ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး၊ ကန့်ဘလူခရိုင်သည် စိုက်ပျိုးရေးကို အဓိကလုပ်ကိုင်ကြပြီး ရာသီအလိုက်သီးနှံမျိုးစုံ စိုက်ပျိုးလျက်ရှိရာ ယခုနှစ်ဆောင်းသီးနှံမြေပဲများ စိုက်ပျိုးလျက်ရှိကြောင်း သိရသည်။ ထိုသို့စိုက်ပျိုးရာတွင် မျိုးမြေပဲဆံများကို ဒေသတွင်းတောင်သူများထံမှလည်းကောင်း၊ အခြားဒေသများမှလည်းကောင်းဝယ်ယူရကြောင်း၊ ဆီစက်လုပ်ငန်းရှင်အချို့မှလည်း မြေပဲလုံးဆံများကို ရွှေဘိုမြို့နှင့် မန္တလေးမြို့တို့မှဝယ်ယူပြီး မြေပဲဆီကြိတ်ကာ ကုန်ချောထုတ်လုပ်၍ပြန်လည် ရောင်းချကြောင်း၊ မြေပဲလုံးဆံကို ဆီကြိတ်ရုံသာမက အစားအသောက်များတွင်လည်း ထည့်သွင်းအသုံးပြုခြင်းနှင့် တွဲဖက်စားသုံးခြင်းတို့ကိုပြုလုပ်ကြကြောင်း၊ ကန့်ဘလူခရိုင်၌ နိုဝင်ဘာလ ဒုတိယပတ်အတွင်း မြေပဲအတောင့်(၁)တင်းလျှင် ငွေကျပ် ၃၅၀၀၀နှင့် မြေပဲလုံးဆံ(၁)တင်းလျှင် ငွေကျပ် ၁၃၆၀၀၀ဖြင့် အရောင်းအဝယ်ဖြစ်လျက်ရှိကြောင်း၊ ယခုအပတ်တွင် ယခင်အပတ်နှင့် နှိုင်းယှဉ်ပါက မြေပဲအတောင့်ဈေးနှုန်းနှင့် မြေပဲလုံဆံဈေးနှုန်းများမှာ တည်ငြိမ်ပြီး အရောင်းအဝယ် ဖြစ်လျက်ရှိကြောင်း သီးနှံရောင်းဝယ်ရေးလုပ်ငန်းရှင်ထံမှ  သတင်းရရှိပါသည်။

DOCA(စစ်ကိုင်း)

မကွေးတိုင်းဒေသကြီး၊ မကွေးမြို့ပေါ် သီးနှံပွဲရုံများတွင် မကွေးခရိုင်အတွင်းရှိ ကျေးရွာများနှင့် မင်းဘူးခရိုင်အတွင်းရှိ ကျေးရွာများမှထွက်ရှိသည့် နှမ်းများ နေ့စဉ်အရောင်းအဝယ်ဖြစ်လျက်ရှိကြောင်းသိရသည်။
ဈေးနှုန်းအနေဖြင့် ၂၀၂၄ခုနှစ်၊ နိုဝင်ဘာလ (ပထမပတ်)တွင် နှမ်းနက်စမုံတစ်တင်းလျှင် ငွေကျပ် (၁၂၁၀၀၀-၂၁၅၀၀၀)၊ နှမ်းဖြူ (ဂျပန်) တစ်တင်းလျှင် ငွေကျပ် (၁၂၇၀၀၀-၁၂၈၀၀၀)၊ နှမ်းဖြူတစ်တင်းလျှင် ငွေကျပ်(၁၂၅၀၀၀)နှင့် နှမ်းနီတစ်တင်းလျှင် ငွေကျပ်(၁၀၅၀၀၀-၁၁၅၀၀၀)ဖြင့်အရောင်းအဝယ်ဖြစ်ကြောင်း၊ ဈေးကွက်အနေဖြင့် ဒေသတွင်းဆီကြိတ်ခွဲထုတ်လုပ်သည့် လုပ်ငန်းရှင်များက ဝယ်ယူကြကြောင်းနှင့် ရန်ကုန်၊ မန္တလေးမြို့များသို့ တင်ပို့ကြောင်းသိရှိရပါသည်။
DOCA(မကွေး)

            မန္တလေးတိုင်းဒေသကြီး၊‌ ကျောက်ဆည်ခရိုင်သည် စပါး၊ ပဲမျိုးစုံနှင့် ဆီထွက်သီးနှံမျိုးစုံတို့ကို စိုက်ပျိုးလျက်ရှိပါသည်။ စီးပွားလည်းဖြစ်ဝင်ငွေတိုးသော နှံစားပြောင်းသီးနှံကိုလည်းစိုက်ပျိုးလျက်ရှိပါသည်။ ခရိုင်အတွင်း နှံစားပြောင်းစိုက်ဧက (၄၂၀၅)ဧက စိုက်ပျိုးထားရှိပြီး ကျောက်ဆည်မြို့နယ် တွင် (၂၈၄၁)ဧက၊ မြစ်သားမြို့နယ်တွင် (၁၃၆၄)ဧက စိုက်ပျိုးနိုင်ခဲ့ပြီး ယခုနိုဝင်ဘာလဆန်းပိုင်းမှစတင်၍ နှံစားပြောင်းကို ကျောက်ဆည်မြို့နယ်တွင် (၈၀၁)ဧက ရိတ်သိမ်းပြီးစီးပြီဖြစ်ကြောင်း ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရပါသည်။ အများဆုံးရိတ်သိမ်းသောရွာများမှာ ကျောက်ဆည်မြို့နယ်တွင် နောင်ခမ်း၊ ကင်းနှင့်တောင်တော်ရွာများဖြစ်ပြီး ဇူလိုင်လတွင် စတင်စိုက်ပျိုးခဲ့ပြီး ယခုနိုဝင်ဘာလဆန်းပိုင်းတွင် စတင်ထွက်ရှိခဲ့ခြင်းဖြစ်ပါသည်။ အများဆုံးစိုက်ပျိုးသောမျိုးများမှာ ထွက်တိုးနီမျိုးများဖြစ်ပြီး စိုက်ပျိုးမှုကုန်ကျစရိတ်အနေဖြင့် တစ်ဧကလျှင် မျိုး၊ သွင်းအားစု၊ လုပ်သားခအပါအဝင် စုစုပေါင်း (၂၅၀၀၀၀/-)ကျပ်ဝန်းကျင်ခန့်ကုန်ကျကြောင်း၊ အထွက်နှုန်း အနေဖြင့် (၃၅-၄၀)တင်းအထိ ထွက်ရှိကြောင်း၊ နှံစားပြောင်းစျေးနှုန်းအနေဖြင့် တစ်တင်းလျှင် (၃၀၀၀၀/-)ကျပ် ဖြင့်  ရောင်းဝယ်လျှက်ရှိကြောင်း ၊  တစ်ဧကအကျိုးအမြတ်အနေဖြင့် စိုက်ပျိုးစရိတ်နှုတ်ပြီးပါက (၉၅၀၀၀၀/-)ကျပ်ခန့်မြတ်ကြောင်း၊ တောင်သူများမှ မြို့ပေါ်ပွဲရုံများသို့သွားရောက်ရောင်းချကြကြောင်း၊ ပွဲရုံများမှ မန္တလေးနှင့် ရန်ကုန်မြို့များသို့ တင်ပို့ရောင်းချလျက်ရှိပါသည်။ နှံစားပြောင်းသီးနှံစိုက်ပျိုးခြင်းဖြင့် ကျွဲ၊ နွားစာများဖူလုံသည့်အပြင် ပြောင်းရိုးများကိုလည်း အခင်းပြတ်ရောင်းချရသဖြင့် အပိုဝင်ငွေများရရှိသောကြောင့် နှံစားပြောင်းသီးနှံကို တိုးချဲ့စိုက်ပျိုးသင့်ပါကြောင်း စိုက်ပျိုးသောတောင်သူ တစ်ဦး၏ ပြောကြားချက်အရသိရှိရပါသည်။

DOCA(မန္တလေး)  

               မှိုသည်အများအားဖြင့် ပူနွေးသောရာသီဥတုမှ စိုစွတ်ထိုင်းမှိုင်းသောမိုးဥတုသို့အကူးတွင် သစ်ပင်၊ ဝါးပင်၊ တောင်ပို့ ၊ ခြုံနွယ်နှင့် အခြားစိုစွတ်သောမြေအချို့တွင် ပေါက်ရောက်တတ်ပါသည်။ ရာသီစာဖြစ်သော မှိုအုံးနက်များကို  မန္တလေးတိုင်းဒေသကြီး၊ ကျောက်ဆည်ခရိုင်ရှိကျေးရွာများတွင် အများဆုံးထွက်ရှိပြီး ဒေသခံများသည် ရရှိသောမှိုများကို မှိုဝယ်ဒိုင်များသို့လာရောက်ရောင်းချလျက်ရှိပါသည်။ မှိုတွင်စားသင့်သောမှိုနှင့် မစားသင့်သောမှိုဟူ၍ နှစ်မျိူးရှိပါသည်။စားသင့်သောမှိုများမှာ ကောက်ရိုးမှို၊ တောင်ပို့မှို၊ မှိုဖြူ၊ မှိုအုံးနက်၊မှိုကြက်တောင်နှင့်သရက်မှိုများဖြစ်ပြီး မစားသင့်သောမှိုများမှာမှိုကွန်ချာ၊ ကြက်ခူမှိုနှင့် နွားချေးမှိုများဖြစ်ကြပါသည်။ တစ်ချို့မှိုများမှာ စားသင့်သောမှိုများဖြစ်သော်လည်း အဆိပ်သင့်စေသောကြောင့် အဆိပ်ဖြေစေရန်အတွက် ကန်စွန်းရွက်များထည့်၍စားသုံးသင့်ပါသည်။ မြန်မာလူမျိုးများသည် အများအားဖြင့် ကောက်ရိုးမှို၊ မှိုအုံးနက်နှင့် တောင်ပို့မှိုများကိုသာ အများဆုံးစားသုံးကြပြီး ကောက်ရိုးမှိုကို ရာသီမရွေးစားသုံးကြ၍ မှိုအုံးနက်များကိုရာသီစာအဖြစ် တစ်နှစ်တစ်ခါကြိုက်နှစ်သက်စွာ စားသုံးကြပါသည်။ ယခုအခါကျေးလက်နေပြည်သူများသည် မှိုအုံးနက်ရာသီဖြစ်သောကြောင့် မှိုပေါက်သည့်နေရာများကို မှတ်သားထားကြပြီး နေ့ရက်များသတ်မှတ်၍ရှာဖွေကြပါသည်။ ထိုသို့ရှာဖွေရာတွင် မှိုရှာသူတစ်ဦး တစ်နေ့လျင် (၁)ပိဿာမှ(၂)ပိဿာအထိရရှိကြောင်း၊ မှို(၁)ပိဿာပေါက်ဈေးအနေဖြင့် မှိုအပွင့်(၁)ပိဿာလျင်(၁၈၀၀၀)ကျပ်၊ မှိုထီးဆောင်း (၁)ပိဿာလျင်(၂၀၀၀၀)ကျပ် ရရှိသောကြောင့် မှိုရှာသူကျေးလက်နေပြည်သူများအနေဖြင့်နေ့စဉ်ဝင်ငွေရရှိ၍ စားဝတ်နေရေးအဆင်ပြေနေကြောင်း မှိုအုန်းနက်ရှာဖွေရောင်းချနေသူတစ်ဦး၏ ပြောကြားချက်အရသိရှိရသည်။

DOCA(မန္တလေး)

               ကျောက်ဆည်ခရိုင်တွင် ငှက်ပျောများစတင်ရိတ်သိမ်းလျှက်ရှိပြီး ခရိုင်အတွင်း ငှက်ပျောစိုက် ဧက(၃၁၁၃)ဧကစိုက်ပျိုးနိုင်ခဲ့ပြီး ကျောက်ဆည်မြို့နယ် တွင် (၁၂၈၂)ဧက ၊ စဉ့်ကိုင်မြို့နယ်တွင် (၇၅၀) ဧက၊မြစ်သားမြို့နယ်တွင် (၁၀၈၁)ဧက စိုက်ပျိုးထားရှိပြီး နိုဝင်ဘာလဆန်းပိုင်းမှစတင်၍ ကျောက်ဆည်မြို့နယ် တွင် (၇၄၀)ဧက၊ စဉ့်ကိုင်မြို့နယ်တွင် (၅၂၅) ဧက၊မြစ်သားမြို့နယ်တွင် (၃၄၀)ဧက ရိတ်သိမ်းပြီးစီးပြီဖြစ်ကြောင်း ခရိုင်ကြေးတိုင်နှင့် မြေစာရင်း ဦးစီးဌာန၏စာရင်းများအရ သိရှိရပါသည်။ အများဆုံးစိုက်ပျိုးသောရွာများမှာ ရွှေလျောင်းကျေးရွာ၊ဆူလေးကုန်းကျေးရွာနှင့် ကံဆွယ်ကျေးရွာများဖြစ်ပြီး ငှက်ပျောစိုက်ပျိုးမှုတစ်ဧကကုန်ကျစရိတ်အနေဖြင့် မျိုး၊ သွင်းအားစု ၊ လုပ်သားခအပါအဝင် စုစုပေါင်း (၁၅၀၀၀၀၀/-)ကျပ်ဝန်းကျင်ခန့်ကုန်ကျကြောင်း၊ ငှက်ပျောအထွက်နှုန်းအနေဖြင့် တစ်ဧကလျှင် အခိုင်(၈၀၀)အထိထွက်ရှိကြောင်း ငှက်ပျောအခိုင်(၄၀)ပါလှည်းတစ်စီး လျှင် (၂၈၀၀၀၀/-)ကျပ်ဖြင့် ရောင်းဝယ်ခဲ့ပြီး ငှက်ပျောလက်ရင်းတစ်ဖီးလျှင် (၃၅၀၀/-)ကျပ်၊ လက်ဖျားတစ်ဖီးလျှင် (၂၅၀၀-၂၆၀၀)ကျပ်အထိရောင်းချရကြောင်း ငှက်ပျောခိုင်များကို ပွဲစားများမှ ခြံထဲအရောက်လာရောက်ဝယ်ယူကြ‌ကြောင်း ပွဲစားများမှတဆင့် မန္တလေး၊ ရန်ကုန်မြို့များသို့ တင်ပို့ရောင်းချကြကြောင်း ငှက်ပျောအစောထွက်ရှိသူများမှာ လှည်းတစ်စီးလျှင် (၄၀၀၀၀၀/-)ကျပ်ရောင်းချခဲ့ရပြီး ယခုခရိုင်အတွင်း ငှက်ပျောဖြိုင်ဖြိုင်ထွက်ပေါ်သောကြောင့် စျေးနှုန်းများကျဆင်းသော်လည်း စိုက်ပျိုးစရိတ်နှုတ်ပြီးပါက (၄၁၀၀၀၀၀/-)ကျပ် ခန့်အကျိုးအမြတ်ရရှိကြောင်း ငှက်ပျောစိုက်ပျိုးသော တောင်သူတစ်ဦး၏ပြောကြားချက်အရ သိရှိရပါသည်။

DOCA(မန္တလေး)