HighLight News

      မွန်ပြည်နယ်၊ စားသုံးသူရေးရာဦးစီးဌာနမှ ဝန်ထမ်းများသည် ၈-၂-၂၀၂၃  ရက်နေ့တွင် မုဒုံမြို့နယ်ရှိ ကွေ့ဝမ်းကျေးရွာနှင့် ရွှေပြည်စိုးရပ်ကွက်တို့တွင်လည်းကောင်း၊ ၉-၂-၂၀၂၃ ရက်နေ့တွင် မော်လမြိုင်မြို့၊ အောင်သုခရပ်ကွက်၊ ရွှေပြည်အေးရပ်ကွက်၊ သာယာကုန်းရပ်ကွက်တို့တွင်လည်းကောင်း၊ ၁၀-၂-၂၀၂၃ ရက်နေ့တွင် မော်လမြိုင်မြို့ ကြက်တန်းမန္တလေးရပ်ကွက်၊ မောင်ငံရပ်ကွက်နှင့် စမ်းကြီးရပ်ကွက်တို့တွင်လည်းကောင်း၊ ၁၁-၂-၂၀၂၃ ရက်နေ့တွင် မော်လမြိုင်မြို့၊ ကြက်တန်းမန္တလေးရပ်ကွက်၊ မြိုင်သာယာရပ်ကွက်၊ ကျွဲခြံကုန်းရပ်တို့တွင်လည်းကောင်း၊ ၁၂-၂-၂၀၂၃ ရက်နေ့တွင် မော်လမြိုင်မြို့ ကျောက်တန်းရပ်ကွက်၊ ဘိုကုန်းရပ်ကွက်၊ ငန်းတေးရပ်ကွက်တို့တွင်လည်းကောင်း ကုမ္ပဏီများကဖြန့်ဖြူးရောင်းချသည့် စားအုန်းဆီများအား ဈေးကွက်အတွင်း လက်လီ/လက်ကား ဖြန့်ဖြူးရောင်းချခြင်းကို ကြပ်မတ်ဆောင်ရွက်ခဲ့ပါသည်။

     ထိုသို့ဆောင်ရွက်ရာတွင် စားသုံးဆီတင်သွင်းသည့် ကုမ္ပဏီများက လက်ကားကုန်သည်များသို့ ဖြန့်ဖြူးထုတ်ပေးခဲ့သည့်စားအုန်းဆီများကို ရန်ကုန်အထိုင်ဈေး၏ ရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များထပ်ပေါင်း၍ ၂ ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချရမည်ဖြစ်ရာ လက်လီဈေးကွက်အတွင်း သင့်တင့်မျှတသောဈေးနှုန်းများဖြင့် ရောင်းချစေရေး၊ ဈေးနှုန်းအဆမတန်မြှင့်တင်ရောင်းချခြင်းမရှိစေရေးတို့အတွက် ကွင်းဆင်းကြပ်မတ်ဆောင်ရွက်ခဲ့ပါသည်။

DOCA(မွန်)

      မွန်ပြည်နယ်ကုန်သည်များနှင့် စက်မှုလက်မှုလုပ်ငန်းရှင်များအသင်းနှစ်ပတ်လည် အသင်းသားများစုံညီအစည်းအဝေးကို ၁၁-၂-၂၀၂၃ ရက်နေ့ စနေနေ့တွင် မော်လမြိုင်မြို့ ကုန်စည်ဒိုင်ခန်းမ၌ ကျင်းပပြုလုပ်ခဲ့ရာ အဆိုပါအစည်းအဝေးသို့ မွန်ပြည်နယ်ဝန်ကြီးချုပ်၊ အစိုးရအဖွဲ့ဝင်ဝန်ကြီးများ၊ ပြည်နယ်အဆင့် ဌာနဆိုင်ရာတာဝန်ရှိပုဂ္ဂိုလ်များ၊ ကုန်သည်လုပ်ငန်းရှင်များ၊ ဘဏ်လုပ်ငန်းရှင်များ၊ သတင်းမီဒီယာများ၊ ဖိတ်ကြားထားသောဧည့်သည်တော်များ တက်ရောက်ခဲ့ကြောင်းသိရှိရပါသည်။

          အစည်းအဝေးတွင် မွန်ပြည်နယ်အစိုးရအဖွဲ့ဝန်ကြီးချုပ်က အမှာစကားချီးမြှင့်ပြောကြားခဲ့ပြီး ၊ မွန်ပြည်နယ် ကုန်သည်များနှင့်စက်မှုလက်မှုလုပ်ငန်းရှင်များအသင်းဥက္ကဋ္ဌ ဦးဝင်းထိန်က အဖွင့်နှုတ်ခွန်းဆက်စကားပြောကြားခဲ့သည်။ ဆက်လက်၍ နှစ်ပတ်လည်အစီရင်ခံစာနှင့် ဘဏ္ဍာရေးရှင်းတမ်းကို အတွင်းရေးမှူးက ဖတ်ကြားရှင်းလင်းတင်ပြခဲ့ပြီး၊ နှစ်ပတ်လည်အစီရင်ခံစာနှင့် ဘဏ္ဍာရေးရှင်းတမ်းကို အတည်ပြုခဲ့ကြပါသည်။ထို့နောက်စားသုံးသူရေးရာဦးစီးဌာန၊ မွန်ပြည်နယ် ပြည်နယ်ဦးစီးမှူးက ၂၀၂၂-၂၀၂၅ သက်တမ်းရွေးချယ်တင်မြှောက်ခြင်းခံရသော အမှုဆောင်အဖွဲဝင်များ၏ အမည်စာရင်းကိုဖတ်ကြားတင်ပြခဲ့ပါသည်။ ဆက်လက်၍ ၂၀၂၂-၂၀၂၅ သက်တမ်းအတွက် တာဝန်ထမ်းဆောင်မည့် ဥက္ကဋ္ဌအသစ်က မိတ်ဆက်စကားပြောကြားပြီး ရှေ့ဆက်ဆောင်ရွက်မည့်လုပ်ငန်းစဉ်များနှင့်ပတ်သက်၍ ရှင်းလင်းတင်ပြခဲ့ပါသည်။ ထို့နောက် ဖိတ်ကြားထားသောဘဏ်များမှ ဝန်ထမ်းများသည် ဝန်ဆောင်မှုများအားရှင်းလင်းခဲ့ကြပြီး အစည်းအဝေးကို နေ့လယ်(၁၂:၃၀)နာရီအချိန်တွင် ရုပ်သိမ်းခဲ့ကြောင်းသိရှိရပါသည်။

DOCA(မွန်)

     စားသုံးသူရေးရာဦးစီးဌာန၊ သထုံခရိုင်ဦးစီးမှူးရုံးမှ ဝန်ထမ်းများသည် ၂၀၂၃ ခုနှစ် ဖေဖော်ဝါရီလ ၁၀ ရက်နေ့တွင် သထုံမြို့နယ်၊ အောက်ကျင်းရပ်ကွက်၊ အ-မ-က (လွန်)ကန်ညီနောင်ကျောင်း၌ စားသုံးသူကာကွယ်ရေး အသိပညာပေးဟောပြောဆွေးနွေးပွဲကို ကျင်းပပြုလုပ်ခဲ့သည်။

     အဆိုပါ ဟောပြောဆွေးနွေးပွဲတွင် ကျောင်းအုပ်ဆရာမကြီး ဒေါ်မိုးမိုးသိန်းက အဖွင့်အမှာစကားပြောကြားခဲ့ပြီးစားသုံးသူရေးရာဦးစီးဌာန၊ သထုံခရိုင်ဦးစီးမှူးရုံးမှ မြို့နယ်တာဝန်ခံက ဌာန၏မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေ၏ရည်ရွယ်ချက်၊ စားသုံးသူအခွင့်အရေးနှင့်တာဝန်များ၊ ကုန်စည်နှင့်ဝန်ဆောင်မှုအပေါ် ဝယ်ယူအသုံးပြုတတ်စေရန် အချက်များ၊ ကုန်အညွှန်းအမှတ်သားဆိုင်ရာပြဋ္ဌာန်းချက်များ၊ ကုန်စည်နှင့်ဝန်ဆောင်မှုအပေါ် နစ်နာဆုံးရှုံးမှုဖြစ်ပေါ်လျှင် တိုင်ကြားနိုင်မည့်လူပုဂ္ဂိုလ်များ၊ တိုင်ကြားနိုင်မည့်နည်းလမ်းများ၊ ပြန်လည်ကုစားခွင့်ရှိသည့်အကြောင်းအရာများအား ရှင်းလင်းဆွေးနွေးခဲ့ပါသည်။

     အဆိုပါ ဟောပြောဆွေးနွေးပွဲသို့ ဆရာ/ဆရာမများနှင့်  ကျောင်းသား/ကျောင်းသူများ စုစုပေါင်း (၁၂၄)ဦးတက်ရောက်ခဲ့ပြီး စားသုံးသူကာကွယ်ရေးဆိုင်ရာ သိကောင်းစရာလက်ကမ်းစာစောင်များကို ဖြန့်ဝေပေးခဲ့ပါသည်။

DOCA(မွန်)

      စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ စစ်ဆေးရေးမှူးဒေါ်နှောင်းနှောင်းဝင်းသည် ၁၄.၂.၂၀၂၃ရက်နေ့တွင် ဗန်းမော်မြို့၊ ပေါက်ကုန်းရပ်ကွက်ရှိ လက်လီလက်ကားရောင်းချ နေသော ကုန်စုံဆိုင်များ၌ COOK&LOBSTER အမှတ်တံဆိပ်(ငံပြာ) စားသုံးသူကာကွယ်ရေး ဥပဒေပါကုန်အညွှန်းအမှတ်အသားဖော်ပြခြင်းနှင့်ပတ်သက်၍ ကိုက်ညီမှုရှိ/မရှိ  ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။

        ထိုသို့ဈေးကွက်စောင့်ကြည့်စစ်ဆေးရာတွင် အစားအသောက်ကုန်စည်အုပ်စု ဟင်းလျာများတွင် အရောင်အနံ့အရသာအတွက် အသုံးပြုသောပစ္စည်းအမျိုးမျိုးတွင်ပါဝင်သည့် COOK&LOBSTER အမှတ်တံဆိပ်(ငံပြာ)၌ ကုန်စည်အမျိုးအစားအလိုက်သတ်မှတ်ချက်နှင့်အညီ မြန်မာဘာသာဖြင့် သိသာထင်ရှားစွာဖော်ပြရမည့် အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ သုံးစွဲပုံနည်းလမ်း၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြ ချက်ကြိုတင် သတိပေး ချက်များပြည့်စုံစွာ ပါရှိကြောင်း စစ်ဆေးတွေ့ရှိရပြီး ကုန်စုံဆိုင်ပိုင်ရှင်များအား ကုန်အညွှန်းအမှတ် အသားပြည့်စုံမှန်ကန် မှုရှိသော ကုန်စည်များကိုသာ ဈေးကွက်အတွင်းရောင်းချကြရန်ရှင်း လင်းဆွေးနွေးခဲ့ပြီး ကုန်အညွှန်း အမှတ်အသားဆိုင်ရာ လက်ကမ်းစာစောင်များဖြန့်ဝေခဲ့ကြောင်းသိရှိရပါသည်။

DOCA(ကချင်)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများကို ဆောင်ရွက်ရမည့်စီမံချက်များချမှတ်၍ ဆောင်ရွက်လျက်ရှိရာ ဖေဖော်ဝါရီလ(၁၃)ရက်နေ့၊ နံနက်(၁၁:၀၀)နာရီအချိန်တွင် ရွှေဘိုမြို့နယ် သမဝါယမဦးစီးဌာန၌ စားသုံးသူကာကွယ်ရေး အသိပညာပေးဟောပြောပွဲဆောင်ရွက်ခဲ့ပါသည်။

     အဆိုပါဟောပြောပွဲတွင် ရွှေဘိုခရိုင်စားသုံးသူရေးရာဦးစီးဌာနမှ ရွှေဘိုမြို့နယ်တာဝန်ခံ ဦးသန့်ဇော်လင်းက စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ဆောင်ပုဒ်နှင့် Vision၊ Mission များကို ရှင်းလင်းပြောကြားခဲ့ပြီးနောက် စားသုံးသူကာကွယ်ရေးဥပဒေကို ၂၀၁၉ ခုနှစ်၊ မတ်လ(၁၅)ရက်နေ့တွင် ပြဋ္ဌာန်းခဲ့ရာ အခန်းပေါင်း(၂၅)ခန်းနှင့် ပုဒ်မပေါင်း (၈၄)ခုပါဝင်ပါကြောင်း၊ ဥပဒေ၌ စားသုံးသူနှင့်စီးပွားရေးလုပ်ငန်းရှင်၏အဓိပ္ပါယ်ဖွင့်ဆိုချက်များ၊ ဥပဒေ၏ရည်ရွယ်ချက်များ၊ စားသုံးသူအခွင့်အရေးနှင့်လိုက်နာရမည့်တာဝန်များ၊ ကုန်အညွှန်းအမှတ်အသားဖော်ပြရန်အကြောင်းများအား သတ်မှတ်ပြဋ္ဌာန်းထားပါကြောင်း၊ စားသုံးသူအခွင့်အရေးနှင့် အကျိုးစီးပွားနစ်နာဆုံးရှုံးမှုများရှိပါက တိုင်ကြားနိုင်ပါကြောင်းနှင့် တိုင်ကြားနိုင်သည့်နေရာများ၊ ဌာနနှင့်သက်ဆိုင်သောအကြောင်းအရာများကို  Consumer Call Center (1535) သို့ မေးမြန်းစုံစမ်းနိုင်ပါကြောင်း၊ တိုင်ကြားစာများကို စိစစ်ညှိနှိုင်းဖြေရှင်းပေးနိုင်မည်ဖြစ်ပါကြောင်း၊ ရှင်းလင်းဆွေးနွေးပေးခဲ့သည့် အဆိုပါဟောပြောပွဲသို့  မြို့နယ်မဝါယမဦးစီးဌာနမှ မြို့နယ်ဦးစီးမှူးနှင့် အရာထမ်း၊ အမှုထမ်း စုစုပေါင်းဝန်ထမ်း (၁၂)ဦးတက်ရောက်ခဲ့၍ စားသုံးသူကာကွယ်ရေး အသိပညာပေးလက်ကမ်းစာစောင် (၁၂)စောင်ကို ဖြန့်ဝေပေးခဲ့ပါသည်။

      ဌာနဆိုင်ရာရုံးများတွင် စားသုံးသူကာကွယ်ရေး အသိပညာပေဟောပြောပွဲဆောင်ရွက်ခြင်းဖြင့် ဝန်ထမ်းများအနေဖြင့် ဝန်ကြီးဌာန၏ဆောင်ပုဒ်၊ Vision၊ Mission များအပေါ် ဌာနက အကောင်အထည်ဖော်ဆောင်ရွက်နေသည့်လုပ်ငန်းများ၊ စားသုံးသူကာကွယ်ရေးဥပဒေ၏ ရည်ရွယ်ချက်များ၊ စားသုံးသူအခွင့်အရေးများကို သိရှိပြီးတောင်းဆိုတတ်လာခြင်း၊ ကုန်စည်များကို ဝယ်ယူရာတွင် ကုန်အညွှန်းအမှတ်အသားများကိုသိရှိ၍ ရွေးချယ်ဝယ်ယူတတ်လာခြင်းစသည့် အကျိုးကျေးဇူးများကို ရရှိလာနိုင်မည်ဖြစ်ပါသည်။

DOCA(စစ်ကိုင်း)