ပြည်တွင်းကုန်သွယ်မှုသတင်း

    ရွှေတောင်မြို့နယ်၊ ကြို့ကုန်းအုပ်စု၊ ကြို့ကုန်းရွာရှိ တောင်သူ ဒေါ်စန်းစန်းအေး၏ မာလကာသီးစိုက်ပျိုး ခြင်းကို (၁၅.၉.၂၀၂၅)နေ့၊ နံနက်(၁၀:၃၀)နာရီတွင် သွားရောက်လေ့လာခဲ့ပါသည်။ မာလကာပင် တစ်ပင်နှင့်တစ်ပင်ကို (၈)ပေခြားစိုက်ပျိုးပြီး စိုက်သည့်အခါ မြေကျင်းတစ်ပေခွဲပတ်လည်အနက် နှစ်ပေတူးပြီး မြေအရင်းနက်ပါက ပိုကောင်း မွန်ပါသည်။ မြေကျင်းကို ပိုးသတ်ထားပြီးမှ အပင်ကို စိုက်ပျိုးရန် စိုက်သည့်အခါ  မြေလုံးကို မကွာစေရန် အသာအယာ ခွဲစိုက်ပါက အောက်ခြေကို ဓါးနှင့်ဖြတ်ပြီး အထုတ်အတိုင်းထည့်ပါ။ မြေကျပ်အောင်လုပ်ပြီးမှ ပလပ်စတစ်ကို အသာ အယာဆွဲထုတ်ရပါသည်။ အမြစ်စွဲစေရန် အပင်အား နို့ဆီဗူး(၂)ခွက် အားဆေးလောင်းပေးရပါသည်။ မာလကာပင်မှ လောက်စလုံးလောက် အသီးများထွက်လာမှ အထုတ် ထုတ်ရပါသည်။(၃)လကြာလျှင် မာလကာသီးများစတင်ခူးဆွတ် ရပြီး ဒိုင်များမှ ခြံထဲသို့လာရောက်၍ တစ်လုံးကို (၂၅၀)ကျပ်ပေးဝယ်ပါသည်။ ခြံရှင်များမှ ဈေးများကို ကိုယ်တိုင်သွား ရောက်ပြီး မာလကာသီးအချောကို တစ်လုံး (၃၅၀)ကျပ်ဖြင့်ရောင်းချပါသည်။ မာလကာသီးအပင်တစ်ပင်ကို (၅၀၀)ကျပ်ဖြင့်ပေးဝယ်ရပြီး အပင်(၁၀၀)စိုက်ပျိုးထားကြောင်းသိရသည်။ မာလကာသီးတစ်ခါခူးလျှင် တစ်ရက်လျှင် အလုံး(၃၀၀)ရရှိကြောင်း သိရသည်။ ကုန်ကျစရိတ်မှာ (၃)သိန်းရှိပြီး နှစ်ရှည်သီးနှံဖြစ်သောကြောင့် အကျိုးအမြတ် များများရရှိကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့နယ်၊ မြို့မဈေးတွင်  ကြက်သား၊ ဝက်သား၊ အမဲသား၊ ဆိတ်သား၊ ငါးကြင်း၊ ငါးမြင်း၊ ငါးခူ၊ ငါးရံ့၊ ပုစွန်နှင့် အခြားအသားငါးမျိုးစုံရောင်းချလျက်ရှိရာ ယခု စက်တင်ဘာလ(ဒုတိယအပတ်)၌ အသားငါးများဈေးနှုန်းများမှာ ယခင်လထက် ဈေးနှုန်းမြင့်တက်လျက်ရှိကြောင်း သိရသည်။

    ယခင်လက ကြက်သား ၁ ပိဿာလျှင် ၂၀၀၀၀ ကျပ်မှ ယခုလတွင် ၂၃၀၀၀ ကျပ်အထိ လည်းကောင်း၊ ဝက်သား ၁ ပိဿာလျှင် ၃၀၀၀၀ ကျပ်မှ ၃၃၀၀၀ ကျပ်အထိလည်းကောင်း၊ အမဲသား ၁ ပိဿာလျှင် ၂၅၀၀၀ ကျပ်မှ ၂၈၀၀၀ ကျပ်အထိလည်းကောင်း၊ ဆိတ်သား ၁ ပိဿာလျှင် ၇၅၀၀၀ ကျပ်မှ ၇၈၀၀၀ ကျပ်အထိလည်းကောင်း၊ ယခင်လက ငါးကြင်း ၁ ပိဿာလျှင် ၁၅၀၀၀ ကျပ်မှ ယခုလတွင် ၁၈၀၀၀ ကျပ်အထိ လည်းကောင်း၊ ငါးမြင်း ၁ ပိဿာလျှင် ၁၄၀၀၀ ကျပ်မှ ၁၇၀၀၀ ကျပ် အထိ လည်းကောင်း၊ ငါးခူ ၁ ပိဿာလျှင် ၃၀၀၀၀ ကျပ်မှ ၄၅၀၀၀ ကျပ်အထိလည်းကောင်း၊ ငါးရံ့ ၁ ပိဿာ လျှင် ၂၀၀၀၀ ကျပ်မှ ၂၅၀၀၀ ကျပ်အထိ လည်းကောင်းဈေးနှုန်းမြင့်တက်လျက်ရှိပြီး အခြား ငါးကလေးများကတော့ ဈေးနှုန်းပုံမှန်ရှိကြောင်း သိရသည်။

DOCA(ပဲခူး)

     မိတ္ထီလာမြို့၊ ဖောင်တော်ဦးဘုရားပွဲတော်၌ ဗမာမုန့်ကရေကရာမှာ အရောင်းသွက်လျက်ရှိကြောင်း သိရသည်။မိတ္ထီလာမြို့၏ တန်ခိုးကြီးဖောင်တော်ဦးဘုရားမှာ မြောက်ကန်ထိပ်ဖောင်တော်ပေါ်တွင် တည်ထားကိုးကွယ်ပြီး နှစ်စဉ်တော်သလင်းလဆန်းမှစ၍ လပြည့်ကျော်သည်အထိ ဘုရားပွဲကျင်းပလေ့ ရှိပါသည်။ဖောင်တော်ဦးဘုရားပွဲ၌ လပြည့်နေ့ဆွမ်းလောင်းပွဲနှင့်အတူ မိတ္ထီလာကန်အတွင်း လှေပြိုင်ပွဲ ကိုလည်း ကျင်းပလေ့ရှိရာ ယခုနှစ်တွင်လည်း ဘုရားပွဲလာ ပြည်သူများနှင့် စည်ကားလျှက်ရှိပြီး ပွဲဈေးတန်း အတွင်းရောင်းချနေသော လူသုံးကုန်၊ စားသောက်ကုန်များအနက် ဗမာကရေကရာ မှာလည်း အရောင်းသွက် လျက်ရှိပါသည်။ ဗမာမုန့်ကရေကရာမှာ ကောက်ညှင်းမုန့်ကို ထန်းလျှက်၊ သကြားတို့ဖြင့် ပြုလုပ်ကာ ဆန်မှုန့်နှင့် နယ်ထားသည့်အတွက် ကျန်းမာရေးအရ ဘေးထွက်ဆိုးကျိုးနည်းသော ဗမာမုန့်တစ်မျိုး ဖြစ်ပါသည်။ ဖောင်တော်ဦးဘုရားပွဲတွင် ဘုရားဖူး၊ဈေးပွဲ လာပြည်သူများက အိမ်အပြန်လက်ဆောင် အနေဖြင့် ဝယ်ယူကြရာ (၂၅)သားလျှင် (၇၀၀၀)ကျပ်ဖြင့် အရောင်းသွက်လျက်ရှိကြောင်း သိရှိရပါသည်။

DOCA(မန္တလေး)

     သာစည်မြို့နယ်တွင် ထောပတ်ပဲကို မိုးနှမ်းရိတ်သိမ်းပြီးနောက် သြဂုတ်လနှင့် စက်တင်ဘာလများတွင် ဆောင်းသီးနှံအနေဖြင့် စိုက်ပျိုးရာ ဒီဇင်ဘာလနှင့် ဇန်နဝါရီလများတွင် ရိတ်သိမ်းထွက်ရှိကြောင်း သိရသည်။ ထောပတ်ပဲကို ပဲခြောက်အနေဖြင့် မရိတ်သိမ်းမှီ ပဲစိုအနေဖြင့်လည်း ထောပတ်ပဲကို ဒေသတွင်း စားသုံးသူအနေဖြင့် နှစ်စဉ်စိုက်ပျိုးခြင်းဖြစ်သည်။ ထောပတ်ပဲကို ဒေသတွင်းစားသုံးမှုအနေဖြင့် ပဲခြောက်ကိုပြုတ်၍ လည်းကောင်း၊ ရေနွေးဖြင့် စိမ်ကာ အခွံချွတ်ပြီး ဟင်းလျာ ချက်ပြုတ်၍ လည်းကောင်း စားသုံးသော်လည်း ပဲအစိုကို နှပ်၍ စားသုံးမှုကို ပိုမိုနှစ်သက်ကြပါသည်။ ထို့အတွက် ထောပတ်ပဲကို အစိုအတိုင်းပဲ ခူးဆွတ်ရောင်းချကြရာ ယခင်နှစ်ကို နို့ဆီ(၁)ဗူးကို (၁၀၀၀) ကျပ်၊ ပဲခြောက်အနေနှင့် (၁၀၀၀၀၀) ကျော် ရရှိခဲ့သဖြင့် အကျိုးအမြတ်ရကြောင်း တောင်သူများထံမှ သိရှိရသည်။

DOCA(မန္တလေး)

    ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ် စပါးသီးနှံကို နှစ်စဉ်စိုက်ပျိုးခဲ့ရာ ယခုနှစ် ၂၀၂၅-၂၀၂၆ မိုးစပါးစိုက်ပျိုးရာသီတွင် ခရမ်းတစ်မြို့နယ်လုံးတွင် စပါးစိုက်ပျိုးဧက (၁၁၀၆၃၉)စိုက်ပျိုးခဲ့ရာတွင် ခရမ်းမြို့နယ်၏ ကျေးရွာများဖြစ်သော ကြာကန်၊ ပိန်းကန်၊ မောင်းမ၊ ကမာကလူ၊ ရိုးကြီး၊ တမံကြီး၊ ကြူတောကျေးရွာများတွင် စပါးသက်တမ်းနုမျိုးများကို အခြောက် ကြဲ၍ ကောက်စောစပါးများ စတင်ထွက်ရှိလာခဲ့ပြီး ယခုနှစ်တွင် မိုးရေချိန်လုံလောက်စွာ ရရှိပြီး ပိုးမွှားများ ဖျက်ဆီးမှုမရှိကြောင်း သီးနှံအထွက်နှုန်းသည် ယခင်နှစ်များထက်ပိုမိုထွက်ရှိလာ ကြောင်း သိရပြီး ထွက်ရှိစပါးများသည် မိုးရွာသွန်းမှုများရှိခြင်းကြောင့် စပါးအစိုဓာတ်များခြင်း၊ စပါးဝယ်ယူမှုတွင် လမ်းများခြောက်သွေ့မှုမရှိသေးခြင်းကြောင့် သယ်ယူစရိတ်များခြင်းများရှိပြီး၊ စပါးဈေးကွက်အနေဖြင့် မြို့ပေါ်စက်ပိုင်း ကုန်ုသည်များက စက်အရောက် စပါးတင်း (၁၀၀)လျှင် (၅၅)ပေါင်ကိုက်ဖြင့် (၉)သိန်းခွဲမှ (၁၀)သိန်းအထိ ဝယ်ယူရရှိစပါးများအား အခြောက်ခံစက်များ ဖြင့် အခြောက်ခံ၍စပါးကြိတ်ခွဲပြီး ထွက်ရှိဆန်သစ်များအား ရန်ကုန်ဈေးကွက်တွင် (၁၀၈)ပေါင် (၁)အိတ်လျှင် (၄၆၀၀၀/-)ကျပ်ဖြင့် တင်ပို့ရောင်းချလျှက်ရှိကြောင်း သိရှိရပါသည်။

DOCA(ရန်ကုန်)