ပြည်တွင်းကုန်သွယ်မှုသတင်း

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ ပဲဈေးကွက်တွင် ပြည်တွင်းစားသုံးမှုမြင့်မားလျက် ရှိသော စားတော်ပဲများ တက်ဈေးဖြင့်အရောင်းအဝယ်ဖြစ်လျက်ရှိကြောင်း သိရှိရသည်။ ဈေးကွက်သို့ ကျွန်းစားတော်ပဲစိုက်ပျိုးမှုများသော ပခုက္ကူ၊ မြစ်ခြေ၊ ကမ္မ၊ ဂန့်ဂေါ၊ ထီးလင်း၊ ဆော၊ ကျောက်ထု၊ လောင်းရှည်ဒေသများနှင့် ပေါက်၊ ဆိပ်ဖြူမြို့မှ ထွက်ရှိသောစားတော်ပဲများ ပွဲရုံများသို့နေ့စဉ် ဝင်ရောက်ကြောင်း၊ သီးနှံ(အသစ်)ပေါ်ချိန်တွင် ဈေးအေး၍အရောင်းအဝယ်ဖြစ်ခဲ့ပြီး ပြည်တွင်းစားသုံးမှု များ၍ စားတော်ပဲဈေးတရိပ်ရိပ်မြင့်တက်ပြီး အရောင်းအဝယ်ဖြစ်ကြောင်း သိရှိရသည်။

              ဈေးနှုန်းအနေဖြင့် ၂၀၂၅ခုနှစ်၊ ဩဂုတ်လ(တတိယပတ်)တွင် စားတော်ပဲဈေး တရိပ်ရိပ် ဆက်လက်မြင့်တက်ပြီး အရောင်းအဝယ်ဖြစ်ကြောင်း၊ ဒေသတွင်းပဲလက်ကျန်နည်းပြီး စားသုံးမှု ဝယ်လိုအားမြင့်မားလျက်ရှိ၍ ဈေးမြင့်တက်ကြောင်း၊ ကျွန်းစားတော်ပဲ တစ်တင်းလျှင် ကျပ် (၂၂၀၀၀၀-၂၁၀၀၀၀)ဖြင့် အရောင်းအဝယ်ဖြစ်ပြီး ယောစားတော်ပဲတစ်တင်းလျှင် ကျပ်(၁၇၀၀၀၀-၁၆၅၀၀၀) အရောင်းအဝယ်ဖြစ်ခဲ့ပြီး သီးနှံပေါ်စ မတ်လကုန်ပိုင်းတွင် ကျွန်းစားတော်ပဲတစ်တင်း ကျပ်  (၁၂၀၀၀၀-၁၀၀၀၀၀)ဈေးနှုန်းဖြင့် အရောင်းအဝယ်ဖြစ်ခဲ့ပြီး သီးနှံပေါ်စအချိန်နှင့် ဈေးနှုန်းနှိုင်းယှဉ်ပါက ကျွန်းစားတော်ပဲတစ်တင်းလျှင် ကျပ်(၁၀၀၀၀၀)ခန့်ဈေးတက်ပြီး အရောင်းအဝယ်ဖြစ်ကြောင်း သိရှိရ သည်။ စားတော်ပဲသီးနှံပြည်တွင်းစိုက်ပျိုးမှုနည်းပြီး နေ့စဉ်စားသုံးမှုများလျက်ရှိသော သီးနှံဖြစ်သည်။ ယခုနှစ်တွင် စားတော်ပဲသီးနှံဖြစ်ထွန်းမှုနည်း၍ ဈေးကွက်သို့သီးနှံဝင်ရောက်မှု နည်းခြင်းကြောင့် ဈေးကွက်တွင် ပဲလက်ကျန်နည်းပြီး ဝယ်လိုအားကောင်း၍ ဈေးတက်ကြောင်း၊ ပြည်တွင်းစားသုံးမှုအနေဖြင့် မြန်မာလူမျိုးများသည် စားတော်ပဲသီးနှံကို မြန်မာ့ရိုးရာအစားအစာအဖြစ် နေ့စဉ်စားသုံးခြင်း အပြင် လုပ်ငန်းရှင်များမှလည်း စားသောက်ကုန်မျိုးစုံ ထုတ်လုပ်ရောင်းချလျက်ရှိ၍ တစ်နှစ်ပတ်လုံး စားသုံးသည့်သီးနှံတစ်မျိုးဖြစ်ပြီး ယခုအချိန်တွင်ဒေသတွင်းပဲလက်ကျန်နည်းပြီး ဝယ်လိုအားကောင်း၍ ပြည်တွင်းစားတော်ပဲ ဈေးကွက်စံချိန်တင် အမြင့်ဈေးဖြင့် အရောင်းအဝယ်ဖြစ်လျက်ရှိကြာင်း သိရှိရသည်။

DOCA(မကွေး)

      ကြွက်နားရွက်မှိုသည် စား၍ရသော မှိုတစ်မျိုးဖြစ်ပြီး ကြာဇံချက်၊ ကြာဇံဟင်းခါး၊ ကော်ရည်ခေါက်ဆွဲနှင့် တရုတ်ဟင်းလျာများတွင် အများဆုံးပါဝင်လေ့ရှိသည်။ မှို၏ပုံစံသည် နားရွက်နှင့် ဆင်တူသောကြောင့် ကြွက်နားရွက်မှို ဟုခေါ်ကြသည်။ ကြွက်နားရွက်မှိုစားခြင်း၏ ကောင်းကျိုးများမှာ- သွေးလည်ပတ်မှု ကောင်းမွန်စေခြင်း၊ ရောင်ရမ်းမှုကို သက်သာစေခြင်း၊ နှလုံးကျန်းမာရေး အတွက် ကောင်းမွန်စေခြင်း၊ Antioxidant၏ အစွမ်းသတ္တိပါဝင်ခြင်း၊ ခန္ဓာကိုယ်အတွင်း အဆိပ်အတောက်ကင်းစေပြီး ဝိတ်ကျစေပါသည်။

      မြိတ်မြို့တွင် ကြွက်နားရွက်မှိုကို တစ်ဆယ်သားလျှင် ၃၅၀၀ကျပ်ဖြင့်ရောင်းချလျက် ရှိပြီး တစ်ပိဿာလျှင် ၃၅၀၀၀ကျပ်ခန့်ရှိကြောင်း ရန်ကုန်မြို့မှတဆင့် မြိတ်မြို့အတွင်း ဖြန့်ဝေရောင်းချလျက်ရှိကြောင်း သိရှိရပါသည်။

DOCA(တနင်္သာရီ)

           ဩဂုတ်လ တတိယအပတ်တွင် ပုသိမ်မြို့၏ ဘိလပ်မြေဈေးကွက်မှာ အရောင်းအဝယ် ပုံမှန်ရှိနေပြီး ဈေးနှုန်းမှာ အနည်းငယ်ကျဆင်းလျက်ရှိနေကြောင်း သိရှိရပါသည်။ ယခုအပတ်ဈေးနှုန်း မှာ ထိုင်းဆင် အမှတ်တံဆိပ် (50) kg တစ်အိတ်လျှင် (၂၈၀၀၀) ကျပ်၊ ကြံနှစ်ကောင် အမှတ်တံဆိပ် (50) kg တစ်အိတ်လျှင် (၂၅၀၀၀) ကျပ်၊ အပါချီ အမှတ်တံဆိပ် (50) kg တစ်အိတ်လျှင် (၂၄၅၀၀) ကျပ်တို့ ဖြစ်ကြောင်းသိရှိရပါသည်။

        ဩဂုတ်လ ဒုတိယအပတ် ဈေးနှုန်းနှင့် နှိုင်းယဉ်ပါက ဘိလပ်မြေဈေးနှုန်းများမှာ ဈေးနှုန်း အနည်းငယ်ကျဆင်းမှုရှိပြီး ဘိလပ်မြေဈေးကွက်မှာ မိုးတွင်းကာလဖြစ်သောကြောင့် ဒေသတွင်း ဝယ်ယူမှု နည်းသော်လည်း ဈေးကွက်အတွင်းပစ္စည်းပြတ်လပ်မှုမရှိ၍ ပုံမှန်ရောင်းဝယ်လျက်ရှိကြောင်း သိရှိရပါသည်။

Doca (ဧရာဝတီ)

    ၂၀၂၅ခုနှစ်၊ ဩဂုတ်လစတုတ္ထပတ်အတွင်း ကရင်ပြည်နယ်၊ဘားအံမြို့ရေပေါ်ဈေးတွင် ရောင်းချ နေသော ဒေသထွက်ရာသီစာ ဆူစကားသီး(သို့)ပန်းသီးများ ဈေးကွက်အတွင်း ဈေးကောင်းရလျက်ရှိကြောင်း သိရသည်။

     ဆူစကားသီး(သို့)ပန်းသီးနှင့်ပတ်သက်၍ ရောင်းချသူဆိုင်ရှင်မှ ဆူစကားသီး(သို့)ပန်းသီးပင်သည် နွယ်ပင်တစ်မျိုးဖြစ်ပြီး ကရင်ပြည်နယ်အတွင်း မိုးရာသီမှသာ ရရှိနိုင်သည်။ ဆူစကားသီး(သို့)ပန်းသီးပင်သည် ဘူးသီး၊ဂေါ်ရခါးသီး အတိုင်းချက်စားနိုင်သလို ဆူစကားသီး(သို့)ပန်းသီး၏ အနှစ်သည်လည်း ပင်မှည့်သီးလို ဖျော်ရည်အဖြစ် သောက်သုံးနိုင်ပါသည်။

 ဘားအံမြို့အနီးတစ်ဝိုက်ကျေးရွာများတွင် ဆူစကားသီး(သို့)ပန်းသီးကို မိမိတို့အိမ်ခြံဝင်းအတွင်း တစ်ပိုင်တနိုင် အပိုဝင်ငွေရရှိနိုင်ရန်အတွက် စိုက်ပျိုးကြသည်။ ဆူစကားသီး(သို့)ပန်းသီးကို အရွယ်အစား အလိုက်ရောင်းချကြသည်။ ဆူစကားသီး(သို့)ပန်းသီးဈေးနှုန်းမှာ လက်ကားဈေးနှုန်းအလုံးကြီး(၁၀)လုံးလျှင် (၁၅၀၀၀)ကျပ်၊ အလုံး(၅၀)လုံးလျှင်(၇၃၀၀၀)ကျပ်၊ အလုံး(၁၀၀)လုံးလျှင်(၁၂၀၀၀၀)ကျပ်နှုန်းနှင့် လက်လီ ဈေးနှုန်းအနေဖြင့် အလုံးကြီးတစ်လုံးလျှင်(၂၀၀၀/၂၅၀၀)ကျပ်၊ အလုံးလတ်တစ်လုံးလျှင်(၁၅၀၀/၂၀၀၀) ကျပ်၊ အလုံးသေးတစ်လုံးလျှင်(၈၀၀/၁၀၀၀)ကျပ်နှုန်း ရောင်းချ၍ ဈေးကောင်းရကာ အရောင်းသွက်လျက်ရှိကြောင်း သိရသည်။

DOCA(ကရင်)

       မွန်ပြည်နယ်မော်လမြိုင်မြို့အမှတ် (၁) ဈေးကြီး၌ ၂၀၂၅ ခုနှစ်၊ ဩဂုတ်လတွင် ရောင်းချလျှက်ရှိသော ငါးခြောက်အမယ်များမှာ ငါးနှပ်ခြောက် (အာပြဲခြောက်)၊ ငါးပုပ်ခြောက်၊ ငါးနီတူခြောက်၊ ငါးလိပ်ကျောက်ခြောက်၊ ငါးရွှေခြောက်၊ ငါးအူမြင်းခြောက်၊ ငါးကွင်းရှပ်ခြောက်၊ ငါးတံခွန်ခြောက် (အကောင်သေး)၊ ငါးတံခွန်ခြောက်ခွဲခြမ်း၊ ငါးဖောင်ရိုးခြောက်၊ ငါးစာပြက်၊ ငါးစင်ရိုင်းခြောက်၊ ပုစွန်ခြောက်(အကြီး)၊ ပုစွန်ခြောက်(အလတ်)၊ ပုစွန်ခြောက်(အသေး)၊ ပုစွန် ခြောက်အခွံပါအမှုန့်ခြောက်တို့ ရောင်းချလျက်ရှိသည်။

    ၎င်းငါးခြောက်အမယ်စုံ၏ ဈေးနှုန်းများမှာ ငါးနှပ်ခြောက်(အာပြဲခြောက်)(အကြီး) တစ်ပိဿာလျှင် ကျပ် ၄၅၀၀၀၊ ငါးနှပ်ခြောက်(အာပြဲခြောက်)(အလတ်) တစ်ပိဿာလျှင် ကျပ် ၄၀၀၀၀၊  ငါးနှပ်ခြောက်(အာပြဲခြောက်)(အသေး) တစ်ပိဿာလျှင် ကျပ် ၂၅၀၀၀၊ ငါးပုပ်ခြောက် တစ်ပိဿာ လျှင် ကျပ် ၃၅၀၀၀၊   ငါးနီတူခြောက် တစ်ပိဿာလျှင် ကျပ် ၄၀၀၀၀၊   ငါးလိပ်ကျောက်ခြောက် တစ်ပိဿာလျှင် ကျပ် ၃၅၀၀၀၊  ငါးရွှေခြောက် တစ်ပိဿာလျှင် ကျပ် ၂၅၀၀၀၊  ငါးအူမြင်းခြောက် တစ်ပိဿာလျှင် ကျပ် ၄၀၀၀၀၊   ငါးကွင်းရှပ်ခြောက်(အကြီး) တစ်ပိဿာလျှင် ကျပ် ၄၀၀၀၀၊ ငါးကွင်းရှပ်ခြောက်(အလတ်)တစ်ပိဿာလျှင် ကျပ် ၃၅၀၀၀၊ ငါးကွင်းရှပ်ခြောက် (အသေး) တစ်ပိဿာလျှင် ကျပ် ၃၂၀၀၀ မှ ၃၀၀၀၀ ကျပ်အတွင်း၊ ငါးတံခွန်ခြောက်(အကောင်သေး) တစ်ပိဿာလျှင် ကျပ် ၂၃၀၀၀မှ ၂၀၀၀၀အတွင်း၊ ငါးတံခွန်ခြောက်ခွဲခြမ်း တစ်ပိဿာလျှင် ကျပ် ၂၅၀၀၀၊  ငါးဖောင်ရိုးခြောက် တစ်ပိဿာလျှင် ကျပ် ၃၀၀၀၀၊ ငါးစာပြက် တစ်ပိဿာလျှင်  ကျပ်၃၁၀၀၀မှ ၂၇၀၀၀အတွင်း၊ ငါးစရိုင်းခြောက် တစ်ပိဿာလျှင် ကျပ် ၃၀၀၀၀၊ ပုဇွန်ခြောက် (အကြီး) တစ်ပိဿာလျှင် ကျပ် ၁၂၀၀၀၀၊  ပုဇွန်ခြောက် (အလတ်) တစ်ပိဿာလျှင် ကျပ် ၉၀၀၀၀၊  ပုဇွန်ခြောက် (အသေး)တစ်ပိဿာလျှင် ကျပ် ၇၀၀၀၀၊ ပုဇွန်ခြောက်အခွံပါ အမှုန့်ခြောက် တစ်ပိဿာလျှင် ကျပ် ၃၀၀၀၀ တို့ဖြစ်သည်။ အဆိုပါ ငါးခြောက်ဈေးနှုန်းများမှာ အပတ်စဉ်လိုက် အနည်းငယ် အပြောင်းအလဲရှိနိုင်ကြောင်း သိရသည်။

DOCA (မွန်)