HighLight News

        ပဲခူးတိုင်းဒေသကြီ၊ စားသုံးသူရေးရာဦးစီးဌာန၊ ပဲခူးတိုင်းဒေသကြီး ဦးစီးမှူးရုံး အစည်းအဝေးခန်းမ၌ ဧပြီလ ၄ ရက်နေ့ ၊ နေ့လည် (၂:၀၀) နာရီအချိန်တွင် တိုင်းဒေသကြီးစားသုံးသူရေးရာကော်မတီ (၁/၂၀၂၂) အစည်းအဝေးပြုလုပ်ခဲ့ရာ  ဉက္ကဋ္ဌ၊ အတွင်းရေးမှူး၊ အဖွဲ့ဝင် (၄) ဦးနှင့် တိုင်းဒေသကြီးဦးစီးမှူးရုံးမှ (၅) ဦးတက်ရောက်၍ ကျင်းပပြုလုပ်ခဲ့ပါသည်။

        အဆိုပါ အစည်းအဝေးတွင် ပဲခူးတိုင်းဒေသကြီး၊ စားသုံးသူရေးရာကော်မတီဉက္ကဋ္ဌ၊ စီးပွားရေးရာ ဝန်ကြီး ဦးတင်ဦးက အဖွင့်အမှာစကားပြောကြားခဲ့ပြီး တိုင်းဒေသကြီးစားသုံးသူရေးရာကော်မတီ အတွင်းရေးမှူး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးမှ ပြဌာန်းထားသောနည်းဉပဒေဆိုင်ရာ ကိစ္စရပ်များ၊ စားသုံးသူသတင်းကွန်ယက်ဖွဲ့စည်းထားရှိမှု အခြေအနေများကို ရှင်းလင်းဆွေးနွေးခြင်း၊ စားသုံးသူရေးရာဌာနခွဲတာဝန်ခံမှ စားသုံးသူကာကွယ်ရေးလုပ်ငန်းဆောင်ရွက်ချက်များ၊ တိုင်ကြားမှုနှင့် ဖြေရှင်းဆောင်ရွက်ချက်များအား ကော်မတီအဖွဲ့ဝင်များသို့ တင်ပြ၍ ကော်မတီ၏ဆုံးဖြတ်ချက်၊ အတည်ပြုချက်၊ အကြံပြုချက်များပေးနိုင်ရေးအတွက် ရှင်းလင်းဆွေးနွေးတင်ပြခဲ့ရာ တက်ရောက်လာသည့် ကော်မတီအဖွဲ့ဝင်များမှ ပြန်လည်ဆွေးနွေးခဲ့ပြီး စားသုံးသူကာကွယ်ရေးလုပ်ငန်းများတွင် ပူးပေါင်းပါဝင် ဆောင်ရွက်သွားမည်ဖြစ်ကြောင်း စသည်ဖြင့် ဆွေးနွေးခဲ့ကြောင်း သတင်းရရှိပါသည်။

DOCA(ပဲခူး)

               ဧရာဝတီတိုင်း‌ဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ မြို့နယ်တာဝန်ခံ ဦးအောင်ဇော်ဦးနှင့် ဝန်ထမ်းများသည် (၇.၄.၂၀၂၂) နေ့ နံနက်ပိုင်းတွင် မိတ်ဖက်အဖွဲ့အစည်းများဖြစ်သော စည်ပင်သာယာရေးအဖွဲ့၊ ကျန်းမာရေးဦးစီးဌာနှင့် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ မအူပင်မြို့ပေါ်ရှိ စတိုးဆိုင်များနှင့် ကုန်မျိုးစုံဆိုင်များသို့ ကွင်းဆင်း၍ ကုန်အညွှန်းအမှတ်အသားပါဝင်မှု ရှိ/မရှိ ဈေးကွက် စောင့်ကြည့်မှု ဆောင်ရွက်ခဲ့ပါသည်။

            အဆိုပါ ကွင်းဆင်း၍ ဈေးကွက်စောင့်ကြည့်မှုတွင် စတိုးဆိုင်များနှင့် ကုန်မျိုးစုံဆိုင်များအား မအူပင်မြို့နယ်တာဝန်ခံ ဦးအောင်ဇော်ဦးက အသင့်စားအစားအစာများ၊ အလှကုန်ပစ္စည်းများ၊ လူသုံးကုန်ပစ္စည်းများတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပါဝင်မှုရှိသော ကုန်ပစ္စည်းများသာ ဈေးကွက်အတွင်း ရောင်းရမည် ဖြစ်ကြောင်းနှင့် စားသုံးသူကာကွယ်ရေးဥပဒေပါ စားသုံးသူများ၏ အခွင့်အရေးများ၊ လုပ်ငန်းရှင်များလိုက်နာရမည့် တာဝန်နှင့် ဝတ္တရားများအကြောင်းတို့ကို အပြန်အလှန် ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြမြို့နယ်တာဝန်ခံ ဦးလှထွဋ်ဦးသည် ၂၀၂၂ ခုနှစ်၊ ဧပြီလ ၈ ရက်နေ့၊ နံနက်(၉:၃၀)နာရီအချိန်က မြို့နယ်အစားအသောက်နှင့်ဆေးဝါးကွက်ကဲရေးကော်မတီနှင့် ပူးပေါင်း၍ မြို့နယ်အတွင်း ကျန်းမာရေးဝန်ကြီးဌာနက စားသုံးရန်မသင့် ထုတ်ပြန်ထားသော အသားလုံး၊ အသားချောင်းများအား အဖွဲ့ဖြင့် ကွင်းဆင်းစစ်ဆေးခဲ့ပါသည်။

          ထိုသို့စစ်ဆေးရာတွင် အစားအသောက်နှင့်ဆေးဝါးကွပ်ကဲရေးဦးစီးဌာန မှ ၂၀၂၂ ခုနှစ်၊ ဖေဖော်ဝါရီလမှ မတ်လအထိ စားသုံးရန်မသင့်ဟု စစ်ဆေးတွေ့ရှိသည့် အသားလုံး၊ အသားချောင်း (၂၁) မျိုးအား မြောင်းမြမြို့နယ်အတွင်း ရောင်းချခြင်း ရှိ/မရှိ ကွင်းဆင်းစစ်ဆေးခဲ့ရာ  စားသုံးရန်မသင့်ဟု ကြေငြာထားသော အသားလုံး၊ အသားချောင်း  ရောင်းချသော အရောင်းဆိုင် (၃) ဆိုင်မှ ပစ္စည်းအမျိုးအစား(၃) မျိုး၊ အရေအတွက် (၆)ခု အား အဖွဲ့ဖြင့် သိမ်းဆည်းပြီး မြို့နယ်စည်ပင်သာယာရေးအဖွဲ့ ရုံးဝန်းအတွင်း မြေမြုပ်ဖျက်စီးခဲ့ကြောင်း သိရှိရပါသည်။

           အလားတူ မြောင်းမြခရိုင်အတွင်းရှိ အိမ်မဲမြို့နယ်နှင့် ဝါးခယ်မမြို့နယ်များတွင်လည်း ကျန်းမာရေးဝန်ကြီးဌာနက စားသုံးရန်မသင့် ထုတ်ပြန်ထားသောအသားလုံး၊ အသားချောင်း (၂၁)မျိုးအား ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်းလည်း သိရှိရပါသည်။

DOCA(ဧရာဝတီ)

              စစ်ကိုင်းတိုင်းဒေသကြီး၊စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်နှင့် ဝန်ထမ်းများသည် စစ်ကိုင်းမြို့၊ လေးကျွန်းမြေအုဌ်ကျောင်း(ဘုန်းတော်ကြီးကျောင်း)၌ မတ်လ ၂၉ရက်မှ ဧပြီလ ၁၂ရက်နေ့ထိ ဗုဒ္ဓဘာသာယဉ်ကျေးလိမ္မာသင်တန်း ဓမ္မစကူးလ်ဖွင့်လှစ်သင်ကြားခဲ့ရာ ကျောင်းသား/ ကျောင်းသူ ၅၀၀ကျော်တက်ရောက်ခဲ့သည့်အနက် ကျောင်းသား/ကျောင်းသူ ၁၅၀ဦးအား ဧပြီလ ၈ ရက်နေ့တွင် စားသုံးသူကာကွယ်ရေးဆိုင်ရာ ပန်းဖလက်များ ဖြန့်ဝေပြီး အသိပညာပေးဟောပြောပွဲ ကျင်းပပြုလုပ်ခဲ့ပါသည်။

          အဆိုပါဟောပြောပွဲတွင် စစ်ကိုင်းခရိုင်ဦးစီးမှူးက  စားသုံးသူရေးရာဦးစီးဌာန ပေါ်ပေါက်လာပုံ အကြောင်း၊ မိမိတို့ဌာန၏ မျှော်မှန်းချက်သည် "စားသုံးသူများလုံခြုံစိတ်ချရမှုရှိစေရန်" ဖြစ်ပါ ကြောင်း၊ နှစ်စဉ် မတ်လ(၁၅)ရက်နေ့ကို ကမ္ဘာ့စားသုံးသူအခွင့်အရေးများနေ့ဟု သတ်မှတ်ထားပါ ကြောင်း၊ စားသုံးသူကာကွယ်ရေးဥပဒေကို ၂၀၁၉ ခုနှစ်၊ မတ်လ(၁၅)ရက်နေ့က ပြည်ထောင်စုလွှတ်တော်ဥပဒေ အမှတ် ၉။ ဖြင့်ပြဌာန်းခဲ့ကြောင်း၊ စားသုံးသူကာကွယ်ရေးနည်းဥပဒေကို ၂၀၂၂ခုနှစ်၊ ဇန်နဝါရီလ(၁၈)ရက်နေ့က ပြဌာန်းခဲ့ကြောင်း၊ စားသုံးသူကာကွယ်ရေးဥပဒေ အခန်း(၉)၊ ပုဒ်မ(၁၉)တွင် ပြဌာန်ထားသော စားသုံးသူအခွင့်အရေး(၈)ချက်နှင့် စားသုံးသူ၏တာဝန်များ အခန်း (၁၈) ပါ ကုန်အညွှန်း အမှတ်အသားဖော်ပြခြင်းနှင့် စပ်လျဉ်းသည့်ကုန်စည် အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြရမည့် အချက်(၈)ချက်တို့ကို အကျယ်တဝင့် ရှင်းလင်းပြောကြားခဲ့ကြောင်း သတင်းရရှိပါသည်။

DOCA(စစ်ကိုင်း)

                  စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးဦးကျော်ကျော်လွင်နှင့် တာဝန်ရှိသူများသည် ၂၀-၄-၂၀၂၂ နေ့တွင် မုံရွာစက်မှုဇုံ၌ မုံရွာခရိုင်၊ ဝါလုပ်ငန်းရှင်များနှင့် တွေ့ဆုံဆွေးနွေးခဲ့ပါသည်။

              ထိုသို့ဆွေးနွေးရာတွင် တိုင်းဒေသကြီးဦးစီးမှူးက စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည်  ၈-၄-၂၀၂၂ ရက်စွဲပါ အမိန့်အမှတ် ၁/၂၀၂၂  ဖြင့် ဝါသီးနှံနှင့် ဝါဂွမ်းကို အရေးကြီးကုန်စည်အဖြစ် သတ်မှတ်ခဲ့ပါကြောင်း၊ အဆိုပါအမိန့်တွင် ဝါသီးနှံနှင့် ဝါဂွမ်းတို့ကို စျေးကွက်အတွင်း စျေးနှုန်းမြှင့်တင်ရောင်းချခြင်း၊ စျေးနှုန်းမြှင့်တင်ဖြန့်ဖြူးခြင်း သို့မဟုတ် စျေးကစားရန်ရည်ရွယ်ချက်ဖြင့် သိုလှောင်ခြင်း မပြုရန်တားမြစ်ထားပါကြောင်း၊ အမိန့်ပါ တားမြစ်ချက်များအား လိုက်နာခြင်းမရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူခြင်းခံရမည်ဖြစ်ပါကြောင်း၊  ယင်းကိစ္စနှင့်ပတ်သက်၍ ဝါသီးနှံနှင့် ဝါဂွမ်းတို့ကို တင်ပို့မှု၊ ရောင်းဝယ်မှု၊ လက်ဝယ်ထားမှု၊ သိုလှောင်မှု၊ သယ်ဆောင်မှု၊ ဖြန့်ဖြူးမှု၊ အသုံးပြုမှု အခြေအနေများကို ​ကြပ်မတ်ဆောင်ရွက်ရန် စားသုံးသူရေးရာဦးစီးဌာနအား တာဝန်ပေးအပ်ထားသည့်အတွက် မိမိအနေဖြင့် ယခုကဲ့သို့ ဝါလုပ်ငန်းရှင်များအား လာရောက်တွေ့ဆုံ ရှင်းလင်းဆွေးနွေးရခြင်းဖြစ်ပါကြောင်း၊ ဝါသီးနှံနှင့်ဝါဂွမ်းကို အရေးကြီးကုန်စည်အဖြစ် သတ်မှတ်ထားသော်လည်း ပုံမှန်ရောင်းဝယ်ဖောက်ကားမှုများကို ဆက်လက်ဆောင်ရွက်နိုင်ပါကြောင်း၊ မိမိတို့ဌာနအနေဖြင့် မိမိတို့တိုင်းဒေသကြီးအတွင်းရှိ ဝါသီးနှံနှင့်ဝါဂွမ်း လက်ကျန် အခြေအနေများ၊ ရောင်းဝယ်ဖောက်ကားမှုအခြေအနေများကို အထက်အဆင့် တာဝန်ရှိသူများထံ  အပတ်စဥ် တင်ပြရမည်ဖြစ်သောကြောင့် ဌာနတာဝန်ရှိသူများက စာရင်းကောက်ယူသည့်အခါ မှန်မှန်ကန်ကန်စာရင်းပေးစေလိုပါကြောင်း၊ ဌာနနှင့်ပူးပေါင်းဆောင်ရွက်ကြစေလိုပါကြောင်း၊ လုပ်ငန်း ရှင်များဖက်က အခက်အခဲများ၊ အကြံပြုလိုသည်များရှိပါက ဆွေးနွေးစေလိုပါကြောင်း ပြောကြားခဲ့ပါသည်။

             ထို့နောက် ဝါလုပ်ငန်းရှင်များက ၎င်းတို့၏အခက်အခဲများကို တင်ပြကြပြီး၊ နိုင်ငံတော်မှ ဝါဂွမ်းဝယ်ယူရေးနှင့် ပတ်သက်၍ အကြံပြုဆွေးနွေးခဲ့ကြကြောင်း သတင်းရရှိပါသည်။

DOCA(စစ်ကိုင်း)