ပြည်တွင်းကုန်သွယ်မှုသတင်း

       စစ်ကိုင်းတိုင်းဒေသကြီး၊ ကန့်ဘလူခရိုင်တွင် ကွမ်းသီးပင်များကို နေအိမ်ခြံဝင်းများ၌ မိသားစုဝင်ငွေရရှိသည့်အတွက် တစ်နိုင်တစ်ပိုင်စိုက်ပျိုးကြကြောင်း၊ ကန့်ဘလူခရိုင်တွင် ရောင်းချနေသည့် ကွမ်းသီးများကို ကန့်ဘလူခရိုင်အတွင်းမှလည်းကောင်း၊ ဘိတ်ဒေသမှလည်းကောင်း ဝယ်ယူ၍ ကွမ်းသီးမှ ကွမ်းသီးစိတ်များထုတ်လုပ်၍ ဖြန့်ဖြူးရောင်းချလျက်ရှိကြောင်းသိရသည်။

         ၂၀၂၄ခုနှစ်၊ နိုဝင်ဘာလ တတိယပတ်တွင်ဖြစ်ပေါ်နေသော ကန့်ဘလူခရိုင်၏ ကွမ်းသီးစိတ်ဈေးနှုန်းများအနေဖြင့် အရည်အသွေးပေါ်မူတည်၍ ကွမ်းသီးစိတ် လက်ကားဈေးတစ်ပိဿာလျှင် ငွေကျပ်(၁၅၅၀၀)ဖြင့်လည်းကောင်း၊ လက်လီဈေးတစ်ပိဿာလျှင် ငွေကျပ်(၁၆၀၀၀) ဖြင့်လည်းကောင်း၊ ကွမ်းသီးစိတ်(ပယ်)တစ်ပိဿာလျှင် ငွေကျပ်(၆၀၀၀)ဖြင့်လည်းကောင်း အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ကန့်ဘလူမြို့နယ်မှထွက်ရှိသည့် ကွမ်းသီးစိတ်များကို ကန့်ဘလူမြို့ပေါ်ရှိဆိုင်များ၊ ကန့်ဘလူမြို့နယ်၊ ထန်းကုန်းကျေးရွာနှင့် ကျွန်းလှမြို့နယ်များသို့ လက်လီ/ လက္ကားဖြန့်ဖြူးရောင်းချလျက်ရှိကြောင်း  ကန့်ဘလူမြို့၊ အမှတ်(၃)ရပ်ကွက်ရှိ ကွမ်းသီးစိတ်ရောင်းဝယ်ရေးလုပ်ငန်းရှင်၏ ပြောပြချက်အရသိရပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ မုံရွာမြို့နယ်အတွင်း ချင်းတွင်းမြစ်ရိုးအရှေ့ဘက်တွင်တည်ရှိသော ညောင်ဖြူပင်၊ သစ်ဆိမ့်၊ ထနောင်းတော၊ နဂါးတွင်းကျေးရွာများတွင် အနည်းငယ်စိုက်ပျိုးပြီး ဈေးကွက်အတွင်းလိုအပ်သော ဂေါ်ဖီထုပ်များကို ရှမ်းပြည်နယ်မှ  မှာယူရောင်းချကြပါသည်။ ဂေါ်ဖီထုပ်ဈေးနှုန်းမှာ အောက်တိုဘာလအတွင်း ဂေါ်ဖီထုပ်တစ်ထုပ်လျှင် အကြီး (၃၅၀၀) ကျပ်၊ အသေး (၂၀၀၀) ကျပ်ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ နိုဝင်ဘာလတွင် ဂေါ်ဖီတစ်ထုပ်လျှင် အကြီး (၃၅၀၀) ကျပ်၊ အသေး (၂၀၀၀ ) ကျပ်ဈေးရှိခဲ့ပြီး မတ်လနှင့် ဧပြီလ ဈေးနှုန်းတို့နှင့်နှိုင်းယှဉ်လျှင် ဈေးနှုန်းကွာဟမှုမရှိကြောင်း မုံရွာမြို့၊ ကန်သာယာဈေးရှိ ဈေးရောင်းချသူများထံမှသိရပါသည်။

DOCA(စစ်ကိုင်း)

        ရှောက်ချိုသီးမှာ ရှောက်သီး၊ သံပရာသီး၊ လိမ္မော်သီးတို့နှင့် မျိုးရင်းတူသည့် အသီးတစ်မျိုးဖြစ်ပြီး အခွံမှာ အစိမ်းရောင်ရင့်ရင့်၊ အစိမ်းရောင်ဖျော့ဖျော့နှင့် အဝါရောင်သန်းသည့် ရှောက်ချိုသီးဟူ၍ အမျိုးမျိုးရှိပါသည်။ ရှောက်ချိုသီးစားသုံးခြင်းဖြင့် အစာခြေစနစ်ကိုကျန်းမာစေ၍ ဗီတာမင်စီချို့တဲ့မှုမဖြစ်အောင် ကာကွယ်ပေးခြင်းဖြင့် ကိုယ်ခံအားကောင်းစေသည့်အပြင် ဆံကေသာကျန်းမာရေး၊ အသားအရည်ကျန်းမာရေးအတွက်လည်းကောင်းမွန်စေပါသည်။ ရှောက်ချိုသီးတွင် ပိုတက်စီယမ်ပါဝင်မှုကြောင့် ကင်ဆာရောဂါ၊ ကျောက်ကပ်ရောဂါ၊ ဆီးအိမ်/ ဆီးလမ်းကြောင်းပိုးဝင်ခြင်း၊ ပန်းနာရင်ကြပ်ရောဂါ၊ ဂေါက်ရောဂါနှင့် ကားမူးခြင်းတို့ကို သက်သာပျောက်ကင်းစေနိုင်သော အကျိုးကျေးဇူးများရရှိသည့် အသီးတစ်မျိုးဖြစ်ပါသည်။

          ရှောက်ချိုသီးကို အကွင်းလိုက်လှီးပြီး ဆား၊ သကြား၊ ငရုတ်သီး၊ အရောင်တင်မှုန့်အနည်းငယ်ထည့်မွှေ၍ စားရသည့်အရသာကို ကလေး/ လူကြီးကြိုက်နှစ်သက်ကြသည့်အပြင် အဖျော်ရည်အနေဖြင့်လည်းသောက်သုံးပါက ချိုချိုချဉ်ချဉ်လေးနှင့် ခံတွင်းရှင်းစေကြောင်းသိရပါသည်။ ရှောက်ချိုသီးစားသုံးခြင်းကြောင့် ကျန်းမာရေးအကျိုးကျေးဇူးများစွာရရှိသည့်အတွက် စားသုံးသူများက ဝယ်ယူကြကြောင်း၊ ရှောက်ချိုသီးတစ်လုံးကို (၆၀ဝိ/-)ကျပ်မှ (၁၂၀ဝိ/-)ကျပ်အထိ ဈေးကွက်အတွင်း အရောင်းအဝယ်ဖြစ်နေကြောင်း၊ ဒေသအသီးသီးမှ ဝင်ရောက်လျက်ရှိကြောင်းနှင့် ရောင်းချသည့်အသီးအများစုမှာ မောက်မယ်ရှောက်ချိုသီးများဖြစ်ပြီး ပုံမှန်ဝင်ရောက်၍ အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ရှမ်း)

     ဧရာဝတီတိုင်း‌ဒေသကြီး၊ ဟင်္သာတခရိုင်၊ ဇလွန်မြို့နယ်ဦးစီးမှူးရုံးတွင် စားသုံးသူကာကွယ်ရေးလုပ်ငန်းများကို ပုံမှန်ဆောင်ရွက်လျက်ရှိပြီး စားသုံးသူများနေ့စဉ် ဝယ်ယူသုံးစွဲလျက်ရှိသည့် အခြေခံစားသောက်ကုန်များ၏ ဈေးနှုန်း၊ဈေးကွက် အခြေအနေများကိုလည်း စဉ်ဆက်မပြတ် လေ့လာဆောင်ရွက်လျက်ရှိပါသည်။

     ဇလွန်မြို့၊ မြို့မဈေးအတွင်းရောင်းချသော  ကြက်ဥများကို ညောင်တုန်းမြို့နှင့်ကြိမ်ပင်ဆယ် မြို့တို့မှ မှာယူရကြောင်း၊ ဘဲဥများကို ကျိုက်လတ်ဒေသမှ မှာယူရောင်းချလျက်ရှိကြောင်း သိရှိရပါသည်။ ၂၀၂၄ခုနှစ်၊ နိုဝင်ဘာလ (ဒုတိယပတ်)တွင် ကြက်ဥအလုံးကြီး(၁၀)လုံးလျှင် (၄၅၀၀ ကျပ်)၊ ကြက်ဥအလုံး အသေး (၁၀)လုံးလျှင် ကျပ်(၄၄၀၀ ကျပ်)၊ ဘဲဥ(၁၀)လုံးလျှင် ကျပ်(၅၅၀၀ မှ ၅၆၀၀)ကျပ် ဈေးနှုန်းများဖြင့် အရောင်းအဝယ်ဖြစ်လျက်ရှိပြီး၊ ယခင် (ပထမပတ်)နှင့်နှိုင်းယှဉ်ပါက ယခုတစ်ပတ်တွင် ကြက်ဥ(၁၀)လုံးလျှင် ကျပ်(၂၀၀ မှ ၃၀၀)၊ ဘဲဥ(၁၀)လုံးလျှင် ကျပ် (၃၀၀)ဖြင့် ဈေးအနည်းငယ် မြင့်တက်လျက်ရှိကြောင်း၊ ဥစားကြက်မွေးမြူးရေးခြံများ၌ ကြက်ဥအထွက်နှုန်းလျော့ကျလာခြင်းအပြင် သယ်ယူစရိတ်မြင့်မားခြင်းကြောင့် ကြက်ဥ၊ဘဲဥဈေးနှုန်းများမှာ အနည်းငယ်မြင့်တက်ရခြင်းဖြစ်ကြောင်း၊  အလုံးအရွယ်အစားအပေါ်မူတည်၍ ဈေးနှုန်းများလဲ ကွာခြားမှုရှိကြောင်း ကြက်ဥ၊ဘဲဥ ရောင်းချသူကုန်စုံဆိုင်များမှ သိရှိရပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ မအူပင်မြို့နယ်အတွင်းရှိ စလင်းဒေါင့်ကျေးရွာ၊ အောင်ဟိတ်ကျေးရွာများတွင် စံပယ်ဖြူပန်းကို ဘုရားပန်းအတွက် ရောင်းချရန် စီးပွားဖြစ်စိုက်ပျိုးလျက်ရှိကြောင်း သိရသည်။ ၂၀၂၄-၂၀၂၅ ခုနှစ်တွင် မအူပင်မြို့နယ်တွင် ပန်းစိုက် ဧက ၁၂၈ ကျော် စိုက်ပျိုးထားရှိကြောင်း မြို့နယ်စာရင်းများအရ သိရသည်။

      အောင်ဟိတ်ကျေးရွာတွင် စံပယ်ဖြူပန်းစိုက်ပျိုးကြပြီး၊ ဘုရားပန်းအဖြစ် ရောင်းချသော ပန်းတစ်မျိုး ဖြစ်သည်။ စံပယ်ဖြူပန်း မျိုးကို အပင်ကိုဝယ်ယူပြီး တစ်ပင်ကို   ၂၀   ကျပ်နှုန်းဖြင့်  တောင်ကြီးဘက်မှ မှာယူဝယ်ယူသည်။ တစ်ခြံလျှင် အပင်တစ်သောင်း စိုက်ပျိုးရကြောင်း၊  စံပယ်ဖြူ ဘုရားပန်းစိုက်သူ တောင်သူဦးကျော်ဆန်းက ပြောပြသည်။ စံပယ်ဖြူပန်း သည် အောက်တိုဘာလ နောက်ဆုံးပါတ်တွင် စတင်စိုက်ပျိုးပြီး  ဒီဇင်ဘာစတုတ္ထပတ်တွင် ပန်းပွင့်၍ ခူးဆွတ်ရပြီးဖြစ်ကြောင်း၊ တစ်နေ့ကို ပန်း ၆၀၀ညွှန့် တစ်ရက်ခြားတစ်ခါ ခူးရကြောင်း သိရသည်။

     အောင်ဟိတ်ကျေးရွာရှိ ကျေးရွာသူ/သားများသည် လယ်ယာထွက်စပါးကို စိုက်ပျိုးသလို ပန်းစိုက်ပျိုးသူလည်း များသည်။ စိုက်ပျိုးသောပန်းမျိုးများမှာ၊ ဂန္ဓမာပန်းမျိုး (၄)မျိုး၊ ကြယ်တာရာ ပန်း၊ နှင်းဆီပန်း၊ ပန်းထိန်ငိုပန်း၊ မျိုးများ နှစ်စဉ်စိုက်ပျိုးကြပြီး၊ တစ်နှစ်ကို ပန်းစိုက်ပျိုးမှု ရာသီအလိုက်ပန်းများ  ၃ကြိမ် စိုက်ပျိုးကြောင်း၊ စံပယ်ဖြူပန်း စိုက်ပျိုးထုတ်လုပ်မှု ကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခ အပါအဝင်  တစ်ခြံလျှင် ငွေကျပ်    ၉၀၀၀၀၀/- ခန့် ကုန်ကျပြီး အထွက်နှုန်းအနေဖြင့်    တစ်လလျှင် ပန်းအညွှန့် ၉၀၀၀- ၁၀၀၀၀နီးပါး ထွက်ရှိသည်။ ဈေးနှုန်းအနေဖြင့် စံပယ်ဖြူပန်း တစ်ညွှန့်ကို လက်ကားဈေး တစ်ပင်ကို ၂၀၀ကျပ်၊ တစ်နေ့ကို အပင် ၆၀၀ထွက်၍ တစ်လကို ၁၅ရက်ခူးရသည့်အတွက် ငွေကျပ် ၁၈၀၀၀၀၀/-ရရှိကာ  အကျိုးအမြတ်  ၉၀၀၀၀၀/-ကျပ် ခန့် အကျိုးအမြတ် ရရှိကြောင်း သိရသည်။

          ပန်း ဈေးကွက်အနေဖြင့် မအူပင်မြို့၊ ကျိုတ်လတ်၊ မော်ကျွန်းမြို့များသို့သာ တင်ပို့ရောင်းချပြီး ဒေသခံများ စီးပွားဖြစ် စိုက်ပျိုးနေသော လုပ်ငန်းတစ်ခုဖြစ်ကြောင်း သိရသည်။

DOCA(ဧရာဝတီ)