင်သည် နှစ်ရှည်သီးနှံဖြစ်ပြီး ပြင်ဦးလွင်ရှိ မျှော့တော၊ သက်ကယ်ချောင်တွင် အများဆုံးစိုက်ပျိုးပြီး စိုက်ပျိုးသူများ အကျိုးအမြတ်ဖြစ်လျက်ရှိပါသည်။ မက္ကဒေးမီးယား (ခ)ချောကလက်သီးကို စားသုံးပါက ကင်ဆာရောဂါကာကွယ်နိုင်ခြင်း၊အရွယ်တင် နုပျိုစေခြင်း၊နှလုံးအားကောင်းစေခြင်း၊ သွေးကြောအတွင်းအဆီဓါတ်ကိုလျော့ကျစေခြင်း ၊ အစာခြေ စနစ်ကောင်းမွန်စေခြင်းစသော အကျိုးကျေးဇူးများစွာရရှိပါသည် ။ ကျန်းမာရေးအတွက်အထောက် အကူဖြစ်စေသောကြောင့် နေ့စဉ်ပုံမှန်(၆)ဆံမှ(၁၀)ဆံအထိ စားသောက်နိုင်ပြီး ပြင်ဦးလွင်ရှိဒေသ ထွက်ကုန်အရောင်းဆိုင်များတွင် နို့ဆီဗူး(၁)ဗူးလျှင်(၂၀၀၀/-)ကျပ်ဖြင်ရောင်းဝယ်လျက်ရှိပြီး ခရီးသွား များစိတ်ဝင်စားလျက်ရှိကြောင်း ဒေသထွက်ကုန်ရောင်းချသူများထံမှသိရှိရပါသည်။

DOCA (မန္တလေး)

            မန္တလေးတိုင်းဒေသကြီး၊ကျောက်ဆည်ခရိုင်သည် အညာဒေသ လယ်တွင်းကိုးခရိုင်တွင် တစ်ခု ပါဝင်ပြီး ဆည်ရေသောက်စနစ်ဖြင့် စပါးများအဓိက စိုက်ပျိုး လျက်ရှိ ပါသည်။ ကျောက်ဆည်ခရိုင် တွင် မိုးစပါးစိုက်ပျိုးမှုအနေဖြင့် ၂၀၂၅-၂၀၂၆ ဘဏ္ဍာနှစ်တွင် (၁၃၇၁၈၁)ဧက စိုက်ပျိုးထားကြောင်း သက်ဆိုင်ရာဌာန၏ စာရင်းများအရသိရှိရပါသည်။ ယခင်က တောင်သူများသည် မိမိအိမ်မှ စပါးများ ကိုသာမျိုးအဖြစ်အသုံးပြုကြောင်း၊ ယခုအခါတွင် တောင်သူများသည် နှစ်စဉ် မျိုးကောင်းမျိုးသန့်များ ကိုသာဝယ်ယူ၍ အသုံးပြုကြောင်း၊ တောင်သူအများစုမှာ ဧရာဒေသာစပါးမျိုးကိုသာ အဓိက စိုက်ပျိုး လျက်ရှိပြီး ဧရာပဒေသာ မျိုး(၁)တင်းလျှင် (၃၀၀၀၀/-)ကျပ်ဖြင့် ဝယ်ယူစိုက်ပျိုးလျက်ရှိကြောင်း ၊ ယခုနှစ်တွင် မိုးရွာသွန်းမှုကောင်းသောကြောင့် အထွက်နှုန်း ပိုမိုကောင်းမွန်နိုင်မည်ဖြစ်ကြောင်း ၊ တောင်သူများသည် လက်မှုလယ်ယာစနစ်မှ စက်မှုလယ်ယာစနစ်ကို ပြောင်းလဲအသုံးပြုသောကြောင့် အချိန်ကုန်သက်သာပြီး လုပ်ငန်းများ တွင်ကျယ်လျက်ရှိကြောင်း ၊ ယခင်က တောင်သူများသည် လယ်ထွန်ခြင်း၊စပါးရိတ်သိမ်းခြင်း၊စပါးသယ်ယူခြင်းများကို နွားများ ၊လူများကိုသာအသုံးပြုခဲ့သော်လည်း ယခုအခါတွင် လယ်ထွန်စက်၊ရိတ်သိမ်းခြွေလှေ့စက်၊ထော်လာဂျီ များကိုသာအသုံးပြုလျက်ရှိကြောင်း၊ မိုးစပါး(၁)ဧက ကုန်ကျစရိတ်အနေဖြင့် မျိုးစေ့ ၊ စိုက်ပျိုးစရိတ် ၊ ထွန်ယက်ခြင်း နှင့် ရိတ်သိမ်းခြင်း အပါအဝင် စုစုပေါင်း ကုန်ကျငွေ(၁၀၅၀၀၀၀)ကျပ်ကုန်ကျပြီး ယခင်နှစ် အထွက်နှုန်းအနေဖြင့် (၁)ဧကလျှင်(၈၀-၈၅)တင်းခန့်ထွက်ရှိကြောင်း၊စပါးစျေးနှုန်းအနေဖြင့်ယခင်နှစ်တွင်ဧရာပဒေသာစပါး တင်း(၁၀၀)လျှင် (၂၈၀၀၀၀၀/-)ကျပ်စျေးရှိပြီး ယခုနှစ်တွင် ထွက်ပေါ်ခြင်း မရှိသေးသော်လည်း စပါး စျေးနှုန်းအနေဖြင့် ဧရာပဒေသာ(အဟောင်း) တင်း(၁၀၀)လျှင် (၂၈၀၀၀၀၀/-)ကျပ် ၊ မနောသု (အဟောင်း) တင်း(၁၀၀)လျှင် (၂၁၀၀၀၀၀/-)ကျပ်ဖြစ်ပြီး ဆန်စျေးနှုန်းအနေဖြင့် ဧရာပဒေသာဆန် (၂၄)ပြည် တစ်အိတ်လျှင်(၁၂၅၀၀၀/-)ကျပ်၊မနောသုခဆန်(၂၄)ပြည် တစ်အိတ်လျှင်(၉၂၀၀၀/-)ကျပ် စျေးနှုန်းများဖြင့် ရောင်းဝယ်ဖြစ်နေကြောင်း စျေးကွက်အနေဖြင့် ရန်ကုန်၊ မန္တလေး ၊ မိတ္ထီလာ နှင့် မြင်းခြံမြို့များသို့ တင်ပို့ရောင်းချလျက်ရှိကြောင်း၊ ပွဲစား ၊ ကုန်သည် စက်ပိုင်များထံမှသိရှိရပါသည်။

DOCA (မန္တလေး)