ပြည်တွင်းကုန်သွယ်မှုသတင်း

           မကွေးတိုင်းဒေသကြီး၊ ဆိပ်ဖြူမြို့နယ်အတွင်းရှိ စိုက်တောင်သူများသည် ကြက်သွန်ဖြူနှင့် အာလူးသီးနှံကို ရေမြေရာသီဥတုနှင့်မကိုက်ညီ၍ စိုက်ပျိုးမှုမရှိခြင်းကြောင့် စားသုံးမှုလိုအပ်ချက်အရ အခြားမြို့နယ်များမှ ဝင်ရောက်အရောင်းအဝယ်ဖြစ်လျက်ရှိပါသည်။ ကြက်သွန်ဖြူကို ရှမ်းပြည်နယ်၊ အောင်ပန်းနှင့် ယောနယ်ဒေသ၊ ဆော၊ ပေါက်၊ ကျောက်ထုမြို့များမှ ဝင်ရောက်အရောင်းအဝယ်ဖြစ်လျက်ရှိပြီး ဈေးကွက်တွင် ဈေးနှုန်းကျဆင်းခြင်းမရှိ ဈေးအမြင့်ဖြင့် အရောင်းအဝယ်ဖြစ်လျက်ရှိပါသည်။ ၂၀၂၄ခုနှစ်၊ နိုဝင်ဘာလ(တတိယပတ်)တွင် ကြက်သွန်ဖြူအမျိုးအစား၊ အရည်အသွေးနှင့် အရွယ်အစားလိုက်၍ ဗမာကြက်သွန်ဖြူတစ်ပိဿာလျှင် ကျပ်(၂၀၀၀၀ - ၁၃၅၀၀)၊ ရှမ်းပြည် ကြူကုတ် တစ်ပိဿာလျှင် ကျပ်(၂၂၀၀၀-၁၃၀၀၀)ဈေးအသီးသီးဖြင့် အရောင်းအဝယ်ဖြစ်လျက်ရှိကြောင်း၊ ယခင် အောက်တိုဘာလ(တတိယပတ်)နှင့်ဈေးနှုန်းနှိုင်းယှဉ်ပါက တစ်လအတွင်း ကျပ်(၅၀၀၀)ခန့် ဈေးတက်ပြီး အရောင်းအဝယ်ဖြစ်လျက်ရှိကြောင်း သိရှိရသည်။

          ဈေးနှုန်းမြင့်တက်ရခြင်းမှာ ကြက်သွန်ဖြူသီးနှံများ ဈေးကွက်သို့ ဝင်ရောက်မှုနည်းပြီး ဝယ်ယူစားသုံးမှုမြင့်မားလျက်ရှိခြင်းနှင့် သယ်ယူစရိတ်မြင့်တက်ခြင်းတို့ကြောင့် ဈေးနှုန်းမြင့်တက်ခြင်းဖြစ်ကြောင်း ဆိပ်ဖြူမြို့ ပတ္တမြားဈေးအတွင်းရှိ ကုန်စိမ်းသီးနှံရောင်းဝယ်ရေးဈေးကွက်မှ သိရှိရပါသည်။

DOCA(မကွေး)

              မကွေးတိုင်းဒေသကြီး၊ ပခုက္ကူခရိုင်၊ ဆောမြို့နယ်၌ (မိုး)စပါးစိုက်ပျိုးမှုကို စိုက်ဧက(၅၀၀၀၀) ခန့် လျာထားစိုက်ပျိုးခဲ့ရာ ရာနှုန်းပြည့်ဖြစ်ထွန်းအောင်မြင်စွာ စိုက်ပျိုးနိုင်ခဲ့ကြောင်း၊ ဆောမြို့နယ်အတွင်းရှိ ဒေသခံပြည်သူများသည် စိုက်ပျိုးရေးအဆင်ပြေမှုနှင့် စိုက်ပျိုးမြေကောင်းမွန်မှုတို့ကြောင့် စိုက်ပျိုးရေးလုပ်ငန်းကို စီးပွားဖြစ်စိုက်ပျိုးလုပ်ကိုင်ကြပြီး ဒေသခံပြည်သူများ စားရေရိက္ခာဖူလုံရေးနှင့် ပြည်တွင်းစားသုံးဆန်ဖူလုံမှုမှသည် ပြည်ပနိုင်ငံများသို့ တိုးမြှင့်တင်ပို့နိုင်ရေး မိုးရာသီစိုက်ပျိုးချိန်တွင် စပါးသီးနှံကိုအဓိကထား၍ နှစ်စဉ်စိုက်ပျိုးခဲ့ကြောင်း သိရသည်။

              (မိုး)စပါးစိုက်ပျိုးမှုကို ဇူလိုင်လတွင်စိုက်ပျိုးပြီး နိုဝင်ဘာလတွင်ရိတ်သိမ်းကြောင်း၊ စပါးအထွက်နှုန်းကောင်းသောဆင်းသုခနှင့် မနောသုခမျိုးကို အများဆုံးစိုက်ပျိုးကြောင်း၊ ဆောမြို့နယ်အတွင်းရှိ စံကျေးရွာ၊ တေကျေးရွာ၊ သရက်ချဉ်၊ ကျောက်မြ၊ ရေရှင်၊ ယောကျေးရွာများတွင် နိုဝင်ဘာလ (ဒုတိယပတ်)မှစ၍ (မိုး)စပါးများ စတင်ထွက်ပေါ်လျက်ရှိကြောင်း၊ ယခုနှစ်တွင် ရာသီဥတုကောင်းမွန်ခြင်းကြောင့် တောင်သူတစ်ဦးလျှင် ပျမ်းမျှအထွက်တင်း (၇၅ - ၈၅)ထိ ထွက်ရှိကြောင်း၊ စိုက်ပျိုးစရိတ်ကုန်ကျမှုအနေဖြင့် တစ်ဧကလျှင် ငွေကျပ်(၁၅)သိန်းခန့် ကုန်ကျကြောင်း၊ ဒေသခံတောင်သူများသည် ထွက်ရှိသောစပါးများကိုကြိတ်ခွဲပြီး ရရှိသောဆန်ကိုရောင်းချကြောင်း၊ စပါးတစ်တင်းကြိတ်လျှင် ဆန်(၇)ပြည်ခန့် ထွက်ရှိကြောင်း၊ ဈေးကွက်အနေဖြင့် ဆောမြို့နယ်အတွင်းရှိ စားသုံးသူဒေသခံပြည်သူများနှင့် ပခုက္ကူမြို့သို့ ဖြန့်ဖြူးရောင်းချလျက်ရှိပြီး သီးနှံပေါ်စဒေသတွင်းဈေးကွက်တွင် ဆန်တစ်တင်းလျှင် ကျပ်(၅၀၀၀၀)ခန့် ရောင်းချလျက်ရှိ၍ အကျိုးအမြတ်အနေဖြင့် တစ်ဧကလျှင် ငွေကျပ်(၇၀၀၀၀၀) ခန့်ရရှိကြောင်း သိရသည်။

                ဆောမြို့နယ်အတွင်းရှိ‌ ဒေသခံတောင်သူများသည် နိုဝင်ဘာလကုန်တွင်ရိတ်သိမ်းပြီး စပါးခင်းကျွတ်မြေကွက်များ၌ ကြက်သွန်ဖြူနှင့် မြေပဲသီးနှံကို သီးထပ်အဖြစ်စိုက်ပျိုးကြမည်ဖြစ်ကြောင်း ဒေသခံတောင်သူများထံမှ သိရှိရပါသည်။

DOCA(မကွေး)

               မကွေးတိုင်းဒေသကြီး၊ အထက်မင်းလှမြို့၊ ဇေယျာသီရိဈေးတွင် ဟင်းသီးဟင်းရွက်များကို မကွေးမြို့၊ မင်းဘူးမြို့၊ တောင်တွင်းကြီးမြို့၊ ရှမ်းပြည်နယ်၊ တောင်ကြီးမြို့နှင့် အောင်ပန်းမြို့တို့မှ မှာယူရောင်းချသည့်အပြင် မြို့အနီးရှိကျေးရွာများဖြစ်သည့် ပန်းတော်ပြင်၊ ဥယျာဉ်၊ မယ်ဇလီတော၊ ရွာတော်ကျေးရွာများနှင့် မြို့တစ်ဖက်ကမ်းရှိ ကျွန်းရွာများမှလည်း လာရောက်ရောင်းဝယ်ဖောက်ကားလျက်ရှိကြောင်း သိရသည်။

              ၂၀၂၄ခုနှစ်၊ နိုဝင်ဘာလ(တတိယပတ်)တွင် မင်းလှမြို့နယ်အတွင်းရှိ ကျေးရွာများမှ မုန်လာဥဖြူများစတင်ထွက်ပေါ်လျက်ရှိရာ မုန်လာဥအရွယ်အစားပေါ်မူတည်၍ (၃)ဥတစ်စည်းလျှင် ကျပ်(၇၀၀ မှ ၉၀၀)ဈေးဖြင့် ရောင်းချလျက်ရှိပြီး ပေါ်ဦးပေါ်ဖျားချိန်ဖြစ်၍ ဈေးကောင်းရလျက်ရှိကြောင်း ဈေးသည်များထံမှ သိရှိရပါသည်။

 DOCA(မကွေး)

    ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ်အတွင်းရှိ တောင်သူများသည် မိုးသီးနှံစပါး၊ ဆောင်းသီးနှံ ပဲမျိုးစုံ စိုက်ပျိုးမှု အများဆုံးဖြစ်သော်လည်း မိသားစုဝင်ငွေ နေ့စဉ်ရရှိရေး အတွက် မိမိခြံမြေများတွင် ဂန္ဓာမာပန်း အမျိုးအစားမျိုးစုံအား စီးပွားဖြစ်အတွက်သော်လည်းကောင်း၊ နေ့စဉ်ဝင်ငွေအတွက်သော်လည်းကောင်း၊ နေရာဒေသများစွာတွင် စိုက်ပျိုးလာကြပါသည်။ (၂၀.၁၁. ၂၀၂၄)ရက်နေ့၊ နံနက်(၀၉:၀၀) အချိန်တွင် စားသုံးသူရေးရာဦးစီးဌာနမှ မြို့နယ်ဦးစီးမှူး ဦးမိုးကျော်က စစ်ကွင်းကျေးရွာအတွင်း ဂန္ဓာပန်းစိုက်ပျိုးသောတောင်သူ ဒေါ်မြင့်သိန်းခြံသို့ မြေပြင်ကွင်းဆင်းမှုကို ဆောင်ရွက်ခဲ့ပါသည်။

    ဟင်္သာတမြို့နယ် ဒေသတွင်း စိုက်ပျိုးသော ပန်းများကို ကာလ(၂)ပိုင်းခွဲခြား၍ စိုက်ပျိုးကြပါသည်။ မိုးရာသီပန်းကို ဇွန်လ ပထမပတ်တွင် စတင်စိုက်ပျိုးကြပြီး နိုဝင်ဘာလတွင် ရောင်းချရန် အဆင့်သို့ ရောက်ရှိပြီး၊ ဆောင်းရာသီ ပန်းကို ဇန်နဝါရီလတွင် စတင်စိုက်ပျိုးပြီး၊ မေလတွင် ခူးဆွတ်ရန် အဆင့်သို့ရောက်ရှိပါသည်။ ဟင်္သာတမြို့နယ်အတွင်း ပန်းစိုက်ဧက စုစုပေါင်း(၅၀၀)ဧကကျော်ရှိပါသည်။ မိုးရာသီပန်းအဖြစ် ဂန္ဒမာပန်းများကို စိုက်ပျိုးကြပြီး တစ်ဧကလျှင် ဂန္ဓာမာပန်းပင် (၃၅၀၀၀ မှ ၄၀၀၀၀) အထိ စိုက်ပျိုးနိုင်ပါသည်။ ပန်းမျိုးများကို ပြင်ဦးလွင်၊ တောင်ကြီး စသော မြို့ကြီးများမှ မှာယူစိုက်ပျိုးရပါသည်။ ပန်းမျိုးမှာတစ်ပင်လျှင် (၁၈ ကျပ် မှ ၂၀ ကျပ်) ဝန်းကျင် ဈေးနှုန်းဖြင့် ဝယ်ယူရပါသည်။ ဂန္ဓမာပန်း စိုက်ပျိုးချိန် မှ ခူးဆွတ်ချိန်အထိ လုပ်သားခ၊ ဓါတ်မြေဩဇာ၊ ဆေးဖြန်းခြင်း၊ ပေါင်းနှုတ်ခြင်းအပါအဝင် တစ်ဧကကုန်ကျစရိတ်   သိန်း ၇၀ ကျပ် ဝန်းကျင်အထိရှိပြီး နိုဝင်ဘာလ ပထမပတ်မှစ၍ ခူးဆွတ်ရောင်းချရာတွင် ဂန္ဓာပန်း အပွင့်ကြီး တစ်ပွင့်လျှင် ၅၀၀ ကျပ်မှ ၇၀၀ ကျပ်၊ ဂန္ဓမာပန်းအပွင့်သေး တစ်ပွင့်လျှင် ၃၀၀ ကျပ်မှ ၄၀၀ ကျပ်ဖြင့် ရောင်းချရပါသည်။ ယခုနှစ်တွင် ပန်းဈေးများ ပြန်လည် ကောင်းမွန်လာသည့်အတွက် ပန်းစိုက်တောင်သူများအနေဖြင့် အကျိုးအမြတ်များကြောင်း သိရှိရပါသည်။ ဈေးကွက်အနေဖြင့် မိမိဒေသ၊ မိမိခရိုင်အတွင်း၊ ဧရာဝတီတိုင်းဒေသကြီးနှင့် ရန်ကုန်တိုင်းဒေသကြီးအတွင်းရှိ မြို့နယ်များသို့ ရထား၊ ကားများဖြင့် လက်လီ၊ လက္ကားရောင်းချလျက်ရှိပါသည်။ ပန်းစိုက်တောင်သူများအနေဖြင့် ယခုနှစ်တွင် ပန်းဈေးကောင်းခြင်းကြောင့်  အကျိုးအမြတ် တွက်ခြေကိုက်မှုရှိပြီး မိသားစုဝင်ငွေတိုးနေသော ဂန္ဓာပန်းစိုက်ပျိုးခြင်းအကြောင်း လေ့လာတင်ပြအပ်ပါသည်။

DOCA(ဧရာဝတီ)

DOCA(ဟင်္သာတ)

                မိတ္ထီလာနှင့် ရမည်းသင်းခရိုင်ရှိ မြို့နယ်များ၌ နိုဝင်ဘာလဆန်းမှစ၍ ဝါသီးနှံအသစ်များ ဈေးကွက်သို့ဝင်ရောက်ကြောင်းသိရသည်။ ယခုနှစ်တွင် ဝါသီးနှံစိုက်ပျိုးမှုအနည်းငယ်နောက်ကျသည့်အတွက် ဈေးကွက်ဝင်ရောက်မှုမှာလည်းအနည်းငယ်နောက်ကျခြင်းဖြစ်ကြောင်း သိရသည်။ ဈေးကွက်သို့ အောက်တိုဘာလတွင် စတင်ဝင်ရောက်လေ့ရှိပြီး ယခုနှစ်မှတော့ နိုဝင်ဘာလမှသာဝင်ရောက်လာခြင်းဖြစ်ပါသည်။ ဝါဈေးနှုန်းမှာ တစ်ပိဿာလျှင် (၃၁၀၀-၃၃၀၀) ကျပ်ဈေးရှိပြီး၊ ဂွမ်းအနေနှင့် အရောင်းအဝယ်နည်းသေး၍ တစ်ပိဿာလျှင် (၈၀၀၀-၁၀၅၀၀) ကျပ်ထိရှိကြောင်း သိရသည်။

               ဝါသီးနှံကို မိုးကြို၊ မိုး၊ မိုးနှောင်းဟူ၍စိုက်ပျိုးရာ မိတ္ထီလာခရိုင်တွင် ယခုနှစ်ရာသီဥတုအခြေအနေရ မိုးနှောင်းဝါကိုအစိုက်များကာ အထွက်နှုန်းများသော ချည်မျှင်ရှည်ဝါကိုပိုမိုစိုက်ပျိုးကြောင်းသိရသည်။ ခရိုင်အတွင်းမြို့နယ်အလိုက် စိုက်ပျိုးမှုတွင် ဝမ်းတွင်းမြို့နယ်မှာ ဧကအများဆုံးစိုက်ပျိုးရသဖြင့် ရမည်းသင်းခရိုင်တွင်လည်း မြို့နယ်အလိုက်စိုက်ပျိုးရာ မိုးနှောင်းဝါစိုက်ပျိုးကာ မျိုးအနေနှင့် ချည်မျှင်ရှည်ဝါကိုသာ စိုက်ပျိုးကြောင်းသိရပါသည်။ မိတ္ထီလာခရိုင်တွင် မလှိုင်မြို့နယ်၌ မလှိုင်ဝါကိုလည်းစိုက်ပျိုးကြပါသည်။ ဝါပွဲစား ပွဲရုံများအနေနှင့် ဒေသတွင်းဝါစက်များကိုရောင်းချကြရာ ဂွမ်းစက်များမှာ ပြည်တွင်းရောင်းဝယ်မှုအနေဖြင့် မန္တလေးချည်မျှင်စက်များသို့ အရည်အသွေးအနည်းငယ်နိမ့်သည့် C ၊ D အမျိုးအစားများကိုရောင်းချကြပြီး၊ ဈေးနှုန်းမှာ ဂွမ်းတစ်ပိဿာလျှင်  C မှာ (၈၉၀၀) ကျပ်၊ D မှာ (၈၀၀၀) ကျပ် ဈေးရှိကြောင်းသိရှိရပါသည်။

DOCA(မန္တ‌လေး)