ပြည်တွင်းကုန်သွယ်မှုသတင်း

       မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်တွင် ကွမ်းရွက်များကို ဧရာဝတီတိုင်းဒေသကြီး၊ ကနောင်၊ မြန်အောင်၊ ပဲခူးတိုင်းဒေသကြီး၊ ပေါက်ခေါင်း၊ ပေါင်းတလည်၊ စစ်ကိုင်းတိုင်းဒေသကြီး၊ မုံရွာမြို့ရှိ ကွမ်းခြံများမှ တိုက်ရိုက်ဝယ်ယူရောင်းချကြောင်း၊ ကွမ်းသီးများကို ထားဝယ်မှ တိုက်ရိုက်တင်ပို့သည့် ပြည်မြို့ရှိ ကွမ်းဒိုင်မှတစ်ဆင့် မှာယူရောင်းချကြောင်း၊ ကွမ်းစားထုံးကို မကွေးမှဝယ်ယူရောင်းချပြီး နှပ်ဆေးနှင့်ဗမာဆေးကို မုံရွာနှင့်ပခုက္ကူမှ ဝယ်ယူရောင်းချကြောင်းသိရသည်။

         မင်းလှမြို့နယ်တွင် ကွမ်းသီး၊ ကွမ်းရွက် လက်လီ/ လက်ကားရောင်းချသည့်ဆိုင် (၁၀)ဆိုင်ခန့်ရှိပြီး ကွမ်းစိမ်းနှင့်ကွမ်းရွက်ဝါ(၂)မျိုးရှိသည့်အနက် ကွမ်းရွက်ဝါကို ပိုအစားများကြကြောင်း သိရှိရပါသည်။ ကွမ်းရွက်ဈေးနှုန်းအနေဖြင့် ၂၀၂၄ခုနှစ်၊ ဇူလိုင်လ(စတုတ္တပတ်)တွင် ကွမ်းရွက်ဝါ(၁) ပိဿာလျှင် ကွမ်းရွက်အကြီး၊ အသေးနှင့် ဝယ်ယူတင်သွင်းရသည့် နေရာဒေသအလိုက် ကျပ်(၄၀၀၀-၆၀၀၀-၉၀၀၀)၊ ကွမ်းသီးခြမ်း(၁)ပိဿာလျှင် ကျပ်(၁၀၀၀၀)၊ ကွမ်းသီးစိပ်(၁)ပိဿာလျှင် ကျပ် (၈၀၀၀)၊ ကွမ်းစားထုံး(၁) လီတာ(၁)ဘူးလျှင် ကျပ် (၉၀၀-၁၀၀၀)၊ ကွမ်းစားနှပ်ဆေး (၁)ထုပ်လျှင် ကျပ်(၅၀၀-၆၀၀)၊ ဗမာဆေး(၁)ထုပ်လျှင် ကျပ်(၄၀၀-၅၀၀) စသည့်ဈေးနှုန်းများဖြင့် ရောင်းချလျက်ရှိကြောင်းသိရှိရပါသည်။

       အရောင်းအဝယ်အနေဖြင့် (၁)ရက်လျှင်ကွမ်းရွက်ပိဿာချိန် (၁၀)ပိဿာနှင့်အထက်ရောင်းချရပြီး ကွမ်းသီး၊ ကွမ်းစိပ်မှာ (၅)ပိဿာမှ (၆)ပိဿာထိပုံမှန်ရောင်းချရကြောင်း၊ ကွမ်းရွက်ဈေးနှုန်းမှာ ကွမ်းရွက်ထွက်ရှိရာဒေသများတွင် ကွမ်းရွက်များလှိုင်လှိုင်ထွက်ပေါ်နေလျက်ရှိသောကြောင့် ကွမ်းရွက်ဈေးနှုန်းမှာ ဇူလိုင်လ (ပထမပတ်)ထက် ယခု(စတုတ္တပတ်)တွင် ကျပ်(၁၀၀၀) ဈေးဆက်လက်ကျဆင်းပြီး ကွမ်းသီးဈေးမှာ ထားဝယ်မြို့မှ သယ်ယူရသဖြင့် လမ်းခရီးအခက်အခဲများကြောင့် ကျပ်(၂၀၀၀)ဈေးမြင့်၍ အရောင်းအဝယ်ဖြစ်လျက်ရှိကြောင်း အထက်မင်းလှ-သရက်ကားလမ်းဘေးရှိ ကွမ်းသီး၊ ကွမ်းရွက်ရောင်းချသည့် ကွမ်းဆိုင်ပိုင်ရှင်တစ်ဦးထံမှသိရှိရပါသည်။

DOCA(မကွေး)

          မကွေးတိုင်းဒေသကြီး၊ မကွေးခရိုင်၊ မကွေးမြို့ရှိ အိမ်ဆောက်ပစ္စည်းအရောင်းဆိုင်များဖြစ်သော မြ၊ ပွင့်သာ၊ လမ်းသစ်၊ ပါရမီ၊ ရွှေဂန္ဓာ၊ ရွှေမြန်မာ၊ ဆန်းသစ်၊ စိန်ကျောက်ဆူးနှင့် ဆန်းရှိုင်း အစရှိသည့်ဆိုင်များတွင် သွပ်၊ သံ၊ အခြားပစ္စည်းများနှင့် ဘိလပ်မြေ၊ ထုံးများရောင်းချလျက်ရှိပါသည်။ ထိုဆိုင်များတွင် ဘိလပ်မြေများကို ဇူလိုင်လအတွင်း မန္တလေးတိုင်းဒေသကြီး၊ ကျောက်ဆည်မြို့၊ ဘိလပ်မြေစက်ရုံမှ ဘိလပ်မြေအိတ်ရေ (၂၅၅၉၅)အိတ်နှင့် သာစည်မြို့နယ်ရှိ ပြည်ညောင်မှ ဘိလပ်မြေအိတ်ရေ(၁၄၅၁၅)၊ စုစုပေါင်းအိတ်ရေ၄၀၁၁၀)ဝင်ရောက်ခဲ့ကြောင်း သိရှိရပါသည်။

        ၂၀၂၄ခုနှစ်၊ ဇူလိုင်လ(စတုတ္ထပတ်)တွင်ဖြစ်ပေါ်ခဲ့သော ဘိလပ်မြေဈေးနှုန်းများမှာ ကြံ့နှစ်ကောင်ဘိလပ်မြေတစ်အိတ်လျှင် ကျပ်(၉၇၀၀)၊ အယ်လ်ဖာတစ်အိတ်လျှင် ကျပ်(၉၄၀၀)၊ အပါချီတစ်အိတ်လျှင် ကျပ်(၉၄၀၀)ဖြင့်ရောင်းချခဲ့ကြောင်း အိမ်ဆောက်ပစ္စည်းအရောင်းဆိုင်များထံမှသိရှိရပါသည်။ ယခင်ဇွန်လနှင့်နှိုင်းယှဉ်ပါက ယခုဇူလိုင်လတွင် ကြံ့နှစ်ကောင်တစ်အိတ်လျှင် ကျပ်(၃၀၀)ဈေးနှုန်းမြင့်တက်ခဲ့ပြီး အပါချီတစ်အိတ်လျှင် ကျပ်(၁၀၀)ဈေးနှုန်းကျဆင်းခဲ့ကြောင်း၊ ယခုအချိန်သည် မိုးရာသီကာလဖြစ်၍ ဆောက်လုပ်ရေးပစ္စည်းများ အရောင်းအဝယ်အေးလျက်ရှိကြောင်းသိရပါသည်။   

DOCA(မကွေး)

      မြန်မာနိုင်ငံသည် စိုက်ပျိုးရေးကိုအခြေခံပြီး အခြားစီးပွားရေးကဏ္ဍများကိုလည်းဖွံ့ဖြိုးတိုးတက်အောင် ဆောင်ရွက်နေသောနိုင်ငံတစ်ခုဖြစ်သည်။ စစ်ကိုင်းတိုင်းဒေသကြီး၊ ကန့်ဘလူမြို့နယ်တွင်လည်း သီးနှံစိုက်ပျိုးရေးလုပ်ငန်းများအပြင် ကွမ်းခြံများကို မိမိတို့ယာကွက်များ၌လည်း ကောင်း၊ နေအိမ်ခြံဝင်းများ၌လည်းကောင်း မိသားစုဝင်ငွေရရှိသည့်အတွက် စိုက်ပျိုးကြကြောင်းသိရသည်။

      ၂၀၂၄ခုနှစ်၊ ဇူလိုင်လ နောက်ဆုံးပတ်အတွင်းဖြစ်ပေါ်နေသော ကန့်ဘလူခရိုင်၏ကွမ်းဈေးနှုန်းများအနေဖြင့် အရည်အသွေးပေါ်မူတည်၍ ကွမ်းရွက်(ရှယ်)တစ်ပိဿာလျှင် ငွေကျပ်၄၀၀၀ဖြင့်လည်းကောင်း၊ ကွမ်းရွက်(ရိုးရိုး)တစ်ပိဿာလျှင် ငွေကျပ်၂၀၀၀ဖြင့်လည်းကောင်း အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့်   ကန့်ဘလူမြို့နယ်မှထွက်ရှိသည့်ကွမ်းရွက်များကို ကန့်ဘလူမြို့၊ ကျွန်းလှမြို့နှင့် မန္တလေးမြို့တို့သို့တင်ပို့ရောင်းချလျက်ရှိပြီး ဇူလိုင်လ ပထမပတ်တွင် အရောင်းအဝယ်ဖြစ်သည့်ဈေးနှုန်းများနှင့်နှိုင်းယှဉ်ပါက ဇူလိုင်လ နောက်ဆုံးပတ်အတွင်း ကွမ်းဈေးနှုန်းများတည်ငြိမ်၍ အရောင်းအဝယ်ဖြစ်လျက်ရှိကြောင်း ကွမ်းရွက်ရောင်းဝယ်ရေးလုပ်ငန်းရှင်ထံမှသိရှိရပါသည်။

DOCA(စစ်ကိုင်း)

       မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ဇေယျာသီရိဈေးတွင် ဘုရားပန်းအမျိုးမျိုးဖြစ်သော ဂန္ဓာမာပန်း၊ ပန်းထိမ်ငိုပန်း၊ သပြေပန်း၊ နှင်းဆီပန်း၊ ရေမွှေးပန်းနှင့် သစ္စာပန်း များကို မြို့ပေါ်ရှိရပ်ကွက်များ၊ မြို့ပတ်ဝန်းကျင်ရှိ ရွာတော်၊ ညောင်ပင်သာ၊ ဥယျာဉ်၊ ပန်းတော်ပြင်ကျေးရွာများနှင့် မန္တလေးမြို့၊ ပြင်ဦးလွင်မြို့နှင့် ရှမ်းပြည်နယ်၊ တောင်ကြီးမြို့တို့မှ မှာယူရောင်းချကြောင်းသိရပါသည်။

      ၂၀၂၄ခုနှစ်၊ ဇူလိုင်လ(စတုတ္ထပတ်)တွင် ဇေယျာသီရိဈေးအတွင်းဖြစ်ပေါ်နေသော ဘုရားပန်းဈေးနှုန်းများမှာ ဂန္ဓာမာပန်း(၃)ပင်ပါ(၁)စည်းလျှင် ကျပ်(၁၀၀၀)၊ သပြေငုတ်(အသေး၊ အလတ်၊ အကြီး) အရွယ်အစားအလိုက် (၁)ခုလျှင် ကျပ်(၁၀၀၀-၁၅၀၀-၂၀၀၀)၊ ပန်းထိမ်ငိုပန်း(၁၀)ပင်ပါ(၁)စည်းလျှင် ကျပ်(၂၅၀၀)၊ နှင်းဆီပန်း(၁)ပွင့်လျှင် ကျပ်(၃၅၀)၊ သစ္စာပန်း(၃)ပင်ပါတစ်စည်းလျှင် ကျပ်(၃၅၀၀) ဈေးနှုန်းများဖြင့်ရောင်းချလျက်ရှိပြီး ယခင်အပတ်နှင့်နှိုင်းယှဉ်ပါက ယခုအပတ်တွင် ဂန္ဓာမာပန်း ကျပ်(၃၀၀)၊ သပြေပန်း ကျပ်(၂၀၀-၅၀၀-၁၀၀၀)၊ သစ္စာပန်း ကျပ်(၁၅၀၀)ဈေးနှုန်းမြင့်တက်လာခဲ့ကြောင်းသိရပါသည်။ ယခုအချိန်ကာလသည် မင်းလှမြို့နယ်အတွင်းထွက်ရှိသည့် ပန်းစိုက်ခင်းများတွင် မြစ်ရေဝင်ရောက်သောကြောင့် ဒေသတွင်းပန်းများမထွက်ရှိနိုင်၍ ပန်းများကို ရှမ်းပြည်နယ်၊ တောင်ကြီးမြို့၊ မန္တလေးမြို့နှင့် ပြင်ဦးလွင်မြို့တို့မှ မှာယူရောင်းချရသဖြင့် သယ်ယူစရိတ်မြင့်မားသောကြောင့် ဈေးနှုန်းမြင့်တက်ရခြင်းဖြစ်ကြောင်းသိရှိရပါသည်။

DOCA(မကွေး)

      မကွေးတိုင်းဒေသကြီးသည် ဆီထွက်သီးနှံဖြစ်သော မြေပဲ၊ နှမ်း၊ ကြက်သွန်နီနှင့် အခြားပဲမျိုးစုံကို အဓိကထားစိုက်ပျိုးပြီး အခြားတိုင်းဒေသကြီးနှင့်ပြည်နယ်များသို့ တင်ပို့ရောင်းချ လျက်ရှိသည်။

         မကွေးတိုင်းဒေသကြီးအတွင်းရှိ မကွေး၊ တောင်တွင်းကြီး၊ အောင်လံ၊ ရေနံချောင်း၊ ဆိပ်ဖြူနှင့် ပခုက္ကူကုန်စည်ဒိုင်တွင် နှမ်း၊ ကြက်သွန်နီနှင့် ပဲမျိုးစုံသီးနှံများ ပုံမှန်အရောင်းအဝယ်ဖြစ်လျက်ရှိပါသည်။ ၂၀၂၄ခုနှစ်၊ ဇူလိုင်လ(စတုတ္ထပတ်)တွင် ကုန်စည်ဒိုင်များ၌ အရောင်းအဝယ်ဖြစ်ပေါ်နေသောကုန်ပစ္စည်းများ၏ တစ်ပိဿာဈေးနှုန်းများမှာ မကွေးကုန်စည်ဒိုင်တွင် နှမ်းဖြူ ကျပ်(၉၆၆၅)၊ နှမ်းနီ ကျပ်(၈၆၆၅)၊ နှမ်းနက်(စမုံ) ကျပ်(၁၁၀၀၀)၊ ပဲလွန်းဝါ ကျပ်(၂၇၄၀)၊ ပဲတီစိမ်း ကျပ်(၃၂၀၀)၊ ကုလားပဲ(929) ကျပ်(၄၂၉၀)၊ ကုလားပဲ(ဟော်လန်) ကျပ်(၄၂၃၅)၊ ပဲကြီး(ဖြူ) ကျပ်(၃၆၈၅)၊ ပဲထောပတ် ကျပ်(၇၀၀၀)၊ မတ်ပဲ ကျပ်(၅၃၅၀)၊ ပဲစင်းငုံနီ ကျပ်(၇၃၀၀)ဖြစ်ပြီး ယခင်အပတ်ထက် ယခုအပတ်တွင် နှမ်းဖြူ ကျပ်(၃၃၅)၊  နှမ်းနီ ကျပ်(၅၃၅)၊ နှမ်းနက်(စမုံ) ကျပ်(၂၀၀)၊ ပဲတီစိမ်း ကျပ် (၁၅၀)၊ ကုလားပဲ(ဟော်လန်) ကျပ်(၂၅)၊ ကုလားပဲ(929) ကျပ်(၃၀)ဈေးနှုန်းမြင့်တက်ခဲ့ပြီး ပဲကြီးဖြူ ကျပ်(၅၂၅) ဈေးနှုန်းကျဆင်းခဲ့သည်။

      တစ်ပတ်အတွင်း တန်ချိန်(၈၉၀)ခန့်အရောင်းအဝယ်ဖြစ်ခဲ့ပြီး ရန်ကုန်မြို့သို့ ကုလားပဲအိတ် (၃၀၀၀)၊ မန္တလေးမြို့သို့ နှမ်းအိတ်(၈၀၀၀)၊ မြေပဲအိတ်(၁၀၀၀) စုစုပေါင်းအိတ်(၁၂၀၀၀) တင်ပို့ခဲ့ကြောင်းသိရသည်။

      တောင်တွင်းကြီးကုန်စည်ဒိုင်တွင် နှမ်းဖြူသန့်တစ်ပိဿာလျှင် ကျပ်(၈၄၄၅)ဖြစ်ပြီး တစ်ပတ်အတွင်း တန်ချိန် (၄၀.၈၂)ခန့်အရောင်းအဝယ်ဖြစ်ခဲ့ပါသည်။

     အောင်လံကုန်စည်ဒိုင်တွင် သိပ္ပံနှမ်းနက် ကျပ်(၈၄၄၅)၊ ပဲတီစိမ်း ကျပ်(၃၃၅၀)၊ ပဲစင်းငုံနီ ကျပ် (၇၀၅၀)၊ ကုလားပဲ (ဟော်လန်) ကျပ်(၄၂၅၀)၊ ကုလားပဲ(မြကြေး) ကျပ်(၄၃၅၀)၊ ပဲကြီး(သစ်) ကျပ် (၄၂၅၀)၊ မြေပဲဆီဆန်(နီ) ကျပ်(၈၀၀၀)၊ မြေပဲဆီဆန်(ဖြူ) ကျပ်(၈၀၀၀)၊ မတ်ပဲ ကျပ်(၅၃၀၀)၊ ဝါ ကျပ် (၃၁၀၀)ဖြစ်ပြီး ယခင်အပတ်ထက် ယခုတအပတ်တွင် ကုလားပဲ(ဟော်လန်) ကျပ်(၅၀)၊ မြေပဲဆီဆန် (နီ) ကျပ်(၃၀၀)၊ မြေပဲဆီဆန်(ဖြူ) ကျပ်(၂၀၀)ဈေးနှုန်းမြင့်တက်ခဲ့ပြီး ပဲစင်းငုံ(နီ) ကျပ်(၃၀)၊ မတ်ပဲ ကျပ် (၅၀)ဈေးကျခဲ့ပါသည်။ တစ်ပတ်အတွင်း တန်ချိန်(၁၀၅)ခန့်အရောင်းအဝယ်ဖြစ်ခဲ့ကြောင်းသိရသည်။ 

   ရေနံချောင်းကုန်စည်ဒိုင်တွင် ကြက်သွန်နီ ကျပ်(၁၄၀၀-၁၈၀၀)ဖြစ်ပြီး ယခင်အပတ်ထက် ယခုအပတ်တွင် ကြက်သွန်နီ ကျပ်(၁၀၀)ဈေးနှုန်းလျော့နည်းခဲ့ပြီး တန်ချိန်(၉၇.၉၇)ခန့် အရောင်းအဝယ်ဖြစ်ခဲ့ကြောင်းသိရသည်။  

        ဆိပ်ဖြူကုန်စည်ဒိုင်တွင် ကြက်သွန်နီ ကျပ်(၁၂၀၀-၁၈၀၀)ဖြစ်ပြီး ယခင်အပတ်ထက် ယခုအပတ်တွင် ကြက်သွန်နီ ကျပ်(၁၀၀)ဈေးတက်ခဲ့ပြီး တန်ချိန်(၅၇.၉၇)ခန့်အရောင်းအဝယ်ဖြစ်ခဲ့ ကြောင်းသိရသည်။

    ပခုက္ကူကုန်စည်ဒိုင်တွင် ကုလားပဲ(929) ကျပ်(၄၂၆၅)၊ ပဲတီစိမ်း ကျပ်(၃၅၀၀)၊ ပဲစင်းငုံ ကျပ် (၇၀၇၀)၊ ပဲဇီးကွက် ကျပ်(၃၃၀၀)ဖြစ်ပြီး ယခင်အပတ်ထက် ယခုအပတ်တွင် ကုလားပဲ(929) ကျပ်(၅၅)ဈေးမြင့်ခဲ့ပြီး  ပဲတီစိမ်း ကျပ်(၄၀၀)၊ ပဲစင်းငုံ  ကျပ်(၁၀)ဈေးကျခဲ့ပါသည်။  တစ်ပတ်အတွင်း တန်ချိန်(၇၃.၉)ခန့်အရောင်းအဝယ်ဖြစ်ခဲ့ကြောင်းသိရှိရပါသည်။

DOCA(မကွေး)