ပြည်တွင်းကုန်သွယ်မှုသတင်း

                    မုံရွာနယ်တဝိုက်ရှိ မုံရွာ၊ ချောင်းဦး၊ ကနီ၊ ဘုတလင်၊ ဆားလင်းကြီးနှင့် မြောင်မြို့နယ်တို့သည် ချင်းတွင်းမြစ်ရိုးတစ်လျှောက်တွင် တည်ရှိပြီး နှစ်စဉ်ပဲမျိုးစုံသီးနှံကို အဓိကထား စိုက်ပျိုးထုတ်လုပ်လျှက်ရှိသည့် ဒေသများဖြစ်ပါသည်။ ပဲမျိုးစုံသီးနှံများအနက် စွန်တာပဲများမှာ ဈေးကွက်ရရှိနေသည့်အတွက် တစ်နှစ်ထက်တစ်နှစ် စိုက်ဧကများ တိုးတက်လျှက်ရှိကြောင်း သိရှိရပါသည်။

               စွန်တာပဲများကို မိုး၊ ဆောင်းရာသီနှစ်မျိုးစလုံးတွင် စိုက်ပျိုးကြကြောင်း၊ ယခုအချိန်ကာလတွင် ဆောင်းစိုက်စွန်တာပဲများ လှိုင်လှိုင်ပေါ်နေပြီး ဈေးကောင်းရရှိနေကြောင်း တောင်သူများထံမှ သိရှိရပါသည်။ ယခင်က စွန်တာ(ဆောင်း)ပဲများကို ညံ့သည့် မြေအတန်းအစားများတွင် ပုံမှန်စိုက်ပျိုးကြသော်လည်း ယခု( ၄-၅)နှစ်အတွင်း မြေပဲဖြစ်ထွန်းသည့် နှုံးတင်မြေနုကျွန်းများတွင်ပင် စိုက်ပျိုးလာခဲ့ကြကြောင်း၊ မြေပဲသီးနှံမှာ တစ်ဧကကုန်ကျစရိတ် မြင့်မားပြီး သီးနှံပေါ်ချိန်ဈေးကောင်းမရရှိသည့်အတွက် အကျိုးအမြတ်မရရှိခဲ့ကြောင်း၊ စိုက်ပျိုးစရိတ်သက်သာပြီး အကျိုးအမြတ်ပိုမိုရရှိသည့် စွန်တာပဲများကို ပြောင်းလဲစိုက်ပျိုးလာခြင်းဖြစ်ကြောင်း တောင်သူများထံမှ သိရှိရပါသည်။

                ယခုနှစ်တွင် ဆားလင်းကြီးမြို့နယ်၊ ချင်းတွင်းမြစ်ရိုးတစ်လျှောက်ရှိ မြေနုကျွန်းများပေါ်တွင် ယခင်နှစ်ကထက် စွန်တာပဲစိုက်ဧကများ ပိုမိုများပြားလာခဲ့ကြောင်း၊ ယခုနှစ်ချင်းတွင်းမြစ်ရေ ဝင်ရောက်မှုမရှိသည့်အတွက် ပွင့်ကင်းမဝင်မီ ရေတစ်ရေပေးသွင်းခဲ့ရကြောင်း၊ ယခင်နှစ်ကထက် တစ်ဧကကုန်ကျစရိတ်ပိုမိုခဲ့သော်လည်း အထွက်နှုန်းအနည်းငယ်ပိုခဲ့သလို ဈေးနှုန်းလည်းမြင့်တက်ခဲ့သည့်အတွက် အကျိုးအမြတ်ရရှိခဲ့ပါကြောင်း၊ ယခုနှစ်တွင် တစ်ဧကစိုက်ပျိုးထုတ်လုပ်မှုကုန်ကျစရိတ်(၂)သိန်းကျော် ကုန်ကျခဲ့ပြီး တစ်ဧက (၁၈) တင်းခန့် ထွက်ရှိခဲ့ကြောင်း၊ တစ်တင်း(၄၀၀၀၀)ကျပ်ဖြင့် ရောင်းချခဲ့ရသည့်အတွက် တစ်ဧက (၅) သိန်းဝန်းကျင်ခန့် အကျိုးအမြတ်ရရှိခဲ့ကြောင်း တောင်သူဦးဌေးလွင်၏ ပြောပြချက်အရ သိရှိရပါသည်။

              လက်ရှိမုံရွာဈေးကွက်အတွင်း၌ စွန်တာပဲတစ်တင်း (၄၀၀၀၀) ကျပ်ဝန်းကျင်ပေါက်ဈေးရှိပြီး ယခင်နှစ်ကာလတူနှင့် နှိုင်းယှဉ်ပါက တစ်တင်း (၇၀၀၀-၈၀၀၀) ကျပ်ခန့် ဈေးမြင့်လျက်ရှိကြောင်း၊ ဈေးကောင်းရနေသည့်အတွက် နယ်အဝင်များလျှက်ရှိကြောင်း၊ တစ်ရက်ပျှမ်းမျှစွန်တာပဲ အိတ် (၅၀၀) ခန့်ရောင်းဝယ်ဖြစ်လျှက်ရှိကြောင်း၊ ဒေသတွင်းပဲကြော်ဖိုလုပ်ငန်းများမှ ကုန်ကြမ်းဝယ်ယူစုဆောင်းမှုများရှိနေပြီး မန္တလေးနှင့် ပခုက္ကူမြို့ကြီးများမှလည်း ပုံမှန်ဝယ်ယူမှုရှိနေသည့်အတွက် ဈေးကောင်းရရှိနေကြောင်း ကုန်သည်အသိုင်းအဝိုင်းမှ ပြောပြချက်အား ရေးသားတင်ပြလိုက်ရပါသည်။

DOCA(စစ်ကိုင်း)

           စစ်ကိုင်းတိုင်းဒေသကြီး၊း( မုံရွာမြို့နယ်) မှ ထွက်ရှိသော ကြက်သွန်နီများသည် ၂၀၂၂ ခုနှစ် ၊မတ်လတတိယပတ်တွင် ပိဿာလျှင် ပွဲရုံဈေးကျပ် ၅၅၀ မှ ၆၀၀ ၊ လက်လီဈေး တစ်ပိဿာလျှင် ကျပ် ၈၀၀မှ ၉၀၀ နှုန်းဖြင့် ဈေးကောင်းရလျှက်ရှိကြောင်းသိရပါသည်။

          ကြက်သွန်နီကို မုံရွာမြို့နယ်အတွင်းရှိ ကျွဲရဲကျေးရွာ၊ မြေနဲကျေးရွာ၊ ရွာတုံကျေးရွာ၊ တောင်ပလူကျေးရွာများတွင် အများဆုံးစိုက်ပျိုးပြီး မုံရွာမြို့နယ်အနေဖြင့် တစ်နှစ်လျှင် ပျမ်းမျှ ဧက(၁၂၀၀၀)ခန့် စိုက်ပျိုးလျက်ရှိသည်။ ထွက်ရှိသော ကြက်သွန်နီများကို မန္တလေး၊ရန်ကုန်မြို့များနှင့် မြို့တွင်းပွဲရုံများသို့ တင်ပို့ရောင်းချလျှက်ရှိသည်။ ယခင်နှစ်တွင် ကိုဗစ်ရောဂါအခြေအနေများအရ ဝယ်ယူစားသုံးမှုနည်းပါးသောကြောင့် ကြက်သွန်နီဈေးနှုန်းရသင့်သလောက်မရဘဲ တောင်သူများအနေဖြင့် အရှုံးပေါ်ခဲ့ကြောင်းသိရသည်။ ယခင်နှစ်ကာလတူဈေးနှုန်းမှာ ပွဲရုံဈေးတစ်ပိဿာ ကျပ် ၂၅၀ မှ ၃၀၀ ၊ လက်လီဈေးနှုန်းမှာ ကျပ် ၄၀၀မှ ၅၀၀ ရှိကြောင်းသိရှိခဲ့ရသည်။ ယခုနှစ်တွင် ယခင်နှစ် ဈေးထက် ကြက်သွန်နီဈေးကောင်းရရှိလာကြောင်း သိရှိရပါသည်။

DOCA(စစ်ကိုင်း)

            မုံရွာကုန်စည်ဒိုင်၌ မတ်လ ဒုတိယအပတ်အတွင်း အရောင်းအဝယ်ဖြစ်လျက်ရှိသော သီးနှံပေါက်စျေးနှုန်းများမှာ ဂျုံဖြူသန့်တစ်တင်း ကျပ်၃၉၀၀၀၊ ဂျုံထွက်တိုးတစ်တင်း ကျပ်၃၄၇၀၀၊ ကုလားပဲထိုင်ဝမ်တစ်တင်း ကျပ်၄၀၀၀၀၊ ကုလားပဲ 929 တစ်တင်း ကျပ်၄၀၃၀၀၊ ကုလားပဲV2 တစ်တင်း ကျပ်၄၂၅၀၀၊ ပဲစဉ်းငုံတစ်တင်း ကျပ်၄၃၇၀၀၊ ပဲတီစိမ်းကြီး တစ်တင်း ကျပ်၃၆၀၀၀၊ ပဲကြီးတစ်တင်း ကျပ်၅၂၀၀၀မှ ကျပ်၅၇၀၀၀ထိ၊ ပဲနီလုံးရိုးရိုးတစ်တင်း ကျပ်၄၀၂၀၀၊ မလွမ်းပိုတစ်တင်း ကျပ်၄၂၀၀၀၊ မတ်ပဲတစ်တင်း ကျပ်၄၅၅၀၀၊ ပုဂံပဲတစ်တင်း ကျပ်၅၅၀၀၀၊ မြေထောက်ပဲတစ်တင်း ကျပ်၅၄၅၀၀၊ ထောပတ်ပဲ တစ်တင်း ကျပ်၄၀၀၀၀မှ ကျပ်၄၂၀၀၀ထိ၊ ပဲလွန်းပြာတစ်တင်း ကျပ်၃၂၈၀၀၊ CPပြောင်းဖူး စေ့တစ်တင်း ကျပ်၁၆၃၀၀၊ ပြောင်းနီတစ်တင်း ကျပ်၁၂၀၀၀၊ ဆန်ပြောင်းဖြူတစ်တင်း ကျပ်၁၃၅၀၀၊ ဆီထွက်သီးနှံဖြစ်သော နှမ်းဖြူတစ်တင်း ကျပ်၅၁၀၀၀မှ ကျပ်၅၉၀၀၀ထိ၊ နှမ်းနက်တစ်တင်း ကျပ်၆၅၀၀၀မှ ကျပ်၇၇၀၀၀ထိ၊ နှမ်းညို၊ နှမ်းနီ၊ နှမ်းဝါများမှာ တစ်တင်း ကျပ်၅၂၅၀၀နှုန်း၊ မြေပဲလုံးဆံဖြူ တစ်ပိဿာ ၃၅၀၀မှ ၃၆၅၀၊ မြေပဲလုံးဆံနီ တစ်ပိဿာ ကျပ်၃၄၀၀၊ မြေပဲဖတ်တစ်ပိဿာ ကျပ် ၁၅၃၀၊ နှမ်းဖတ်တစ်ပိဿာ ကျပ်၁၁၅၀၊ နေကြာဖတ်တစ်ပိဿာ ကျပ်၉၅၀နှုန်းဖြင့် အသီးသီး အရောင်း အဝယ်ဖြစ်လျက်ရှိကြောင်း သိရပါသည်။

            သီးနှံပေါက်စျေးနှုန်းများမှာ ယခင်လကာလတူ အချိန်နှင့်နှိုင်းယှဉ်ပါက ပေါက်စျေးနှုန်းများ မြင့်တက်လာကြောင်းသိရှိရပါသည်။

DOCA(စစ်ကိုင်း)

           မွန်ပြည်နယ်၏ ၂၀၂၀-၂၀၂၁ ဘဏ္ဍာနှစ် ရော်ဘာစိုက်ဧကမှာ ၅၀၂၁၄၁ ဧကရှိပြီး ၂၀၂၁-၂၀၂၂ ဘဏ္ဍာနှစ် ရော်ဘာစိုက်ဧကမှာ ၅၀၁၇၁၈ ဧကရှိသည့်အတွက် ၂၀၂၀-၂၀၂၁ ဘဏ္ဍာနှစ်ထက် စိုက်ဧက (၄၂၃) ဧက ကျဆင်းလာကြောင်း တွေ့ရှိရသည်။

           ပြည်နယ်အတွင်း အရောင်းအဝယ်ဖြစ်သည့် ရော်ဘာထွက်ကုန်ပစ္စည်းအမျိုးအစားများမှာ TSR, Crump Rubber များအား ပြုပြင်ထုတ်လုပ်၍  ပြည်ပသို့တင်ပို့ခြင်းအား ဆောင်ရွက်ပြီး RSS-3 ရော်ဘာအား ပြည်တွင်းရောင်းဝယ်မှုနှင့် ပြည်ပတင်ပို့မှုပုံစံဖြင့်လည်းကောင်း၊ အထူးပြားများ၊ ခွက်ကပ်များ၊ ဆွဲဖတ်များကို လုပ်သားစရိတတ်လျှော့ချနိုင်ရေးအတွက် TSR ထုတ်စက်ရုံများသို့ ပေးပို့ရောင်းဝယ်မှုများရှိကြောင်း သိရှိရသည်။ ယခင်နှစ် RSS-3 ရော်ဘာတစ်ပေါင်ဈေးနှုန်းမှာ ကျပ် ၈၂၀မှ ၉၀၀ ဝန်းကျင်ခန့်သာရှိခဲ့သည့်အတွက် တောင်သူများအကျိုးအမြတ်နည်းခဲ့သည်။

          မွန်ပြည်နယ်၏ ရော်ဘာဈေးနှုန်းအခြေအနေမှာ ယခုတစ်ပတ်တွင် RSS-3 တစ်ပေါင် ၁၂၀၀ ကျပ် ပေါက်ဈေးဖြစ်ပေါ်နေပြီး ယခင်တစ်ပတ်ဈေးနှုန်း ကျပ် ၁၂၄၀ ရှိပြီး ယခင်ပတ်နှင့်နှိုင်းယှဉ်ပါက ၄၀ ကျပ် ခန့် ဈေးနှုန်းကျဆင်းလာပြီး  ယခင်နှစ်အလားတူ ကာလ RSS-3 တစ်ပေါင်ကျပ် ၉၀၀ ကျပ်နှင့်နှိုင်းယှဉ်ပါက ယခင်နှစ်ဈေးနှုန်းထက် တစ်ပေါင်လျှင် ကျပ် ၃၀၀ ခန့်ဈေးနှုန်းမြင့်တက်လာကြောင်း တွေ့ရှိရသည်။

DOCA(မွန်)

              ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ်တွင် မုန့်ဟင်းခါးဖို ၂၀ ခန့်၊ မုန့်ဖတ်ခြောက်လုပ်ငန်းလုပ်ကိုင်သူ ၉ ဦးခန့်ရှိကြောင်း သိရှိရပြီး မုန့်ဟင်းခါးသည် ဒေသအလိုက် စားသုံးကြသောအစားအစာများတွင် တစ်မျိုးအပါအဝင်ဖြစ်ပါသည်။ စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံသည် မတ်လ ၁၇ ရက်နေ့ နံနက်ပိုင်းက တောင်ငူမြို့တွင် သရဖူအမှတ်တံဆိပ် မုန့်ဟင်းခါးခြောက်ထုတ်လုပ်သူ ဦးသိန်းနိုင်မြင့်နှင့်တွေ့ဆုံပြီး မုန့်ဟင်းခါးခြောက် ထုတ်လုပ်ဖြန့်ဖြူးရောင်းချနိုင်မှုအခြေအနေများကို မေးမြန်းခဲ့ပါသည်။

              တွေ့ဆုံမေးမြန်းမှုအရ မုန့်ဟင်းခါးဖတ် ထုတ်လုပ်ရာတွင် ဆန်လတ်ဆန်များကို အဓိကကုန်ကြမ်းအဖြစ် အသုံးပြုရကြောင်း၊ ယခုအချိန်တွင် ဒေသထွက် ဆန်တစ်အိတ်လျှင် ၂၆၅၀၀ ကျပ် ဝယ်ယူရကြောင်း၊ သရဖူမုန့်ဖတ်ခြောက်စက်ရုံတွင် တစ်ရက်လျှင် ဆန်အိတ် ၄၀ ခန့် မုန့်ဖတ်ထုတ်လုပ်နိုင်ကြောင်း၊ စက်ရုံတွင် လုပ်သား ၂၀ ဦးရှိကြောင်း သိရပါသည်။

              မုန့်ဟင်းခါးခြောက် ထုတ်လုပ်ရာတွင် ပထမဦးစွာ ဆန်လတ်များကို တစ်ရက်စာ ထုတ်လုပ်မှုအတွက် ဆန်အိတ် ၄၀ အား ၂ နာရီခန့် ရေစိမ်ထားရပါသည်။ ရေစိမ်ထားပြီး ဆန်အိတ်များကို နှစ်ကြိမ်မှ သုံးကြိမ်အထိ ရေဆေးရပါသည်။ ရေဆေးပြီး ဆန်များကို မုန့်ကြိတ်ရပါသည်။ ထွက်ရှိ လာသည့် မုန့်နှစ်များအား ရေစစ်ပြီး မုန့်ဟင်းခါးဖတ်ထွက်လာအောင် ညှစ်ရပါသည်။ ရလာသည့် မုန့်ဖတ်များကို လျှော်ရပါသည်။ လျှော်ပြီးသားမုန့်ဖတ်များကို တစ်ရက်နေလှန်းရပါသည်။ မုန့်ဖတ်နေလှန်းရန် စင်များဆောက်ရပါသည်။ ခြောက်သွေ့လာသော မုန့်ဖတ်ခြောက်များကို တပိုင်တနိုင်မယူ၍ ထုတ်ပိုးသည့်နေရာသို့ ပေးပို့ရပါသည်။ ထုပ်ပိုးပြီးသောမုန့်ဖတ်ခြောက်များသည် ဈေးကွက်သို့ပို့ရပါသည်။

              လုပ်သားခငွေရှင်းရာတွင် ကုန်ကြမ်းမှ ကုန်ချောထုပ်ပြီးသည်အထိ ဆန်တစ်အိတ်လျှင် ၃၀၀၀ ကျပ် ပေးရကြောင်း၊ ဆန်လတ်ကြီး တစ်အိတ်လျှင် မုန့်ဖတ်ခြောက် ၂၀ ကျပ်သားထုပ် ၁၁၀ ထုပ်မှ ၁၃၀ ထုပ်အထိရရှိကြောင်း၊ ယခင်နှစ်က မုန့်ဟင်းခါးခြောက် ၂၀ ကျပ်သား တစ်ထုပ်လျှင် ၂၅၀ ကျပ် ရောင်းရကြောင်း၊ ယခုနှစ်တွင် ပီနန်အိတ်ဈေး၊ ပလပ်စတစ်ဈေး၊ ဆီဈေးများတက်လာကြောင်း၊ မုန့်ဖတ်ခြောက်အဖြစ်မရောက်ခင် စက်မှထွက်လာသည့် မုန့်ဖတ်များ မကပ်အောင် စားဆီသုတ်ပေးရကြောင်း၊ ကုန်ကြမ်း ၁၀ အိတ်တွင် စားဆီတစ်ပိဿာ အသုံးပြုရကြောင်း၊ အသုံးပြုရသည့် ကုန်ကြမ်း၊ ဆက်စပ်ပစ္စည်း၊ လုပ်သားခ၊ မီတာခပေါ်အခြေခံ၍ တစ်ထုပ်လျှင် ၂၉၀ ကျပ် ရောင်းချကြောင်း၊ မုန့်ဟင်းခါးခြောက်များကို ရန်ကုန်ဈေးကွက်သို့ အဓိကပို့ကြောင်း၊ မုန့်ဟင်းခါးခြောက် ထုတ်လုပ်ရာတွင် အလေအလွင့်များလည်းရှိကြောင်း၊ အလေအလွင့်ဖြစ်သွားသော မုန့်ဖတ် ခြောက်များကို တစ်ပိသာလျှင် ၄၀၀ ကျပ်နှုန်းဖြင့် ဝက်မွေးမြူသူများက ဝက်စာအဖြစ် ဝယ်ယူကြောင်း လုပ်ငန်းရှင်က ရှင်းပြပါသည်။

           လုပ်ငန်းအခက်အခဲအနေဖြင့် လျှပ်စစ်မီးကို အားထား၍ လုပ်ငန်းဆောင်ရွက်ရသဖြင့် လျှပ်စစ်မီးရရှိမှု နည်းပါးသည့်အခါ အခက်အခဲရှိကြောင်း၊ ဆန်များရေစိမ်ပြီး မီးလုံးဝမလာသဖြင့် ဆန်ပြန်လည်လှန်းရသည့် ရက်များရှိကြောင်း၊ ဈေးကွက်အမှာရှိသလောက် မပို့နိုင်သေးကြောင်း လည်း လုပ်ငန်းရှင်ဦးသိန်းနိုင်မြင့်၏ ပြောပြချက်အရ သိရှိရပါသည်။

DOCA(ပဲခူး)