ပြည်တွင်းကုန်သွယ်မှုသတင်း

          မြန်မာလူမျိုးတို့၏ ထမင်းဝိုင်းများတွင် မပါမဖြစ်စားသုံးကြသည့်ငါးပိသည် မြစ်ဝကျွန်းပေါ် ဒေသများနှင့် ပင်လယ်ကမ်းရိုးတမ်းဒေသများတွင် ပေါများစွာထွက်ရှိလေ့ရှိရာ မြစ်ချောင်းများပေါများသည့် ပဲခူးတိုင်းဒေသကြီး၊ ကဝမြို့နယ်အတွင်းထွက်ရှိသည့် ငါးပိအမျိုးအစားများစွာထဲမှ ငါးရံ့ငါးပိသည် ဈေးကွက်အတွင်း ဈေးကောင်းရရှိလျက်ရှိပြီး ဝယ်လိုအားအင်မတန်ကောင်းသည့် ထုတ်ကုန်ပစ္စည်းတစ်ခုအနေဖြင့် ရပ်တည်လျက်ရှိသည်။ ကဝမြို့နယ်တွင် ငါးရံ့ငါးပိကို ရေကျိုငါးပိနှင့် ငါးရံ့ငါးပိကောင်ဟူ၍ (၂)မျိုးပြုလုပ်လေ့ရှိပြီး ဈေးကွက်အတွင်း ရောင်းချမှုအားကောင်းမှုနှင့် လူကြိုက်များလေ့ရှိသည်မှာ ငါးရံ့ရေကျိုငါးပိဖြစ်ရာ ၎င်းရေကျိုငါးပိအား ငါးပိကြော်အဖြစ်လည်းကောင်း၊ ငပိချက်အဖြစ်လည်းကောင်း၊ ဟင်းခပ်အဖြစ်သော်လည်းကောင်း အမျိုးမျိုးစားသုံးလေ့ရှိကြသည်။

         ငါးရံ့ငါးပိပြုလုပ်ရန် ငါးရံ့ကောင်များကို ရေချိုအရပ်များဖြစ်သည့် အင်း၊ အိုင်၊ ချောင်း၊ မြောင်းများ၊ လယ်ကွင်းများထဲမှ ရရှိလေ့ရှိပြီး နှစ်ဆယ်ကျပ်သား၊ နှစ်ဆယ့်ငါးကျပ်သားရှိသည့် အကောင်များကို ရေကျိုငါးပိပြုလုပ်လေ့ရှိကြောင်းနှင့် အရွယ်အစားကြီးမားသည့်ငါးများအား ငါးပိကောင်အဖြစ် ပြုလုပ်လေ့ရှိကြောင်း ငါးရံ့ငါးပိပြုလုပ်သူတစ်ဦးထံမှသိရသည်။

         ငါးရံ့ငါးပိပြုလုပ်သူများသည် ငါးရံ့ပေါများချိန် ဆောင်းဦးကာလခန့်တွင် တစ်ပိဿာလျှင် (၅၀၀၀) ကျပ်နှုန်းဖြင့်ဝယ်ယူ၍ ငါးပိပြုလုပ်ထားရှိခဲ့ပြီး ယခုစက်တင်ဘာလ၊ တတိယအပတ်တွင် ဈေးကွက်အတွင်း ငါးရံ့ရေကျိုငါးပိတစ်ပိဿာလျှင် (၁၅၀၀၀)ကျပ်နှုန်းနှင့် ငါးပိကောင်(၁)ပိဿာလျှင် (၁၀၀၀၀) ကျပ်နှုန်းအထိ ဈေးကွက်အတွင်း ဈေးကောင်းရရှိလျက်ရှိကြောင်းနှင့် မြန်မာလူမျိုးများ၏ ထမင်းဝိုင်းများတွင် ထမင်းကို အသားငါး၊ ဟင်းလျာနှင့်တွဲဖက်၍ စားသောက်ရသည့်တိုင်အောင် ငါးပိ၊ တို့စရာမပါရှိပါက တင်းတိမ်ကျေနပ်မှုမရှိကြသဖြင့် အခြားငါးပိများထက် အနံ့၊ အရသာလွန်စွာကောင်းမွန်ပြီး အာဟာရမျှတလှသည့် ငါးရံ့ငါးပိမှာ ဈေးကွက်အတွင်း၌ ဝယ်လိုအား၊ ရောင်းလိုအားကျဆင်းသွားမှုမရှိဘဲ ဈေးကွက်အတွင်း ခိုင်မာစွာရပ်တည်နိုင်သည့် ကုန်ပစ္စည်းတစ်ခုဖြစ်ကြောင်း ငါးပိပြုလုပ်သူများနှင့် ငါးပိကုန်သည်များထံမှသိရှိရပါသည်။

DOCA(ပဲခူး)

    မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး ၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ဆီထွက်သီးနှံမျိုးစုံ စိုက်ပျိုးလျက်ရှိရာ နေကြာသီးနှံကိုလည်း စိုက်ပျိုးကြကြောင်း သိရသည်။

    မိုးနေကြာသီးနှံကို ဇွန်လတွင်စတင်စိုက်ပျိုးပြီး စက်တင်ဘာလတွင် ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် ဆင်းရွှေကြာ-၂ မျိုးများကို အများဆုံးစိုက်ပျိုးကြပြီး၊ မြေအနေအထားနှင့် အပင်ပြုစုခြင်းအပေါ်မူတည်၍ အထွက်နှုန်းများကွာခြားမှုရှိကြောင်း၊ ဈေးနှုန်းအနေဖြင့် အောက်တိုဘာလဒုတိယပတ်တွင် နေကြာတစ်တင်းလျှင် ငွေကျပ် ၅၀၀၀၀ ဖြင့် ရောင်းဝယ်လျက်ရှိကြောင်း သိရသည်။

    ဈေးကွက်အနေဖြင့် နေကြာသီးနှံများကို ကန့်ဘလူမြို့၊ ဇီးကုန်းမြို့ပေါ်ရှိပွဲရုံများသို့ ရောင်းချကြပြီး ပွဲရုံများမှ ရွှေဘိုမြို့၊ မန္တလေးမြို့များရှိပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း၊ ယခုပတ်တွင် အရောင်းအဝယ်ဖြစ်လျက်ရှိသော နေကြာသီးနှံဈေးနှုန်းများသည် ယခင်နှစ်ကာလတူထက် ဈေးကောင်းရရှိသောကြောင့် စိုက်ပျိုးသူများအနေဖြင့် ထိုက်သင့်သည့် အကျိုးအမြတ်များရရှိကာ အဆင်ပြေလျက်ရှိကြောင်း တောင်သူတစ်ဦးထံမှ သိရသည်။

DOCA(စစ်ကိုင်း)

      မြန်မာနိုင်ငံတွင် နွေရာသီ၊ မိုးရာသီနှင့် ဆောင်းရာသီ ဆိုပြီး ရာသီဥတု(၃)မျိုးရှိရာ ရာသီဥတုအလိုက် ဒေသအစားအစာများ ပြုလုပ်ရောင်းချလျက်ရှိကြသည်။ ယခုအခါ စစ်ကိုင်းတိုင်းဒေသကြီး ၊ ကန့်ဘလူမြို့တွင် ရာသီအစားအစာတစ်မျိုးဖြစ်သည့်  ကောက်ညှင်းပြား(ခေါ်)ခေါစီများ စတင်ရောင်းချလျက်ရှိကြောင်း သိရသည်။

      ကောက်ညှင်းပြား(ခေါ်)ခေါစီပြုလုပ်ရာတွင် အသုံးပြုသည့် ကုန်ကြမ်း ကောက်ညှင်းဆန်ကို ဒေသတွင်းတောင်သူများထံမှ ဝယ်ယူရရှိသလို မိုးညှင်းဒေသမှလည်းမှာယူပြီး အသုံးပြုလျက်ရှိ ကြောင်း၊ ကောက်ညှင်းဆန်အနက်ရောင်နှင့် ကောက်ညှင်းဆန်အဖြူရောင်ဆိုပြီး (၂)မျိုးရှိကြောင်း၊ စားသုံးသူများအနေဖြင့် ကောက်ညှင်းဆန်အနက်ဖြင့် ပြုလုပ်သည်ကို ပိုမိုကြိုက်ကြကြောင်း၊ ကောက်ညှင်းဆန်ကို ကောက်ညှင်းပြားအပြင် ခေါပြင်နှင့် ပေါင်းသင်းတို့ပြုလုပ်၍လည်း ရောင်းချကြောင်း၊ ကန့်ဘလူမြို့၊ ဘုရာကြီးညနေဈေးတွင် ကောက်ညှင်းပြားကြီး ၅ ပြားလျှင် ၁၀၀၀ကျပ် ၊ ကောက်ညှင်းပြားသေး ၉ ပြားလျှင် ၁၀၀၀ ကျပ် ၊ ခေါပြင် ၁ တုံးလျှင် ၁၀၀ ကျပ်ရောင်းဖြင့် ရောင်းချကြောင်း၊ ဈေးကွက်နေဖြင့် မြို့ပေါ်နေပြည်သူများ၊ ခရီးသွားပြည်သူများနှင့် အသိမိတ်ဆွေများထံ လက်ဆောင်ပစ္စည်းအဖြစ် ဝယ်ယူပေးပို့ကြသောကြောင့် နေ့စဉ်ဝင်ငွေရရှိကာ မိသားစုအဆင်ပြေလျက်ရှိကြောင်း ကန့်ဘလူမြို့ အမှတ်(၁)ရပ်ကွက်ရှိ ကောက်ညှင်းပြား(ခေါ်)ခေါစီ ပြုလုပ်ရောင်းချသူထံမှ သိရှိရသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်း ဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန် စာရင်းတို့ကို အပတ်စဉ်၊ လစဉ်တင်ပြလျက်ရှိရာ ၂၀၂၄ခုနှစ်၊ အောက်တိုဘာလ၊ ပထမအပတ်တွင် အရောင်းအဝယ်ဖြစ်သည့် သီးနှံဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းခဲ့ပါသည်။ ဆက်သွယ်မေးမြန်းမှုအရ မြေပဲလုံးဆန်များမှာ စက်တင်ဘာလ၊ ဒုတိယအပတ်မှ စတင်၍ ရွှေဘိုဈေးကွက်သို့ ဝင်ရောက်ခဲ့ကြောင်း၊ အောက်တိုဘာလ၊ ဒုတိယအပတ်တွင် အရောင်းအဝယ်ဖြစ်သည့်ဈေးနှုန်းမှာ  မြေပဲလုံးဆန်တစ်တင်းလျှင် (၁၂၀၀၀ဝိ/-)ကျပ် ပေါက်ဈေးရှိပြီး တစ်ပတ်အတွင်းအရောင်းအဝယ်ဖြစ်မှုမှာ (၄၅၀၀)တင်း/ (၁၀၃)တန်ဖြစ် ကြောင်း၊   ‌ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်ပတ်၌     မြေပဲလုံးဆန်တစ်တင်းလျှင် (၁၁၆၈၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင် ယခင်အပတ်အောက် မြေပဲလုံးဆန် တစ်တင်းလျှင်(၃၂၀ဝိ/-)ကျပ် ဈေးလျော့နည်းခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့်ဈေးနှုန်း နှိုင်းယှဉ်ပါက ယခင်နှစ်ကာလတူ၌ မြေပဲလုံးဆန်တစ်တင်းလျှင်(၉၆၈၀ဝိ/-)ကျပ်ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက်  မြေပဲလုံးဆန်တစ်တင်းလျှင် (၂၃၂၀ဝိ/-)ကျပ် ဈေးပိုမိုရရှိခဲ့ကြောင်း၊ ရွှေဘိုဈေးကွက်သို့ ဝင်ရောက်လာသည့် မြေပဲလုံးဆန်များအား  ဒေသတွင်းဆီကြိတ်ခွဲထုတ်လုပ်သည့် ဆီစက်များနှင့် စားသုံးရန်အတွက် ဆီကြိတ်ခွဲရန်ဝယ်ယူသူများရှိသဖြင့် ဝင်ရောက်သမျှ အရောင်းအဝယ်ဖြစ်လျက်ရှိ‌ကြောင်း သတင်းရရှိပါသည်။

DOCA(စစ်ကိုင်း)

        မန္တလေးမြို့အတွင်းသို့ အနယ်နယ်အရပ်ဒေသများမှ ကုန်စိမ်းသီးနှံများ နေ့စဉ်ဝင်ရောက်၍ ပွဲရုံများက လက္ကားရောင်းချပြီး မန္တလေးမြို့တွင်းနှင့် အခြားမြို့နယ်ဈေးကလေးများသို့ ဝယ်ယူရောင်းချရာတွင် ပြင်ဦးလွင်မြို့၊ ဒေသထွက်များဖြစ်ကြသည့် ဂေါ်ရခါးသီး၊ ပန်းမုံလာ၊ ဗိုလ်စားပဲသီး၊ ဂေါ်ရခါးညွန့်၊ ခါကြက်ဥ၊ မုံညင်းများကို ညနေဈေးနှင့် နံနက်ဈေးတို့တွင် ရောင်းချကြပါသည်။ ယခုအချိန်တွင် ဂေါ်ရခါးသီး(၁)လုံးလျှင် ၅၀၀/၆၀၀/၇၀၀ ကျပ်၊ ယခင်နှစ်တွင် ၂၅၀/၃၀၀/၃၅၀ ကျပ်၊ ဂေါ်ရခါးညွန့်(၂၅)ကျပ်သားလျှင် ၂၀၀၀ကျပ်၊ ယခင်နှစ်တွင် ၁၀၀၀ကျပ်၊ ဗိုလ်စားပဲသီး(၂၅)ကျပ်သားလျှင် ၂၀၀၀ကျပ်၊ ယခင်နှစ်တွင် (၂၅)ကျပ်သားလျှင် ၇၀၀ကျပ်၊ ခါကြက်ဥ(၁၀)ကျပ်သားလျှင် ၇၀၀ကျပ်၊ ယခင်နှစ်တွင် ၃၀၀ကျပ်အထိရှိခဲ့ပါသည်။ အခြားဒေသထွက်များဖြစ်ကြသော ခရမ်းချဉ်သီး အင်းလေးသီးမှာ ယခုအချိန်တွင် ၅၀၀၀ကျပ်၊ ယခင် ၂၅၀၀ကျပ်၊ ရွာငံသီး(၁)ပိဿာလျှင် ၄၀၀၀/၄၅၀၀ ကျပ်၊ ယခင်က ၂၀၀၀ကျပ်၊ နောင်ချိုသီး(၁)ပိဿာလျှင် ယခု ၃၅၀၀ကျပ်၊ ယခင်က ၂၀၀၀ကျပ်၊ မုံရွာပင်ထောင်ခရမ်းချဉ်သီး(၁)ပိဿာလျှင် ၃၅၀၀ကျပ်၊ ယခင်က ၂၀၀၀ကျပ်၊ ရမည်းသင်း/ ပျော်ဘွယ်မြို့နယ်များမှထွက်ရှိသည့် ဗမာခရမ်းချဉ်အသီးမျိုးမှာ (၁)ပိဿာလျှင် ၆၀၀၀ကျပ်၊ ယခင်က ၃၀၀၀ကျပ်၊ ခရမ်းသီး(၁)ပိဿာလျှင် ၄၅၀၀ကျပ်၊ ယခင်က ၁၅၀၀ကျပ်၊ ပင်ထောင်ပဲသီးတောင့်ရှည် (၁)ပိဿာလျှင် ၆၀၀၀ကျပ်၊ ယခင်က ၂၅၀၀ကျပ်၊ ရုံးပတီသီး(၁)ပိဿာလျှင် ၄၅၀၀ကျပ်၊ ယခင်က ၂၀၀၀ကျပ်၊ ကြက်ဟင်းခါးသီး(၁)ပိဿာလျှင် ၅၀၀၀ကျပ်၊ ယခင်က ၂၀၀၀ကျပ်၊ ဗမာနံနံပင် (၁)စည်းလျှင် ၃၀၀/၄၀၀ ကျပ်၊ ယခင်က ၁၀၀ကျပ်၊ တရုတ်နံနံပင်(၁)စည်းလျှင် ၅၀၀ကျပ်၊ ယခင်က ၁၀၀ကျပ် စသည့်ဈေးနှုန်းအသီးသီးဖြင့် ရောင်းချကြပါသည်။ ယခုနှစ်တွင်မူ သဘာဝဘေးအန္တရာယ်ဖြစ်သော ရေကြီးခြင်း၊ သယ်ယူစရိတ်ကြီးခြင်း၊ စိုက်ပျိုးစရိတ်ကြီးမားလာခြင်းဖြစ်ကြောင်း ကုန်စိမ်းစိုက်ပျိုးရောင်းချသူထံမှသိရပါသည်။

DOCA(မန္တလေး)