ပြည်ပကုန်သွယ်မှုသတင်းများ

               အီကွေဒေါသည် ဟောင်ကောင်သို့ ဘလူးဘယ်ရီသီးများအား ၂၀၂၄ ခုနှစ်၊ အောက်တိုဘာလ ၂၅ ရက်နေ့မှစတင်၍ တင်ပို့ခဲ့သည်။ အီကွေဒေါနိုင်ငံမှ ဟောင်ကောင်သို့ ဘလူးဘယ်ရီသီးများအား တစ်ပတ်လျှင် ၁၅၀၀ ကီလိုဂရမ်တင်ပို့မည်ဖြစ်ပြီး ရာသီကုန်လာသည်နှင့်အမျှ ထုထည်အားဖြင့် နှစ်ဆ တိုးမြှင့်တင်ပို့သွားမည်ဖြစ်ကြောင်းသိရသည်။ ထိုဘလူးဘယ်ရီသီးများသည် အီကွေဒေါနိုင်ငံမှ တင်ပို့ သော အဝါရောင် နဂါးမောက်သီး၊ သလဲသီးတို့နှင့်အတူ နိုင်ငံတကာ ဈေးကွက်သို့ စတင်ဝင်ရောက် လာခဲ့သည်။ Nobis Fruit ကုမ္ပဏီသည် ဟောင်ကောင်တွင် AtlasBlue ဘလူးဘယ်ရီသီးမျိုးစိတ်များကို မိတ်ဆက်ရာတွင် ဦးဆောင် ဆောင်ရွက်ခဲ့သည်။ Nobis Fruit ကုမ္ပဏီသည် ဟောင်ကောင်ဈေးကွက်၏ မြင့်မားသော အရည်အသွေးစံချိန်စံညွှန်းများနှင့် ကိုက်ညီစေရန် အရွယ်အစားအလိုက် အသီးရွေးချယ်မှု ကို ပိုမိုကောင်းမွန်အောင် ပြုလုပ်ပေးသော စက်များထားရှိအသုံးပြုခြင်းနှင့် ပေးပို့ထားသော ဘလူး ဘယ်ရီသီးများအား လိုအပ်သော Brix အဆင့်ရှိရန် အာမခံခြင်းကဲ့သို့သော ကိစ္စရပ်များတွင် ရင်းနှီးမြှုပ်နှံမှုများပြုလုပ်ထားကြောင်းသိရသည်။ ဟောင်ကောင်သို့ ဘလူးဘယ်ရီသီးများ တင်ပို့ခြင်း သည် အရည်အသွေးနှင့် ဆန်းသစ်တီထွင်မှုများတိုး တက်လာစေရန်အတွက် အီကွေဒေါနိုင်ငံ၏ ကတိကဝတ်ကို ထပ်လောင်းအတည်ပြုသည့် ခြေလှမ်းကောင်းတစ်ရပ်ပင်ဖြစ်သည်။ Nobis Fruit ကုမ္ပဏီသည် ၂၀၂၄-၂၀၂၅ အတွင်း အမေရိကန်၊ စင်္ကာပူ၊ မလေးရှား၊ တူရကီ၊ စပိန်နှင့် နယ်သာလန် တို့ကဲ့သို့သော အဓိကဈေးကွက်များသို့ ၎င်း၏ ဘလူးဘယ်ရီသီးတင်ပို့မှု ပမာဏကို တိုးမြှင့်ရန် စီစဉ် လျက်ရှိကြောင်းသိရသည်။

DOCA(ရန်ကုန်)

Source : Freshplaza  

အိန္ဒိယသည် အဓိကပို့ကုန်ခွန်ကိုဖျက်သိမ်းကာ စျေးကွက်တွင် ထောက်ပံ့မှုလွန်ကဲလာမည်ကို စိုးရိမ်မှုများမြင့်တက်လာပြီးနောက် ထိပ်တန်းဆန်တင်ပို့သူနှင့် ဗီယက်နမ်နိုင်ငံတို့၏ နှုန်းထားများကို တစ်နှစ်ကျော်အတွင်း အနိမ့်ဆုံးအဆင့်သို့တွန်းပို့ခဲ့ပြီး ယခုသီတင်းပတ်အတွင်း အာရှ၏ အဓိကအချက်အချာနေရာများတွင် ဆန်တင်ပို့မှုနှုန်းကျဆင်းသွားခဲ့ကြောင်းသိရသည်။ အိန္ဒိယသည် ပို့ကုန်ခွန်မြှင့်တင်ရန် အင်္ဂါနေ့နှောင်းပိုင်းတွင် ဆန်ဖြူအပေါ် ပို့ကုန်ခွန်ကိုဖယ်ရှားခဲ့ပြီး ဘာစမာတီမဟုတ်သော ဆန်ဖြူတင်ပို့မှုအတွက် ကြမ်းခင်းဈေး တစ်တန် ကန်ဒေါ်လာ၄၉၀ကိုဖယ်ရှားခဲ့သည်။ အိန္ဒိယ၏ ဆန်ဖြူဆန်ကွဲ ၅ရာခိုင်နှုန်းကို ယခုသီတင်းပတ်တွင် တစ်တန်လျှင် ကန်ဒေါ်လာ၄၅၀မှ ၄၈၄ဒေါ်လာဖြင့် ဈေးဖွင့်ခဲ့ပြီး ၂၀၂၃ခုနှစ်၊ သြဂုတ်လနောက်ပိုင်း အနိမ့်ဆုံးဖြစ်သည်။ အိန္ဒိယဆန်ကွဲ ၅ရာခိုင်နှုန်းမှာ တစ်တန်လျှင် ကန်ဒေါ်လာ၄၆၀မှ ၄၉၀ဒေါ်လာအထိရှိသည်။ “အစိုးရက ပို့ကုန်ခွန်နဲ့ အနိမ့်ဆုံးပို့ကုန်ဈေးနှုန်းကိုဖယ်ရှားပြီးနောက် အိန္ဒိယဈေးတွေ သိသိသာသာကျဆင်းသွားတယ်။ ဒီတစ်ပတ်တော့ ဝယ်လိုအားကောင်းနေတယ်” ဟု ကာလကတ္တားအခြေစိုက် ပို့ကုန်လုပ်ငန်းရှင်တစ်ဦးကပြောသည်။ ဗီယက်နမ်၏ ဆန်ကွဲ ၅ရာခိုင်နှုန်းကို ကြာသပတေးနေ့တွင် မက်ထရစ်တစ်တန်လျှင် ၅၃၂ဒေါ်လာဖြင့်ကမ်းလှမ်းခဲ့ပြီး လွန်ခဲ့သည့်တစ်ပတ်က ၅၃၇ဒေါ်လာမှ ကျဆင်းခဲ့ကြောင်း ဗီယက်နမ်စားနပ်ရိက္ခာအသင်းမှသိရသည်။ ဤအပတ်စျေးနှုန်းများသည် ၂၀၂၃ခုနှစ်၊ ဇူလိုင်လကတည်းက ၎င်းတို့၏ စပါးဈေးနှုန်း အနိမ့်ဆုံးဈေးသို့ကျဆင်းခဲ့ခြင်းဖြစ်သည်။ “အခြားတင်ပို့တဲ့နိုင်ငံတွေက အပြိုင်အဆိုင်ဈေးတွေကြောင့် ဗီယက်နမ်ဆန်ဈေးတွေ သက်သာသွားတယ်” ဟု ဟိုချီမင်းမြို့အခြေစိုက် ကုန်သည်တစ်ဦးကပြောသည်။ အိန္ဒိယဆန်ဖြူဈေးသည် ၁နှစ်အတွင်း အနိမ့်ဆုံးအနီးတွင်ရှိနေပြီး ထိုင်းဝယ်လိုအားတည်ငြိမ်မှုနှင့်အတူ ထိုင်းအတိုးနှုန်းမြင့်တက်ခဲ့သည်။ “ဆန်ဝယ်ယူရေး လေလံဆွဲမှုကိုဖျက်သိမ်းရန် ဗုဒ္ဓဟူးနေ့တွင် အင်ဒိုနီးရှား၏ Bulog ၏ဆုံးဖြတ်ချက်သည် ဈေးနှုန်းများအပေါ် ဆိုးရွားသော သက်ရောက်မှုများကျန်ရစ်စေခဲ့သည်” ဟု ကုန်သည်က ထပ်လောင်းပြောကြားခဲ့သည်။ အိန္ဒိယ၏ တင်ပို့မှုဆုံးဖြတ်ချက်ကြောင့် ထိုင်းနိုင်ငံ၏ ဆန်ကွဲ ၅ရာခိုင်နှုန်းသည် ပြီးခဲ့သည့်သီတင်းပတ်က တစ်တန်လျှင် ကန်ဒေါ်လာ၅၂၀မှ ဒေါ်လာ၅၁၀သို့ကျဆင်းခဲ့သည်။ ဝယ်လိုအားတည်ငြိမ်နေပြီး ပို့ကုန်လုပ်ငန်းရှင်များသည် အပတ်စဉ် ကုန်စည်စီးဆင်းမှုများရှိနေကြောင်း ဘန်ကောက်အခြေစိုက် ကုန်သည်တစ်ဦးကပြောသည်။ တစ်ချိန်တည်းတွင် ဘင်္ဂလားဒေ့ရှ်သည် သီးနှံတန်ချိန် ၁ဒသမ ၁သန်းနီးပါးပျက်စီးခဲ့သည့် ရေကြီးရေလျှံမှုများကြောင့် ဆန်တင်သွင်းခွန် ၃၇ရာခိုင်နှုန်းလျှော့ချခဲ့သည်။ ဆန်အကောက်ခွန်ကို ၂၅ရာခိုင်နှုန်းမှ ၁၅ရာခိုင်နှုန်းအထိလျှော့ချခဲ့ပြီး စည်းကြပ်ခွန် ၂၅ရာခိုင်နှုန်းမှ ၅ရာခိုင်နှုန်းသို့လျှော့ချလိုက်ကြောင်း ဘဏ္ဍာရေးဝန်ကြီးဌာန၏ ယခုသီတင်းပတ်အစောပိုင်းက ထုတ်ပြန်ချက်အရသိရသည်။ ထို့ပြင် မြန်မာနိုင်ငံသည်လည်း လက်ရှိ ဆန်တင်သွင်းမှုအပေါ် ကြိုတင်ခွန် ၅ရာခိုင်နှုန်းရုပ်သိမ်းခဲ့သည်။
Sources –reuters
DOCA(မန္တလေး)

ယူကေဘဏ္ဍာရေးဝန်ကြီး Reeves က တရုတ်ကုန်သွယ်မှုကိုမြှင့်တင်ရန် နီးကပ်သော ချဉ်းကပ်မှုလိုအပ်ကြောင်းကို ဝါရှင်တန်တွင်ပြုလုပ်သော အပြည်ပြည်ဆိုင်ရာငွေကြေးရန်ပုံငွေအဖွဲ့နှင့် ကမ္ဘာ့ဘဏ်၏ နှစ်စဉ်အစည်းအဝေးတွင် ပြောကြားခဲ့ကြောင်း reuters သတင်းတစ်ရပ်ကဖော်ပြသည်။ ဝါရှင်တန်၌ ပြုလုပ်သော ရန်ပုံငွေနှင့် ကမ္ဘာ့ဘဏ် နှစ်ပတ်လည်အစည်းအဝေးများတွင် အမေရိကန်သည် ပေကျင်း၏ စီးပွားရေးနှင့် ကုန်သွယ်မှုများအား တင်းတင်းကြပ်ကြပ်ကိုင်တွယ်သည့်အချိန်မှစ၍ တရုတ်နိုင်ငံသို့ ပို့ကုန်များမြှင့်တင်နိုင်ခဲ့ကြောင်း ၄င်းက ဆက်လက်ပြောကြားခဲ့သည်။
Reeves သည် ၂၀၂၅ခုနှစ်အစောပိုင်းတွင် ပေကျင်းသို့သွားရောက်ရန် စဉ်းစားနေပြီး ၂၀၁၉ခုနှစ်တွင် ပြုလုပ်ခဲ့သော တရုတ်နှင့် အဆင့်မြင့်အစည်းအဝေးများကို ပြန်လည်အသက်သွင်းရန် ဗြိတိန်ဘဏ္ဍာရေးဝန်ကြီးဌာနကလုပ်ဆောင်နေပြီး တရုတ်အစိုးရသည် ပိုမိုနီးကပ်သော တွေ့ဆုံဆွေးနွေးမှုများကိုလည်းပံ့ပိုးပေးထားကြောင်း တရုတ်အစိုးရမီဒီယာကဖော်ပြခဲ့သည်။ အမေရိကန်နှင့် ဥရောပသမဂ္ဂတို့ကဲ့သို့ပင်၊ ဗြိတိန်သည် တရုတ်လုပ် လျှပ်စစ်ကားများအပေါ် အခွန်စည်းကြပ်ရန် အစီအစဉ်မရှိကြောင်း ယင်းကပြောကြားခဲ့သည်။ ဗြိတိန်နိုင်ငံခြားရေးဝန်ကြီး ဒေးဗစ်လမီသည် ပြီးခဲ့သည့် သီတင်းပတ်က တရုတ်နိုင်ငံသို့ နှစ်ရက်ကြာခရီးစဉ်အတွင်း လာရောက်ခဲ့ပြီး အစိုးရသည် စီးပွားရေးဆက်ဆံမှုတွင် အမျိုးသားလုံခြုံရေးကို ဦးစားပေးမည်ဟု ပြောကြားခဲ့သော်လည်း စီးပွားရေး၏ ၉၅ရာခိုင်နှုန်းသည် အဓိကစိုးရိမ်ရသည့် နယ်ပယ်တွင်မရှိကြောင်း ၎င်းကပြောကြားခဲ့သည်။ တရုတ်နိုင်ငံသည် ဗြိတိန်၏ ဆဋ္ဌမမြောက် အကြီးဆုံးကုန်သွယ်ဖက်ဖြစ်ပြီး၊ ကုန်စည်နှင့် ဝန်ဆောင်မှုကုန်သွယ်မှု၏ ၅ရာခိုင်နှုန်းသည် ပေါင် ၈၆.၅ ဘီလီယံ (ဒေါ်လာ ၁၁၂ဘီလီယံ) ရှိပြီး ဗြိတိန်သည် တရုတ်ကုန်သွယ်မှု၏ စျေးကွက်ဝေစု ၁.၂ ရာခိုင်နှုန်းရှိသည်။ "ဘဏ္ဍာရေးဝန်ဆောင်မှုများအပါအဝင် UK ကုမ္ပဏီများ ပိုမိုတင်ပို့ရန်နှင့် တရုတ်နိုင်ငံနှင့် ကုန်သွယ်မှုအတွက် ကြီးမားသောအခွင့်အလမ်းများရှိသည်" ဟု Reeves ကပြောကြားခဲ့သည်။ “ပိုမိုလုံခြုံပြီး ခံနိုင်ရည်ရှိတဲ့ စီးပွားရေးကို တည်ဆောက်လိုတဲ့ ကျွန်တော့်ရဲ့ဆန္ဒဟာ ဒီအစိုးရရဲ့ စီးပွားရေးမူဝါဒရဲ့ အရေးကြီးတဲ့ အစိတ်အပိုင်းတစ်ခုအနေနဲ့ မပြောင်းလဲပါဘူး” ဟု သူမကပြောကြားခဲ့သည်။
source- reuters
DOCA(မန္တလေး)

ကမ္ဘာ့ဒုတိယအကြီးဆုံးစီးပွားရေး၏ အလားလာကောင်းဆုံးအချက်ထဲတွင်ပါဝင်သည့် တရုတ်နိုင်ငံ၏ ပို့ကုန်၊သွင်းကုန်မျှော်မှန်းချက်သည် စက်တင်ဘာလတွင် ခန့်မှန်းထားသည်ထက် ပိုမိုလျော့နည်းခဲ့သည်။ တနင်္လာနေ့တွင်ထုန်ပြန်သော အကောက်ခွန်အချက်အလက်များအရ စက်တင်ဘာလတွင် ပို့ကုန်စုစုပေါင်း၏ ၂.၄ ရာခိုင်နှုန်းရှိပြီး သွင်းကုန် ၀.၃ ရာခိုင်နှုန်းရှိကြောင်းသိရသည်။.
လေ့လာသူများ၏အဆိုအရ တရုတ်ပို့ကုန်များသည် စက်တင်ဘာလတွင် ခြောက်နှစ်အတွင်း ခန့်မှန်းတန်ဖိုး ၀.၉ ရာခိင်နှုန်းခန့်မြင့်တက်မည်ဟုခန့်မှန်းထားသော်လည်း ခန့်မှန်းထားသည်ထက်လျော့နည်းခဲ့ကြောင်း reuters ၏ စစ်တမ်းများအရသိရသည်။
ပို့ကုန်များသည် တရုတ်နိုင်ငံ၏ စီးပွားရေးဖွံ့ဖြိုးတိုးတက်မှုအတွက် အဓိကမောင်းနှင်အားတစ်ခုဖြစ်ပြီး မကြာသေးမီနှစ်များအတွင်း သုံးစွဲသူအသုံးစရိတ်နည်းပါးမှုနှင့် အိမ်ခြံမြေကျဆင်းမှုကြောင့် အလေးချိန်ကျဆင်းခဲ့သည်။ သို့သော် ကုန်သွယ်ရေးတင်းမာမှုများမြင့်တက်လာခြင်းသည် လာမည့်နှစ်တွင် အရှိန်အဟုန်ဖြင့် ဆက်လက်ကြီးထွားလာရန် တရုတ်နိုင်ငံ၏ ပို့ကုန်ကို ခက်ခဲစေလိမ့်မည်ဖြစ်ကြောင်း Pinpoint Asset Management ၏ ဥက္ကဋ္ဌနှင့် စီးပွားရေးပညာရှင် Zhiwei Zhang က မှတ်ချက်တစ်ခု၌ ပြောကြားခဲ့သည်
အမေရိကန်နှင့် ဥရောပသမဂ္ဂတို့သည် တရုတ်နိုင်ငံလုပ် လျှပ်စစ်ကားများအပါအဝင် အခြားသောထုတ်ကုန်များအပေါ် အခွန်တိုးမြှင့်ကောက်ခံလျက်ရှိသည်။ ၎င်း၏အကြီးဆုံးကုန်သွယ်ဖက်ဖြစ်သော အမေရိကန်သို့ တရုတ်နိုင်ငံ၏ပို့ကုန်သည် ပြီးခဲ့သည့်နှစ်ထက် စက်တင်ဘာတွင် ၂ဒသမ ၂ရာခိုင်နှုန်းမြင့်တက်ခဲ့ပြီး အမေရိကန်မှ တင်သွင်းမှုမှာ ၆ဒသမ ၇ရာခိုင်နှုန်းမြင့်တက်ခဲ့ကြောင်း CNBC ၏ တရားဝင်အချက်အလက်များ လေ့လာဆန်းစစ်မှုအရသိရသည်။ "ပြီးခဲ့တဲ့လက သွင်းကုန်ပမာဏကျဆင်းသွားပေမယ့် ဘဏ္ဍာရေးအသုံးစရိတ်က စက်မှုကုန်စည်တွေရဲ့ ဝယ်လိုအားကို တိုးမြင့်လာစေတဲ့အတွက် အချိန်တိုအတွင်း ပြန်တက်လာနိုင်ဖွယ်ရှိပါတယ်" ဟု Capital Economics မှ တရုတ်စီးပွားရေးပညာရှင် Zichun Huang က တနင်္လာနေ့တွင် မှတ်ချက်တစ်ခု၌ ပြောကြားခဲ့သည်။ ဒေသတွင်းအခြေခံအားဖြင့် တရုတ်နိုင်ငံ၏ အကြီးဆုံးကုန်သွယ်ဖက်ဖြစ်သော အရှေ့တောင်အာရှနိုင်ငံများအသင်းသို့တင်ပို့မှုမှာ ၅ဒသမ ၅ရာခိုင်နှုန်းမြင့်တက်ခဲ့ပြီး သွင်းကုန်မှာ ၄ဒသမ ၂ရာခိုင်နှုန်းမြင့်တက်ခဲ့သည်။ ဥရောပသမဂ္ဂသို့ တရုတ်၏ပို့ကုန်သည် ၁ဒသမ ၃ရာခိုင်နှုန်းမြင့်တက်ခဲ့ပြီး သွင်းကုန် ၄ရာခိုင်နှုန်းကျဆင်းခဲ့သည်။ BRICS မိတ်ဖက် ရုရှားနိုင်ငံသို့ တရုတ်နိုင်ငံ၏တင်ပို့မှုမှာ ၁၆ဒသမ ၆ရာခိုင်နှုန်းမြင့်တက်ခဲ့သော်လည်း သွင်းကုန် ၈ဒသမ ၄ရာခိုင်နှုန်းကျဆင်းခဲ့ကြောင်း ဆန်းစစ်ချက်တွင် ဖော်ပြထားသည်။ တရုတ်နိုင်ငံ၏ အလုံးစုံ မော်တော်ယာဥ်တင်ပို့မှုမှာ စက်တင်ဘာလတွင် တစ်နှစ်ထက်တစ်နှစ် ၂၅.၇ ရာခိုင်နှုန်းတိုးလာခဲ့ပြီး ဖိနပ်များ၊ အရုပ်များနှင့် စမတ်ဖုန်းများအားလုံးသည် အလားတူကာလထက် ကျဆင်းသွားခဲ့သည်။
ပြည်တွင်းဝယ်လိုအားအနေဖြင့် တရုတ်နိုင်ငံ၏ ရေနံစိမ်းတင်သွင်းမှုသည် စက်တင်ဘာလတွင် အမေရိကန်ဒေါ်လာဈေးနှုန်းဖြင့် ၁၀.၇ ရာခိုင်နှုန်းကျဆင်းသွားခဲ့ပြီး သဘာဝဓာတ်ငွေ့နှင့် ကျောက်မီးသွေးတင်သွင်းမှုမှာ ယခင်နှစ်ကာလတူနှင့်နှိုင်းယှဉ်ပါက မြင့်တက်ခဲ့သည်။ တရုတ်နိုင်ငံ၏ ရှားပါးမြေကုန်သွယ်မှုသည် ယခင်နှစ်ထက် စက်တင်ဘာလတွင် တင်ပို့မှု ၄၀ရာခိုင်နှုန်းကျော်ကျဆင်းခဲ့ပြီး သွင်းကုန် ၉ရာခိုင်နှုန်းခန့်ကျဆင်းသွားသဖြင့် တရုတ်နိုင်ငံ၏ ရှားပါးမြေကုန်သွယ်မှုသည် ပိုမိုကျဆင်းသွားခဲ့သည်။ ပိုမိုမတည်ငြိမ်သော အစားအသောက်နှင့် စွမ်းအင်စျေးနှုန်းများကို ဖယ်ရှားပေးသည့် အဓိကစားသုံးသူစျေးနှုန်းညွှန်းကိန်းသည် လွန်ခဲ့သောနှစ်ထက် စက်တင်ဘာလတွင် ၀.၁ ရာခိုင်နှုန်းမြင့်တက်ခဲ့သည်။ Wind Information database အရ ယခုအခြေအနေသည် ၂၀၂၁ နောက်ပိုင်းနှစ်များတွင် ဖေဖော်ဝါရီလနောက်ပိုင်း အနှေးဆုံးဖြစ်သည်။ စက်တင်ဘာ ၁ရက်နေ့မှစတင်ခဲ့သော ဆောင်းဦးရာသီနှင့် ရွှေရောင် ရက်သတ္တပတ် အားလပ်ရက်များကြားမှ ခရီးသွားလုပ်ငန်းဆိုင်ရာ စျေးနှုန်းများသည် တစ်နှစ်ထက်တစ်နှစ် ၂.၁ ရာခိုင်နှုန်းကျဆင်းခဲ့သည်။ တရုတ်အမျိုးသားစာရင်းအင်းဗျူရိုသည် သောကြာနေ့တွင် လက်လီရောင်းချမှု၊ စက်မှုထုတ်လုပ်မှုနှင့် ပုံသေပိုင်ဆိုင်မှုရင်းနှီးမြှုပ်နှံမှုတို့နှင့်အတူ တတိယသုံးလပတ် GDP ဒေတာကို သောကြာနေ့တွင်ထုတ်ပြန်ရန် စီစဉ်ထားသည်။ ရင်းနှီးမြုပ်နှံသူများစွာ မျှော်လင့်ထားသည့် ဘဏ္ဍာရေးမူဝါဒ အသေးစိတ်အချက်အလက်များမှာ တိုတောင်းနေသော်လည်း တရုတ်အာဏာပိုင်များသည် ပြီးခဲ့သည့်လနှောင်းပိုင်းကတည်းက လှုံ့ဆော်မှုကြေညာချက်များကို အရှိန်မြှင့်လုပ်ဆောင်ခဲ့သည်။ ဘေဂျင်း၏ စီးပွားရေးပံ့ပိုးမှု၏ နောက်ဆုံးအကျိုးသက်ရောက်မှုကို အကြိတ်အနယ်ငြင်းခုံနေကြစဉ် တရုတ်ရှိ စတော့ရှယ်ယာများတွင် လှုပ်ခတ်မှုများရှိခဲ့ကြောင်းသိရသည်။
sources- hnixhua news
DOCA(မန္တလေး)

အိန္ဒိယနိုင်ငံမှ ပုံမှန်တင်သွင်းနေသော်လည်း Dinajpur ရှိ Hili ဆိပ်ကမ်းမှ ကြက်သွန်နီဈေးသည် သုံးရက်အတွင်း တစ်ကီလိုလျှင် TK ၁၀~၁၂ ခန့်အထိမြင့်တက်လာခဲ့သည်။ ယခုကဲ့သို့ တိုးလာရခြင်းမှာ ပြည်တွင်းရောင်းလိုအားကျဆင်းခြင်းနှင့် တင်သွင်းလာသော ကြက်သွန်နီဝယ်လိုအားမြင့်မားလာခြင်းတို့ကြောင့်ဖြစ်သည်။ လက်ကားရောင်းချသူများနှင့် စားသုံးသူများသည် တတ်နိုင်သော နှုန်းဖြင့် ကြက်သွန်နီဝယ်ယူနိုင်စွမ်းကိုထိခိုက်စေပြီး ရုတ်တရက်ဈေးတက်ခြင်းအတွက် စိတ်ပျက်မိကြောင်းပြောကြားကြသည်။ အိန္ဒိယရှိ Diwali ဈေးကွက်ပိတ်မှုကြောင့် ဈေးနှုန်းများသည် ယာယီအကျိုးသက်ရောက်မှုရှိကြောင်း တင်သွင်းသူများက ရှင်းပြခဲ့ကြပြီး တစ်ပတ်အတွင်း တည်ငြိမ်လာရန်လည်း မျှော်မှန်းထားကြသည်။ ၂၆-၁၀-၂၀၂၄ ရက်နေ့ (စနေနေ့) တွင် Indore, Nashik, South နှင့် Nagar အမျိုးအစား ကြက်သွန်နီ ၉၉၁တန် အိန္ဒိယထရပ်ကား ၃၄စီးဖြင့် ရောက်ရှိလာခဲ့သည်။ ယင်းတို့အနက် Nashik ကြက်သွန်နီသည် လွန်ခဲ့သောသုံးရက်က TK ၉၀~၉၅ ခန့်ရှိပြီး ဆိပ်ကမ်းတွင် တစ်ကီလိုလျှင် TK ၉၈~၁၀၀ ဖြင့်ရောင်းချခဲ့ပြီး Indore မျိုးများကို တစ်ကီလိုလျှင် TK ၈၅ဖြင့်ရောင်းချခဲ့သည်။ တစ်ချိန်တည်းတွင် ပြည်တွင်းထွက်ကြက်သွန်နီများအား တစ်ကီလိုလျှင် TK ၁၃၀ ဖြင့် ဈေးကွက်အတွင်း ရောင်းချလျက်ရှိသည်။ Hili အကောက်ခွန်အဆိုအရ စနေနေ့အထိ အလုပ်ချိန် ၁၆ရက်အတွင်း ကြက်သွန်နီတန်ချိန် ၁၀၀၀၀နီးပါးတင်သွင်းခဲ့ကြောင်းသိရသည်။
Source : dhakatribune
DOCA(ရန်ကုန်)