ပြည်တွင်းကုန်သွယ်မှုသတင်း

   မိုးစပါးအသစ်ဈေးအနေဖြင့် ကရင်မစပါးဈေးနှုန်းမှာ ၂၀၂၃ခုနှစ်၊ ဒီဇင်ဘာလ ဒုတိယပတ်တွင် ၄၆ပေါင်ပါ တင်း၁၀၀လျှင် ၁၇၀၀၀၀၀ကျပ်သာရှိခဲ့ပြီး ယခုဒီဇင်ဘာလ နောက်ဆုံးပတ်တွင် ၄၆ပေါင်ပါ တင်း၁၀၀လျှင် ၁၈၅၀၀၀၀ကျပ်၊ ကရင်မဆန်ဈေးနှုန်းမှာမူ ၆၀၀၀၀ကျပ်မှ (၆၈၀၀၀-၇၀၀၀၀) ကျပ်ထိဈေးနှုန်းမြင့်တက်ခဲ့ပြီး မှော်ဘီစပါးဈေးမှာ စပါးကောင်းသည့်အတွက် ဈေးကောင်းရနေပါသည်။ ယခင်တွင် မှော်ဘီစပါးဈေးနှုန်းမှာ ၁၉၀၀၀၀၀ကျပ်၊ ယခုဒီဇင်ဘာလ နောက်ဆုံးပတ်တွင် ၁၉၃၀၀၀၀ကျပ်နှင့် မှော်ဘီဆန်တစ်အိတ်လျှင် ၆၉၀၀၀ကျပ်မှာ ဆန်အသစ်ဈေးနှုန်းဖြစ်ပါသည်။

    ဧည့်မထအုပ်စုစပါးဈေးနှုန်းများမှာ အရောင်းအဝယ်မရှိတော့ဘဲ ယခုအခါတွင် စပါးကြီး (ခေါ်)  သက်ရင့်စပါးများဖြစ်သည့် မှော်ဘီ၊ ကရင်မစပါးများသာ အရောင်းအဝယ်ရှိနေပါသည်။ ဈေးကွက်အတွင်း၌ ဆန်အသစ်များသာအရောင်းအဝယ်ရှိနေပြီး  ဆန်သစ်ဆင်းသွယ်တစ်အိတ်လျှင် ၆၈၀၀၀ကျပ်၊ ရတနာတိုးတစ်အိတ်လျှင် ၆၇၀၀၀ကျပ်၊ မနောသုခတစ်အိတ်လျှင် ၆၈၀၀၀ကျပ်၊ ရိုးနီရှယ်တစ်အိတ်လျှင် ၉၀၀၀၀ကျပ်ဖြင့် ပြည်ဈေးကွက်အတွင်း အရောင်းအဝယ်ရှိနေပြီး ဆန်ကွဲကြီး Extra တစ်အိတ်လျှင် ၅၀၀၀၀ကျပ်၊ ဆန်ကွဲ 2.3.4 တစ်အိတ်လျှင် ၄၈၀၀၀ကျပ်၊ ဆန်ကွဲတစ်အိတ်လျှင် ၄၉၀၀၀ကျပ်နှင့် ဖွဲနုတစ်ပေါင်လျှင် ၂၆၀ကျပ်တို့ဖြင့် အရောင်းအဝယ်ရှိနေပါသည်။

    ပေါ်ဆန်းဆန်ဈေးနှုန်းမှာ ပုသိမ်ပေါ်ဆန်းဆန်အသစ်တစ်အိတ်လျှင် ၁၂၀၀၀၀ကျပ်ဖြင့်အရောင်းအဝယ်ရှိနေပြီး ဈေးကွက်အတွင်းရောင်းချနေသော ပေါ်ဆန်းဆန်များမှာ ပြည်ခရိုင်အတွင်း အနည်းငယ်သာစိုက်ပျိုးကြသည့် ပေါ်ဆန်းဆန်များပင်ဖြစ်ပါသည်။

   ပြည်မှရန်ကုန်သို့ ဆန်တင်ပို့ရောင်းချမှုမှာ ရက်သတ္တပတ်(၇)ရက်အတွင်း အိတ်၁၄၀၀ခန့်တင်ပို့ရောင်းချမှုရှိပြီး တောင်သူများနေဖြင့် ယခု (၂၀၂၃-၂၀၂၄) ခုနှစ်တွင် တစ်ဧကလျှင် ၇၅၀၀၀၀ကျပ်သာကုန်ကျသည့်အတွက် စပါးဈေးနှုန်းကြီးမြင့်ခြင်းကြောင့် အကျိုးအမြတ်များပိုမိုရရှိကြောင်းသိရပါသည်။

DOCA(ပဲခူး)

   ပဲခူးတိုင်းဒေသကြီး ၊ ပြည်ပဲမျိုးစုံဈေးကွက်တွင် ဈေးအမြင့်ဖြင့် ရောင်းဝယ်လျက်ရှိသော ပဲသီးနှံမှာ ပဲကြီးသီးနှံဖြစ်ပြီး ပဲလက်ကျန်များ နေ့စဉ်အရောင်းအဝယ်ဖြစ်ခဲ့ပါသည်။ ပဲသစ်များ ဝင်ရောက်လာခြင်း မရှိသေးဘဲ ပဲဟောင်းလက်ကျန်များကိုသာ ဒေသတွင်း ပဲကြော်ဖိုလုပ်ငန်းသမားများ အဓိက ဝယ်ယူမှုရှိကြပါသည်။  တစ်ရက်လျှင် အိတ် ၂၀၀/၃၀၀ ကျော် ရောင်းဝယ်မှုဖြစ်ပြီး ပဲဈေးမှာ (ရွှေကျွန်း) တစ်တင်း ၁၂၇၀၀၀ ကျပ်၊ (ကမ်းနား) တစ်တင်း ၁၂၅၀၀၀ ကျပ်ဖြင့် ရောင်းဝယ်မှုဖြစ်ကြပါသည်။  ပဲကြီးသီးနှံသည် နှစ်စဉ်လိုလို ဈေးကောင်းရနေသည့်အတွက် ဈေးကွက်အတွင်း  မတ်ပဲ၊ ကုလားပဲ သီးနှံများထက်ပင် ဈေးပိုမြင့်ခဲ့ကြောင်း သိရပါသည်။ ယခင်နှစ်က ကာလတူ ချိန်မှာလည်း ပဲကြီးသီးနှံသည် ပဲဈေးကွက်မှာ အခြားပဲများထက် ဈေးကောင်းပိုရခဲ့ကြောင်း လေ့လာသိရှိရပါသည်။ယခင်နှစ်က ကာလတူချိန် ပဲကြီးသီးနှံဈေးမှာ (ရွှေကျွန်း) တစ်တင်း ၇၅၀၀၀ ကျပ်၊(ကမ်းနား)တစ်တင်း ၇၁၀၀၀ ကျပ်ဖြင့် အသီးသီးရောင်းဝယ်မှု ဖြစ်ခဲ့ကြောင်း သိရပါသည်။

DOCA(ပဲခူး)

    ပဲခူးတိုင်းဒေသကြီး ၊ ပြည်ပဲဈေးကွက်သို့ ဆောင်းပဲတီစိမ်းသစ်များ နေ့စဉ် ဝင်ရောက်လာပြီး အထွက် လှိုင်လာပြီဖြစ်လို့ တစ်ရက်လျှင် အိတ်ရေ ၇၀၀/၈၀၀ ကျော်ထိ ဝင်ရောက်မှုရှိလာခဲ့ပါသည်။ ပြည်အနီးတစ်ဝိုက် ဒေသများမှ ဝင်ရောက်ခြင်းဖြစ်သလို ပေါင်းတလည်၊ ပေါက်ခေါင်းမြို့နယ်များမှလည်း ဝင်ရောက်ခဲ့ခြင်း ဖြစ်ပါသည်။ ဝယ်လိုအားအနေဖြင့် မန္တလေးလိုင်းသမား အဓိက ဝယ်ယူမှုရှိကာ တစ်ခါတစ်ရံ ရန်ကုန်ဝယ်လက်များလည်း ဝယ်ယူမှုရှိကြောင်း သိရပါသည်။ ဈေးနှုန်းအနေဖြင့် ပဲတစ်တင်း ၆၄၀၀၀ ကျပ်မှ ၆၅၀၀၀ ကျပ်အထိ ပဲအရည်အသွေးပေါ်မူတည်၍ ရောင်းဝယ်မှုဖြစ်ကြပါသည်။ ယခုနှစ် ကုန်ပိုင်းကာလတွင် ပဲဈေးကွက်အတွင်း ပဲသီးနှံအားလုံးလိုလို ဈေးကောင်းရနေတာကြောင့် ပဲတီစိမ်းသီးနှံသည်လည်း အခြားပဲများနည်းတူ ဈေးမြင့်တက်လာခဲ့ပါသည်။ ပဲသစ်စဝင်ချိန်ကာလ ပဲတစ်တင်း ၅၄၀၀၀  ကျပ်ဖြင့်သာ ရောင်းဝယ်ခဲ့ကြသည့်အတွက် ယခုလမှာ တစ်တင်း ကျပ် ၁သောင်းကျော်အထိ မြင့်တက်လာခဲ့ပါသည်။ ပဲတီစိမ်းသီးနှံသည် မတ်ပဲ၊ကုလားပဲ သီးနှံများကဲ့သို့ တစ်နှစ်တာကာလပတ်လုံး ဈေးကွက်အတွင်း ရောင်းဝယ်နေခြင်းမဟုတ်ဘဲ ပဲထွက်ပေါ်ချိန် ကာလတွင်သာ ရောင်းဝယ်မှုအဖြစ် များတဲ့သီးနှံဖြစ်ပါသည်။ ပဲတီစိမ်းသီးနှံအား ပြည်ခရိုင်တွင် မိုးပဲနှင့်  ဆောင်းပဲ  ၂ ရာသီ ထွက်ပေါ်ကြောင်း သိရပါပြီး မိုးပဲတီစိမ်းသီးနှံမှာ ဈေးကွက်သို့ ဇူလိုင်၊ ဩဂုတ်လများတွင် ဝင်ရောက်ခဲ့ကာ ဆောင်းပဲတီစိမ်းသီးနှံကတော့ နိုဝင်ဘာ၊ဒီဇင်ဘာလများတွင် အများအပြား ဝင်ရောက်မှုရှိသည်ဟု သိရပါသည်။

DOCA(ပဲခူး)

    ပြည်ဈေးကွက်တွင် အရသာခါးသက်မှုရှိသော တမာရွက်ကို တမာချဉ်များအဖြစ် အချဉ်ဖောက်ထားကာ ဈေးကောင်းရလျက် အရောင်းအဝယ်ဖြစ်လျက်ရှိပါသည်။ ပြည်ဒေသအနီးရှိ ကျေးရွာများနှင့် ပြည်မြို့အနောက်ဘက်ကမ်းရှိ ဖိုးဦးတောင်၊ ညောင်ပင်သာ၊ မကျီးစုရွာများမှ ၁၀ရက်ခြားတစ်ခါ ဝင်ရောက်မှုရှိပြီး တစ်ခါဝင်လျှင် တမာချဉ်အစည်း (၁၈၀-၂၀၀) ခန့် ပြည်ဈေးကွက်သို့ဝင်ရောက်မှုရှိနေပါသည်။ တမာရွက်နုနုကို ရေနွေးကျိုက်ကျိုက်ဆူ၌ နွမ်းသွားရုံနှစ်ကာ ဆယ်၍ အေးအောင်ထားကာ ကြိုပြီးသားဆီးသီးရည်ထဲတွင် ဆားငန်ငန်ခတ်ပြီးသည့်နောက်တွင် တမာရွက်နုနုအစည်းများကို အိုးသန့်သန့်ထဲသို့ ဝင်အောင်ထည့်၍ ကြပ်ကြပ်ဖိသိပ်ထားပြီး အပေါ်မှ ဆားကို မနည်းမများဖြူးကာ ဖက်လုံလုံဖြင့်ပိတ်ထား၍ အချဉ်တည်ရပါမည်။ တချို့မှာ မန်ကျည်းမှည့်ဖြင့်ပြုတ်၍လည်း အချဉ်တည်စားသုံးကြောင်းသိရပါသည်။ တမာချဉ်ကို ခရမ်းချဉ်သီးငါးပိချက်၊ ငါးငါးပိရည်ကျို ငရုတ်သီးစပ်စပ်ဟင်းများနှင့်တွဲကာ တို့စရာအဖြစ် တွဲဖက်စားသောက်ကြပါသည်။ ပြည်တမာချဉ်များကို ပြည်မြို့ပေါ်ရှိ ဈေးများအပြင် ရန်ကုန်ဈေးကွက်သို့လည်းတင်ပို့ပြီး ဈေးနှုန်းမှာ တမာချဉ်တစ်စည်းလျှင် (၅၀၀-၆၀၀-၇၀၀) ကျပ်နှုန်းများဖြင့် အသီးသီးရောင်းချလျက်ရှိကြောင်းသိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဒုတိယဦးစီးမှူး ဒေါ်သူဇာကျော်သည် ပြည်တွင်းတစ်နိုင်တစ်ပိုင်မြေပဲဆုံဆီလုပ်ငန်းများဖွံ့ဖြိုးတိုးတက်ရန်အတွက် (၂၆-၁၂-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် ပခုက္ကူမြို့ပေါ်ရှိ မြေပဲဆုံဆီလုပ်ငန်းရှင်နှင့်တွေ့ဆုံ၍ မြေပဲဆုံဆီဈေးနှုန်း/ဈေးကွက်၊ ထုတ်လုပ်နိုင်မှုအခြေအနေများကို မေးမြန်းဆွေးနွေးခဲ့ကြောင်းသိရှိရပါသည်။

     မြေပဲဆုံဆီများကို ယခင်ထက်ပို၍ ကြိတ်ခွဲရကြောင်း၊ ဆုံကြိတ်သည့်အိမ်သို့လာရောက်၍ မြေပဲဆံကိုဝယ်၍ ကြိတ်ခွဲသူများရှိကြသည့်အပြင် မြေပဲဆံကို ဈေးကွက်ပေါက်ဈေးအတိုင်းရောင်းချပေးပြီး ကြိတ်ခွဲရသည်များလည်းရှိကြောင်း၊ ယခင်နှစ်များ၌ မြေပဲဆုံဆီကြိတ်ခွဲနှုန်းနည်းပါးပြီး ယခုနှစ်၌ လျှပ်စစ်မီးလာသည့်အချိန်တိုင်း ကြိတ်ခွဲရကြောင်း၊ (၁)ဆုံကြိတ်ခွဲလျှင် (၁)နာရီ (သို့မဟုတ်) (၀၁:၃၀)နာရီခန့်ကြိတ်ခွဲရကြောင်း၊ မြေပဲအမျိုးအစားပေါ်မူတည်၍ ကြိတ်ခွဲချိန်မတူညီကြောင်း၊ အမှာရှိသောအခါ ညအချိန်လျှပ်စစ်မီးလာချိန်တွင် ကြိတ်ခွဲရကြောင်း၊ ဆီကြိတ်ခွဲခအနေဖြင့် (၅)ပိဿာဝင်(၁)ဆုံလျှင် ကျပ်(၁၅၀၀)ယူပြီး မြေပဲဆုံဆီတစ်ပိဿာလျှင် ကျပ်(၁၄၀၀၀)ဖြင့်ရောင်းချကြောင်း၊ ဈေးကွက်အနေဖြင့် ပခုက္ကူမြို့ပေါ်နှင့် မုံရွာ၊ မိုးကုတ်၊ ရန်ကုန်မြို့ကို အဓိကထားတင်ပို့ရောင်းချကြောင်း၊ ပဲဖတ်တစ်ပိဿာလျှင် ကျပ်(၂၁၀၀)ဖြင့် တိရစ္ဆာန်စာအဖြစ် အိမ်တိုင်အရောက် လာရောက်ဝယ်ယူကြကြောင်း မြေပဲဆုံဆီလုပ်ငန်းရှင်တစ်ဦး၏ ပြောကြားချက်အရသိရှိရပါသည်။

  မြေပဲဆုံဆီကို ကုန်အမှတ်တံဆိပ်ဖြင့် ထုတ်လုပ်ဖြန့်ဖြူးရောင်းချပါက  စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်များကို ပြည့်စုံစွာထည့်သွင်းရမည်ဖြစ်ကြောင်း၊ ကုန်အမှတ်တံဆိပ်ကို ပြသရာတွင် ပြည့်စုံမှုမရှိသေးသဖြင့် ထပ်မံဖော်ပြရမည့်အချက်များကို ချပြရှင်းလင်းခဲ့ပြီးနောက် ပြင်ဆင်ရန်လိုအပ်ကြောင်းနှင့် ပြည့်စုံမှုရှိပါက ကုန်အမှတ်တံဆိပ်နမူနာများနှင့်တကွ စိစစ်အတည်ပြုပေးနိုင်ရန်အတွက် စားသုံးသူရေးရာဦးစီးဌာနသို့ လာရောက်လျှောက်ထားနိုင်ကြောင်း အသိပေးဆွေးနွေးခဲ့မှုကိုသိရှိရပါသည်။

DOCA(မကွေး)