HighLight News

   စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် မြို့နယ်အထွေထွေအုပ်ချုပ်ရေးဦးစီးဌာန၊ ပြည်တွင်းအခွန်များဦးစီးဌာန၊ စိုက်ပျိုးရေးဦးစီးဌာနနှင့် မြို့နယ်စည်ပင်သာယာရေးအဖွဲ့တို့မှ တာဝန်ရှိသူများပါဝင်သော ပူးပေါင်းအဖွဲ့နှင့်အတူ ၂၀၂၃ခုနှစ်၊ ဇူလိုင်လ ၅ရက်နေ့၊ နံနက်ပိုင်းအချိန်တွင် ရေတာရှည်မြို့ရှိ ဓာတ်မြေဩဇာနှင့် စိုက်ပျိုးရေးဆေးအရောင်းဆိုင်များသို့သွားရောက်၍ ကွင်းဆင်းစစ်ဆေးခဲ့ပါသည်။

 စားသုံးသူရေးရာဦးစီးဌာနအနေဖြင့် ဓာတ်မြေဩဇာနှင့် စိုက်ပျိုးရေးဆေးများတွင် မြန်မာဘာသာဖြင့် ကုန်အညွှန်းအမှတ်အသားများ‌ဖော်ပြထားခြင်းရှိ/မရှိကိုလည်းကောင်း၊ အိုင်စီပီရွှေမည်းကုမ္ပဏီကထုတ်လုပ်သည့် မြင့်ပျံအမှတ်တံဆိပ်ဓာတ်မြေဩဇာများကို၊ တုပထားသည့်သဘောသက်ရောက်သည့် ဓာတ်မြေဩဇာများရောင်းချခြင်းရှိ/မရှိကိုလည်းကောင်း စစ်ဆေးကြည့်ရှုခဲ့ပြီး တရားမဝင်ဓာတ်မြေဩဇာများရောင်းချခြင်းသည် စားသုံးသူများကိုထိခိုက်နစ်နာစေသည့်ပြင် တရားမဝင်ကုန်သွယ်မှုပြုခြင်းလည်းဖြစ်၍ တရားမဝင်ကုန်စည်များကိုရောင်းချခြင်းမပြုရန် အသိပညာပေးခဲ့ပါသည်။

     ပူးပေါင်းအဖွဲ့တွင် ပါဝင်သည့်ဌာနဆိုင်ရာများအနေဖြင့်လည်း မိမိတို့ဌာနနှင့်သက်ဆိုင်သည်များကိုစစ်ဆေးပြီး အသိပညာပေးခဲ့ကြောင်းနှင့် ရေတာရှည်မြို့ရှိ ရွှေလမင်းစိုက်ပျိုးရေးဆေးဆိုင်၊ ရတနာဌေးစိုက်ပျိုးရေးဆေးဆိုင်၊ ရွှေရည်ဝင်းစိုက်ပျိုးရေးဆေးဆိုင်၊ ဒေါ်ခင်မာသီစိုက်ပျိုးရေး ဆေးဆိုင်များကိုစစ်ဆေးခဲ့ရာသက်ဆိုင်ရာဌာနဆိုင်ရာများ၏ဥပဒေ၊ ညွှန်ကြားချက်များနှင့်အညီ ဆောင်ရွက်ထားသည်ကိုတွေ့ရကြောင်း သိရပါသည်။

DOCA(ပဲခူး)

  စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ စစ်ဆေးရေးအရာရှိ ဦးမင်းဇော်၊ ဖြူးမြို့နယ်၊ စိုက်ပျိုးရေးဦးစီးဌာန၊ ဒုတိယဦးစီးမှူး ဦးခင်မောင်ဆွေတို့နှင့်အတူ ဇူလိုင်လ ၄ရက်နေ့၊ နံနက်ပိုင်းအချိန်တွင် ဖြူးမြို့ရှိ ဓာတ်မြေဩဇာနှင့် စိုက်ပျိုးရေးဆေးဆိုင်များသို့သွားရောက်၍ ဓာတ်မြေဩဇာနှင့် စိုက်ပျိုးရေးဆေးများ၌ မြန်မာဘာသာဖြင့် ကုန်အညွှန်းအမှတ်အသားများဖော်ပြထားခြင်းရှိ/မရှိကို စောင့်ကြည့်စစ်ဆေးခဲ့ပါသည်။

  ခရိုင်ဦးစီးမှူးဦးဆောင်သောအဖွဲ့သည် ဖြူးမြို့၊ အုတ်ဖြတ်လမ်းရှိ စွန်မင်း၊ မိတ်ဆွေကောင်း၊ ရွှေမာလာ၊ ကောင်းထက်နှင့် တက်နေဓာတ်မြေဩဇာနှင့် စိုက်ပျိုးရေးဆေးအရောင်းဆိုင်များ၊ ပဲခူးလမ်းတောင်ပိုင်းရှိ မဟာမိတ်ဓာတ်မြေဩဇာနှင့် စိုက်ပျိုးရေးဆေးအရောင်းဆိုင်၊ ဗိုလ်ချုပ်လမ်းရှိ စွန်မင်းဓာတ်မြေဩဇာနှင့် စိုက်ပျိုးရေးဆေးသိုလှောင်ရုံသို့ရောက်ရှိ၍ စစ်ဆေးခဲ့ရာ ညွှန်ကြား ချက်များနှင့်အညီ ရောင်းချလျက်ရှိသည်ကိုတွေ့ရပါသည်။

 ခရိုင်ဦးစီးမှူးက တရားမဝင်ကုန်စည်များရောင်းဝယ်ခြင်းသည် စားသုံးသူအခွင့်အရေးကို ချိုးဖောက်ရာရောက်သည့်အပြင် တရားမဝင်ကုန်သွယ်မှုပြုရာလည်းရောက်ကြောင်း၊ တရားမဝင်ကုန်သွယ်မှုပြုခြင်းဖြင့် နိုင်ငံတော်က ရသင့်ရထိုက်သည့်ဘဏ္ဍာငွေကို ဆုံးရှုံးစေသည့်အပြင် စားသုံးသူနစ်နာဆုံးရှုံးမှုများကိုလည်းဖြစ်ပေါ်စေနိုင်ပါကြောင်း၊ သို့ဖြစ်ပါ၍ တရားမဝင်ကုန်သွယ်မှုပြုခြင်းကို အထူးသတိပြုရှောင်ရှားကြရန်လိုပါကြောင်း စသည်ဖြင့်အသိပညာပေးပြောကြားခဲ့ပါသည်။

DOCA(ပဲခူး)

    စားသုံးသူရေးရာဦးစီးဌာန၊   မိုးညှင်းခရိုင်ဦးစီးမှူးရုံးမှ   ခရိုင်ဦးစီမှူး ဦးမောင်မောင်ခိုင်သည် (၁၂-၇-၂၀၂၃) ရက်နေ့၊ နံနက် (၁၀:၃၀) နာရီအချိန်တွင် မိုးညှင်းမြို့၊ အရှေ့စုရပ်ကွက်အတွင်းရှိ  ကုန်မျိုးစုံရောင်းချနေသော လုပ်ငန်းရှင်နှင့်တွေ့ဆုံဆွေးနွေးခဲ့ပါသည်။

  ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေတွင်ပါရှိသော စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ တစ်ဦးချင်း သော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုကြောင်း၊ စီးပွားရေးလုပ်ငန်းရှင်၏တာဝန်များဖြစ်သော ကုန်စည် (သို့) ဝန်ဆောင်မှု၏အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သောသတင်းအချက်အလက်များပေးခြင်း၊ စားသုံးသူကိုခွဲခြားမှုမရှိဘဲ ဖြောင့်မတ်မှန်ကန်စွာဆက်ဆံခြင်း၊ အရည်အသွေးစမ်းသပ်ရန်လိုအပ်သော ကုန်စည်နှင့်စပ်လျဉ်း၍ ဝယ်ယူခြင်းမပြုမီ စားသုံးသူများကို စမ်းသပ်နိုင်သည့်အခွင့်အရေးပေးခြင်း၊ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ ထပ်မံပေးချေရမည့်တန်ဖိုးကို စားသုံးသူက ဝယ်ယူအသုံးမပြုမီသိရှိစေရန် အတိအလင်းဖော်ပြပေးခြင်း၊ ဝန်ဆောင်မှုဆိုသည်မှာ လုပ်ငန်း (သို့မဟုတ်) လုပ်ဆောင်မှုအသွင်ဖြင့် စားသုံးသူ၏လိုအပ်ချက်ကို တန်ဖိုးဖြင့်ဖြစ်စေ၊ တန်ဖိုးမပါဘဲဖြစ်စေ ဖြည့်ဆည်းပေးသည့်ဆောင်ရွက်မှုကိုဆိုလိုကြောင်း၊ ဝန်ဆောင်မှုပေးခြင်းနှင့် စပ်လျဉ်းသည့်ဖော်ပြရမည့် အာမခံချက်များဖြစ်သော စားသုံးသူ၏လိုအပ်ချက်နှင့်ကိုက်ညီမှုရှိခြင်း၊ စားသုံးသူနှင့် သဘောတူညီထားသည့် ဝန်ဆောင်မှုတန်ဖိုးအတိုင်းပေးအပ်စေခြင်း စသည့်အချက်များကို ရှင်းလင်းဆွေးနွေးခဲ့ပြီးနောက် ကုန်အညွှန်းအမှတ်အသားဖော်ပြခြင်းဆိုင်ရာ  အသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(ကချင်)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ကြီးကြပ်မှုဖြင့် ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦးဇော်ထွန်းဦး၊ ပခုက္ကူမြို့နယ်တာဝန်ခံ ဦးဇော်မင်းဦးနှင့် ဝန်ထမ်းများအဖွဲ့တို့သည်   (၅-၇-၂၀၂၃) ရက်နေ့၊ နံနက် (၁၁:၃၀) နာရီအချိန်တွင် ပခုက္ကူမြို့ပေါ်ရှိ စက်သုံးဆီရောင်းချနေသော ဆီဆိုင်(၃)ဆိုင်သို့သွားရောက်၍ သတ်မှတ်ထားသော အခြေခံရည်ညွှန်းဈေးဖြင့် အမှန်တကယ်ရောင်းချမှုရှိ/မရှိနှင့် အချင်အတွယ်မှန်ကန်မှုရှိ/မရှိတို့ကို ကွင်းဆင်းစစ်ဆေးခဲ့ပါသည်။

   ဒုတိယခရိုင်ဦးစီးမှူးနှင့် ဝန်ထမ်းများသည် မြို့ပေါ်စက်သုံးဆီရောင်းချလျက်ရှိသော တောင်ဇလပ်၊ ရွှေဗျိုင်းဖြူ၊ Petro Top ဆီဆိုင်များကို သတ်မှတ်ထားသော အခြေခံရည်ညွှန်းဈေးဖြင့် ရောင်းချရန်၊ ဈေးနှုန်းများကိုလည်း အများပြည်သူသိရှိအောင် LED Board များတွင်ဖော်ပြပေးရန်၊ နေ့စဉ်ရောင်းချနေသော ဈေးနှုန်းများကိုလည်းဖော်ပြပေးရန်၊ အချင်အတွယ်မှန်ကန်မှုရှိစေရန်၊ စက်သုံးဆီများကို ပုံးများ၊ ပေပါအလိုက် ရောင်းချမည့်သူများကိုလည်း ရောင်းချခြင်းမပြုရန်နှင့် လုပ်ငန်းရှင်များအနေဖြင့် တရားမဝင် စက်ဆီ၊ ချောဆီများ တင်သွင်းရောင်းချခြင်းမပြုစေရန် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်သွားရန်နှင့် စက်သုံးဆီပြတ်လတ် မှုမရှိစေရေး ဆောင်ရွက်သွားရန်တို့ကို ရှင်းလင်းဆွေးနွေးခဲ့ပါသည်။

DOCA(မကွေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် သရက်ခရိုင်ဦးစီးမှူးရုံးမှ ဝန်ထမ်းများနှင့် ကံမမြို့နယ်တာဝန်ခံ ဒု-ဦးစီးမှူး ဒေါ်နွဲ့ယဉ်ဝင်းသည် သရက်ခရိုင်၊ ကံမမြို့ရှိ ကုန်စုံဆိုင်အရောင်းပိုင်ရှင်များနှင့် တစ်နိုင်တစ်ပိုင်ထုတ်လုပ်သည့်လုပ်ငန်းရှင်များ ကုန်စည်များတွင် ကုန်အညွှန်းအမှတ်အသားပြည့်စုံစွာထည့်သွင်းဖော်ပြလာစေရန်ရည်ရွယ်၍ အသိပညာပေးဟောပြောပွဲကို (၅-၇-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ကံမမြို့၊ မြို့နယ်စည်ပင်သာယာရေးအဖွဲ့၊ မြို့နယ်ခန်းမ၌ မြို့နယ်စည်ပင်ဦးစီးမှူးအပါအဝင် ဝန်ထမ်း(၆)ဦး၊ ကုန်စုံဆိုင်အရောင်းပိုင်ရှင်များနှင့် တစ်နိုင်တစ်ပိုင်ထုတ်လုပ်သည့် လုပ်ငန်းရှင်(၁၅)ဦးတို့ကို ထုတ်လုပ်သည့်ကုန်စည်များတွင် ကုန်အညွှန်းအမှတ်အသားပြည့်စုံစွာထည့်သွင်းဖော်ပြစေရေး အသိပညာပေးဆွေးနွေးဟောပြောခြင်းများဆောင်ရွက်ခဲ့ပါသည်။

 ထိုသို့ဆွေးနွေးဟောပြောမှုများဆောင်ရွက်ရာတွင် ကံမမြို့နယ်တာဝန်ခံ ဒေါ်နွဲ့ယဉ်ဝင်းက ကုန်စုံဆိုင်အရောင်းပိုင်ရှင်များနှင့် တစ်နိုင်တစ်ပိုင်ထုတ်လုပ်သည့် စီးပွားရေးလုပ်ငန်းရှင်များကို စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ပုဒ်မ(၄၃)အရ မည်သည့် စီးပွားရေးလုပ်ငန်းရှင်မဆို ပုဒ်မ(၄၁)၊ ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေဖော်ပြရာ၌ စီးပွားရေးလုပ်ငန်းရှင်များ လိုက်နာဆောင်ရွက်ရန်၊ ကုန်အညွှန်းအမှတ်အသားကို မြန်မာဘာသာဖြင့်ဖော်ပြခြင်းတွင် ကုန်စည်၏အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင်သတိပေးချက် စသည့်အချက်(၇)ချက်ကိုမဖြစ်မနေ ထည့်သွင်းဖော်ပြရန်၊ မြန်မာနိုင်ငံစားသုံးသူကာကွယ်ရေးကော်မရှင်က ၂၀၁၉ခုနှစ်၊ ဒီဇင်ဘာလ(၃)ရက်နေ့တွင် ညွှန်ကြားချက်အမှတ်(၂/၂၀၁၉)ဖြင့်ထုတ်ပြန်ခဲ့သည့် ကုန်စည်အုပ်စု(၈)မျိုးပါဝင်၍ ကုန်စည်တစ်ခုချင်းစီအလိုက် ကုန်အညွှန်းအမှတ်အသားကို မြန်မာဘာသာဖြင့်ဖော်ပြရာ၌ စီးပွားရေးလုပ်ငန်းရှင်များ လိုက်နာဆောင်ရွက်ရာတွင် အခက်အခဲမရှိစေရန်အတွက် ထုတ်ပြန်ခြင်းဖြစ်ကြောင်း၊ ကုန်စည်အုပ်စုအလိုက်ဖော်ပြရာတွင် (အမှန်ခြစ်)သည် မဖြစ်မနေဖော်ပြရန်လိုအပ်သည့် အညွှန်းအမှတ်အသားဖြစ်ပြီး (အမှားခြစ်)သည် မဖြစ်မနေဖော်ပြရန်မလိုအပ်ဘဲ ဖော်ပြလိုပါက ဖော်ပြနိုင်သည့်အညွှန်းအမှတ်အသားဖြစ်ပါကြောင်း၊ ဆက်လက်၍ ဒု-ကြီးကြပ်ရေးမှူး ဦးကျော်ရွှေက စီးပွားရေးလုပ်ငန်းရှင်များအား ကုန်ပစ္စည်းများထုတ်လုပ်ရာတွင် ထုတ်လုပ်ရက်စွဲနှင့် သက်တမ်းလွန်ရက်စွဲများကို ထည့်သွင်းဖော်ပြရမည်ဖြစ်ကြောင်း၊ ဈေးကွက်အတွင်းရှိ မိမိထုတ်လုပ်သောထုတ်ကုန်များသည် စားသုံးသူများအတွက် ဘေးအန္တရာယ်ကင်းရှင်းစေပြီး သတင်းအချက်အလက်များပြည့်စုံစွာထည့်သွင်းခြင်းတို့ကြောင့် စားသုံးသူများအနေဖြင့် ထုတ်လုပ်သူများအပေါ်ယုံကြည်လာပြီး စီးပွားရေးအကျိုးများပိုမိုဖြစ်ထွန်းလာမည်ဖြစ်ပါကြောင်း ဟောပြောဆွေးနွေးခြင်းများဆောင်ရွက်ခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)ပါ အသိပညာပေးလက်ကမ်းစာစောင်များဖြန့်ဝေပေးခဲ့ပါသည်။

DOCA(မကွေး)