ပြည်တွင်းကုန်သွယ်မှုသတင်း

    ပဲခူးတိုင်း(အနောက်) နတ်တလင်းခရိုင်၊ ဇီးကုန်းမြို့နယ် မိုးစပါးစိုက်တောင်သူများ ဩဂုတ်လ တတိယပတ်မှစတင်ပြီး ရိတ်သိမ်းလျက်ရှိပါသည်။ ဇီးကုန်းမြို့နယ်တွင်မိုးစပါးစိုက်ဧက (၄၈၀၇၇)စိုက်ပျိုးပြီး  မျိုးစပါးကွဲအလိုက် ရတနာတိုး၊ မှော်ဘီ၊ နှံကောက်၊ ဗီယမ်နမ်မျိုးများကို အများဆုံးစိုက်ပျိုးလျက်ရှိပါသည်။

            မိုးစပါးစိုက်ပျိုးမှုအား ဇွန်လ ပထမပတ်မှစတင်စိုက်ပျိုးပြီး သက်လတ် ရက်(၉၀)မှ ရက် (၁၀၀)မျိုး များအား စက်တင်ဘာလ ပထမပတ်တွင် စတင်ရိတ်သိမ်းနေကြပြီး တစ်ဧက အထွက်နှုန်းမှာ ကုန်းပိုင်း၌ (၆၅-၇၀)တင်းခန့်နှင့် အဝန်းပိုင်း ရေတော်မိုးတော် စိုက်ဧကများ၌ (၁၀၀-၁၂၀)တင်း ထွက်ရှိကြောင်းသိရပါသည်။ မိုးစပါး တစ်ဧကကုန်ကျစရိတ်အနေဖြင့် မိုးစပါးကြဲခင်း ထယ်ထိုး၊ ထွန်မွှေခ (၄၀၀၀၀)ကျပ်၊ မြက်ကောက်ခ (၅၀၀၀ )ကျပ်၊ ပျိုးကြဲခ (၆၀၀၀)ကျပ်၊ ကန်သင်းမြက်ရှင်းခနှင့် ကောက်ပင်ဖာခ (၃၀၀၀၀)ကျပ်၊ ပိုးသတ်ဆေး ၊မြက်သတ်ဆေး၊ ဓာတ်မြေဩဇာ(ပုလဲ) (ကွန်ပေါင်း) ဆေးဘိုးနှင့် ဆေးဖျန်းလုပ်သားခ (၃၂၀၀၀၀)ကျပ်၊ စပါးမျိုး ၂တင်း (၅၀၀၀၀)ကျပ်၊ စပါးရိတ်ခြွေစက်ခ တစ်ဧက  (၁၃၀၀၀၀)ကျပ်၊ ရိတ်ခြွေပြီး စပါးများကို လူဖြင့်သယ်ယူခ အနေဖြင့် အနီးအဝေးပေါ်မှုတည်၍  စပါးတစ်တင်း(၁၅၀၀ကျပ်မှ ၁၇၀၀ကျပ်)ရှိသဖြင့် မိုးစပါးတစ်ဧက စိုက်ပျိုးစရိတ် ကုန်ကျမှုအနေဖြင့်  စုစုပေါင်း (၆၈၁၀၀၀)ကျပ်ခန့်ရှိပါသည်။ ၂၀၂၅ခု၊ စက်တင်ဘာလ ဒုတိယပတ်အထိ မိုးစပါးဈေးနှုန်းမှာ ကွင်းပေါက်ဈေး အစိုဓာတ်၂၁%နှင့်  တစ်တင်းလျှင် ပေါင်(၅၀)ဖြင့် စပါးတင်း(၁၀၀)  ငွေကျပ် (၉၅၀၀၀၀-ကျပ်မှ ၁၀၀၀၀၀၀-ကျပ်)နှုန်းရှိကြောင်း သိရပါသည်။

            မိုးစပါး စိုက်တောင်သူ အများစုမှာ တစ်ဧက (၇၀)တင်းအောက် ထွက်ရှိပါက အရှုံးရှိပြီး၊  (၁၀၀)တင်းနှင့် အထက်ထွက်ရှိပါက (၂၅၀၀၀၀-ကျပ်မှ ၃၀၀၀၀၀-ကျပ်)အမြတ်ရရှိနိုင်ပါကြောင်း၊ ပျိုးထောင် စိုက်ပျိုးမည်ဆိုပါက ပျိုးထောင်ခ၊ ပျိုးနှုတ်ခ၊ ကောက်စိုက်ခ၊ ကောက်ပင်ဖာခ၊ မြက်နုတ်ခ၊ တမန်းပြင်ခများ ပိုမိုကုန်ကျစရိတ်များရှိ၍ တစ်ဧက ကုန်ကျစရိတ် ငွေကျပ် (၈၉၀၀၀၀)ခန့်ရှိသဖြင့်  အကျိုးအမြတ်နည်းပြီး ပျမ်းမျှ စိုက်ဧကအရ တောင်သူများ မှာယခင်နှစ်များ ထက်စာလျှင် အရှုံးဘက်တွင်ရှိနေ၍ အကျိုးအမြတ်မရှိကြောင်း မိုးစပါးစိုက်တောင်သူများထံမှ သိရပါသည်။

DOCA(ပဲခူး)

    ပဲခူးတိုင်းဒေသကြီး ၊ နတ်တလင်းခရိုင်၊ နတ်တလင်းမြို့၊ မြို့မဈေးနှင့် ညနေဈေးတို့ တွင်ရောင်းချနေသော ကြက်ဥကို ရန်ကုန်မြို့မှ အများဆုံးတင်သွင်းကြပြီး ဈေးနှုန်းများကတော့ ယခင် ဩဂုတ်လ စတုတ္ထပတ်တွင် ကြက်ဥ(အသေး)(၁လုံး)ကို (၄၃၀)ကျပ်၊ ကြက်ဥ (အလတ်) (၁)လုံးကို (၄၅၀)ကျပ်၊ ကြက်ဥ(အကြီး)(၁)လုံး (၅၀၀)ကျပ်ဖြစ်ပြီး ဘဲဥ(၁)လုံး (၆၀၀)ကျပ် ၊ ငုံးဥ(၁)လုံး (၁၀၀)ကျပ်၊ ဗမာကြက်ဥ(၁)လုံး (၇၀၀) ကျပ်ဖြင့် ရောင်းချနေကြောင်းသိရပါသည်။ ယခု စက်တင်ဘာလ တတိယပတ်တွင် ကြက်ဥ(အသေး)(၁လုံး)ကို (၄၃၀)ကျပ်၊ ကြက်ဥ (အလတ်) (၁)လုံးကို (၄၅၀)ကျပ်၊ ကြက်ဥ(အကြီး)(၁)လုံး (၅၀၀)ကျပ်ဖြစ်ပြီး ဘဲဥ(၁)လုံး (၆၀၀)ကျပ် ၊ ငုံးဥ(၁)လုံး (၁၀၀)ကျပ်၊ ဗမာကြက်ဥ(၁)လုံး (၇၀၀) ကျပ်နှုန်းဈေးဖြင့် ရောင်းချလျှက်ရှိရာ ယခင်ဩဂုတ်လ စတုတ္တပတ်  ကြက်ဥ၊ဘဲဥ၊ ငုံးဥ ပေါက်ဈေးနှုန်းများနှင့် နှိုင်းယှဉ်ပါက ဈေးနှုန်းအတက်အကျမရှိဘဲ ဈေးနှုန်း တည်ငြိမ် လျက်ရှိကြောင်း သိရပါသည်။

DOCA(ပဲခူး)

     ပြည်မြို့နယ်အနီးတစ်ဝိုက်ရှိ ရွာများဖြစ်သော ပျဉ်းပင်ကိုင်းရွာ၊ အောင်မြေရွာ၊ မြေပဒေသာရွာများမှ ကီလို မာလကာသီးများကို ခြံမြေရှိသလောက်စိုက်ပျိုးကြပြီး တစ်ဦးလျှင် (၂)ယောက်စိုက်၊ (၃)ယောက်စိုက် စသဖြင့် စိုက်ပျိုးကြောင်း သိရသည်။ (၁)ဧကလျှင် နေ့စဉ် အလုံး (၁၀၀၀)ခန့် ခူးရကြောင်းသိရပြီး ပြည်ဈေးကွက်သို့ အလုံးအကြီး အသေးပါ အလုံး (၇၀၀)ကို (၃)ရက်ခြား ဝင်ရောက်မှုရှိပါသည်။ ဈေးနှုန်းများမှာ အလုံးအကြီးမှာ ကျပ် (၁၂၀၀-၁၅၀၀)၊ အလုံးလတ် တစ်လုံးလျှင် ကျပ် (၈၀၀ - ၁၀၀၀)၊ အလုံးသေး တစ်လုံးလျှင် (၅၀၀ - ၆၀၀)ကျပ်နှုန်း အသီးသီး ရောင်းချလျက်ရှိပြီး အဝင်ရှိသလောက် အရောင်းအဝယ်ဖြစ်ပြီး အကျိုးအမြတ်အနေနှင့် နေ့စဉ် (၈၀၀၀-၁၀၀၀၀)ကျပ် ရရှိကြောင်း သိရပါသည်။                                   

DOCA(ပဲခူး)                      

      ပြည်ခရိုင်၊ ပြည်မြို့ရှိ ဈေးကွက်များတွင် ဆင်ခရမ်းချဉ်သီးများ ရောင်းချနေကြောင်း သိရသည်။ ပြည်မြို့အတွင်းရှိ ကျေးရွာများတွင် အနည်းငယ်သာထွက်ရှိပြီး မင်းတုန်း၊ ကံမဘက်မှလာကြောင်း သိရသည်။ ခရမ်းချဉ်သီး အမျိုးမျိုးထဲမှ ဆင်ခရမ်းချဉ်သီးကို ကျန်းမာရေးအတွက် အထောက်အကူပြုသောကြောင့် စားသုံးကြသည်။ ဆင်ခရမ်း ချဉ်သီးတွင် အခွံက မမှည့်ခင် အစိမ်းရောင်ဖြစ်ပြီး မှည့်လာချိန်မှာ အနီရောင်၊ အဝါရောင် အမျိုးမျိုးဖြစ်နိုင်ပါသည်။ အသားက အခြား ခရမ်းချဉ်သီးတွေထက်ထူပြီး နည်းနည်းမာကြောင်း သိရသည်။ ဆင်ခရမ်းချဉ်သီးကို ရခိုင်ဟင်းများတွင် အများဆုံးထည့်၍ချက်ကြကြောင်း သိရသည်။ ဆင်ခရမ်းချဉ်သီးကို ကြက်သောက်ဆမ်းဆိုင်များနှင့် မီးဖိုချောင်တွင် ချက်ပြုတ်ရန်အတွက် ဝယ်ယူကြကြောင်း သိရသည်။ဆင်ခရမ်းချဉ်သီးတွင် ဗီတာမင် A,B,C အကုန်ပါဝင်တာကြောင့် အသီးတင်မဟုတ်ပဲ တစ်ပင်လုံး ဆေးဖက်ဝင်ကြောင်း သိရသည်။ ဆင်ခရမ်းချဉ်သီးကို ကြက်သောက်ဆမ်းဆိုင်များနှင့် မီးဖိုချောင်များတွင် ချက်ပြုတ်ရန်အတွက် ဝယ်ယူကြကြောင်း သိရသည်။ ဆင်ခရမ်းချဉ်သီး ဈေးနှုန်းများမှာ အလုံးကြီး (၁)လုံးလျှင် (၅၀၀)ကျပ်၊ အလုံးသေး(၁)လုံးလျှင် (၄၀၀)ကျပ်တို့ဖြင့် ရောင်းချကြောင်း သိရပါသည်။

DOCA(ပဲခူး)

     မြန်မာနိုင်ငံတွင် ထင်ရှားကျယ်ပြန့်စွာ စိုက်ပျိုးလာသော ဟင်းသီးဟင်းရွက် အမျိုးအစား ဖြစ်သည်။ အများအားဖြင့် ကြော်ချက်၍စားသုံးကြသည်။ အချို့က ဆေးဝါးအဖြစ် စားသုံးကြသည်။ သမပိုင်းရာသီဥတုကိုကြိုက်နှစ်သက်သည်။ မြေသြဇာထက်သန်ပြီး အစိုဓာတ်ရှိသော သဲနုန်းမြေသည် ကညွတ်စိုက်ရန် အသင့်တော်ဆုံးဖြစ်သည်။  ရေမဝပ်သော ခဲမြေတွင် စိုက်ပျိုးပါက စည်သွပ်ကညွတ်အထွက်အကောင်းဆုံးဖြစ်သည်။ ကညွတ်စိုက်မည့်မြေတွင် ပဲမျိုးရင်းဝင် အပင်များစိုက်ပျိုးပြီး ပန်းပပွင့်မီထယ်ထိုးခြင်းဖြင့် သစ်စိမ်းမြေသြဇာအဖြစ် မြေတွင်းအာဟာရဓာတ် ရစေသဖြင့် ကညွတ်ပင်ကြီးထွားဖွံ့ဖြိုးရေးတွင် များစွာအထောက်အကူဖြစ်စေသည်။ ကညွတ်ကို မေလနှင့်ဇွန်လတွင်စတင်စိုက်ပျိုးနိုင်ပါသည်။ တစ်တန်းနှင့်တစ်တန်း (၃-၆)ပေ၊ တစ်ပင်နှင့်တစ်ပင် (၁-၁.၅)ပေအထိ အကွာအဝေးထား၍ စိုက်ပျိုးနိုင်သည်။ ကျင်းကို (၈)လက်မအထိ တူး၍စိုက်ပျိုးနိုင် သည်။ ပေါင်းမြက်ကို အခါအားလျော်စွာရှင်းပေးပြီး မိုးမကျမီ တစ်ပတ်အလိုတွင် မြေပေါ်အပင်များကိုခုတ်၍ မီးရှို့ပါ။  နွားချေးဆွေး၊မြေဆွေးများကိုထည့်ပြီး မိုးဦးကျလာသည်နှင့် အစို့များထွက်လာမည်။ ကညွတ်(၁-၂)နှစ်သားတွင်အပင်များကြား၌ ပဲမျိုးရင်းဝင်အပင်များ စိုက်ပျိုးနိုင်သည်။ ကညွတ်အစို့များကိုစိုက်ပျိုးပြီး (၂)နှစ်သားတွင် စတင်ရိတ်သိမ်းနိုင်သည်။ အပင်သက်(၇)နှစ်သက်အထိ အထွက်တိုးသည်။ (၄-၁၀)နှစ်သားတွင် အရည်အသွေးကောင်းသော ကညွတ်များကိုရရှိနိုင်သည်။ တစ်ဧကလျှင် ပိဿာ(၃၀၀-၅၀၀)အထိထွက်နိုင်ပါသည်။ ဘောင်များကို‌ မြေ‌တောင်မြှောက်ပေးခြင်းဖြင့် နူးညံ့ပြီးကြီးထွားသော အစို့များကိုရရှိနိုင်ပါသည်။

     ကညွတ်သည် အာဟာဓာတ်များပြည့်ဝနေသော အရာဖြစ်သောကြောင့် နေ့စဥ်စားသောက်သည့်အထဲတွင် ထည့်သွင်းသင့်သော ဟင်းသီးဟင်းရွက်တစ်မျိုးဖြစ်ပါသည်။ ထို့အပြင် အဆီပါဝင်မှုသည် မရှိသလောက်ရှိပြီး ကယ်လိုရီလည်းလွန်စွာနည်းပါသည်။ ကညွတ်ကို စားသုံးပေးခြင်းအားဖြင့် အရိုးများကိုသန်မာ‌စေခြင်း၊ ရောင်ရမ်းမှုကိုလျော့ကျစေခြင်း၊ ဆီးရွှင်စေခြင်း၊ အစာချေလမ်းကြောင်း အတွက်အကျိုးပြုခြင်း၊ ကင်ဆာဆဲလ်များကိုတိုက်ဖျက်ပေးခြင်း စသည့်အကျိုးကျေးဇူးများစွာ ပေးလျက်ရှိသောကြောင့် စားသုံးပေးသင့်သော ဟင်းသီးဟင်းရွက်တစ်မျိုးဖြစ်ပါသည်။

DOCA(ပဲခူး)