ပြည်တွင်းကုန်သွယ်မှုသတင်း

           မိတ္ထီလာခရိုင်အတွင်း ပဲစဉ်းငုံကို ယခုနှစ်တွင် ဧက (၉၀၀၀၀) ခန့်စိုက်ပျိုးခဲ့ရာ မလှိုင်မြို့နယ်တွင် ဧက (၆၀၀၀၀) ခန့်ဖြင့် အများဆုံးစိုက်ပျိုးကြောင်းသိရပါသည်။ ပဲစင်းငုံသီးနှံမှာ ရေငတ်ဒဏ်ခံခြင်းကြောင့် ဒေသရာသီဥတုနှင့်သင့်လျော်သည့်အပြင် စိုက်ပျိုးစရိတ်(သွင်းအားစု/လုပ်အားခ)များပါ သက်သာခြင်းကြောင့် စိုက်ပျိုးမှုများပါသည်။ စိုက်ပျိုးကာလမှာ မေလနှင့် ဇွန်လများတွင် စိုက်ပျိုးကြပြီး ဒီဇင်ဘာလနှင့် ဇန်နဝါရီလများတွင် ရိတ်သိမ်းကြပါသည်။ ပဲစင်းငုံကို ဝါ၊ နှမ်းတို့နှင့် သီးညှပ်အဖြစ်လည်းကောင်း၊ ပဲစင်းငုံကို ဒီဇင်ဘာလ လလယ်ပိုင်းတွင် စတင်ရိတ်သိမ်းခဲ့ရာ သီးနှံပေါ်စတွင် စျေးကောင်းရသဖြင့် တစ်တင်းလျှင် ၅၅၀၀၀ိ/-ကျပ်ရှိခဲ့ပါသည်။ သီးနှံလှိုင်ချိန်ဖြစ်သော ဒီဇင်ဘာလ၏ လကုန်ပိုင်းတွင် ၅၃၀၀၀ိ/-ကျပ်ဖြင့် စျေးအနည်းငယ်ကျဆင်းခဲ့သော်လည်း ဇန်နဝါရီလလယ်တွင် မိတ္ထီလာမြို့ပေါ်ရှိ ရောင်းစျေးမှာ တစ်တင်းလျှင် ၅၇၀၀၀ိ/-ကျပ်၊ ကွင်းစျေး(ကျေးရွာ)စျေးမှာ တစ်တင်းလျှင် ၅၅၀၀၀ိ/-ကျပ်မှ ၅၆၀၀၀ိ/-ကျပ်အထိရှိကြောင်းသိရပါသည်၊၊ တစ်ဧကအထွက်နှုန်းမှာ သီးသန့်စိုက်ဧကများတွင် (၇/၈) တင်းနှင့် သီးညှပ်စိုက်ဧကများတွင် (၃.၅/၄)တင်းထွက်ရှိကြောင်းသိရပါသည်။

DOCA(မန္တလေး)

          ၂၀၂၂-၂၀၂၃ ခုနှစ်ထွက် ၊ ပဲခူးတိုင်းဒေသကြီး၏ ဧည့်မထ (မိုးစပါး) ဈေးနှုန်းများ အနည်းငယ်မြင့်တက်လျက်ရှိကြောင်း သိရှိရပါသည်။ ဇန်နဝါရီလ ဒုတိယပတ်တွင် ဧည့်မထစပါးဈေးနှုန်း ၄၆ပေါင် တင်း၁၀၀ လျှင် ၁၁၂၀၀၀၀ကျပ်မှ ၁၁၆၀၀၀၀ ကျပ်ထိရှိခဲ့ရာမှ ယခုဇန်နဝါရီလ တတိယပတ်တွင် ၁၁၆၀၀၀၀ ကျပ်မှ ၁၁၉၆၀၀၀ကျပ် ဈေးနှုန်းဖြစ်ခဲ့သဖြင့် ဧည့်မထ စပါး ၄၆ပေါင် ၊ တင်း၁၀၀ လျှင် ၃၆၀၀၀ကျပ် မြင့်တက်လာခဲ့ကြောင်း သိရှိရပါသည်။ ဇန်နဝါရီလ ဒုတိယပတ်တွင် ဧည့်မထ ဆန်ဈေးနှုန်းမှာ ၂၅ % (၁၀၈)ပေါင် တစ်အိတ်လျှင် ၄၂၀၀၀ ကျပ်မှ ၄၃၅၀၀ ကျပ်ရှိခဲ့ရာမှ ဇန်နဝါရီလ တတိယပတ်တွင် ဧည့်မထ ၂၅ % ဆန် (၁၀၈)ပေါင် ၄၄၀၀၀ကျပ်မှ ၄၆၀၀၀ ကျပ်ထိ ရောက်ရှိခဲ့သဖြင့် ဧည့်မထဆန် ၁၀၈ပေါင် တစ်အိတ်လျှင် ယခင်အပတ်ကထက် ယခုအပတ်တွင် ၂၀၀၀ - ၂၅၀၀ ကျပ်ထိ အသီးသီး ဈေးနှုန်းမြင့်တက်လာခဲ့ကြောင်း ဆန်စက်ပိုင်ရှင်များနှင့် ဆန်ကုန်သည်များထံမှ သိရှိရပါသည်။

          ယခုကဲ့သို့ စပါး/ဆန်ဈေးနှုန်း အနည်းငယ်မြင့်တက်လာရခြင်းမှာ ပြည်ပသို့ တင်ပို့မည့် သင်္ဘော ဆိုက်ရောက်နေချိန်ဖြစ်သဖြင့် ရန်ကုန်ရှိ ဆန်ကုန်သည်များမှ ဧည့်မထ Export အဆင့်မီ အရည်အသွေး မြင့်ဆန်များကို ဈေးနှုန်းမြင့် ဝယ်ယူနေခြင်းကြောင့်သော်လည်းကောင်း ၊ တောင်သူများမှ စပါးနည်းပါး လာသည့်အချိန်တွင် စပါးကိုထိန်း၍ ရောင်းချနေခြင်းများကြောင့်လည်းကောင်း ဈေးနှုန်း မြင့်တက်လာခဲ့ကြောင်း သိရှိရပါသည်။

DOCA(ပဲခူး)

       စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ခရိုင်ဦးစီးမှူး၏ လမ်းညွှန်မှုဖြင့် ဦးစန်းအောင် ဒု-ဦးစီးမှူးသည်(၁၉-၁-၂၀၂၃) ရက်နေ့ နံနက် (၁၀:၀၀) ချိန်တွင် မိတ္ထီလာမြို့နယ် အလည်ရွာကျေးရွာ၊ သဖန်းပင်ရိုးကျေးရွာနှင့် (တောင်)ဆည်ကုန်းကျေးရွာများသို့ ဆီးသီး(အချဉ်မျိုး)နှင့်ပတ်သက်၍ ကွင်းဆင်းလေ့လာခဲ့ပါသည်။

       ဆီးသီး(အချဉ်မျိုး)အပင်များသည် အပူပိုင်းဒေသတွင် ပေါက်တတ်သော သဘာဝပေါက်ပင်တစ်မျိုးဖြစ်ပြီး နှစ်ရှည်သီးပင်အမျိုးအစားဖြစ်ပါသည်။ ထိုအပင်များသည် တောင်သူများ၏ လယ်ကန်သင်း၊ ယာကန်သင်းနှင့် မြေလွတ်နေရာများတွင် သဘာဝအလျောက် အလေ့ကျပေါက်လျက်ရှိသည်ကိုတွေ့ရပါသည်။ တောင်သူများအနေဖြင့် ဆီးသီးများကို နှစ်စဉ် ဒီဇင်ဘာလမှ ဖေဖော်ဝါရီလအထိ (၃)လခန့်ခူးဆွတ်ပြီး ရောင်းချကြရကြောင်း၊ အရွယ်ရောက်ပြီးသော ဆီးပင်ကြီး(၁) ပင်ကို (၁) ရာသီလျှင် (၂၀ မှ ၂၅) တင်းအထိ ထွက်ရှိကြောင်း၊ ခူးဆွတ်ပြီး ရရှိလာသောဆီးသီးများကို နေလှမ်းအခြောက်ခံပြီး ကျေးရွာအရောက် လာရောက်ဝယ်ယူကြသော ပွဲစားများထံသို့လည်းကောင်း၊ မြို့ပေါ်ရှိ ဆီးသီးပွဲရုံအဝယ်ဒိုင်များသို့လည်းကောင်း တင်ပို့ရောင်းချကြပါသည်။ ယခင်နှစ်က ဆီးသီးခြောက် (၁) တင်းလျှင် (၄၅၀၀ိ/-မှ၅၀၀၀ိ/-)ကျပ်စျေးနှုန်းသာရရှိခဲ့သော်လည်း ယခုနှစ်တွင် လက်ရှိပေါက်စျေးမှာ (၁) တင်းလျှင် (၉၅၀၀ိ/-မှ ၁၀၀၀၀ိ/-)ကျပ်အထိ စျေးနှုန်းရရှိသည့်အတွက် ယခင်နှစ်ထက် နှစ်ဆဝင်ငွေပိုမိုရရှိကြောင်း တောင်သူများထံမှသိရှိရပါသည်။ အရွယ်ရောက်ပြီးသောဆီးပင် (၁) ပင်ရှိလျှင်ပင် (၁) ရာသီအတွင်း ၂၅၀၀၀၀ိ/- ကျပ်ခန့် ဝင်ငွေရရှိကြောင်းသိရှိရပါသည်။

   ဆီးသီး(အချဉ်မျိုး)အပင်များသည် မြေလွတ်နေရာနှင့် လယ်ကန်သင်း၊ ယာကန်သင်းများတွင် အလေ့ကျပေါက်သည့်အတွက် တောင်သူများအနေဖြင့် စိုက်ပျိုးမှုကုန်ကျစရိတ်မရှိခြင်း၊ ပြုစုပျိုးထောင်ပေးရန်မလိုခြင်း၊ မိသားစုအပိုဝင်ငွေရရှိခြင်း၊ အရှုံးမရှိပဲ အမြတ်အစွန်းသာရှိခြင်း၊ အပင်များများရှိလျှင် ရှိသလောက် အကျိုးရှိခြင်းတို့ကြောင့် ကျေးလက်နေတောင်သူများကို သဘာဝကပေးသော လက်ဆောင်အဖြစ်ရှိနေမည်ဖြစ်ပါသည်။ ထိုကဲ့သို့ တန်ဖိုးရှိလှသော ဆီးပင် (အချဉ်မျိုး)များကို စနစ်တကျစိုက်ပျိုးပြီး သေချာဂရုစိုက်ပြုစုပေးမည်ဆိုလျှင် ယခုထက်မကသောဝင်ငွေများ မလွဲဧကန်ရရှိနိုင်မည်ဖြစ်ပါကြောင်း အကြံပြုတင်ပြအပ်ပါသည်။

DOCA(မန္တလေး)

       မိတ္ထီလာကုန်စည်ဒိုင်၌ အရောင်းအဝယ်ဖြစ်လျက်ရှိသည့် ဆီထွက်သီးနှံများ၏ စျေးကွက်အခြေအနေမှာ နှမ်းညိုတစ်တင်းလျှင် (၇၃၀၀၀-၇၅၀၀၀)ကျပ်၊ နှမ်းဖြူတစ်တင်းလျှင် (၈၀၀၀၀-၈၅၀၀၀)ကျပ်၊ နေကြာစေ့တစ်ပိဿာလျှင် (၃၆၀၀-၃၇၀၀)ကျပ်ရှိပြီး၊ ယခင်ပတ်ကာလတူ ပေါက်စျေးနှုန်းများမှာ နှမ်းညိုတစ်တင်းလျှင် (၆၇၅၀၀-၇၀၀၀၀)ကျပ်၊ နှမ်းဖြူတစ်တင်းလျှင် ၈၀၀၀၀ ကျပ်၊ နေကြာစေ့တစ်ပိဿာလျှင် ၃၅၀၀ ကျပ်ရှိပြီး၊ ယခင်တစ်ပတ်ကာလတူနှင့် နှိုင်းယှဉ်ပါက နှမ်းစျေးနှုန်းနှင့် နေကြာစျေးနှုန်းများ မြင့်တက်လာကြောင်း၊ ယခုပတ်အတွင်း ဆီစျေးနှုန်းမှာ နှမ်းဆီတစ်ပိဿာလျှင် (၁၁၅၀၀-၉၅၀၀) ကျပ် ၊ မြေပဲဆီတစ်ပိဿာလျှင် (၁၁၀၀၀-၁၂၀၀၀)ကျပ်၊နေကြာဆီတစ်ပိဿာလျှင် ၁၂၀၀၀ ကျပ်၊ စားအုန်းဆီတစ်ပိဿာလျှင် (၆၂၄၀-၆၂၅၀) ကျပ်ရှိပြီး၊ ယခင်ပတ်ကာလတူဘပေါက်စျေးနှုန်းမှာ နှမ်းဆီတစ်ပိဿာလျှင် (၁၁၀၀၀-၉၀၀၀)ကျပ်၊ မြေပဲဆီတစ်ပိဿာလျှင် ၁၁၀၀၀ ကျပ်၊ နေကြာဆီတစ်ပိဿာလျှင် ၁၂၅၀၀ ကျပ်၊ စားအုန်းဆီတစ်ပိဿာလျှင် (၅၇၇၅-၅၈၀၀)ကျပ် စျေးများရှိခဲ့ပြီး၊ ယခုတစ်ပတ်ကာလတူပေါက်ဈေးနှုန်းနှင့်နှိုင်းယှဉ်ပါက နှမ်းဆီ၊ မြေပဲဆီ၊ စားအုန်းဆီစျေးနှုန်းများမှာ မြင့်တက်နေပြီး၊ နေကြာဆီစျေးနှုန်းမှာ အနည်းငယ်ကျဆင်းလျက်ရှိ‌ကြောင်းသိရပါသည်။ နှမ်းဖက်တစ်ပိဿာလျှင် ၂၃၀၀ ကျပ်၊ မြေပဲဖက်တစ်ပိဿာလျှင် ၂၇၀၀ ကျပ်၊ နေကြာဖက်တစ်ပိဿာလျှင် ၁၈၀၀ ကျပ်စျေးနှုန်းရှိပြီး  ယခင်အပတ်နှင့်နှိုင်းယှဉ်ပါက စျေးငြိမ်နေကြောင်းသိရှိရပါသည်။

DOCA(မန္တလေး)

        ဧရာဝတီတိုင်းဒေသကြီး၊ ဟင်္သာတကုန်စည်ဒိုင်တွင် ဆောင်းသီးနှံပဲမျိုးစုံ လှိုင်လှိုင်ထွက်ရှိသော ဇန်နဝါရီလဆန်းမှစ၍ အဓိကဆောင်းသီးနှံဖြစ်သည့် မတ်ပဲမှာ အရောင်းအဝယ်တွင်ကျယ်ပြီး ဈေးကွက်သွက်လာခဲ့ပါသည်။ ဇန်နဝါရီလ(၁၈)ရက်နေ့တွင် မတ်ပဲတစ်တင်းလျှင် ၅၄၄၀၀ ကျပ်ဖြင့် အရောင်းအဝယ်ဖြစ်ခဲ့ပြီး နေ့စဉ်အိတ်(၂၀၀၀)ခန့်အရောင်းအဝယ်ဖြစ်လျက်ရှိပါသည်။ မတ်ပဲစပေါ်ချိန် ဒီဇင်ဘာ ဒုတိယပတ်တွင် တစ်တင်းလျှင် ၆၀၀၀၀ ကျပ်ဈေးပေါက်ခဲ့သော်လည်း ယခုကဲ့သို့ နယ်စုံပဲထွက်လာချိန်တွင် ယခင်လထက် တစ်တင်းလျှင် ၅၆၀၀ ကျပ်ခန့်ကျဆင်းခဲ့ပါသည်။ ပဲတီစိမ်း(ဆီပြောင်)တစ်တင်းလျှင် ၅၄၅၀၀ ကျပ်ဖြင့် အရောင်းအဝယ်ဖြစ်လျက်ရှိပြီး ယခင်လထက် ၇၅၀၀ ကျပ်ခန့်မြင့်တက်ခဲ့ပါသည်။ ပဲလွန်းဖြူတစ်တင်း လျှင် ၃၉၇၀၀ ကျပ်ဈေးပေါက်ပြီး ယခင်လနှင့် ဈေးနှုန်းတူအရောင်းအဝယ်ဖြစ်လျက်ရှိကာ၊ ပဲလွန်းနီတစ်တင်းလျှင် ၆၁၀၀၀ ကျပ်ဖြင့် အရောင်းအဝယ်ဖြစ်လျက်ရှိပြီး ယခင်လထက် ကျပ် ၆၀၀၀ ခန့်မြင့်တက်ခဲ့ပါသည်။ ပဲပုတ်တစ်တင်းလျှင် ၅၅၀၀၀ ကျပ်ဖြင့် ယခင်လနှင့် ဈေးနှုန်းတူအရောင်းအဝယ်ဖြစ်ပြီး၊ ပဲယင်း (အနီ)မှာ တစ်တင်းလျှင် ၆၂၀၀၀ ကျပ်ဈေးဖြင့် အရောင်းအဝယ်ဖြစ်လျက်ရှိပြီး ယခင်လထက် ၆၅၀၀ ကျပ်ခန့်မြင့်တက်ခဲ့ပါသည်။ အစေ့ထုတ်ပြောင်းမှာ ယခင်လနှင့်ဈေးနှုန်းတူ တစ်တင်းလျှင် ၂၁၀၀၀ ကျပ်ဈေးဖြင့်အရောင်းအဝယ်ဖြစ်လျက်ရှိကြောင်းသိရှိရပါသည်။

DOCA(ဧရာဝတီ)