HighLight News

   Packing Machine များထုတ်လုပ်ဖြန့်ဖြူးလျက်ရှိသော Machine City ကုမ္ပဏီသည် ၂၀၂၃ခုနှစ်၊ ဩဂုတ်လ ၂ရက်နေ့၊ နံနက်ပိုင်းအချိန်တွင် စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံး၌ တောင်ငူခရိုင်အတွင်းရှိ မုန့်ဖတ်ခြောက်လုပ်ငန်းရှင်များအားတွေ့ဆုံ၍ ၎င်းတို့ကုမ္ပဏီမှထုတ်လုပ်သည့် ထုပ်ပိုးစက် (Packing Machine) များနှင့်ပတ်သက်၍ ရှင်းလင်းပြသခဲ့ပါသည်။

     အခမ်းအနားတွင် စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးမှ လက်ထောက်ညွှန်ကြားရေးမှူး ဒေါ်အေးအေးသင်းက အဖွင့်အမှာစကားပြောကြားခဲ့ပြီးနောက် တောင်ငူခရိုင်ဦးစီးမှူး ဦးမျိုးအောင်က မိတ်ဆက်စကားပြောကြားခဲ့ပါသည်။ ဆက်လက်၍ Machine City ကုမ္ပဏီမှ ဦးရဲမြင့်ဦးက  ၎င်းတို့ကုမ္ပဏီမှထုတ်လုပ်သည့် ထုပ်ပိုးစက် (Packing Machine) များအကြောင်းကို Power Point ဖြင့် ရှင်းလင်းပြသခဲ့ပါသည်။

   Machine City ကုမ္ပဏီမှဖြန့်ဖြူးရောင်းချသည့် သာမန်အိတ်ပိတ်စက်များတွင် လက်ဖိစက်နှင့်ခြေနင်းစက် စသည်တို့ရှိရာ အမျိုးအစားပေါ်မူတည်၍ တစ်လုံးလျှင် ၂၀၀၀၀ကျပ်မှ ၅၀၀၀၀ကျပ်အထိရှိပါသည်။ ၎င်းစက်များမှာ ထုပ်ပိုးအိတ်ခွံများကို သားရေကြိုးစည်းသည့်စနစ်မှ စက်ဖြင့် စနစ်တကျသေသပ်လှပစွာပိတ်နိုင်မည်ဖြစ်ပါသည်။ ခြေနင်းစက်တစ်မျိုးမှာ တန်ဖိုးအားဖြင့် ၄၀၀၀၀ကျပ်မှ ၄၅၀၀၀ကျပ်အထိရှိပြီး အကြမ်းခံနိုင်သဖြင့် ၎င်းစက်ကို လုပ်ငန်းရှင်များစိတ်ပါဝင်စားသည်ကိုတွေ့ရပါသည်။

  ပြည်ပပို့ကုန်အဖြစ် အဆင့်မီသေသပ်လှပစွာထုပ်ပိုးနိုင်သည့် ရင်ခွဲအိတ်ပိတ်စက်မှာ တန်ဖိုးအားဖြင့် ၁၆၅၀၀၀၀ကျပ် (ကျပ်တစ်ဆယ့်ခြောက်သိန်းငါးသောင်း) ခန့်ရှိရာ လုပ်ငန်းရှင်များအတွက် ရင်းနှီးမြှုပ်နှံရန် စဉ်းစားရမည့်အပြင် မုန့်ဖတ်ခြောက်များ၏ သဘောသဘာဝအရ အခြားစားသောက်ကုန်များနှင့်မတူညီသဖြင့် မုန့်ဖတ်ခြောက်များထုပ်ပိုးနိုင်ရန် ပြုပြင်ဆောင်ရွက်ရမည်ဖြစ်ကြောင်းကိုတွေ့ရှိရပါသည်။ ဘေးအိတ်ပိတ်စက်မှာ တန်ဖိုးအားဖြင့် ၁၂၀၀၀၀၀ကျပ် (ကျပ်သိန်း၁၂၀) ခန့်ရှိပြီး မုန့်ဖတ်ခြောက်အတွက် ပိုမိုသင့်လျော်ကြောင်း လုပ်ငန်းရှင်များကဆိုပါသည်။

  Packing Machine ဝယ်ယူခြင်းနှင့်ပတ်သက်၍ အရစ်ကျစနစ်ဖြင့် ကုမ္ပဏီ၏ဆောင်ရွက်ပေးနိုင်မည့်ကိစ္စကို လုပ်ငန်းရှင်များကမေးမြန်းရာ ကုမ္ပဏီက ငွေကြေးလည်ပတ်မှုအခက်အခဲကြောင့် လုပ်ငန်းရှင် ၃ဦးအထိကို ၆၀ရာခိုင်နှုန်းငွေချေပြီး ကျန်သည့် ၄၀ရာခိုင်နှုန်းကို တစ်လလျှင် ၂၀ ရာခိုင်နှုန်းစီပေးသွင်းရမည်ဖြစ်ကြောင်း ပြန်လည်ရှင်းလင်းပြောကြားခဲ့သည်ကို သိရှိရပါသည်။

   Machine City မှထုတ်လုပ်သည့် ထုပ်ပိုးစက် (Packing Machine) များနှင့်ပတ်သက်၍ ရှင်းလင်းပြသခြင်းအခမ်းအနားသို့ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ အသေးစားစက်မှုလက်မှုလုပ်ငန်းဦးစီးဌာနတို့မှ ခရိုင်ဦးစီးမှူးများနှင့် တောင်ငူမြို့နယ်မှ မုန့်ဖတ်ခြောက်လုပ်ငန်းရှင် ၇ဦးတက်ရောက်ခဲ့ကြကြောင်း သိရပါသည်။

DOCA(ပဲခူး)

      တနင်္သာရီတိုင်းဒေသကြီး၊ ကော့သောင်းခရိုင်၊ စားသုံးသူရေးရာဦးစီးဌာနတွင် ၂၀၂၃ခုနှစ်၊ ဩဂုတ်လ ၇ရက်နေ့၊ နေ့လယ် (၂:၀၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၊ ခရိုင်အသေးစားနှင့်စက်မှုလက်မှုလုပ်ငန်းဦးစီးဌာန၊ ပြည်သူ့ကျန်းမာရေးဦးစီးဌာနနှင့် မြို့နယ်စည်ပင်သာယာရေးအဖွဲ့တို့နှင့်အတူပူးပေါင်းကာ အဏ္ဏဝါရပ်ကွက်တွင် လက်ကားကုန်စုံဆိုင်ကြီး (၆) ဆိုင်သို့သွားရောက်၍ အစားအသောက်ကုန်စည်အုပ်စုများအနက် အသင့်သောက်အချိုရည်အမျိုးမျိုးတို့တွင် ကုန်အညွှန်းအမှတ်အသားဖော်ပြခြင်းဆိုင်ရာပြဋ္ဌာန်းချက်များနှင့်ပတ်သက်၍ ကုန်စည်၏အမျိုးအမည်၊ အရွယ်အစား၊ အသားတင်ပမာဏ၊ ထားသိုသိမ်းဆည်းပုံအညွှန်းနှင့် ဓာတ်မတည့်ကြောင်းဖော်ပြထားခြင်းရှိ/မရှိ စသည်တို့ကို ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြကြောင်း သိရှိရပါသည်။

DOCA(တနင်္သာရီ)

    ၂၀၂၃ ခုနှစ် ဩဂုတ်လ ၃ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၌ ဝန်ထမ်းများစွမ်းဆောင်ရည်မြှင့်အထောက်အကူပြု Thursday Talk ကျင်းပပြုလုပ်ခဲ့ရာ ပြည်နယ်ရုံးနှင့် မော်လမြိုင်ခရိုင်ရုံးမှ ဝန်ထမ်းစုစုပေါင်း ( ၃၀) ဦးတက်ရောက်ခဲ့ကြောင်းသိရှိရပါသည်။

    အဆိုပါ ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု Thursday Talk အသိပညာပေးဟောပြောဆွေးနွေးပွဲကို ပြည်နယ်ဦးစီးမှူးက အဖွင့်အမှာစကားပြောကြားပြီးနောက် မော်လမြိုင်ခရိုင်ဦးစီးမှူး ဒေါ်ဝါဝါမြိုင်က စားသုံးသူရေးရာဌာနခွဲ၏ လုပ်ငန်းဆောင်ရွက်ချက်များအကြောင်းဆွေးနွေးခဲ့ပြီး စီမံရေးရာဌာနခွဲမှ ဒေါ်သိန်းကြည် ဒု-ဦးစီးမှူးက ပင်စင်အကြောင်းသိကောင်းစရာများကိုဆွေးနွေးခြင်းနှင့် ချောင်းဆုံမြို့နယ်တာဝန်ခံ ဒေါ်ထက်ထက်နွေဦးမှ  ချောင်းဆုံမြို့နယ်တာဝန်ခံ၏လုပ်ငန်းဆောင်ရွက်ချက်များအား ရှင်းလင်းဆွေးနွေးခဲ့ကြပြီး တက်ရောက်လာသောသူများမှ အပြန်အလှန်ဆွေးနွေးခြင်းများပြုလုပ်ခဲ့ကြောင်း သတင်းရရှိပါသည်။

DOCA(မွန်)

     ကျောက်ဆည်ခရိုင် ၊စားသုံးသူရေးရာဦးစီးဌာနသည် စားသုံးသူအခွင့်အရေးများသိရှိစေရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် အသိပညာပေးဟောပြောဆွေးနွေးပွဲများကျင်းပခြင်းနှင့် ဈေးကွက်စောင့်ကြည့် စစ်ဆေးရေးလုပ်ငန်းများအား စဉ်ဆက်မပျက်ဆောင်ရွက်လျက်ရှိရာ (၃.၈.၂၀၂၃) ရက်နေ့တွင် စဉ့်ကိုင်မြို့နယ်၊ ကျောက်ဆည်တက္ကသိုလ်၌  စဉ့်ကိုင်မြို့နယ်၊ ပြည်သူ့ကျန်းမာရေး ဦးစီးဌာနတို့ပူးပေါင်း၍ စားသုံးသူကာကွယ်ရေးအသိပညာပေးဟောပြောဆွေးနွေးပွဲကျင်းပခဲ့ပါသည်။ အဆိုပါ ဟောပြောဆွေးနွေးပွဲတွင် ကျောက်ဆည်တက္ကသိုလ်ပါမောက္ခချုပ် ဒေါက်တာရီရီဦးမှ အဖွင့်အမှာစကားပြောကြားခဲ့ပြီး ကျောက်ဆည်ခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူး ဦးကျင်ဌေးက ဦးစီးဌာနအကြောင်းနှင့်ပတ်သက်၍ မိတ်ဆက်အမှာစကားပြောကြားခဲ့ပါသည်။ ဆက်လက်၍ စဉ့်ကိုင်မြို့နယ်၊ ပြည်သူ့ကျန်းမာရေးဦးစီးဌာနမှ ကျန်းမာရေးမှူ းဦးကျော်မင်းထွန်းက ကျန်းမာရေးနှင့်ပတ်သက်သည့်သိကောင်းစရာများကိုလည်းကောင်း၊ ကျောက်ဆည်ခရိုင် စားသုံးသူရေးရာဦးစီးဌာန၊ ဦးဇော်မင်းလတ်(ဦးစီးမှူး)က စားသုံးသူကာကွယ်ရေးဥပဒေပြဌာန်းထားရှိမှု၊ စားသုံးသူများ၏အခွင့်အရေးနှင့် စားသုံးသူတို့၏တာဝန်၊ လုပ်ငန်းရှင်များလိုက်နာရမည့် တာဝန်များ၊ ကုန်အညွှန်းအမှတ်အသားဖော်ပြချက်များ ကုန်စည်နှင့်ဝန်ဆောင်မှုတို့စပ်လျဉ်း၍ အာမခံပေးထားမှုအပေါ် စားသုံးသူကတောင်းဆိုနိုင်သည့် အခွင့်အရေးများ၊ စားသုံးသူများနစ်နာဆုံးရှုံးမှုများဖြစ်ပေါ်ပါက တိုင်းဒေသကြီး/ ပြည်နယ်များရှိ Consumer Information & Complaint Center(CICC) များနှင့် Consumer Call Center ဖြစ်သည့် 1535 သို့ခေါ်ဆို၍ တိုင်ကြားနိုင်သည့်အပြင် စားသုံးသူရေးရာဦးစီးဌာန၏ Website ဖြစ်သော www. doca. gov. mm ထဲသို့ဝင်ရောက်ပြီး တိုင်ကြားနိုင်ပါကြောင်း ဆွေးနွေးပြောကြားခဲ့ပြီး အသိပညာပေးဟောပြောဆွေးနွေးပွဲသို့ ဆရာ၊ ဆရာမများနှင့် ကျောင်းသား/ကျောင်းသူ(၃၀၀)ဦးခန့်တက်ရောက်ခဲ့ပါသည်။ဆက်လက်၍ ခရိုင်ဦးစီးမှူးနှင့်အဖွဲ့သည် ကျောင်းအတွင်းရောင်းချ‌နေသော ဈေးဆိုင်များအား ဈေးကွက်စောင့်ကြည့်စစ်ဆေးခဲ့ကြောင်းသတင်းရရှိပါသည်။

DOCA(မန္တလေး)

 ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ ခရိုင်ဦးစီးမှူး ဦးဇော်မင်းနှင့် ဌာနဆိုင်ရာဝန်ထမ်းများသည် (၂.၈.၂၀၂၃) ရက်နေ့ နံနက် (၁၀၀၀)နာရီအချိန်က ဌာနဆိုင်ရာများစုပေါင်း၍ ကျောင်းသား/ကျောင်းသူ(၁၂၀)အား အသိပညာပေးဟောပြောပွဲပြုလုပ်ကျင်းပခဲ့ကြပါသည်။

   အဆိုပါဟောပြောပွဲအခမ်းအနားတွင် စားသုံးသူရေးရာဦးစီးဌာနမှ ခရီုင်ဦးစီးမှူးဦးဇော်မင်းက စားသုံးသူကာကွယ်ရေး လုပ်ငန်းစဉ်များအကြောင်းကို အသိပညာပေးဟောပြောခဲ့ပြီး ဦးစီးဌာနပေါ်ပေါက်လာပုံအဆင့်ဆင့်၊ ယခင်က စားသုံးသူအကာအကွယ်ပေးရေးဥပဒေ (၂၀၁၆)ခုနှစ်က စားသုံးသူကာကွယ်ရေးလုပ်ငန်းများ ပိုမိုထိရောက်စွာ အကောင်အထည်ဖော်ဆောင်ရွက်ခဲ့ပြီး စားသုံးသူရေးရာဦးစီးဌာနအဖြစ် သီးခြားပြောင်းလဲဖွဲ့စည်းခဲ့ကြောင်း၊ စားသုံးသူ ကာကွယ်ရေးဥပဒေကို (၂၀၁၉)ကို ပြင်ဆင်ရေးဆွဲ၍ ပြည်ထောင်စုလွတ်တော်ဥပဒေ (အမှတ်-၉) ၂၀၁၉ခုနှစ် မတ်လ ၁၅ရက်နေ့က အတည်ပြုဌာန်းခဲ့ပုံအကြောင်း၊ စားသုံးသူကာကွယ်ရေးဥပဒေ၏ အခန်း(၁၈)မှ ကုန်အညွှန်းအမှတ်အသားဖော်ပြခြင်းဆိုင်ရာ အချက်အလက်များကိုသိရှိနားလည်ရန် ရှင်းလင်းပြောကြားခဲ့ပြီး စားသုံးသူများမိမိတို့ဝယ်ယူသည့်ကုန်စည်များကို ကုန်အညွှန်းအမှတ်အသားပြည်စုံစွာဖော်ပြပါဝင်သောကုန်စည်များကို ရွေးချယ်ဝယ်ယူတက်စေရန် ရှင်းလင်းခဲ့ပြီး စားသုံးသူ၏အခွင့်အရေး(၈)ချက်၊ ကုန်စည်နှင့် ဝန်ဆောင်မှုများကိုရယူသုံးစွဲရာတွင်   စားသုံးသူအခွင့်အရေး အမှန်တကယ်နစ်နာဆုံးရှုံးမှုဖြစ်ပေါ်လာပါက စားသုံးသူရေးရာဦးစီးဌာနသို့တိုင်ကြားနိုင်သော နည်းလမ်းများ၊ Consumer Call Center 1535 သို့ဆက်သွယ်မေးမြန်းစုံစမ်းနိုင်ကြောင်း၊ အသိပညာပေး လက်ကမ်းစာစောင်များဖြန့်ဝေပေးခဲ့ပြီး ကျောင်းသား/ ကျောင်းသူများမှ စိတ်ဝင်တစားမေးမြန်းခဲ့ကြပြီး အခမ်းအနားသို့ (၁၂၀)ဦး တက်ရောက်ခဲ့ကြောင်းသိရသည်။

DOCA(ဧရာဝတီ)