ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး (အနောက်ပိုင်း) ပြည်ခရိုင်၊ ပြည်မြို့နယ်တွင် အချိန်မရွေးဝယ်ယူစားသုံးနိုင်သည့် ဒေသထွက်ကုန်တစ်မျိုးဖြစ်သည့် ဆန်မရွေးကို ပြည်မြို့ မြို့မစည်ပင်သာယာဈေးကြီးနှင့် အခြားဈေးများတွင်လည်း စားသုံးသူများအနေဖြင့် စိတ်ကြိုက်ဝယ်ယူစားသုံးနိုင်ပါသည်။ ဆန်မရွေးမှာ မြန်မာ့ရိုးရာအစားအစာဖြစ်သည့်အတွက် တောနေမြို့နေလူတန်းစားများကြိုက်သော သရေစာမုန့်ဖြစ်ပြီး ၎င်းကို ကုန်ကြမ်းရရှိမှုအနေဖြင့် ပြည်မြို့နယ်အတွင်း ဆန်စက်များနှင့် ဆန်ပွဲရုံများမှ ဆန်ကွဲနှင့် ဆလပ်ကိုဝယ်ယူပြီး တန်ဖိုးမြှင့်ထုတ်ကုန်အဖြစ် မိသားစုတစ်ပိုင်တစ်နိုင်လုပ်ကိုင်ကြပြီး နေ့စဉ်ဝင်ငွေရရှိသော လုပ်ငန်းလည်းဖြစ်ပါသည်။ ပြည်ဒေသထွက်ဆန်မရွေးကို အခြားမြို့နယ်များသို့ တင်ပို့ရောင်းချကြောင်းလည်း သိရပါသည်။ ဆန်မရွေးတစ်ပိဿာလျှင် ( ၇၀၀၀)) ကျပ်ရှိပါသည်။ ဆန်မရွေးကို တန်ဖိုးမြှင့်ထုတ်ကုန်အဖြစ် ထုတ်လုပ်နိုင်ရန် ငွေကြေးအရင်းအနှီး၊ နည်းပညာပံ့ပိုးမှုများ ဆောင်ရွက်ပေးနိုင်ပါက လုပ်ငန်းများ ယခုထက်ပိုမိုတိုးချဲ့လုပ်ကိုင်လာနိုင်ပြီး အလုပ်အကိုင်အခွင့်အလမ်းများ ပိုမိုရရှိလာနိုင်ကြောင်း သိရှိရပါသည်။

DOCA(ပဲခူး)

          ပဲစောင်းလျားပင်မှာ ပူပြီးစိုစွတ်သောနေရာများတွင် အများအပြားပေါက်ရောက်ပါသည်။ နွယ်ပင်အမျိုးအစားဖြစ်ပြီး တို့စရာအဖြစ် စားသောက်ကြသည့် ဟင်းသီးဟင်းရွက်ပင်ဖြစ်ပါသည်။ အမြစ်မှထွက်ရှိလာသောပဲမြစ်များကို မုန့်ပဲသားရေစာအဖြစ်စားသောက်ကြပါသည်။ ပဲစောင်းလျားပင်အား မြန်မာနိုင်ငံအနှံအပြားတွင် စိုက်ပျိုးကြပါသည်။ ပဲမြစ်များစိုက်ပျိုးရာတွင် ဘောင်များပြုလုပ်၍ အစေ့ချစိုက်ပျိုးသည့်စနစ်ဖြင့် စိုက်ပျိုးကြပါသည်။ ပဲမြစ်စိုက်ပျိုးသည့် တောင်သူအများစုမှာ နှစ်စဉ်ဩဂုတ်လတွင်စိုက်ပျိုး၍ ဒီဇင်ဘာလနှင့် ဖေဖော်ဝါရီလများတွင် တူးဖော်ရောင်းချကြောင်းသိရှိရပါသည်။ ယခုအချိန်တွင် ပြည်ဈေးကွက်အတွင်းရောက်ရှိလာသည့် ပဲမြစ်များမှာ ပြည်မြို့နှင့် ဒေသအနီးတဝိုက်ရှိ ကျေးလက်ဒေသများနှင့် ရွှေတောင်မြို့ရှိ ကျေးလက်ဒေသများ၏ တစ်နိုင်တစ်ပိုင်စိုက်ပျိုးခြံများမှရရှိပါသည်။ ပဲမြစ်၏အရသာမှာ ချိုပြီးစိမ့်၍ လူကြိုက်များသော အစားအစာဖြစ်ပါသည်။ ရာသီပေါ်စာဖြစ်သည့်ပဲမြစ်အား ဈေးကွက်အတွင်းရောင်းချရာ၌ တစ်ပိဿာ လျှင် ၅၅၀၀ကျပ်နှုန်းဖြင့်လည်းကောင်း၊ (၅၀)သားလျှင် (၃၀၀၀)ကျပ် နှုန်းဖြင့်လည်းကောင်း ဈေးကွက်အတွင်း ရောင်းချကြကြောင်းသိရှိရပါသည်။

DOCA(ပဲခူး)

          အရောင်အသွေးစုံလင်လှသော ဂန္ဓမာပန်းသည် မြင်သူတိုင်းသဘောကျနှစ်ခြိုက်သော ပန်းဖြစ်ပါသည်။ ဂန္ဓမာပန်းသည် ကမ္ဘာတွင်တန်ဖိုးထား အမြတ်တနိုးသုံးစွဲပြီးစီးပွားဖြစ်ထုတ်လုပ် စိုက်ပျိုးသောပန်းဖြစ်ပါသည်။ မြန်မာနိုင်ငံတွင် ဂန္ဓမာပန်းအား ဘုရားပန်းအဖြစ်လည်းကောင်း၊ အလှူ၊ မင်္ဂလာဆောင်အခမ်းအနားများတွင် အလှပန်းအိုးအဖြစ်လည်းကောင်း၊ နှစ်ခြိုက်စွာသုံးစွဲကြသောပန်း ဖြစ်ပါသည်။ အရောင်အသွေးစုံလင်လှသော ဂန္ဓမာပန်းများကို စိုက်ပျိုးခြင်းသည်လည်း မြန်မာနိုင်ငံအတွင်း စီးပွားဖြစ်စိုက်ပျိုးရေးလုပ်ငန်းတစ်ခုဖြစ်ပါသည်။

          ဂန္ဓမာပန်းများတွင် မျိုးကွဲပေါင်းများစွာရှိပါသည်။ ပန်းမျိုးများ အားပန်းပွင့်၏ပုံစံ၊ အရောင်၊ အပင် အရွယ်အစားပေါ်မူတည်၍ အမည်အမျိုးမျိုးရှိကြပါသည်။ ဂန္ဓမာပန်းအမျိုးအစားများမှာ အန်းမားဖြူ၊ အန်းမားဝါ၊ လပ်ကီးဖြူ၊ လက်ကီးနီ၊ ရွှေစိမ်း၊ ကီလို၊ ကြွေဖြူ၊ ကြွေဝါ၊ ချက်စိမ်း၊ ပုလဲဖြူမှအစ ဂန္ဓမာပန်း မျိုးများစွာရှိပါသည်။ ပန်းများကိုအဓိကအားဖြင့် မေလနောက်ပိုင်းတွင် စိုက်ပျိုးရမည့်မျိုးနှင့် အောက်တိုဘာလနောက်ပိုင်းတွင် စိုက်ပျိုးရမည့်မျိုးများဖြစ်ပါသည်။ အန်းမား၊ လပ်ကီးမျိုးများကို မေလနောက်ပိုင်းနှင့်အောက်တိုဘာလနောက်ပိုင်းတွင် စိုက်ပျိုးနိုင်ပါသည်။

          ဂန္ဓမာပန်းများကို စိုက်ပျိုးရန်အတွက် မိမိကြိုက်နှစ်သက်ရာမျိုးများကို ပျိုးပင်ရောင်းချသူများထံမှ ကြိုတင်မှာယူစိုက်ပျိုးကြပါသည်။ ဂန္ဓမာပန်းများကို မြန်မာနိုင်ငံတွင် စိုက်ခင်းများဖြင့် အများဆုံးစိုက်ပျိုးကြပါသည်။ ရွေးချယ်စိုက်ပျိုးထားသည့် ပန်းမျိုးအလိုက် ပန်းစပွင့်သည့်နေမှ (၄)ရက်ခြားတစ်ခါ တစ်ကြိမ်ခူးဆွတ်နိုင်ပါသည်။ ပန်းများကိုဈေးကွက်အနီး အဝေးပေါ်မူတည်၍ ညနေ နေအေးသောအချိန်တွင် ခူးဆွတ်သင့်ပါသည်။ ခူးဆွတ်ပြီးသော ဂန္ဓမာပန်းများကို ပြည်ဈေးကွက်အတွင်းတွင် ရောင်းချလျက်ရှိရာ တစ်စည်းလျှင် (၂၅၀၀-၃၀၀၀)ကျပ် ဈေးများဖြင့် ရောင်းချလျက်ရှိကြောင်းသိရှိရပါသည်။

DOCA(ပဲခူး)

          မာလကာပင်၏အသီးမှာ အကြမ်းအားဖြင့် အူနီသီးမျိုးနှင့် အူဖြူသီးမျိုးဟူ၍ ရှိပါသည်။ အူနီသီးမျိုးသည် အသီး၏အတွင်းသားသည် ပန်းရောင်မှ အနီရောင်ရှိ၍ စားသုံးရာတွင် ပျော့ပျောင်းသည်။ အူဖြူမျိုးထက်ပို၍ချိုပြီး အသီးပုံသဏ္ဍန်သည် ဘူးသီးပုံဖြစ်သည်။ အူဖြူမျိုးအသီး၏အတွင်းသားသည် အဖြူရောင်ရှိပြီး အသီးသည်မာကျစ်၍ အူနီမျိုးထက် အစေ့လဲပိုများပြီး အသီးပုံသဏ္ဍန်သည် အလုံးပုံဖြစ်သည်။ ၎င်းအပြင် ကီလိုမာလကာလို့ခေါ်သောအခြားမျိုးများလည်း ရှိသေးကြောင်းသိရသည်။ 

            မာလကာသီးများကို ပြည်မြို့အတွင်းတွင်လည်းစီးပွားဖြစ်စိုက်ပျိုးကြသလို မှော်ဇာ၊ ခွေးရဲစသော အနီးအနားရှိရွာများမှလည်း ပြည်ဈေးကွက်အတွင်းသို့လာရောက်ရောင်းချကြပါသည်။ ပြည်ဈေးကွက်တွင် ရောင်းချသောမာလကာသီးဈေးနှုန်းအနေဖြင့် ကီလိုမာလကာသီး အလတ်တစ်ပိဿာလျှင် (၄၀၀၀-၅၀၀၀)ကျပ်နှုန်း၊ အစေ့မပါမာလကာသီး (1Kg)လျှင် (၅၀၀၀-၆၀၀၀)ကျပ်နှုန်းဖြင့် ရောင်းချကြကြောင်းသိရှိရပါသည်။

DOCA(ပဲခူး)

          ပြည်ခရိုင်၊ ပေါက်ခေါင်းမြို့နယ်၊ သဖန်းချိုအုပ်စု၊ လေးကြီးကျေးရွာတွင် ခရမ်းကြွပ်သီးများကို စိုက်ပျိုးထွက်ရှိနေပြီဖြစ်ပါသည်။ တောင်သူများနေဖြင့် ခရမ်းကြွပ်သီးကို ဧကပြတ်စိုက်ပျိုးထားခြင်းမရှိဘဲ အခြားသီးနှံများဖြင့်ရောနှော၍ စိုက်ပျိုးထားရှိပါသည်။ ခရမ်းကြွပ်သီးကိုအများဆုံးစိုက်ပျိုး ဧကမှာ (၀.၂၅)ဧက တစ်ယောက်သာစိုက်ပျိုးထားကြောင်းသိရှိရပါသည်။ ခရမ်းကြွပ်သီး (၀.၂၅)ဧကတွင် အပင်ပေါင်း (၂၀၀၀)ခန့်စိုက်ပျိုးနိုင်ပြီး မျိုး၊ စိုက်ပျိုးစရိတ်၊ သွင်းအားစု လုပ်သားခအပါအဝင် ကုန်ကျစရိတ်မှာ (၅)သိန်းကျပ်ခန့် ကုန်ကျကြောင်းသိရပါသည်။ ခရမ်းကြွပ်သီးခူးဆွတ်ချိန်ရောက်ရှိလျှင် (၃)ရက်ခြားတစ်ခါ ခူးဆွတ်ရရှိပြီး တစ်ကြိမ်ခူးဆွတ်လျှင် (၀.၂၅)ဧကတွင် အလုံးရေ (၈၅၀၀)ခန့် ခူးဆွတ်ရရှိကြောင်းသိရှိရပါသည်။ ခရမ်းကြွပ်သီးတစ်ခါစိုက်ပျိုးထားလျှင် ခူးဆွတ်ချိန်မှာ (၁)လခွဲခန့်ကြာမြင့်ပြီး ခူးဆွတ်သည့်အကြိမ်ရေမှာ (၁၅)ကြိမ်ခန့် ခူးဆွတ်ရရှိကြောင်း သိရပါသည်။ ခရမ်းကြွပ်သီးများကို ကုန်စိမ်းပွဲစားများက စိုက်ခင်းအထိလာရောက်ဝယ်ယူကြ၍ ဖောက်သည်ဈေးအနေဖြင့် တစ်လုံးလျှင် (၁၀)ကျပ်ဖြင့် ရောင်းချကြပါသည်။ တောင်သူဝင်ငွေနေဖြင့် (၀.၂၅)ဧကတွင် (၁၂၇၅၀၀၀)ကျပ်ခန့် ရရှိပြီး အသားတင်အမြတ်အနေဖြင့် (၇၇၅၀၀၀) ကျပ် ရရှိကြောင်းသိရပါသည်။

          ခရမ်းကြွပ်သီးကိုကုန်စိမ်းဒိုင်များမှတစ်ဆင့် နယ်မြို့များရှိဈေးကွက်များသို့ ပြန်လည်ဖြန့်ဖြုးရောင်းချကြကြောင်းသိရပါသည်။ စိုက်ပျိုးသူများအနေဖြင့်လည်း စိုက်ပျိုးသင့်သလို တစ်ဆင့်ပြန်လည်ရောင်းချသူများအနေဖြင့်လည်း သင့်တင့်သောအမြတ်အစွန်းများ ရရှိနိုင်မည်ဖြစ်ကြောင်းသိရှိရပါသည်။

DOCA(ပဲခူး)