တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။
၂၈.၃.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
ရွှေဘိုမြို့၊ အမှတ် (၁၀) ရပ်ကွက်ရှိ ကုန်းဘောင်ဈေးတွင် ၂၀၂၃ခုနှစ်၊ မတ်လ (တတိယပတ်) တွင်ဖြစ်ပေါ်ခဲ့သော သစ်သီးဝလံဈေးနှုန်းများမှာ ပုပ္ပားမြို့နှင့် မတ္တရာမြို့မှထွက်ရှိသည့် မာလကာသီးတစ်လုံးလျှင် (၂၀၀)ကျပ်မှ (၃၀၀)ကျပ်ထိ၊ တောင်ကြီးမြို့နှင့် ပြင်ဦးလွင်မြို့မှထွက်ရှိသည့် ထောပတ်သီးတစ်လုံးလျှင် (၃၀၀)ကျပ်မှ (၇၀၀)ကျပ်ထိ၊ ဒေသတွင်းနှင့် ပြင်ဦးလွင်မြို့မှ စတော်ဘယ်ရီသီးတစ်ပိဿာလျှင် (၅၀၀၀)ကျပ်မှ (၆၀၀၀)ကျပ်ထိ၊ ပန်းသီးတစ်လုံးလျှင် (၅၀၀)ကျပ်မှ (၁၅၀၀)ကျပ်ထိ၊ ပန်းသစ်တော်သီးတစ်လုံးလျှင် (၃၀၀၀)ကျပ်၊ မန္တလေးပွဲရုံများမှ မှာယူရောင်းချသည့် ပျားလိမ္မော်တစ်ပိဿာလျှင် (၆၀၀၀)ကျပ်၊ ရွှေလိမ္မော်တစ်ပိဿာလျှင် (၈၀၀၀)ကျပ်၊ ရမည်းသင်းမြို့မှထွက်ရှိသည့် စပျစ်သီးအဝိုင်းသီးတစ်ပိဿာလျှင် (၆၀၀၀)ကျပ်၊ အချွန်းသီးတစ်ပိဿာလျှင် (၇၀၀၀)ကျပ်၊ ဆားတောင်မြို့နှင့် ရွှေပန်းကုန်းရွာမှထွက်ရှိသည့် ငှက်ပျောသီးဖီးကြမ်းတစ်ဖီးလျှင် (၈၀၀)ကျပ်၊ ဝက်လက်မြို့၊ ရွှေကျင်ရွာမှထွက်ရှိသည့် ဖရဲသီးတစ်လုံးလျှင် (၁၅၀၀)ကျပ်မှ (၂၅၀၀)ကျပ်ထိ၊ သခွားသီးတစ်လုံးလျင်(၅၀၀)ကျပ်မှ (၈၀၀)ကျပ်ထိ၊ ဒေသတွင်းမှထွက်ရှိသည့် သင်္ဘောသီးတစ်လုံးလျှင် (၆၀၀)ကျပ်မှ (၁၀၀၀)ကျပ်ထိ၊ ဗန်းမော်မြို့မှ မှာယူရောင်းချသည့် သစ်ကြားသီးတစ်လုံးလျှင် (၁၀၀)ကျပ်ဖြင့် အသီးသီးအရောင်းအဝယ်ဖြစ်နေကြောင်း ကုန်းဘောင်ဈေးအတွင်းရောင်းချသော သစ်သီးဆိုင်များမှ သတင်းရရှိပါသည်။
DOCA(စစ်ကိုင်း)
မကွေးတိုင်းဒေသကြီး၊ မြို့သစ်မြို့နယ်တွင် စပျစ်စိုက်ပျိုးခြင်းကို မြေအောက်ရေတူးဖော်စိုက်ပျိုးခဲ့ရာ အောင်မြင်ဖြစ်ထွန်းလျက်ရှိကြောင်းနှင့် စပျစ်သီးစျေးကောင်းရ၍ အဆင်ပြေလျက်ရှိကြောင်း စပျစ်ခြံစိုက်ပျိုး တောင်သူတစ်ဦးထံမှ သိရပါသည်။
ယခုနှစ် စပျစ်စိုက်တောင်သူများအနေဖြင့် စပျစ်သီး (၁)ပိဿာကို ကျပ်(၈၀၀၀)စျေးအထိ ရောင်း ရပါကြောင်း၊ စိုက်ပျိုးသည့် မြေအနေအထားမှာ ယာမြေကို နွားချေး၊ မြေဩဇာတို့နှင့် ဦးစွာမြေပြုပြင်ခြင်း ဆောင်ရွက်ရပါကြောင်း၊ စပျစ်စိုက် တောင်သူများအနေဖြင့် စပျစ်စတင်စိုက်ပျိုးမည်ဆိုပါက စိုက်ပျိုး မြေပြုပြင်ခြင်း၊ ခြံစောင့်တဲအိမ်ဆောက်လုပ်ခြင်း၊ စပျစ်မျိုး ဝယ်ယူခြင်းတို့အတွက် ကနဦး ကုန်ကျစရိတ် သိန်း(၂၀)မှ သိန်း(၅၀) ဝန်းကျင်ကုန်ကျကြောင်း၊ စပျစ်ခြံ စိုက်ပျိုးမှု အောင်မြင်လာပါက တစ်နှစ်အတွင်း သိန်း(၃၀)မှ (၅၀) ဝန်းကျင်ခန့် ရရှိကြောင်း၊ နောက်နှစ်များတွင် မြေဩဇာကျွေးခြင်း၊ အပင်ပြုစုထိန်းသိမ်းခြင်းအတွက် (၁)ဧက သိန်း(၁၀)ဝန်းကျင် ကုန်ကျ၍ ဒုတိယနှစ်မှစ၍ အကျိုးအမြတ်(၁)ဧက သိန်း(၂၀)မှ သိန်း(၃၀)ကြားရ၍ အဆင်ပြေလာနိုင်ကြောင်း စပျစ်စိုက်တောင်သူဦးလှဌေးထံက သိရသည်။
မြို့သစ်မြို့နယ်တွင် စပျစ်စိုက်ပျိုးခြင်းကို မြေအောက်ရေတူးဖော်ကာ စမ်းသပ်စိုက်ပျိုးခဲ့ရာ အောင်မြင်ဖြစ်ထွန်းသဖြင့် စိုက်ပျိုးတောင်သူများသည် “ပဲ၊ ပြောင်း၊ စပါး၊ နှမ်း၊မြေပဲနှင့် နေကြာ” စိုက်ပျိုးခြင်းနှင့်အတူ စပျစ်စိုက်ပျိုးခြင်းကိုပါ တွဲဖက်၍ လုပ်ကိုင်လာပြီဖြစ်ကြောင်း သိရှိရပါသည်။
DOCA(မကွေး)
ရွှေဘိုမြို့ပေါ်ရှိ အောင်ဇေယျဈေးတွင် ဆိုင်ခန်းပေါင်း (၁၀၀) ကျော်နှင့် ပျံကျဈေးသည်များအပြင် မိုးကုတ်မြို့သို့ တင်ပို့ရောင်းချသည့် သီးနှံလက်ကားဒိုင်များဖြင့် နေ့စဉ် နံနက် (၆:၀၀)နာရီမှ နေ့လယ် (၂:၀၀)နာရီထိ ပိတ်ရက်မရှိ ရောင်းဝယ်ဖောက်ကားလျက်ရှိပါသည်။
၂၀၂၃ခုနှစ်၊ မတ်လ (ဒုတိယပတ်) တွင် မရမ်းသီးတစ်ပိဿာလျှင် (၈၀၀၀)ကျပ်နှုန်းဖြင့်ရောင်းချခဲ့ပြီး၊ ယခု မတ်လ (တတိယပတ်)တွင် မရမ်းသီးတစ်ပိဿာလျှင် (၅၀၀၀)ကျပ်ဖြင့် အရောင်းအဝယ်ဖြစ်နေသဖြင့် ယခင်အပတ်နှင့်ယခုအပတ် မရမ်းသီးတစ်ပိဿာ ဈေးနှုန်းတို့ကိုနှိုင်းယှဉ်ရာ (၃၀၀၀)ကျပ်ဈေးနှုန်းကျဆင်းခဲ့ပြီး ပုံမှန်အရောင်းအဝယ်ဖြစ်လျက်ရှိကြောင်း ဈေးအတွင်းရှိ သီးနှံလက်ကားဒိုင်များမှ သတင်းရရှိသည်။
DOCA(စစ်ကိုင်း)
မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်တွင် ဆောင်းသီးနှံအဖြစ် မတ်ပဲများ စတင်ရိတ်သိမ်းလျက်ရှိပြီး စျေးကောင်းရရှိနေပါကြောင်း မတ်ပဲစိုက်တောင်သူများထံမှ သိရှိရပါသည်။
တောင်တွင်းကြီးမြို့နယ်ရှိ ကျေးလက်နေတောင်သူများမှာ ဆောင်းသီးနှံအဖြစ် မတ်ပဲကို မိုးစပါးသီးနှံ ရိတ်သိမ်းပြီးအချိန် အောက်တိုဘာလနှင့်နိုဝင်ဘာလများတွင် စတင်ကြဲပက် စိုက်ပျိုးကြပြီး ယခုနှစ် ဆောင်း မတ်ပဲစိုက်ဧက (၅၂၄၅)စိုက်ပျိုးခဲ့ကြောင်း၊ ယခုအခါတွင် မတ်ပဲများ ရင့်မှည့်ပြီး ရိတ်သိမ်းကာ အခြောက်လှမ်း၍ စတင်ချွေလျက်ရှိကြောင်း၊ ရိတ်သိမ်းခအနေဖြင့် (၁)ဧက ကျပ်(၂၀၀၀၀)နှင့် ချွေလှေ့ခအနေဖြင့် မတ်ပဲ တစ်တင်းလျှင် ကျပ်(၃၀၀၀) ပေးငှားရပြီး အထွက်နှုန်းအနေဖြင့် တစ်ဧကလျှင် (၉)တင်းမှ (၁၂)တင်းအထိ ထွက်ရှိကြောင်းနှင့် ယခင်နှစ် မတ်ပဲ တစ်တင်းလျှင် ကျပ်(၅၀၀၀၀)နှင့် လက်ရှိကာလ မတ်ပဲတစ်တင်းလျှင် ကျပ်(၆၄၀၀၀) ရောင်းချရသည့်အတွက် မတ်ပဲစိုက်တောင်သူများ အဆင်ပြေလျက်ရှိကြောင်း သိရှိရပါသည်။
DOCA(မကွေး)
မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်၊ ပန်းတောကျေးရွာအုပ်စု မြောင်းဂွကျေးရွာသည် စလင်းချောင်း၏မြောက်ဘက် နွယ်တမယ်၊ သရက်ချဉ်ကားလမ်းမဘေးတွင် အိမ်ခြေ(၁၂၈)အိမ်၊ လူဦးရေ(၅၇၆)ဦးတို့ဖြင့် တည်ရှိပြီး ကျေးရွာနေပြည်သူများမှာ တောင်သူအလုပ်ကိုလုပ်ကိုင်ရင်းဖြင့် လယ်ယာလုပ်ငန်းများနှင့်အတူ ဘိုးဘွားအစဉ်အဆက် မိရိုးဖလာမိသားစု တစ်နိုင်တစ်ပိုင်လုပ်ငန်းအဖြစ် မြေအိုးလုပ်ငန်းကို လုပ်ကိုင်လျက်ရှိရာ မိသားစုများ စားဝတ်နေရေး အဆင်ပြေလျက်ရှိကြောင်း သိရှိရပါသည်။
မြေအိုးလုပ်ငန်းကိုလုပ်ကိုင်ရန် မိမိတို့၏လယ်ယာမြေများမှ မြေကြီးများကို လှည်းများ၊ ထော်လာဂျီများ၊ သုံးဘီးများဖြင့် မိုးစပါးရိတ်သိမ်းချွေလှေ့ကာ နေအိမ်များတွင် စုဆောင်း၍အိုးအကြမ်းထည် များလုပ်ကိုင်ထားပြီး နေအိမ်များအတွင်း၌ လေမတိုး၊ နေမပူအောင်ထားသိုမှသာလျှင် လေကြောင်း မလိုက်၊ မအက်ကွဲဘဲ ပို၍ခိုင်ခန့်ကြောင်း၊ သောက်ရေအိုးများကို အကြမ်းထည်ပြုလုပ်ပြီးမှသာ ချောင်းသဲများအား လယ်မြေများဖြင့်ဖျော်စပ်၍ ရေအိုးအတွင်းအပြင်သုတ်ပြီး အရိပ်ထဲတွင်အခြောက်ခံ ၍ မိမိကျေးရွာပတ်ဝန်းကျင်နှင့် တောင်ကုန်းများပေါ်တွင် နှစ်ညထားမီးဖုတ်ရကြောင်း၊ မီးဖုတ်ရာတွင် ထင်းကိုအသုံးမပြုဘဲ စပါးခွံ၊ သစ်ခွံ၊ ကောက်ရိုးများကိုအသုံးပြု၍ မီးဖုတ်ပြီး နောက်တစ်ရက် ညနေပိုင်းတွင် မြေအိုးအချောထည်များ ရရှိကြောင်း၊ ပြုလုပ်သည့်အိုးများထဲမှ သဲသောက်ရေအိုး၊ မြူအိုး၊ ထန်းရေအိုး၊ အတာအိုးနှင့် ဟင်းချက်အိုးတို့ဖြစ်ပြီး တပို့တွဲ၊ တပေါင်းလများတွင် လုပ်ကိုင်သည့် သဲသောက်ရေအိုးမှာ လူကြိုက်များပြီး အရောင်းရဆုံးဖြစ်ကာ ပွင့်ဖြူ၊ ဆိပ်ဖြူ၊ ရှောက်တော၊ ချောက် မြို့အတွင်းရှိပြည်သူများမှ ဝယ်ယူခြင်းနှင့် ဖောက်သည်ရောင်းချကြောင်းသိရသည်။
မြောင်းဂွကျေးရွာမှ ပြုလုပ်သည့်သောက်ရေအိုး(၁)လုံးလျှင် ဖောက်သည်ဈေးအနေဖြင့် ကျပ် (၂၅၀၀)၊ မြူအိုး (၁)လုံးလျှင် ကျပ်(၃၅၀)၊ ဟင်းချက်အိုး(၁)လုံးလျှင် ကျပ်(၁၀၀၀) အသီးသီးဖြင့် ရောင်းချ ရကြောင်းနှင့် မိသားစုတနိုင်တပိုင်ပြုလုပ်သည့် အိမ်တွင်းလက်မှုအိုးလုပ်ငန်းပြုလုပ်ရောင်းချခြင်းဖြင့် အပိုဝင်ငွေရရှိကြောင်း မြေအိုးလုပ်ကိုင်ရောင်းချသူ ဦးဝင်းရွှေထံမှ သိရှိရပါသည်။
DOCA(မကွေး)
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူး ရုံးအနေဖြင့် စားသုံးသူကာကွယ်ရေးလုပ်ငန်းများကို စားသုံးသူပြည်သူများသာမက စီးပွားရေးလုပ်ငန်းရှင်များသိရှိနိုင်စေရန် အသိပညာပေးခြင်များ ဆောင်ရွက်လျက်ရှိရာ (၂၀.၃.၂၀၂၃)ရက်နေ့ နံနက်(၀၉:၃၀)နာရီအချိန်တွင် ဒု-ခရိုင်ဦးစီးမှူးနှင့်/ထုတ်ကုန်လုံခြုံစိတ်ချရမှုဌာနခွဲတာဝန်ခံတို့သည် ရွှေဘိုမြို့နယ်၊ ဇီးကုန်းလေးကျေးရွာရှိ ရက်ကန်းလုပ်ငန်းရှင်အား တွေ့ဆုံဆွေးနွေးခဲ့ပါသည်။
ထိုသို့တွေ့ဆုံဆွေးနွေးရာတွင် ဒု-ခရိုင်ဦးစီးမှူးမှ စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်းများနှင့် ပြည်တွင်းကုန်သွယ်ရေးဖွံ့ဖြိုးမှုလုပ်ငန်းများကိုလည်း ဆောင်ရွက်လျက် ရှိကြောင်း၊ စားသုံးသူကာကွယ်ရေဥပဒေပါ စားသုံးသူအခွင့်အရေး(၈)ချက်နှင့် လိုက်နာရမည့်တာဝန်များ အကြောင်း၊ စီးပွားရေးလုပ်ငန်းရှင်၏တာဝန်များအကြောင်း၊ ပြည်သူများအနေဖြင့် ဌာနနှင့်ပတ်သက်သော သတင်းအချက်အလက်များကို အလွယ်တကူမေးမြန်းစုံစမ်းနိုင်ရန်၊ ကုန်စည်နှင့်ဝန်ဆောင်မှုများ ဝယ်ယူ သုံးစွဲရာတွင် နစ်နာဆုံးရှုံးမှုများကြုံရပါက ဌာနသို့အလွယ်တကူတိုင်ကြားနိုင်ရန်၊ လုပ်ငန်းရှင်များအနေဖြင့် မိမိတို့၏ ကုန်စည်နှင့် ဝန်ဆောင်မှုများ ထုတ်လုပ်၊ ဖြန့်ဖြူး၊ ရောင်းချရာတွင် ကုန်အညွှန်းအမှတ်အသား အပါအဝင် လိုက်နာဆောင်ရွက်ရမည့်အချက်များကို စုံစမ်းနိုင်ရန်ရည်ရွယ်၍ ဌာနအနေဖြင့် Consumer Call Center ဝန်ဆောင်မှုများကို ဆောင်ရွက်ပေးလျက်ရှိရာ Telenor ,Mytel, Ooredooနှင့် MPT Sim Card User များအားလုံး Consumer Call Centerနံပါတ် ၁၅၃၅သို့ခေါ်ဆို၍ သိရှိလိုသည်များကို စုံစမ်းမေးမြန်းနိုင်သည့်အကြောင်းများ ရှင်းလင်းဆွေးနွေးခဲ့ပြီးပါသည်။ ဆက်လက်၍ ရက်ကန်းထည်များ၏ ဈေးနှုန်းဈေးကွက် နှင့်အကျိုးအမြတ်ရရှိမှုအခြေအနေများကို မေးမြန်းခဲ့ရာ လုပ်ငန်းရှင်အနေဖြင့် စက်ရက်ကန်း(၅)စင် ထောင်ထားကြောင်း၊ ယခုရက်လုပ်နေသည်မှာ ၂/၈၀တိုင်၊ ၂/၄၀ဖောက် မျက်ဝန်းဆင်ဖြစ်ပြီး လုံချည်တစ်ကွင်းလျင်(၈၅၀ဝိ/-)နှင့် ဝမ်းဆက်တစ်အုပ်လျင်(၁၁၅၀ဝိ/-)ဖြင့် ဆိပ်ခွန်ကျေးရွာနှင့် ဇီးကုန်းလေးကျေးရွာတွင် ဖောက်သည်သွင်း၍ရကြောင်း၊ ကိုယ်တိုင်ရက်လုပ်ပါက တစ်အုပ်လျင်(၁၉၀ဝိ/-) ခန့်အကျိုးအမြတ်ရှိပြီး ငှာရမ်း၍ရက်လုပ်ပါက တစ်အုပ်လျှင်(၁၀၀ဝိ/-) ပေးရကြောင်း၊ လျှပ်စစ်မီးမှန်ပါက တစ်ရက်လျှင် ဝမ်းဆက်(၅)အုပ်မှ (၇)အုပ်ထိရရှိကြောင်း၊ ရက်ကန်းလုပ်ငန်းလုပ်ကိုင်ရသည်မှာ လျှပ်စစ်မီး မမှန်ခြင်း၊ ရက်လုပ်ချိန်ပုံမှန်မရှိခြင်း၊ ချည်ဈေးနှုန်းများ ပုံမှန်မရှိခြင်းစသည့် အခက်အခဲများကြောင့် ယခင်ကလောက်အဆင်ပြေချောမွေ့မှုမရှိသည့်အတွက် မိမိရင်းနှီးထားသည့် လုပ်ငန်းဖြစ်၍သာ ဆက်လက်လုပ်ကိုင်ဆောင်ရွက်နေရခြင်းဖြစ်ကြောင်း လုပ်ငန်းရှင်နှင့်တွေ့ဆုံဆွေးနွေးမှုအရ သတင်းရရှိ ပါသည်။
DOCA(စစ်ကိုင်း)
တနင်္သာရီတိုင်းဒေသကြီးသည် ရော်ဘာနှင့် သီဟိုဠ်များကို အဓိကထားစိုက်ပျိုးလျက်ရှိသည့် တိုင်းဒေသကြီးဖြစ်ပါသည်။ ရော်ဘာစိုက်ပျိုးသည့်ဧရိယာမှာ (၃၅၁၇၇၇) ဧက၊ အစေးလှီးဧရိယာမှာ (၂၀၂၇၁၉) ဧက၊ အထွက်နှုန်းမှာ (၅၂၀.၂၁) ပေါင်ရှိပြီး တစ်နှစ်စာပျှမ်းမျှအထွက်တန်မှာ (၄၇၈၃၄) မက်ထရစ်တန်ရှိကြောင်း သိရှိရပါသည်။
မှိုင်းခံရော်ဘာတွင် RSS-1၊ RSS-2၊ RSS-3၊ RSS-4၊ RSS-5 ဟူ၍ အဆင့်သတ်မှတ်ချက် (၅ ) မျိုးရှိပါသည်။ ယခုလက်ရှိ တနင်္သာရီတိုင်းဒေသကြီးအတွင်းတွင် RSS-3 နှင့် RSS-5 ( ၂ ) မျိုးသာ အဓိကအရောင်းအဝယ်ဖြစ်လျက်ရှိပါသည်။
ယခုအပတ်၌ ရော်ဘာစျေးနှုန်းမှာ RSS-3 တစ်ပေါင်လျှင် ကျပ် ၁၄၂၀ နှုန်း၊ RSS-5 တစ်ပေါင်လျှင် ကျပ် ၁၃၂၀ နှုန်းပေါက်ဈေးရှိပြီး RSS-3 သည် RSS-5 ထက် အပြစ်အနာအဆာကင်းသောကြောင့် ဈေးကောင်းပိုရလျက်ရှိကြောင်း သိရှိရပါသည်။ သီဟိုဠ်စေ့တွင် အခွံမချွတ်ရသေးသောအပင်မှဆွတ်ခူးသော အသီးအကြမ်းစျေးနှင့် အခြောက်လှန်းသန့်စင်ပြီးသော အချောစျေးဟူ၍ စျေးနှုန်း(၂)မျိုးရှိပြီး သီဟိုဠ်စေ့စျေးနှုန်းမြင့်တက်လျက်ရှိရာ သီဟိုစေ့အကြမ်းတစ်ပိဿာလျှင် ၄၅၀၀ကျပ်ရှိပြီး သီဟိုဠ်စေ့အချောတစ်ပိဿာလျှင် ၃၂၀၀၀ကျပ်ဖြစ်ကြောင်း ကုန်သည်တစ်ဦးထံမှ သိရှိရပါသည်။
တနင်္သာရီတိုင်းဒေသကြီး၊ ထားဝယ်တွင် ရော်ဘာစျေးနှုန်းအနေဖြင့် ယခင်အပတ်နှင့်နှိုင်းယှဉ်ပါက စျေးနှုန်းတည်ငြိမ်လျက်ရှိပါကြောင်း၊ ရော်ဘာကို ကော့သောင်းနှင့် ထိုင်းဘက်သို့ အများဆုံးတင်ပို့လျက်ရှိကြောင်းနှင့် ယခုအခါ ထားဝယ်မှကော့သောင်းသို့ (ကားခ)သယ်ယူပို့ဆောင်ခမှာ တစ်တန်လျှင် (၁၈၀၀၀၀−၂၀၀၀၀၀) ကျပ်နှုန်းရှိကြောင်း စုံစမ်းသိရှိရပါသည်။
DOCA(တနင်္သာရီ)
မုံရွာမြို့ သီရိမင်္ဂလာစျေးရှိ သစ်သီးဝလံများမှာ ရှမ်းပြည်နယ်၊ တောင်ကြီး၊ မြစ်ကြီးနား၊ သီပေါ၊ စစ်ကိုင်း၊ ပြင်ဦးလွင်နှင့် ဒေသတွင်းတို့မှ အသီးသီးဝင်ရောက်လျက်ရှိကြောင်း သိရပါသည်။
ယခုမတ်လ တတိယအပတ်တွင် ရွှေလိမ္မော်(၁)ပိဿာလျှင် ကျပ်(၇၅၀၀မှ ၈၀၀၀)ကြား၊ ပျားလိမ္မော်(၁)ပိဿာလျှင် ကျပ်(၆၀၀၀မှ ၈၀၀၀)ကြား၊ လိမ္မော်(ရိုးရိုး) (၁)ပိဿာလျှင် ကျပ်(၃၀၀၀မှ ၅၀၀၀) ကြား၊ ပန်းသစ်တော် (၁)လုံး လျှင် ကျပ်(၂၀၀၀မှ ၂၅၀၀)ကြား၊ ပန်းသီး (၁)လုံးလျှင် ကျပ်(၇၀၀မှ ၉၀၀)ကြား၊ ထောပတ်သီး (၁)လုံးလျှင် ကျပ်(၅၀၀ မှ ၁၀၀၀)ကြား၊ ကျွဲကောသီး (၁)လုံးလျှင် ကျပ်(၁၀၀၀မှ ၁၅၀၀)ကြား၊ တယ်သီး (၁)လုံးလျှင် ကျပ်(၈၀၀မှ ၁၀၀၀)ကြား၊ သခွားမွှေး (၁)လုံးလျှင် ကျပ်(၃၀၀၀မှ ၃၅၀၀)ကြား၊ ဖရဲသီး(ကြီး) (၁)လုံးလျှင် ကျပ်(၂၀၀၀မှ ၃၀၀၀)ကြား၊ ဖရဲသီး(သေး) (၁)လုံးလျှင် ကျပ်(၁၀၀၀မှ ၁၅၀၀)ကြား၊ နာနတ်သီး (၁)လုံးလျှင် ကျပ်(၁၂၀၀မှ ၁၅၀၀)ကြား၊ နှင်းသီး(၁)ပိဿာလျှင် ကျပ်(၅၀၀၀မှ ၇၀၀၀)ကြား၊ နဂါးမောက်သီး (၁)လုံးလျှင် ကျပ်(၈၀၀မှ ၁၀၀၀)ကြား၊ ငှက်ပျောသီးဖီးကြမ်းတစ်ဖီးလျှင် (၁၂၀၀)ကျပ်၊ ငှက်ပျောသီးမွှေး တစ်ဖီးလျှင် (၁၀၀၀)ကျပ်၊ စပျစ်သီး (၁)ပိဿာလျှင် ကျပ်(၈၀၀၀မှ ၁၀၀၀၀)ကြားဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။
DOCA(စစ်ကိုင်း)
