ပြည်တွင်းကုန်သွယ်မှုသတင်း

  ၂၀၂၅ ခုနှစ် အောက်တိုဘာလ၏ ကြက်သွန်ဖြူသီးနှံဈေးနှုန်းများမှာ လက်ကား တစ်ပိဿာ လျှင် (၄၀၀၀-၄၅၀၀)ကျပ် နှင့် လက်လီ တစ်ပိဿာလျှင် (၅၀၀၀-၆၀၀၀)ကျပ် ဈေးပေါက်ခဲ့ပါသည်။

   စိုက်ဧကများသောတောင်သူများနှင့်ကုန်သည်အချို့တို့မှ ၂၀၂၅ခုနှစ်မေလနှောင်းပိုင်းမှ စတင်၍ သိုလှောင်ထားခဲ့ ရာ သိုလှောင်ကာလကြာမြင့်လာခြင်း၊ ကုန်စည်အရည်အသွေးကျဆင်း လာမည့် အခြေအနေများကြောင့် ဈေးကွက်သို့ အမြောက်အမြား ပို့ဆောင်ရောင်းချခြင်းကြောင့် ကုန် စည် ဖောင်းပွမှုဖြစ်ပေါ်၍ ဈေးကျဆင်းရကြောင်း လေ့လာသိရှိရပါသည်။

          ယခင်နှစ်ကာလတူနှင့် နှိုင်းယှဉ်လျှင် ဈေးကွာဟချက်ကြီးမား၍ ကြက်သွန်ဖြူစိုက်တောင်သူ များအနေဖြင့် တွက်ခြေကိုက် စိုက်ပျိုးမှု အခြေအနေရှိခဲ့သော်လည်း အကျိုးအမြတ်နည်းပါးကြောင်း သိရှိရပါသည်။ကြက်သွန်ဖြူအသစ်များမှာ နှစ်ကုန်ပိုင်းကာလတွင် ထွက်ပေါ်လာနိုင်၍ အဟောင်း လက်ကျန်များအား ဈေးကွက်သို့ တင်ပို့ရောင်းချခြင်းဖြစ်ပါသည်။

    ဝါကျွတ်ကာလမတိုင်မီ ဈေးကျလာခဲ့သော ကြက်သွန်ဖြူမှာ ဝါကျွတ်ပွဲတော်အပြီးတွင် ဈေးအ နည်းငယ်ပြန်လည်တက်လာပြီး ဈေးကွက်ဝယ်လိုအားလည်းပြန်လည်ကောင်းမွန်လာနိုင်သဖြင့် ကြက်သွန်ဖြူ ဈေးနှုန်း၊ဈေးကွက် ဆက်လက်ကောင်းမွန်နိုင်ကြောင်း လေ့လာရေးသားအပ်ပါသည်။

DOCA(ှရှမ်း)

  ရှမ်းပြည်နယ်(မြောက်ပိုင်း)၊ လားရှိုးမြို့နယ်ရှိ ကုန်အရောင်းဆိုင်များသို့ နီးစပ်ရာဒေသများမှ အာလူးများ ဝင်ရောက်လာပြီး အရောင်းအဝယ်ဖြစ်နေကြောင်းသိရသည်။ အာလူးများအနေဖြင့် အလုံးကြီး၊ အလုံးလတ်နှင့် အလုံးသေးဟူ၍ သုံးမျိုးရှိပြီး အလုံးကြီးများကို အာလူးကြော်လုပ်ငန်း များတွင် အသုံးပြုပြီး အလုံးလတ်များကို စားသုံးရာတွင်အသုံးပြုကြောင်း၊ အလုံးသေးများကိုမူ အကြော်စုံသမားများမှ အာလူးကြော်အတွက်အသုံးပြုခြင်း၊ အာလူးထမင်းအတွက် အသုံးပြုခြင်းများ ရှိကြောင်း သိရှိရသည်။

          အာလူးဈေးနှုန်းမှာ တစ်ပိဿာလျှင် (၂၅၀၀) ကျပ်မှ (၃၀၀၀) ကျပ်အထိရှိပြီး အမျိုးအစား၊ အကြီးအသေးပေါ်မူတည်၍ အရောင်းအဝယ်ဖြစ်နေကြောင်း ဒေသခံများ၏ပြောကြားချက်အရ သိရှိ ရပါသည်။ အာလူးမှာ အမျိုးအစားကွဲပြားသော်လည်း ရောင်းချသည့်ဈေးနှုန်းမှာ အတူတူပင်ဖြစ်ကြောင်း၊ ရှမ်းမြောက်ဒေသတွင်ဖြစ်ပေါ်နေသော နိုင်ငံရေးအခြေအနေများကြောင့် ကုန်စည်စီးဆင်းမှုများခက်ခဲနေ ကြောင်းလည်း သိရှိရပါသည်။

DOCA(ရှမ်း)

  ရှမ်းပြည်နယ်(မြောက်ပိုင်း)၊ လားရှိုးမြို့၊ ဘူတာဈေးတွင် အသား၊ ငါး၊ အသီးအရွက်များ၊ ဒေသထွက်သီးနှံများကို ရောင်းချလျက်ရှိရာ ခြံထွက်ဘူးသီးများကိုလည်း ပေါများစွာရောင်းချလျက် ရှိကြောင်း တွေ့ရှိရပါသည်။

   ဘူးသီးကို အတို့အမြှပ်ဖြစ်လည်းကောင်း၊ ဘူးသီးအချဉ်ဟင်းပြုလုပ်၍လည်းကောင်း၊ ကြက် ကာလသားဟင်းချက်ရာတွင်ရော၍လည်းကောင်း၊ ဘူးသီးဟင်းခါးအဖြစ်လည်းကောင်း မျိုးစုံပြလုပ် စားသုံးနိုင်သလို၊ ဘူးသီးခြောက်ပြုလုပ်ပြီး ကြာရှည်အထားခံနိုင်အောင်ပြုလုပ်၍လည်း စားသုံးကြ ကြောင်း သိရှိရသည်။ ဘူးသီးဈေးနှုန်းမှာ တစ်လုံးလျှင် (၂၀၀၀) ကျပ်မှ (၃၀၀၀) ကျပ်အထိ ရောင်းချ လျက်ရှိကြောင်း သိရှိရပါသည်။ ဘူးသီးကို မြို့တွင်းရှိ ရေခြံစိုက်ပျိုးရေးလုပ်ငန်းလုပ်ကိုင်သူများမှ လာရောက်ရောင်းချကြကြောင်း သိရှိရပါသည်။

DOCA(ရှမ်း)

     စစ်ကိုင်းတိုင်းဒေသကြီးအတွင်းရှိ ကျေးရွာများ နှင့် မြို့ပေါ်ရပ်ကွက်များတွင် စိုက်ပျိုးရေး လုပ်ငန်းများကို လုပ်ကိုင်စားသောက်ကြရာမှ နှစ်ရှည်သီးနှံဖြစ်သည့် ဂွေးပင်၊ မာလကာသီးပင်၊ ဩဇာသီးပင်၊ သရက်သီးပင်၊ နဂါးမောက်သီးပင်၊ ပိန္နဲသီးပင်နှင့် မန်ကျည်းသီးပင် များကိုလည်း မိမိတို့ နေအိမ်ခြံစည်းရိုးများနှင့် တောင်ယာများထဲတွင် တစ်ပိုင်တစ်နိုင် စိုက်ပျိုးလျက်ရှိ ကြပါ သည်။ စိုက်ပျိုးရရှိသော သီနှံများထဲမှ  ဩဇာသီး၊ ဂွေးသီးနှင့် မာလကာသီးမျာကို မုံရွာမြို့၊ ချင်းတွင်းရတနာဈေး၊ သံလမ်းဈေးနှင့် ဈေးဟောင်းတို့တွင်  လာရောက်ရောင်းချလျက်ရှိ ကြောင်း သိရှိရပါသည်။

          ၂၀၂၅ ခုနှစ်၊ စက်တင်ဘာလ နောက်ဆုံးပတ်တွင် ဩဇာသီးဈေးနှုန်းများမှာ အရွယ် အစားအလိုက်ဈေးအမျိုးမျိုးရှိပြီး အရွယ်ကြီးအလုံးလှ(၁)လုံးလျှင် (၆၀၀)ကျပ်၊ အရွယ်သေး အလုံးသေး (၁)လုံးလျှင် (၅၀၀)ကျပ်ဖြင့်လည်းကောင်း၊  ဂွေးချိုသီး ဈေးနှုန်းမှာ ဂွေးချိုသီး (၂၂)လုံးပါ တစ်ထုပ်လျှင် (၁၀၀၀)ကျပ်ဖြင့် လည်းကောင်း၊ ကီလိုမာလကာသီးဈေးနှုန်းများ အနေဖြင့် အကြီးတစ်လုံးလျှင် (၆၀၀)ကျပ်၊ အသေးတစ်လုံးလျှင် (၅၀၀) ကျပ်ဖြစ်ပြီး အကြီး အသေး ပေါ်မူတည်ပြီး ရောင်းချလျက်ရှိကြောင်း သိရပါသည်။

DOCA(စစ်ကိုင်း)

         ဘူးသီးပင်သည် မြန်မာနိုင်ငံ အပူပိုင်းနှင့်သမပိုင်းရာသီဥတုတွင် ကောင်းစွာဖြစ်ထွန်း သော ဟင်းသီးဟင်းရွက်အပင်မျိုးဖြစ်ပြီး နွယ်ပင်အမျိုးအစာဖြစ်ပါသည်။ ဘူးသီးပင်မှ ဘူးသီး များအပြင် ဘူးရွက်များလည်း စားသုံးနိုင်ကြပါသည်။ ဘူးပင်နှင့် ကျောက်ဖရုံသီးပင်သည် အိမ်တိုင်းနီးပါ စိုက်ပျိုးလေ့ရှိရာ စိုက်ပျိုးရလွယ်ကူပြီး အာဟာရဓာတ် ကြွယ်ဝသော အသီးအနှံ ဖြစ်သောကြောင့် နေ့စဉ်စားသင့်ကြောင်း သိရှိရသည်။

           ၂၀၂၅ ခုနှစ်၊ စက်တင်ဘာလ နောက်ဆုံးပတ်တွင် မုံရွာမြို့၊ မြသလ္လာဈေးကွက်တွင် ဘူးသီးတစ်လုံးလျှင် (၁၀၀၀-၁၅၀၀-၂၀၀၀) ကျပ် ပေါက်ဈေးများရှိပြီး အသီးလတ်ဆက်မှုနှင့် အရွယ်အစားအကြီး၊ အသေးပေါ်တွင်မူ၍ ဈေးနှုန်းများကွာခြားလျက်ရှိပြီး ကျောက်ဖရုံသီးအကြီး တစ်လုံးလျှင် (၄၅၀၀)ကျပ်၊ အလတ်တစ်လုံးလျှင် (၄၀၀၀) ကျပ်၊ အသေးတစ်လုံးလျှင် (၂၅၀၀)ကျပ်နှင့် ရောင်းချကြောင်း သိရှိရပါသည်။ စားသုံးမှုများ၍ ဈေးကွက်တွင် ရောင်းအား ကောင်းကြောင်း၊ ကုန်စိမ်းရောင်းချသူတစ်ဦး၏ ပြောပြချက်အရ သိရှိရသည်။

DOCA(စစ်ကိုင်း)