HighLight News

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ ကျွန်းလှမြို့နယ်တာဝန်ခံရုံးအနေဖြင့်  စားသုံးသူပြည်သူများဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက် ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်လျက်ရှိရာ ၂၀၂၃ခုနှစ်၊ ဇူလိုင်လ (၁၃) ရက်နေ့၊ နံနက် (၁၀:၀၀) နာရီအချိန်တွင် ကျွန်းလှမြို့နယ်၊ စီမံအုပ်ချုပ်ရေးအဖွဲ့ရုံးမှ ဒုတိယဦးစီးမှူး ဒေါ်ယွန်းမီမီထွန်း၊ ကျွန်းလှမြို့မရဲစခန်းမှ ရဲတပ်ကြပ် သိန်းဇော်ဌေး၊ မြို့နယ်မီးသတ်ဦးစီးဌာနမှ ဝန်ထမ်းတစ်ဦးနှင့် စားသုံးသူရေးရာဦးစီးဌာန၊  ကျွန်းလှမြို့နယ်တာဝန်ခံ (အကြီးတန်းစာရေး) ဒေါ်ဝေဝေအောင်တို့သည် ကျွန်းလှမြို့၊ သစ်ရာမြိုင်ရပ်ကွက်ဈေးအတွင်းရှိ အောင်ချမ်းမြေ့ကုန်မျိုးစုံရောင်းဝယ်ရေးဆိုင်ရှိ စားသုံးဆီများအား ဈေးကွက်စောင့်ကြည့်စစ်ဆေးခဲ့ကြပါသည်။

  အဆိုပါ ကုန်မျိုးစုံရောင်းဝယ်ရေးဆိုင်တွင် ရောင်းချသည့်စားသုံးဆီများသည် ထုတ်ကုန်လုံခြုံစိတ်ချရမှုရှိ/မရှိ၊ ကုန်အညွှန်းအမှတ်အသားများပြည့်စုံစွာဖော်ပြထားခြင်းရှိ/မရှိနှင့် သက်တမ်းလွန်ကုန်စည်များရောင်းချနေခြင်းရှိ/မရှိတို့ကို ဈေးကွက်စောင့်ကြည့်စစ်ဆေးခဲ့ရာ   Goody ဟင်းရွက်ဆီများတွင် ထုတ်ကုန်လုံခြုံစိတ်ချရမှုရှိသည့် ကုန်စည်များကိုသာတွေ့ရှိရကာ ကုန်အညွှန်းအမှတ်အသားဖော်ပြခြင်းနှင့်ကိုက်ညီမှုရှိကြောင်း၊ သက်တမ်းလွန်စားသောက်ကုန်များကိုရောင်းချမှုမရှိသော်လည်း ရောင်းချသည့် စီးပွားရေးလုပ်ငန်းရှင်များအနေဖြင့် မိမိရောင်းချသည့်ကုန်စည်အပေါ် တာဝန်ရှိမှုကိုနားလည်သိရှိစေရန်အတွက် စားသုံးသူကာကွယ်ရေးဥပဒေပါ စားသုံးသူနှင့် စီးပွားရေးလုပ်ငန်းရှင်တို့၏ အဓိပ္ပါယ်ဖွင့်ဆိုချက်များ၊  အခန်း (၁၈) ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) နှင့်အညီ ပြည့်စုံစွာထည့်သွင်းဖော်ပြ၍ ထုတ်လုပ်ဖြန့်ဖြူးသည့်ကုန်ပစ္စည်းများကိုသာရောင်းချကြရန်ဖြစ်ကြောင်းနှင့် မိမိတို့ထံ လက်ဝယ်လာရောက်ပို့ဆောင်သောကုန်ပစ္စည်းများတွင် ကုန်အညွှန်းအမှတ်အသားမပြည့်စုံပါက လာရောက်ပို့ဆောင်သူအား ကုန်အညွှန်းအမှတ်အသားပြည့်စုံစွာထည့်သွင်းပေးရန်နှင့်မပြည့်စုံပါက “မိမိတို့ကဝယ်ယူရောင်းချမည်မဟုတ်” ဟု လက်ဆင့်ကမ်းပြောကြားပေးရမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ်အသားဖော်ပြခြင်းနှင့်ပတ်သက်၍ စားသုံးသူရေးရာဦးစီးဌာန၏ အတည်ပြုချက်ရယူနိုင်ရေး ဆောင်ရွက်ကြရန်ဖြစ်ကြောင်းနှင့် မိမိတို့စားသုံးသူရေးရာဦးစီးဌာနမှ ကုန်အညွှန်းအမှတ်အသားလျှောက်ထားရာတွင် အခမဲ့ကူညီဆောင်ရွက်ပေးပါကြောင်း၊ ဥပဒေပါ စီးပွားရေးလုပ်ငန်းရှင်၏တာဝန်များနှင့် လိုက်နာရမည့်အချက်များအကြောင်းကို သိရှိလိုက်နာရမည်ဖြစ်ကြောင်းတို့ကို အသိပညာပေးဆွေးနွေးခဲ့ပြီး လက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

ရှမ်းပြည်နယ် (မြောက်ပိုင်း)၊ မိုးမိတ်ခရိုင်၊ မဘိမ်းမြို့နယ်တွင် (၂၀၂၃-၂၀၂၄) ခုနှစ်အတွက် မိုးစပါးရည်မှန်းချက်စိုက်ဧကမှာ (၂၃၉၉၆) ဧကဖြစ်ပြီး ယခုလက်ရှိအချိန်တွင် (၆၆၅၄) ဧကစိုက်ပျိုးပြီးဖြစ်ကြောင်း သိရှိရပါသည်။ မိုးစပါးကို လယ်စိုက်ဧက (၂၁၆၃၄) ဧက၊ ယာ (၂၂၉၂) ဧကနှင့် တောင်ယာ (၇၀) ဧကစိုက်ပျိုးမည်ဖြစ်ကြောင်း သိရှိရပါသည်။

မဘိမ်းမြို့နယ်တွင် မိုးစပါးကို ဆင်းဧကရီ-၃ (ဒေသအခေါ်ဆင်း-၃) မျိုးစပါးနှင့် ဝက်မမျိုးစပါးများကိုစိုက်ပျိုးကြကြောင်းနှင့် ဈေးကောင်းလည်းရ၊ ဒေသခံများက ပိုမိုစားသုံးသည့် ဆင်းဧကရီ-၃ (ဒေသအခေါ် ဆင်း-၃) စပါးမျိုးကိုပို၍စိုက်ပျိုးကြသည်။ အခြောက်ကြဲပက် စိုက်ပျိုးနည်းနှင့် Seeder (ခေါ်) မျိုးစေ့ချစက်ဖြင့် စိုက်ပျိုးသည့်နည်းကိုလည်း အသုံးပြုစိုက်ပျိုးကြကြောင်း သိရှိရပါသည်။ Seeder) (ခေါ်) မျိုးစေ့စက်ဖြင့် စိုက်ပျိုးသည့်နည်းလမ်းသည် စပါးအထွက်ပို၍ကောင်းကြောင်း သိရှိရပါသည်။

မိုးစပါးကို ဇွန်လ (၁၅) ရက်နေ့နောက်ပိုင်းမှစတင်၍ စိုက်ပျိုးကြကြောင်းနှင့် ဇူလိုင်လကုန်တွင် အပြီးစိုက်ပျိုးကြပါသည်။ ဆင်းဧကရီ-၃ (ဒေသအခေါ် ဆင်း-၃) စပါးမျိုးသည် စတင်စိုက်ပျိုးသည့်ရက်မှ ရက်ပေါင်း (၁၃၅) ရက် (လေးလခွဲ) ကြာလျှင် ရိတ်သိမ်း၍ရကြောင်း သိရှိရပါသည်။

DOCA(ရှမ်း)

    ၂၀၂၃ခုနှစ်၊ ဇူလိုင်လ ၁၄ရက်နေ့၊ နေ့လယ် (၁၃:၃၀) နာရီအချိန်တွင် ရှမ်းပြည်နယ် (တောင်ပိုင်း) စားသုံးသူရေးရာဦးစီးဌာန၊ တောင်ကြီးခရိုင်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည်  အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့၊ အထွေထွေ အုပ်ချုပ်ရေးဦးစီးဌာနတို့နှင့်ပူးပေါင်း၍ တောင်ကြီးမြို့ပေါ်ရှိ Star Mart စတိုးဆိုင်နှင့် သန်းကြွယ်စတိုးဆိုင်များကို မြန်မာဘာသာဖြင့်  ကုန်အညွှန်းအမှတ်အသားပြည့်စုံမှန်ကန်မှုရှိ/မရှိကို   ဈေးကွက်စောင့်ကြည့်စစ်ဆေးခဲ့ပါသည်။

   ထိုသို့ကွင်းဆင်းခဲ့ရာတွင် စားသုံးသူပြည်သူအများဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသောကုန်စည်များပေါ်တွင် ကုန်စည်အမျိုးအစာအလိုက် ကုန်အညွှန်းအမှတ်အသားများပြည့်စုံမှန်ကန်စွာဖော်ပြခြင်းရှိ/မရှိ၊ မည်သည့်စီးပွားရေးလုပ်ငန်းရှင်မဆို ပုဒ်မ-၄၁၊ ပုဒ်မခွဲ (ခ) နှင့် (ဆ) တို့ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ၊ ရေးသားဖော်ပြခြင်းရှိ/မရှိတို့ကို ဈေးကွက်စောင့်ကြည့်ခဲ့ပြီးနောက် စီးပွားရေးလုပ်ငန်းရှင်များအနေဖြင့် ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ရန်၊  စားသုံးသူကာကွယ်ရေးဥပဒေ ၂၀၁၉ပါ စီးပွားရေးလုပ်ငန်းရှင်၏တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်း စသည်တို့ကို အသိပညာပေးဆွေးနွေးခဲ့ပြီး ကုန်စုံဆိုင်၊ စတိုးဆိုင် (၂) ဆိုင်တို့အား ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ကြကြောင်း သတင်းရရှိပါသည်။

DOCA(ရှမ်း)

  စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး ဦးဇော်မင်းနှင့်ဝန်ထမ်းများသည် ၂၀၂၃ခုနှစ်၊ ဇူလိုင်လ၊ ဒုတိယအပတ်၌ အရေးကြီးကုန်စည်များတွင်ပါဝင်သော ဝါသီးနှံနှင့်ပတ်သက်၍ ကွင်းဆင်းလေ့လာခဲ့ပါသည်။

    မိတ္ထီလာခရိုင်သည် မန္တလေးတိုင်းဒေသကြီးအတွင်း ဝါစိုက်ပျိုးမှုများသောဒေသဖြစ်၍ ပုဂ္ဂလိက ဝါစက်၊ ဝါစေ့ဆီစက်များဖြင့် လုပ်ကိုင်ကြပါသည်။ ဝါသီးနှံကို မိုးကြို၊ မိုး၊ မိုးနှောင်းဟူ၍ စိုက်ပျိုးကြကာ ဒေသတွင်း၌ မိုး၊ မိုးနှောင်းဝါများကိုအများဆုံးစိုက်ပျိုးသဖြင့် ယခုအခါ စိုက်ပျိုးဆဲကာလဖြစ်၍ ဝါ၊ ဂွမ်းလက်ကျန်များမှာ နည်းလေ့ရှိပါသည်။ မိတ္ထီလာမြို့နယ်တွင် ဝါစက် (၇) စက်ရှိပြီး ၎င်းစက်များ၌ ဝါစေ့ဆီထုတ်လုပ်သည့်လုပ်ငန်းရှင် (၆) ဦးရှိပါသည်၊၊ အဆိုပါစက်များ၏ ထုတ်လုပ်မှုအခြေအနေများကို သွားရောက်ကွင်းဆင်းလေ့လာခဲ့ရာ ဝါကုန်ကြမ်း (၃) ပိဿာကိုကြိတ်လျှင် ဂွမ်း (၁) ပိဿာနှင့် ဝါ‌စေ့သုံးပုံနှစ်ပုံခန့်ထွက်ရှိကြောင်း  သိရပါသည်။ ဝါစေ့ (၁၀၀) ပိဿာကိုကြိတ်လျှင် ဝါစေ့ဆီ (၁၀/၁၂) ပိဿာခန့်ထွက်ရှိကာ အကြော်လုပ်ငန်းသမားများ အထူးနှစ်သက်ကြောင်းသိရသည်။ ထို့ပြင် ဝါစေ့အဖတ်မှာလည်း တိရစ္ဆာန်အစာနှင့် မှိုစိုက်ပျိုးရေးတို့ အတွက် အသုံးပြုနိုင်ခြင်းကြောင့် ဝါပင်မှထွက်ရှိလာသော အပွင့်၊ အဆံတို့မှာ အကျိုကျေးဇူးများပါသည်။ လက်ရှိဖြစ်ပေါ်နေသောစျေးနှုန်းများမှာ ဝါတစ်ပိဿာလျှင် (၃၄၀၀-၃၅၀၀) ကျပ်၊ ဝါစေ့၊ ဝါစေ့ဖတ်တစ်ပိဿာလျှင် (၁၅၀၀-၁၆၀၀) ကျပ်နှင့် ဝါစေ့ဆီတစ်ပိဿာလျှင် (၇၃၀၀) ကျပ်တို့ရှိကြောင်း သိရှိရပါသည်။

DOCA(မန္တလေး)

    ၂၀၂၃ခုနှစ်၊ ဇူလိုင်လ ၁၂ ရက်နေ့၊ နေ့လယ် (၁၃း၀၀) နာရီအချိန်တွင် ခရိုင်ဦးစီးမှူးရုံးခန်းအတွင်း၌ စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူးရုံး၊ ခရိုင်ဦးစီးမှူး ဦးဇော်မင်းသည် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မိထ္ထီလာမြို့နယ်အတွင်း မုန့်မျိုးစုံထုတ်လုပ်ဖြန့်ဖြူးရောင်းချနေသော လုပ်ငန်းရှင် (၄) ဦးနှင့်တွေ့ဆုံဆွေးနွေးခဲ့ပါသည်။

          ခရိုင်ဦးစီးမှူးက စားသုံးသူရေးရာဦးစီးဌာနသည် စားသုံးသူအခွင့်အရေးများကိုသိရှိနားလည်စေရန် စားသုံးသူကာကွယ်ရေးအသိပညာပေးဟောပြောပွဲလုပ်ငန်းများဆောင်ရွက်နေကြောင်း၊ စားသုံးသူများဘေးအန္တရာယ်ကင်းရှင်းစေးရေး၊ ထုတ်ကုန်လုံခြုံစိတ်ချရမှုရှိစေရေးတို့အတွက် ဈေးကွက်စောင့်ကြည့်စစ်ဆေးခြင်းလုပ်ငန်းများကိုလုပ်ဆောင်လျက်ရှိကြောင်း၊  စားသုံးသူပြည်သူများ နေ့စဉ်ဝယ်ယူစားသုံးနေသော ကုန်စည်များနှင့်ပတ်သက်သည့် သတင်းအချက်အလက်များကို စားသုံးသူပြည်သူများမှန်ကန်စွာသိရှိစေရေး၊ လုပ်ငန်းရှင်များအနေဖြင့် ကုန်အညွှန်းအမှတ်အသားများကိုဖော်ပြရာတွင် စားသုံးသူကာကွယ်ပေးရေးဥပ‌‌ဒေ ၂၀၁၉ပါ ပြဋ္ဌာန်းချက်များကို လိုက်နာပြီး ထုတ်ကုန်လုံခြုံစိတ်ချရမှုရှိသောကုန်ပစ္စည်းများကို ထုတ်လုပ်အသုံးပြုနိုင်ရေးနှင့် စားသုံးသူအခွင့်အ‌ရေးများနစ်နာဆုံးရှုံးမှုမရှိစေရေးအတွက်ရည်ရွယ်၍ တွေ့ဆုံဆွေးနွေးခြင်းဖြစ်ကြောင်း ပြောကြားခဲ့ပါသည်၊၊

      ဆက်လက်၍ ခရိုင်ဦးစီးမှူးက လုပ်ငန်းရှင်များအား စားသုံးသူကာကွယ်‌ရေးဥပ‌ဒေ ၂၀၁၉ ပြဋ္ဌာန်းချက်များအနက် ဥပဒေအခန်း (၉) ပါ စားသုံးသူ၏အခွင့်အရေးနှင့်တာဝန်များ၊ အခန်း (၁၀) ပါ စီးပွားရေးလုပ်ငန်းရှင်များ၏တာဝန်များ၊ အခန်း (၂၃) ပါ တားမြစ်ချချက်များကို သိရှိရမည်ဖြစ်ကြောင်း၊ ကုန်အညွှန်းအမှတ်အသားသည် ၂၀၂၀ခုနှစ်၊ မတ်လ (၁၆) ရက်နေ့မှစ၍ စတင်အာဏာသက်ရောက်နေပြီဖြစ်ကြောင်းနှင့် ကုန်အညွှန်းအမှတ်အသားပြည့်စုံစွာမပါရှိပါက မည်သည့်စီးပွားရေးလုပ်ငန်းရှင်မဆို စားသုံးသူကာကွယ်ရေးဥပဒေပုဒ်မ (၇၃) အရ (၂) နှစ်ထက်မပိုသောထောင်ဒဏ်ဖြစ်စေ၊ ကျပ်သိန်း (၂၀၀) ထက်မပိုသောငွေဒဏ်ဖြစ်စေ၊ ဒဏ် (၂) ရပ်လုံးဖြစ်စေ အရေးယူမှုများပြုလုပ်နိုင်ကြောင်း အသိပညာပေးဆွေးနွေးပြောကြားခဲ့ပြီး  ကုန်အညွှန်းအမှတ်အသားတပ်ဆင်ရန် အခက်အခဲရှိပါက စားသုံးသူရေးရာဦးစီးဌာနသို့ လာရောက်တိုင်ပင်ဆွေးနွေးနိုင်ကြောင်း၊ လုပ်ငန်းရှင်များအနေဖြင့်လည်း မိမိတို့ကိုယ်တိုင် စာသုံးသူများဖြစ်ကြောင်း၊ စာသုံးသူအခွင့်အရေးဆုံးရှုံးနစ်နာမှုများရှိခဲ့လျှင် DOCA Myanmar Application နှင့် စားသုံးသူရေးရာဦးစီးဌာန၏ Website www. doca. gov. mm တွင် ဝင်ရောက်လေ့လာတိုင်ကြားနိုင်ကြောင်း ဆွေးနွေးပြောကြားခဲ့မှုကိုသိရှိရပါသည်။

DOCA(မန္တလေး)