HighLight News

             ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့၌  မြို့ပေါ်ရပ်ကွက်များရှိ ဆေးဆိုင်များနှင့် အလှကုန်ဆိုင်များအား ဈေးကွက်စောင့်ကြည့် ကွင်းဆင်းစစ်ဆေးခြင်းကို  ခရိုင်စားသုံးသူရေးရာဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်ကျန်းမာရေးဦးစီးဌာန၊ ရပ်ကွက်အုပ်ချုပ်ရေးမှူးများနှင့် မြို့နယ်စည်ပင်သာယာရေးအဖွဲ့တို့မှ ဝန်ထမ်းများပူးပေါင်း၍ (၆.၃.၂၀၂၅)ရက်နေ့ နံနက် (၁၀း၀၀) နာရီအချိန်တွင် ကွင်းဆင်းစစ်ဆေး ဆောင်ရွက်ခဲ့ကြောင်းသိရသည်။

           ထိုသို့ စစ်ဆေးရာ၌  မြန်မာနိုင်ငံ ဆေးဝါးမှတ်ပုံတင် အမှတ်မပါရှိသော ဆေးဝါးများ၊ သက်တမ်းလွန်ဆေးဝါးများနှင့် တရားမဝင်ဆေးဝါးများ၊ စပ်ဆေးအန္တရာယ် သတိပြု၍ ကျောက်ကပ်ပျက်စီးလွယ်သဖြင့် ရောင်းချခြင်းရှိ၊ မရှိနှင့် အလှကုန်ဆိုင်များတွင် သက်တမ်းလွန်အလှကုန်များ သုံးစွဲရန်မသင့်ဟု တားမြစ်ထားသော အလှကုန်များရှိ၊ မရှိကို ဈေးကွက်စောင့်ကြည့်ခြင်း၊ အသိပညာပေးခြင်းများနှင့် ဆေးဝါး၊ ဆေးပစ္စည်း၊ အလှကုန် ပြည်ပတင်သွင်းကုန်စည်ဖြစ်ပါက အလှကုန်တင်သွင်းခွင့်လက်မှတ်နှင့် ပြည်တွင်းထုတ် ကုန်စည်ဖြစ်ပါက ထုတ်လုပ်မှုကျင့်စဉ်နှင့်အညီ ထုတ်လုပ်ခြင်းရှိ/မရှိ ထောက်ခံချက်မှတ်ပုံတင်ခွင့်ပြုလိုင်စင် ပါဝင်မှုရှိ/မရှိကို ကုန်စည်များသတ်မှတ်ချက်အတိုင်း  ကွင်းဆင်းဆောင်ရွက်ခဲ့ခြင်းဖြစ်ကြောင်း နှင့် မအူပင်မြို့နယ်ရပ်ကွက် စတိုးဆိုင်(၅)ဆိုင်မှ အလှကုန်ပစ္စည်းများသည် သတ်မှတ်ချက်များနှင့် ကိုက်ညီကြောင်း စစ်ဆေးတွေ့ရှိရကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ ပုသိမ်ခရိုင်၊ ပုသိမ်မြို့နယ်၊ မြို့ပေါ်ရှိ အလှကုန်အရောင်းဆိုင်များအား (၇.၃.၂၀၂၅) ရက်နေ့၊ နံနက် (၁၀:၀၀)နာရီအချိန်တွင် တိုင်းဒေသကြီးအစားအသောက်နှင့် ဆေးဝါး ကွပ်ကဲရေးဦးစီးဌာနမှ ဦးဆောင်၍ ပုသိမ်မြို့နယ် အစားအသောက်နှင့်ဆေးဝါးကြီးကြပ် ကွပ်ကဲရေး ကော်မတီနှင့်အတူ ပူးပေါင်းအဖွဲ့ဖြင့် တားမြစ်ထားသော အလှကုန်ပစ္စည်းများရောင်းချခြင်းရှိ/ မရှိ ရှောင်တခင်ဝင်ရောက်၍ ဈေးကွက်စောင့်ကြည့်စစ်ဆေးခဲ့ရာ တားမြစ်ထားသော အလှကုန်များအား မြို့နယ်ကျန်းမာရေးဦးစီးဌာနရုံးဝင်းအတွင်း ဖျက်ဆီးခဲ့ကြောင်း သိရှိရပါသည်။

DOCA(ဧရာဝတီ)

           သဘာဝဆီးရွင်ဆေးဖြစ်နေတဲ့ ကညွတ်သည် ခန္ဓာကိုယ်ထဲကရေတွေကို ထုတ်ပယ်ပေးပြီး မလိုလားအပ်တဲ့ အငန်ဓာတ်နဲ့ အရည်ဓာတ်ပါဝင်မှုကို လျော့နည်းစေပါတယ်၊ သွေးတိုးရောဂါ ဒါမှမဟုတ် ဖောရောင်ခြင်း ခံစားနေရတဲ့သူတွေအတွက် အကျိုးပြုပေးနိုင်တဲ့ ဓာတ်စာလည်းဖြစ်ပါသည်။ မြန်မာ့ဆေးကျမ်းများအရ ကညွတ်မှာ ချိုအေးသောအရသာရှိ၍ အေးသောဂုဏ်ရှိပြီး၊ သလိပ်ကိုကြေစေပြီး သွေးရောဂါများကိုနှိမ်နင်းပါသည်။ အရွက်၊ အပင်၊ အရိုး၊ အမြစ်၊ အသီးအားလုံးသည် လူကိုအကျိုးပြုသော်လည်း အရိုး၊ အမြစ်သည် အဓိကအသုံးဝင်ပါသည်။

          တစ်နှစ်လျှင်တစ်ကြိမ်သာ ရာသီအလိုက်ပေါက်ရောက်သည့် ရာသီစာကညွန်ကို ပုသိမ်မြို့၊ ဘူတာဈေးတွင် တစ်ပိဿာလျှင် (၆၀၀၀/-) ကျပ်၊ (၅၀) သားလျှင် (၃၀၀၀/-) ကျပ်နှုန်းဖြင့် ရောင်းချနေကြောင်း သိရှိရပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မြောင်းမြခရိုင် လပွတ္တာမြို့နယ် တာဝန်ခံဦးမြင့်ဌေးနှင့်ဝန်ထမ်းများသည် (၅.၃.၂၀၂၅) ရက်နေ့ နေ့လယ်(၁၂:၀၀) နာရီအချိန်တွင် လပွတ္တာမြို့နယ် အမှတ်(၅)ရပ်ကွက် မီးပြတိုက် Mini Mart တွင် ရန်ကုန်မြို့  5 Star ကုမ္မဏီမှ ဝယ်ယူရောင်းချနေသော ကြက်အူချောင်းများအား ကုန်အညွှန်းအမှတ်အသားပြည့်စုံမှု ရှိ/မရှိ ကွင်းဆင်းစစ်ဆေးခဲ့ပါသည်။

          ထို့သို့ကွင်းဆင်းစစ်ဆေးရာတွင် လပွတ္တာမြို့နယ်တာဝန်ခံမှ လပွတ္တာမြို့နယ်၊ အမှတ်(၅) ရပ်ကွက် မီးပြတိုက် Mini Mart တွင် ရောင်းချနေသော ကြက်အူချောင်းများအား ကုန်အညွှန်းပြည့်စုံစွာဖော်ပြထားခြင်းရှိ/မရှိ၊ စားသုံးသူဘေးအန္တရာယ်ဖြစ်စေနိုင်သော အစားအသောက်များရောင်းချခြင်းရှိ/မရှိ ကွင်းဆင်းစစ်ဆေးခဲ့ပြီး သတ်မှတ်စံချိန်စံညွှန်းနှင့်အညီ ရောင်းချလျက်ရှိ ကြောင်းတွေ့ရှိရပါသည်။ ပြီးနောက်သက်ဆိုင်ရာဌာနမှခွင့်ပြုထားသော ဥပဒေညွှန်ကြားချက်များ အားလိုက်နာဆောင်ရွက်ကြရန်နှင့် ကုန်အညွှန်းအမှတ်အသား ပြည့်စုံစွာဖော်ပြထားသည့် စားသောက်ကုန်များကိုသာဈေးကွက်အတွင်း တင်သွင်းရောင်းချစေရန် အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ ဝါးခယ်မမြို့နယ်တာဝန်ခံ ဦးအောင်မိုးနှင့် ဝန်ထမ်းများသည် ယာယီရဲမှူးနှင့်အတူ (၅.၃.၂၀၂၅)ရက်နေ့ နံနက်(၁၀:၀၀) နာရီအချိန်တွင် ဝါးခယ်မမြို့နယ်၊ အစိုးရစက်မှုလက်မှုသိပ္ပံသင်တန်းကျောင်းတွင် စားသုံးသူအသိပညာပေး  ဟောပြောဆောင်ရွက်ခဲ့ပါသည်။

           ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ ဝါးခယ်မမြို့နယ်တာဝန်ခံမှ မိတ်ဆက်စကားပြောကြားပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ (၂၀၁၉)ပါ ပြဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေရေးသားဖော်ပြရမည်ဖြစ်ကြောင်း ဟောပြောဆွေးနွေးခဲ့ပါသည်။ စားသုံးသူကာကွယ်ရေးဥပဒေပါ အချက်အလက်များသိရှိလိုပါက ခရိုင်စားသုံးသူရေးရာဦးစီးမှူးရုံးတွင်လည်းကောင်း၊ စားသုံးသူရေးရာဦးစီးဌာနရုံးချုပ်၏ www.doca.mm.website တွင်  လည်းဝင်ရောက်ကြည့်ရှုလေ့လာနိုင်ပါကြောင်း၊ စားသုံးသူများနစ်နာမှုရှိပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ CICC သို့ လူကိုယ်တိုင်ဖြစ်စေ တယ်လီဖုန်းဖြင့်ဖြစ်စေတိုင်ကြားနိုင်ပါကြောင်း အသိပေးဟောပြောခဲ့ပြီး  ထို့ဟောပြောပွဲသို့ ဆရာ/ ဆရာမများနှင့် ကျောင်းသား/ ကျောင်းသူ စုစုပေါင်း(၈၀)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)