ပြည်တွင်းကုန်သွယ်မှုသတင်း

            ဧရာဝတီတိုင်းဒေသကြီး၊ မအူပင်ခရိုင်တွင် ငှက်ပျောစိုက်ဧက ၃၇၅၀ ဧက စိုက်ပျိုးကြပြီး နှစ်စဉ်စိုက်ပျိုး၍ မြို့နယ်တွင်းနှင့် ရန်ကုန်သို့ ငှက်ပျောထွက်ရှိချိန် တင်ပို့ရောင်းချကြောင်း သိရသည်။ ဖီကြမ်း ငှက်ပျောစိမ်းကို အဓိကစိုက်ပျိုးသည်။

            ငှက်ပျောမျိုးကို ၂၀၂၁ခုနှစ်က မျိုး တစ်ပင် ၅၀၀ ကျပ်ဖြင့် ဝယ်ယူစိုက်ပျိုးခဲ့ပြီး ၁ဧက ဝက်တွင် အပင်ရေ ၅၀၀ စိုက်ပျိုးခဲ့ကြောင်း သိရသည်။ မြေက မြေသားထူထူ၊ ရေစီးဆင်းမှုကောင်းရမည်။  ငှက်ပျောစိုက်ပျိုးရန် မြေပြုပြင်သည့်အခါ မစိုက်မီ (၂) လ ကြိုတင်ပြီး စိုက်ကျင်းပြုလုပ်မည့်နေရာပေါ် မြေဆွေးထည့်ထားရကြောင်း ငပျောစိုက်ပျိုးပြီး ၆လအကြာတွင် ငှက်ပျောအဖူး ထွက်ရှိလာပြီး နောက်ထပ် ၇လ အကြာတွင် အခိုင်ထွက်ရှိ၍ ဈေးကွက်ဝင်ရောင်းတန်းဝင်သည်။  ငှက်ပျော်စိုက်ပျိုးမှု ကုန်ကျစရိတ် ၁ဧက ဝက် အပေါ်တွင် ငွေကျပ် ၁၀၀၀၀၀၀ ကုန်ကျကြောင်း၊ ၁ဧက စိုက်ပျိုးပါက ကုန်ကျစရိတ် ငွေကျပ် ၂၀၀၀၀၀၀ ခန့်ကုန်ကျနိုင်ကြောင်းသိရသည်။ ယခုငှက်ပျော် စိုက်ပျိုးသက်တမ်းမှာ ၄နှစ် ရှိပြီဖြစ်ကြောင်း၊  ငှက်ပျောသည် နှစ် တစ်နှစ်တွင် အောက်တိုဘာလမှ မေလအထိ (၈)လအတွင်း ထွက်ရှိပြီး မိုးတွင်းကာလများတွင် အထွက်နည်းကြောင်း၊ ငှက်ပျောဖီးထွက်ရှိမှုအနေဖြင့် စိုက်ပျိုးဧကပေါ်တွင် အခိုင် ၃၅၀ ခန့် ထွက်ရှိသည်၊ ဖီးကြမ်း တစ်ခိုင်လျှင် ၆ဖီးမှ ၉ဖီး အထိ ထွက်ရှိ ကြောင်းသိရသည်။

             ၂၀၂၅ခုနှစ် မတ်လ ငှက်ပျော ဈေးနှုန်းအနေဖြင့် ငှက်ပျော တစ်ဖီးကို ငွေကျပ် ၂၀၀၀ဖြင့် လက်ကား ဖြန့်ဖြူးရောင်းချရပြီး ငှက်ပျောဖီး တစ်ခိုင်ကို ငွေကျပ် ပျမ်းမျှ ၁၅၀၀၀ နှုန်းရရှိသည်။ ငှက်ပျော ပေါ်ချိန်သည် စိုက်ပြီး ဆယ်လ၊ ဆယ့်တစ်လတွင် ပေါ်ပြီးထွက်ရှိလာသည့် ဖီးကြမ်းငှက်ပျောများအား အခွန်လွတ်စည်ပင်သာယာစျေးအတွင်းသို့ သွားရောက်ရောင်းချရကြောင်းနှင့် ကုန်သည် များကလည်း ငှက်ပျောခြံထိ လာရောက်ဝယ်ယူကြကြောင်း ရန်ကုန်သို့လည်း အဓိကထားတင်ပို့ကြောင်း ငှက်ပျောစိုက်တောင်သူထံမှ သိရသည်။ မိုးတွင်းကာလ ရောက်ရှိပါက အပင်ဟောင်းနှင့် ငှက်ပျောပင်အကြမ်းများကို ရှင်းလင်းပြီး ငှက်ပျောပင် တစ်ပင်စီသာ ချန်ထား၍ အပင်ပြန်လည်ပျိုးရသည်၊   စိုက်ပျိုးမှု  အကျိုးအမြတ်အနေဖြင့်  တစ်နှစ်အတွင်း ငွေကျပ် ၄၂၅၀၀၀၀ ခန့် အကျိုးအမြတ်ကျန်ရှိကြောင်း စိုက်ပျိုးသူထံမှ သိရှိရပါသည်။

DOCA (ဧရာဝတီ)

          တနင်္သာရီတိုင်းဒေသကြီးတွင် ပင်လယ်ရေငန်ရောက်သော ဒီရေတောများရှိပြီး ဓနိပင်သည် ပင်လယ်ရေငန်ရောက်သည့် နေရာများတွင် အလေ့ကျပေါက်ရောက်သော အပင်မျိုးဖြစ်ပါသည်။ ဓနိပင်များအား အဖူးဖူးချိန်တွင် အနည်းငယ်အညှာအားဖြတ်၍ ခံခွက်ဖြင့်ခံပါက အသင့်သောက်နိုင်သော ဓနိရည်အားရရှိပြီး ရရှိလာသော ဓနိရည်များအား ပျစ်ခဲလာသည်အထိ မီးဖြင့်တည်လိုက်ပါကာ ဓနိ သကြား(ခေါ်)ပျား အချိုရည်အပျစ်အား ရရှိသကဲ့သို့ ဓနိရည်အား ညသိပ်၍ ၃/၄ ရက်ခန့်ထားရှိပါက ပအုန်းရည်ခေါ်(ရှာလကာရည်အချဥ်)အားရရှိပါသည်။ အဆိုပါ ဓနိသကြားများနှင့် ဓနိရည်အား အချဥ်ဖောက်၍ရရှိလာသော ပအုန်းရည်အား ဒေသထွက်စာ လက်လုပ်မုန့်များ၊ အသုတ်များနှင့် ဟင်းလျာများတွင် ထည့်သွင်းအသုံးပြုကြပြီး တနင်္သာရီတိုင်းဒေသကြီး၏ ဒေသအစားအစာဖြစ်သော မြိတ်ကတ်ကြေးကိုက်ကြော်ရာတွင် အသုံးပြုသော အချဥ်ရည်သည် ဓနိပင်မှထွက်ရှိလာသော ပအုန်းရည်ပင် ဖြစ်ပါသည်။

            တနင်္သာရီတိုင်း‌ဒေသကြီး ထားဝယ်မြို့ရှိ ဈေးများနှင့် ကုန်စုံဆိုင်များတွင် ဓနိရည်အားမီးဖြင့်ကြို၍ ရရှိသော ဓနိသကြား(ခေါ်)ပျား တစ်ပိဿာလျှင်(၅၀၀၀)ကျပ်နှင့် ပအုန်းရည် တစ်လီတာ တစ်ဘူးလျှင် (၁၀၀၀)ကျပ်ဖြင့်ရောင်းချလျက်ရှိပြီး ဒေသတွင်းစျေးကွက်အပြင် မော်လမြိုင်၊ ရန်ကုန်၊ မန္တလေးမြို့များသို့လည်း တင်ပို့ရောင်းချလျက်ရှိကြောင်း သိရှိရပါသည်။

DOCA(တနင်္သာရီ)

           တနင်္သာရီတိုင်းဒေသကြီး၊ ထားဝယ်မြို့နယ်အတွင်းရှိ ကျေးရွာများတွင် စိုက်ပျိုးရေးကို အဓိကထားလုပ်ကိုင်ကြရာမှ စားဖိုဆောင်သီးနှံဖြစ်သည့် ခါကြက်ဥ(ခ)ဥနီကို တစ်ပိုင်တစ်နိုင် မိသားစုအိမ်ခြံမြေများနှင့် မိမိပိုင်ယာမြေများတွင်သာ စိုက်ပျိုးကြပြီး မိမိတို့ဒေသတွင်း ကျေးရွာများနှင့် ထားဝယ်မြို့ပေါ်ရှိ ဈေကွက်အတွင်းသို့ ပို့ဆောင်ရောင်းချကြသလို ရန်ကုန်၊ မန္တလေး ပွဲရုံများမှလည်း မှာယူရောင်းချကြပါသည်။

            ခါကြက်ဥကို အသုပ်ဆိုင်များ၊ စားသောက်ဆိုင်များ၊ ကော်ပြန်ဆိုင်များနှင့် အကင်ဆိုင်များမှ အသုံးပြုမှုများပြီး မရှိမဖြစ်အ‌ရောင်းအဝယ်ဖြစ်နေသော သီးနှံတစ်မျိုးဖြစ်ပါသည်။ယခု ၂၀၂၅ ခုနှစ်၊ မတ်တွင် ဖြစ်ပေါ်နေသော  ခါကြက်ဥဈေးနှုန်းမှာ ခါကြက်ဥ ဥကြီး တစ်ပိဿာလျှင်(၃၅၀၀)ကျပ် ၂၅ကျပ်သားလျှင်(၁၀၀၀) ကျပ်၊ ခါကြက်ဥသေး တစ်ပိဿာလျှင်(၃၀၀၀)ကျပ် ၂၅ကျပ်သားလျှင် (၈၀၀)ကျပ် ဈေးနှုန်းများဖြင့် ဝယ်ယူသူများပြီး အရောင်းအဝယ်ဖြစ်နေကြောင်း ကုန်စိမ်းသီးနှံအစုံ ရောင်းချသူများထံမှ သိရှိရပါသည်။

DOCA(တနင်္သာရီ)

            ယခုအခါ ထားဝယ်မြို့ပေါ်ရှိ ကုန်စုံဆိုင်များတွင် ရောင်းချလျက်ရှိသည့် ကြံသကာများကို ရန်ကုန်မြို့နှင့်မော်လမြိုင်မြို့တို့မှ ဝယ်ယူရောင်းချကြောင်း၊ ၂၀၂၅ ခုနှစ်၊ မတ်လတွင် ရောင်းချနေသော ကြံသကာဈေးနှုန်းမှာ တစ်ပိဿာလျှင် ၆၅၀၀ကျပ် ၊ (၅၀)ကျပ်သားလျှင် ၃၃၅၀ ကျပ်နှင့်(၁၀)ကျပ်သားလျှင် ၇၀၀ကျပ်ဖြင့်ရောင်းချကြောင်း၊ ကြံသကာသည် ကြံပင်မှရရှိသည့် တန်ဖိုးမြင့်ထုတ်ကုန်တစ်ခုဖြစ်ပြီး ကြံသကာကို မုန့်ပြုလုပ်ရာတွင်လည်း အသုံးပြုကြောင်း၊  အိမ်အလည်လာသူ မိတ်ဆွေများကို တည်ခင်းဧည့်ခံရာတွင်လည်း အသုံးပြုကြသည့်အတွက် အရောင်းသွက်လျက်ရှိကြောင်း လုပ်ငန်းရှင်ထံမှ သိရှိရပါသည်။

DOCA(တနင်္သာရီ)

             ကတက်ပင်ကို မြန်မာနိုင်ငံအနှံ့အပြားတွင် စိုက်ပျိုးကြသည်။ ကတက်ပင်မှာ အပင်မြင့်မျိုးဖြစ်၍ အမြင့်ပေ ၃၀ ခန့်ရှိပြီး ပင်စည်လုံးပတ်မှာ ၃ ပေမှ ၅ ‌ပေအထိရှိသော ပင်လတ်မျိုးဖြစ်သည်။ ကတက်ပင်သည် နွေရာသီတွင် အရွက်ကြွေကျပြီး ဆင်စွယ်ရောင်အပွင့်များ ပွင့်၍ အသီးမှာဝမ်းဘဲဥ အကြီးစားခန့်ရှိသည်။ အခွံတွင် အပြောက်အပိမ့်များရှိသည့် သဘာဝအလျောက်ပေါက်ရောက်သော အပင်မျိုးဖြစ်ပါသည်။

            ကတက်ပင်သည် ဆေးဘက်ဝင်အပင်တစ်မျိုးဖြစ်၍ ဆေးအဖြစ်သော်လည်းကောင်း၊ အစားအစာအဖြစ်လည်ကောင်း အသုံးဝင်သော အပင်တစ်မျိုးဖြစ်သည်။ ဆေးအဖြစ်အသုံးပြုရာတွင် ပျောက်ကင်းစေသည့် ရောဂါများမှာ အရွက်နှင့်အမြစ်၏အခေါက်တို့ကို အနာဖြစ်သည့်နေရာ၌ အုံပေးလိမ်းပေးလျှင် အနာများအကျက်မြန်ပြီး သက်သာစေခြင်း၊ အခေါက်ကို သက်တန့်နှင့်အနာ ပေါက်တို့၌ ပါရန္နဝါမြစ်နှင့် သွေးသောက်လျှင် လျင်မြန်စွာပျောက်ကင်းစေခြင်း၊ အရွက်ကိုကြိတ်၍ ရေနှင့်ဖျော်ပြီး မီးဖြင့်နွေးအောင်ပြုလုပ်၍ ကိုက်ခဲနာကျင်သောနေရာများကိုလိမ်းသော် အကိုက်အခဲများပျောက်ကင်းစေနိုင်ခြင်း၊ ကတက်ရွက်နှင့်ကွမ်းရွက်နှစ်မျိုးကို ကြိတ်ညှစ်ပြီးလျှင် ရေနှင့်ဆတူရော၍ ထောပတ်ဖြင့်ရောသောက်သော် အဆစ်ရောင်ရောဂါပျောက်ကင်းစေပါသည်။ ကတက်အမြစ် ခေါက်ကို ၄ ခွက်တစ်ခွက်ပြုတ်သောက်သော် ဆီးချို၊ ကျောက်တည်ရောဂါပျောက်ကင်းစေခြင်း၊ ကတက်ခေါက်ပြုတ်ရည်ကို ကြံသကာဖြင့် ရောသောက်သော် ဆီးအိမ်ရောင်ရောဂါနှင့် ကျောက်တည် ရောဂါပျောက်ကင်းစေခြင်းနှင့် အမြစ်ကို အပြင်းဖျားရောဂါကုဆေး၌လည်း ထည့်သွင်းအသုံးပြုနိုင် ကြောင်းလေ့လာသိရှိရသည်။

           ကတက်ကို ဆေးဝါးများအဖြစ်အသုံးပြုသည့် အပြင်အစားအစာအဖြစ် အချဉ်တည်၍ စားသုံး ကြပြီး လူတိုင်းကြိုက်နှစ်သက်သည့် အစားအစာဖြစ်ပါသည်။ အချဉ်တည်ထားသည့် ကတက်ရွက်များ ကိုသုပ်စား၍သော်လည်းကောင်း၊ အတို့အမြှုပ်အဖြစ်လည်းကောင်း၊ ငါး/ဝက်သား/အမဲသား/ ကြက်သား များဖြင့် ရောနှောချက်ပြုတ်၍လည်းကောင်း၊ ထမင်းဆိုင်များတွင် ဟင်းအမယ်များအဖြစ်လည်းကောင်း ရောင်းချခြင်းတို့ကြောင့် အဈေးကွက်အတွင်း ရောင်းအားကောင်းလျက်ရှိကြောင်းသိရှိရပါသည်။

             တောင်ကြီးမြို့ရှိ အမှတ်(၅)ဈေး၊ (၅)ရက်ဈေးနှင့် မြို့မဈေးကြီး ကုန်စိမ်းဈေးတန်းများတွင် ဆေးဘက်ဝင်ကတက်ရွက်များကို အရွက်စိမ်းအလိုက်လည်းကောင်း၊ အချဉ်တည်၍ လည်းကောင်း ရောင်းချကြောင်းတွေ့ရှိရပါသည်။ ကတက်အရွက်စိမ်းများကို အစည်းလိုက်ရောင်းချလျက်ရှိပြီး တစ်စည်းလျှင်(၅၀ဝိ)ကျပ်နှင့် ကတက်အချဉ်တည်ရွက်များကို ပန်းကန်လုံးအသေးတစ်လုံးလျှင် (၁၀၀ဝိ)ကျပ်ဖြင့် ရောင်းချလျက်ကြောင်း သိရှိရပါသည်။

DOCA(ရှမ်း)