ပြည်တွင်းကုန်သွယ်မှုသတင်း

   ပြည်ချင်းပွဲရုံများသို့ ချင်းဥမများဝင်ရောက်မှုမှာ ပုံမှန်ဖြစ်နေပြီး ချင်းဥမအတက်ကြီးများ လှပနေပြီး ရောင်းဝယ်ရေးသမားတို့ကို ဆွဲဆောင်မှုရှိနေကာ လက်လီသမားတို့ အစွဲများနေတာ တွေ့ရပါသည်။ မြို့တွင်းရှိ ဒါးလှီးချင်းဖတ် ရောင်းဝယ်ရေးသမားတို့ကလည်း အဝယ်များ နေတာ တွေ့ရပါသည်။ ယခု ဩဂုတ်လပထမပတ်တွင် ပြည်မြို့တွင် ဖြစ်ပေါ်လျက်ရှိသော ချင်းဈေးများမှာ (ပွဲရုံဈေး) တစ်ပိဿာလျှင် (၃၀၀၀-၄၀၀၀)ကျပ်၊ လက်လီဈေးတစ်ပိဿာလျှင် (၄၅၀၀-၅၀၀၀) ကျပ်ဈေးဖြင့် ယခင်ဇူလိုင်လကုန်ထက်စာလျှင် ချင်းဈေးများကျဆင်းလာပြီး တစ်ပိဿာလျှင် (၅၀၀ကျပ်မှ ၈၀၀ကျပ်)ထိ ဈေးများကျဆင်းလာတာ တွေ့ရပါသည်။

DOCA(ပဲခူး)

     ဓနိဖူးဆိုသည်မှာ ဓနိပင်၏ပင်စည်မှ ရိုးတံတစ်ခုအဖြစ်ထွက်လာပြီး ၎င်းရိုးတံ၏ထိပ်ဖျားတွင် သံလျက်ပုံစံလေးများအဖြစ်စု၍ ဖွဲ့စည်းတည်ရှိနေကြသည့် အဖူးလေးများဖြစ်ပါသည်။ ဓနိဖူးခြောက်သည် သဘာဝအတိုင်းပေါက်ရောက်နေသော ဓနိပင်မှ ဓနိဖူးကိုခုတ်ပြီး သင့်တော်သော အရွယ်အစားလေးများအဖြစ် လှီးဖြတ်ကာ သဘာဝနေရောင်ဖြင့် (၃)ရက်မှ(၅) ရက်အကြာ အခြောက်လှန်းကာ သဘာဝအတိုင်း ထုတ်လုပ်လျက်ရှိသည့် သဘာဝဆေးဘက် ဝင်ပစ္စည်း ဖြစ်ပါသည်။ ထိုသို့သဘာဝဆေးဖက်ဝင် ဓနိဖူးခြောက်ရေကို သောက်သုံးခြင်းဖြင့် ကင်ဆာရောဂါ၊ နှလုံးသွေးကြောဆိုင်ရာရောဂါများ၊ သွေးတိုး၊ ဆီးချိုစသော အာရုံကြောဆိုင်ရာရောဂါများကို အကောင်းဆုံး ကာကွယ်ကုသမှုပေးနိုင်ပါသည်။

    ဓနိဖူးခြောက်ကို ဈေးကွက်အတွင်းတွင် ကျယ်ကျယ်ပြန့်ပြန့်ရောင်းချလျက်ရှိပြီး ဈေးနှုန်းအနေဖြင့် ဩဂုတ်လပထမပတ်တွင် (၁၀၀)ဂရမ်ပါသော ဓနိဖူးခြောက်တစ်ထုတ်လျှင် (၅၀၀၀)ကျပ်၊ (၁၄၀)ဂရမ်တစ်ထုတ်လျှင် (၆၀၀၀)ကျပ်ဖြင့် ရောင်းချလျက်ရှိကြောင်း သိရပါသည်။

DOCA(ပဲခူး)

    ပြည်ဈေးကွက်တွင် မီးဖိုချောင်သုံးသီးနှံဖြစ်သည့် ကြက်သွန်ဖြူ(ရှမ်း)မှာ ဇူလိုင်လကုန်ပတ်က တစ်ပိဿာလျှင် (၉၀၀၀)ကျပ်ဈေးရှိခဲ့ပြီး ယခု ဩဂုတ်လပထမပတ်တွင် တစ်ပိဿာလျှင် (၉၅၀၀) ကျပ်ဈေးရှိပါသည်။ ကြူကုတ် တစ်ပိဿာလျှင် (၈၀၀၀)ကျပ်ဈေးဖြင့် ဈေးငြိမ်နေပါသည်။ ရှမ်းစဈေးအနည်းငယ် တက်လာရခြင်းမှာ ရှမ်းတောင်မှ အဝင်နည်းနေခြင်းဖြစ်ကြောင်း သိရပါသည်။

    ခရမ်းချဉ်သီးသီးနှံအနေဖြင့် ယခင်နှစ်ကတစ်ပိဿာလျှင် (၁၀၀၀)ကျပ်ဈေး၊ ဇူလိုင်လက (၂၀၀၀) ကျပ်ဈေး၊ ဇူလိုင်လကုန်ပတ်က (၂၈၀၀)ကျပ်ဈေးရှိခဲ့ပါသည်။ ယခုဩဂုတ်လပတ် ပထမပတ်တွင် တစ်ပိဿာလျှင် ယခင်ဈေးအတိုင်း (၂၈၀၀)ကျပ်ဈေးဖြင့် ဈေးငြိမ်၍ အရောင်းအဝယ်ဖြစ်လျက်ရှိပါသည်။ ယခင်ဇူလိုင်လနှင့်ဈေးနှုန်းကွာဟရခြင်းမှာ စိုက်ပျိုးချိန်တွင် သွင်းအားစု ဈေးကြီးမြင့်နေခဲ့ပြီး သယ်ယူစရိတ်များ မြင့်တက်လာခြင်းများကြောင့်ဖြစ်ကြောင်း သိရပါသည်။

     အာလူးသီးနှံအနေဖြင့် ရှမ်းအာလူးများဈေးကွက်တွင် လက်ကျန်များရှိနေသည့်အတွက် ယခင်တစ်ပတ်ဈေးအတိုင်း တစ်ပိဿာလျှင် (၃၅၀၀)ကျပ်ဈေးဖြင့် ဈေးငြိမ်လျက်ရှိပါသည်။

      ယခုကာလသည် ဝါတွင်းကာလဖြစ်၍ အလှူပွဲများရှိနေခြင်းကြောင့် မီးဖိုချောင်သုံး သီးနှံများ ယခင်ထက်အရောင်းသွက်လျက်ရှိကြောင်း သိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်တွင် သင်္ဘောသီးတင်ပို့ရောင်းချမှုမှာ ယခုဩဂုတ်လ ပထမပတ်တွင် ဈေးနှုန်းများမြင့်တက်လျက်ရှိပါသည်။ သင်္ဘောပင်သည် အပူပိုင်းစားသည့် အပင်ဖြစ်၍ အပူပိုင်းနှင့် အပူလျော့ပိုင်းဒေသရှိ နေရာများတွင် စိုက်ပျိုးကြပါသည်။ မြန်မာနိုင်ငံတွင်လည်း နေရာအနှံ့ အပြားတွင် စိုက်ပျိုးလျက်ရှိပါသည်။ သင်္ဘောပင်တွင် အဖိုပင်၊ အမပင်နှင့် လိင်စုံပင်ဟူ၍ အဓိက (၃)မျိုး ရှိပါသည်။ သင်္ဘောပင်စိုက်ပျိုးပြီး (၄/၅)လအကြာတွင် အသီးစတင်သီးပါသည်။ (၃)နှစ်သား အရွယ်အထိ အသီးအထွက်ကောင်းသည် မျိုးကိုလိုက်၍ တစ်ပင်လျှင် အသီး(၅၀)မှ (၁၀၀)အထိ သီးနိုင်ပါသည်။ သင်္ဘောသီးသည် ခန္ဓာကိုယ်အစိတ်အပိုင်းများစွာကို ကောင်းမွန်စေပြီး ရောဂါများစွာကိုလည်း ကာကွယ်နိုင်ပါသည်။ သင်္ဘောသီးတွင် ဗီတာမင်C နှင့် E အပြင် Anti-Oxidants ဓါတ်ကြောင့် အသားအရေပေါ်လူးပေးပါက အသားအရေပျက်စီးမှုကို ကာကွယ်ပေးပြီး အသားအရေကို နုပျိုလှပစေသောကြောင့် အလှကုန်ပစ္စည်းများတွင်အသုံးပြုလျက်ရှိပါသည်။ သင်္ဘောသီးတွင် ပါရှိသော Anti-Oxidants ကြောင့် ကင်ဆာများစွာကို ကာကွယ်ပေးနိုင်သည့်အပြင် အမျိုးသမီးများတွင်ဖြစ်တက်သော သားအိမ်ကင်ဆာဖြစ်စေသော HPV ဗိုင်းရပ်ပိုးကိုလည်း ကာကွယ်ပေးနိုင်သည်။ သင်္ဘောသီးသည် နေ့စဉ်စားသုံးနေကြအစားအစာများတွင် တစ်ခုမဟုတ် တစ်ခု ပါဝင်နေပါသည်။ အသုပ်မျိုးစုံ၊ အထောင်းမျိုးစုံတို့တွင်လည်း မပါမဖြစ်ပါဝင်ပါသည်။ ပြည်မြို့ ဈေးကွက်သို့ ပေါက်ခေါင်း၊ ပေါင်းတလည်၊ ရွှေတောင်၊ ပန်းတောင်းတို့မှ အများဆုံးဝင်ရောက်လျက်ရှိပြီး ဈေးနှုန်းအနေဖြင့် မိုးနှောင်းကာလတွင် သင်္ဘောသီးအထွက်တိုး၍ တစ်လုံးလျှင် (၂၀၀-၅၀၀)ကျပ်အထိ ရှိတတ်ပြီး နွေရာသီနှင့် မိုးဦးရာသီတွင်အထွက်နှုန်းလျော့ကျ၍ တစ်လုံးလျှင် (၈၀၀)ကျပ် မှ (၁၅၀၀)ကျပ်အထိ ဈေးနှုန်းများမြင့်တက်လျက်ရှိကြောင်း သိရပါသည်။

DOCA(ပဲခူး)

       ပြည်ခရိုင်အနေဖြင့် ယခုဩဂုတ်လပထမပတ်တွင် မိုးနှမ်းများထွက်ပေါ်လာခြင်းမရှိသေးဘဲ နောက်လများဖြစ်သော စက်တင်ဘာလနှင့် အောက်တိုဘာလတို့တွင် ထွက်ပေါ်လာမည်ဖြစ်ပါသည်။ အောက်တိုဘာလနှင့် နိုဝင်ဘာလတွင် မိုးနှမ်းများ  အထွက်အလှိုင်ဆုံးလများဖြစ်ကြောင်း သိရပါသည်။ မိုးနှမ်းကို တောင်သူများမှ အများဆုံးစိုက်ပျိုးကြပြီး ပြည်ခရိုင်အနေဖြင့် မိုးနှမ်းစိုက်ဧကမှာ (၅၄၆၅၈) ဧကရှိသည်ဟု သိရပါသည်။  ယခုအချိန်တွင် ပြည်ဈေးကွက်သို့ အခြားမြို့နယ်များဖြစ်သော ကြံခင်း၊ မြန်အောင်၊ မိုးညိုနှင့် နတ်တလင်းဘက်မှ နှမ်းနက်များကို တစ်ခါတင်ပို့လျှင် အိတ်(၁၀၀၀)ခန့်တင်ပို့ပြီး ပြည်ဈေးကွက်မှတစ်ဆင့် အောင်လံ၊ မကွေးနှင့် မန္တလေးသို့ တင်ပို့ ကြောင်း သိရပါသည်။ ပြည်ဒေသတွင် စားသုံးဆီဖူလှုံရန်အတွက် လှောင်နှမ်းလက်ကျန်များကိုသာ ထုတ်ယူသုံးစွဲကြောင်း သိရပါသည်။ ယခုနှစ်မိုးရာသီတွင် စိုက်ပျိုးထားသော မိုးနှမ်းခင်းများမှာ ကောင်းမွန်မှုရှိကြောင်း သိရပြီး ထွက်ပေါ်ခါနီးတွင် သဘာဝဘေးအန္တရာယ်အမျိုးမျိုးမှ ဖျက်ဆီးခြင်းမရှိပါက အထွက်နှုန်းများ ကောင်းမွန်လာနိုင်မည်ဖြစ်ကြောင်း ခန့်မှန်းသိရှိရပါသည်။ ယခု ဩဂုတ်လ ပထမပတ်တွင် နှမ်းဈေးနှုန်းများအနေဖြင့် နှမ်းနီ(၃)တင်းတစ်အိတ်လျှင် (၃၀၀၀၀၀)ကျပ်၊ နှမ်းနက် (၃)တင်းတစ်အိတ်လျှင် (၃၂၀၀၀၀)ကျပ် နှင့် စမုံနက်နှမ်း(၃)တင်းတစ်အိတ်လျှင် (၃၅၀၀၀၀) ကျပ်ဖြင့် ပြည်ဈေးကွက်တွင် ဈေးဖွင့်၍ရောင်းချကြောင်း သိရပါသည်။ ဇူလိုင်လကုန် ပတ်တွင် နှမ်းနီ(၃)တင်းတစ်အိတ်လျှင် (၂၇၀၀၀၀)ကျပ်၊ နှမ်းနက်(၃)တင်းတစ်အိတ်လျှင် (၃၀၀၀၀၀)ကျပ်နှင့် စမုံနက်နှမ်း (၃)တင်း တစ်အိတ်လျှင် (၃၃၀၀၀၀)ကျပ်ဖြစ်ခဲ့သဖြင့် ယခု ဩဂုတ်လပထမပတ်တွင် နှမ်းဈေးများ မြင့်တက်လာခဲ့ပါသည်။

      ထို့ကြောင့် မိုးနှမ်းစိုက်တောင်သူများအနေဖြင့် မိုးနှမ်းများထွက်ပေါ်ချိန်တွင် အထွက်နှုန်းလည်းကောင်း၊ ဈေးနှုန်းလည်းကောင်းမည်ဆိုပါက အမြတ်အစွန်းများ ပိုမိုရရှိနိုင်မည် ဖြစ်ပါသည်။

DOCA(ပဲခူး)