ပြည်တွင်းကုန်သွယ်မှုသတင်း

     ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်ရှိ  သီလဝါစက်မှုဇုန်၊ Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်းရှိမြို့နယ်များနှင့် အခြားတိုင်းဒေသကြီးပြည်နယ် များရှိ ကိုယ်စားလှယ်များသို့ စားအုန်းဆီများ နေ့စဉ်ထုတ်ပေးလျက်ရှိပါသည်။ စားအုန်းဆီအား ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အပတ်စဉ်ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည် ဖြန့်ဖြူးရောင်းချသူများအနေဖြင့် ဒေသအရောက်ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေးနှင့် ဈေးနှုန်းအဆမတန်မြှင့်တင်ရောင်းချခြင်းများမပြုလုပ်စေရေးတို့အတွက်လည်း ဝန်ထမ်းများအနေဖြင့် ကွင်းဆင်းကြပ်မတ်ဆောင်ရွက်လျက်ရှိကြောင်းနှင့် (၂၂-၁-၂၀၂၄) ရက်နေ့မှ (၂၇-၁-၂၀၂၄)ရက်နေ့အထိ ဆီကုမ္ပဏီ (၁၇)ခုနှင့် စားအုန်းဆီတန်ချိန် (၇၃၁၇.၈၈၃)တန်ထုတ်ပေးခဲ့ကြောင်းသိရှိရပါသည်။

DOCA(ရန်ကုန်)

          ပြည်ပဲမျိုးစုံဈေးကွက်အတွင်းသို့ ဆောင်းပဲသစ်မျိုးစုံအဝင်များလာပြီဖြစ်ပါသည်။ အဆိုပါ ပဲသစ်များထဲတွင် ပဲစင်းငုံသစ် သီးနှံသည်လည်း နှစ်ဆန်းပိုင်းမှစ၍ ပဲသစ်တဖြည်းဖြည်း ဝင်ရောက် လာပြီး ယခုတစ်ပတ်မှာတော့ ပဲအထွက်လှိုင်နေပြီဖြစ်လို့ ပဲဝင်ရောက်မှုလည်း တစ်ရက်အိတ် ၅၀၀/၆၀၀ ကျော်အထိ ဝင်ရောက်ခဲ့ပါသည်။ ပဲစင်းငုံသီးနှံအား ဝယ်လိုအားအနေဖြင့် လှောင်သမားများနှင့် ရန်ကုန်ဝယ်လက်သမားများ ဝယ်ယူလျက်ရှိတာကြောင့် ဝင်ရောက်လာသမျှ အရောင်းအဝယ်ဖြစ်ခဲ့ပါသည်။ ပဲစင်းငုံသီးနှံဈေးမှာ ပိဿာ(၂၀)တစ်တင်းလျှင် ၁၁၅၀၀၀ကျပ်ဖြင့် အရောင်းအဝယ်ဖြစ်နေသည့်အတွက် ယခုနှစ်ပဲဈေးကွက်မှာ ဈေးကောင်းဝင် သီးနှံထဲပါဝင်နေတဲ့ ပဲသီးနှံတစ်မျိုး ဖြစ်ခဲ့ကာ နှစ်အလိုက်ဈေးနှုန်းများအရလည်း ရှေ့ကနှစ်များထက် ယခုနှစ်ဈေးနှုန်း ပိုရလျက်ရှိသည်ကို အောက်ပါအတိုင်းလေ့လာတွေ့ရှိရပါသည်-

စဉ်               ခုနှစ်             ကာလ                    ဈေးနှုန်း

၁။                ၂၀၂၀            ဇန်နဝါရီလ              ၂၂၂၀၀(ကျပ်)

၂။                ၂၀၂၁            ဇန်နဝါရီလ              ၂၆၀၀၀(ကျပ်)

၃။                ၂၀၂၂            ဇန်နဝါရီလ              ၄၂၀၀၀(ကျပ်)

၄။                ၂၀၂၃            ဇန်နဝါရီလ              ၅၇၅၀၀(ကျပ်)

၅။                ၂၀၂၄            ဇန်နဝါရီလ              ၁၁၅၀၀၀(ကျပ်)

          ၂၀၂၀ခုနှစ် နှစ်ဆန်းပိုင်းတွင် ပဲစင်းငုံသီးနှံသည် ပိဿာ(၂၀)တစ်တင်း ၂၂၂၀၀ ကျပ်ဖြင့် အခြား ပဲများသည် ကျပ်(၃)သောင်းအထက်ဈေးကောင်းခဲ့သော်လည်း ပဲစင်းငုံသီးနှံသည် ဈေးအနိမ့်ဖြင့်သာ ရောင်းဝယ်ခဲ့ကြပါသည်။ ၂၀၂၁ ခုနှစ်၊ နှစ်စမှာတော့ ယခင်နှစ်ကထက် ဈေးအနည်း ငယ်ပိုလာ သော်လည်း ပြည်ပဈေးကွက်ဝင်မတ်ပဲနှင့် ပဲတီစိမ်းသီးနှံများထက် ဈေးပိုလာခြင်းမရှိဘဲ အဆိုပါ ပဲများထက် ဈေးလျော့နည်းရောင်းဝယ်ခဲ့ကြပါသည်။ ၂၀၂၂ ခုနှစ် နှစ်ဆန်းပိုင်းပဲသစ်ဈေးမှာ ဈေး မြင့်တက်လာပြီး ပဲတစ်တင်း ၄၂၀၀၀ကျပ်ဖြင့် ရရှိလာသည့်အတွက် ပဲဈေးကွက်မှာ မတ်ပဲသီးနှံ နည်းတူ ဈေးမြင့်တက်လာပြီး ပဲတီစိမ်းသီးနှံထက်ပင် ဈေးပိုသွားခဲ့ကြောင်း လေ့လာသိရှိရပါသည်။

          ၂၀၂၃ ခုနှစ်မှာတော့ ပြည်ပဝယ်လက် မတ်ပဲ၊ ပဲတီစိမ်း၊ ကုလားပဲ စသည့်သီးနှံများလည်း ဈေးမြင့်တက်လာသလို ပဲစင်းငုံသီးနှံကလည်း ဈေးပြိုင်မြင့်တက်လာခဲ့တာကြောင့် ပိဿာ ၂၀ တစ်တင်း ၅၇၅၀၀ကျပ်မှ ၅၈၀၀၀ကျပ်အထိ ရရှိခဲ့လို့ မတ်ပဲ၊ ပဲတီစိမ်းသီးနှံများထက်ပင် ဈေးပိုရရှိ လာခဲ့ပါသည်။ ယခု ၂၀၂၄ခုနှစ် ၊ နှစ်ဆန်းပိုင်းတွင် ပဲသီးနှံအားလုံးလိုလို ဈေးကောင်း ရရှိလာခဲ့ပြီး ပဲစင်းငုံသီးနှံဟာဆိုလျှင် ပဲသစ်ဝင်လာချိန် တစ်တင်းကျပ် (၁)သိန်းကျော်အထိ မြင့်တက်လာခဲ့ကာ ပဲဈေးကွက်မှာ မတ်ပဲသီးနှံထက်ဈေးပိုရခဲ့ပါသည်။ ဝယ်လိုအားအနေဖြင့်လည်း ဝင်လာသမျှ အဝယ်ရှိခဲ့လို့ နေ့စဉ်အရောင်းအဝယ်သွက်နေခဲ့သလို ဈေးနှုန်းလည်း အခြားပဲများ ထက်ပိုရလျှက် ရှိကာ ဆောင်းပဲသစ်ဈေးကွက်မှာ ဈေးအမြင့်ဆုံးဖြင့် ရောင်းဝယ်နေခဲ့သည့် ပဲသီးနှံဖြစ်ပါသည်။ (၅)နှစ်တာကာလ ဈေးနှုန်းနှိုင်းယှဉ်မှုအရ ပဲစင်းငုံသီးနှံသည် ၂၀၂၀ခုနှစ်နှင့် ၂၀၂၁ခုနှစ်များတွင် ပဲဈေးကွက်မှာ ဈေးအေးနေခဲ့သည့် သီးနှံဖြစ်ခဲ့ပြီး ၂၀၂၂ခုနှစ် ဩဂုတ်လမှစ၍ ပဲဈေးနှုန်း တစ်နှစ် ထက် တစ်နှစ်မြင့်တက်လာခဲ့ကာ ၂၀၂၄ ခုနှစ်မှာတော့ အမြင့်ဆုံးဈေးဖြင့် မတ်ပဲ၊ ပဲတီစိမ်း သီးနှံများထက်ပင် ဈေးပိုရလာသလို နှစ်အလိုက်ပဲဈေးနှုန်းဈေးကွက်မှာလည်း ဈေးအမြင့်ဆုံးရခဲ့သည့် ပဲသီးနှံဖြစ်ကြောင်းရေးသားတင်ပြလိုက်ရပါသည်။

DOCA(ပဲခူး)

   ပြည်မြို့၏ ဈေးကွက်တွင် သံပုရာသီးများဈေးနှုန်းမြင့်တက်လျက်ရှိပါသည်။ သံပုရာသီးမှာ နွေသီးနှင့် မိုးသီးဟူ၍ (၂)ရာသီသီးပြီး ယခုအချိန်တွင် နွေသံပုရာသီးများ ဈေးကွက်တွင် အရောင်းအဝယ်ကောင်းသဖြင့် ဈေးနှုန်းများ မြင့်တက်လာကြောင်း သိရပါသည်။ ပြည်ဈေးကွက်သို့ ဝင်ရောက်လာသော သံပုရာသီးများမျာ ပြည်မြို့အနီး ပတ်ဝန်းကျင်ရှိ ကျေးရွာများနှင့် ပေါက်ခေါင်း၊ ပေါင်းတလည်ဘက်ရှိ သံပုရာစိုက်ပျိုးသော ကျေးရွာများမှ လာရောက်ရောင်းချကြောင်း သိရပါသည်။ သံပုရာပင်မှာ နှစ်ရှည်ပင်ဖြစ်၍ တစ်ပင်စိုက်ပျိုးထားလျင်  နှစ်ပတ်လည် စားသုံးရောင်းချနိုင်သောအပင် ဖြစ်ပါသည်။ သံပုရာပင်တစ်ပင်ကို စိုက်ပျိုးထားလျင် သံပုရာသီးထွက်ပေါ်ချိန်တွင် (၁၀)ရက် တစ်ခါ သို့မဟုတ် (၁၅)ရက်တစ်ခါ ခူးဆွတ်ရပါသည်။ တစ်ခါခူးလျှင် သီးနှုန်းအားကောင်းလျှင် (၅၀၀) လုံးကျော်ထိ ခူးဆွတ်ရရှိကြောင်း သိရပါသည်။ သံပုရာသီးဈေးနှုန်းများမှာ ယခုအချိန်တွင် သီးသော အသီးမှာ နွေသီးဖြစ်၍ တစ်လုံးလျှင် လက်ကားဈေး (၂၀၀)ကျပ်အထိရောင်းချကြပြီး လက်လီဈေးမှာ တစ်လုံးလျှင် (၂၅၀/၃၀၀)ကျပ်အထိ ရောင်းချကြောင်း သိရပါသည်။ နွေရာသီတွင် သီးသော သံပုရာသီးမှာ အထွက်နှုန်းနည်းသော်လည်း ယခုနှစ်တွင် သီးနှုန်းအားကောင်းသဖြင့် သံပုရာပင် စိုက်ပျိုးသူများအနေဖြင့် ယခုနှစ်တွင် တွက်ခြေကိုက်သော နှစ်ဖြစ်ပါသည်။ သံပုရာပင်မှာ စိုက်ပျိုးရာတွင် အရင်းအနှီးနည်းပြီး တစ်ခါစိုက်ပျိုးလျှင် နှစ်ရှည်စားသုံးနိုင်သောအပင်ဖြစ်၍ စိုက်ပျိုးသင့်သော သီးနှံတစ်မျိုးဖြစ်ပါသည်။

DOCA(ပဲခူး)

   ပြည်ဈေးကွက်မှာ လက်လီ/လက်ကား ပဲမျိုးစုံရောင်းဝယ်လျက်ရှိရာ မတ်ပဲ၊ ပဲတီစိမ်း၊ ကုလားပဲ၊ ပဲစင်းငုံ၊ ပဲကြီး စသည့်သီးနှံများ လက်ကားရောင်းဝယ်မှုဖြစ်ကြပြီး လက်လီ‌ရောင်းဝယ်မှု အဖြစ်များသည့် ပဲမှာ ကျွန်ုပ်တို့ နံနက်စာတွင် နေ့စဉ်လိုလိုပါဝင်နေသည့် စားတော်ပဲ၊ သီးနှံ ဖြစ်ပါသည်။ စားတော်ပဲသီးနှံသည် လက်ကားသမား၊ လက်လီသမားရောင်းဝယ်မှု ပိုဖြစ်ပြီး နှစ်စဉ်လိုလို အခြားပဲများအားလုံးထက် ဈေးပိုရလျက်ရှိခဲ့ပါသည်။ ၂၀၂၂ ခုနှစ် နောက်ပိုင်း၊ ပဲဈေးနှုန်း ဈေးကွက်ဖြစ်သော  စားတော်ပဲသီးနှံဈေးမှာ ပိဿာ ၂၀ တစ်တင်းလျှင် ကျပ် (၁)သိန်းအထိ ဈေးကောင်းရရှိခဲ့ကာ ပဲဈေးကွက်အတွင်း ဈေးအမြင့်ဆုံးဖြင့် စံချိန်တင်မြင့်တက်လာခဲ့သည့် ပဲသီးနှံဖြစ်ခဲ့ပါသည်။ နှစ်စဉ် ဆက်လက်ဈေးကောင်းရလာပြီး ယခု ၂၀၂၄ နှစ်ဆန်းပိုင်းမှာလည်း ပဲတစ်တင်း (၁၂၅၀၀၀) ကျပ်ဖြင့် ပဲဟောင်းလက်ကျန်မှာ လက်လီဝယ်ယူမှုများဖြင့် ရောင်းဝယ်နေခဲ့ရကြောင်း သိရှိရပါသည်။

DOCA(ပဲခူး)

         နိုင်ငံတော်အနေဖြင့် ပြည်ပသွင်းကုန်အစားထိုး ပြည်တွင်းကုန်ထုတ်လုပ်မှုမြင့်မားတိုးတက် စေရေးအတွက် အသေးစား၊ အလတ်စား စက်မှုလက်မှုလုပ်ငန်းများဖွံ့ဖြိုးတိုးတက်ရေးကို ဦးစားပေး ကဏ္ဍတစ်ခုအဖြစ် တွန်းအားပေးဆောင်ရွက်လျက်ရှိပါသည်။ စားသုံးသူရေးရာဦးစီးဌာန အနေဖြင့် လည်း ၂၀၁၆ ခုနှစ်၊ ဧပြီလ (၁)ရက်နေ့မှစ၍ ပြည်တွင်း/ပြည်ပမှ ထုတ်လုပ်တင်သွင်းလာသည့် ကုန်စည်နှင့် ဝန်ဆောင်မှုများအပေါ် နိုင်ငံသားအားလုံး ဘေးအန္တရာယ်ကင်းရှင်းစွာ အသုံးပြုနိုင်ရေး စားသုံးသူ အခွင့်အရေးပြည့်ပြည့်ဝဝရရှိစေရေးအတွက် စားသုံးသူကာကွယ်ရေးဥပဒေပါပြဌာန်းချက် များနှင့်အညီ ဆောင်ရွက်ပေးလျက်ရှိသလို ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါ တာဝန်ယူဆောင်ရွက်လျက်ရှိပါသည်။ ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် စားသုံးသူ ရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူး၊ ဦးမင်းဆွေနှင့် ဝန်ထမ်းများသည် ပြည်မြို့နယ်၊ မြရွာကျေးရွာ၊ လမ်းဆုံရှိ တောင်သူအကျိုးပြုလယ်ယာသုံးစက်ကိရိယာများ ထုတ်လုပ် ရောင်းချနေသော စိန်ကမ္ဘာဦး ကုမ္ပဏီမှ တာဝန်ရှိသူများ၊ ကြံစိုက်ပျိုးထုတ်လုပ်သူ တောင်သူများနှင့် သွားရောက်တွေ့ဆုံ၍ လုပ်ငန်းဆောင်ရွက်နေမှု အခြေအနေများအား လေ့လာမေးမြန်းခဲ့ရာ ကုမ္ပဏီအနေဖြင့် တောင်သူအကျိုးပြု ကြံစိုက်စက်နှင့် ကြံခင်းဓါတ်မြေဩဇာချစက်များအား ထိုင်းနိုင်ငံနည်းပညာအခြေခံ၍ အရည်အသွေးကောင်းမွန်စွာထုတ်လုပ်ထားပြီး ယနေ့အထိ ကြံစိုက်စက် (၂)စီးနှင့် ကြံခင်းဓါတ်မြေဩဇာချစက် (၃)စီးထုတ်လုပ်ရောင်းချထားကြောင်း သိရပါသည်။

ကြံစိုက်စက်

          ကျွန်တော်တို့ မြန်မာနိုင်ငံသည် လယ်ယာစိုက်ပျိုးရေးကို အခြေခံ၍ အခြားစီးပွားရေးကဏ္ဍများ ဘက်စုံဖွံ့ဖြိုးတိုးတက်အောင်ဆောင်ရွက်နေသော နိုင်ငံတစ်ခုဖြစ်ပါသည်။ လက်မှုလယ်ယာစနစ်မှ စက်မှုလယ်ယာစနစ်ကို ပြောင်းလဲကျင့်သုံးလျက်ရှိတဲ့ နိုင်ငံလည်းဖြစ်ပါသည်။ ကြံစိုက် တောင်သူများအနေဖြင့် ကြံစိုက်ရာသီတွင် အစိုဓါတ်အမီ ထွန်ယက်စိုက်ပျိုးနိုင်မှသာ အရည်အသွေးကောင်း၊ အထွက်နှုန်းကောင်းမှာဖြစ်ပါသည်။ စိန်ကမ္ဘာဦးကုမ္ပဏီသည် ကြံစိုက်တောင်သူများ ရာသီချိန် အမီ ထွန်ယက်စိုက်ပျိုးနိုင်ရေးအတွက် ဈေးနှုန်းသက်သက်သာသာဖြင့် ကြံစိုက်စက်များကို ထုတ်လုပ်ရောင်းချပေးနေပြီး စက်တန်ဘိုးမှာ ကျပ်သိန်း (၉၀)ဝန်းကျင်ဖြစ်သလို တစ်နှစ် အာမခံပေးထားကြောင်း သိရပါသည်။ ထိုင်းနိုင်ငံမှ တိုက်ရိုက်ဝယ်ယူမည်ဆိုပါက ကြံစိုက်စက် တစ်စီးလျှင် ကျပ်သိန်း (၁၂၀)ကျော်ပေးရမှာ ဖြစ်ပါသည်။ တောင်သူများအနေဖြင့် ကိုယ်ပိုင်ဝယ်ယူနိုင်ခြင်းမရှိသော်လည်း တစ်ဆင့်ငှားစနစ်ဖြင့် ငှားရမ်းသုံးစွဲနိုင်မှာဖြစ်ပါကြောင်း၊ ငှားရမ်းခအနေဖြင့် ဆီဈေးနှုန်းအတက်အကျပေါ်မူတည်၍ စက်မောင်းအပါ (၃)ဦး တစ်ဧကလျှင် ကျပ် (၈၀၀၀ဝိ/-) နှုန်းဖြင့် ငှားရမ်းနိုင်ကြောင်း သိရပါသည်။ ကြံစိုက်စက်ကိုအသုံးပြု၍ စိုက်ပျိုးပါက လုပ်သား အင်အားလျော့ချနိုင်သဖြင့် လုပ်သားခချွေတာနိုင်ခြင်း၊ ကြံတစ်ဧကလျှင် မျိုးကြံ (၂)တန်ခန့်သာ လိုအပ်သလို (၈)နာရီအတွင်း (၅)ဧကစိုက်ပျိုးနိုင်မှာဖြစ်ပါသည်။ ကြံစိုက်စက်ဖြင့် စနစ်တကျ စိုက်ပျိုးသည့်အတွက် မျိုးကြံ အလေအလွင့်မရှိခြင်း၊ အချိန်တိုအတွင်း ဧကများများစိုက်ပျိုးနိုင်ခြင်း၊ စိုက်စနစ် မှန်၍ အထွက်နှုန်းကောင်း၊ အရည်အသွေးကောင်း အကျိုးအမြတ်များများရရှိနိုင်မှာဖြစ်ပါသည်။

ကြံခင်းဓါတ်မြေဩဇာချစက်

          စိန်ကမ္ဘာဦးကုမ္ပဏီသည် ကြံစိုက်စက်များအပြင် ကြံခင်းဓါတ်မြေဩဇာချစက်များကိုပါ ထုတ်လုပ်ရောင်းချပေးနေကြောင်းသိရှိရပါသည်။ စက်တန်ဖိုးမှာ ကျပ်သိန်း (၈၀)ဖြစ်ပါသည်။ ငှားရမ်း အသုံးပြုမည်ဆိုပါက တစ်ဧကလျှင် (၄၀၀၀ဝိ/-)၊ ဓါတ်မြေဩဇာ (၂)အိတ်၊ ကြာချိန် (၃)နာရီ ဖြစ်ပါသည်။ လူအင်အားဖြင့် ကျဲပက်ပါက တစ်ရက်ကို (၁)ဧကကျော်လောက်သာပြီးကြောင်း၊ ဓါတ်မြေဩဇာအလေအလွင့်များပြီး အပင်အတွက်ထိရောက်မှုမရှိနိုင်ကြောင်း တောင်သူများထံမှ သိရပါသည်။ ကြံခင်းဓါတ်မြေဩဇာချစက်ဖြင့် ကျဲပက်လျှင် အပင်မြစ်ခြေအထိ ဝင်ရောက်သည့် အတွက် ပိုမိုထိရောက်ပြီး အလေအလွင့်နည်းပါး၍ အထွက်နှုန်းပိုမိုထွက်ရှိမှာဖြစ်ပါသည်။

          စိန်ကမ္ဘာဦးကုမ္ပဏီသည် ဓါတ်ဆီအင်ဂျင်ဖြင့်သာ စက်ပစ္စည်းများထုတ်လုပ်နေရသည့် အတွက် အမှာရှိသလောက် ထုတ်လုပ်နိုင်မှုမရှိသေးကြောင်း၊ လျှပ်စစ်မီးများရရှိပါက စက်တန်ဘိုးလျော့၍ ရောင်းနိုင်မည် ဖြစ်သလို ကြံစိုက်တောင်သူများအနေနှင့်လည်း သက်သက်သာသာဖြင့် ဝယ်ယူအသုံးပြုနိုင်မှာဖြစ်ပါကြောင်း ရေးသားတင်ပြအပ်ပါသည်။

DOCA(ပဲခူး)