ပြည်တွင်းကုန်သွယ်မှုသတင်း

             မိုးရာသီတွင် လှိုင်လှိုင်ပေါသော ကျွဲကောသီးလေးများသည် အချဉ်ဓါတ်အက်ဆစ်ပါရှိသော သစ်သီးမျိုးနွယ်ဝင်ဖြစ်ပါသည်။ ကျွဲကောသီးထဲတွင် ဘီတာမင်စီအမြောက်အများပါသော ကြောင့် သွေးလွှတ်ကြောများ ဆန့်ခြင်း၊ ကျုံ့ခြင်းများကို လုပ်ဆောင်ပေးနိုင်ပါသည်။

            ခန္ဓာကိုယ် အလေးချိန်ကျလိုသူများအတွက်လည်း ကျွဲကောသီးက များစွာကောင်းကျိုးပြုသည့်အပြင် ပုံမှန်စားသုံးပေးခြင်းအားဖြင့်  ပင်ပန်းနွမ်းလျခြင်း၊ အိပ်မပျော်ခြင်း၊ လည်ပင်းနာခြင်းနှင့် ဆီးချိုရောဂါများကိုပါ ကာကွယ်နိုင်ပါသည်။ ကျွဲကောသီးစားသုံးခြင်းကြောင့် ကောင်းကျိုးများစွာရရှိနိုင်၍ လူကြီးလူငယ်မရွေးစားသုံးသင့်သော အသီးတစ်မျိုးဖြစ်ပါသည်။

        ကျွဲကောသီးတစ်လုံးလျှင် ၁၅၀၀ ကျပ်မှ ၃၅၀၀ ကျပ်အထိ အလုံးအသေးအကြီးပေါ် မူတည်၍ ရောင်းချလျှက်ရှိကြောင်း တောင်ငူမြို့၊ ညောင်ပင်ဈေးမှ သစ်သီးဆိုင်များမှ သိရှိရပါသည်။

DOCA(ပဲခူး)

          တောင်ငူခရိုင်၊ ဖြူးမြို့တွင် ရောင်းကုန်တစ်ခုဖြစ်သော ရွှေပန်း၊ ငွေပန်းများသည် ယခုအခါ လှိုင်လှိုင်ပွင့်ဝေ၍ ဈေးကွက်အတွင်း  ရာသီပန်းများအဖြစ်ရောင်းချလျက်ရှိပါသည်။ ရပ်ကွက်အတွင်း အချို့အိမ်များတွင် အလှစိုက်၍သော်လည်းကောင်း၊ တပိုင်တနိုင်စိုက်ပျိုးပြီး အပွင့်များရောင်းချ၍သော်လည်းကောင်း စိုက်ပျိုးကြပါသည်။

             ရာသီပေါ်ပန်းရောင်းသော ပန်းသည်များသည် တစ်ရာသီတစ်မျိုးပေါ်နေသော ပန်းများကိုဝယ်ယူ၍သီကုံးပြီး တဆင့်ပြန်လည်ရောင်းချခြင်းဖြင့် ဝင်ငွေရရှိလျက်ရှိပါသည်။ ပန်းစိုက်ပျိုးသူများသည် ပန်းသည်များထံသို့ ရွှေပန်း၊ ငွေပန်းများအား အပွင့် ၁၀၀ လျှင် ၇၀၀ ကျပ်နှုန်းဖြင့် ပန်းရောင်းသူက ကိုယ်တိုင်သီကုံး၍ သုံးပွင့်ပါတစ်ကုံးလျှင် ၁၀၀ ကျပ်၊ သုံးကုံးလျှင် ၂၀၀ ကျပ်ဖြင့် ပြန်လည်ရောင်းချပါသည်။

              ယခင်နှစ်က သုံးပွင့်ပါတစ်ကုံးလျှင် ၅၀ ကျပ်ဖြင့် ရောင်းချရသဖြင့် ယခုနှစ်တွင် ဈေးကောင်းရသည်ဟု ဆိုရမည်ဖြစ်ကြောင်း၊ ရွှေပန်း၊ ငွေပန်းကုံးများကို ဘုရားပန်းကပ်လှူ၍လည်း ကောင်း၊ မော်တော်ယာဉ်များတွင် ချိတ်ဆွဲ၍လည်းကောင်း ဝယ်ယူကြကြောင်း ပန်းရောင်းချသူ တစ်ဦးထံမှ သိရှိရပါသည်။

DOCA(ပဲခူး)

     အုန်းပင်သည် အမျိုးအစားအနေဖြင့် ဒေသအလိုက် အမျိုးမျိုးရှိသော်လည်း အခြေခံအားဖြင့် သုံးမျိုးသာရှိကြောင်း သိရှိရပါသည်။ ယင်းတို့မှာ ပင်မြင့်မျိုး၊ ပင်ပုမျိုးနှင့်စပ်မျိူးတို့ဖြစ်ကြသည်။ အပင်ပေါ်ရှိ အုန်းသီးကခြောက်သွေ့သောရာသီတွင် ရင့်မှည့်မှုမြန်ဆန်ပြီး၊ စိုစွတ်သောမိုးရာသီတွင် ရင့်မှည့်မှုကြာတက်ပါသည်။ အုန်းသီးသည်ယေဘုယျအားဖြင့် ခြောက်နှစ်ခုနစ်နှစ်ခန့်တွင် အသီးစ၍  အခိုင်လိုက်သီးပြီး အုန်းသီးတစ်ခိုင်တွင် အသီးပေါင်း (၁၀) လုံးမှ(၂၀)လုံးခန့်အထိသီးနိုင်သည်။ များသောအားဖြင့် တစ်နှစ်ပတ်လုံးအသီးမပြတ်ရှိနေတက်ပြီး ရာသီဥတုဒဏ်ကိုခံနိုင်ရည်ရှိ၍ အခြားအပင်များကဲ့သို့အစဉ်တစိုက်ပြုစုစိုက်ပျိုးနေရသော အပင်မျိုးမဟုတ်ချေ။

     အုန်းသီးသည် လူတွေအတွက်အလွန်အကျိုး၍ သွေးတွင်းသကြားဓာတ်အား ထိန်းသိမ်းပေးခြင်း၊ ရေဓာတ်ထိန်းသိမ်းပေးခြင်းတို့ကိုလည်း အလွန်းအကျိုးပြုပြီး အုန်းရည်ကို အချို့က သူ့ချည်း သက်သက်အရသာခံသောက်၍လည်ကောင်း၊ သကြားနှင့်ဖျော်၍လည်းကောင်း ၊ သဘာဝသစ်သီးအနေဖြင့်လည်း သောက်သုံးကြပါသည်။ ယခုအခါ အုန်းသီးနု အကြီးတစ်လုံးလျှင် (၂၅၀၀မှ၃၀၀၀) ကျပ်ခန့်ရှိပြီး၊ အသေးတစ်လုံးလျှင်(၂၀၀၀)ကျပ်ခန့် ဖြစ်ပေါ်လျက်ရှိပါသည်။

DOCA(တနင်္သာရီ)

             ဖြူးမြို့အနောက်ဘက်၊ ပဲခူးရိုးမတောင်ယာတောများတွင် စိုက်ပျိုးသောသီးမွှေးငှက်ပျောသီးများမှာ ဖြူးမြို့စည်ပင်သာယာဈေးတွင် ဈေးကွက်ဖြစ်ထွန်းလျက်ရှိပါသည်။ ဖြူးဒေသထွက် သီးမွှေးငှက်ပျောသီးမှာ အရသာကောင်းမွန်သောကြောင့် ဒေသတွင်းသာမက အခြားမြို့ရွာများတိုင် နာမည်ကျော်လျက်ရှိပါသည်။

              သီးမွှေးငှက်ပျောသီးများအား ပဲခူးရိုးမရှိတောင်ယာတောများမှ ဆိုင်ကယ်များနှင့် သယ်ယူ၍ ဖြူးစည်ပင်သာယာဈေးရှိ ငှက်ပျောသီးဆိုင်များသို့ လာရောက်ဖောက်သည်သွင်းကြပါသည်။ သီးမွှေးငှက်ပျောသီးဈေးနှုန်းများအနေဖြင့် အဖီးလှတစ်ဖီးလျှင် ၇၀၀၀ ကျပ်ထိဈေးနှုန်းရှိပြီး အကြီးအသေးအလိုက် ၃၀၀၀ကျပ် မှစ၍ ၅၀၀၀ကျပ်၊ ၇၀၀၀ကျပ်ထိ ဈေးနှုန်းရရှိကြောင်း သိရှိရပါသည်။

               ဖြူးဒေသထွက်သီးမွှေးငှက်ပျောသီးမှာ မြန်မာတို့၏ပွဲတော်ဖြစ်သော သီတင်းကျွတ်အချိန်အခါဖြစ်သော အောက်တိုဘာလတွင် လှိုင်လှိုင်ပေါ်ခြင်းဖြစ်ပါသည်။ မြန်မာတို့၏ သီတင်းကျွတ်အခါပြီးလျှင် ဟိန္ဒူလူမျိုးတို့၏ ဒီပါဝတီပွဲတော်ဖြစ်သောကြောင့် ယခုကာလသည် သီးမွှေးငှက်ပျောသီး ရောင်းအားအကောင်းဆုံးလလည်း ဖြစ်ပါသည်။ သီတင်းကျွတ်အချိန်အခါတွင် လူကြီးမိဘများအား ဂါရဝပြုကန်တော့ကြရာတွင် သီးမွှေးငှက်ပျောသီးများဖြင့် ကန်တော့ခြင်း၊ ဟိန္ဒူလူမျိုး၏ ဒီပါဝတီ ပွဲတော်တွင်ဘုရားရှိခိုးရာတွင် ရိုးရာထုံးတမ်းအရ အသီးမျိုးစုံ၊ ပန်းမျိုးစုံဖြင့် ကန်တော့ကြခြင်းကြောင့် ယခုကာလသည် သီးမွှေးငှက်ပျောသီး ရောင်းအားကောင်းခြင်းဖြစ်ကြောင်း ဖြူးမြို့ရှိ ငှက်ပျောသီးဆိုင်ပိုင်ရှင်တစ်ဦး၏ ပြောကြားချက်အရ သိရှိခဲ့ပါသည်။

DOCA(ပဲခူး)

                 တောင်ငူမြို့နယ်အတွင်းရှိ ဆောက်လုပ်ရေးလုပ်ငန်းသုံးပစ္စည်း အရောင်းဆိုင်များတွင် ဆောက်လုပ်ရေးလုပ်ငန်းဆောင်ရွက်ရာ၌ မရှိမဖြစ်လိုအပ်သော ဆောက်လုပ်ရေးလုပ်ငန်းသုံး သံချောင်းများ   ရောင်းချလျက်ရှိပါသည်။

              ယခင်စက်တင်ဘာလ နောက်ဆုံးပတ်တွင် ဆောက်လုပ်ရေးလုပ်ငန်းသုံးသံချောင်းများမှာ (၆)မူးလုံးဆိုဒ်သံချောင်း တစ်တန်လျှင် (၃၇၀၀၀၀၀)ကျပ်၊ (၅) မူးလုံးဆိုဒ်သံချောင်း တစ်တန်လျှင် (၃၈၀၀၀၀၀)ကျပ်၊ (၃)မူးလုံးသံချောင်း တစ်တန်လျှင် (၃၉၀၀၀၀၀)ကျပ်ရှိခဲ့ရာမှ ယခုလတွင် (၆) မူးလုံးဆိုဒ်သံချောင်း တစ်တန်လျှင် (၂၇၀၀၀၀၀) ကျပ်၊ (5)မူးလုံးဆိုဒ်သံချောင်း တစ်တန်လျှင်  (၂၈၀၀၀၀၀)ကျပ်၊ (၃)မူးလုံးသံချောင်းတစ်တန်လျှင် (၂၉၀၀၀၀၀)ကျပ် အထိရှိခဲ့ပြီး ယခုအောက်တိုဘာလ တတိယပတ်တွင် ဆောက်လုပ်ရေးလုပ်ငန်းသုံး သံချောင်းအရွယ်အစားအလိုက် (၁၀၀၀၀၀၀)ကျပ်ခန့် ဈေးနှုန်းကျဆင်းလာပါသည်။

               ယခုအခါ မိုးရာသီဖြစ်သည့်အတွက် ဆောက်လုပ်ရေးလုပ်ငန်းလုပ်ကိုင်မှု နည်းပါးခြင်းကြောင့်လည်းကောင်း၊ ဒေါ်လာဈေးကျဆင်းမှုကြောင့်လည်းကောင်း ဆောက်လုပ်ရေးလုပ်ငန်းသုံးသံချောင်းများ ဈေးနှုန်းကျဆင်းလာရခြင်းဖြစ်ကြောင်း ဆောက်လုပ်ရေးလုပ်ငန်းသုံး ပစ္စည်းအရောင်းဆိုင်များမှသိရှိရပါသည်။

DOCA(ပဲခူး)