ပြည်တွင်းကုန်သွယ်မှုသတင်း

      မန္တလေးတိုင်းဒေသကြီး ၊  ကျောက်ဆည်မြို့နယ်အတွင်းရှိ ကျေးလက်တောရွာများရှိ တောင်သူများသည် စပါး၊ နှမ်း၊ ပဲ၊ ပြောင်း၊ နေကြာစသည့် သီးနှံမျိုးစုံ စိုက်ပျိုးသည့်အပြင် ဟင်းသီး ဟင်းရွက်မျိုးစုံ နှင့် သစ်သီးဝလံများကို တစ်နိုင်တစ်ပိုင်မှ စီးပွားဖြစ်အများအပြား စိုက်ပျိုးလာကြပါ ကြောင်း၊ ၄င်းသီးနှံများအနက်မှ ရုံးပတီသီး သီးနှံကိုလည်းစိုက်ပျိုးကြပါကြောင်း၊ ရုံးပတီသီးပင်သည် ရာသီမ‌ရွေးစိုက်ပျိုးနိုင်ပြီး ဝင်ငွေရလွယ်သော သီးနှံတစ်မျိုးဖြစ်သည့်အတွက် တွက်ခြေကိုက်၍ စိုက်ပျိုးသင့်သော သီးနှံတစ်မျိုးဖြစ်ပါကြောင်း ၊ အများဆုံးစိုက်ပျိုးသောရွာများမှာ ကျောင်းကုန်း ၊ ကလိုင်ကျော် နှင့် အင်ရောင်းကျေးရွာများဖြစ်ပါသည်။ စိုက်ပျိုးသော မျိုးများမှာ ပင်ပုမျိုး ၊ ပင်လတ် မျိုးနှင့်ပင်မြင့်မျိုးများကိုစို က်ပျိုးကြပြီး  (၁)ဧကလျှင် မျိုးစေ့(၁၂) ထုပ်စိုက်ပျိုးရပြီးမျိုးစေ့ (၁)ထုပ် လျှင်(၈၀၀၀-၁၀၀၀၀)ကျပ် ပေးရကြောင်း ၊ (၁)ဧက ကုန်ကျစရိတ်အနေဖြင့် မျိုး ၊ သွင်းအားစု ၊ လုပ်သားခအပါအဝင် စုစုပေါင်း(၈၀၀၀၀၀/-)ကျပ် ဝန်းကျင်ကုန်ကျကြောင်း  ၊ စတင်စိုက်ပျိုးပြီး (၆၀-၇၀)ရက်အကြာတွင် အသီးများ စတင်ခူးဆွတ်နိုင်ပါကြောင်း ၊ ခူးဆွတ်မှုအနေဖြင့် နှစ်ရက်ခြား တစ်ကြိမ်ခူးဆွတ်ပေးနိုင်ပါကြောင်း ၊ သက်တမ်းအနေဖြင့် (၂)လအထိ ခူးဆွတ်ရကြောင်း ၊ စျေးနှုန်း စျေးကွက်အနေဖြင့် လက်ကားစျေးဂျွန် (၁)ပိဿာလျှင် (၁၈၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း၊ကုန်စိမ်းသီးနှံဖြစ်သည့်အတွက်စျေးနှုန်းအတက်အကျရှိနိုင်ပါကြောင်း၊ (၁)ဧကအထွက်နှုန်းအနေဖြင့်ပိဿာ(၁၀၀၀၁၅၀၀)အထိထွက်ရှိကြောင်း၊ အကျိုးအမြတ်အနေဖြင့် (၁၀)သိန်းခန့်မြတ်ပြီး ပွဲစားများမှစိုက်ခင်းထဲများအထိ လာရောက်ဝယ်ယူကြကြောင်း ၊ ရုံးပတီသီး တွင် သံဓာတ်၊ ကယ်လ်ဆီယမ်၊ မဂ္ဂနီဆီယမ်၊ မဂ္ဂနိစ်အပါအဝင် ခန္ဓာကိုယ်အတွက် မရှိမဖြစ်လိုအပ်တဲ့ အခြားသတ္တုဓာတ် များစွာပါဝင်ပါကြောင်း၊ ရုံးပတီသီးသည် အရိုးကျန်းမာရေးအတွက် အရေးပါသလို ကိုယ်တွင်းရှိ အဆစ်အမှေးပါးတွေကိုလည်း ကောင်းမွန်စေပါကြောင်း၊ ရုံးပတီသီးတွင် ပါဝင်သည့်  ပျော်ဝင်နိုင်သည့် အမျှင်ဓာတ်များသည် အစာခြေစနစ်ကို ကောင်းမွန်စေပြီး အစာစားချင်စိတ်ကို လျော့ကျစေနိုင်ပါကြောင်း ၊ အချိန်တန်ကြာအောင် အစာခံစေနိုင်တာကြောင့် ကယ်လိုရီစားသုံးမှု ပမာဏကို တိုင်းတာရာမှာ အထောက်အကူပြုစေနိုင်တဲ့အပြင် ကိုယ်အလေးချိန် ကျအောင် လုပ်ဆောင်နေသူတွေအတွက်လည်း သင့်တော်ပါကြောင်း၊ အမျှင်ဓာတ်ပေါများစွာပါဝင်ခြင်းသည် အူမကြီးကင်ဆာဖြစ်ပွားစေရန် အခွင့်အလမ်းနည်းပါးပါကြောင်း၊ သွေးထဲရှိသကြားဓာတ်ကိုထိန်းပေး နိုင်ပြီး Myricetin ဓာတ်ပါဝင်သောကြောင့် သကြားစုပ်ယူမှုပမာဏ နည်းစေသောကြောင့် ဆီးချိုသမားတွေအတွက် အထူးသင့်တော်တဲ့ စားစရာတစ်မျိုးဖြစ်ပါကြောင်း ၊ ရုံးပတီသီး သီးနှံ စိုက်ပျိုးခြင်းဖြင့် အကျိုးအမြတ်များစွာရရှိသည့်အပြင် စားသုံးမှုအတွက် ကျန်းမာစေမည့် ဟင်းစား ရုံးပတီသီး သီးနှံကိုလည်း တိုးချဲ့စိုက်ပျိုးသင့်ပါကြောင်း တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

      ဝါသီးနှံအား မြန်မာနိုင်ငံတွင် မိုးကြိုရာသီ ၊ မိုးရာသီ နှင့် မိုးနှောင်းရာသီများတွင် စိုက်ပျိုး လျက်ရှိရာ မန္တလေးတိုင်းဒေသကြီး ၊ မြစ်သားမြို့နယ်တွင် မိုးကြိုဝါများ ရိတ်သိမ်းပြီးစီးလုနီးပါးရှိပါ သည်။ယခင်နှစ်တွင် မိုးကြိုဝါအား(၁၀၁၀)ဧက စိုက်ပျိုးနိုင်ခဲ့သော်လည်း ယခုနှစ်တွင်(၂၁၂၅)ဧက စိုက်ပျိုးနိုင်ခဲ့ကြောင်း သက်ဆိုင်ရာဌာန၏စာရင်းများအရသိရှိရပါသည်။ မိုးကြိုဝါအား ဖေဖော်ဝါရီလ လယ်မှမတ်လအတွင်းစတင်စိုက်ပျိုးပြီး တောင်သူများမှာ Raca နှင့် B 31 မျိုးများကို စိုက်ပျိုးကြ သော်လည်း တောင်သူအများစုမှာ အထွက်နှုန်းကောင်းမွန်ပြီး ပိုးမွှားအန္တရာယ်ဒဏ်ခံနိုင်ရည်ရှိသည့် Raca မျိုးကို  အများဆုံး စိုက်ပျိုးကြပါသည် ။ Raca မျိုးကို အချို့ တောင်သူများက ကုမ္ပဏီထံမှ ဝယ်ယူပြီးစိုက်ပျိုးကြသော်လည်း အချို့မှာ ယခင်နှစ် ဝါသီးနှံပေါ်ချိန်တွင် ဝါကောက်ပြီးမျိုးအဖြစ် ပြန်လည်အသုံးပြုကြပါသည်။ ဝါစိုက်ပျိုးမှုအနေဖြင့် (၁)ဧကလျှင် ပျိုးထုတ်ဝယ်ယူ၍ စိုက်ပျိုးပါက မျိုးစေ့ထုတ် (၂)ထုတ်ကုန်ကြပြီး ယခင်ဝါသီးနှံပေါ်ချိန်၌ ကောက်ယူထားသော မျိုးစေ့အား အသုံးပြုပါက (၅)ပိဿာခန့် ကုန်ကျကြောင်း ၊ မျိုးစေ့ (၁)ထုတ်လျှင် (၅၀၀၀၀/-)ကျပ်နှင့် မျိုးစေ့ (၁)ပိဿာလျှင် (၄၀၀၀/-)ကျပ် ကုန်ကျကြောင်း ၊ မျိုးစေ့ထုတ်ဖြင့် စိုက်ပျိုးပါက (၁) ဧကလျှင် (၁၀၀၀၀၀/-)ကျပ် ကုန်ကျပြီး ဝါကောက်ပြီး ရယူထားသောမျိုးစေ့ စိုက်ပျိုးပါက (၁)ဧကလျှင် (၂၀၀၀၀/-)ကျပ် ကုန်ကျပါသည် ။ (၁)ဧက ကုန်ကျစရိတ်အနေဖြင့် မျိုးစေ့၊ သွင်းအားစု၊ နွားရှဉ်းခ၊ လုပ်သားခအပါအဝင် စုစုပေါင်း (၉၀၀၀၀၀-၁၀၀၀၀၀၀)ကျပ်အထိ ကုန်ကျကြောင်း၊ ဝါထွက်ရှိမှု အနေဖြင့် ယခင်နှစ်တွင် ဝါဖြစ်ထွန်းမှုအပေါ်မူတည်ပြီး (၁)ဧကလျှင် ပိဿာ(၈၀၀-၁၀၀၀)အထိ ထွက်ရှိပြီး ဝါစျေးနှုန်းအနေဖြင့် (၁)ပိဿာလျှင် စတင်ထွက်ရှိချိန်တွင် (၃၀၀၀-၃၅၀၀)ကျပ် ရရှိ၍ လှိုင်လှိုင်ထွက်ပေါ်ချိန်တွင် ဝါအရည်အသွေးကောင်းပါက (၄၀၀၀/-)ကျပ်အထိ ရရှိခဲ့ကြောင်း ၊ ယခုနှစ်တွင် စတင်ထွက်ပေါ်ချိန်၌ ဝါ(၁)ပိဿာလျှင် (၃၀၀၀-၃၅၀၀)ကျပ် စျေးနှုန်းရှိခဲ့ပြီး ယခု စက်တင်ဘာလဆန်းတွင် ဝါအမျိုးအစားပေါ်မူတည်ပြီး (၁)ပိဿာလျှင်(၄၁၀၀-၄၁၅၀)အထိ ဝါစျေးနှုန်းများ မြင့်တက်လာသည့်အတွက် ဝါစိုက်တောင်သူများအတွက် အကျိုးအမြတ်များ ဖြစ်ထွန်းလာကြောင်း ဝါကုန်သည်များထံမှ သိရှိရပါသည်။

DOCA(မန္တလေး)

      တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့သည် ပင်လယ်ကမ်းရိုးတန်းဒေသဖြစ်သောကြောင့် ဒေသခံများမှာ အဓိကအားဖြင့် ရေလုပ်ငန်းဖြင့် အသက်မွေးဝမ်းကျောင်းပြုကြပြီး ဖမ်းဆီးရရှိသော အသားငါးများကို ဒေသရှိစျေးကွက်များနှင့် အနယ်နယ်အရပ်ရပ်သို့ တင်ပို့ရောင်းချကြကြောင်း သိရှိရပါသည်။ ၂၀၂၅ခုနှစ်၊ စက်တင်ဘာလ ပထမပတ်အတွင်း မြိတ်မြို့အတွင်း ရောင်းချနေသော ငါးစျေးနှုန်းများမှာ ဘီဇင်းတစ်ပိဿာလျှင် (၁၃၀၀၀)ကျပ်၊ ဘီဇင်းရံကားတစ်ပိဿာလျှင် (၁၉၀၀၀)ကျပ်၊ ဘာသီတစ်ပိဿာလျှင် (၇၀၀၀)ကျပ်၊ ဇယောတစ်ပိဿာလျှင် (၁၇၅၀၀)ကျပ် နှုန်းတို့ဖြင့် ရောင်းချလျက်ရှိကြောင်း သိရှိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊   မြိတ်မြို့နယ်တွင် ယခုစက်တင်ဘာလတွင် အိမ်ဆောက် ပစ္စည်းများ အရောင်းအဝယ်ကောင်းလျက်ရှိပါသည်။ အိမ်ဆောက်ပစ္စည်းများထဲတွင် ဘိလပ် မြေသည် မရှိမဖြစ်သော အရာဖြစ်သည်။ ဘိလပ်မြေကို ပြည်တွင်းဘိလပ်မြေ စက်ရုံများ အပြင် ဝယ်ယူသုံးစွဲကြသည့်အပြင် ပြည်ပဘိလပ်မြေများကိုလည်း ဝယ်ယူသုံးစွဲကြောင်း သိရှိရပါသည်။ 

      မြိတ်ခရိုင် မြိတ်မြို့နယ်တွင် ရောင်းချနေသောဘိလပ်မြေများဖြစ်သည့်  ဆင်နီ တစ်အိတ်လျှင်  (၃၀၀၀၀)ကျပ်၊ ကြံ့တစ်အိတ်လျှင် (၂၈၀၀၀)ကျပ်၊ Apacheတစ်အိတ်လျှင် (၂၇၅၀၀)ကျပ်ရှိကြောင်း ဘိလပ်မြေအရောင်းဆိုင်များမှ သိရှိရပါသည်။

DOCA(တနင်္သာရီ)

    ထန်းလျက်သည် မြန်မာရိုးရာအစားအစာတစ်ခုဖြစ်ပြီး လူတွေရဲ့ကျန်းမာရေးကို အလွန်ပင် အထောက်အကူဖြစ်စေပါသည်။ ထန်းလျက်ကို မြန်မာတွေက ထမင်းစားပြီးလျှင် အချိုတည်းစရာအဖြစ်စားတတ်ကြပါသည်။ ထန်းလျက်သည်အစာကြေလွယ်ပြီး သွေးအားကို သန့်ရှင်း စေခြင်း၊ ထန်းလျက်ကိုဂျင်းနှင့်ရောစားပေးလျှင် အဆစ်အမြစ်နာကျင်ခြင်းကိုကာကွယ်ပေးခြင်း၊ ကိုယ်ဝန်ဆောင်မိခင်များကို ကိုယ်ဝန်လွယ်စေပြီး သွေးအားနည်းခြင်းကို ကာကွယ်ပေးနိုင်ခြင်းစသည့် အကျိုးကျေးဇူးများလည်း ရရှိစေပါသည်။

          ယခင်၂၀၂၅ခုနှစ်၊ စက်တင်ဘာလ ပထမပတ်တွင် မြိတ်မြို့ပေါ်ရှိ ကုန်မျိုးစုံအရောင်းဆိုင်များတွင် ရောင်းချနေသော ထန်းလျက်သည် တစ်ပိဿာလျှင်(၉၀၀၀)ကျပ်ရှိပြီး ယခုစက်တင်ဘာလ ပထမပတ်တွင် (၁၀၅၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)