ပြည်တွင်းကုန်သွယ်မှုသတင်း

           ဘုရင့်နောင်ဆန်စပါးကုန်စည်ဒိုင်သို့ ၁၉.၃.၂၀၂၅ ရက်နေ့တွင် ပဲခူး(အရှေ့) မှ ရှယ်စ ၂၁၂၀ အိတ်ဝင်ရောက်လာပြီး ဈေးနှုန်းမှာ ၆၈၀၀၀ မှ ၇၀၀၀၀ ကျပ်၊ ဆန်ကြမ်းထိပ်စအိတ်ရေ ၂၀၁၀ နှင့် ဈေးနှုန်းမှာ ၆၇၀၀၀ မှ ၆၈၀၀၀ ကျပ်၊ လက်စအိတ်ရေ ၁၄၇၂ နှင့် ဈေးနှုန်းမှာ ၆၆၀၀၀ မှ ၆၇၀၀၀ ကျပ်၊ ၂၅မတ်ဆန်အိတ် ၁၀၂၀ နှင့် ဈေးနှုန်းများမှာ ၆၄၀၀၀ မှ ၆၅၀၀၀ ကျပ်၊ ဆန်ကွဲအိတ်ရေ ၃၉၆၀ နှင့် ဈေးနှုန်းများမှာ ၄၈၅၀၀ မှ ၅၂၀၀၀ ကျပ်တိုဖြစ်ကြောင်းသိရှိရပြီး ပဲခူး(အနောက်) မှ ရှယ်စ ၂၃၈၉ အိတ်၊ ဆန်ကြမ်းထိပ်စအိတ် ၁၆၃၂၊ လတ်စအိတ်ရေ ၁၅၆၀၊ ဆန်ကွဲအိတ်ရေ ၃၈၇၂၊ ဧရာဝတီတိုင်းမှ ရှယ်စ ၂၄၅၃ အိတ်၊ ဆန်ကြမ်းထိပ်စ ၁၈၇၅ အိတ်၊ လတ်စ ၁၅၅၈ အိတ်၊ ၂၅% ၉၆၀ နှင့် ဆန်ကွဲအိတ် ရေ ၁၉၅၃ တို့ဝင်ရောက်ကြောင်းသိရှိရပြီး ဆန်သစ်များဝင်ရောက်လာပါသဖြင့် ဆန်ဈေးနှုန်းအနည်း ငယ်အေးကြောင်းနှင့် ဈေးနှုန်းများမှာလည်း တူညီမှုရှိကြောင်း သိရှိရပါသည်။

DOCA(ရန်ကုန်)

           ရန်ကုန်တိုင်းဒေသကြီး လှိုင်မြို့နယ်  သီရိမင်္ဂလာဈေးအတွင်းသို့ နေ့စဉ် ဟင်းသီးဟင်းရွက်၊ သစ်သီး၊ ပန်းများဝင်ရောက်လျက်ရှိရာ အောင်ပန်း၊ တောင်ကြီး၊ ကလော၊ ဟဲဟိုး၊ အင်းလေး၊ မှော်ဘီ၊ တိုက်ကြိး၊ တွံတေး၊ ကျောင်းကုန်း၊ ရွှေညောင်၊ ညောင်နှစ်ပင်၊ ခရမ်း၊ သုံးခွ၊ ဝါးနက်ချောင်း၊ ဧရာဝတီတိုင်း၊ပဲခူးတိုင်း၊ မန္တလေးတိုင်းတို့မှ ၁၆.၃.၂၀၂၅ မှ ၂၀.၃.၂၀၂၅ ရက်နေ့တွင် ဟင်းသီးဟင်းရွက်ကုန်ချိန် ပိဿာချိန်ပေါင်း (၄၃၂၃၇၅၀) ကား (၅၀၄) စီးဝင်ရောက် ကြောင်း၊ ပြင်ဦးလွင်၊ ကလော၊ မိုးကုတ်၊ တောင်ကြီး၊ အောင်ပန်း၊ ဘီးလင်း၊ တပ်ကုန်း၊ ရဲမွန်၊ ရေး၊ အင်းမ၊ မှော်ဘီ၊ တိုက်ကြိး၊ မန္တလေး ၊ သီပေါ၊ ကျိုက်ကော်၊ မော်လမြိုင်၊ ပုပ္ပါး၊ ကျောက်ဆည်၊ တောင်ငူ၊ တွံတေး၊ ထားဝယ်၊ ကြံခင်း၊ ခရမ်းတို့မှ သစ်သီးများ ကုန်ချိန်ပိဿာချိန်ပေါင်း (၄၂၅၆၀၀) ကား(၄၉) စီးဝင်ရောက် ကြောင်းနှင့် ကလော၊ ဟဲဟိုး၊ ပြင်ဦးလွင်၊ တောင်ကြီး၊ ရွှေတောင်၊ ငွေတောင်၊ လှည်းကူး၊ ကျွန်းကလေး၊ ဇီးဖြူကုန်း၊ တွံတေး၊ ကော့မှူး၊ ညောင်တုန်း၊ နေပြည်တော်တို့မှ ပန်းများ ကုန်ချိန်ပိဿာချိန်(၁၆၈၅၃၀) ကား (၁၆၈) စီးဝင်ရောက်ကြောင်း သိရှိရပါသည်။

DOCA(ရန်ကုန်)

            ထားဝယ်မြို့၊ သစ်သီးဈေးကွက်အတွင်း မရမ်းသီးမှည့်များ ဝင်ရောက်လျက်ရှိပါသည်။ မရမ်းသီးကို ဒီဇင်ဘာလ တတိယပတ်လောက်မှ စတင်ဝင်ရောက်ခဲ့ပြီး လုံးသေးများကို ရာသီစာအဖြစ် မရမ်းသီးထောင်း၍ ဟင်းအဖြစ်စားသုံးကြပါသည်။ စတင်ဝင်ရောက်ချိန်တွင် မရမ်းသီး ၁၀  လုံးလျှင် ၅၀၀၀ ကျပ်ထိ ဈေးရှိခဲ့ပြီး၊ ဇန်နဝါရီလတွင်  ၃၀၀၀ ကျပ်ဝန်းကျင် ထိဈေးရှိပြီး၊ ယခု မတ်လတွင် မရမ်းသီးများ ရင့်မှည့်လာပြီး ဈေးနှုန်းလည်းကျဆင်းခဲ့ပါတယ်။ အချို့အိမ်ရှင်မများ အနေနှင့် ယခုလိုမရမ်းသီး ၁၀ လုံးလျှင် ၁၅၀၀ ကျပ်မှ ၂၀၀၀ ကျပ်ဝန်းကျင် ဈေးပေါချိန်တွင် မရမ်းသီးများကို ပါးပါးလှီး၍ နေလှမ်းပြီး အခြောက်ထိန်းသိမ်းထားရှိကာ မိုးကာလ ခရမ်းချဉ်သီး ရှားပါးသည့်ချိန်တွင် ခရမ်းချဉ်သီးအစား မရမ်းသီးခြောက်နှင့် ဟင်းများချက်ပြုတ် စားသောက်ကြပါ သည်။ မရမ်းသီးအမှည့်မှာ ချဉ်ချိုမွှေးအရသာရှိသည့်အတွက် အချဉ်ကြိုက်သူများက မရမ်းသီးမှည့်များကို နှစ်သက်ကြပါသည်။ ယခု လတ်တလော မရမ်းသီးမှည့် ဈေးကွက်အနေနှင့် ၁၀ လုံးလျှင် ၁၅၀၀-၁၀၀၀ ကျပ်ထိ ဈေးကွက်တွင် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(တနင်္သာရီ)

          လူတန်းစာမရွေး လူအများကြိုက်နှစ်သက်သည့်ပဲပြားသည် ပရိုတင်းဓာတ်ကြွယ်ဝပြီး ကျန်းမာရေးနှင့်ညီညွှတ်သည့် အစားအစာတစ်မျိုးဖြစ်သည်။ ပဲပြားကိုကြော်ကာ အစာသိပ်လုပ်စားခြင်း၊ ပဲပြားတုတ်ထိုးလုပ်စားခြင်း၊ ပဲပင်ပေါက်နှင့် ကြော်စားခြင်း၊ ပဲပြားသုပ်လုပ်စားခြင်း၊ ခရမ်းချဉ်သီးနှင့် အခြားမိမိကြိုက်နှစ်သက်ရာတို့ဖြင့် အမျိုးမျိုးပြုလုပ်စားသုံးနိုင်ကြောင်းသိရသည်။

          တနင်္သာရီတိုင်းဒေသကြီး၊ ထားဝယ်မြို့ပေါ်ဈေးများတွင် ပဲပြားများကို တစ်ပြားလျှင်(၆၀၀) ကျပ်နှုန်းဖြင့် ရောင်းချဝယ်ယူလျက်ရှိကြသည်။ ပဲပြားဈေးနှုန်းမှာ ဈေးနှုန်းပြောင်းလဲခြင်းမရှိပဲ ဈေးနှုန်းတည်ငြိမ်နေကြောင်း သိရှိရပါသည်။

DOCA(တနင်္သာရီ)

          တနင်္သာရီတိုင်းဒေသကြီး၊ ထားဝယ်မြို့နယ်တွင် ပဲ၊ ငရုတ် စသည့်သီးနှံများကို ရာသီအလိုက် စိုက်ပျိုးကြသည့်အပြင် ပန်းမန်မျိုးနွယ်ဝင်ဖြစ်သည့် အောင်သပြေ၊ အာဆီယံသပြေနှင့် ညိုချော သပြေများကိုလည်း စိုက်ပျိုးလုပ်ကိုင်လျက်ရှိကာ ပုံမှန်ဝင်ငွေရနေကြောင်း သိရသည်။

      သပြေတစ်ကြိမ်စိုက်ပျိုးပီးစ အပင်ငယ်ချိန်တွင် ရေအစိုဓာတ်မပြတ် ပေးသွင်းရပြီး၊ ခူးဆွတ် ရောင်းချနိုင်ချိန်တွင်  မြေသား အစို၊ အခြောက်အနေအထားကြည့်၍ (၁၀)ရက် တစ်ကြိမ်၊ (၁၅) ရက် တစ်ကြိမ်ခန့်သာရေးပေးသွင်းရကြောင်း၊ ပိုးကျပါက ပိုးသတ်ဆေးဖျန်းပေးရကြောင်း၊ စိုက်ပျိုးပြီး (၁၀) နှစ်သားခန့်ထိ ခူးဆွတ်ရကြောင်း ပန်းစိုက်တောင်သူတစ်ဦးထံက သိရသည်။ လက်ရှိသပြေ တစ်စည်းလျှင် ကျပ် (၃၀၀) မှ (၅၀၀) နှုန်းဖြင့် စိုက်ခင်းအတွင်း လက္ကားရောင်းချရ၍ ပုံမှန်ဝင်ငွေရရှိကြောင်း၊ ပန်းရောင်းချသူများအနေဖြင့်လည်း ထားဝယ်မြို့ပေါ်ဈေးကွက်များတွင် လိုက်လံရောင်းချသောကြောင့် စိုက်ပျိုးသူများ အပြင်လက်လီ‌‌ရောင်းချသူများပါ ဝင်ငွေရနေကြပါ ကြောင်း သိရှိရပါသည်။

DOCA(တနင်္သာရီ)