ပြည်ပကုန်သွယ်မှုသတင်းများ

နိုင်ငံပိုင်လုပ်ငန်းများအတွက် ဘတ် ၁.၆ ထရီလီယံ ရင်းနှီးမြှုပ်နှံမှုဘတ်ဂျက်ကို ထိုင်းကက်ဘိနက်ခွင့်ပြု

ထိုင်းကတ်ဘိနက်သည် နိုင်ငံ၏ GDP ကြီးထွားနှုန်းကို ၀.၃ ရာခိုင်နှုန်းမြှင့်တင်ပေးနိုင်ရန် မျှော်မှန်းရသည့် ၂၀၂၆ ဘဏ္ဍာရေးနှစ်တွင် နိုင်ငံပိုင်လုပ်ငန်းများအတွက် ရင်းနှီးမြှုပ်နှံမှုဘတ်ဂျက် ဘတ် ၁.၆ ထရီလီယံကို ခွင့်ပြုခဲ့ကြောင်း ဝန်ကြီးချုပ်ရုံးပြောခွင့်ရပုဂ္ဂိုလ် Siripong Ang Kasakulkiat ၏ အဆိုအရ သိရပါသည်။ နိုင်ငံတော်စီးပွားရေးနှင့်လူမှုဝန်းကျင်ဖွံ့ဖြိုးတိုးတက်ရေး ကောင်စီ (NESDC) က ထိုရင်းနှီးမြှုပ်နှံမှုငွေ သုံးစွဲခြင်းသည် ထိုင်းနိုင်ငံ၏ စီးပွားရေးကြီးထွားနှုန်းကို ၀.၃ ရာခိုင်နှုန်း မြှင့်တင်ရန် လှုံ့ဆော်ပေးနိုင်မည်ဟု ခန့်မှန်းခဲ့ပါသည်။ ဩဂုတ်လတွင် အစိုးရစီမံကိန်းအဖွဲ့ က ယခုနှစ်အတွက် ထိုင်း GDP ကြီးထွားနှုန်းကို ယခင်ခန့်မှန်းထားသည့် ၁.၈ ရာခိုင်နှုန်းမှ ၂ ရာခိုင်နှုန်း သို့ တိုးမြှင့်ခန့်မှန်းခဲ့ကြောင်း သိရပါသည်။ NESDC သည် အမေရိကန်ထံမှ အကောက်ခွန်နှုန်းထား များ ပိုမိုရှင်းလင်းလာခြင်းကို ထိုင်းနိုင်ငံ၏ ပို့ကုန်ကဏ္ဍအတွက် အကျိုးရှိကြောင်း မှတ်ချက်ပြုခဲ့ပါ သည်။ ထိုင်းနိုင်ငံသည် ဒေသတွင်း ပျမ်းမျှနှုန်းထားနှင့် နီးစပ်သည့် ၁၉ ရာခိုင်နှုန်း အကောက်ခွန် နှုန်းထားချမှတ်ခြင်းခံထားရကြောင်း သိရပါသည်။ ယခုနှစ်အတွက် အမေရိကန်ဒေါ်လာဖြင့် တင်ပို့မှုမှာ ၅.၅ ရာခိုင်နှုန်းတိုးတက်ရန် မျှော်မှန်းရကြောင်း သိရပါသည်။ ထိုင်းတင်ပို့မှုနာလံထူလာမှု သည် ကုန်ထုတ်လုပ်မှုနှင့် ပုဂ္ဂလိကရင်းနှီးမြှုပ်နှံမှုကိုပါ လှုံ့ဆော်ပေးနိုင်ရန် မျှော်မှန်းရကြောင်း သိရပါသည်။ ယခုနှစ်အတွက် ပုဂ္ဂလိကကဏ္ဍရင်းနှီးမြှုပ်နှံမှုမှာ ယခင်ခန့်မှန်းထားသည့် ၀.၇ ရာခိုင် နှုန်းကျုံခြင်းမှ ၁ ရာခိုင်နှုန်းမြင့်တက်နိုင်မည်ဟု ခန့်မှန်းထားကြောင်းသိရပါသည်။ ထို့ပြင် Mr Siripong က ကတ်ဘိနက်သည် အများပြည်သူဝန်ဆောင်မှုကို နှောင့်နှေးစေသည့် စည်းမျဉ်းများမှ ဝယ်ယူသူဗဟိုပြုမော်ဒယ်သို့ အသွင်ကူးပြောင်းမည့်စည်းမျဉ်းများ တိုးတက်လာစေရန်အတွက် နိုင်ငံ ပိုင်လုပ်ငန်းအားလုံးကို ညွှန်ကြားရန် နိုင်ငံပိုင်လုပ်ငန်းများမူဝါဒကော်မတီကို ကက်ဘိနက်က တာဝန်ပေးအပ်ခဲ့ကြောင်း ပြောကြားခဲ့ပါသည်။ ကက်ဘိနက်သည် ၂၀၂၇ ခုနှစ် ဘဏ္ဍာနှစ်အတွက် မူဝါဒမူဘောင်ကိုလည်း ခွင့်ပြုခဲ့ပြီး ဝန်ကြီးချုပ် Anutin Charnvirakul က မူဝါဒ ညွှန်ကြားချက်ကို ဒီဇင်ဘာလ ၁ ရက်နေ့တွင် ကြေညာရန် စီစဉ်ထားကြောင်း သိရပါသည်။

DOCA (ရန်ကုန်)

ရေထွက်ကုန်အရည်အသွေးမြှင့်တင်ရန် သိပ္ပံနှင့်နည်းပညာတွင် ရင်းနှီးမြှပ်နှံသည့် မဲခေါင်ဒယ်တာ

ပြည်ပကုန်သွယ်မှုသတင်းများ

၂၀၂၅ ခုနှစ်၏ ပထမ ၉ လတာ ကလတွင် ဗီယက်နမ်၏ ရေထွက်ကုန်တင်ပို့မှုမှာ အမေရိကန် ဒေါ်လာ ၈.၃ ဘီလီယံတန်ဖိုးရှိခဲ့ပြီး ယခုတစ်နှစ်လုံးအတွက် တင်ပို့မှုမှာ အမေရိကန်ဒေါ်လာ ၁၁ ဘီလီ ယံထိ ရောက်ရှိရန်ခန့်မှန်းကြောင်း ဗီယက်နမ်ပင်လယ်စာ တင်ပို့သူများနှင့် ထုတ်လုပ်သူများ အသင်း (VASEP) ၏ အဆိုအရ သိရပါသည်။ Can Tho ၊ Ca Mau နှင့် Ah Giang အစရှိသည့် မဲခေါင် ဒေသပြည်နယ်များသည် နည်းပညာမြင့်နှင့် ဒစ်ဂျစ်တယ်အသွင်ကူးပြောင်းမှုတို့ကို အကောင်အထည် ဖော်ဆောင်ရွက်လျှက်ရှိသောကြောင့် ထိုသို့ အောင်မြင်မှုရရှိခြင်းတွင် အဓိက အခန်းကဏ္ဍက ရပ်တည်နေကြောင်း သိရပါသည်။ ၂၀၂၅ ခုနှစ်၏ နောက်ဆုံးလများတွင် မဲခေါင်ဒယ်တာသည် ရေထွက်ကုန်တင်ပို့မှုနှင့် ထုတ်လုပ်မှုသို့ အသွင်ကူးပြောင်းမှုအားကောင်းခဲ့ကြောင်း သိရပါသည်။ Can Tho မြို့တော်တွင် ဒေသအာဏာပိုင်များသည် ရေလုပ်ငန်းကဏ္ဍအား အဓိကစီးပွားရေးကဏ္ဍအဖြစ် သတ်မှတ်ထား ပြီး Water brackish ပုဇွန်သည် မြို့‌တော်၏ ပို့ကုန်ဝင်ငွေရရှိမှုတွင် သိသာထင်ရှားစွာ ပါဝင် နေကြာင်း သိရပါသည်။ မြူနီစပယ်စိုက်ပျိုးမွေးမြူရေးနှင့်သဘာဝပတ်ဝန်းကျင်ဦးစီးဌာန၏ အဆိုအရ ၂၀၁၅ ခုနှစ်မှ ၂၀၂၄ ခုနှစ်အထိ brackish water ပုဇွန်ထုတ်လုပ်မှုမှာ တန်ချိန် ၉၀၀၀၀ မှ ၂၃၃၀၀၀ ထိ နှစ်စဉ်ပျမ်းမျှ ၁၁ ရာခိုင်နှုန်းမြင့်တက်ခဲ့ကြောင်း သိရပါသည်။ ၂၀၂၅ ခုနှစ်တွင် မြို့တော်သည် ပုဇွန် ၂၂၉၇၀၀ တန် ထုတ်လုပ်ရန် ရည်မှန်းထားပြီး ပို့ကုန်ဝင်ငွေ အမေရိကန်ဒေါ်လာ ၁၁ဘီလီယံကျော် ရရှိရန် ရည်ရွယ်ထားကြောင်း သိရပါသည်။ Ca Mau ပြည်နယ်သည်လည်း ဟတ်တာ ၄၂၇၀၀၀ ဖြင့် နိုင်ငံ၏ အကြီးမားဆုံး ပုဇွန်မွေးမြူသည့် ဧရိယာဖြစ်လာကြောင်း သိရပါသည်။ ၂၀၂၅ ခုနှစ်တွင် ၎င်း ပြည်နယ်သည် ရေထွက်ကုန်တင်ပို့ရာမှ ဝင်ငွေ အမေရိကန်ဒေါ်လာ ၂.၄၇ ဘီလီယံ ရရှိကာ ၂၀၂၄ ခုနှစ်နှင့် နှိုင်းယှဉ်ပါက ၇% မြင့်တက်ရန် မျှော်မှန်းရကြောင်း သိရပါသည်။ ထိုအောင်မြင်မှုရရှိရန် Ca Mau ပြည်နယ်သည် နိုင်ငံတကာစံနှုန်းမီသော မွေးမြူသည့် ဧရိယာများတည်ထောင်ခြင်း၊ အော်ဂဲနစ်၊ ဂေဟစနစ်နှင့်ကိုက်ညီသော နည်းပညာဖြင့် ပုဇွန်မွေးမြူမှု မော်ဒယ်များသို့ တိုးချဲ့ရန် စီစဉ်နေ ကြောင်း သိရပါသည်။ ပုဇွန်အပြင် Ca Mau ပြည်နယ်သည် ဂဏန်းမွေးမြူရေးတွင်လည်း သိသာ ထင်ရှားစွာ တိုးတက်လျှက်ရှိကြောင်း သိရပါသည်။ ၎င်းတို့သည် လတ်တလောတွင် ဂဏန်းမွေးမြူ သည့် ဧရိယာ ၂၆၀၀၀၀ ဟတ်တာရှိပြီး နှစ်စဉ်တန်ချိန် ၃၁၀၀၀ ထုတ်လုပ်နိုင်စွမ်းရှိကြောင်း သိရပါ သည်။ VASEP ၏ အထွေထွေအတွင်းရေးမှူး Nguyen Goai Nam က ဗီယက်နမ်ရေထွက်ကုန် လုပ်ငန်းကဏ္ဍသည် ထောက်ပံ့မှုကွင်းဆက်ဒစ်ဂျစ်တယ် အသွင်ကူးပြောင်းမှု၊ ကုန်ကြမ်းပစ္စည်း အရင်းအမြစ်များ ထိန်းချုပ်မှုနှင့်အဓိကဈေးကွက်များနှင့်ယုံကြည်မှုတည်ဆောက်ရန် အတွက်ပွင့်လင်းမြင်သာမှုရှိရန် အရှိန်အဟုန်မြှင့် ဆောင်ရွက်ရမည် ဖြစ်ကြောင်း ပြောကြားခဲ့ပါသည်။

DOCA (ရန်ကုန်)

အကောက်ခွန်နှုန်းနိမ့်ကျမှုက အမေရိကန်ဈေးကွက်၌ မလေးရှားစားအုန်းဆီ၏ယှဉ်ပြိုင်နိုင်စွမ်းကို တိုးတက်စေ

ပြည်ပကုန်သွယ်မှုသတင်းများ

မလေးရှား၏ စားအုန်းဆီနှင့် ကိုကိုးထုတ်ကုန်များအပါအဝင် ပို့ကုန်ပစ္စည်းအမျိုးအစား စုစု ပေါင်း ၁၇၁၁ ခုအပေါ် ၁၉ ရာခိုင်နှုန်းအောက်အထိ အကောက်ခွန်လျှော့ချရန် အမေရိကန်၏ ဆုံးဖြတ်ချက်နှင့်စပ်လျဉ်း၍ အကျိုးအမြတ်ရရှိရန်စီစဉ်ထားပြီး အမေရိကန်ဈေးကွက်၌ မလေးရှား ထုတ်ကုန်ပစ္စည်းများ၏ ဈေးနှုန်းယှဉ်ပြိုင်နိုင်စွမ်းအားရှိမှုကို တိုးမြှင့်လာစေရန် မလေးရှားနိုင်ငံက မျှော်လင့်ထားကြောင်း The Edge Malaysia သတင်းဌာနက အောက်တိုဘာလ ၂၇ ရက်နေ့တွင် ဖော်ပြထားပါသည်။

စိုက်ခင်းနှင့် ကုန်စည်များရေးရာဝန်ကြီးဌာန၊ မလေးရှားစားအုန်းဆီဘုတ်အဖွဲ့ (MPOB) မှ ညွှန်ကြာ ရေးမှူးချုပ် Datuk Dr Ahmad Parveez Ghulam Kadir က အမေရိကန်သည် မလေးရှား စားအုန်းဆီနှင့် ဆီအုန်းသီးဆံမှ ထုတ်လုပ်သည့် စားအုန်းဆီထုတ်ကုန်များအတွက် အကောက်ခွန် လျှော့ချခြင်းအပြင် အဆီအက်ဆစ်နှင့် အဆီအယ်လ်ကိုဟောကဲ့သို့သော စားအုန်းဆီကို အခြေခံ သည့် ဓာတုဗေဒနည်းလမ်းအရ ပြုပြင်ထုတ်လုပ်ထားသည့်ကုန်ပစ္စည်းများ၊ ဓာတုဗေဒ ကွန်ပေါင်း ပစ္စည်းကိုလည်း အခွန်လျှော့ချမှုပြုလုပ်လာခြင်းက မလေးရှားနိုင်ငံ၏ ကုန်ကြမ်းမှ ကုန်ချော ထုတ်လုပ်သည့် စက်မှုလုပ်ငန်းများအတွက် အဓိကခြေလှမ်းသစ်တစ်ခုကို တက်လှမ်းနိုင်စေမည် ဖြစ်ကြောင်း ပြောကြားခဲ့သည်။

အလားတူ စားအုန်းဆီမှ ထုတ်လုပ်ရရှိသော ဗီတာမင်အေနှင့် ဗီတာမင်အီး ထုတ်ကုန်များ သည်လည်း အမေရိကန်၏ အခွန်လျှော့ချကောက်ခံခြင်းမှ အကျိုးကျေးဇူးများ ရရှိစေခဲ့ကြောင်း၊ ၎င်းသည် မလေးရှား ပို့ကုန်လုပ်ငန်းရှင်များ၏ ဈေးနှုန်းယှဉ်ပြိုင်နိုင်စွမ်းကို တိုးတက်စေပြီး အထူး သဖြင့် အခြားစားအုန်းဆီထုတ်လုပ်သည့်နိုင်ငံများနှင့် ယှဉ်ပြိုင်နိုင်စွမ်း ပိုမိုမြှင့်တင်ပေးကြောင်း Mr. Ahmad Parveez က Bernama သတင်းဌာနသို့ ပြောကြားခဲ့သည်။

အဆိုပါ အမေရိကန်၏ အခွန်လျှော့ချမှုလုပ်ဆောင်ချက်သည် မလေးရှားထုတ်ကုန်များ၏ ကုန်ကျစရိတ်ကို ထိရောက်စွာ လျှော့ချပေးပြီး အမေရိကန်ဈေးကွက်တွင် မလေးရှား၏ခြေကုပ်ရ ယူမှု အားကောင်းစေသည့် ထူးခြားသော ကူးသန်းရောင်းဝယ်ရေးဆိုင်ရာ အားသာချက်ကို ထောက် ပံ့ပေးကြောင်း၊ ထို့အပြင် စားအုန်းဆီကိုအခြေခံသည့် တန်ဖိုးမြှင့်ပို့ကုန်ပစ္စည်းများ တိုးချဲ့ထုတ်လုပ် ခြင်း၊ အထူးသဖြင့်စားအုန်းဆီမှဆင်းသက်လာသော ဓာတုဗေဒကွန်ပေါင်းပစ္စည်း (oleochemical) ကဏ္ဍတွင် ပိုမိုချဲ့ထွင်လာစေရန် လှုံ့ဆော်ပေးမည်ဖြစ်ကြောင်း Mr. Ahmad Parveez က ဆိုသည်။

၎င်းက ဆက်လက်ပြောကြားရာ၌ စျေးနှုန်းအရ တိုက်ရိုက်အားသာမှုရှိခြင်းသည် အမျိုးသား အဆင့် ရေရှည်တည်တံ့ခိုင်မြဲမှုဆိုင်ရာ အသိအမှတ်ပြုခံရခြင်းကို မြှင့်တင်ရန် မလေးရှားအစိုးရ၏ ကြိုးပမ်းအားထုတ်မှုများကို ထပ်လောင်းအားဖြည့်ပေးပြီး တန်ဖိုးမြင့်မားမှုနှင့် ထုတ်ကုန်အရည် အသွေးကို သတိပြုဝယ်ယူသည့် အမေရိကန်ဝယ်လက်များအား စိတ်ဝင်စားမှုမြင့်တက်စေသည်ဟု ဆိုသည်။

မလေးရှားနိုင်ငံ၊ ရင်းနှီးမြှုပ်နှံမှု၊ ကုန်သွယ်မှုနှင့်စက်မှု ဝန်ကြီး Tengku Datuk Seri Zafrul Abdul Aziz က အမေရိကန်-မလေးရှား နှစ်နိုင်ငံကြားချုပ်ဆိုထားသော အပြန်အလှန် ကုန်သွယ်မှု သဘောတူညီချက်အရ အမေရိကန်သို့ တင်ပို့သည့် မလေးရှားပို့ကုန်အမယ် ၁၇၁၁ ခုကို အခွန် စည်းကြပ်မှု ၁၉ ရာခိုင်နှုန်းအောက် လျော့နည်းကောက်ခံမှု ရရှိမည်ဖြစ်ကြောင်းနှင့် အဆိုပါ သဘောတူညီချက်အရ အခွန်လျှော့ချမှုတွင် စားအုန်းဆီ၊ ရော်ဘာနှင့် ကိုကိုးတို့အပြင် ဆေးဝါး ဆိုင်ရာပစ္စည်းအချို့နှင့် အာကာသယာဉ်သုံးကိရိယာများ ပါဝင်ကြောင်း အောက်တိုဘာ ၂၆ ရက်နေ့ ၌ ထုတ်ပြန်ကြေညာခဲ့သည်။

အမေရိကန်သို့ တင်ပို့သည့် အဆိုပါ ပို့ကုန်တန်ဖိုး စုစုပေါင်းသည် အမေရိကန်ဒေါ်လာ ၅.၂ ဘီလီယံ (မလေးရှားရင်းဂစ် ၂၁.၉ ဘီလီယံ) ရှိပြီး မလေးရှား၏ စုစုပေါင်း ပို့ကုန်ပမာဏအနက် ၁၂ ရာခိုင်နှုန်းခန့်ရှိသည်ဟု ဝန်ကြီး Mr. Tengku Datuk က ထိုနေ့ သတင်းစာရှင်းလင်းပွဲတွင် ပြော ကြားခဲ့ခြင်း ဖြစ်သည်။ မလေးရှားပို့ကုန်အပေါ် အမေရိကန်၏ အခွန်လျှော့ချမှုအစီအစဉ်သည် နှစ်နိုင်ငံစလုံးက လိုအပ်သော တရားဝင်စာရွက်စာတမ်းများကို အပြန်အလှန်ဖလှယ်ပြီးနောက် ရက်ပေါင်း ၆၀ အတွင်း အကျိုးသက်ရောက်မည်ဟု မျှော်လင့်ရကြောင်း ဖော်ပြထားသည်။

အမေရိကန်နှင့် မလေးရှား ပူးတွဲကြေညာချက် ထုတ်ပြန်ရာတွင် မိတ်ဖက်ဆောင်ရွက်သည့် နိုင်ငံများအတွက် အလားအလာရှိသော အကောက်ခွန်နှုန်းထား ချိန်ညှိလျှော့ချမှုနှင့် စပ်လျဉ်း၍ ၂၀၂၅ ခုနှစ် စက်တင်ဘာလ ၅ ရက်နေ့၌ ထုတ်ပြန်ထားရှိသော အမေရိကန်နိုင်ငံ၏ အမိန့်စာ အမှတ် ၁၄၃၄၆ ၏ နောက်ဆက်တွဲ (ဂ) တွင် နှစ်နိုင်ငံအပြန်အလှန် စည်းကြပ်မည့် အကောက် ခွန်နှုန်းထားကို သုညရာခိုင်နှုန်း အထိလျှော့ချနိုင်မည့် ကုန်ပစ္စည်းစာရင်းကို ခွဲခြားသတ်မှတ်ထား ပြီးဖြစ်သည်ဟု ဖော်ပြခဲ့သည်။

အမေရိကန်နိုင်ငံအနေဖြင့် ၂၀၂၅ ခုနှစ် ဧပြီလ ၂ ရက်နေ့တွင် ထုတ်ပြန်ခဲ့သည့် အမိန့်အမှတ် ၁၄၂၅၇ တွင် ဖော်ပြထားသော မလေးရှားနိုင်ငံမှထုတ်လုပ်သည့် မူရင်းထုတ်ကုန်ပစ္စည်းများအပေါ် ယခုပြင်ဆင်ခဲ့သည့်အတိုင်း အပြန်အလှန် အကောက်ခွန် ၁၉ ရာခိုင်နှုန်းဖြင့်သာ ဆက်လက် ထိန်း သိမ်းထားရန် ကတိပြုထားကြောင်း The Edge Malaysia သတင်းဌာန၏ ရေးသားဖော်ပြချက်များ အား တင်ပြလိုက်ရပါသည်။

Source: The Edge Malaysia, 27^th Oct 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

လယ်ယာထွက်ကုန် အမျိုးအစား ၃၉၀၀ ကျော် တရုတ်ဈေးကွက်သို့ တင်ပို့ရန် အတည်ပြုချက် ဗီယက်နမ်ရရှိထား

ပြည်ပကုန်သွယ်မှုသတင်းများ

တရုတ်နိုင်ငံ အကောက်ခွန်အထွေထွေအုပ်ချုပ်မှုအာဏာပိုင်အဖွဲ့(GACC) သည် ဗီယက်နမ် လုပ်ငန်းရှင်များအတွက် လယ်ယာထွက်ကုန်နှင့် စားသောက်ကုန် အမျိုးအမည်ပေါင်း ၃၉၃၈ ခုကို တရုတ်ပြည်တွင်းဈေးကွက်သို့ တင်သွင်းခွင့်ပြုရန် အတည်ပြုထားပြီးဖြစ်သည်ဟု ဗီယက်နမ် စိုက်ပျိုးရေးနှင့် ပတ်ဝန်းကျင်ဝန်ကြီးဌာနက ပြောကြားခဲ့ပါသည်။

အဆိုပါကုန်အမယ်များအနက် အမျိုးအစား ၂၅၀ ကို ယခုနှစ် ပထမ ၁၀ လအတွင်း တင်ပို့ ခွင့်လိုင်စင် ထုတ်ပေးခဲ့ပြီးဖြစ်ကြောင်း၊ ဗီယက်နမ်၏ အကြီးဆုံးကုန်သွယ်ရေး မိတ်ဖက်ဖြစ်သော တရုတ်နိုင်ငံသည် လယ်ယာထွက်ကုန်တင်သွင်းသည့် အရေးပါသော ဈေးကွက်တစ်ခုဖြစ်ကြောင်း၊ လယ်ယာထွက်ကုန်နှင့် စားသောက်ကုန်များ တင်သွင်းမှုအပေါ် တရုတ်နိုင်ငံက စည်းမျဉ်းတင်း ကျပ်မှုများ ပိုမိုပြုလုပ်လာသည့်အတွက် ဗီယက်နမ်လုပ်ငန်းရှင်များအနေဖြင့် ထုတ်လုပ်မှုလုပ်ငန်း စဉ်များတွင် စံချိန်စံညွှန်းများကိုက်ညီအောင် ဆောင်ရွက်ခြင်း၊ ယှဉ်ပြိုင်နိုင်စွမ်း ပိုမိုတိုးတက်စေရန် ပြုပြင်ထုတ်လုပ်မှုနှင့် ကုန်ကြမ်းရရှိနိုင်ရေးတို့၌ ရင်းနှီးမြှုပ်နှံခြင်း၊ ပြည်ပသို့ ရေရှည်တင်ပို့နိုင်ရေး ထိန်းသိမ်းဆောင်ရွက်ခြင်း စသည်တို့ကို လုပ်ဆောင်လျက်ရှိကြောင်း သိရှိရပါသည်။

GACC သည် တရုတ်နိုင်ငံသို့ တင်သွင်းသောစားသောက်ကုန်များကို ထုတ်လုပ်သည့် ပြည်ပ မှ လုပ်ငန်းရှင်များ၏ အကောက်ခွန်မှတ်ပုံတင်ခြင်းဆိုင်ရာ ညွှန်ကြားချက် အမိန့်အမှတ် ၂၈၀ အား ပြင်ဆင်ထုတ်ပြန်ခြင်းကို အောက်တိုဘာ ၁၄ ရက်နေ့၌ ဆောင်ရွက်ခဲ့ကြောင်း၊ အဆိုပါ ညွှန်ကြား ချက်သည် ၂၀၂၆ ခုနှစ် ဇွန်လ ၁ ရက်နေ့တွင် စတင်အာဏာသက်ရောက်မည်ဖြစ်ပြီး ၂၀၂၂ ခုနှစ်၌ စတင်ကျင့်သုံးခဲ့သည့် ညွှန်ကြားချက်ကို အစားထိုး ပြင်ဆင်ထားခြင်းဖြစ်ကြောင်းသိရှိရပါသည်။

ဗီယက်နမ် SPS ရုံး၏ ဒုတိယညွှန်ကြားရေးမှူး Dr. Ngô Xuân Nam က ၎င်းအမိန့်အမှတ် ၂၈၀ သည် တရုတ်နိုင်ငံသို့တင်ပို့မည့် စားသောက်ကုန်များအား ထုတ်လုပ်ခြင်း၊ အဆင့်ဆင့်ပြုပြင် ခြင်းနှင့် ကြာရှည်ခံအောင်ပြုလုပ်ခြင်း စသည်တို့ကို ဆောင်ရွက်သည့် လုပ်ငန်းရှင်များအပေါ် တိုက်ရိုက်သက်ရောက်မှုရှိမည်ဖြစ်ကြောင်း၊ လယ်ယာထွက်ကုန်များ၊ ပင်လယ်စာ၊ အသား၊ နို့၊ ကော်မှုန့်၊ အချိုရည်၊ အဖျော်ယမကာနှင့် အခြောက်ခံထားသည့် လယ်ယာထုတ်ကုန် စသည်တို့ကို ပြုပြင်ထုတ်လုပ်သော စက်ရုံများလည်းပါဝင်ကြောင်း၊ လုပ်ငန်းရှင်များသည် အထူးသဖြင့် လုပ်ငန်း တည်နေရာ၊ တရားဝင်ရပ်တည်မှု သို့မဟုတ် ပြည်တွင်းလိုင်စင်ရရှိမှု စသည့် အပြောင်းအလဲများရှိ ပါက GACC ၏ CIFER Portal တွင် မှတ်ပုံတင်ထားမှုကို ပြန်လည်စိစစ်သင့်ကြောင်း၊ ပြောင်းလဲမှု များသည် အစားအစာ ဘေးအန္တရာယ်ကင်းရှင်းမှုစနစ်ကို သက်ရောက်မှုရှိလျှင် စည်းမျဉ်းအသစ် များအရ မှတ်ပုံတင်ထားရှိမှုအား ချက်ချင်းရုပ်သိမ်းခြင်းခံရနိုင်ကြောင်း ပြောကြားခဲ့ပါသည်။

လုပ်ငန်းရှင်များအနေဖြင့် တရုတ်ဈေးကွက်သို့ ကြာရှည်ခံအောင်ပြုပြင်ထားသည့် ကုန်စည် များကိုတင်ပို့မည်ဆိုပါက ကုန်စည်ထားသိုမည့်နေရာများ၊ အအေးခန်းနေရာ သို့မဟုတ် ပြည်ပတွင် ယာယီသိုလှောင်ထားသည့်နေရာ အစရှိသဖြင့် မှတ်ပုံတင်လျှောက်ထားရာတွင် လိုအပ်သည့် အချက်အလက်များကို အမိန့်အမှတ် ၂၈၀ တွင် ရှင်းလင်းစွာဖော်ပြထားကြောင်း၊ အမိန့်အမှတ် ၂၈၀ သည် ခြေလှမ်းသစ်တစ်ခုဖြစ်ပြီး အတားအဆီးတစ်ခုမဟုတ်ကြောင်း၊ ဗီယက်နမ်သည် ထိရောက်၍ ပွင့်လင်းမြင်သာမှုရှိသော အစားအစာဘေးအန္တရာယ်ကင်းရှင်းရေး ထိန်းချုပ်မှုစနစ်ကို ထိန်းသိမ်းထားရှိလျက် ကနဦးကြိုတင်သတိပေးချက်စနစ်ကို ဆောင်ရွက်မည်ဆိုပါက ဆုံးရှုံးမှု ဖြစ် နိုင်ခြေကို နိမ့်ကျသည့်အဆင့်အထိ အကဲဖြတ်ဆန်းစစ်နိုင်လိမ့်မည်ဖြစ်ပြီး ဗီယက်နမ်လုပ်ငန်းရှင် များ အနေဖြင့် ဦးစားပေးအုပ်စုအဆင့်၌ ရပ်တည်နိုင်လိမ့်မည်ဖြစ်ကြောင်း သိရှိရပါသည်။

အမိန့်အမှတ် ၂၈၀ မှ အခွင့်အလမ်းများကို ရယူနိုင်ရေးအတွက် စီမံခန့်ခွဲရေး အေဂျင်စီများ အနေဖြင့် တရုတ်နိုင်ငံနှင့် အခြားသော ကုန်သွယ်ဘက်နိုင်ငံများက ဗီယက်နမ်၏ စီမံခန့်ခွဲမှု စွမ်းရည်နှင့် ပွင့်လင်းမြင်သာမှုတို့ကို အကဲဖြတ်ရာတွင် အရေးပါသည့် အခြေခံတစ်ခုဖြစ်သော ခြေရာခံမှုစနစ်များနှင့် အဆင့်ဆင့်ထုပ်ပိုးသည့် စက်ကိရိယာများ၊ ထုတ်လုပ်သည့်နေရာ၊ စိုက်ပျိုး သည့်နေရာ စသည်တို့နှင့်စပ်လျဉ်း၍ အချက်အလက်များ ကိုက်ညှိခြင်းကို ဆက်လက်လုပ်ဆောင် ရန် Dr. Nam က အကြံပြုထားကြောင်းသိရှိရပါသည်။

Source : Vietnam News, Oct 25, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

တောင်ကိုရီးယားနိုင်ငံ၏ ထုတ်လုပ်သူဈေးနှုန်းများ စက်တင်ဘာလတွင် ပြန်လည်မြင့်တက်

ပြည်ပကုန်သွယ်မှုသတင်းများ

တောင်ကိုရီးယားနိုင်ငံ၏ ကုန်ပစ္စည်းနှင့် ဝန်ဆောင်မှု ဈေးနှုန်းများသည် နေအိမ်သုံး လျှပ်စစ်နှင့် စက်မှုလုပ်ငန်းသုံး သဘာဝဓာတ်ငွေ့နှုန်းထားများ တိုးမြှင့်လိုက်ခြင်းကြောင့် ပြန်လည်မြင့်တက် လာခဲ့ကြောင်း အောက်တိုဘာလ ၂၂ ရက်နေ့တွင် ထုတ်ပြန်သော ဗဟိုဘဏ်အချက်အလက်များအရ သိရှိရပါသည်။

ထုတ်လုပ်သူဈေးနှုန်းညွှန်းကိန်း (PPI) သည် ယခင်လက ၀.၁ ရာခိုင်နှုန်း ကျဆင်းခဲ့ပြီး နောက် စက်တင်ဘာလတွင် ယခင်လကထက် ၀.၄ ရာခိုင်နှုန်း မြင့်တက်လာခဲ့ကြောင်း ကိုရီယားဘဏ် (BOK) က ပြောကြားခဲ့ပါသည်။

စက်တင်ဘာလတွင် လျှပ်စစ်၊ သဘာဝဓာတ်ငွေ့နှင့် ပိုက်လိုင်းရေတို့၏ ဈေးနှုန်းသည် ဩဂုတ်လတွင် မပြောင်းလဲဘဲ လစဉ်အခြေခံဖြင့် ၁.၁ ရာခိုင်နှုန်း တက်လာခဲ့ပါသည်။ ဈေးနှုန်းတက်လာရခြင်းမှာ နေအိမ်သုံးလျှပ်စစ် ၁၄.၄ ရာခိုင်နှုန်း နှင့် စက်မှုလုပ်ငန်းသုံး ဓာတ်ငွေ့ခ ၅.၈ ရာခိုင်နှုန်း တက်လာခြင်းကြောင့် ဖြစ်ပါသည်။

ကုန်ပစ္စည်းပေးသွင်းသူများအကြား စိုက်ပျိုးရေး၊ မွေးမြူရေးနှင့် ငါးလုပ်ငန်းထွက်ကုန်များ ၏ ဈေးနှုန်းသည် ပြီးခဲ့သည့်လက ၀.၄ ရာခိုင်နှုန်း တက်လာခဲ့ပြီး ယခင်လက ၃.၄ ရာခိုင်နှုန်း တိုးတက် လာခြင်းထက် နှေးကွေးခဲ့ပါသည်။

စက်မှုလုပ်ငန်းထွက်ကုန်များဖြစ်သည့် ရေနံထွက်ကုန်များအပါအဝင် ထုတ်လုပ်သူဈေးနှုန်းသည် ဩဂုတ်လတွင် မပြောင်းလဲဘဲ စက်တင်ဘာလတွင် ယခင်လနှင့် နှိုင်းယှဉ်ပါက ၀.၂ ရာခိုင်နှုန်း တက်လာခဲ့ပါသည်။

DOCA (ရန်ကုန်)

ဆန်ကုန်သွယ်မှု ပူးပေါင်းဆောင်ရွက်ရေး စင်ကာပူနှင့် ထိုင်းဆွေးနွေး

ပြည်ပကုန်သွယ်မှုသတင်းများ

ထိုင်းစီးပွားရေးနှင့်ကူးသန်းရောင်းဝယ်ရေးဝန်ကြီး Suphajee Suthumpun သည် ထိုင်း-စင်ကာပူ ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်ခြင်းတို့ မြှင့်တင်ရန် စီစဉ်လျက်ရှိရာ အထူးသဖြင့် ဆန်တင်ပို့မှုနှင့်ပတ်သက်၍ ပူးပေါင်းဆောင်ရွက်မှုကို အလေးထား ဆောင်ရွက်သွား မည်ဖြစ်သည်။

အဆိုပါကိစ္စကို အောက်တိုဘာလ ၂၂ ရက်နေ့တွင် ဗီဒီယိုကွန်ဖရင့်မှတစ်ဆင့် စင်ကာပူ ကုန် သွယ်ရေးနှင့် စက်မှုဝန်ကြီး Gan Kim Yongနှင့် ဆွေးနွေးခဲ့ပြီး ကုန်သွယ်ရေး၊ ရင်းနှီးမြှုပ်နှံမှုနှင့် ဒေသတွင်းဒီဂျစ်တယ်စီးပွားရေး ချဲ့ထွင်ရေးဆိုင်ရာ အကြောင်းအရာများကို ဆွေးနွေးခဲ့ကြောင်း၊ ဆန်ကုန်သွယ်ရေးသဘောတူညီချက် တစ်ရပ်ကိုလည်း ချုပ်ဆိုခဲ့ကြောင်း Ms Suphajee က ပြော ကြားခဲ့သည်။

Ms Suphajee က ဒေသတွင်း ဒီဂျစ်တယ်စီးပွားရေးကို အထောက်အပံ့ပြုမည့် အာဆီယံ ဒီဂျစ်တယ်စီးပွားရေး မူဘောင်သဘောတူညီချက် (DEFA) ကိုလည်း ချုပ်ဆိုရန် ကြိုးပမ်းလျက်ရှိ ကြောင်း၊ စင်ကာပူနှင့် ပူးပေါင်းဆောင်ရွက်မှုကို မြှင့်တင်ရန် ထိုင်းနိုင်ငံဘက်မှ အသင့်ရှိနေသည် ကို အလေးပေးဖော်ပြရန်အတွက်လည်း ယခုအစည်းအဝေးကို ကျင်းပခြင်းဖြစ်ကြောင်း ပြောကြား ခဲ့သည်။

ထိုင်းနိုင်ငံသည် စင်ကာပူ၏ လိုအပ်ချက်များကိုသာမက ကမ္ဘာတစ်ဝန်းရှိ အခြားစျေးကွက် များသို့ပါ ချဲ့ထွင်နိုင်သည့် အရည်အသွေးမြင့် စိုက်ပျိုးရေးထွက်ကုန်များ တင်ပို့ရန် အလားအလာ ရှိ ကြောင်း၊ ထိုင်းနိုင်ငံနှင့် စင်ကာပူနိုင်ငံတို့သည် ထိုင်းနိုင်ငံ၏ ဆန်တင်ပို့ရေးနှင့် အဆိုပါ နှစ်နိုင်ငံလုံး ၏ အစားအစာဖူလုံရေးတို့အတွက် အဓိကခြေလှမ်းတစ်ရပ်ဖြစ်သည့် ဆန်ကုန်သွယ်ရေး သဘော တူညီချက်ကို ချုပ်ဆိုပြီးဖြစ်ကြောင်း၊ အဆိုပါသဘောတူညီချက်၏ သိသာထင်ရှားသော ရလဒ်များ ကို လာမည့်လအတွင်း မြင်တွေ့ရမည်ဖြစ်ကြောင်း၊ ထိုင်းနိုင်ငံသည် DEFA နှင့်ပတ်သက်၍ ညှိ နှိုင်းရေး ဆွေးနွေးပွဲ၏ ဥက္ကဋ္ဌအဖြစ် အဆိုပါမူဘောင်အား အကောင်အထည်ဖော်ရာတွင် စင်ကာပူ ၏ ကူညီပံ့ပိုးမှုကို တောင်းခံခဲ့ကြောင်း Ms Suphajee က ပြောကြားခဲ့သည်။

DEFA သည် ယခုနှစ်အတွက် အာဆီယံ၏ အဓိကစီးပွားရေးအစီအစဉ်များအနက် တစ်ခုဖြစ် ကြောင်း၊ အဆိုပါသဘောတူညီချက်သည် အာဆီယံအတွင်း ဒီဂျစ်တယ်ချိတ်ဆက်မှုများ ဖန်တီး ပေးပြီး နယ်စပ်ဖြတ်ကျော်ကုန်သွယ်မှုများနှင့် စာရွက်စာတမ်း အသုံးမပြုသော ကုန်သွယ်ခြင်းများ ကို အဆင်ပြေချောမွေ့စေမည်ဖြစ်ကြောင်း၊ ထို့အပြင် ထိုင်းနိုင်ငံနှင့် အာဆီယံ၏ ကုန်သွယ်မှု ယှဉ် ပြိုင်နိုင်စွမ်းကို မြှင့်တင်ပေးမည့်အပြင် စီးပွားရေးကဏ္ဍတွင် ဒီဂျစ်တယ်ကုန်သွယ်မှုဆီသို့ ရှေ့ဆက် နိုင်မည့် အထောက်အပံ့တစ်ခုဖြစ်ကြောင်း Ms Suphajee က မှတ်ချက်ပြုခဲ့သည်။

၂၀၂၄ ခုနှစ်တွင် ထိုင်း-စင်ကာပူ နှစ်နိုင်ငံကြား ကုန်သွယ်မှုတန်ဖိုးသည် အမေရိကန် ဒေါ်လာ ၁၇.၇ ဘီလီယံအထိ မြင့်တက်ခဲ့ကြောင်း၊ ထိုင်းနိုင်ငံသည် စင်ကာပူသို့ ဒေါ်လာ ၁၀.၃၆ ဘီလီယံတန်ဖိုးရှိသော ကုန်စည်များတင်ပို့ခဲ့ပြီး ဒေါ်လာ ၇.၄၀ ဘီလီယံတန်ဖိုးရှိသော ကုန်စည် များကို တင်သွင်းခဲ့သဖြင့် ကုန်သွယ်မှုပိုငွေ ဒေါ်လာ ၂.၉၇ ဘီလီယံ ရှိခဲ့ကြောင်း ထိုင်းစီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ပြောကြားခဲ့သည်။

၂၀၂၅ ခုနှစ် ပထမ ၈ လအတွင်း နှစ်နိုင်ငံကြား ကုန်သွယ်မှုတန်ဖိုးသည် ယခင်နှစ်ကထက် ၆.၂၅ ရာခိုင်နှုန်း တိုးတက်ခဲ့ပြီး ဒေါ်လာ ၁၂.၁၄ ဘီလီယံအထိ ရောက်ရှိခဲ့ကြောင်း ထိုင်း စီးပွားရေး နှင့်ကူးသန်းရောင်းဝယ်ရေးဝန်ကြီးဌာနက ပြောကြားခဲ့သည်။ ထို့အပြင် ထိုင်းနိုင်ငံ၏ တင်ပို့မှုသည် အမေရိကန်ဒေါ်လာ ၇.၂၁ ဘီလီယံအထိ ၁၂.၅၇ ရာခိုင်နှုန်း တိုးတက်ခဲ့ပြီး စင်ကာပူမှ တင်သွင်းမှု သည် ၁.၈၁ ရာခိုင်နှုန်း လျော့ကျကာ အမေရိကန်ဒေါ်လာ ၄.၉၂ ဘီလီယံသို့ ရောက်ရှိခဲ့ကြောင်း သိရှိရသည်။

Source: Bangkok Post, 24 Oct 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ဥဇဘက်ကစ္စတန်၏ နိုင်ငံခြားကုန်သွယ်မှု ပထမ ၉ လအတွင်း ၂၂.၉ ရာခိုနှုန်း မြင့်တက်

ပြည်ပကုန်သွယ်မှုသတင်းများ

ဥဇဘက်ကစ္စတန်၏ နိုင်ငံခြားကုန်သွယ်မှုသည် ၂၀၂၅ ခုနှစ် ဇန်နဝါရီ - စက်တင်ဘာလ အတွင်း ၂၂.၉ ရာခိုင်နှုန်း မြင့်တက်လာကြောင်း အမျိုးသားစာရင်းအင်းဌာနက အောက်တိုဘာလ ၂၁ ရက်နေ့တွင် ထုတ်ပြန်ခဲ့ပါသည်။

ကိုးလတာကာလအတွင်း ဥဇဘက်ကစ္စတန်၏ နိုင်ငံခြားကုန်သွယ်မှုသည် အမေရိကန် ဒေါ်လာ ၅၉.၈ ဘီလီယံ အထိ ရောက်ရှိခဲ့ပြီး ၂၀၂၄ ခုနှစ်အလားတူ ကာလနှင့် နှိုင်းယှဉ်ပါက အမေရိကန်ဒေါ်လာ ၁၁.၄ ဘီလီယံ သို့မဟုတ် ၂၂.၉ ရာခိုင်နှုန်း တိုးလာကြောင်း သိရှိရပါသည်။

တင်ပို့မှုသည် ဒေါ်လာ ၂၆.၆၈ ဘီလီယံ သို့‌ ရောက်ရှိခဲ့ပြီး တင်သွင်းမှု စုစုပေါင်းမှာ ဒေါ်လာ ၃၃.၁၁ ဘီလီယံ ရှိခဲ့ကြောင်း ပြောကြားခဲ့ပါသည်။

စက်တင်ဘာလတွင် ဥဇဘက် သမ္မတ Shavkat Mirziyoyev က ဥဇဘက်ကစ္စတန် နိုင်ငံသည် ၂၀၃၀ တွင် အလယ်အလတ်ဝင်ငွေရှိသော အထက်တန်းနိုင်ငံများ၏ အဆင့်တွင် ပါဝင်ရန် ရည်မှန်း ထားကြောင်း ပြောကြားခဲ့ပါသည်။

DOCA (ရန်ကုန်)

အမေရိကန်မှ သွင်းကုန်များအပေါ် အကောက်ခွန်နှုန်းထား ကမ္ဘောဒီးယား လျှော့ချ

ပြည်ပကုန်သွယ်မှုသတင်းများ

ကမ္ဘောဒီးယားထုတ်ကုန်များ တင်သွင်းမှုအပေါ်စည်းကြပ်မည့် အပြန်အလှန်အကောက်ခွန် ကို ၄၉ ရာခိုင်နှုန်းမှ ၁၉ ရာခိုင်နှုန်းသို့ အမေရိကန်အစိုးရက လျှော့ချပေးခြင်းမှ ရရှိလာမည့် အကျိုး အမြတ်နှင့် နှိုင်းယှဉ်ပါက အမေရိကန်၏ လယ်ယာစိုက်ပျိုးရေးနှင့် စက်မှုထုတ်ကုန်များ တင်သွင်းမှု အပေါ် အကောက်ခွန် ကင်းလွတ်ခွင့်ပြုရန် ကမ္ဘောဒီးယားအစိုးရ၏ ဆုံးဖြတ်ချက်သည် နိုင်ငံ အတွက် မည်သည့်ဆုံးရှုံးမှုမျှ ဖြစ်ပေါ်စေလိမ့်မည်မဟုတ်ဟု စီးပွားရေးပညာရှင်များက ယုံကြည် ကြကြောင်း Phnom Penh Post သတင်းဌာနက ဖော်ပြပါသည်။

အမေရိကန်သမ္မတအိမ်ဖြူတော်မှ အောက်တိုဘာ ၂၆ ရက်နေ့၌ သတင်းထုတ်ပြန်ရာတွင် အမေရိကန်နှင့် ကမ္ဘောဒီးယား နှစ်နိုင်ငံအကြား ကုန်သွယ်မှု သဘောတူညီချက် ရေးထိုးနိုင်ခြင်းက အမေရိကန် ပို့ကုန်လုပ်ငန်းရှင်များအတွက် မျှော်မှန်းမထားခဲ့သော ကမ္ဘောဒီးယားဈေးကွက်သို့ ဝင် ရောက်ခွင့် ရရှိစေမည်ဖြစ်ကြောင်း၊ စားသောက်ကုန်၊ လယ်ယာထွက်ကုန်နှင့် စက်မှုထုတ်ကုန်များ အပါအဝင် အမေရိကန်ထုတ်ကုန်များအပေါ် ချမှတ်ထားသည့် အကောက်ခွန်နှုန်းထား အားလုံးကို ကမ္ဘောဒီးယားဘက်မှ ဖယ်ရှားပေးရန် သဘောတူခဲ့သဖြင့် အမေရိကန်ပို့ကုန်များသည် ယင်း ဈေးကွက်သို့ ဝင်ရောက်ရာ၌ မည်သည့်အကောက်ခွန်ကိုမျှ ကြုံတွေ့ရမည် မဟုတ်ကြောင်း၊ အခြား သော ကုန်သွယ်ဘက်များနှင့် နှိုင်းစာလျှင် အမေရိကန်၏ သွင်းကုန်များသည် ယှဉ်ပြိုင်နိုင်စွမ်းအရ အားနည်းချက်ရှိမည် မဟုတ်ကြောင်း ပြောဆိုခဲ့သည်။

ပို့ကုန်များအပေါ် အခြားသော ထပ်ဆောင်း စမ်းသပ်စစ်ဆေးရန် လိုအပ်ချက်များကြောင့် ဝန်ထုပ်ဝန်ပိုးဖြစ်ပေါ်ခြင်း မရှိစေရေး အမေရိကန်အာဏာပိုင်များ၏ လိုလားချက်ကို အသိအမှတ် ပြုခြင်း အပါအဝင် အမေရိကန်ပို့ကုန်များအပေါ် သင့်တင့်မျှတစွာ ပြုမူဆောင်ရွက်မည်ဟု ကမ္ဘော ဒီးယားဘက်မှ ကတိပြုထားသည်။

ကမ္ဘောဒီးယား အထွေထွေ အကောက်ခွန်နှင့်အထူးအခွန်များ ဦးစီးဌာန၏ အချက်အလက် များအရ တရုတ်နိုင်ငံ၏နောက်၌ အမေရိကန်သည် ကမ္ဘောဒီးယား၏ ဒုတိယအကြီးဆုံး ကုန်သွယ် ဖက်နိုင်ငံဖြစ်ကြောင်း၊ ယခုနှစ် ပထမကိုးလအတွင်း ၎င်းတို့ နှစ်နိုင်ငံအကြား ကုန်သွယ်မှုတန်ဖိုး သည် ဒေါ်လာ ၉.၅၇ ဘီလီယံရှိပြီး ၂၀၂၄ ခုနှစ် အလားတူကာလကထက် ၂၂.၆ ရာခိုင်နှုန်း တိုး တက်လာခဲ့ကြောင်း၊ အမေရိကန်သို့ ပို့ကုန်တန်ဖိုးသည် ဒေါ်လာ ၉ ဘီလီယံရှိပြီး ၂၂ ရာခိုင်နှုန်း တိုးတက်လျက် အမေရိကန်ထံမှ သွင်းကုန်တန်ဖိုးမှာ ဒေါ်လာ ၂၈၃.၆၃ သန်းဖြင့် ၄၆.၉ ရာခိုင်နှုန်း တိုးတက်မှု ရရှိခဲ့ခြင်းဖြစ်ကြောင်း သိရှိရသည်။

နှစ်နိုင်ငံ ပူးပေါင်းဆောင်ရွက်မှု အားကောင်းစေရန်နှင့် ပြည်တွင်းသို့ အမေရိကန် ကုန်စည် များ စီးဆင်းဝင်ရောက်မှုကို တိုးမြှင့်ရန် ရည်ရွယ်လျက် အစိုးရသည် သွင်းကုန်အခွန်ကို ဖယ်ရှားခဲ့ ခြင်းဖြစ်ကြောင်း၊ ၎င်းမူဝါဒသည် နိုင်ငံတော်အခွန်ဘဏ္ဍာရရှိမှုအပေါ် သက်ရောက်မှု အနည်းငယ် မျှသာ ရှိမည်ဖြစ်ကြောင်း၊ အမေရိကန်သို့ တင်ပို့သည့်ကုန်ပမာဏနှင့် နှိုင်းယှဉ်ပါက သွင်းကုန်မှာ နည်းပါးနေဆဲဖြစ်ကြောင်း၊ အမေရိကန်ဘက်မှ အပြန်အလှန် အကောက်ခွန်နှုန်းကို ၁၉ ရာခိုင်နှုန်း သို့ လျှော့ချပေးခြင်းက ကမ္ဘောဒီးယား အနေဖြင့် အပြုသဘောဆောင်သည့် အကျိုးရလဒ်များ ဆက်လက်ရရှိလိမ့်မည်ဖြစ်ကြောင်း၊ အခွန်လျှော့ချမှုသည် ကမ္ဘောဒီးယားပြည်တွင်း၌ အမေရိကန် ထုတ်ကုန်များအား ပိုမိုသုံးစွဲရန်လည်း တွန်းအားပေးမည်ဖြစ်ကြောင်း စီးပွားရေးပညာရှင် Lor Vichet က အောက်တိုဘာ ၂၇ ရက်နေ့တွင် ပြောကြားခဲ့သည်။

ယခုနှစ် ဧပြီလ၌ သွင်းကုန်များအပေါ် အပြန်အလှန်အကောက်ခွန် စည်းကြပ်မည် မူဝါဒကို ကျင့်သုံးမည်ဟု သမ္မတဒေါ်နယ်ထရမ့် ဦးဆောင်သော အမေရိကန်အစိုးရက ကြေညာချက် ထုတ် ပြန်ခဲ့ချိန်၌ ကမ္ဘောဒီးယားအပေါ် ချမှတ်သည့် အကောက်ခွန်နှုန်းမှာ ၄၉ ရာခိုင်နှုန်းရှိပြီး နောက်ပိုင်း ကာလတွင် စေ့စပ်ညှိနှိုင်းမှုများအရ ဩဂုတ်လဆန်း၌ ၃၆ ရာခိုင်နှုန်းသို့ လျှော့ချခဲ့သည်။ ယခုအခါ ၁၉ ရာခိုင်နှုန်းသို့ ထပ်မံလျှော့ချပေးခဲ့သဖြင့် အမေရိကန်ဈေးကွက်သို့ ကမ္ဘောဒီးယားပို့ကုန်များ ဝင်ရောက်ရာတွင် ဆက်လက်ယှဉ်ပြိုင်နိုင်စွမ်းရရှိနေဦးမည်ဟု Phnom Penh Post သတင်းဌာန က ဖော်ပြထားသည်။

Source: Phnom Penh Post, 27 October 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ဂျပန်နိုင်ငံ၏ အမေရိကန်သို့တင်ပို့မှုများ အခွန်အခများကြောင့်ကျဆင်း

ပြည်ပကုန်သွယ်မှုသတင်းများ

၂၀၂၅ ဘဏ္ဍာရေးနှစ်၏ ပထမနှစ်ဝက်တွင် အမေရိကန်၏ အခွန်အခများကြောင့် ကားတင်းပို့မှုများ ထိခိုက်ခဲ့သည့်အတွက် ဂျပန်နိုင်ငံ၏ အမေရိကန်နိုင်ငံသို့ တင်ပို့မှုများ သိသိသာသာ ကျဆင်းခဲ့ကြောင်း အစိုးရအချက်အလက်များက အောက်တိုဘာလ ၂၂ ရက်နေ့တွင် ကျဆင်းခဲ့ပါသည်။

ဘဏ္ဍာရေးဝန်ကြီးဌာန၏ အချက်အလက်များအရ ဧပြီလနှင့် စက်တင်ဘာလကြားတွင် အမေရိကန်သို့တင်ပို့မှုသည် ယခင်နှစ်ကထက် ၁၀.၂ ရာခိုင်နှုန်း ကျဆင်းကာ ယန်း ၉.၇၁၁၅ ထရီလီယံ (အမေရိကန်ဒေါ်လာ ၆၄ ဘီလီယံခန့်) သို့ ရောက်ရှိခဲ့ပါသည်။

အဆိုပါကာလအတွင်း မော်တော်ကားတင်ပို့မှုသည် ၂၂.၇ ရာခိုင်နှုန်း ကျဆင်းကာ ယန်း ၂.၃၈၉၀ ထရီလီယံ သို့ ရောက်ရှိခဲ့ပါသည်။ ပို့ကုန်ပမာဏမှာ ၂.၄ ရာခိုင်နှုန်း ကျဆင်းပြီး ကားအစီးရေ ၆၆၂၉၁၄ စီး ရှိခဲ့ပါသည်။

၂၀၂၅ ခုနှစ် ဘဏ္ဍာရေးနှစ်၏ ပထမနှစ်ဝက်တွင် ဂျပန်၏ အမေရိကန်နှင့် ကုန်သွယ်မှု ပိုငွေသည် ၂၂.၆ ရာခိုင်နှုန်း ကျဆင်းပြီး ယန်း ၃၃၂၂၂ ထရီလီယံ ယန်းသို့ ‌ရောက်ရှိခဲ့ပါသည်။

ဂျပန်နိုင်ငံသည် ကမ္ဘာလုံးဆိုင်ရာတွင် ကုန်သွယ်မှုလိုငွေ ယန် ၁၂၂၃၈ ထရီလီယံ ရှိခဲ့ပါသည်။ စုစုပေါင်းတင်ပို့မှုသည် ၀.၂ ရာခိုင်နှုန်း တက်လာပြီး ယန်း ၅၃.၆၅၃၃ ထရီလီယံ သို့ရောက်ရှိခဲ့ ပါသည်။ အဓိကအားဖြင့် ရေနံစိမ်း၊ ကျောက်မီးသွေးနှင့် သဘာဝဓာတ်ငွေ့ရည် ဝယ်ယူမှုများ ကျဆင်းခြင်းကြောင့် တင်သွင်းမှုသည် ၃.၂ ရာခိုင်နှုန်း ကျဆင်းပြီး ယန်း ၅၄၈၇၇၁ ထရီလီယံ သို့ရောက်ရှိခဲ့ကြောင်း သိရှိရပါသည်။

DOCA (ရန်ကုန်)

ကမ္ဘောဒီးယားနှင့် ဘူလ်ဂေးရီးယား တို့သည် စီးပွားရေး ပူးပေါင်းဆောင်ရွက်မှုနှင့် အခွင့်အလမ်းအသစ်များကိုရှာဖွေ

ပြည်ပကုန်သွယ်မှုသတင်းများ

ကမ္ဘောဒီးယား ဒုတိယဝန်ကြီးချုပ် Sun chanthol သည် ထင်ရှားသော ဘူလ်ဂေးရီးယား စီးပွားရေးခေါင်းဆောင် တစ်ဦးဖြစ်ပြီး ဆွစ်ဇာလန်နိုင်ငံ ဒါဗို့စ်အခြေစိုက် ကမ္ဘာ့ဆက်သွယ်ရေး ဖိုရမ် ၏ ဥက္ကဌဖြစ်သူ ‌ဒေါက်တာ Maxim Behar နှင့် အောက်တိုဘာလ ၂၁ ရက်နေ့က တွေ့ဆုံခဲ့ပြီး နှစ်နိုင်ငံ အကြား စီးပွားရေး ပူးပေါင်းဆောင်ရွက်မှုနှင့် ရင်းနှီးမြှုပ်နှံမှု တိုးမြှင့်ရေးကို ဆွေးနွေးခဲ့ပါသည်။

‌ ဒေါက်တာ Maxim Behar သည် နိုင်ငံခြားတိုက်ရိုက်ရင်းနှီးမြှုပ်နှံမှုကို ဆွဲဆောင်နိုင်ရန် ကြိုးပမ်းအားထုတ်မှုများအတွက် ကမ္ဘောဒီးယား တော်ဝင်အစိုးရကို ချီးကျူးဂုဏ်ပြုခဲ့ပါသည်။ ၎င်း၏ ခရီးစဉ်အပြီးတွင် လေ့လာတွေ့ရှိခဲ့သော အပြုသဘောဆောင်သည့် ရင်းနှီးမြှုပ်နှံမှု အလားအလာ များကို ကမ္ဘောဒီးယားဝန်ကြီးချုပ်ထံသို့ တိုက်ရိုက်တင်ပြပေးမည်ဖြစ်ကြောင်း ပြောကြားခဲ့ပါသည်။

CDC ၏ ပထမဆုံး ဒုတိယဥက္ကဌ အဖြစ်လည်း တာဝန်ထမ်းဆောင်နေသည့် ဒုတိယ ဝန်ကြီးချုပ် Sun chanthol က နိုင်ငံခြားရင်းနှီးမြှုပ်နှံမှုများကို ဆွဲဆောင်ရန် စီးပွးရေးကို ကဏ္ဍစုံအောင် လုပ်ဆောင်ရန်နှင့် ပုဂ္ဂလိက ကဏ္ဍတိုးတက်မှုကို မြှင့်တင်ရန် ရည်ရွယ်သည့် အဓိက ကျသော ကမ္ဘောဒီးယား မူဝါဒဆိုင်ရာ အစီအစဉ်များကို ဖော်ပြခဲ့ပါသည်။

ဆွေးနွေးမှုများသည် ကမ္ဘောဒီးယားနှင့် ဘူလ်ဂေးရီးယား တို့၏ အပြန်အလှန်အကျိုးစီးပွား အတွက် အထူးသဖြင့် ကုန်သွယ်ရေးနှင့် ရင်းနှီးမြှုပ်နှံမှု ကဏ္ဍတွင် ပိုမိုခိုင်မာသော အနာဂတ်ပူးပေါင်း ဆောင်ရွက်မှုများဆီသို့ ဦးတည်သွားမည်ဟု ယုံကြည်ကြောင်း ပြောကြားခဲ့ ပါသည်။

DOCA (ရန်ကုန်)

Languages

Main menu

ပြည်ပကုန်သွယ်မှုသတင်းများ

နိုင်ငံပိုင်လုပ်ငန်းများအတွက် ဘတ် ၁.၆ ထရီလီယံ ရင်းနှီးမြှုပ်နှံမှုဘတ်ဂျက်ကို ထိုင်းကက်ဘိနက်ခွင့်ပြု

ရေထွက်ကုန်အရည်အသွေးမြှင့်တင်ရန် သိပ္ပံနှင့်နည်းပညာတွင် ရင်းနှီးမြှပ်နှံသည့် မဲခေါင်ဒယ်တာ

အကောက်ခွန်နှုန်းနိမ့်ကျမှုက အမေရိကန်ဈေးကွက်၌ မလေးရှားစားအုန်းဆီ၏ယှဉ်ပြိုင်နိုင်စွမ်းကို တိုးတက်စေ

လယ်ယာထွက်ကုန် အမျိုးအစား ၃၉၀၀ ကျော် တရုတ်ဈေးကွက်သို့ တင်ပို့ရန် အတည်ပြုချက် ဗီယက်နမ်ရရှိထား

တောင်ကိုရီးယားနိုင်ငံ၏ ထုတ်လုပ်သူဈေးနှုန်းများ စက်တင်ဘာလတွင် ပြန်လည်မြင့်တက်

ဆန်ကုန်သွယ်မှု ပူးပေါင်းဆောင်ရွက်ရေး စင်ကာပူနှင့် ထိုင်းဆွေးနွေး

ဥဇဘက်ကစ္စတန်၏ နိုင်ငံခြားကုန်သွယ်မှု ပထမ ၉ လအတွင်း ၂၂.၉ ရာခိုနှုန်း မြင့်တက်

အမေရိကန်မှ သွင်းကုန်များအပေါ် အကောက်ခွန်နှုန်းထား ကမ္ဘောဒီးယား လျှော့ချ

ဂျပန်နိုင်ငံ၏ အမေရိကန်သို့တင်ပို့မှုများ အခွန်အခများကြောင့်ကျဆင်း

Pages

You are here

ပြည်ပကုန်သွယ်မှုသတင်းများ

Pages