ပြည်တွင်းကုန်သွယ်မှုသတင်း

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်  စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါ ဆောင်ရွက်လျက်ရှိရာ စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့ မြို့မစည်ပင်သာယာဈေးကွက်အတွင်းသို့ ရှမ်းပြည်နယ် အောင်ပန်းတို့မှထွက်ရှိသော ခရမ်းချဥ်သီးများကို မန္တလေးတိုင်းဒေသကြီးမှ မှာယူရောင်းချပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

      ခရမ်းချဥ်သီးများသည် ယခုအချိန် မိုးရာသီတွင် ဒေသထွက် ခရမ်းချဥ်သီးများ ဈေးကွက်အတွင်းသို့ ဝင်ရောက်မှုမရှိသည့်အတွက် ရှမ်းပြည်နယ် အောင်ပန်းဒေသထွက် ခရမ်းချဥ်သီးများကို မန္တလေးမြို့မှ မှာယူရောင်းချရပါသည်။ ရှမ်းပြည်နယ်၊ အောင်ပန်းဒေသထွက် ခရမ်းချဥ်သီးများမှာ ရာသီမရွေး ဝယ်ယူစားသုံးနိုင်ပြီး အခွံလည်းထူ၍ အချဥ်အရသာနည်းသည့်အပြင် အလုံးအရွယ်အစားလှခြင်း၊ အထားခံခြင်းတို့ကြောင့် လူအများကကြိုက်နှစ်သက်ကြပါသည်။ ယခု ဇူလိုင်လ တစ်လလုံး ခရမ်းချဥ်သီး ဈေးနှုန်းများမှာ တစ်ပိဿာလျှင်(၅၅၀၀/၆၀၀၀)ကျပ်တို့ဖြင့် တည်ငြိမ်လျက်ရှိလာကြောင်း သိရှိရပါသည်။

     ကန့်ဘလူမြို့၏ ယခုဩဂုတ်လ ပထမအပတ်တွင် ခရမ်းချဥ်သီးဈေးနှုန်းအနေဖြင့် ထိုင်ဝမ်ခရမ်းချဥ်သီးဈေးမှာ အလုံးအရွယ်အစားအလိုက် တစ်ပိဿာလျှင် (၃၀၀၀/၃၅၀၀)ကျပ် ဈေးနှုန်းအထိ  ကျဆင်းလျက်ရှိကြောင်း ကန့်ဘလူမြို့ ကုန်စိမ်းသီးနှံအရောင်းအဝယ်လုပ်နေသူများထံမှ သိရှိရပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် စီးပွားရေးလုပ်ငန်းရှင်များနှင့် တွေ့ဆုံ၍ အခြေခံစားကုန်ဈေးနှုန်းများ၊ ဓါတ်မြေဩဇာနှင့် ပိုးသတ်ဆေးဈေးနှုန်းများအား အပတ်စဉ်တင်ပြလျက်ရှိပါသည်။

    ဩဂုတ်လ၊ ပထမအပတ်တွင် ရွှေဘိုမြို့၌ ရောင်းချလျက်ရှိသော ဓါတ်မြေဩဇာနှင့် ပိုးသတ်ဆေးဈေးနှုန်းများမှာ အာမို၊ ကျွဲနက်တံဆိပ် (၁၅:၁၅:၁၅)ကွန်ပေါင်း ဓါတ်မြေဩဇာတစ်အိတ်လျှင်(၁၇၅၀၀ဝိ/-) ကျပ် ၊ ဇာမဏီတံဆိပ်(၁၃:၅:၇) ကွန်ပေါင်းဓါတ်မြေဩဇာ 50kgတစ်အိတ်လျှင် (၇၄၀၀ဝိ/-)ကျပ်နှင့် ဒီမွန် 1.8တံဆိပ် ထိသေ/စားသေ (အဆိပ်ငွေ့) 500cc တစ်ဗူးလျှင် (၁၇၀၀ဝိ/-)ကျပ်၊ ငှက်ကြီးတောင်တံဆိပ် ထိသေ/စားသေ(အဆိပ်ငွေ့) 100ccတစ်ဗူးလျှင် (၂၂၀၀ဝိ/-)ကျပ်၊ ဇိုင်ကလုံးတံဆိပ် ပင်လုံးပြန့် ပိုးသတ်ဆေး 1litter တစ်ဗူးလျှင်(၆၄၀၀ဝိ/-)ကျပ်ဖြင့် ရောင်းချလျက်ရှိပြီး အာမို၊ ပုလဲတံဆိပ် ကွန်ပေါင်း ဓါတ်မြေဩဇာ၊ ပန်းဖူးတံဆိပ် ဓါတ်မြေဩဇာ၊ MCတံဆိပ် (၁၅:၁၅:၁၅) ကွန်ပေါင်း ဓါတ်မြေဩဇာနှင့် ရှောင်လင်တံဆိပ် ထိသေ/စားသေ (အဆိပ်ငွေ့)ပိုးသတ်ဆေးများမှာ ပစ္စည်းပြတ်လျက်ရှိကြောင်း၊ ယခုအချိန်တွင် ရွှေဘိုခရိုင်၌ မိုးစပါးများ ပျိုးထောင်ထားပြီး စိုက်ပျိုးရန်ပြင်ဆင်နေသည့်အချိန်ဖြစ်သဖြင့် ပိုးသတ်ဆေးများမှာ ပုံမှန်အရောင်းအဝယ်ဖြစ်သော်လည်း ဓါတ်မြေဩဇာမှာ ပစ္စည်းပြတ်သည့်အပြင် အရောင်းအဝယ်အေးလျက်ရှိကြောင်း ဓါတ်မြေဩဇာနှင့် ပိုးသတ်ဆေးအရောင်းဆိုင်များမှ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)

      ပြည်ခရိုင်တွင် ယခုအချိန်၌ မိုးနှမ်းများ စိုက်ပျိုးနေချိန်ဖြစ်ပြီး စိုက်ဧကမှာ (၆၂၃၈၄)ကျော်ခန့်ရှိသည်ဟုသိရပါသည်။ ပြည်ဈေးကွက်သို့ ယခုအချိန်တွင် နှမ်းဝင်ရောက်မှုမရှိဘဲ ယခင် လက်ကျန်အနည်းငယ်ဖြင့်သာ အရောင်းအဝယ်ရံဖန်ရံခါဖြစ်ကြောင်းသိရပါသည်။ ပြည်ဒေသအတွင်း ဆီစက်သမားများက ယခင်လှောင်ထားသည့်  နှမ်းလက်ကျန်ကိုထုတ်၍ ဆီများကြိတ်ခွဲနေကြောင်းသိရပါသည်။  နှမ်းနက်နှင့် စမုံနက်နှမ်းကို ဝယ်လက်အဝယ်နည်းသဖြင့် အရောင်းအဝယ်မဖြစ်၍ ဈေးငြိမ်နေခြင်းဖြစ်ပါသည်။ မိုးနှမ်းများမှာ လာမည့်ဩဂုတ်လနှင့် စက်တင်ဘာလတို့တွင် စတင်ထွက်ပေါ်လာမည်ဖြစ်ပြီး အောက်တိုဘာလတွင် လှိုင်လှိုင်ထွက်ပေါ်လာမည်ဖြစ်သော်လည်း  မိုးနှမ်းများထွက်ပေါ်ချိန်တွင်  ရာသီဥတုဖျက်ဆီးမှုမရှိလျှင် တောင်သူများအတွက် အမြတ်အစွန်းများရရှိလာနိုင်မည်ဖြစ်ပါသည်။ ယခုဇူလိုင်လ၊ နောက်ဆုံးအပတ်တွင် နှမ်းနီ(၃)တင်းဝင် တစ်အိတ်လျှင် ၃၃၆၀၀၀ကျပ်၊ နှမ်းနက်(၃)တင်းဝင်တစ်အိတ်လျှင် ၄၂၉၀၀၀ကျပ်နှင့် စမုံနက်နှမ်း (၃)တင်းဝင် တစ်အိတ်လျှင် ၄၄၄၀၀၀ကျပ်ဈေးအမြင့်ဖြင့် အရောင်းအဝယ်ဖြစ်လျက်ရှိပြီး ယခင်နှစ် ယခုကဲ့သို့သောအချိန်နှင့်နှိုင်းယှဉ်လျှင် နှမ်းနီ(၃)တင်းဝင်တစ်အိတ်လျှင် ၆၆၀၀၀ကျပ်၊ နှမ်းနက်(၃)တင်းဝင်တစ်အိတ်လျှင် ၁၂၉၀၀၀ကျပ်နှင့် စမုံနက်နှမ်း (၃)တင်းဝင်တစ်အိတ်လျှင် ၁၁၄၀၀၀ကျပ်ဖြင့် ဈေးနှုန်းများမြင့်တက်လာခဲ့ပါသည်။ ထိုသို့ဈေးနှုန်းများမြင့်တက်လာရခြင်းမှာ စိုက်ပျိုးစရိတ်များကြီးမြင့်ခြင်း၊ နှမ်းများအထွက်နည်းခြင်းနှင့် ဝယ်လိုအားမြင့်တက်လာခြင်းတို့ကြောင့် ဈေးနှုန်းများမြင့်တက်လာရခြင်းဖြစ်သည်ဟုသိရှိရပါသည်။ နှမ်းဆီဈေးမှာလည်း ယခင်နှစ်တွင် တစ်ပိဿာလျှင် ၁၂၀၀၀ကျပ်ဖြစ်ခဲ့ပြီး ယခုနှစ်ဖြစ်သော ဇူလိုင်လ နောက်ဆုံးပတ်တွင် တစ်ပိဿာလျှင် (၁၆၀၀၀-၁၇၀၀၀) ကျပ်ဖြင့်ရောင်းဝယ်လျက်ရှိပါသည်။ နှမ်းဆီဈေးမှာလည်း ယခင်နှစ်ထက်စာလျှင် ယခုနှစ်မှာ တစ်ပိဿာလျှင် (၄၀၀၀-၅၀၀၀) ကျပ်ခန့်ဈေးနှုန်းများမြင့်တက်လာခဲ့ကြောင်းသိရှိရပါသည်။

DOCA(ပဲခူး)

       ပြည်ခရိုင်တွင် ဇွန်လ၊ ဇူလိုင်လမှစတင်၍ မိုးမြေပဲများစတင်စိုက်ပျိုးရာ စိုက်ဧကမှာ ၂၀၂၄ခုနှစ်၊ ဇွန်လကုန်အထိ (၃၃၇၁၅)ဧကကျော်ခန့်စိုက်ပျိုးပြီးဖြစ်ကြောင်းသိရပါသည်။ မိုးမြေပဲများမှာ လာမည့်ဩဂုတ်လနှင့် စက်တင်ဘာလတို့တွင် စတင်ထွက်ပေါ်လာမည်ဖြစ်ပြီး ယခုအချိန်၌ ပြည်ဈေးကွက်သို့ မြစ်ရေများကြီးနေသဖြင့် ဝင်ရောက်မှုမရှိဘဲ ဒေသတွင်းမြေပဲဆန်များဖြင့်သာ အရောင်းအဝယ်ဖြစ်လျက်ရှိပါသည်။ ယခင်လမ်းပန်းဆက်သွယ်ရေးကောင်းချိန်တွင် နယ်အစုံမှဝင်ရောက်မှုရှိ၍ တစ်နေ့လျှင် အိတ်ပိဿာ(၂၀)ဝင်အိတ် (၁၀၀၀)ခန့်အထိဝင်ရောက်လျက်ရှိကြောင်းသိရပါသည်။ ယခုအချိန်တွင် မိုးမြေပဲများစိုက်ပျိုးချိန်ဖြစ်၍ ဝင်ရောက်မှုနည်းလာသဖြင့် နေ့စဉ်ဝင်ရောက်မှုမရှိသော်လည်း နေပွင့်လျှင် ပွင့်သလို  ခန့်မှန်းခြေ အိတ် (၅၀-၁၀၀) လောက်သာဝင်ရောက်မှုရှိကြောင်းသိရပါသည်။ ပြည်ဈေးကွက်သို့ဝင်ရောက်လာသော မြေပဲဆန်များကို ဒေသတွင်းဆီစက်သမားများနှင့် ပဲကြော်၊ ပဲလှော်သမားများက ဝယ်ယူမှုရှိသဖြင့် အရောင်းအဝယ်မှာ ပုံမှန်ဖြစ်လျက်ရှိပါသည်။ မြေပဲဆန်ကို တစ်ဆင့်မြှင့်တင်၍ ဆီကြိတ်စားသုံးကြသည့်အပြင် မုန့်ပဲသားရေစာများတွင်ထည့်သွင်း၍သေ်လည်းကောင်း၊ မြေပဲယိုပြုလုပ်၍သေ်လည်းကောင်း၊ မြေပဲဆားလှော်ပြုလုပ်၍သေ်လည်းကောင်း စားသုံးကြပါသည်။ မြေပဲဆန်ဈေးနှုန်းများအနေဖြင့် ယခုအပတ်ဖြစ်သော ဇူလိုင်လ၊ နောက်ဆုံးအပတ်တွင် မြေပဲဆီဆန်(အဖြူ) တစ်ပိဿာလျှင် (၆၅၀၀)ကျပ်၊ ဆီဆန်(အနီ) တစ်ပိဿာလျှင် (၆၈၀၀)ကျပ်နှင့် လုံးဆန်ဈေးမှာ (အဖြူ)တစ်ပိဿာလျှင် (၇၃၀၀)ကျပ်၊ (အနီ)တစ်ပိဿာလျှင် (၇၅၀၀)ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခင်ဇွန်လကုန်အပတ်တွင် ဆီဆန် (အဖြူ)တစ်ပိဿာလျှင် (၇၀၀၀)ကျပ်၊ ဆီဆန်(အနီ)တစ်ပိဿာလျှင် (၆၈၀၀)ကျပ်နှင့် လုံးဆန် (အဖြူ)တစ်ပိဿာလျှင် (၇၇၀၀)ကျပ်၊ လုံးဆန်(အနီ)တစ်ပိဿာလျှင် (၇၅၀၀)ကျပ်ဖြင့်အရောင်းအဝယ်ဖြစ်ခဲ့၍ ယခုအပတ်တွင် ဆီဆန်(အဖြူ)နှင့် လုံးဆန်(အဖြူ) ဈေးအနည်းငယ်မြင့်လာပြီး လုံးဆန်(အနီ)နှင့် ဆီဆန်(အနီ)ဈေးမှာ ယခင်အတိုင်းဈေးငြိမ်နေသည်ကိုတွေ့ရှိရပါသည်။

DOCA(ပဲခူး)

     ပြည်ခရိုင်၊ ပေါက်ခေါင်းမြို့နယ်အနေဖြင့် နွေနှမ်းနှင့်မိုးနှမ်းများကိုစိုက်ပျိုးကြပါသည်။ ယခုနှစ်ဖြစ်သော ၂၀၂၄-၂၀၂၅ ခုနှစ်တွင် ပေါက်ခေါင်းမြို့နယ်အနေဖြင့် မိုးနှမ်းစိုက်ပျိုးဧက ၃၉၁၆၄ဧက စိုက်ပျိုးပြီးဖြစ်ပါသည်။ စိုက်ပျိုးသောမျိုးများမှာ ဆင်းရတနာ(၃)၊ ဆင်းရတနာ(၁၄)နှင့် စမုံနက်မျိုးများကို အဓိကထား၍စိုက်ပျိုးကြပါသည်။ မိုးရာသီဖြစ်သော မိုးနှမ်းရာသီတွင် စမုံနက်နှမ်းမျိုးမှာ အစိုက်နည်း၍ အခြားမျိုးများကို ပိုမိုစိုက်ပျိုးကြောင်းသိရပါသည်။ မိုးနှမ်းစိုက်ပျိုးကုန်ကျစရိတ်အနေဖြင့် တစ်ဧကလျှင် ၃၆၄၀၀၀ကျပ်ခန့်ကုန်ကျကြောင်းသိရပါသည်။ အထွက်နှုန်း အနေဖြင့် ယခင်နှစ်တွင် တစ်ဧကလျှင် (၁၂)တင်းမှ (၁၃)တင်းအထိထွက်ရှိခဲ့ပြီး ဈေးနှုန်းမှာ တစ်တင်းလျှင် ၈၃၀၀၀ကျပ်မှ ၈၅၀၀၀ကျပ်အထိဈေးရရှိခဲ့ကြောင်းသိရပြီး တစ်ဧက အကျိုးအမြတ်အနေဖြင့် ကျပ်၆၀၀၀၀၀ခန့်ရရှိခဲ့ကြောင်းသိရပါသည်။ ယခုနှစ်တွင်လည်း မိုးနှမ်းများပေါ်ချိန်၌ နှမ်းများအောင်မြင်ဖြစ်ထွန်းလျှင် သင့်တင့်မျှတသောအကျိုးအမြတ်များရရှိနိုင်မည်ဟု လေ့လာသိရှိရပါသည်။

DOCA(ပဲခူး)