HighLight News

                 စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေး သည် ဒုတိယမြို့နယ်အုပ်ချုပ်ရေးမှူး ဦးထွန်းထွန်းလင်း ဦးဆောင်၍ အထွေထွေအုပ်ချုပ်ရေးဦးစီး ဌာန၊ စိုက်ပျိုးရေးဦးစီးဌာန၊ မွေးမြူရေးနှင့်ကုသရေးဦးစီးဌာနတို့မှ မြို့နယ်ဦးစီးမှူးများပါဝင်သော ဌာနဆိုင်ရာ ပူးပေါင်းအဖွဲ့နှင့်အတူ မေလ ၆ ရက် မွန်းလွဲ ၂ နာရီတွင် ရေတာရှည်မြို့နယ် ခင်တန်းကြီးကျေးရွာမှ တောင်သူလယ်သမား ၃၀ ဦးအား ကျေးရွာဘုန်းတော်ကြီးကျောင်း၌ တွေ့ဆုံပြီး စားသုံးသူကာကွယ်ရေးနှင့် ပြည်တွင်းကုန်သွယ်မှုဖွံ့ဖြိုးရေးဆိုင်ရာများကို ဟောပြောခဲ့ပါသည်။

              ထိုသို့ တွေ့ဆုံရာတွင် မြို့နယ်တာဝန်ခံ ဦးဇော်ဇော်ထွေးက စားသုံးသူအခွင့်အရေးနှင့် စားသုံးသူနစ်နာဆုံးရှုံးမှုများ မဖြစ်စေရေးအတွက် ဆောင်ရွက်ချက်များ၊ စားသုံးသူနစ်နာဆုံးရှုံးမှုများ ဖြစ်ပေါ်ပါက တိုင်ကြားနိုင်သည့်အကြောင်းများကိုလည်းကောင်း၊ ပြည်တွင်းကုန်သွယ်မှုဖွံ့ဖြိုးရေး အတွက်  ဈေးနှုန်းဈေးကွက် သတင်းများ၊ သီးနှံများ၏ စိုက်အောင်ထွက် စားသုံးပိုလျှံ သတင်းအချက်အလက်များ ရယူစုဆောင်း၍ တင်ပြဆောင်ရွက်ပေးသည့် အခြေအနေများ၊ သီးနှံအစုအဖွဲ့များ ဖွဲ့စည်း၍ စုပေါင်းဆောင်ရွက်သည့် အလေ့အထများရှိစေရေးအတွက် ဆောင်ရွက်ပေးသည့် အခြေအနေများကိုလည်းကောင်း၊ ကျန်းမာရေးဌာနက အကြံပြုထားသည့် လူတစ်ဦး စားသုံးသင့် သည့် ဆီပမာဏထက်ကျော်လွန်၍ စားသုံးခြင်းမပြုခြင်းဖြင့် ကျန်းမာရေးနှင့်ညီညွတ်သည့်အပြင် မိသားစုစီးပွားရေးကိုလည်း အထောက်အကူပြုမည့်အခြေအနေများ၊ မြေပဲ၊ နှမ်း၊ နေကြာ တိုးချဲ့ စိုက်ပျိုးခြင်းဖြင့် ကျန်းမာရေးနှင့်ညီညွတ်သည့် စားသုံးဆီများကို စားရမည့်အပြင် ပြည်တွင်း စားသုံးဆီဖူလုံရေးအတွက်လည်း အထောက်အကူပြုမည့် အခြေအနေများကို ရှင်းလင်းပြောကြား ခဲ့ပါသည်။

              ဆက်လက်၍ ရေတာရှည်မြို့နယ်တာဝန်ခံသည် ပူးပေါင်းအဖွဲ့ဝင်များနှင့်အတူ ညနေ ၄ နာရီတွင် ဇလုတ်ကြီးကျေးရွာမှ တောင်သူလယ်သမား ၅၆ ဦးတို့အား ကျေးရွာဘုန်းတော်ကြီးကျောင်း၌ တွေ့ဆုံပြီး မြို့နယ်တာဝန်ခံဦးဇော်ဇော်ထွေးက စားသုံးသူကာကွယ်ရေးနှင့် ပြည်တွင်းကုန်သွယ်မှုဖွံ့ဖြိုးရေးဆိုင်ရာများကို ဟောပြောခဲ့ကြောင်း သိရပါသည်။

DOCA(ပဲခူး)

      စိုက်ပျိုးရေး၊ မွေးမြူရေးနှင့်ကုန်ထုတ်လုပ်မှု ဖွံ့ဖြိုးတိုးတက်ရေးလုပ်ငန်းများ ဆောင်ရွက်ရန်အတွက် ပဲခူးတိုင်းဒေသကြီးအတွင်းရှိ ကဏ္ဍအလိုက် သက်ဆိုင်သောဌာနများမှ ခရိုင်/မြို့နယ်အလိုက် ကျေးရွာအုပ်စုများအရောက် ကွင်းဆင်းဆောင်ရွက်ရန် ပဲခူးတိုင်းဒေသကြီးအစိုးရအဖွဲ့၏ ဝန်ကြီးချုပ်က လမ်းညွှန်ခဲ့ပါသဖြင့် ပြည်ခရိုင်၊ စားသုံးသူရေးရာဦးစီးဌာနအနေဖြင့် ကဏ္ဍအလိုက် သက်ဆိုင်ရာဌာနဆိုင်ရာများနှင့် ပူးပေါင်းပါဝင်၍ ခရိုင်အတွင်းရှိ မြို့နယ်များအလိုက် ကျေးရွာများသို့ ကွင်းဆင်း ဆောင်ရွက်လျှက်ရှိပါသည်။

        စိုက်ပျိုးထုတ်လုပ်သူများ၊ စီးပွားရေးလုပ်ငန်းရှင်များ၊ မွေးမြူရေးလုပ်ငန်းရှင်များနှင့် တွေ့ဆုံဆွေးနွေးခဲ့ရာတွင် မိမိတို့ဌာနမှ ဆောင်ရွက်နေသည့် ပြည်တွင်း ကုန်သွယ်ရေးဖွံ့ဖြိုးတိုးတက်မှုနှင့် သုတေသနဆိုင်ရာ ကိစ္စရပ်များ၊ နိုင်ငံအတွင်း စားသုံးဆီ ဖူလုံရေးအတွက် နေကြာသီးနှံတိုးချဲ့စိုက်ပျိုးရန်ရှိသည့် အခြေအနေများအား စားသုံးသူသုံးစွဲမှု လျော့ချသုံးစွဲရန်နှင့် အလွန့်အကျွံသုံးစွဲပါက ဖြစ်ပေါ်လာမည့် ဘေးထွက်ဆိုးကျိုး အသိပညာပေးရေးလုပ်ငန်းများနှင့် အစုအဖွဲ့ အသင်းအဖွဲ့များ ဖွဲ့စည်းထားပါက ရရှိလာမည့် အကျိုးကျေးဇူးများအကြောင်း သက်ဆိုင်ရာ မိတ်ဖက်ဌာနများနှင့် ပူးပေါင်းကွင်းဆင်း ဆောင်ရွက်သွားမည်ဖြစ်ကြောင်း ဆွေးနွေးပြောကြားခဲ့ပါသည်။

        ပြည်ခရိုင်အနေဖြင့် မေလ ပထမပတ်အတွင်း ပြည်၊ ပေါင်းတည်၊ သဲကုန်း၊ ရွှေတောင်နှင့် ပေါက်ခေါင်းမြို့နယ်များရှိ ကျေးရွာအုပ်စု (၉)အုပ်စု၊ ကျေးရွာ (၉)ရွာနှင့် မြို့ (၁)မြို့အား ကွင်းဆင်း ဆောင်ရွက်ပြီး ဖြစ်ပါသည်။

DOCA(ပဲခူး)

              ဧရာဝတီတိုင်းဒေသကြီး ဖျာပုံခရိုင်စားသုံးသူရေးရာဦးစီးဌာန၊ ခရိုင်ဦးစီးမှူးဦးထွေးသိမ်း ဦးဆောင်၍ ဒုတိယ ခရိုင်ဦးစီးမှူး ဦးမိုးမင်းသန်း၊ မြို့နယ်တာဝန်ခံဦးမင်းဇော်နှင့် စည်ပင်သာယာရေး အဖွဲ့မှလက်ထောက်ညွှန်ကြားရေးမှူး ဦးသန့်ဇင်ဦးတို့နှင့်အတူ ဖျာပုံမြို့၊ မြို့မဈေးရှိ ဈေးတာဝန်ခံရုံး တွင်ဧပြီလ(၃၀)ရက်နေ့၊နေ့လည်(၁၄:၀၀)နာရီတွင် မြို့နယ်စားသုံးဆီကုန်သည်များနှင့် ကုန်မျိုးစုံ အရောင်းဆိုင်လုပ်ငန်းရှင်(၂၄)ဦးတို့အား စားသုံးသူကာကွယ်ရေး အသိပညာပေးဟောပြောဆွေးနွေး ခဲ့ကြောင်းသိရသည်။

          အဆိုပါဟောပြောပွဲတွင် ခရိုင်ဦးစီးမှူးက မြို့နယ်ဆီကုန်သည် လုပ်ငန်းရှင်များအနေဖြင့် စားဆီများဖြန့်ဖြူးသယ်ယူပို့ဆောင်ရာတွင် စားသုံးသူပြည်သူများ ဘေးဉပဒ်အန္တရာယ်ကင်းရှင်းစေ ရန်အတွက် မေလ(၁)ရက်နေ့မှစတင်ပြီး ဆီကန်မှထုတ်ယူသော စားဆီများအား Food  Grade အဆင့်ရှိ အဝါရောင်ပေပါအသစ်(သို့မဟုတ်)သန့်စင်ပြီး ပေပါအဟောင်း၊ စားသုံးဆီသီးသန့်သယ် ဆောင်သော ဘောက်ဆာယာဉ်များနှင့် သန့်စင်ပြီး Food  Grade  Tank များကိုသာ ဆီဖြည့်သွင်း ပေးမည်ဖြစ်ပြီး သတ်မှတ်ချက်နှင့် ကိုက်ညီမှုမရှိသည့် ပေပါများ၊  ဘောက်ဆာယာဉ်များအတွင်းသို့ ဆီဖြည့်သွင်းပေးမည်မဟုတ်ကြောင်း၊ ဈေးကွက်အတွင်း ဖြန့်ဖြူးရာ၌ ဓါတုဗေဒပစ္စည်းများထည့် သွင်းအသုံးပြုထားသည့် ပုံးများ၊ ပေပါများတွင် စားအုန်းဆီများထည့်သွင်းသုံးစွဲခြင်းမပြုဖို့လိုပါ ကြောင်း၊ ဌာနအနေဖြင့် ပြည်ပမှတင်သွင်းလာသည့်စားသုံးဆီများ အရည်အသွေးပြည့်မီရေး၊ပြည် သူများကျန်းမာရေးနှင့်ညီညွှတ်ပြီးဘေးအန္တရာယ်ကင်းရှင်းသည့် စားသုံးဆီများကို သုံးစွဲနိုင်ရေး၊ဈေး ကွက်အတွင်းဖြစ်သင့်ဖြစ်ထိုက်သည့် ဈေးနှုန်းဖြင့် ဝယ်ယူသုံးစွဲနိုင်ရေးအတွက် ပြည်ပမှ စားသုံး ဆီတင် သွင်းခြင်း၊ သိုလှောင်ခြင်း၊ ဖြန့်ဖြူးခြင်းလုပ်ငန်းများကို ထိန်းကျောင်းကြပ်မတ်ဆောင်ရွက် လျက်ရှိကြောင်း၊ လုပ်ငန်းရှင်များအနေဖြင့် ညွှန်ကြားချက်များကို လိုက်နာဆောင်ရွက်ကြရန်နှင့် ဆောင်ရွက်ထားရှိမှုအခြေအနေများကိုလည်း ဌာနက ကွင်းဆင်းစစ် ဆေးကြပ်မတ်ဆောင်ရွက်သွား မည်ဖြစ်ကြောင်းအသိပေးပြောကြားပါသည်။

          ဆက်လက်၍ ဒုတိယခရိုင်ဦးစီးမှူးက ကုန်မျိုးစုံအရောင်းဆိုင် လုပ်ငန်းရှင်များအား စားသုံးသူ ကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ရှင်းလင်း ဟောပြောခြင်းဖြင့်လည်းကောင်း၊ မြို့နယ်တာဝန်ခံက ဈေးကွက်စောင့်ကြည့်စစ်ဆေးမှုနှင့်အရေးယူ ဆောင်ရွက်မှုတို့ကို ရှင်းလင်း ဆွေးနွေးခြင်းဖြင့် လည်းကောင်း၊ စည်ပင်သာယာရေးအဖွဲ့မှ လက်ထောက်ညွှန်ကြားရေးမှူးက စားသုံးသူရေး ဦးစီးဌာနသည် စည်ပင်သာယာရေးအဖွဲ့နှင့် မိတ်ဖက်ဌာနဖြစ်ပါကြောင်း၊ဈေးသူဈေးသားများအနေဖြင့် ပြဌာန်းထားသော ဥပဒေ၊ ညွှန်ကြားချက်၊ အသိပေးကြေညာချက်များအား လိုက်နာဆောင်ရွက်ကြရန်လိုအပ်ကြောင်း၊ မိမိတို့အနေဖြင့် ပူးပေါင်း ဆောင်ရွက်သွားမည်ဖြစ်ကြောင်းဟောပြောဆွေးနွေးပါသည်။

           ထို့နောက် တက်ရောက်လာသူများအား စားအုန်းဆီများဖြန့်ဖြူး၊ သယ်ယူပို့ဆောင်ရာတွင် လိုက်နာဆောင်ရွက်ရမည်အသိပေးကြေညာချက် လက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး ညောင်တုန်းမြို့နယ်၊ မြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် စားသုံးသူကာကွယ်ရေး အသိပညာပေး ဟောပြောပွဲကို (၅.၅.၂၀၂၂) ရက်နေ့ နံနက် (၀၉:၀၀) မှ (၁၀:၁၅) နာရီအချိန်ထိ ညောင်တုန်းမြို့နယ် သခွတ်ချောင်းကျေးရွာ ခွန်အားဆန်စက်တွင် ကျင်းပပြုလုပ်ခဲ့ပါသည်။

          အဆိုပါ ဟောပြောပွဲတွင် ဌာနဆိုင်ရာ မိတ်ဖက်ဌာနများဖြစ်သော ကျန်းမာရေးဦးစီးဌာန၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ပါဝင်ပြီး အသိပညာပေး ဟောပြောမှုများ ပြုလုပ်ခဲ့ကြပါသည်။

          ဟောပြောပွဲတွင် ညောင်တုန်းမြို့နယ်ဦးစီးမှူးက စားသုံးသူကာကွယ်ပေးရေးဥပဒေများအကြောင်း၊ စားသုံးသူအခွင့်အရေးများအကြောင်း၊  ကုန်အညွှန်းအမှတ်အသားနှင့်စပ်လျဉ်းသည့် ကိစ္စရပ်များအကြောင်း ဟောပြောခဲ့ပါသည်။

          ဆက်လက်၍ ကုန်စည်၊ ဝန်ဆောင်မှုနှင့် စပ်လျဉ်း၍ စားသုံးသူများနစ်နာမှုရှိလာပါက အရေးဆို တိုင်ကြားနိုင်သည့် Call Center 1535 သို့ ဆက်သွယ် မေးမြန်းတိုင်ကြားနိုင်ပြီဖြစ်ကြောင်း၊ စားသုံးသူများသာမက ကုန်စည်၊ ဝန်ဆောင်မှု ထုတ်လုပ်ဖြန်းဖြူးရောင်းချနေသော လုပ်ငန်းရှင်များပါ စားသုံးသူကာ ကွယ်ရေးကိစ္စရပ်များနှင့်ပတ်သက်၍  သိရှိလိုသည်များကို မည်သူမဆို Call Center 1535  မေးမြန်းနိုင်ပါကြောင်း၊ အသိပညာပေးဟောပြောခဲ့ပြီး တက်ရောက်လာသူများမှ စားသုံးသူကာကွယ်ပေးရေးနှင့်စပ်လျဉ်း၍ သိရှိလိုသည်များကို မေးမြန်းကြရာ မြို့နယ်ဦးစီးမှူးမှ အကျယ်တဝင့်ရှင်းလင်း ဖြေကြားပြီး လက်ကမ်းစာစောင်များဖြန့်ဝေခဲ့ကြောင်းနှင့် ဟောပြောပွဲသို့ ဆန်စက်လုပ်သား (၂၅) ဦး တက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး အစည်းအဝေးခန်းမ၌ (၉.၅.၂၀၂၂) ရက်နေ့ တွင် နံနက် (၁၀:၀၀) အချိန်မှ စ၍ မအူပင်မြို့ပေါ်ရှိ ဆီလက်ကားရောင်းချသူများအား ဖိတ်၍ စားသုံးသူကာကွယ်ပေးရေး ဥပဒေအကြောင်းနှင့် ပြည်ပမှ တင်သွင်းလာသည့် စားအုံးဆီများ သယ်ယူပို့ဆောင်ရာတွင် ညွှန်ကြားချက်များကို လိုက်နာဆောင်ရွက်ရန် အသိပညာပေး ဟောပြောပွဲကို ကျင်းပပြုလုပ်ခဲ့ပါသည်။

          အဆိုပါဟောပြောပွဲတွင် မအူပင်မြို့နယ်တာဝန်ခံ ဦးအောင်ဇော်ဦးမှ အဖွင့်အမှာစကားပြောကြားရာတွင် စားသုံးသူကာကွယ်ပေးရေးဥပဒေ၏ အခန်း(၁၀) ပါ စီးပွားရေးလုပ်ငန်းရှင်များ၏ တာဝန်များ၊ အခန်း (၁၁) ပါ ကုန်စည်နှင့်စပ်လျဉ်း၍ အာမခံချက်ပေးခြင်း တို့အပြင် ပြည်ပမှ တင်းသွင်းလာသည့် စားအုံးဆီများ သယ်ယူပို့ဆောင်ရာတွင် လိုက်နာရမည့် ညွှန်ကြားချက်များအား အကျယ်တဝင့် အပြန်အလှန်ဆွေးနွေးပြီး မိတ်ဖက်အဖွဲ့အစည်းများဖြစ်သော စည်ပင်သာယာရေးအဖွဲ့နှင့် ကျန်းမာရေးဦးစီးဌာနတို့မှလည်း ဖြည့်စွက်ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)