HighLight News

  (၂၁-၆-၂၀၂၃) ရက်နေ့၊ နံနက် (၀၈:၀၀) နာရီအချိန်တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ပြည်နယ်အစိုးရအဖွဲ့ဝန်ကြီးချုပ်ဦးဆောင်၍ အစိုးရအဖွဲ့ဝင်ဝန်ကြီးများ၊ ပြည်နယ်အဆင့် သက်ဆိုင်ရာဌာနဆိုင်ရာများနှင့်အတူ MSME လုပ်ငန်းများဖွံ့ဖြိုးတိုးတက်ရေးအတွက် MSME လုပ်ငန်းများ၏ လုပ်ငန်းလည်ပတ်မှုအခြေအနေများကို ကွင်းဆင်းစစ်ဆေးခဲ့ကြပါသည်။

  ပထမဦးစွာ ခရွန်းကျေးရွာရှိ Cool Storage သို့ရောက်ရှိပြီး မွန်ပြည်နယ်၏အဓိကစိုက်ပျိုးရေး၊ မွေးမြူရေးထုတ်ကုန်များ၏ အရည်အသွေးနှင့်တန်ဖိုးမကျစေရန်နှင့် တန်ဖိုးမြှင့်ထုတ်ကုန်များထုတ်လုပ်ကာ စနစ်တကျထိန်းသိမ်းသိုလှောင်ထားရှိပြီး တင်ပို့နိုင်ရန်တို့အတွက် အအေးခန်းစက်ရုံတည်ထောင်ထားမှုအခြေအနေ၊ ထုန်ကုန်များသိုလှောင်ထားရှိမှုအခြေအနေနှင့် တိုးချဲ့ဆောင်ရွက်မှုအခြေအနေများကို ကြည့်ရှုလေ့လာခဲ့ကြသည်။

   ထို့နောက် ဖားအောက်ကျေးရွာအတွင်းရှိ မိသားစုတစ်ပိုင်တစ်နိုင်လုပ်ငန်းများလုပ်ကိုင်နေသော ရိုးရာအိမ်တွင်းရက်ကန်းချည်ထည်ရက်လုပ်မှုအခြေအနေများကိုကြည့်ရှုခဲ့ကာ ဆက်လက်၍ မော်လမြိုင်နည်းပညာတက္ကသိုလ်ရှိ ရွှေဇီဝသဘာဝဇီဝမြေဩဇာစက်ရုံသို့သွားရောက်ပြီး သဘာဝမြေဩဇာထုတ်လုပ်နေမှုအခြေအနေ၊ လုပ်ငန်းတိုးချဲ့နေမှုအခြေအနေများအား စစ်ဆေးဆောင်ရွက်ခဲ့ကြောင်းသတင်းရရှိပါသည်။

DOCA(မွန်)

  ဧရာဝတီတိုင်းဒေသကြီးအတွင်း ပုဂ္ဂလိကစက်မှုလုပ်ငန်းများဖွံ့ဖြိုးတိုးတက်လာစေရန် ပုဂ္ဂလိကစက်မှုလုပ်ငန်းကြီးကြပ်ရေးအဖွဲ့၏ လုပ်ငန်းညှိနှိုင်းအစည်းအဝေးကို စက်မှုကြီးကြပ်ရေးနှင့်စစ်ဆေးရေးဦးစီးဌာန၊ တိုင်းဦးစီးမှူးရုံး၊ အစည်းအဝေးခန်းမတွင် ၂၀၂၃ခုနှစ်၊ ဇွန်လ ၂၃ရက်နေ့၊ နေ့လယ် (၁၂:၀၀) နာရီအချိန်တွင်ပြုလုပ်ခဲ့ရာ စက်မှုကြီးကြပ်ရေးနှင့်စစ်ဆေးရေးဦးစီးဌာနမှ တိုင်းဦးစီးမှူး၊ ပုဂ္ဂလိကစက်မှုကြီးကြပ်ရေးအဖွဲ့ဥက္ကဋ္ဌ ဦးဝင်းဦး၊ အဖွဲ့ဝင်ဌာနဆိုင်ရာများဖြစ်သော စားသုံးသူရေးရာဦးစီးဌာန၊ လက်ထောက်ညွှန်ကြားရေးမှူး ဦးစံကြည်၊ တိုင်းထွေ/အုပ်၊ တိုင်းလျှပ်စစ်၊ တိုင်းစီမံကိန်း၊ တိုင်းလယ်/စီး၊ ပြည်တွင်းအခွန်များဦးစီးဌာန၊ ပတ်ဝန်းကျင်ထိန်သိမ်းရေးဦးစီးဌာန၊ တိုင်းသစ်တောဦးစီးဌာနမှ အဖွဲ့ဝင်များတက်ရောက်ပါသည်။

   ဧရာဝတီတိုင်းဒေသကြီးအတွင်း ပုဂ္ဂလိကစက်မှုလုပ်ငန်းများကို စနစ်တကျဆောင်ရွက်နိုင်ရန်အတွက် ကွင်းဆင်းစစ်ဆေးပြီးသော အစားအစာထုတ်လုပ်ခြင်း၊ အဖျော်ယမကာများထုတ်လုပ်ခြင်း၊ သစ်နှင့်သစ်အချောထည်များထုတ်လုပ်ခြင်း၊ အခြားကုန်စည်များထုတ်လုပ်ခြင်း၊ စက်နှင့်စက်ကိရိယာများပြင်ဆင်ခြင်းနှင့်တပ်ဆင်ခြင်း၊ အကြီးစားလုပ်ငန်း(၂၁)ခု၊ အလတ်စားလုပ်ငန်း(၁၀)ခု၊ အသေးစားလုပ်ငန်း(၃၅)ခု၊ စုစုပေါင်းလုပ်ငန်း(၆၆)ခုအား သက်ဆိုင်ရာဌာနများ၏ ထောက်ခံတင်ပြ ချက်များနှင့်အတူ မှတ်ပုံတင်ခွင့်ပြုရန်တင်ပြလာမှုအပေါ် အဖွဲ့ဝင်များက ဝိုင်းဝန်းဆွေးနွေးခဲ့ပြီး ဦးစီးဌာန၊ ရုံးချုပ်သို့ ဆက်လက်တင်ပြနိုင်ရန်  ညှိနှိုင်းဆောင်ရွက်ခဲ့ကြောင်းသိရပါသည်။

DOCA(ဧရာဝတီ)

   မွန်ပြည်နယ်၊ သထုံခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးရှိ လူထုအခြေပြုဗဟိုခန်းမတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် စားသုံးသူရေးရာဦးစီးဌာနတို့ပူးပေါင်း၍ (၂၁-၆-၂၀၂၃) ရက်နေ့တွင် အွန်လိုင်းရောင်းဝယ်မှုဆိုင်ရာ စားသုံးသူအသိပညာပေးဆွေးနွေးပွဲ (Talk Show) အစီအစဉ်ကို အွန်လိုင်းမှတစ်ဆင့် ကျင်းပပြုလုပ်ခဲ့ကြောင်း သိရပါသည်။

   ဆွေးနွေးပွဲတွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒုတိယဦးစီးမှူး ဒေါ်အေးအေးသန်းက Talk Show အစီအစဉ်ကျင်းပပြုလုပ်ရသည့်ရည်ရွယ်ချက်ကို ရှင်းလင်းပြီးနောက် ခရိုင်စားသုံးသူရေးရာဦးစီးဌာနမှ ဦးစီးအရာရှိ ဦးအောင်ကျော်မင်းက စားသုံးသူရေးရာဦးစီးဌာန၏ လုပ်ငန်းဆောင်ရွက်မှုများ၊ ယနေ့ခေတ်၌ တွင်တွင်ကျယ်ကျယ်အသုံးပြုလာသည့် အွန်လိုင်းရောင်းဝယ်မှုများနှင့်အတူ ပေါ်ပေါက်လာသည့်စားသုံးသူတို့၏ ထိခိုက်နစ်နာမှုများနှင့်တိုင်ကြားမှုများ၊ စားသုံးသူများအနေဖြင့် အွန်လိုင်းမှဝယ်ယူခြင်းမပြုမီ သတိပြုရမည့်အချက်များ၊ စားသုံးသူထိခိုက်နစ်နာမှုများနှင့်ပတ်သက်၍ တိုင်ကြားနိုင်သည့်နည်းလမ်းများ၊ အွန်လိုင်းမှ ဝယ်ယူစားသုံးသူများအနေဖြင့် ထိခိုက်နစ်နာမှုမရှိစေရေးအတွက်ထိန်းကျောင်းနိုင်ရန် စားသုံးသူရေးရာဦးစီးဌာနက အကောင်အထည်ဖော်ဆောင်ရွက်နေသည့် Online Shopping မှတ်ပုံတင်စနစ်လုပ်ငန်းများ စသည့်သိမှတ်ဖွယ်ရာများတို့ကို ကျယ်ကျယ်ပြန့်ပြန့်ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)

  မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှဝန်ထမ်းများသည် ပြည်နယ်အစားအသောက်နှင့်ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့တို့နှင့်ပူးပေါင်း၍ (၂၃-၆-၂၀၂၃) ရက်နေ့တွင် မော်လမြိုင်မြို့၊ အမှတ် (၁) ဈေး၌ရောင်းချနေသော ကုန်စုံဆိုင် (၁၄) ဆိုင်အား ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

    ထိုသို့ ဈေးကွက်စောင့်ကြည့်စစ်ဆေးရာတွင် အမှတ် (၁) ဈေးအတွင်း ရောင်းချနေသော Coca Cola၊ Sprite၊ Max+ (အချိုရည်) များမှာ အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်ရှိ/မရှိ၊ ကုန်အညွှန်းအမှတ်အသားပြည့်စုံစွာဖော်ပြထားမှုရှိ/မရှိတို့ကို စောင့်ကြည့်စစ်ဆေးခဲ့ပြီးနောက် ဆိုင်ပိုင်ရှင်များအား ထောက်ခံချက်မရှိသောအချိုရည်များကို ရောင်းချခြင်းမပြုရန်ဆွေးနွေးပြောကြားခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော (၂/၂၀၁၉) ပါ ကုန်အညွှန်းအမှတ်အသားဖော်ပြချက်နှင့်စပ်လျဉ်း၍ အသေးစိတ်ပါရှိရမည့် အချက်များဖော်ပြထားသော လက်ကမ်းစာစောင်များဖြန့်ဝေပေးခဲ့ကြောင်း သိရှိရပါသည်။

DOCA(မွန်)

    မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှဝန်ထမ်းများသည် (၂၂-၆-၂၀၂၃) ရက်နေ့တွင် သံဖြူဇရပ်မြို့နယ်၊ အ-ထ-က (၁) ကျောင်း၌ စားသုံးသူကာကွယ်ရေးအသိပညာပေးဟောပြောပွဲကျင်းပကြောင်း သိရပါသည်။

    အဆိုပါဟောပြောပွဲတွင် အ-ထ-က (၁) ကျောင်းမှ ကျောင်းအုပ်ဆရာမကြီး ဒေါ်အေးသက်မော်က အဖွင့်အမှာစကားပြောကြားခဲ့ပြီးနောက် စားသုံးသူရေးရာဦးစီးဌာနမှ ဦးစီးအရာရှိ ဒေါ်ဝါဝါမြိုင်က စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ မိမိတို့ဌာနမှ လက်ရှိဆောင်ရွက်နေသောလုပ်ငန်းတာဝန်များအား ဦးစွာရှင်းလင်းပြောကြားပြီး၊ စားသုံးသူကာကွယ်ရေးဥပဒေ ၂၀၁၉ပါ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ကုန်အညွှန်းအမှတ်အသားဖော်ပြချက်များကို စားသုံးသူကသေချာစွာဖတ်ရှု့ပြီးမှသာ ရွေးချယ်ဝယ်ယူစားသောက်သင့်ကြောင်း၊ စားသုံးသူထိခိုက်နစ်နာမှုပေါ်လာပါက စားသုံးသူရေးရာဦးစီးဌာနသို့ တိုင်ကြားနိုင်သည့်အကြောင်းအရာများ၊ Consumer Call Center No.(1535) သို့ဖုန်းခေါ်ဆို၍လည်း တိုင်ကြားနိုင်ကြောင်း၊ စားသုံးသူရေးရာဦးစီးဌာန၏ website ဖြစ်သော www. doca. gov. mm တွင်လည်း ဝင်ရောက်တိုင်ကြားနိုင်ကြောင်း ဟောပြောဆွေးနွေးခဲ့ပါသည်။

     အဆိုပါဟောပြောဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူ၊ စုစုပေါင်း (၃၅၂) ဦးတက်ရောက်ခဲ့ကာ ကျောင်းအုပ်ဆရာမကြီးထံသို့ လက်ကမ်းစာစောင်များပေးအပ်ခဲ့ကြောင်း သိရှိရပါသည်။

DOCA(မွန်)