ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ နတ်တလင်းခရိုင် နတ်တလင်းမြို့ အရှေ့ဘက် သဲချောင်းရွာတွင် ကြက်သွန်ပင်များ စိုက်ပျိုးကြပါသည်။ ကြက်သွန်ပင်များတစ်တောင်ကို အပင်စိတ်လျှင် (၆၀၀၀) ကျပ်ဖြင့်ရောင်းချပြီး အပင်ကြဲလျှင် (၇၀၀၀)ကျပ်ဖြင့် ရောင်းချပါသည်။ ကြက်သွန်ပင်စိုက်ပျိုးမည် ဆိုလျှင် အရင်ဘောင်ဆွဲမြေဆွပြီးမှသာလျှင် စိုက်ပျိုးကြရပါသည်။ ကြက်သွန်ပင်တစ်ဘောင်ကို ဘောင်ကျဉ်း လျှင်တစ်ဒေါင်ဖြင့်သာ စိုက်ပျိုးကြရပါသည်။ ဘောင်ကျယ်လျှင်တစ်‌ဒေါင်ခွဲနှစ်ဒေါင်ခန့် စိုက်ပျိုးကြရ ပါသည်။ စိုက်ပျိုးပြီးလျှင် မနက်(၁)ကြိမ် ညတစ်ကြိမ် ရေလောင်းပေးရပါမည်။ (၁)လခန့်ကြာလျှင် ဓာတ်ဆားများလောင်းပေးရပါသည်။ ကြက်သွန်နီပေါ်ချိန်မှာ (၃)လခွဲ(၄)လလောက်ခန့်ကြာလျှင် ကြက်သွန်နီဥများ တူးဖော်၍ရပါသည်။ ယခုအချိန်ကာလသည် ကြက်သွန်နီပေါ်ချိန်ဖြစ်သည့်အတွက် စျေးနှုန်းများကျဆင်းလျက်ရှိကြောင်း သိရှိရပါသည်။ ကြက်သွန်နီတစ်ပိဿာလျှင် ကြက်သွန်နီဥ အကြီးတစ်ပိဿာ(၃၅၀၀)ကျပ်၊ ကြက်သွန်နီဥအသေးတစ်ပိဿာလျှင် (၃၀၀၀)ကျပ်ဖြင့်ရောင်းချ လျက် ရှိနေကြောင်း နတ်တလင်းမြို့ကုန်စုံဆိုင်များမှ သိရှိရပါသည်။

DOCA(ပဲခူး)

ဘားအံမြို့၊ မတ် လ ၁၇ ရက်

          ၂၀၂၅ခုနှစ် မတ်လ တတိယပတ်တွင် ကရင်ပြည်နယ်ဒေသထွက် မြေပဲများ အရောင်းသွက် လျက်ရှိကြောင်းသိရသည်။ မြေပဲကို ဘားအံမြို့ အနီးတစ်ဝိုက်ကျေးရွာများမှ စိုက်ပျိုးထွက်ရှိသည်။ မြေပဲများသည် ဒီဇင်ဘာလတွင် စတင်ထွက်ရှိပြီး ယခင်လဒေသထွက်မြေပဲဈေး (၁)ပြည်လျှင် (၄၅၀၀)ကျပ်နှင့် ပြုတ်ပြီးသားမြေပဲ (၁)ဗူးလျှင် (၈၀၀)ကျပ် နှင့် ယခုလ ဒေသထွက်မြေပဲ (၁)ပြည်လျှင် (၃၀၀၀)ကျပ်နှင့် ပြုတ်ပြီးသား မြေပဲ (၁)ဗူးလျှင် (၇၀၀/၈၀၀)ကျပ်တို့ဖြင့် အရောင်းအဝယ်ဖြစ်လျက် ရှိနေသည်။ ဈေးနှုန်းကြည့်ခြင်းအားဖြင့် မြေပဲဈေးနှုန်း ကျသော်လည်း မြေပဲပြုတ်ဈေးနှုန်းမကျရ ခြင်းမှာ လောင်စာမီးသွေးဈေးနှုန်း အနည်းငယ်မြှင့် နေခြင်းဖြစ်ကြောင်းသိရသည်။

DOCA(ကရင်)

   မြန်မာလူမျိုးတို့သည် သပြေပန်းကို အခြားသောပန်းများထက် ပိုမိုကြိုက်နှစ်သက်ကြသည်။ သပြေပန်းသည် ယခင်က တောတောင်များ၌သာ တွေ့ရလေ့ရှိကြောင်း၊ ယခုအခါတွင် သပြေပန်းပင် များကို ခြံဖွဲ့၍စိုက်ပျိုးကြပြီး ရောင်းချလျက်ရှိကြောင်း  ပန်းရောင်းချသူများထံမှ သိရသည်။

သပြေပန်းသည် အပွင့်မျိုးမဟုတ်၊ ရိုးတံအသစ်များမှ အရွက်နုကလေးများသည် ပန်းရောင်း၊ အနီရောင်အဆင်းရှိပြီး လူကြိုက်များကြောင်း၊ သပြေပန်းကို အခက်စည်းနှင့် အငုတ်ဟူ၍(၂)မျိုး ရောင်းချကြောင်း၊ မတ်လ တတိယပတ်အတွင်း သပြေပန်းခက်တစ်စည်းလျှင်(၁၅၀၀)ကျပ်၊ သပြေငုတ်ကြီး(၁)ငုတ်လျှင်(၄၀၀၀)ကျပ်နှင့် သပြေငုတ်သေး(၁)ငုတ်လျှင် (၃၀၀၀)ကျပ်ဖြင့်ရောင်း ချကြောင်း လူကြိုက်များသော ပန်းဖြစ်သည့်အတွက် အရောင်းသွက်လျက်ရှိကြောင်း ပန်းရောင်းချသူ များထံမှ သိရသည်။

DOCA(စစ်ကိုင်း)

မေမြို့ပန်းသည် မြန်မာနိုင်ငံ၏ ရာသီဥတုနှင့် လိုက်ဖက်ညီသောပန်းဖြစ်ပြီး၊ မေမြို့ပန်းသည် အဖြူရောင်၊ အဝါရောင် ၊ ပန်းရောင် စသည့်ဖြင့် အရောင်စုံလင်စွာဖြင့် လှပသောပန်းတစ်မျိုးဖြစ်ပြီး လူကြိုက်များသည်။ မေမြို့ပန်းသည် မြန်မာ့ဓလေ့ထုံးတမ်းများတွင် အထူးသဖြင့် ဘာသာရေးနှင့် ပွဲလမ်းသဘင်များတွင် အသုံးပြုလေ့ရှိကြောင်း၊ မေမြို့ပန်းများကို ဘုရားပန်းအဖြစ်ပူဇော်ခြင်း၊ အိမ်တွင်းအလှဆင်ခြင်းများ ပြုလုပ်လေ့ရှိသည်။

ယခုအခါ ကန့်ဘလူခရိုင်အတွင်း မေမြို့ပန်းများ လှိုင်လှိုင်ထွက်ရှိနေကြောင်း၊ စိုက်ပျိုးမှုအနေ ဖြင့် ကန့်ဘလူမြို့ပေါ်ရပ်ကွက်များနှင့် မြို့အနီးရှိကျေးရွာများတွင် စိုက်ပျိုးကြပြီး ကန့်ဘလူမြို့မဈေး သို့လာရောက်ရောင်းချကြောင်း၊ မတ်လ တတိယပတ်အတွင်း မေမြို့ပန်း(၃)ပင်ပါတစ်စည်းလျှင် (၇၀၀)ကျပ်၊ (၁၀)စည်းပါတစ်ထုံးလျှင် (၆၅၀၀)ကျပ်ဖြင့်ရောင်းချကြောင်း လူကြိုက်များသောပန်း ဖြစ်သည့်အတွက် အရောင်းအဝယ်သွက်လျက်ရှိကြောင်း ပန်းရောင်းချသူများထံမှ သိရသည်။

DOCA(စစ်ကိုင်း)

စစ်ကိုင်းတိုင်းဒေသကြီး၊ ကန့်ဘလူမြို့နယ်တွင် စိုက်ပျိုးရလွယ်ကူပြီး မြေနေရာသီးသန့် အကျယ်အဝန်းအများကြီး မလိုတာကြောင့် အိမ်ခြံဝန်းအတွင်း စားသုံးသီးပင်အဖြစ် ဒန့်ဒလွန်ကို စိုက်ပျိုးကြသည်။ ဒန့်ဒလွန်စိုက်ပျိုးရာတွင် ကိုင်းဖြတ်စိုက်ခြင်းနဲ့ အစေ့ကိုတိုက်ရိုက်စိုက်ခြင်းဆိုပြီး (၂)မျိုးရှိကြောင်း၊ ဒန့်ဒလွန် ကိုမိုးဦးကျချိန် ဇွန်လတွင် စိုက်ပျိုးလျှင် အကောင်းဆုံးဖြစ်ကြောင်း ၊ ဒန့်ဒလွန်တစ်ပင်သည် အရွယ်ရောက်လာပါက စိုက်ပျိုးနည်းစနစ်ပေါ်မူတည်ပြီး အသီးတောင့်ရေ (၂၀၀)ခန့်သီးကြောင်း သိရသည်။

          မြန်မာလူမျိုးများသည် ဒန့်ဒလွန်သီး၊ ဒန့်ဒလွန်ရွက်တို့ကို နှစ်သက်စွာ ချက်ပြုတ်စားသောက် ကြကြောင်း၊ ဒန့်ဒလွန်တစ်ပင်လုံးသည် ကျန်းမာရေးအတွက်အကျိုးပြုသော အဟာရဓာတ်များစွာ ပါဝင်ကြောင်း၊ ကန့်ဘလူမြို့မဈေးတွင် ဒန့်ဒလွန်သီး (၅)တောင့်ပါတစ်စီးလျှင် ငွေကျပ် ၃၀၀၊ အတောင့်လှလျှင်(၅)တောင့်ပါတစ်စီးကို ငွေကျပ် ၅၀၀ ဖြင့်ရောင်းချကြောင်း၊ မိမိတို့နေအိမ်ခြံဝန်းမှ စိုက်ပျိုးထွက်ရှိသည့်အတွက် စားစရာဟင်းတစ်ခွက်အပြင် အသီး၊အရွက်တို့ကို ခူးဆွတ်ရောင်းချ ခြင်းဖြင့် မိသားစုဝင်ငွေရရှိကြောင်း သိရသည်။

DOCA(စစ်ကိုင်း)