ပြည်တွင်းကုန်သွယ်မှုသတင်း

      တနင်္သာရီတိုင်းဒေသကြီး၊ ထားဝယ်မြို့ပေါ်ရှိ အိမ်ဆောက်ပစ္စည်းအ‌ရောင်းဆိုင်ကြီးများတွင် ရောင်းချလျက်ရှိသော ဘိလပ်မြေစျေးနှုန်းများမှာ ကြံ့နှစ်ကောင်(အနီ)နှင့် အယ်လ်ဖာ အမှတ်တံဆိပ် ဘိလပ်မြေ တစ်အိတ်လျှင် (၁၇၀၀၀)ကျပ် အသီးသီး ရောင်းချလျက်ရှိပြီး စိုက်ပျိုးရေးသုံး ပစ္စည်း အရောင်းဆိုင်ကြီးများမှရောင်းချလျက်ရှိသော ဓါတ်မြေသြဇာစျေးနှုန်းများမှာ မြင်းပျံ၊ အာမို၊ သြဘာ အမှတ်တံဆိပ် ယူရီးယား ၅၀ ကီလိုဂရမ် တစ်အိတ်လျှင် (၁၃၀၀၀၀) ကျပ်၊ သံကွင်း အမှတ်တံဆိပ် တီစူပါ ၅၀ ကီလိုဂရမ် တစ်အိတ်လျှင် (၁၅၅၀၀၀)ကျပ်၊ တိုတာ၊ ဂျာမနီ အမှတ်တံဆိပ် ပိုတက်ရှ်  ၅၀ ကီလိုဂရမ် တစ်အိတ်လျှင် (၁၄၆၀၀၀)ကျပ်၊ အာမို အမှတ်တံဆိပ် ၁၅ ပတ်လည် ၅၀ ကီလိုဂရမ် တစ်အိတ်လျှင်(၁၆၃၀၀၀)ကျပ်နှင့် မြန်မာ့သြဘာအမှတ်တံဆိပ် သန်ဒါး ၁၀၀ စီစီ ပိုးသတ်ဆေး တစ်ဘူးလျှင်(၁၁၀၀၀)ကျပ် ရောင်းချလျက်ရှိပြီး ဘိလပ်မြေ၊ ဓါတ်မြေသြဇာနှင့် ပိုးသတ်‌ဆေး စျေးနှုန်းများမှာ နိုဝင်ဘာလ ပထမအပတ်အတွင်း တည်ငြိမ်လျက်ရှိပါသည်။

DOCA(တနင်္သာရီ)

                ခဝဲပင်သည် ဘူး၊ ဖရုံမျိုးရင်း၌ပါဝင်၍ နှစ်စဉ်စိုက်ပျိုးရသောအပင်မျိုးဖြစ်သည်။ နွယ်ပင်ကဲ့သို့ လိမ်ယှက်၍ပေါက်တတ်သည်။ ခဝဲသီးသည် အလျား၇လက်မမှ ၁၅လက်မခန့်အထိရှည်သည်။ ခဝဲပင်၏ အဖျားပိုင်းသည် အနည်းငယ်ထွား၍ အညှာဖက်သို့သေးသွယ်သွား၏။ လတ်ဆက်နေချိန်၌ ခဝဲသီးသည်အစိမ်းရင့်ရောင်ရှိသည်။ သခွားသီးကဲ့သို့လုံးချောမနေဘဲ စောင်းပါရှိသည်။ အရည်ရွှမ်း၍ ပွသည်။ အစေ့မှာသခွားစေ့နှင့်တူသည်။ ခဝဲပင်ကို အသီးအတွက်စိုက်ပျိုးကြသည်။ ခဝဲပင်သည် အမျိုးအစား(၂)မျိုးရှိသည်။ တစ်မျိုးမှာ အပုမျိုးဖြစ်ပြီး(၅-၆)လက်မခန့်ရှည်ပြီး အမြီးပိုင်းတုတ်ပြီး အဖျားပိုင်းရှူးသွားသည်။ ကျန်တစ်မျိုးမှာ အရှည်မျိုးဖြစ်ပြီး တစ်ပေခန့်ရှည်၍အရင်းအဖျားညီညာပြီး တစ်ဖြောင့်တည်းသေးသွယ်သည်။ ခဝဲပင်ကို မိုးရာသီဖြစ်သော ဇွန်၊ ဇူလိုင်၊ ဩဂုတ်လများတွင် အစိုက်များပြီး စက်တင်ဘာလနှင့် အောက်တိုဘာလများတွင် ခူးဆွတ်ကြသည်။ မြေပြန့်ဒေသများတွင်ဆောင်းနှင့်နွေတွင်  စိုက်ပျိုးနိုင်သော်လည်း ရေဝအောင်ပေးရပါသည်။ ဆောင်းရာသီတွင် အောက်ခြေမှငါးပေအထိအသီးအပွင့်များကိုခြွေပြီးမှ အပေါ်အဆစ်များမှအသီးများကိုယူသင့်သည်။ မိုးဒဏ်ကိုခံနိုင်ရည်ရှိပြီး စင်တင်စနစ်၊ ဝါးတန်းထိုးစနစ်ဖြင့်သာ အစိုက်များသည်။

               ခဝဲစေ့ကို တိုက်ရိုက်အစေ့ချစနစ်ဖြင့် စိုက်ပျိုး၍ရသလို ‌ဘောင်တင်ပြီးစိုက်ပျိုး၍လည်းရပါသည်။ တစ်ဧကစာ ကျဲဖြန့်စိုက်ပျိုးရန်အတွက်မျိုးစေ့ (၂-၃)ပေါင်ခန့် လိုအပ်ပါသည်။ မျိုးစေ့ကို အညှောင့်ဖောက်၍ စိုက်ဘောင်ပေါ်တွင် တစ်ပေကြားလက်မဝက်ခန့်မြှုပ်၍စိုက်ပျိုးရပါသည်။ စိုက်ဘောင်ကို နှစ်ပေအကျယ်၊ တစ်ပေအမြင့်ဆွဲ၍ တစ်ဘောင်နှင့်တစ်ဘောင်ငါးပေခြားဆွဲပါ။ တစ်ဧကလျှင် အပင်၈၀၀၀၀ခန့်ရရှိအောင် စိုက်ပျိုးပါသည်။  စင်ပေါ်သို့မရောက်မှီ ကြားဝါးတန်းများကို တစ်ပေခြားကန့်လန့်ဖြတ်ချည်ပေးရပါမည်။ မိုးအနည်းငယ်ရွာသွန်းသောဒေသများတွင် ခဝဲပင်ကိုစင်မထိုးဘဲစိုက်ပျိုးကြသည်။ အကြောင်းမှာ စိုစွတ်သောမြေပေါ်တွင် ကြာမြင့်စွာခဝဲသီးကျနေပါက ပုပ်လွယ်တတ်သောကြောင့်ဖြစ်သည်။ အပင်သက်တမ်း(၇၅-၈၀)ရက်ရှိသော အသီးများကိုဆွတ်ခူးနိုင်သည်။ ရင့်သည်အထိထားပြီးဆွတ်ခူးလျှင် အမျှင်များပါပြီး စား၍မကောင်းတော့သောကြောင့်ဖြစ်ပါသည်။ တစ်ဧကလျှင် အသီးအလုံးရေ (၂၀၀၀၀-၃၀၀၀၀)အထိရရှိနိုင်သည်။ ကုန်ကျစရိတ်မှာ ဝါးစင်ဖိုးနှင့်အထွေထွေစရိတ်စကများ အပါအဝင်ကျပ်(၂၅၀၀၀၀)ခန့်ကုန်ကျကြောင်းသိရပါသည်။ စိုက်ပျိုးပြီး(၂)လအကြာတွင် ခူးဆွတ်နိုင်သည်။ ခဝဲသီးကို တစ်ရက်ခြားတစ်ခါခူးဆွတ်ရပြီး တစ်ကြိမ်ခူးဆွတ်လျှင် အတောင့်ရေ(၂၀၀)ခန့်ရရှိကြောင်းသိရပါသည်။ ကုန်စိမ်းဒိုင်များသည် စိုက်ခင်းထဲထိလာရောက်ဝယ်ယူကြပြီး တစ်တောင့်လျှင် လက်လီစျေး(၅၀၀)ကျပ်ဖြစ်ပြီး လက်ကားစျေးမှာ (၇၀၀) ကျပ်ဖြင့်ရောင်းချလျက်ရှိကြောင်း သိရပါသည်။ ခဝဲသီးသည် တာရှည်အထားခံသော အသီးမျိုးမဟုတ်ကြောင်းသတိပြုသင့်ပါသည်။ တောင်သူများ၏ အကျိုးအမြတ်အနေဖြင့် ကျပ်(၅)သိန်းခန့် ရရှိကြောင်းသိရပါသည်။

DOCA(ပဲခူး)

    မတ်ပဲ

မကွေးတိုင်းဒေသကြီး၊ အောင်လံကုန်စည်ဒိုင်၏ ၂၀၂၄ခုနှစ်၊ နိုဝင်ဘာလ(ပထမပတ်)တွင် မတ်ပဲ(၁)တင်းလျှင် ကျပ်(၁၁၉၀၀၀ မှ ၁၂၀၀၀၀)ဖြစ်ပြီး ယခင် အောက်တိုဘာလ(စတုတ္ထပတ်)တွင် ကျပ်(၁၂၀၀၀၀မှ ၁၂၁၀၀၀)ဖြစ်၍ ဈေးနှုန်းနှိုင်းယှဉ်ပါက ယခုတစ်ပတ်တွင် (၁)တင်းလျှင် ကျပ်(၁၀၀၀) ဈေးနှုန်းလျော့ကျခဲ့ပြီး အရောင်းအဝယ်အနေဖြင့် တစ်ပတ်အတွင်း တင်းရေ (၁၆၅)တင်း၊ တန်ချိန် (၅.၃၈၈)တန် အရောင်းအဝယ်ရှိခဲ့ကြောင်း သိရ သည်။

    ပဲတီစိမ်း

          ပဲတီစိမ်း(ဆောင်း)သီးနှံ အသစ်များမှာ ယခု နိုဝင်ဘာလ(ပထမပတ်)တွင် စတင်၍ အနည်း ငယ် ဝင်ရောက်လာပြီး (၁)တင်းလျှင် သီးနှံအဖွင့်ဈေး ကျပ်(၈၃၀၀၀)ဈေးနှုန်းရှိခဲ့ပြီး အရောင်းအဝယ် အနေဖြင့် တစ်ပတ်အတွင်း တင်းရေ(၁၅၀)တင်း၊ တန်ချိန် (၄.၈၉)တန် အရောင်းအဝယ်ရှိခဲ့ကြောင်း သိရသည်။

   ဘိုကိတ်

          ဘိုကိတ် (ဆောင်း)သီးနှံအသစ်များ နေ့စဉ်ဝင်ရောက်လျက်ရှိပြီး စတင်ဝင်ရောက်လာသည့် ယခင်အောက်တိုဘာလ(စတုတ္ထပတ်)မှစတင်၍ ယခုနိုဝင်ဘာလ(ပထမပတ်)ထိ (၁)တင်းလျှင် ကျပ် (၁၁၀၀၀၀)ဖြင့် ဈေးနှုန်းအတက်အကျမရှိပဲ အရောင်းအဝယ်အနေဖြင့် တစ်ပတ်အတွင်း တင်းရေ(၂၀၀)တင်း၊ တန်ချိန် (၆.၅)တန် အရောင်းအဝယ်ရှိခဲ့ကြောင်း သိရသည်။

   ကုလားပဲ(H-L)

     ကုလားပဲ(H-L)သီးနှံမှာ ယခင် အောက်တိုဘာလ(စတုတ္ထပတ်)တွင် (၁)တင်းလျှင် ကျပ်(၁၀၁၅၀၀ မှ ၁၀၁၀၀၀)ဖြစ်ပြီး ယခုနိုဝင်ဘာလ(ပထမပတ်)တွင် (၁)တင်းလျှင် ကျပ် (၁၀၁၀၀၀ မှ ၁၀၁၅၀၀)ဖြင့် (၁)တင်းလျှင် ကျပ်(၅၀၀)ဈေးနှုန်းမြင့်တက်ခဲ့ပြီး အရောင်းအဝယ် အနေဖြင့် တစ်ပတ်အတွင်း တင်းရေ(၉၁၁၂၅)တင်း၊ တန်ချိန် (၃၆.၇၄)တန် အ‌ရောင်းအဝယ် ရှိခဲ့ကြောင်း သိရသည်။

ကုလားပဲ(မြကြေး)

    ကုလားပဲ(မြကြေး)မှာ ယခင် အောက်တိုဘာလ(စတုတ္ထပတ်)တွင် (၁)တင်းလျှင် ကျပ် (၁၀၅၀၀ မှ ၁၁၀၀၀၀)ဖြစ်ပြီး ယခုနိုဝင်ဘာလ(ပထမပတ်)တွင်(၁)တင်းလျှင် ကျပ်(၁၀၅၀၀၀)ဖြစ်၍ ယခင်တစ်ပတ်နှင့်နှိုင်းယှဉ်ပါက ယခုတစ်ပတ်တွင် (၁)တင်းလျှင် ကျပ်(၅၀၀၀)ဈေးနှုန်း လျော့ကျ ခဲ့ပြီး တစ်ပတ်အတွင်း တင်းရေ(၈၂၅)တင်း၊ တန်ချိန် (၂၆.၉)တန် အရောင်းအဝယ်ရှိခဲ့ကြောင်း သိရ သည်။

ပဲကြီး

   ပဲကြီးမှာ ယခင် အောက်တိုဘာလ(စတုတ္ထပတ်)မှ ယခုနိုဝင်ဘာလ(ပထမပတ်)အထိ (၁)တင်းလျှင် ကျပ်(၈၂၀၀၀ မှ ၈၈၀၀၀)ရှိခဲ့၍ ဈေးနှုန်းတည်ငြိမ်လျက်ရှိပြီး တစ်ပတ်အတွင်း တင်းရေ(၁၅၀)တင်း၊ တန်ချိန်(၄.၈၉)တန် အရောင်းအဝယ်ရှိခဲ့ကြောင်း သိရသည်။

မြေပဲလုံးဆံနီ

     မြေပဲလုံးဆံနီအနေဖြင့် ယခင်အောက်တိုဘာလ(စတုတ္ထပတ်)တွင် အရောင်းအဝယ်ဖြစ်မှုမရှိ ခဲ့သော်လည်း ယခုနိုဝင်ဘာလ (ပထမပတ်)တွင် (၁)တင်းလျှင် ကျပ်(၁၂၈၀၀၀)ဈေးနှုန်းဖြစ်ပေါ်ခဲ့ပြီး အရောင်းအဝယ်အနေဖြင့် တစ်ပတ်အတွင်း တင်းရေ(၃၇၅)တင်း၊ တန်ချိန်(၉.၈)တန်ခန့် အရောင်းအဝယ်ရှိခဲ့ကြောင်း သိရသည်။

မြေပဲလုံးဆံဖြူ

    မြေပဲလုံးဆံဖြူမှာ ယခင် အောက်တိုဘာလ(စတုတ္ထပတ်)တွင် (၁)တင်းလျှင် ကျပ် (၁၁၆၈၀၀ မှ ၁၂၀၀၀၀)ဖြစ်ပြီး ယခုနိုဝင်ဘာလ(ပထမပတ်)တွင် (၁)တင်းလျှင် ကျပ်(၁၁၈၄၀၀မှ ၁၂၀၀၀၀) ဖြစ်၍ (၁)တင်းလျှင် ကျပ်(၁၆၀၀)ဈေးနှုန်းမြင့်တက်ခဲ့ပြီး အရောင်းအဝယ်အနေဖြင့် တစ်ပတ်အတွင်း တင်းရေ(၁၁၂၅)တင်း၊ တန်ချိန် (၂၉.၃၉)တန် အရောင်းအဝယ်ရှိခဲ့ကြောင်း သိရသည်။

    ယခုနိုဝင်ဘာလ(ပထမပတ်)တွင် အောင်လံကုန်စည်ဒိုင်အနေဖြင့် အဆိုပါ ပဲမျိုးစုံ သီးနှံများ၏ အရောင်းအဝယ်အနေဖြင့် တင်း‌ရေ(၃၈၀၀)တင်း၊ တန်အနေဖြင့် (၁၁၄.၂၂)တန် အရောင်းအဝယ် ရှိခဲ့ပါကြောင်း သိရှိရသည်။

DOCA(မကွေး)

ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်တွင် ထင်း/ မီးသွေးအစားထိုး စပါးခွံလောင်စာတောင့်ထုတ်လုပ်ခြင်းကို ရန်ကုန်-ဟင်္သာတ ကားလမ်းဘေး၊ အမှတ် (၁၇)ရပ်ကွက် မိဘဂုဏ်ရည်ဆန်စက်၌ ၂၀၂၀ခုနှစ်ကတည်းက လုပ်ငန်းစတင်ပြီး လောင်စာတောင့်ထုတ်လုပ်လျက်ရှိကြောင်းသိရသည်။
အဆိုပါ စပါးခွံလောင်စာတောင့်ကို အိမ်သုံးမီးဖိုများတွင် သုံးစွဲမည်ဆိုပါက မီးသွေးထက် သုံးပုံတစ်ပုံသာ ကုန်ကျစရိတ်ရှိမည်ဖြစ်ကြောင်း၊ သစ်တောပြုန်းတီးမှုကိုကာကွယ်ပြီး အခြားလောင်စာများထက် များစွာကုန်ကျစရိတ်သက်သာသည့် စပါးခွံလောင်စာတောင့်ကိုသုံးစွဲသင့်ကြောင်း၊ မီးမွေးခါစတွင်သာ မီးခိုးအနည်းငယ်ထွက်သော်လည်း သုံးစွဲပြီးသည်အထိ မီးခိုးမထွက်ဘဲ ကျန်ရှိသောပြာများကိုလည်း စိုက်ပျိုးရေးသုံး EN ဘိုကာရှီ သဘာဝမြေဩဇာအဖြစ် ပြန်လည်အသုံးပြုနိုင်ပြီး အလုံးစုံစွန်ပစ်ပစ္စည်းမထွက်ကြောင်းသိရသည်။
အဆိုပါ စပါးခွံလောင်စာတောင့် ၁တန်လျှင် ၁၇၅၀၀၀ကျပ်နှင့် ၂၀၀၀၀၀ကျပ်ကြားရောင်းရကြောင်း၊ ၃၀ပိဿာဝင်တစ်အိတ်လျှင် ၁၀၀၀၀ကျပ်နှုန်းဖြင့် ရောင်းချလျက်ရှိသည်။ စက်ရုံမှ လောင်စာတောင့် ၁လကို တန်၁၅၀ထုတ်လုပ်နိုင်ကြောင်း၊ ကိုယ်တိုင် Gasifier ဖြင့် လျှပ်စစ်ဓာတ်အားထုတ်လုပ်ပြီး ဆန်စက်လည်ပတ်ကာ၊ ရန်ကုန်မြို့ ရှိ စက်မှုဇုန်များ၊ သံမဏိစက်ရုံ၊ အရက်ချက်စက်ရုံ၊ စက္ကူစက်ရုံနှင့် အခြားကုန်ထုတ်လုပ်ငန်းများသို့ ထုတ်လုပ်ဖြန့်ဖြူးရောင်းချလျက်ရှိကြောင်းသိရသည်။
ဓနုဖြူမြို့နယ်တွင် အဓိက စပါးစိုက်ပျိုးသော ကျေးရွာများပြားပြီး ဟာလာဆန်စက်များလည်ပတ်လျက်ရှိသဖြင့် ကျေးရွာအတွက် လိုအပ်သော စပါးခွံလောင်စာတောင့်များ လုံလောက်စွာ ထုတ်လုပ်သုံးစွဲနိုင်မည်ဖြစ်ကြောင်း၊ ဓာတ်ငွေ့သုံးဘွိုင်လာနှင့် ဆီဘွိုင်လာများတွင် အသုံးပြုပါက (၄၀%)ခန့် ငွေကြေးကုန်ကျမှုသက်သာခြင်း၊ စပါးခွံဘွိုင်လာကိုအသုံးပြုပါက (၂၀%) ခန့် ငွေကြေးပိုသုံးရပြီး ဘွိုင်လာပိုက်များလဲလှယ်ခြင်းနှင့် ပြုပြင်ခြင်းစရိတ်လုံးဝမရှိတော့သည့်အပြင် တိုက်ရိုက်ပြောင်းလဲအသုံးပြုနိုင်ခြင်း၊ ကျောက်မီးသွေးဘွိုင်လာများတွင် (၁၀%)ခန့် ငွေကြေးအကုန်အကျသက်သာခြင်း စသည့် စီးပွားရေးဈေးကွက်တွက်ခြေကိုက်မှုများရှိလာမည်ဖြစ်ကြောင်း စက်ရုံပိုင်ရှင်၏ ရှင်းလင်းပြောပြချက်အရသိရပါသည်။
DOCA(ဧရာဝတီ)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် မြန်မာ့လက်မှုပစ္စည်း ထန်းလျှော်နှင့် ဝါးနှီးထွက်ပစ္စည်းများ ရောင်းချလျက်ရှိရာ ဈေးနှုန်းဈေးကွက်အခြေအနေများ သိရှိနိုင်ရန် ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဝန်ထမ်းတစ်ဦးတို့သည် ဈေးဆိုင်လုပ်ငန်းရှင်နှင့် ကွင်းဆင်းတွေ့ဆုံမေးမြန်းခဲ့ကြောင်း သိရသည်။

     ထန်းလျှော်ဖြင့်ရက်လုပ်ထားသည့် ထန်းလျှော်ဖျာ(၁)ချပ်လျှင် အသေး၊ အကြီးပေါ်မူတည်၍ ၁၅၀၀၀ကျပ်မှ ၂၀၀၀၀ကျပ်ထိ ရောင်းချရကြောင်း၊ အခြားအသုံးအဆောင် ပစ္စည်းများဖြစ်သည့် ထန်းခေါက်ထိုင်ခုံ(၁)တစ်လုံးလျှင် ၇၀၀၀ ကျပ်၊ ထန်းလျှော်တောင်းအကြီး (၁) လုံးလျှင် ၇၀၀၀ ကျပ်၊ ထန်းလျှော်လက်ဆွဲခြင်း(၁)လုံးလျှင် ၃၅၀၀ ကျပ်မှ ၇၀၀၀ ကျပ်ဖြင့် ရောင်းချကြောင်း သိရသည်။

     ဒေသထွက်ဝါးနှီးဖြင့်ပြုလုပ်ထားသည့် ဝါးနှီးဖျာအချော(၁)ချပ်လျှင် ၂၂၀၀၀ကျပ်နှင့် အကြမ်း (၁)ချပ်လျှင် ၁၇၀၀၀ ကျပ်ဖြင့် ရောင်းချကြောင်း၊ ဝါးနှီးခမောက်အသေး အကြီးပေါ်မူတည်၍ ၂၅၀၀ကျပ်မှ ၃၀၀၀ကျပ်၊ ဂျုံခမောက်(၁)ချပ်လျှင် ၃၅၀၀ကျပ်၊ တောင်သူများအသုံးပြုသည့် ရိုင်(၁) လိပ်လျှင် ၂၁၀၀၀ ကျပ်၊ ဇကော(၁)ချပ်လျှင်  ၄၅၀၀ကျပ်၊ ဇကာ(၁)ချပ်လျှင် ၄၀၀၀ကျပ် ၊ သောက်ရေအိုးဖုံး(၁)ခုလျှင် ၁၃၀၀ကျပ်မှ ၁၅၀၀ကျပ်ထိရှိကြောင်း၊ တံမြက်စည်းကြမ်း(၁)ချောင်းလျှင် ၅၀၀၀ ကျပ်မှ ၆၀၀၀ကျပ်၊ တံမြက်စည်းနု(၁)ချောင်းလျှင် ၃၀၀၀  မှ ၄၀၀၀ ကျပ်အထိ ရောင်းချရကြောင်း ဝါးနှီးနှင့် ထန်းလျှော်ထွက်ပစ္စည်း ရောင်းချသည့်ဆိုင်မှ သတင်းရရှိပါသည်။

DOCA(စစ်ကိုင်း)