ပြည်တွင်းကုန်သွယ်မှုသတင်း

  ပြည်ခရိုင်၊ ပန်းတောင်းမြို့နယ် ငါးဆယ်ပေးအုပ်စု၊ တောင်ပို့ကွင်းကျေးရွာတွင် တောင်ကုန်းများ၊ လယ်ကန်သင်းများပေါ်တွင် ဆီးသီးပင်များစိုက်ပျိုးထားရှိသလို အလေ့ကျလည်း ပေါက်ရောက်ကြပါသည်။ ယခုလိုအချိန်ဖြစ်သော ဆောင်းရာသီတွင် ဆီးသီးများ စတင်ထွက်ပေါ်လာသဖြင့် ခူးယူ ရောင်းချလျက်ရှိကြောင်း သိရပါသည်။ ထွက်ရှိလာသောဆီးသီးများကို ဝယ်ယူရာတွင် တစ်နေ့လျှင် ဆီးသီး တင်း(၂၀)မှ (၃၀)အထိ ဝယ်ယူရောင်းချလျက်ရှိပြီး အစိမ်းနှင့် အမှည့်ရောရာကိုလည်း ဝယ်ယူကြောင်း သိရပါသည်။ ဆီးသီးဈေးနှုန်းအနေဖြင့် အစိမ်း တစ်တင်းလျှင် ၁၀၀၀၀ကျပ်၊ ဆီးသီးအမှည့် တစ်တင်းလျှင် ၆၀၀၀ကျပ်ဖြင့် ဝယ်ယူရောင်းချကြောင်း သိရပါသည်။ ဆီးသီးအစိမ်းနှင့် အမှည့်ရောရာကို ‌အစိမ်းသတ်သတ်၊ အမှည့်သတ်သတ်ရွေးပြီး အစိမ်းကို ဧရာဝတီတိုင်း ဟင်္သာတမြို့သို့တင်ပို့ရောင်းချသလို ဆီးသီးအမှည့်ကို နေလှန်း အခြောက်ခံပြီး ဆီးသီးခြောက်များကို အောင်လံမြို့ရှိ ဇီးခွဲစက်သမားများက လာရောက်ဝယ်ယူ သိရပါသည်။ ထို့ကြောင့် ဆီးသီးပင်မှာ အလေ့ကျပင်ဖြစ်သလို စိုက်ပျိုးရသော အပင်ဖြစ်ပြီး နှစ်ရှည်ပင်ဖြစ်၍ ဆီးသီးစိုက်ပျိုးထားလျှင် နှစ်စဉ်ဝင်ငွေရသဖြင့် စိုက်ပျိုးသင့်သည့် သီးနှံဖြစ်ကြောင်း ရေးသားတင်ပြလိုက်ရပါသည်။

DOCA(ပဲခူး)

    ပဲခူးတိုင်းဒေသကြီး၊ တောင်ငူခရိုင်တွင် သကြားစက်(၄)လုံးရှိရာ ယခုအခါတွင် ကြံများပေါပြီဖြစ်သဖြင့် လည်ပတ်ပြီး သကြားများထုတ်လုပ်လျက်ရှိနေပြီဖြစ်ပါသည်။ ရေတာရှည်မြို့နယ်၊ အောင်ချမ်းသာသကြားစက်တွင် ကြံတန်ချိန် ၆၀၀၀၀၊ မြို့လှသကြားစက်တွင် ကြံတန်ချိန် ၁၀၀၀၀၀၊ အုတ်တွင်းမြို့နယ်၊ ဗောဓိကုန်းသကြားစက်တွင် ကြံတန်ချိန် ၇၀၀၀၀နှင့် ဖြူးမြို့နယ်၊ ဇေယျဝတီသကြားစက်တွင် ကြံတန်ချိန် ၆၀၀၀၀ဝယ်ယူ၍ လည်ပတ်ရန်လျာထားကြောင်းသိရပါသည်။

       ရေတာရှည်မြို့နယ်မှ အောင်ချမ်းသာသကြားစက်နှင့် မြို့လှသကြားစက်တို့သည် ကွင်းဈေး ၁၃၅၀၀၀ကျပ်၊ စက်ရုံအရောက်ဈေး ၁၅၀၀၀၀ကျပ်၊ အုတ်တွင်းမြို့နယ်၊ ဗောဓိကုန်းသကြား စက်နှင့် ဖြူးမြို့နယ်၊ ဇေယျဝတီသကြားစက်တို့သည် ကွင်းဈေး ၁၁၀၀၀၀ကျပ်၊ စက်ရုံအရောက်ဈေး ၁၂၅၀၀၀ကျပ်ဖြင့် ကြံတောင်သူများထံမှဝယ်ယူကြောင်းသိရပါသည်။

     ကြံရောင်းချသူတောင်သူများအား ကြံတန်ချိန်နည်းလျှင် ကြံဖိုးငွေကို စက်ရုံမှ ချက်ချင်းပေးချေပြီး ကြံတန်ချိန်များလျှင် ကြံဖိုးငွေကို တစ်ရက်စောင့်ရကြောင်းသိရပါသည်။ စက်ရုံအလိုက် ကြံစိုက်တောင်သူများအား စိုက်ပျိုးစရိတ်ကို ကြိုတင်ထုတ်ပေးထားကြောင်းလည်းသိရပါသည်။

     လက်ရှိအခြေအနေအထိ ပျှမ်းမျှကြံတန် ၁၀၀လျှင် သကြား ၉.၄၂တန်ထွက်ရှိသဖြင့် လျာထားချက်အတိုင်း ကြိတ်ခွဲနိုင်ပါက တောင်ငူခရိုင်တွင် ယခုနှစ်အတွင်း သကြားတန်ချိန် ၂၇၃၀၀တန်ထွက်ရှိမည်ဖြစ်ကြောင်းသိရပါသည်။

DOCA(ပဲခူး)

   စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံ တွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျ စရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိပါ သည်။

    ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက် နှင့် ဈေးနှုန်းဖြစ်ပေါ်မှုများအရ ၂၀၂၄ ခုနှစ်၊ ဇန်နဝါရီလ ၈ ရက်နေ့မှ ဇန်နဝါရီလ ၁၄ ရက်နေ့ အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၄,၉၅၅ ကျပ်ဖြစ်ကြောင်း ထုတ်ပြန်ကြေညာထားပါသည်။

   ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေးထုတ် ပြန်ထားသည်။

    အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန ၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

     ၂၀၂၄ခုနှစ်၊ ဇန်နဝါရီလဆန်းတွင် ပြည်ကုန်စိမ်းဈေးကွက်အတွင်းသို့ အောင်ပန်းမှ ကုန်စိမ်းကားအဝင် (၁) ရက်ခြားရှိ၍ ပြည်မြို့အနီးနားရှိ မှော်ဇာ၊ ဝက်ပုတ်၊ အင်းမမှလည်း ပြည်သို့တင်ပို့မှုရှိပြီး ရန်ကုန်ဒေသထွက် ကုန်စိမ်းသီးနှံများကိုမူ  သီရိမင်္ဂလာဈေး၊ ဒညင်းကုန်းသို့ တိုက်ရိုက်တင်ပို့ရောင်းချကြကြောင်းသိရပါသည်။ ပွင့်လင်းရာသီဖြစ်သောကြောင့် ဟင်းသီးဟင်းရွက်၊ အသီးအနှံပေါများနေသော်လည်း သယ်ယူပို့ဆောင်ခစရိတ်ကြီးမြင့်သောကြောင့် ဈေးနှုန်းများမှာ ယမန်နှစ်များကဲ့သို့ အနည်းငယ်မျှ ဈေးချိုခဲ့ခြင်းမရှိပေ။ ပြည်မြို့မဈေးကြီးအတွင်းရှိ ကုန်စိမ်းလက်ကားလက်လီဒိုင်ကြီးမှ ကောက်ယူရရှိသော ကုန်စိမ်းဈေးနှုန်းများမှာ ဂေါ်ရခါးညွန့် (၁) စည်းလျှင် ၈၀၀ကျပ်၊ ရေမုံညင်း (သို့) ထိုင်ဝမ်မုံညင်း (အကြီး) (၁) စည်းလျှင် ၃၀၀ကျပ်၊ (အသေး) ၂၅၀ကျပ်၊ ကိုက်လန် (၁) စည်းလျှင် ၈၀၀ကျပ်၊ ယိုးဒယားမုန်လာဥနီ (၁)ပိဿာလျှင် ၅၀၀၀ကျပ်၊ ကြာစွယ် (၁၀) ကျပ်သားလျှင် ၁၈၀၀ကျပ်၊ ဘေဘီပြောင်းဖူး၁တွဲလျှင် ၂၀၀ ၏ကျပ်၊ မုံညင်းစိမ်း (၂၅) ကျပ်သားလျှင် ၅၀၀ ကျပ်၊ ဂေါ်ဖီထုပ်အချောတစ်ထုပ်လျှင် ၁၅၀၀ကျပ်၊ ပန်းဂေါ်ဖီ (ချော) တစ်ထုပ်လျှင် ၆၀၀ကျပ်၊ ရွှေပဲ (၁၀) ကျပ်သားလျှင် ၁၂၀၀ကျပ်၊ ဗိုလ်စားပဲ (၁၀) ကျပ်သားလျှင် ၃၀၀ကျပ်၊ ငရုတ်ပွ (၁၀) ကျပ်သားလျှင် ၆၀၀ကျပ်၊ ဂေါ်ရခါးသီး (၁) လုံးလျှင် ၂၅၀ကျပ်၊ ဒေသထွက်ခရမ်းချဉ်သီး (၁) ပိဿာလျှင် ၁၂၀၀ကျပ်၊ ရှမ်းခရမ်းချဉ် သီး (၁) ပိဿာလျှင် ၁၂၀၀ကျပ်၊ ဗမာခရမ်းချဉ်သီး (၁) ပိဿာလျှင် ၂၀၀၀ကျပ်၊ ခရမ်းသီး (၁) လုံးကြီးလျှင် ၁၅၀ကျပ်၊ အလတ် ၁၀၀ကျပ်၊ ပန်းဂေါ်ဖီအစိမ်းတစ်ထုပ်လျှင် ၁၅၀၀ကျပ်၊ သကြားပြောင်း (၁)ဖူးလျှင် ၅၀၀ကျပ်၊ ငြုပ်နီ (၁၀) ကျပ်သားလျှင် ၅၀၀ကျပ်၊ တရုတ်နံနံ (၁) စည်းလျှင် ၆၀၀ကျပ်၊ ရှမ်းကိုက်လန် (၁) စည်းလျှင် ၁၀၀ကျပ်၊ ပဒဲကော (၁၀) ကျပ်သားလျှင် ၁၅၀၀ကျပ်၊ ဂေါ်ရခါးသီး (၁) လုံးလျှင် ၂၅၀ကျပ်နှင့် ပီနံစစ်စစ် (၁) ပိဿာလျှင် ၈၀၀၀ကျပ်ဈေးနှုန်းတို့ဖြစ်ကြောင်းသိရှိရပါသည်။

DOCA(ပဲခူး)

    ပြည်ခရိုင်၊ ပေါက်ခေါင်းမြို့နယ်၊ သဖန်းချိုကျေးရွာတွင် ငရုတ်သီးစိမ်း(ကျောက်စိမ်း)သီးများစိုက်ပျိုးထားသဖြင့် စိုက်ပျိုးထွက်ရှိမှုနှင့် ဈေးနှုန်းဈေးကွက်အခြေအနေများကိုသိရှိစေရန် ကွင်းဆင်းလေ့လာခဲ့ပါသည်။

   ပေါက်ခေါင်းမြို့နယ်၊ သဖန်းချိုအုပ်စု၊ သဖန်းချိုကျေးရွာတွင် ငရုတ်သီးစိမ်း (ကျောက်စိမ်းသီး) စိုက်ပျိုးထားသော တောင်သူဦးစိုးနိုင်နှင့်တွေ့ဆုံ၍ ကွင်းဆင်းလေ့လာခဲ့ပါသည်။ ငရုတ်သီးစိမ်းစိုက်ပျိုးသည့်ဧကမှာ (၀.၂၅)ဧကကို ဝါခေါင်လမှစ၍ နယုန်လအထိစိုက်ပျိုးနိုင်ပြီး တန်ဆောင်မုန်းလနှင့် နတ်တော်လတွင်ထွက်ရှိကြောင်းသိရပါသည်။ စိုက်ပျိုးသောအပင်ရေပေါင်းမှာ (၁၅၀၀)ခန့်ရှိပြီး ကုန်ကျစရိတ်အနေဖြင့် (၆၈၅၀၀၀)ကျပ်ကုန်ကျကြောင်းသိရပါသည်။ ငရုတ်သီးစိမ်း စတင်ခူးဆွတ်ချိန်တွင် ပိဿာချိန် (၅၀)ခန့်ခူးဆွတ်နိုင်ပြီး (၁၅)ရက်ခြားတစ်ခါ ခူးဆွတ်ရပါသည်။ ငရုတ်သီးထွက်ရှိမှုမှာ (၈၀၀)ပိဿာခန့်ထွက်ရှိသဖြင့် ငရုတ်သီးစိမ်းထွက်ရှိချိန်တွင် ဝင်ငွေပေါင်းမှာ (၀.၂၅) ဧကတွင် (၁၂၀၀၀၀၀)ခန့်ရရှိပြီး အကျိုးအမြတ်အနေဖြင့် (၅၁၅၀၀၀)ကျပ်ကျော်ရရှိကြောင်းသိရပါသည်။ ထွက်ရှိသောငရုတ်သီးစိမ်းများကို နယ်မြို့များသို့တင်ပို့ရောင်းချပြီး တစ်ပိဿာလျှင် (၁၅၀၀)ကျပ်ဖြင့်ရောင်းချကြောင်းသိရပါသည်။ ကုန်စိမ်းသမားတချို့မှာ စိုက်ခင်းအထိဆင်း၍ ဝယ်ယူနေကြကြောင်းသိရပါသည်။

        ငရုတ်သီးစိမ်းစိုက်ပျိုးခြင်းဖြင့်လည်း မိသားစုတစ်နိုင်တစ်ပိုင်ဝင်နှင့် အကျိုးအမြတ်လည်းရရှိနိုင်မည်ဖြစ်ပါကြောင်း ရေးသားတင်ပြလိုက်ရပါသည်။

DOCA(ပဲခူး)