ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မ စည်ပင်သာယာဈေးနှင့် ပန်းခြံဈေးတို့တွင် အနီးဝန်းကျင်ကျေးရွာများမှ စိုက်ပျိုးထွက်ရှိသော ပခုက္ကူကျွန်း၊ ရေတောင်ဘက်ရှိရွာများ ၊ မြစ်ခြေကမ္မ၊ ကျောက်ပန်းတောင်း၊ ပုပ္ပါးဒေသမှအများဆုံး ဝင်ရောက် ရောင်းဝယ်ဖောက်ကားလျက် ရှိပါသည်။

   ပခုက္ကူမြို့မ ဈေးနှင့် ပန်းခြံဈေးအတွင်း၂၀၂၃ ခုနှစ်၊ဇူလိုင်လ ဒုတိယတပတ်အတွင်း  အရောင်းအဝယ်ဖြစ်နေသောအခြေခံစားကုန်ဈေးနှုန်းများမှာ ရွှေဘိုပေါ်ဆန်း တစ်ပြည်လျှင် ကျပ် (၄၈၀၀)၊ မနောသုခ တစ်ပြည်လျှင် ကျပ်(၃၈၀၀)ဖြစ်ပြီး စားဖိုဆောင်သီးနှံများဖြစ်သော ကြက်သွန်နီ လက်လီထိပ်စ တစ်ပိဿာလျှင် ကျပ်(၂၄၀၀)၊ အလတ်စ တစ်ပိဿာလျှင် ကျပ်(၂၃၀၀)၊ အနိမ့်စ တစ်ပိဿာလျှင် ကျပ်(၂၀၀၀)၊ ကြက်သွန်ဖြူ(ကြူကုတ်) တစ်ပိဿာလျှင် ကျပ်(၈၀၀၀)၊ ကြက်သွန်ဖြူ (ဗမာ) ထိပ်စတစ်ပိဿာလျှင် ကျပ်(၁၃၀၀၀)၊ အလတ်စတစ်ပိဿာလျှင် ကျပ် (၁၂၀၀၀)၊ အနိမ့်စ တစ်ပိဿာလျှင်ကျပ်(၁၀၀၀၀)၊ ချင်းအတက် တစ်ပိဿာလျှင် ကျပ်(၈၀၀၀)၊ ဆားကြမ်း တစ်ပိဿာ ကျပ်(၅၅၀)၊ မြေပဲဆံ တစ်ပြည်လျှင် ကျပ်(၇၇၀၀)၊ ကုလားပဲခြမ်းတစ်ပြည်လျှင် ကျပ်(၇၇၀၀)၊ ရှမ်း ပြည်နယ်မှထွက်ရှိသော အားလူး တစ်ပိဿာလျှင် ကျပ်(၃၀၀၀-၃၂၀၀)၊ ငရုတ်သီးခြောက်အရှည် တစ်ပိဿာလျှင် ကျပ်(၂၀၀၀၀)၊ ငရုတ်ခြောက်အပု တစ်ပိဿာလျှင် ကျပ်(၁၈၀၀၀)၊ နနွင်းအတက် တစ်ပိဿာလျှင် ကျပ်(၅၅၀၀)၊ ကြက်ဥမှာအရွယ်အစားလိုက်၍ တစ်လုံးလျှင် ကျပ်(၃၀၀)၊ ဘဲဥ တစ်လုံး ကျပ်(၄၀၀)၊ ခရမ်းချဉ်သီးတစ်ပိဿာလျှင် ကျပ်(၂၀၀၀)၊ ပဲတောင့်ရှည် တစ်ပိဿာလျှင် ကျပ်(၂၄၀၀)တို့ဖြင့် အရောင်းအဝယ်ဖြစ်နေကြောင်း မြို့မဈေးသည်များထံမှ သိရှိရပါသည်။

DOCA(မကွေး)

     တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။

    မြန်မာနိုင်ငံစက်သုံးဆီတင်သွင်း၊သိုလှောင်၊ဖြန့်ဖြူးခြင်းလုပ်ငန်းကြီးကြပ်ရေးကော်မတီက တိုင်းဒေသကြီး၊ ပြည်နယ်အလိုက် မြို့ကြီးများ၏ စက်သုံးဆီရည်ညွှန်းလက်ကားဈေးနှုန်းများကို နေ့စဉ် ထုတ်ပြန်ပေးလျက်ရှိပါသည်။

     ဆိပ်ဖြူမြို့နယ်တွင် စက်သုံးဆီအရောင်းဆိုင် (၁၁) ဆိုင်ရှိရာ နေ့စဉ်ဖွင့်လှစ်ရောင်းချလျက်ရှိပြီး ၂၀၂၃ခုနှစ်၊ ဇူလိုင်လ (ပထမပတ်) နှင့် (ဒုတိယပတ်) စက်သုံးဆီဈေးနှုန်းများမှာ 92 တစ်လီတာလျှင် ယခင်အပတ်တွင် ကျပ်(၁၉၉၀)ဖြစ်ခဲ့ပြီး ယခုအပတ်တွင် ကျပ် (၂၀၉၅) ဖြစ်၍ ကျပ် (၁၀၅) ဈေးမြင့်ခဲ့ကြောင်း၊ 95 တစ်လီတာလျှင် ယခင်အပတ်တွင် ကျပ် (၂၀၉၅) ဖြစ်ခဲ့ပြီး ယခုအပတ်တွင် ကျပ် (၂၂၁၀) ဖြစ်၍ ကျပ် (၁၁၅) ဈေးမြင့်ခဲ့ကြောင်း၊ ဒီဇယ်ရိုးရိုးတစ်လီတာလျှင် ယခင်အပတ်တွင် ကျပ် (၂၀၄၅) ဖြစ်ခဲ့ပြီး ယခုအပတ်တွင် ကျပ် (၂၁၂၅) ဖြစ်၍ ကျပ် (၈၀) ဈေးမြင့်ခဲ့ကြောင်း၊ ပရီမီယမ်ဒီဇယ်တစ်လီတာလျှင် ယခင်အပတ်တွင် ကျပ် (၂၁၂၅) ဖြစ်ခဲ့ပြီး ယခုအပတ်တွင် ကျပ် (၂၂၀၅) ဖြစ်၍ ကျပ် (၈၀) ဈေးအမြင့်ဖြင့် အရောင်းအဝယ်ဖြစ်နေကြောင်း၊ ယခင်ဇူလိုင်လ၊ ပထမအပတ်ထက် ဈေးနှုန်းမြင့်ပြီး အရောင်းအဝယ်ဖြစ်ကြောင်း စက်သုံးဆီအရောင်းဆိုင်များမှသိရှိရပါသည်။

DOCA(မကွေး)

          မုံရွာမြို့၊ ချင်းတွင်းရတနာစျေး၌  ရောင်းချနေသော ပုဇွန်ခြောက်၊ ငါးခြောက်များမှာ ရန်ကုန်၊ မန္တလေး၊ ရခိုင်ပြည်နယ်ဘက်မှ ဝင်ရောက်ကြောင်းသိရပြီး ပုဇွန်၊ ငါးခြောက်စျေးနှုန်းများမှာ ဝင်ရောက်သည့် ဒေသအ‌ပေါ် မူတည်၍လည်းကောင်း၊ အရည်အသွေးကိုလိုက်၍လည်းကောင်း ကွာခြားလျက်ရှိပါသည်။

      ၂၀၂၃ခုနှစ် ဇူလိုင်လ တတိယအပတ်တွင် ရောင်းချနေသော ဈေးနှုန်းများမှာ ပုဇွန်ခြောက် (၁)ပိဿာလျှင် ကျပ်(၆၅၀၀၀)မှ ကျပ်(၈၅၀၀၀)၊ ငါးရံ့ခြောက် (၁)ပိဿာလျှင် ကျပ်(၅၅၀၀၀မှ ၈၀၀၀၀)၊ ငါးပုတ်လုံးခြောက်(၁)ပိဿာလျှင် ကျပ်(၁၆၀၀၀မှ ၁၈၅၀၀)၊  ငါးပုတ်သင်(၁)ပိဿာလျှင် ကျပ်(၁၅၀၀၀မှ ၁၆၀၀၀) ၊ အာပြဲခြောက်(၁)ပိဿာလျှင် ကျပ်(၂၀၀၀၀မှ ၂၂၀၀၀)၊ ငါးကျည်း ခြောက်(၁)ပိဿာလျှင် ကျပ်(၃၅၀၀၀မှ ၄၅၀၀၀)၊ ငါးနီတူးခြောက် (၁)ပိဿာ လျှင် ကျပ်(၁၂၀၀၀ မှ ၁၄၀၀၀)၊ ငါးဖန့်ဝိုင်း(ငါးပိကောင်) (၁)ပိဿာလျှင် ကျပ်(၁၅၀၀၀မှ ၁၇၅၀၀) ရှိကြောင်း ချင်းတွင်းရတနာဈေးတွင် ရောင်းချနေသော ငါးခြောက်ကုန်သည်များထံမှ သိရပါသည်။

DOCA(စစ်ကိုင်း)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်ရပ်ကွက်များဖြစ်သော အမှတ် (၁၂)၊ အမှတ် (၁၃) နှင့် အမှတ် (၁၄) ရပ်ကွက်တို့တွင် မြန်မာ့သားရေညှပ်ဖိနပ်များကို ရှေးယခင်များစွာကပင် လုပ်ကိုင်လာခဲ့ကြပါသည်။ မြန်မာ့သားရေညှပ်ဖိနပ်များမှာ ခိုင်ခန့်ခြင်း၊ ကျန်းမာရေးနှင့်လည်းညီညွတ်ခြင်း၊ စီးရာတွင်လည်း သက်တောင့်သက်သာရှိခြင်းတို့ကြောင့် လူကြိုက်များလှပါသည်။  ပခုက္ကူမြို့ပေါ်ရှိ မြန်မာ့ညှပ်ဖိနပ်လုပ်ငန်းများဖြစ်သော ဧရာဝဏ်ဆင်၊ ခိုပျံ၊ ဂရိတ်၊ မောင်မယ်၊ မြအိုးစည်၊ ရွှေကျားနှင့် ရွှေအိုးစည်ဖိနပ်လုပ်ငန်းများမှာ လုပ်သားဦးရေ (၁၀) ဦးမှ (၂၅) ဦးအထိတို့ ဖြင့် လုပ်ကိုင်လျက်ရှိကြပါသည်။

  မြန်မာ့ညှပ်ဖိနပ်ကို နွား၏သားရေအရိုင်းဖြင့်ပြုလုပ်ရပါသည်။ နွား၏သားရေအရိုင်းများကို စစ်ကိုင်းတိုင်းဒေသကြီး၊ မုံရွာ၊ မန္တလေးတိုင်းဒေသကြီး၊ မြင်းခြံနှင့် ပခုက္ကူခရိုင်၊  ကန်တော်ဒေသတို့မှ ဝယ်ယူရကြောင်း၊ ထိုဝယ်ပြီးသောသားရေများကို ရေဖြင့်စိမ်ရကြောင်း၊ စိမ်ပြီးသောသားရေများကို လိုရာဖိနပ်ပုံစံများချပြီး ဆိုဒ်စုံလှီးဖြတ်ရကြောင်း၊ လှီးဖြတ်ပြီးသော သားရေမျက်နှာပြင်အချောများကိုရွေးပြီး  ကော်ပတ်တိုက်ရကြောင်း၊ ကော်ပတ်တိုက်ပြီး အနက်ဆီသုတ်၍ ချောသည်အထိစက်ကြိတ်ရကြောင်း၊ စက်ကြိတ်ပြီးရလာသောသားရေများကိုနေလှမ်းရကြောင်း၊ ရလာသောသားရေများကို ဆေးကြမ်းမှုတ်ပြီး ဆေးကြမ်းခြောက်လျှင် ကော်ပတ်စားပြီး မိမိလိုအပ်သောဆေးရောင်မှုတ်ရပြီး  ကျားစီး၊ မစီးများကို ဆိုဒ်စုံလှီးဖြတ်ရကြောင်း၊ ရလာသောဖိနပ်ပြားများကို ဖိနပ်သဲကြိုးတပ်ရန် ခေါင်နှင့်ခါးဖြတ်ကို စောက်ပြားဖြင့်ရှပ်ထုတ်ရပါကြောင်း၊ ထိုမှတစ်ဆင့် ဖိနပ်ပြား၏ဘေးပတ်များကို စက်ကြိုးချုပ်ရန်အတွက်  နှုတ်ခမ်းသားမျာကိုစက်ဖြင့်ကြိတ်ပြီး စောက်ကြောင်းထိုးကာ ဘေးပတ်လည်ကိုစက်ကြောင်းပေါက်၍  သားရေပြားအောက်ခြေမှ ရာဘာပတ်ကြိုးဖြင့်ပတ်ရကြောင်း၊ ရာဘာပတ်ကြိုးအလယ်မှ ဝမ်းစာထည့်ပြီး သားရေနှင့်တွဲ၍ စက်ဖြင့်ချုပ်ရကြောင်း၊  စက်ဖြင့်ချုပ်ပြီး ရလာသောသားရေများကို ခေါင်စိုက်သဲကြိုးကွင်းပြု၍ ခေါင်ကိုသံရိုက်ရကြောင်း၊ ဖနောင့်နေရာတွင် ဖနောင့်မနာရန်အတွက် ချက်စာထည့်ပြီး ကားတာယာဖြင့်ကော်သုတ်၍ အောက်ခြေမှပိတ်ပြီး နှုတ်ခမ်းနားကို ဓားဖြင့်လှီးဖြတ်၍ လက်နှင့်အချောဆွဲခြင်းဖြင့် ဖိနပ်တစ်ရံရရှိပါကြောင်း၊ ရရှိ လာသောဖိနပ်များအား ကစ်တိုက်အချောသတ်ရကြောင်း၊ တစ်နေ့လျှင် ဖိနပ်လုပ်သားခမှာ တစ်ရံလျှင် ကျပ် (၃၀၀) ပေးရပြီး လုပ်သားတစ်ဦးလျှင် အရံ (၂၅) ရံပြီးကြောင်း၊ ရရှိလာသောသားရေဖိနပ်များကို မြန်မာပြည်အနှံ့အပြားသို့တင်ပို့နေကြောင်း၊ မြန်မာ့သားရေညှပ်ဖိနပ်လုပ်ငန်းဦးရေများပြားလာသည်နှင့်အမျှ အလုပ်အကိုင်အခွင့်အလမ်းများလည်း များစွာအထောက် အကူဖြစ်လာပါကြောင်း လုပ်ငန်းရှင်များထံမှသိရှိရပါသည်။

DOCA(မကွေး)