မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီဈေးကွက်သို့ ဇူလိုင်လ(စတုတ္ထပတ်) တွင် ဒေသတွင်းကြက်သွန်နီစိုက်ပျိုးရာကျေးရွာများနှင့် ချောက်၊ စလင်း၊ ပွင့်ဖြူဒေသများမှ ကြက်သွန်နီများ ဝင်ရောက်အရောင်းအဝယ်ဖြစ်လျက်ရှိသည်။ တစ်ရက်လျှင် ကုန်ချိန်ပိဿာ (၁၅၀၀၀-၂၀၀၀၀)ထိဝင်ရောက်အရောင်းအဝယ်ဖြစ်လျက်ရှိပြီး တစ်ပတ်အတွင်း ကုန်ချိန် ပိဿာ(၂၅၀၀၀၀)ခန့်ဝင်ရောက်ကြောင်း၊ ကုန်စည်ဒိုင်တွင် အရောင်းအဝယ်ဖြစ်မှုနည်းပြီး မြို့ပေါ်ရှိပွဲရုံများတွင်သာ အရောင်းအဝယ်ဖြစ်လျက်ရှိကြောင်း၊ ဝယ်လက်ပွဲစားများက ကျေးရွာများထိဆင်း၍ ဝယ်ယူသော်လည်း တောင်သူများက ရောင်းချမှုနည်းကြောင်းသိရှိရပါသည်။
ဈေးနှုန်းအနေဖြင့် ဇူလိုင်လ(စတုတ္ထပတ်)တွင် အရောင်းအဝယ်ဖြစ်သည့်ဈေးနှုန်းများမှာ ကြက်သွန်နီ ဂျွန်တစ်ပိဿာလျှင် ကုန်ပစ္စည်းအရည်အသွေးလိုက်၍ အမြင့်ဈေး ကျပ်(၁၈၀၀မှ ၁၄၀၀)ဈေးဖြင့်အရောင်းအဝယ်ဖြစ်ပြီး ပွဲရုံများက ဂျွန်ကြက်သွန်နီများကို အကြီးအသေးအလတ်ရွေးချယ်သန့်စင်ပြီးသော ကြက်သွန်နီတစ်ပိဿာလျှင် ထိပ်စ (ရှယ်) ကျပ် (၂၃၀၀)၊ လတ်ကြီး ကျပ်(၂၂၀၀-၂၁၀၀)၊ လတ်သန့် ကျပ်(၂၁၀၀-၂၀၀၀)၊ လတ်ချော ကျပ်(၁၆၀၀-၁၅၀၀) ဈေးနှုန်းအသီးသီးဖြင့် အရောင်းအဝယ်ရှိကြောင်း၊ ယခင်ဇူလိုင်လ(တတိယပတ်)ဈေးနှုန်းနှင့်နှိုင်းယှဉ်ပါက ကြက်သွန်နီတစ်ပိဿာလျှင် ကျပ်(၁၅၀)ခန့်ဈေးတက်ပြီး အရောင်းအဝယ်ဖြစ်ကြောင်း၊ ယခုအပတ်တွင် ပြည်ပအဝယ်လိုက်၍ ဈေးနှုန်းအနည်းငယ်မြင့်တက်ကြောင်း၊ ပြည်တွင်းကြက်သွန်နီကို ပြည်ပနိုင်ငံများမှ အဝယ်လိုက်လာသော်လည်း နယ်မြေအခြေအနေနှင့် လမ်းပန်းဆက်သွယ်ရေးအခက်အခဲများကြောင့် အရောင်းအဝယ်အေးကြောင်း ဈေးကွက်မှသိရှိရပါသည်။
ကုန်စည်စီးဆင်းမှုအနေဖြင့် ဆိပ်ဖြူဒေသတွင်းကြက်သွန်နီများကို ရန်ကုန်ဘုရင့်နောင်ပွဲရုံနှင့် ပြည်၊ ပုသိမ်မြို့များအပြင် မြဝတီ၊ မော်လမြိုင်၊ မူဆယ်ဝယ်လက်များမှတစ်ဆင့် ထိုင်း၊ ဗီယက်နမ်၊ တရုတ်နိုင်ငံများသို့ တင်ပို့လျက်ရှိကြောင်း၊ ဇူလိုင်လ(စတုတ္ထပတ်)တွင် ကြက်သွန်နီပိဿာ (၃)သိန်း၊ တန်ချိန်အားဖြင့် (၄၉၀)တန်ခန့် ကုန်းလမ်းမှတစ်ဆင့် မော်တော်ယာဉ်များဖြင့် ကုန်စည်စီးဆင်းခဲ့ကြောင်း ဈေးကွက်မှသိရှိရပါသည်။
DOCA(မကွေး)
