HighLight News

         စားသုံးသူရေးရာဦးစီးဌာန၊ မကွေးခရိုင်၊ မကွေးမြို့နယ်ဦးစီးမှူး ဦးမျိုးဝင်း(စစ်ဆေးရေးအရာရှိ)နှင့် မကွေးခရိုင်ရုံးမှ  ဝန်ထမ်းများသည် (၅.၅.၂၀၂၂)ရက်နေ့ နံနက်(၁၀:၃၀)နာရီမှ (၁၁:၃၀)နာရီထိ မကွေးမြို့ အ.ထ.က (၁)လမ်း ကန်သာရပ်ရှိ သာလှ(စတိုး) ဆိုင်တွင် ရောင်းချနေသော စားသောက်ကုန်များအား ဌာနမှ သတ်မှတ်ထားသော ဥပဒေပါ ကုန်အညွှန်းအမှတ်အသားများ ပြည့်စုံမှန်ကန်စွာပါဝင်မှု ရှိ/မရှိ အသင့်စားမုန့် အမျိုးမျိုး ၊အချိုရည်များ၊ ပေါင်မုန့်၊ကိတ်မုန့်များသည် စားသုံးသူများအား ဘေးအန္တရာယ်ကင်းရှင်းမှု ရှိ/မရှိ ၊ ထုတ်ကုန်လုံခြုံစိတ်ချရမှုရှိ/မရှိ  စားသုံးသူကာကွယ်ရေး ဥပဒေ ၂၀၁၉နှင့်အညီ  ကုန်အညွှန်းအမှတ်အသား များပြည့်စုံမှန်ကန်စွာဖော်ပြထားမှုရှိ/မရှိတို့ကို စစ်ဆေးရေးအရာရှိမှ ဦးဆောင်ပြီး ကိုဗစ်-၁၉ စည်းကမ်းချက် များနှင့်အညီ  စျေးကွက်စောင့်ကြည့် စစ်ဆေးခဲ့ပါသည်။

            စားသောက်ကုန် မုန့်အမျိုးမျိုးရောင်းချသော လုပ်ငန်းရှင်အား စားသုံးသူကာကွယ်ရေးဥပဒေ -၂၀၁၉ အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသားပြည့်စုံစွာ ဖော်ပြထားသော ကုန်စည်များကိုသာ ရောင်းချရန်နှင့် မြန်မာနိုင်ငံစားသုံးသူကာကွယ်ရေး ကော်မရှင်မှ ထုတ်ပြန် ထားသည့် ညွှန်ကြားချက်အမှတ်(၂/၂၀၁၉)အရ အသင့်စားမုန့်အမျိုးမျိုးတွင်  ထားသိုသိမ်းဆည်းပုံအညွှန်း နှင့်ဓါတ်မတည့်ကြောင်းဖော်ပြချက်များကို မြန်မာဘာသာဖြင့် မဖြစ်မနေဖော်ပြရမည်ဟု ဖော်ပြထား ကြောင်း၊ ကုန်အညွှန်းအမှတ်အသားနှင့်စပ်လျဉ်း၍  ၂၀၂၀ ခုနှစ် မတ်လ(၁၆)ရက်နေ့ မှ စတင်အာဏာ သက်ရောက်နေပြီဖြစ်ကြောင်းနှင့် ကုန်အညွှန်းအမှတ်အသားပြည့်စုံစွာဖော်ပြမှုမရှိပါက ရောင်းချဖြန့်ဖြူးခွင့် မရှိဘဲဥပဒေအရ အရေးယူ‌ခံရမည်ဖြစ်ကြောင်း၊ လိုက်နာရန်ပျက်ကွက်သော လုပ်ငန်းရှင်အား စားသုံးသူ ကာကွယ်ရေးဥပဒေ ပုဒ်မ(၇၃)အရ (၂)နှစ်ထက်မပိုသော ထောင်ဒဏ်ဖြစ်စေ၊ ကျပ်သိန်း(၂၀၀)ထက်မပိုသော ငွေဒဏ်ဖြစ်စေ၊ ပြစ်ဒဏ်(၂)ရပ်လုံးဖြစ်စေ အရေးယူခံရနိုင်ကြောင်း အသိပညာပေးဆွေနွေးခဲ့ပြီး ကုန်အညွှန်း အမှတ်သားနှင့်ပတ်သက်၍ အခက်အခဲရှိပါက “စားသုံးသူ‌‌ရေးရာဦးစီးဌာန”သို့  လာရောက်တိုင်ပင် ဆွေးနွေး နိုင်ကြောင်းနှင့်လုပ်ငန်းရှင်များအနေဖြင့်လည်း မိမိတို့ကိုယ်တိုင်ပင် စားသုံးသူများဖြစ်ကြောင်း၊ စားသုံးသူ များအနေဖြင့် စားသုံးသူအခွင့်အရေးများ ဆုံးရှုံးနစ်နာမှုရှိပါက စားသုံးသူရေးရာဦးစီဌာနသို့ လူကိုယ်တိုင် လာရောက်တိုင်ကြားနိုင်သလို (DOCA  Myanmar Application နှင့် စားသုံးသူရေးရာဦးစီးဌာန၏ Website doca.gov.mm တွင် ဝင်ရောက်ဖြည့်စွက်တိုင်ကြားနိုင်ကြောင်း ဆွေးနွေးပြောကြားခဲ့ပါသည်။

DOCA(မကွေး)

            စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ တာချီလိတ်မြို့နယ်တာဝန်ခံရုံးမှ ဝန်ထမ်းများသည် အစားအသောက်နှင့် ဆေးဝါးကွပ်ကဲမှုဦးစီးဌာနမှ ဝန်ထမ်းများပူးပေါင်း၍ ၂၀၂၂ခုနှစ်၊ မေလ၊ (၅) ရက်နေ့၊ နံနက်(၁၀:၀၀)နာရီအချိန်တွင် တာချီလိတ်မြို့နယ်အတွင်းရှိ ဆေးဝါးအရောင်းဆိုင်များတွင် Bella Plus Plaster များကို  ထုတ်လုပ်သည့်နိုင်ငံ၊ ထုတ်လုပ်သည့်ကုမ္ပဏီ၊ တင်သွင်းသည့်ကုမ္ပဏီ၊ ဆေးဝါးမှတ်ပုံတင်အမှတ်နှင့် Import Resgistration NO.(IR) များဖော်ပြ၍ စနစ်တကျရောင်းချမှုရှိစေရေး ကွင်းဆင်းစစ်ဆေးခြင်းဆောင်ရွက်ခဲ့ပါသည်။

       အဆိုပါ Bella Plus Plaster များကို တာချီလိတ်မြို့နယ်ရှိ ဆေးဝါးအရောင်းဆိုင်များတွင် ဖြန့်ဖြူးရောင်းချနေမှု မရှိကြောင်းတွေ့ရှိရပြီး မြို့နယ်တာဝန်ခံက ဆေးဝါးအရောင်းဆိုင်များကို စားသုံးသူကာကွယ်ဉပဒေ၊ အခန်း(၉)ပါ “စားသုံးသူ၏အခွင့်အရေးနှင့်တာဝန်များ”နှင့် အခန်း(၁၀)ပါ “စီးပွားရေးလုပ်ငန်းရှင်၏တာဝန်များ”အား သိရှိနိုင်စေရန်အတွက် အသိပညာပေးဆွေးနွေးခြင်းများ ဆောင်ရွက်ခဲ့ပါသည်။

DOCA(ရှမ်း)

           (၅-၅-၂၀၂၂)ရက်နေ့တွင် ရခိုင်ပြည်နယ် သံတွဲခရိုင် စားသုံးသူရေးရာဦးစီးဌာနမှ  ဦးဆောင်၍ သံတွဲခရိုင် အစားအသောက်နှင့်‌ဆေးဝါးကွပ်ကဲရေးဦးစီးဌာန၊ မြို့နယ်စည်ပင်၊ မြို့နယ်ရဲတပ်ဖွဲ့တို့ ပါဝင်သောပူးပေါင်းအဖွဲ့သည် သံတွဲမြို့ ဒွါရာဝတီမြို့သစ် (ခ)ရပ်ကွက် (၇)လမ်းရှိ AWW  သောက်ရေသန့်စက်ရုံသို့ သွားရောက်၍ ထုတ်ကုန်လုံခြုံစိတ်ချရမှုရှိစေရေး ဘေးအန္တရာယ်ကင်းရှင်းသော ကုန်ပစ္စည်းထုတ်လုပ်ရောင်းချရေးနှင့် သောက်ရေသန့်ဗူးပေါ်တွင် ဖော်ပြထားသည့် ကုန်အညွှန်းအမှတ်အသားများ ပြည့်စုံစွာဖော်ပြစေရန် ရည်ရွယ်၍ သွားရောက်ကွင်းဆင်းစစ်ဆေးခဲ့ပါသည်။

          ထိုသို့စစ်ဆေးရာတွင် သောက်ရေသန့်ထုတ်လုပ်သည့် လုပ်ငန်းရှင်နှင့် စက်ရုံဝန်ထမ်းများအား စားသုံးသူရေးရာဦးစီးဌာနမှ ၂၀၁၉ စားသုံးသူကာကွယ်ရေးဥပဒေနှင့်အညီ ကုန်ပစ္စည်းပေါ်တွင် ဖော်ပြရမည့် ကုန်အညွှန်းအမှတ်အသားများအား ပြည့်စုံစွာဖော်ပြစေရေး၊  စီးပွားရေးလုပ်ငန်းရှင်များ လိုက်နာ‌ဆောင်ရွက်ရမည့် တာဝန်နှင့်တားမြစ်ချက်များ၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ သောက်ရေသန့်ထုတ်လုပ်သည့် စက်ရုံနှင့်စက်ရုံ ပတ်ဝန်းကျင်သန့်ရှင်းသာယာလှပစေရေး၊ အသုံးပြုသော သောက်ရေသန့်ဗူးခွံများ သန့်ရှင်းမှုရှိစေ‌ရေး၊ ကောင်းမွန်သောသန့်ရှင်းမှုစနစ်၊ ကောင်းမွန်သောထုတ်လုပ်မှုစနစ်နှင့်အညီ ထုတ်လုပ်စေရေးအတွက်  အသိပညာပေးဆွေးနွေးခဲ့ပါကြောင်း သတင်းရရှိပါသည်။

DOCA(ရခိုင်)

           စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်၍ ဝန်ထမ်း(၁)ဦး၊ တိုင်းဒေသကြီးဦးစီးမှူးရုံးမှ ဝန်ထမ်း(၁)ဦး၊ တိုင်းဒေသကြီးအစားအသောက်နှင့်ဆေးဝါးကွပ်ကဲရေးဦးစီးဌာနမှ ဝန်ထမ်း (၂) ဦးနှင့် ခရိုင်တိုင်းရင်းဆေးကုဌာနမှ ဝန်ထမ်း (၁)ဦး စုစုပေါင်း (၆)ဦး တို့သည် (၅.၅.၂၀၂၂)ရက်နေ့၊ နံနက် (၁၀:၀၀) နာရီ အချိန်တွင် မုံရွာမြို့ပေါ်ရှိ ဆေးနှင့်ဆေးပစ္စည်း အ‌ရောင်းဆိုင်များသို့  တစ်ပတ်အတွင်းဆေးဝါးရောင်းချမှု၊ ကျန်ရှိမှုနှင့် လိုအပ်စာရင်းများကောက်ယူခြင်းနှင့် ဆေးဈေးနှုန်းများကောက်ယူခြင်း၊ ဘေးအန္တရာယ်ရှိကြောင်း သက်ဆိုင်ရာများမှ ထုတ်ပြန်ထားသည့် ဆေးဝါးနှင့် ဆေးပစ္စည်းများ ရောင်းချနေခြင်းရှိ/မရှိစစ်ဆေးခြင်း၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားများနှင့် ဆေးဝါးမှတ်ပုံတင်အမှတ်(IR)များဖော်ပြထားခြင်းမရှိသော ဆေးနှင့်ဆေးပစ္စည်းများ ဈေးကွက်အတွင်းရောင်းချနေမှုရှိ/မရှိ၊ ကွင်းဆင်းစစ်ဆေးခဲ့ကြောင်းနှင့် စားသုံးသူရေးရာအသိပညာပေးဆွေးနွေးခြင်းများ ဆောင်ရွက်ခဲ့ကြောင်း သတင်းရရှိပါသည်။

DOCA(စစ်ကိုင်း)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ ပခုက္ကူခရိုင်ဦးစီးမှူးရုံးမှ ဆိပ်ဖြူမြို့နယ်တာဝန်ခံ ဦးဇော်နေလင်းနှင့်ဝန်ထမ်းများသည် မိတ်ဖက်ဌာန၊ မြို့နယ်စည်ပင်သာယာရေးအဖွဲ့၏ ဦးဆောင်မှုဖြင့် (၁.၅.၂၀၂၂)ရက်နေ့၊ နံနက်  (၀၉:၃၀)နာရီ အချိန်တွင် ထုတ်ကုန်များလုံခြုံစိတ်ချရမှုရှိစေရေးအတွက် ဆိပ်ဖြူမြို့ ယောဝရပ်ကွက်ရှိ "လင်း"သောက်ရေသန့်လုပ်ငန်း၊ အနောက်ပိုင်းရပ်ကွက်ရှိ"ယောနဒီ" နှင့် "ကြည်သာ" သောက်ရေသန့်လုပ်ငန်းများသို့ ကွင်းဆင်းစစ်ဆေး အသိပညာပေးလုပ်ငန်းများ ဆောင်ရွက်ခဲ့ပါသည်။

           အသိပညာပေးဆွေးနွေးခဲ့ရာတွင်ဆိပ်ဖြူမြို့နယ်တာဝန်ခံဦးဇော်နေလင်းမှ ရေသန့်လုပ်ငန်းရှင် များအား စားသုံးသူကာကွယ် ရေးဥပဒေပါ စီးပွားရေးလုပ်ငန်းရှင်များ၏တာဝန်များ ကုန်အညွှန်း အမှတ်အသားနှင့်စပ်လျဉ်း၍ ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရ အရေးယူခြင်းများ၊ တားမြစ်ချက်များ၊ ပြစ်မှုပြစ်ဒဏ်များနှင့် စားသုံးသူအခွင့်အရေးများကို သိရှိလိုက်နာစေရန် အသေးစိတ်ရှင်းလင်းဆွေးနွေးခဲ့ပြီး ကုန်အမှတ်တံဆိပ်များအား ဈေးကွက်အတွင်း ဖြန့်ဖြူးရောင်းချ ရာတွင် စိစစ်ခွင့်ပြုချက်ရရှိထား သည့်အတိုင်း ထုတ်လုပ်ရောင်းချ၍ ကုန်စည်ပေါ်တွင် ကုန်အမှတ် တံဆိပ်များကို မြန်မာဘာသာဖြင့် ပြည့်စုံစွာထည့်သွင်းဖော်ပြရောင်းချရမည်ဖြစ်ကြောင်း၊ စိစစ်ခွင့်ပြု ချက်ရရှိသော အမှတ်တံဆိပ်တွင် ပါရှိသည့်အတိုင်း ဖော်ပြထားခြင်းမရှိဘဲ ကုန်စည်များကို ရောင်းချခြင်းတွေ့ရှိပါက ကုန်အမှတ် တံဆိပ်ခွင့်ပြုခြင်းများ ပြန်လည်သိမ်းဆည်းသွားမည် ဖြစ်ကြောင်း အသေးစိတ်ရှင်းလင်းဆွေးနွေးခဲ့ ပါသည်။

         ဒု-ဦးစီးမှူးဒေါ်မြင့်မြင့်သန်းမှ ရေသန့်လုပ်ငန်းရှင်များအား လူတိုင်းသည် ကျန်းမာစွာဖြင့် အသက်ရှည်စွာ နေထိုင်နိုင်ရေးအတွက် ရေကို နေ့စဉ်သောက်သုံးရ၍ အဓိကအရေးပါသော ကုန်စည်တစ်ခုဖြစ်ကြောင်း၊ ရေသန့်ထုတ်လုပ်ရာတွင် အရည်အသွေးပြည့်မီသော သောက်ရေသန့်ကိုသာ ထုတ်လုပ်ရောင်းချသင့်ကြောင်း၊ စားသုံးသူများအနေဖြင့် ကုန်ပစ္စည်း၏တန်ဖိုးနှင့်အညီ အပြည့်အဝပေး၍ ဝယ်ယူသုံးစွဲခြင်းဖြစ်ကြောင်း၊ လုပ်ငန်းရှင်များအနေဖြင့်လည်း အတ္တ၊ ပရမျှတစွာဖြင့် မိမိတို့ ထုတ်လုပ်သောရေကို အဆင့်ဆင့်ကျိုချက်ပြီး အမှုန်အနည်များမပါရှိသော သန့်စင်သည့်ရေများကိုသာ ရေသန့်ဗူးအတွင်းထည့်၍ ရောင်းချပေးစေလိုကြောင်း၊ ရောင်းချရာတွင်ရေသန့်ဗူးများကိုလည်း သန့်သန့်ရှင်းရှင်းဖြင့် ပြုလုပ်ဆောင်ရွက်ပြီးမှသာ ရောင်းချရန်လိုအပ်ကြောင်း၊ ရေသန့်လုပ်ငန်းရှင်များအနေဖြင့် မိမိကုန်စည်နှင့်ပတ်သက်၍ ဘေးအန္တရာယ်ကင်းရှင်းမှုကိုလည်း အာမခံမှုပေးရမည် ဖြစ်ကြောင်း၊ ကုန်စည်ကြောင့် စားသုံးသူအနေနှင့်ထိခိုက်နစ်နာမှုရှိပါက တာဝန်ယူဖြေရှင်းပေးရမည်ဖြစ်ကြောင်း၊ ဆောင်ရွက်ပေးနိုင်ခြင်းမရှိပါက စားသုံးသူမှ တိုင်းကြားနိုင်သည့် အခွင့်အရေးများရှိကြောင်းနှင့် ရေသန့်လုပ်ငန်းရှင်များနှင့် အလုပ်သမားဝန်ထမ်းများကို စီးပွားရေးလုပ်ငန်းရှင်၏လိုက်နာရမည့်တာဝန်များနှင့် စာသုံးသူများဘက်မှ ရယူတောင်းဆိုနိုင်သည့် အခွင့်အရေးများကို သိရှိရန်အတွက် အသေးစိတ်ရှင်းလင်းဆွေးနွေးခဲ့ပြီး စားသုံးသူကာကွယ်ရေးဆိုင်ရာ အသိပညာပေး လက်ကမ်းစာစောင်များ ဖြန့်ဝေပေးခဲ့ပါသည်။ မြို့နယ်စည်ပင်အမှုဆောင်အရာရှိ ဦးမင်းစည်သူမှ လုပ်ငန်းရှင်များအနေဖြင့် ရေသန့်များကို အဆင့်ဆင့်ကျိုချက်ထုတ်လုပ်ခြင်းမရှိဘဲ ရေတွင်းမှရေကို တိုက်ရိုက် စက်ဖြင့်ခုတ်ပြီး ရေသန့်ဗူးများအတွင်းသို့ထည့်၍ အခြားမြို့နယ်များတွင် ရောင်းချနေကြောင်း သတင်းရရှိ၍ ကွင်းဆင်းစစ်ဆေးခြင်းဖြစ်ကြောင်း၊ ရေသန့်လုပ်ငန်းရှင်များအား ကျိုချက် သန့်စင်ပြီးစီးကြောင်း အထောက်အထားများနှင့်တကွ စစ်ဆေးပြီးသော ရေသန့်နမူနာများကို မြို့နယ်စည်ပင်ရုံးသို့ အမြန်ဆုံးလာရောက် ပို့ပေးစေလိုကြောင်းနှင့် ရေသန့်စက်ရုံဝန်းအတွင်း၌ သန့်ရှင်းသပ်ရပ်စွာဖြင့် ရေသန့်များကို ထုတ်လုပ်ရောင်းချစေလိုကြောင်း အသေးစိတ်ရှင်းလင်း ဆွေးနွေးခဲ့ပါသည်။

DOCA(မကွေး)