ပြည်တွင်းကုန်သွယ်မှုသတင်း

         ပြည်ကုန်စည်ဒိုင်တွင် ပဲမျိုးစုံအရောင်းအဝယ်ဖြစ်လျက်ရှိပြီး မတ်ပဲ၊ ပဲစင်းငုံ၊ ကုလားပဲဈေးနှုန်းမှာ မြင့်တက်လျက်ရှိကြောင်းသိရပါသည်။

    ဩဂုတ်လ ဒုတိယပတ်တွင် မတ်ပဲတစ်တင်းကို (၁၂၄၀၀၀-၁၂၄၅၀၀ ကျပ်ဖြင့် ရန်ကုန်အဝယ်တစ်ရက်လျှင် အိတ် ၂၀၀ခန့်တင်ပို့ပါသည်။ ပဲတီစိမ်းအသစ်များလည်းအဝင်ရှိပြီး တစ်တင်းကို (၅၅၀၀၀-၆၀၀၀၀ ကျပ်ဖြင့် အရောင်းအဝယ်ဖြစ်လျက်ရှိပါသည်။ ပဲစင်းငုံ(နီ)တစ်တင်းကို (၁၄၇၅၀၀-၁၄၈၀၀၀) ကျပ်ဖြင့် ရန်ကုန်အဝယ်တစ်ရက်လျှင် အိတ် (၂၀၀/၂၅၀) ခန့်ရှိပါသည်။ ကုလားပဲဟော်လန်တစ်တင်းကို ၁၀၁၅၀၀ကျပ်၊ မြကြေးမှုံတစ်တင်းကို (၁၀၅၀၀၀-၁၀၆၀၀၀) ကျပ်ဖြင့် မြို့တွင်းခွဲစက်သမားများနှင့် နယ်စုံအဝယ်တစ်ရက်လျှင် အိတ် (၂၀၀/၃၀၀) ခန့်အဝယ်ရှိပါသည်။ ပဲကြီး(ရွှေကျွန်း) တစ်တင်းကို ၉၀၀၀၀ကျပ်၊ ပဲကြီး(ကုန်းပဲ)တစ်တင်းကို ၈၅၀၀၀ကျပ်ဖြင့် မြို့တွင်းပဲကြော်သမားများ တစ်ရက်လျှင် အိတ် ၂၀၀ခန့်အဝယ်ရှိပါသည်။  ဘိုကိတ်ပဲတစ်တင်းကို ၉၅၀၀၀ကျပ်ဖြင့် တစ်ရက်လျှင် မြို့တွင်းနှင့် ရန်ကုန်အဝယ်မှာ အိတ် (၁၅၀/၂၀၀) ခန့်ရှိပါသည်။

          ပြည်ကုန်စည်ဒိုင်တွင် ဩဂုတ်လ ဒုတိယပတ်၏ ပဲအရောင်းအဝယ်ဖြစ်မှုမှာ သွက်လျက်ရှိကြောင်းသိရှိရပါသည်။

DOCA(ပဲခူး)

        ပြည်ပဲဈေးကွက်၌ ပဲသစ်ဝင်ရောက်ခြင်းမရှိဘဲ လက်ကျန်ပဲများဖြင့်သာရောင်းဝယ်နေကြသော ပဲသီးနှံထဲတွင် ဘိုကိတ်ပဲသီးနှံလည်းပါဝင်နေပြီး လက်ကားရောင်းဝယ်မှုအပြင် လက်လီသမားများကလည်း နေ့စဉ်အဝယ်ရှိကြောင်းသိရပါသည်။ ၂၀၂၄ခုနှစ်၊ သြဂုတ်လ၊ တတိယအပတ်တွင် လက်ကားရောင်းဝယ်မှုအနေဖြင့် တစ်ရက်လျှင် အိတ်၅၀ကျော်ရောင်းဝယ်ခဲ့ကြပြီး လက်လီရောင်းဝယ်မှုမှာမူ တစ်ရက်လျှင် အိတ် ၂၀ကျော်သာရောင်းချမှုရှိခဲ့ကြပါသည်။ ဘိုကိတ်ပဲသီးနှံဈေးမှာ တစ်တင်းလျှင် ၉၅၀၀၀ကျပ်ဖြင့်ရောင်းဝယ်ခဲ့ကြရသည့်အတွက် အခြားပဲများနှင့်ယှဉ်လျှင် ဈေးအေးနေသော်လည်း ယခင်နှစ်နှင့်ယှဉ်သည့်အခါ တစ်တင်းလျှင် ကျပ် ၃သောင်းကျော်မြင့်တက်လာခဲ့ပါသည်။ ယခင်နှစ် ကာလတူအချိန်၌ ပဲဈေးကွက်အတွင်း ဘိုကိတ်ပဲသီးနှံမှာ တစ်တင်းလျှင် ၆၀၀၀၀ကျပ်ဖြင့်ရောင်းဝယ်ခဲ့သည့်အတွက် ဈေးကွက်၌ အခြားပဲများထက်ဈေးအေးခဲ့သော်လည်း ယခုနှစ်တွင်မူ ပြည်ပဝယ်လက်ပဲတချို့ထက် ဈေးပိုရရှိခဲ့ကြောင်းလေ့လာသိရှိရပါသည်။

DOCA(ပဲခူး)

     မကွေးတိုင်းဒေသကြီး၊ ချောက်ခရိုင်၊ ရေနံချောင်းမြို့အတွင်းရှိ ကမ္မကျေးရွာ၊ သပွတ်စုကျေးရွာ၊ လက္ခုပ္ပင်ကျေးရွာနှင့် သားလူးကန်ကျေးရွာတို့တွင် သင်္ဘောပင်မှထွက်ရှိသည့် သင်္ဘောသီးအစိမ်းများအား ရေနံချောင်းမြို့ပေါ်ရှိ အသုပ်ဆိုင်များနှင့် အသုပ်စုံရောင်းချသူများမှ ဝယ်ယူမှုများလျက်ရှိကြောင်း သိရှိရပါသည်။

    သင်္ဘောပင်သည် အပင်ဖြစ်ပြီး ငါးလခန့်ကြာသောအခါတွင် အပွင့်များ စတင်ပွင့်လေ့ရှိပြီး ခြောက်လကြာသောအခါ အသီးများစတင်သီးလေ့ရှိကြသည်။ အပင်အသက်(၃)နှစ်သားအရွယ်အထိ အသီးအထွက်နှုန်း လှိုင်လှိုင်ထွက်လေ့ရှိကြပါသည်။ အပင်မျိုးကိုလိုက်၍ (၁)ပင်လျှင် အလုံး ရေ(၅၀)မှ(၁၀၀)အထိ အသီးများသီးလေ့ရှိကြပါသည်။

      သင်္ဘောသီးအစိမ်းကို ချက်စား၍သော်လည်းကောင်း၊ သင်္ဘောသီးသုပ်၊ ယိုးဒယားသင်္ဘောသီးထောင်း၊ ယိုးဒယားသင်္ဘောသီးအပြားသုပ်နှင့် အသုပ်စုံများထဲတွင်လည်း အနည်းငယ်ထည့်၍ စားသုံးလေ့ရှိကြပါသည်။ သင်္ဘောသီးမှည့်များကို ရာသီမရွေးတွေ့ရသော်လည်း အသီးအထွက်နှုန်းအများဆုံးအချိန်မှာ နိုင်ဝင်ဘာလနှင့် ဒီဇင်ဘာလ၊ မတ်လနှင့် ဧပြီလတို့တွင် အများဆုံးတွေ့ရပါသည်။ ၂၀၂၄ခုနှစ်၊ ဩဂုတ်လ(ဒုတိယပတ်)တွင် သင်္ဘောသီးအစိမ်းတစ်လုံးလျှင် အလုံးအသေး၊ အကြီးပေါ်မူတည်ပြီး ကျပ်(၇၀၀-၉၀၀-၁၂၀၀)၊ သင်္ဘောသီးအမှည့်တစ်လုံးလျှင် ကျပ် (၁၀၀၀ - ၁၃၀၀ - ၁၈၀၀)ဖြင့်  စျေးကွက်အတွင်း ရောင်းချလျက်ရှိကြောင်း သိရှိရပါသည်။

DOCA(မကွေး)

     မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်၊ ဥယျာဉ်ဇင်ကျေးရွာ၌ စပါး၊ နှမ်း၊ ပဲသီး၊ ခရမ်းချဉ်သီးနှင့် ဥယျာဉ်ခြံသီးနှံများကို စီးပွားအဖြစ် အဓိကထားစိုက်ပျိုးကြပြီး ထိုင်ဝမ်ခရမ်းချဉ်သီးကို ၂၀၂၄ခုနှစ်၊ ဩဂုတ်လ(ဒုတိယပတ်)တွင် စတင်စိုက်ပျိုးပြီး ခရမ်းချဉ်စိုက်တောင်သူ (၆)ဦးခန့်မှ စိုက်ဧက(၃)ဧကကျော် စိုက်ပျိုးထားကြောင်း သိရသည်။

       ခရမ်းချဉ်စိုက်ပျိုးရာတွင် တိုင်ထောင်စနစ်ဖြင့် မြေအောက်ရေကိုအသုံးပြုပြီး စိုက်ပျိုးခြင်း ဖြစ်ပါကြောင်း၊ ထိုင်ဝမ်ခရမ်းချဉ်သီးမျိုးစေ့တစ်ထုပ်လျှင် ကျပ်(၂၇၀၀၀)ဖြင့် စိုက်ပျိုးရေးဆေးဆိုင်များမှ ဝယ်ယူရပြီး တစ်ဧကလျှင် မျိုး(၆)ထုပ်ခန့်ကုန်ကြကြောင်း၊ စိုက်ပျိုးပြီး(၂)လခွဲအကြာတွင် ခူးဆွတ်ရကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ မြေပြုပြင်ခ၊ သွင်းအားစုနှင့်လုပ်သားခ အပါအဝင် စုစုပေါင်းကုန်ကျစရိတ်မှာ ကျပ်(၂၅)သိန်းရှိကြောင်း၊ ယခင်နှစ်က တစ်ဧကလျှင် ခရမ်းချဉ်သီး ပိဿာချိန် (၄၂၅၀)ပိဿာခန့်ထွက်ရှိခဲ့ပြီး တစ်ပိဿာလျှင် ကျပ်(၂၀၀၀)ဖြင့် အရောင်းအဝယ် ဖြစ်ခဲ့ကြောင်း၊ အကျိုးအမြတ်အနေဖြင့် တစ်ဧကလျှင် ကျပ်(၆၀)သိန်းခန့်ရရှိခဲ့ပြီး ဈေးကွက်အနေဖြင့် မင်းဘူးမြို့ပေါ်ရှိပွဲရုံများသို့ တင်ပို့ရောင်းချကြောင်း၊  ယခုနှစ်တွင် ယခင်နှစ်အတိုင်း  အထွက်နှုန်း ကောင်းမွန်ပါက ထိုက်သင့်သည့် အကျိုးအမြတ်များရရှိနိုင်ကြောင်း ထိုင်ဝမ်ခရမ်းချဉ်သီး စိုက်တောင်သူတစ်ဦးထံမှ သိရသည်။

DOCA(မကွေး)

       တောင်ငူမြို့နယ်၊ ငါးဖယ်အင်းကျေးရွာအုပ်စု၊ မင်းလမ်းကျေးရွာဝန်းကျင်ရှိ လယ်ယာမြေများသည် မိုးစပါးကောင်းမွန်စွာအောင်မြင်ဖြစ်ထွန်းသည့် ဒေသဖြစ်သော်လည်း နှစ်စဉ် ရေကြီးရေလျှံမှုကြောင့် စပါးစိုက်ပျိုးချိန်နောက်ကျပါသည်။

      ယခုအချိန်တွင် အချို့ဒေသများ၌ မိုးစပါးစိုက်ပျိုးပြီးစီးပြီးဖြစ်သော်လည်း မင်းလမ်းကျေးရွာမှ တောင်သူလယ်သမားများက ဩဂုတ်လ၊ တတိယအပတ်တွင်  စတင်စိုက်ပျိုးနေကြပါသည်။ တောင်သူလယ်သမားအများစုမှာ မျိုးစပါးကို ကိုယ်တိုင်ထားရှိပါသည်။ ဇွန်လကုန် ဇူလိုင်လဆန်းတွင် ပျိုးထောင်ကြ ပါသည်။

       အများဆုံးစိုက်ပျိုးသောစပါးများမှာ နှံကောက်နှင့် ဗျော့ထွန်းတို့ဖြစ်ပါသည်။ အာမိုဓာတ်မြေဩဇာနှင့် ရွှေနဂါးဓာတ်မြေဩဇာများကိုအသုံးပြုကြပါသည်။ ကောက်စိုက်လုပ်သားများ၏အလုပ်ချိန်မှာ ဒေသဓလေ့အရ နံနက် (၀၆း၀၀) နာရီအချိန်မှ မွန်းလွဲ (၁၄း၀၀) နာရီခွဲအချိန်ထိဖြစ်ပါသည်။ ကောက်စိုက်ခနှုန်းထားမှာ ယခင်နှစ်တွင် တစ်နေ့လျှင် လူတစ်ဦး ၈၀၀၀ကျပ်ရှိခဲ့ပြီး ယခုနှစ်တွင် ၁၂၀၀၀ကျပ်အထိ ဈေးတက်ကြောင်း တောင်သူလယ်သမားတစ်ဦးထံမှသိရပါသည်။

DOCA(ပဲခူး)