HighLight News

    ၂၀၂၃ခုနှစ်၊ “မြန်မာအမျိုးသမီးများနေ့” အထိမ်းအမှတ်အကြိုသစ်ပင်စိုက်ပျိုးပွဲအခမ်းအနားကို ဇူလိုင်လ၁ရက်နေ့၊ နံနက်ပိုင်းအချိန်တွင် အမှတ် (၁၂)၊ အခြေခံပညာအထက်တန်းကျောင်း၊ မော်လမြိုင်၌ ကျင်းပပြုလုပ်ခဲ့ရာ အဆိုပါသစ်ပင်စိုက်ပွဲအခမ်းအနားသို့ မွန်ပြည်နယ်ဝန်ကြီးချုပ်၊ အစိုးရအဖွဲ့ဝင်ဝန်ကြီးများ၊ စားသုံးသူရေးရာဦးစီးဌာန၏ ပြည်နယ်ဦးစီးမှူးအပါအဝင် ဌာနဆိုင်ရာ တာဝန်ရှိပုဂ္ဂိုလ်များ၊ အသင်းအဖွဲ့များ၊ အမျိုးသမီးရေးရာအသင်းအဖွဲ့များတက်ရောက်ခဲ့‌ကြောင်း သိရှိရသည်။

  ရှေးဦးစွာ ပြည်နယ်ဝန်ကြီးချုပ် ဦးအောင်ကြည်သိန်းက မွန်ပြည်နယ်တွင် သစ်တော/သစ်ပင်ပြုန်းတီးမှုများကို ပြန်လည်အစားထိုးနိုင်ရန်၊ သစ်တောစိုက်ခင်းများထူထောင်နိုင်ရန်ရည်ရွယ်ကာ သစ်တော/သစ်ပင်ပြုန်းတီးမှုများကို ပြည်လည်အစားထိုးနိုင်ရန်နှင့် သဘာဝပတ်ဝန်းကျင်ပြောင်းလဲလာမှုနှင့် ဂေဟစနစ်ပြောင်းလဲမှုများကို ပြုပြင်ထိန်းသိမ်းဆောင်ရွက်နိုင်ရန်တို့အတွက် အလေးထားဆောင်ရွက်လျက်ရှိကြောင်း ပြောကြားခဲ့သည်။

  ထို့နောက် တက်ရောက်လာသူများက ဒေသမျိုးရင်းအဖိုးတန်သစ်မျိုးများ၊ ရာသီအလိုက်ဖူးပွင့်နိုင်သည့်အပင်များ၊ ကြီးမြန်သစ်မျိုးများ၊ အမြဲစိမ်းသစ်မျိုးများ၊ အရိပ်ရသစ်မျိုးများ စသည့် အပင်အမျိုးမျိုးကိုစိုက်ပျိုးခဲ့ကြကြောင်း သိရှိရပါသည်။

DOCA(မွန်)

   မွန်ပြည်နယ်စားသုံးသူရေးရာကော်မတီ (၁/၂၀၂၃) လုပ်ငန်းညှိနှိုင်းအစည်းအဝေးကို ၂၀၂၃ခုနှစ်၊ ဇွန်လ၂၈ရက်နေ့၊ နေ့လယ် (၁၅:၀၀) နာရီအချိန်တွင် မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၏ အစည်းအဝေးခန်းမ၌ ကျင်းပကြောင်းသိရသည်။

 မွန်ပြည်နယ်စားသုံးသူရေးရာကော်မတီ (၁/၂၀၂၃) လုပ်ငန်းညှိနှိုင်းအစည်းသို့  မွန်ပြည်နယ်စားသုံးသူရေးရာကော်မတီဥက္ကဋ္ဌနှင့် အဖွဲ့ဝင်များ စုံညီစွာတက်ရောက်ကြပြီး မွန်ပြည်နယ်စားသုံးသူရေးရာကော်မတီဥက္ကဋ္ဌ၊ စီးပွားရေးရာဝန်ကြီး၊ နိုင်လယိတမက အဖွင့်အမှာစကားပြောကြားခဲ့ ကြောင်း၊ ထို့နောက် မွန်ပြည်နယ်စားသုံးသူရေးရာကော်မတီအတွင်းရေးမှူး၊ စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးဝင်းထွန်းက ယခင် မွန်ပြည်နယ်စားသုံးသူရေးရာကော်မတီ (၁/၂၀၂၃) လုပ်ငန်းညှိနှိုင်းအစည်းအဝေး၏ ဆုံးဖြတ်ချက်များအပေါ် ဆောင်ရွက်ပြီးစီးမှုများကို ရှင်းလင်းပြောကြားခဲ့ကြောင်း၊ (၂၀၂၃-၂၀၂၄) ဘဏ္ဍာနှစ်၏ ပထမ(၃)လပတ်အတွင်း စားသုံးသူကာကွယ်ရေးနှင့် ထုတ်ကုန်လုံစိတ်ချရမှုဆိုင်ရာလုပ်ငန်းဆောင်ရွက်ချက်များကိုတင်ပြခဲ့ကြောင်း၊ စားသုံးသူများဘေးအန္တရာယ်ကင်းရှင်းစေရေး  ဈေးကွက်အတွင်း စစ်ဆေးဆောင်ရွက်မည့် ကုန်စည်အုပ်စုများရွေးချယ်သတ်မှတ်မည့်အစီအမံနှင့် ဆောင်ရွက်ထားရှိမှုတို့ကို   တင်ပြ‌ခဲ့ကြောင်း ယခုအစည်းအဝေး၌  အတည်ပြုချက်ပေးခြင်းဆုံးဖြတ်ချက်တို့ကို အသေးစိတ် Power Point  ဖြင့် ကော်မတီအဖွဲ့ဝင်များသို့ တင်ပြခဲ့ကြောင်းသိရှိရပါသည်။

 အဆိုပါတင်ပြချက်များအား မွန်ပြည်နယ်စားသုံးသူရေးရာကော်မတီအဖွဲ့ဝင်များက အတည်ပြုရန်အချက်များ၊ အကြံပြုချက်များ၊ ဆုံးဖြတ်ရန်အချက်အလက်တို့ကို ကော်မတီအဖွဲ့ဝင်အသီးသီးတို့ဖြင့် ပြန်လည်ဆွေးနွေး၍ အတည်ပြုခြင်း၊ အကြံပြုခြင်းနှင့်ဆုံးဖြတ်ရန်အချက်တို့အား ဆုံးဖြတ်ခဲ့ကြောင်း၊ ရှေ့ဆက်လက်ဆောင်ရွက်မည့် စားသုံးသူကာကွယ်ရေးလုပ်ငန်းများတွင် ကော်မတီအဖွဲ့ဝင်အားလုံး ပူးပေါင်းပါဝင်ဆောင်ရွက်မည်ဖြစ်ကြောင်းနှင့် အစည်းအဝေးကို ညနေ (၁၆:၃၀) နာရီအချိန်တွင်ရုပ်သိမ်းခဲ့ကြောင်း သတင်းရရှိပါသည်။

DOCA(မွန်)

    ဧရာဝတီတိုင်းဒေသကြီး၊ ဒေးဒရဲမြို့နယ်၊ စားသုံးသူရေးရာဦးစီးဌာနမှ  မြို့နယ်တာဝန်ခံ     ဦးသိန်းမောင်သည် ၂၀၂၃ခုနစ်၊ ဇွန်လ (၂၁) ရက်၊ ညနေ (၁၆:၀၀) နာရီအချိန်တွင်  အောင်မင်္ဂလာကွက်သစ်၊  ရာအိမ်မှူး ဦး‌ကျော်ငြိမ်း၏နေအိမ်၌ လုပ်သားပြည်သူ (၁၀) ဦးတို့အား စားသုံးသူကာကွယ်ရေးအသိပညာပေးဟောပြောခြင်းဆောင်ရွက်ခဲ့ပါသည်။

  အဆိုပါဟောပြောပွဲတွင် မြို့နယ်တာဝန်ခံ ဦးသိန်းမောင်က စားသုံးသူကာကွယ်ရေးဥပဒေနှင့်ပတ်သက်၍ စားသုံးသူများလုံခြုံစိတ်ချမှုရှိစေရေးအတွက် စားသုံးသူအခွင့်အရေးနှင့်တာဝန်များ၊ ကုန်စည်နှင့်ဝန်ဆောင်မှုများကိုဝယ်ယူခြင်းမပြုမီ သတိပြုဆောင်ရွက်ရမည့်အချက်များ၊ မည်သည့်စီးပွားရေးလုပ်ငန်းရှင်မဆို ကုန်ညွှန်းအမှတ်အသားဖော်ပြခြင်းနှင့်စပ်လျဉ်း၍ တာဝန်ယူမှု၊ တာဝန်ခံမှုအကြောင်းအရာများ၊ စားသုံးသူများဘေးအန္တရာယ်ကင်းရှင်းပြီး လုံခြုံစိတ်ချမှုရှိသည့် အရည်အသွေးမီကုန်စည်များကိုသာသုံးစွဲနိုင်ရေးအတွက် အခန်း (၁၈) ပါ ကုန်အညွှန်းအမှတ်အသားဖော်ပြရန် သတ်မှတ်ချက်များပါရှိသော    ကုန်စည်နှင့်အစားအသောက်များနှင့်  တားမြစ်ကုန်စည်များအကြောင်း၊    မိမိတို့ဌာနအနေဖြင့် စားသုံးသူများအသုံးပြုသည့် ကုန်စည်နှင့်ဝန်ဆောင်မှုများကို အန္တရာယ်ကင်းရှင်းစေရေးအတွက် ဈေးကွက်စောင့်ကြည့်စစ်ဆေးမှုများပြုလုပ်လျက်ရှိကြောင်း အသိပညာပေးပြောကြားခဲ့မှုကို သိရှိရပါသည်။

DOCA(ဧရာဝတီ)

   ပန်းတနော်မြို့နယ်တွင် မြို့ပေါ်ရပ်ကွက်(၄)ခုရှိပြီး ကျေးရွာအုပ်စုပေါင်း (၅၂)အုပ်စုရှိသည့်အပြင် စိုက်ပျိုးရေးလုပ်ငန်းများဖြစ်သော စပါး၊ ပဲ၊ ပြောင်းကို အဓိကထားစိုက်ပျိုးပြီး ဟင်းသီးဟင်းရွက်နှင့် အခြားသောစိုက်ပျိုးရေးထုတ်ကုန်များ၊ အစားအသောက်ထုတ်ကုန်များနှင့် လူသုံးကုန်ပစ္စည်းများထုတ်လုပ်လျက်ရှိသောမြို့ဖြစ်ပါသည်။

  ပန်းတနော်မြို့နယ်ရှိ  မြစ်ငါးတန်မွေးမြူရေးလုပ်ငန်းသည် ရန်ကုန်ဈေးကွက်အပြင် နိုင်ငံခြားဈေးကွက်သို့ပါတင်ပို့ရောင်းချလျက်ရှိပြီး နိုင်ငံခြားဈေးကွက်ရရှိရေးအတွက် အလားအလာကောင်းများကိုရရှိပြီးဖြစ်ပါသည်။ စပါး၊ ဆန်နှင့် မွေးမြူရေးထုတ်ကုန်များရှိရုံသာမက သင်ဖြူးဖျာ လုပ်ငန်းကို တန်ဖိုးမြင့်ထုတ်ကုန်တစ်ခုအနေဖြင့် ထုတ်လုပ်ရောင်းချနေသော ပန်းတနော်မြို့နယ်၊ ဦးကြည်လွင်၏ သင်ဖြူးဖျာလုပ်ငန်းဆောင်ရွက်မှုအခြေအနေကောင်းများအား စားသုံးသူရေးရာဦးစီးဌာန၊ ပန်းတနော်မြို့နယ်တာဝန်ခံ ဦးပိုးဖြူပိုင်မင်းက ၂၀၂၃ခုနှစ်၊ ဇွန်လ၊ ဒုတိယအပတ်တွင် ကွင်းဆင်းလေ့လာဆောင်ရွက်ခဲ့ပါသည်။

  သင်ဖြူးဖျာလုပ်ငန်းပိုင်ရှင် ဦးကြည်လွင်က မိမိအနေဖြင့် ပန်းတနော်မြို့နယ်၊ ယွန်ကျောင်းလမ်း၊ အနောက်ပိုင်းရပ်ကွက်တွင်နေထိုင်ပြီး ပန်းတနော်မြို့နယ်အတွင်းရှိ သင်ခြံစိုက်တောင်သူများ၏သင်ခြံမှ သင်ပင်များကိုဝယ်ယူအသုံးပြုခဲ့ပါသည်။ သင်ဖျာရက်လုပ်သူများသည် ကုန်ကြမ်း အဖြစ်အသုံးပြုနိုင်ရန်အတွက် သင်ခြံခုတ်၍ထွက်ရှိသောသင်ကိုထက်ခြမ်းခွဲ၍ နေလှမ်းထားသည့်သင်ခွဲခြမ်း (၅၀၀) ပါ တစ်စီးလျှင် သင်မတစ်မသတ်မှတ်ထားရှိပြီး သင်မများကိုရေစိမ်၍ သင်ငင်ပြီး ထွက်ရှိလာသည့်သင်လွှာများကို အချောတစ်ခြမ်း၊ အကြမ်းတစ်ခြမ်းရက်လုပ်၍ အကြမ်းတစ်ခြမ်းကို အောက်လွှာ၊ အချောတစ်ခြမ်းကို အပေါ်လွှာထပ်၍ ချည်ကြိုးဖြင့်ချုပ်ပြီး အနားကွပ်ခြင်းဆောင်ရွက်ပြီးပါက ဖျာခင်း၍အသုံးပြုရန် ရောင်းတန်းဝင်သင်ဖျာတစ်ချပ်ရရှိကြောင်း ပဏာမရှင်းပြခဲ့ပါသည်။

     သင်ဖျာဈေးများမှာ ဘုရားရှိခိုးဖျာတစ်ချပ်လျှင် (၅၀၀၀) ကျပ်မှ (၇၀၀၀) ကျပ်၊ တစ်ယောက်အိပ်သုံးထောင့်ထွာတစ်ချပ်လျှင် (၇၅၀၀) ကျပ်မှ (၈၀၀၀) ကျပ်၊ နှစ်ယောက်အိပ် နှစ်ဖက်ချောအနားကွပ်တစ်ချပ်လျှင် (၅၀၀၀၀) ကျပ်တို့ဖြင့် ဈေးကွက်ရရှိကာ အရောင်းအဝယ်ဖြစ်နေကြောင်းနှင့် သင်ဖျာလုပ်ငန်းကိုပိုမိုတိုးတက်အောင်ဆောင်ရွက်ရန် နည်းပညာလိုအပ်မှု၊ မတည်ရင်းနှီးငွေလိုအပ်မှုနှင့် လုပ်သားနည်းပါးမှုတို့၏အခက်အခဲများကို ဆွေးနွေးတင်ပြခဲ့ပါသည်။

    ရန်ကုန်၊ ပုသိမ်ကားလမ်းဘေးရှိ အမှတ်တရသင်ဖြူးဖျာဆိုင်ပေါင်း(၁၀)ဆိုင်ရှိသည့်အနက် အရောင်းဆိုင်များတွင် သင်ဖြူးဖျာများကိုဝယ်ယူကာ မိမိတို့စိတ်တိုင်းကျ ဇိမ်ခံအသုံးပြုနိုင်ပြီး မွေ့ရာများထက်တွင် အိပ်စက်အနားယူခြင်းထက် ကျန်းမာရေးနှင့်ညီညွတ်သောသင်ဖြူးဖျာလေးပေါ်တွင် အိပ်စက်အနားယူခြင်းမှာ စိတ်ချမ်းမြေ့မှုများကိုပေးစွမ်းနိုင်သည့် ကောင်းကျိုးများကိုတွေ့ရှိရသဖြင့် ယခုအခါ များစွာအသုံးပြုလာကြောင်း အရောင်းအဝယ်တွင်ကျယ်မှုမှတစ်ဆင့်တွေ့ရှိရကြောင်း ဦးကြည်လွင်က ထပ်မံတင်ပြခဲ့ပါသည်။

 စားသုံးသူရေးရာဦးစီးဌာနမှ မြို့နယ်တာဝန်ခံ ဦးပိုးဖြူပိုင်မင်းက သင်ဖြူးဖျာထုတ်လုပ်သော လုပ်ငန်းရှင်အသင်းအဖွဲ့များမှတစ်ဆင့် သင်ဖြူးဖျာလုပ်ငန်းများဖွံ့ဖြိုးတိုးတက်ရေးအတွက် နည်းပညာအကူအညီများရရှိနိုင်သည့်နည်းလမ်းများနှင့် မတည်ရင်းနှီးငွေအတွက် သက်ဆိုင်ရာဘဏ်များနှင့် ချိတ်ဆက်ဆောင်ရွက်နိုင်ရေးတို့ကို အပြန်အလှန်ဆွေးနွေးခဲ့ပြီး များမကြာမီကာလအတွင်း ကျန်းမာရေးနှင့်ညီညွတ်သောသင်ဖြူးဖျာများကို ထုတ်လုပ်မှုအဆင့်အတန်းမီသော ဈေးကွက်ရတန်ဖိုးမြင့်ထုတ်ကုန်တစ်ခုအနေဖြင့် တွေ့မြင်ရဖွယ်ရှိကြောင်း ရေးသားတင်ပြလိုက်ရပါသည်။

DOCA(ဧရာဝတီ)

 ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ ဝါးခယ်မမြို့နယ်တာဝန်ခံ ဦးအောင်မိုးသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အားကစားနှင့်ကာယပညာဦးစီးဌာနတို့နှင့်ပူးပေါင်း၍ (၂၆-၆-၂၀၂၃) ရက်နေ့၊ နေ့လယ် (၁၃း၀၀) နာရီအချိန်တွင် ဝါးခယ်မမြို့နယ်၊ တံခွန်တိုင်ကျေးရွာ၊ အ-လ-က(ခွဲ)ကျောင်း၌ ဆရာ/ဆရာမ၊ ကျောင်းသား/ကျောင်းသူများအား စားသုံးသူကာကွယ်ရေးအသိပညာပေးဟောပြောဆောင်ရွက်ခဲ့ပါသည်။

 ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ ဝါးခယ်မမြို့နယ်တာဝန်ခံက မိတ်ဆက်စကားပြောကြားပြီးနောက် စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ ဌာနက လက်ရှိဆောင်ရွက်နေသောလုပ်ငန်းတာဝန်များနှင့် ဆက်လက်ဆောင်ရွက်ရမည့် လုပ်ငန်းတာဝန်များကို ဦးစွာရှင်းလင်းပြောကြားခဲ့ပါသည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ပုဒ်မ ၄၁၊ ပုဒ်မခွဲ(ခ)နှင့် (ဂ)တို့အရ ကုန်စည်၏အမျိုးအမည်၊ အရွယ်အစား၊ အရေအတွက်နှင့်အသားတင်အလေးချိန်၊ သုံးစွဲပုံနည်းလမ်းနှင့် ထုတ်လုပ်သည့်ရက်စွဲ၊  သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်တို့အား အသေးစိတ်ရှင်းလင်းဟောပြောခဲ့ပြီး မိမိတို့စားသောက်နေသောအစားအသောက်များတွင် ဓာတုဆိုးဆေးများအလွန် အကြူးပါဝင်နေခြင်း၊ သက်တမ်းလွန်အစားအသောက်များအား မိမိ၏အသိဖြင့် ဆင်ခြင်ဝယ်ယူစားသောက်ကြရန်ဟောပြောခဲ့ပါသည်။ ထို့နောက် စားသုံးသူရေးရာအဖွဲ့ဖြင့် ကျောင်းမုန့်ဈေးတန်းမုန့်ဆိုင်များသို့သွားရောက်စစ်ဆေးခဲ့ပါသည်။ အဆိုပါစားသုံးသူအသိပညာပေးဟောပြောပွဲသို့ ဆရာ/ဆရာမ (၇) ဦး၊ ကျောင်းသားကျောင်းသူ (၁၄၀) ဦး၊ စုစုပေါင်း (၁၄၇) ဦးတက်ရောက်ခဲ့ကြောင်းသိရှိရပါသည်။

DOCA(ဧရာဝတီ)