ပြည်တွင်းကုန်သွယ်မှုသတင်း

    ရှမ်းပြည်နယ်(မြောက်ပိုင်း)အတွင်းတွင် ကြံစိုက်ဧက (၁၃၈၅၂၃)ရှိပြီး ကြံများ စတင် ရိတ်သိမ်းနေပြီ ဖြစ်ကြောင်း သိရှိရပါသည်။ ကြံစိုက်တောင်သူများအား ငွေရည်ပုလဲကုမ္ပဏီမှ မျိုးနှင့် သွင်းအားစုများအား ကြိုတင်ထုတ်ပေးပြီး ကြံပေါ်ချိန်ရောက်မှသာ ပြန်လည်ပေးသွင်းရကြောင်း သိရှိရပါသည်။ ယခင်နှစ် ကြံရာသီတွင် တစ်တန်လျှင် (၆၅၀၀၀/-)နှုန်းရရှိပြီး ယခုနှစ် ကြံတစ်တန် စက်ရုံအရောက်ဈေးမှာ ကျပ်(၉၀၀၀၀/-) ဖြစ်ပါသည်။ ယခုနှစ် ပေါက်ဈေးဖြင့် တွက်ချက်လျှင် ကြံတစ်ဧကလျှင် ပထမနှစ်တွင် အထွက်နှုန်း တန်(၄၀ မှ ၅၀)ကြား ထွက်ရှိပြီး စိုက်ပျိုးစရိတ် ကျပ်(၂၂၅၀၀၀၀/-)ခန့်ကုန်ကျကာ အမြတ်ကျပ် (၁၃၅၀၀၀၀/-)ခန့်ရရှိကြောင်း၊ ဒုတိယနှစ်တွင် မျိုး၊ ပလပ်စတစ်နှင့် ထွန်ယက်ခမှာ မလိုအပ်တော့သဖြင့် စိုက်ပျိုးစရိတ်မှာ (၁၂၇၆၀၀၀/-)ခန့်သာ ကုန်ကျပြီး တစ်ဧက အထွက်နှုန်း တန်(၄၀ မှ ၅၀ ကြား)ထွက်ရှိသဖြင့် တစ်ဧကအမြတ် ကျပ်(၂၃၂၀၀၀၀/-)ခန့် ရရှိကြောင်း၊ တတိယနှစ်တွင် ဒုတိယနှစ်နှင့်စိုက်ပျိုး ကုန်ကျစရိတ် တူသော်လည်း အထွက်နှုန်းမှာ တစ်ဧကလျှင် တန်(၂၅ မှ ၃၀ ကြား)သာထွက်ရှိတော့သဖြင့် တစ်ဧကအမြတ်မှာ (၁၄၂၀၀၀၀/-)ခန့်သာ ရရှိကြောင်းသိရှိရပါသည်။ လားရှိုးမြို့နယ်အတွင်းရှိ ထွက်ရှိသော ကြံများအား ငွေရည်ပုလဲကုမ္ပဏီရှိ မိုင်းရယ်သကြားစက်သို့လည်းကောင်း၊ ကျောက်မဲ မြို့နယ်၊ သီပေါမြို့နယ်နှင့်နောင်ချိုမြို့နယ်ရှိ ထွက်ရှိသောကြံများအား ငွေရည်ပုလဲကုမ္ပဏီရှိ ဆမ္မဆယ်သကြားစက်နှင့် အင်းဝိုင်းသကြားစက်များသို့လည်းကောင်း ရောင်းချကြောင်း သိရှိရပါသည်။

DOCA(ရှမ်း)

     စားသုံးသူရေးရာဦးစီးဌာန မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံး၊ စလင်းမြို့နယ် တာဝန်ခံ ဦးဆန်းလင်းမောင် (ဦးစီးမှူး)နှင့်အဖွဲ့သည် (၂၂.၁.၂၀၂၃)ရက်နေ့ နံနက်(၁၀:၀၀)နာရီတွင် ဖောင်လင်းကျေးရွာရှိ ဆောင်းငရုတ်သီး စိုက်ပျိုးသော တောင်သူဦးကျော်နိုင်နှင့်တွေ့ဆုံ၍ စိုက်ပျိုး ထုတ်လုပ်မှု၊ ရောင်းဝယ်မှုအခြေအနေများအား ကွင်းဆင်းလေ့လာခဲ့ပါသည်။

    တောင်သူအနေဖြင့် ယခုနှစ်တွင် ဆောင်းငရုတ်(၃) ဧက စိုက်ပျိုးထားပါကြောင်း၊ ယခင်နှစ်က (၂)ဧကစိုက်ပျိုးခဲ့ပြီး အထွက်နှုန်း‌ကောင်း၍ ငရုတ်သီး(စို) တစ်ပိဿာလျှင် ကျပ်(၁၄၀ဝ) ရရှိခဲ့ ပါကြောင်း၊ ဆောင်းငရုတ်ကို နှစ်စဉ် စက်တင်ဘာလတွင် ပျိုးထောင်ကြပါကြောင်း၊ ပျိုးထောင်ပြီး (၃၅) ရက်သားတွင် စတင်စိုက်ပျိုး၍ စိုက်ပျိုးရာတွင် ပင်ကြား(၂)ပေ၊ တန်ကြား (၃)ပေအကွာ စိုက်ပျိုးကြပြီး တောင်သူများအနေဖြင့် ကျောက်စိမ်း(စပ်မျိုး)692  ငရုတ်မျိုးများကို အများဆုံး စိုက်ပျိုးကြပါကြောင်း၊ နောက်(၃)လခန့်အကြာတွင် စတင်ခူးဆွတ်ရပြီး (၁)ဧကလျှင် (၈)ကြိမ်ခန့် ခူးဆွတ်ရပါကြောင်း၊ (၁)ကြိမ်လျှင် (၂၅၀)ပိဿာခန့်ခူးဆွတ်ရပြီး စုစုပေါင်း(၁၈၀၀)ပိဿာခန့် ခူးဆွတ် ရရှိပါကြောင်း၊ ယခုနှစ်တွင် မိုးရာသွန်းမှုနည်းပါးခြင်း၊ ပိုးမွှားများကျရောက်မှုများပြားခြင်းတို့ကြောင့် ငရုတ်သီးအထွက်နှုန်း ယခင်နှစ် အောက်လျော့နည်းခဲ့ကြောင်း၊ မြေပြင်မျိုးစိုက်ပျိုးခြင်း၊ သွင်းအားစု၊ လုပ်အားခအပါအဝင် (၁)ဧက ကုန်ကျစရိတ် ကျပ်သိန်း (၃၀) ခန့်ကုန်ကျပြီး ငရုတ်သီး(စို) (၁)ပိဿာ လျှင်ဇန်နဝါရီလဆန်း သီးနှံပေါ်ချိန်တွင် ကျပ်(၂၅၀ဝ)ဖြင့် ရောင်းချရသဖြင့် ဝင်ငွေ ကျပ်(၄၅၀၀၀၀၀) ထိ ရရှိကာ အကျိုးအမြတ်အနေဖြင့် (၁)ဧကလျှင် ကျပ်(၁၅၀၀၀၀ဝ)ခန့် ရရှိကြောင်း၊ ထွက်ရှိလာ သော ငရုတ်သီးမှည့်အစိုများကို တောင်သူများအနေဖြင့် မြို့ပေါ်ရှိ ပွဲရုံများသို့ သွားရောက် ရောင်းချကြသလို ပွဲစားများကလည်း ကျေးရွာအရောက် လာရောက်ဝယ်ယူလျက်ရှိရာ ဆောင်း ငရုတ်သီးစိုက်တောင်သူများ အဆင်ပြေလျက်ရှိပြီး ဝင်ငွေတိုးပွားလျက်ရှိကြောင်း ‌ဆောင်းငရုတ် စိုက်ပျိုးသည့် တောင်သူဦးကျော်နိုင်ထံမှ သိရှိရပါသည်။

DOCA(မကွေး)

           မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်ရှိ မြို့မစည်ပင်ဈေးနှင့် ပန်းခြံဈေးတို့တွင် ဒေသတွင်းမြစ်ခြေ၊ ကမ္မမြို့နယ်များမှထွက်ကုန်များအပြင် ပခုက္ကူမြို့နယ်အတွင်းရှိ ကျွန်းများ၊ ရှမ်းပြည်(သီပေါ/အင်းလေး)ထွက်ကုန်များ၊ ကျောက်ပန်းတောင်းနှင့် ပုပ္ပါးနယ်များမှ ထွက်ကုန်များဖြင့် ရောင်းဝယ်ဖောက်ကားလျက်ရှိသော ဈေးဖြစ်ပါသည်။

     အဆိုပါဈေးတွင် ဇန်နဝါရီလ(၁၇)ရက်မှ(၂၃)ရက်နေ့ထိ အရောင်းအဝယ်ဖြစ်နေသည့် ဈေးနှုန်းများမှာ စားဖိုဆောင်သီးနှံများဖြစ်သော ငရုတ်သီးခြောက်(ရှည်) (၁)ပိဿာလျှင် ကျပ်(၁၇၀၀၀/ ၁၈၀၀၀)၊ ငရုတ်သီးခြောက်(ပု) (၁)ပိဿာလျှင် ကျပ်(၂၀၀၀၀)၊ ကြက်သွန်နီ(၁)ပိဿာလျှင် ကျပ် (၂၂၀၀ မှ ၂၅၀၀)၊ ကြက်သွန်ဖြူ ရှမ်းစ(၁)ပိဿာလျှင် ကျပ်(၆၀၀၀ မှ ၇၀၀၀)၊ ကြက်သွန်ဖြူ (ကြူကုတ်) (၁)ပိဿာလျှင် ကျပ်(၄၅၀၀ မှ ၅၀၀၀)၊ ဂျင်းတက် (၁)ပိဿာလျှင် ကျပ်(၁၇၀၀ မှ ၁၈၀၀)၊ ဆား (၁)ပိဿာလျှင် ကျပ်(၅၀၀ မှ ၅၅၀)၊ မန်းကျည်းမှည့်အစေ့လွှတ် (၁)ပိဿာလျှင် ကျပ် (၄၀၀၀ မှ ၄၅၀၀)၊ မြေပဲဆံ(အသစ်) (၁)ပြည်လျှင် ကျပ်(၆၀၀၀ မှ ၆၅၀၀)၊ ကုလားပဲခြမ်း (၁)ပြည် လျှင် ကျပ်(၅၅၀၀ မှ ၅၆၀၀)၊ အာလူး (၁)ပိဿာလျှင် ကျပ်(၂၄၀၀ မှ ၂၅၀၀)၊ ဂေါ်ဖီထုပ်(၁)ထုပ် လျှင် ကျပ်(၈၀၀ မှ  ၁၀၀၀)၊ ပန်းမုန်လာ (၁)ပွင့်လျှင် ကျပ်(၅၀၀ မှ ၁၀၀၀)၊ ခရမ်းချဉ်သီး(၁)ပိဿာလျှင် ကျပ်(၂၀၀၀ မှ ၂၂၀၀)၊ ပဲတောင့်ရှည် (၁)ပိဿာလျှင် ကျပ်(၁၈၀၀ မှ ၂၀၀၀)၊ ပဲရာဇာ/ပဲနီလေး (၁)ပြည်လျှင် ကျပ်(၈၅၀၀ မှ ၉၀၀၀) ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မကွေး)

       ၂၀၂၃ ခုနှစ် ဇန်နဝါရီလ စတုတ္ထပတ်အတွင်း ရှမ်းပြည်နယ်(အရှေ့ပိုင်း) ကျိုင်းတုံမြို့ရှိ အခြေခံစားသောက်ကုန်များဖြစ်သော ရွှေဘိုပေါ်ဆန်မွှေး(သိင်္ဂီ) တစ်ပြည် ၄၅၀၀ကျပ်၊ ဧည့်မထဆန်တစ်ပြည် ၂၅၀၀ကျပ်ဖြင့် ရောင်းဝယ်လျက်ရှိပါသည်။ စားဖိုဆောင်စားသောက်ကုန်များအနေဖြင့် ကြက်သွန်နီတစ်ပိဿာ ၃၅၀၀ကျပ်၊ ကြက်သွန်ဖြူ(ကြူကုတ်) တစ်ပိဿာ ၅၀၀၀ကျပ်၊ (ရှမ်းစ)တစ်ပိဿာ ၆၈၀၀ကျပ်၊ ငရုတ်သီးခြောက်(ရှည်)တစ်ပိဿာ ၂၀၀၀၀ကျပ်၊ ခရမ်းချဉ်သီး တစ်ပိဿာ ၃၀၀၀ကျပ်၊ အာလူးတစ်ပိဿာ ၃၀၀၀ကျပ်၊ မန်ကျည်းသီးမှည့် တစ်ပိဿာ ၂၅၀၀ကျပ်နှင့် ချင်း တစ်ပိဿာ ၁၈၀၀ကျပ် စသဖြင့် ရောင်းဝယ်လျက်ရှိပါသည်။

      ကျိုင်းတုံမြို့တွင် ဇန်နဝါရီလ စတုတ္ထပတ်၌ စားသုံးဆီဈေးနှုန်းများအနေဖြင့် စားအုန်းဆီ တစ်ပိဿာ ၆၅၀၀ကျပ်နှင့် ပဲဆီ(ရိုးရိုး) တစ်ပိဿာ ၁၆၀၀၀ကျပ်၊ ကြက်ဥဈေးမှာ တစ်လုံး ၂၃၀ကျပ်နှင့် ဘဲဥ တစ်လုံး ၃၂၀ကျပ်ဖြင့် ရောင်းဝယ်လျက်ရှိပါသည်။ အသား/ငါးဈေးနှုန်းများမှာ ကြက်သား(CP) တစ်ပိဿာ ၁၀၀၀၀ကျပ်၊ ဝက်သား တစ်ပိဿာ ၂၀၀၀၀ကျပ်၊ အမဲသား တစ်ပိဿာ ၂၂၀၀၀ကျပ်၊ ငါးကြင်း တစ်ပိဿာ ၉၀၀၀ကျပ်၊ ငါးမြစ်ချင်း တစ်ပိဿာ ၈၅၀၀ကျပ် ဈေးနှုန်းများဖြင့် ရောင်းဝယ်လျက်ရှိကြောင်း သိရှိရပါသည်။

       ကျိုင်းတုံမြို့ အခြေခံစားသောက်ကုန်ဈေးနှုန်းများသည် ယခင် ၂၀၂၂ ခုနှစ် ဒီဇင်ဘာလ စတုတ္ထပတ်နှင့် နှိုင်းယှဉ်ပါက ရွှေဘိုပေါ်ဆန်မွှေး(သိင်္ဂီ)၊ ကြက်သွန်နီ၊ ကြက်သွန်ဖြူ(ရှမ်းစ)နှင့် ခရမ်းချဉ်သီးတို့မှာ ဈေးနှုန်းအနည်းငယ်မြင့်တက်လာပြီး ကျန်အခြေခံစားသောက်ကုန်ဈေးနှုန်းများမှာ တည်ငြိမ်လျက်ရှိပါသည်။

DOCA(ရှမ်း)

       မကွေးမြို့ရှိ ကန်သာစျေး၌ ၂၀၂၃ ခုနှစ် ဇန်နဝါရီလ တတိယအပတ်အတွင်း ပုံမှန်ရောင်းချနေသော ကြက်သား၊ ဝက်သား၊ ဆိတ်သား၊ အမဲသားများအပြင်  ရန်ကုန်မြို့မှငါးမျိုးစုံ၊ ရေချိုပုဇွန်၊ ငါးမြစ်ချင်းကြီး၊ ကြက်ဥနှင့် ရခိုင်ပြည်နယ်၊ စစ်တွေမြို့နှင့် အမ်းမြို့တို့မှ ငပိ၊ ငါးခြောက်များ  ဝင်ရောက်လျက်ရှိပြီး ဒေသအလိုက် ပစ္စည်းအမျိုးအစားအလိုက် အရောင်းအဝယ်ဖြစ်လျက်ရှိပြီး ၂၀၂၃ခုနှစ် ဇန်နဝါရီလဆန်းမှစ၍ ဈေးအနည်းငယ်မြင့်တက်လျက်ရှိကြောင်း သိရှိရပါသည်။

          ဇန်နဝါရီလ(တတိယ)ပတ်အတွင်း ဝင်ရောက်ရောင်းချလျှက်ရှိသော စျေးနှုန်းများမှာ ဒေသကြက်သား (၁)ပိဿာလျှင် ကျပ်(၁၄၀၀၀မှ ၁၅၀၀၀)အတွင်း၊ မွေးမြူရေး ကြက်သား (၁)ပိဿာလျှင် ကျပ်(၁၀၀၀၀မှ ၁၂၀၀၀)အတွင်း၊ ဝက်သား (၁)ပိဿာလျှင် ကျပ်(၁၄၀၀၀မှ ၁၆၀၀၀)အတွင်း၊ အမဲသား (၁)ပိဿာလျှင် ကျပ်(၁၄၀၀၀မှ ၁၈၀၀၀)အတွင်း၊ ဆိတ်သား (၁)ပိဿာလျှင် (၂၀၀၀၀ မှ ၂၄၀၀၀) အတွင်း၊ ငါးကြင်း (၁)ပိဿာလျှင် (၁၄၀၀၀မှ ၁၈၀၀၀)အတွင်း၊ မြစ်ငါးမြင်း (၁)ပိဿာလျှင် ကျပ် (၂၅၀၀၀မှ ၃၂၀၀၀)အတွင်း၊ ငါးမြစ်ချင်း (၁)ပိဿာလျှင် ကျပ်(၈၀၀၀မှ ၁၀၀၀၀)အတွင်း၊ ငါးသလောက် (၁)ပိဿာလျှင်  ကျပ်(၂၅၀၀၀ မှ ၂၈၀၀၀)အတွင်း၊ ငါးခူ (၁)ပိဿာလျှင် ကျပ်(၈၀၀၀ မှ ၁၆၀၀၀)အတွင်း၊ ငါးရံ့ (၁)ပိဿာလျှင် ကျပ်(၁၀၀၀၀မှ ၁၆၀၀၀)အတွင်း၊ ငါးတန် (၁)ပိဿာလျှင် ကျပ်(၁၂၀၀၀မှ ၁၆၀၀၀)အတွင်း၊ ငါးဘတ် (၁)ပိဿာလျှင် ကျပ်(၁၆၀၀၀မှ ၁၈၀၀၀)အတွင်း၊ ငါးဖယ် (၁)ပိဿာလျှင် ကျပ်(၁၂၀၀၀မှ ၁၅၀၀၀)အတွင်း၊ ရေချိုပုဇွန် (လတ်) (၁)ပိဿာလျှင် ကျပ်(၃၂၀၀၀ မှ ၃၅၀၀၀)အတွင်း၊ ရေငန်ပုဇွန်(လတ်) (၁)ပိဿာလျှင် ကျပ်(၂၂၀၀၀ မှ ၄၀၀၀၀)အတွင်း၊ ကြက်ဥ (၁)လုံးလျှင် ကျပ်(၂၁၀ မှ ၂၃၀)အတွင်း၊ ဘဲဥ (၁)လုံးလျှင် ကျပ်(၂၈၀ မှ ၃၀၀)အတွင်း၊ ငပိ (၁) ပိဿာလျှင် ကျပ်(၅၀၀၀မှ ၈၀၀၀)အတွင်း၊  အာဗြဲခြောက် (၁)ပိဿာလျှင် ကျပ်( ၂၅၀၀၀မှ ၃၀၀၀၀) အတွင်း၊ ငါးရံ့ခြောက် (၁)ပိဿာလျှင် ကျပ်(၃၆၀၀၀မှ ၄၅၀၀၀)အတွင်း၊ ငါးတံခွန်ခြောက် (၁) ပိဿာလျှင် ကျပ်(၁၅၀၀၀မှ ၁၈၀၀၀)အတွင်း၊ ငါးနီတူခြောက် (၁)ပိဿာလျှင် ကျပ်(၁၃၀၀၀မှ ၁၆၀၀၀)အတွင်း၊ ပုဇွန်ခြောက် (၁)ပိဿာလျှင် ကျပ်(၄၀၀၀၀ မှ ၅၀၀၀၀)အတွင်း အသီးသီးရောင်းချလျက်ရှိကြောင်းနှင့် ယခင်နှစ်ကာလတူထက် ငပိ၊ ငါးခြောက်ဈေးမှာ ကျပ်(၄၀၀၀မှ ၅၀၀၀)ထိ မြင့်တက်လျက်ရှိကြောင်း သိရှိရပါသည်။

DOCA(မကွေး)