ပြည်တွင်းကုန်သွယ်မှုသတင်း

  သတ်မှတ်ရည်ညွှန်းဈေးနှုန်းဖြင့် ရောင်းချပေးသော စားအုန်းဆီများဈေးကွက်အတွင်း ကျယ်ကျယ်ပြန့်ပြန့်ရောင်းချပေးမှုကြောင့် ပုစွန် ၂ကောင်အပါအဝင် ပုံးဆီများအရောင်းအဝယ်အေး၍ ဈေးနှုန်းကျဆင်းလျက်ရှိကြောင်း ဘားအံမြို့၊ ရေပေါ်ဈေးရှိ ဆီအရောင်းဆိုင်များမှသိရသည်။

  ၂၀၂၃ခုနှစ်၊ ဩဂုတ်လနှင့် စက်တင်ဘာလများတွင် ပုစွန် ၂ကောင်အပါအဝင် ဘူးသွတ်ဆီများ၊ ပုံးဆီများမှာ ဈေးနှုန်းမြင့်တက်ခဲ့သော်လည်း ကရင်ပြည်နယ်၌ စားအုန်းဆီဖြန့်ဖြူးမှုအား ကရင်ပြည်နယ်အစိုးရအဖွဲ့၏လမ်းညွှန်မှုဖြင့် ကရင်ပြည်နယ်ဆီလုပ်ငန်းရှင်များအသင်းက ရည်ညွှန်းဈေးအပေါ် သတ်မှတ်ချက်ဈေးနှုန်းဖြင့် ဖြန့်ဖြူးရောင်းချပေးလျက်ရှိကြောင်းနှင့် ဘားအံမြို့ပေါ်နှင့် မြို့နယ်များတွင် အရောင်းကိုယ်စားလှယ်ဆိုင် ၁၉ဆိုင်ဖွင့်လှစ်ရောင်းချပေးလျက်ရှိသောကြောင့် ယခုကဲ့သို့ ပုစွန် ၂ကောင်အပါအဝင် ဘူးသွတ်ဆီများနှင့်ပုံးဆီများဈေးနှုန်းကျဆင်းခြင်းရကြောင်းသိရသည်။ ပုစွန် ၂‌ကောင်အပါအဝင် ဘူးသွတ်ဆီများ၊ ပုံးဆီများဈေးနှုန်းကျဆင်းရ၍ အရောင်းအဝယ်အေးရခြင်းနှင့်ပတ်သက်၍ ဘားအံမြို့၊ ရေပေါ်ဈေးရှိ ကုန်စုံဆိုင်ပိုင်ရှင် မလဲ့က “သတ်မှတ်ဈေးနဲ့ ပေပါဆီတွေရောင်းပေးနေတော့ ပုစွန် ၂ကောင်ဆီတွေ၊ ပုံးဝါဆီတွေ ဈေးကျတယ်ဆရာရေ၊ အရောင်းအဝယ်ကတော့ ၃ဆလောက်ကျသွားတယ်၊ ခုတော့ အကျဈေးနဲ့ပဲရောင်းနေရတယ်” ဟုပြောပြလာပါသည်။

  စက်တင်ဘာလအတွင်း ရည်ညွှန်းဈေးအပေါ် သတ်မှတ်ချက်အရ  ရောင်းချပေးခဲ့သောစားအုန်းဆီ ၁ပိဿာဈေးနှုန်းမှာ ရည်ညွှန်းဈေးအလိုက် ၄၅၀၀/ကျပ်မှ ၅၁၀၀/ကျပ်ဖြစ်ကြောင်းနှင့် ဘားအံမြို့၊ ရေပေါ်ဈေးတွင် အရောင်းအဝယ်ဖြစ်လျက်ရှိသော ပုစွန် ၂ကောင်အပါအဝင် ဘူးသွတ်ဆီများမှာ ဩဂုတ်လအတွင်း ပုစွန် ၂ကောင်ဆီ ၁လီတာလျှင် လက်လီရောင်းဈေး ၅၈၀၀/ကျပ်ထိရှိခဲ့ရာမှ စက်တင်ဘာလ စတုတ္ထအပတ်တွင် ၁လီတာလျှင် ၄၃၀၀/ကျပ်ဈေးနှုန်းထိလည်းကောင်း၊ ပုံးဝါဆီ ၁၀ပိဿာလျှင် ၈၈၀၀၀/ကျပ်မှ ၇၀၀၀၀ကျပ်ထိလည်းကောင်း ဈေးနှုန်းကျဆင်း၍ အရောင်းအဝယ်အေးလျက်ရှိပြီး ဈေးနှုန်းအကျဘက်သို့ ဦးတည်လျက်ရှိကြောင်းသိရပါသည်။

DOCA(ကရင်)

    ယခုအချိန်သည် ပန်းဂေါ်ဖီပေါ်သော ရာသီမဟုတ်သော်လည်း ပန်းဂေါ်ဖီကို စိုက်ပျိုးရေးသမားများက ရေလောင်းစိုက်ပျိုးကြ၍ ပဲခူးတိုင်း(အနောက်)၊ ပြည်ခရိုင်ရှိဈေးများတွင် ပန်းဂေါ်ဖီများရောင်းချလျက်ရှိပါသည်။ စိုက်ပျိုးသူများအနေဖြင့် ပန်းဂေါ်ဖီများပုံမှန်ပေါ်ချိန်မှာ ဆောင်းရာသီဖြစ်သော်လည်း  ပြည်မြို့နယ်အနီးတဝိုက်ရှိကျေးရွာများဖြစ်သော မှော်ဇာနှင့် တောင်လုံးညို၊ ပုတီးကုန်းမြို့ရှိ ကျေးရွာများတွင် တစ်နိုင်တစ်ပိုင်စိုက်ပျိုးကြောင်းသိရပါသည်။ စိုက်ပျိုးထွက်ရှိသောပန်းဂေါ်ဖီများကို ပြည်မြို့ရှိဈေးကွက်များသို့တင်ပို့ရောင်းချကြောင်းသိရပါသည်။ ရာသီချိန်မဟုတ်သော်လည်း ဈေးကောင်းပေး၍ စားသုံးသူများက ဝယ်ယူစားသုံးကြသဖြင့် ဈေးမြင့်လျက်ရှိပါသည်။ ဈေးကွက်တွင်ရောင်းချသော ပန်းဂေါ်ဖီဈေးနှုန်းများမှာ အပွင့်အသေးတစ်ပွင့်လျှင်  (၇၀၀-၈၀၀) ကျပ်၊ အပွင့်ကြီးတစ်ပွင့်လျှင် (၁၈၀၀-၂၀၀၀) ကျပ်ထိဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်းသိရပါသည်။

DOCA(ပဲခူး)

   ၁.၁၀.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံ လက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိပါ သည်။

   ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက် နှင့်ဈေးနှုန်းဖြစ်ပေါ်မှုများအရ ၂၀၂၃ ခုနှစ်၊ အောက်တိုဘာလ ၂ ရက်နေ့ မှ အောက်တိုဘာလ ၈ ရက်နေ့အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၄၃၉၀ ကျပ် ဖြစ်ကြောင်း ထုတ်ပြန်ကြေညာထားပါသည်။

  ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

   အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန ၏ Website: www.doca.gov.mm၊  Facebook Page  နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

    မြန်မာလူမျိုးတို့၏ မနက်စာအစားအစာအဖြစ် နေ့စဉ်စားသုံးနေသည့် မုန့်ပဲသားရေစာများထဲတွင် မုန့်ဟင်းခါးသည် အဓိကအစားအစာတစ်မျိုးဖြစ်ပါသည်။ မုန့်ဟင်းခါးဖတ်ကို ဆန်ဖြင့်ပြုလုပ်ရပြီး မုန့်ဟင်းခါးဖတ်လုပ်ငန်းသည် အိမ်တွင်းမှုစက်မှုလုပ်ငန်းတစ်မျိုးဖြစ်ပါသည်။ နိုင်ငံတော်အနေဖြင့် အသေးစား၊ အလတ်စား စက်မှုလုပ်ငန်းများဖွံ့ဖြိုးတိုးတက်စေရေးအတွက် အထောက်အပံ့များလည်းပေးလျက်ရှိပါသည်။ ထို့ကြောင့် MSMEs လုပ်ငန်းများထဲတွင် မုန့်ဟင်းခါးဖတ်တစ်ခုသည်လည်း အပါအဝင်ဖြစ်ပါသည်။       

    မုန့်ဟင်းခါးဖတ်ရရှိရန်အတွက် ဆန်ကြမ်းကိုအခြေခံ၍ပြုလုပ်ရပြီး ဆန်တစ်အိတ်လျှင် မုန့်ဟင်းခါးဖတ် (၆)ပိဿာခန့်ထွက်ရှိကြောင်းသိရပါသည်။ ဈေးကွက်အတွင်း ရောင်းချသောမုန့်ဟင်းခါးဖတ်ဈေးမှာ တစ်ပိဿာလျှင် (၁၆၀၀)ကျပ်ဖြင့်ရောင်းချလျက်ရှိပါသည်။ ယခင် ၂၀၂၂ခုနှစ်တွင် မုန့်ဟင်းခါးဖတ်တစ်ပိဿာလျှင် (၉၀၀)ကျပ်ဈေးဖြင့် ရောင်းချခဲ့သဖြင့် ယခုနှစ်တွင် မုန့်ဖတ်ဈေးများမြင့်တက်လာခဲ့ပါသည်။ ထိုသို့ မုန့်ဖတ်ဈေးနှုန်းများမြင့်တက်လာရခြင်းမှာ ကုန်ကြမ်းဖြစ်သောဆန်ကြမ်းဈေးများမြင့်တက်လာရခြင်း၊ အလုပ်သမားစရိတ်များမြင့်တက်လာရခြင်းကြောင့်ဖြစ်သည်ဟုသိရပါသည်။

    မုန့်ဟင်းခါးဖတ်ကို ယခင်က မိရိုးဖလာအိမ်တွင်းစက်မှုလုပ်ငန်းအဖြစ် အရင်းအနှီးများများဖြင့် လုပ်ငန်းများတိုးချဲ့လုပ်ကိုင်လာနိုင်မည်ဆိုပါက အကျိုးအမြတ်များပိုမိုရရှိလာနိုင်မည်ဖြစ်ပါသည်။ မုန့်ဟင်းခါးဖတ်ကိုလည်း တစ်ဆင့်မြှင့်ထုတ်ကုန်အဖြစ် မုန့်ဖတ်ခြောက်လုပ်ငန်းပြုလုပ်၍ ရောင်းချပေးမည်ဆိုပါကလည်း အကျိုးအမြတ်များရရှိလာနိုင်မည်ဖြစ်ပါသည်။ ထို့ပြင် အလုပ်သမားများများဖြင့် လုပ်ငန်းများတိုးတက်အောင်ထုတ်လုပ်လာမည်ဆိုပါက အလုပ်အကိုင်အခွင့်အလမ်းကောင်းများရရှိလာနိုင်မည်ဖြစ်ပြီး နိုင်ငံတော်အတွက် အသေးစား၊ အလတ်စား MSMEs လုပ်ငန်းများလည်းဖွံ့ဖြိုးတိုးတက်လာနိုင်မည်ဖြစ်ကြောင်း လေ့လာသုံးသပ်တင်ပြလိုက်ရပါသည်။         

DOCA(ပဲခူး)