HighLight News

         ၉-၁၀-၂၀၂၄ ရက်နေ့တွင် ကျိုက်ထိုမြို့နယ်အတွင်းရှိ စက်သုံးဆီအရောင်းဆိုင်များအား စားသုံးသူရေးရာဦးစီးဌာန၊ ကျိုက်ထိုမြို့နယ်တာဝန်ခံသည် ခရိုင်စီမံအုပ်ချုပ်ရေးအဖွဲ့၊ မြို့နယ်အဆင့်ဌာနဆိုင်ရာများနှင့်ပူးပေါင်းကာ PT Power ၊ Htet ၊ Denko ၊ မိဘမေတ္တာ၊ ချောစုစက်သုံးဆီဆိုင်များအား သွားရောက်ကွင်းဆင်းစစ်ဆေးခဲ့ပါသည်။

          ထိုသို့စစ်ဆေးရာ၌ စက်သုံးဆီများအရည်အသွေးပြည့်ဝမှန်ကန်မှုရှိ/ မရှိ၊ အလေးချိန်လီတာမှန်ကန်မှုရှိ/ မရှိ၊ သတ်မှတ်ခွဲတမ်းများအတိုင်း အမှန်တကယ်ရောက်ရှိမှုရှိ/ မရှိ၊ ရည်ညွှန်းဈေးနှုန်းများအတိုင်း မှန်ကန်စွာရောင်းချခြင်း ရှိ/ မရှိ၊ စက်သုံးဆီများ ဆီလက်ကျန်မှန်ကန်မှုရှိ/မရှိတို့အား ကြည့်ရှုစစ်ဆေးခဲ့ကြောင်းသိရှိရပါသည်။

DOCA(မွန်)

           ဟင်္သာတခရိုင် စားသုံးသူရေးရာဦးစီးဌာနမှ စစ်ဆေးရေးအရာရှိများနှင့် အဖွဲ့များသည် ဆက်စပ်ဌာနဆိုင်ရာများနှင့်ပူးပေါင်း၍ ၂၀၂၄ ခုနှစ်၊ အောက်တိုဘာလ (၅)ရက်နေ့တွင် စားသုံးသူ ပြည်သူများမှ ကုန်စည်၊ ဝန်ဆောင်မှုများကို ဝယ်ယူသုံးစွဲခြင်းဖြင့် ထိခိုက်နစ်နာမှုမရှိစေရေးအတွက် လုပ်ငန်းရှင်များမှ စီးပွားရေးဆိုင်ရာ ကျင့်ဝတ်များစောင့်ထိန်းပြီး စားသုံးသူအကျိုး အလေးထားသည့်သူများဖြစ်စေရန်ရည်ရွယ်လျက် ဟင်္သာတမြို့၊ ပဒေသာဈေးနှင့် ဌေးဝင်းဈေးအတွင်းရှိ ကုန်စုံဆိုင်များ၌ ဖြန့်ဖြူးရောင်းချလျက်ရှိသော ကုန်စည်များတွင် စားသုံးသူကာကွယ်ရေးဥပဒေပါ ကုန်အညွှန်အမှတ်အသားဆိုင်ရာအချက်များအား လိုက်နာမှုရှိ/ မရှိ ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ကြောင်း သတင်းရရှိပါသည်။

        ထိုသို့စစ်ဆေးခဲ့ရာတွင် စားသုံးသူ‌ရေးရာဦးစီးဌာနမှ ခရိုင်စစ်ဆေးရေးမှူးများ၊ မြို့နယ်စစ်ဆေးရေးမှူးများနှင့် ဆက်စပ်ဌာနဆိုင်ရာများပါဝင်သော ပူးပေါင်းအဖွဲ့များသည် ဟင်္သာတ မြို့နယ်၊ ပဒေသာဈေးအတွင်းရှိ ကုန်စုံဆိုင်(၃)ဆိုင်နှင့် ဌေးဝင်းဈေးအတွင်းရှိ ကုန်စုံဆိုင်(၃)ဆိုင်တို့တွင် ရောင်းချလျက်ရှိသော အသင့်စားခေါက်ဆွဲခြောက်ထုပ်အမျိုးမျိုးနှင့် စားသုံးဆီအမျိုးမျိုးတို့၌ ကုန်အညွှန်းအမှတ်အသားဆိုင်ရာအချက်များ ပြည့်စုံကိုက်ညီမှုရှိ/ မရှိ၊ ညွှန်ကြားချက်အမှတ် ၂/၂၀၁၉၊ ညွှန်ကြားချက်အမှတ် ၁/၂၀၂၁တို့အား လိုက်နာဆောင်ရွက်မှုရှိ/ မရှိနှင့် သက်ဆိုင်ရာဌာန ထောက်ခံချက်များဖော်ပြပါဝင်မှုရှိ/ မရှိ စသည့်အချက်များအားစစ်ဆေးခဲ့ပါသည်။ ဆက်လက်၍ အဆိုပါဆိုင်များတွင် ဗူးများပေါ်၌ ရိုက်နှိပ်ထားသည့် အညွှန်းဖော်ပြချက်များနှင့် စတစ်ကာကပ်၍ ဖော်ပြထားသည့် အညွှန်းဖော်ပြချက်များ ကွဲလွဲစွာထုတ်လုပ်ထားသည့် “အဖွားလက်ရာ” အမှတ်တံဆိပ်ပါ အသားဟင်း၊ ငါးဟင်းစည်သွပ်ဗူးများ ရောင်းချမှုရှိ/ မရှိကိုလည်း ဈေးကွက်စောင့်ကြည့်စစ်ဆေးခဲ့ကြောင်းသိရှိရပါသည်။

DOCA(ဧရာဝတီ)

          ပဲခူးတိုင်းဒေသကြီး၊ သာယာဝတီခရိုင်အတွင်းရှိ မြို့နယ်များတွင် အပတ်စဉ် အင်္ဂါနေ့တိုင်း ဘိလပ်မြေဆိုင်များသို့ စားသုံးသူရေးရာဦးစီးဌာနမှ ဝန်ထမ်းများသည် နိုင်ငံအတွင်းနေထိုင်ကြသော ပြည်သူများအား ဈေးနှုန်းသက်သာစွာဝယ်ယူရရှိနိုင်ရေးအတွက် အလေးထားဆောင်ရွက်လျက်ရှိရာ သာယာဝတီခရိုင်အတွင်း မြို့နယ်အလိုက် အပတ်စဉ်အင်္ဂါနေ့တိုင်း ဘိလပ်မြေဆိုင်များသို့သွားရောက်၍ ဘိလပ်မြေအမျိုးအစားအလိုက် ဈေးနှုန်းများနှင့် မြေပြင်လက်ကျန်အခြေအနေများကို ကွင်းဆင်းစစ်ဆေးခြင်းများဆောင်ရွက်ခဲ့ကြောင်းသိရှိရပါသည်။

DOCA(ပဲခူး)

           စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည် (၇.၁၀.၂၀၂၄)ရက်နေ့၊ နံနက် (၀၉:၀၀) နာရီအချိန်တွင် ဟင်္သာတမြို့နယ်၊ လယ်တော်အဝေးပြေးကားဝန်း၊ ဆီကုန်သည်နှင့် ဆီလုပ်ငန်းရှင်များအသင်းရုံး၌ ဆီလုပ်ငန်းရှင်များအား စားသုံးသူကာကွယ်ရေး အသိပညာပေးဟောပြောခြင်းဆောင်ရွက်ခဲ့ပါသည်။

        ဟောပြောပွဲတွင် ဟင်္သာတမြို့နယ်တာဝန်ခံဦးမိုးကျော်မှ စားအုန်းဆီဝယ်ယူခွင့်စာအုပ်များဖြင့် ကျေးရွာ၊ ရပ်ကွက်အတွင်းရောင်းချရာတွင် အုပ်ချုပ်ရေးမှူးများအနေဖြင့် ကုန်စုံဆိုင်ပိုင်ရှင် များအားစနစ်တကျဖြန့်ခွဲပေးနိုင်ရေး၊ ပြည်သူလူထုများလက်ဝယ်သို့အရောက်ရောင်းချပေးနိုင်ရေး၊ စားအုန်းဆီရောင်းချသောကုန်စုံဆိုင်များတွင် သတ်မှတ်ရည်ညွှန်းဈေးပါ ဗွီနိုင်းများကို ဆိုင်ရှေ့တွင်ချိတ်ဆွဲထားရန်၊ အိမ်ထောင်စုစာရင်းကိုင်ဆောင်ထားသည့် အိမ်ထောင်စုတိုင်းကို ရောင်းချပေးရန်၊ အဆင်မပြေမှုများရှိလာလျှင်လည်း မိမိကိုယ်တိုင် ကျေးရွာများသို့ လာရောက်၍အဆင်ပြေချောမွေ့စေရေး လုပ်ဆောင်ပေးမည်ဖြစ်ကြောင်းဟောပြောခဲ့ပြီး ကျေးရွာအုပ်ချုပ်ရေးမှူးများနှင့် ကုန်စုံဆိုင်လုပ်ငန်းရှင်များဘက်မှလည်း သိလိုသည်များ မေးမြန်း၍အပြန်အလှန် ဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ သာယာဝတီခရိုင်ဦးစီးမှူးရုံးရှိ ထုတ်ကုန်လုံခြုံစိတ်ချရမှုဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ဝန်ထမ်းများသည်  (၉-၁၀-၂၀၂၄) ရက်နေ့၊ နေ့လယ် (၁၅:၀၀)နာရီအချိန်တွင် မင်းလှမြို့ပေါ်ရှိ စားအုန်းဆီ လက်လီ/ လက်ကားရောင်းချနေသော ကုန်စုံဆိုင်များအား သွားရောက်ကွင်းဆင်းစစ်ဆေးခြင်းပြုလုပ်ဆောင်ရွက်ခဲ့ပါသည်။

         ထိုသို့ကွင်းဆင်းစစ်ဆေးခြင်းများဆောင်ရွက်ရာတွင် စားအုန်းဆီ လက်လီ/ လက်ကားရောင်းချလျက်ရှိသော လုပ်ငန်းရှင်များအနေဖြင့် သက်ဆိုင်ရာဌာနများမှ ထုတ်ပြန်ထားသည့် အမိန့်၊ ညွှန်ကြားချက်များနှင့်အညီ ရောင်းချဖြန့်ဖြူးကြရန်တို့ကိုရှင်းလင်းပြောကြားခဲ့၍ စားအုန်းဆီခွဲတမ်းများကို သတ်မှတ်စည်းမျဉ်းစည်းကမ်းများနှင့်အညီ စနစ်တကျဖြန့်ဖြူးရောင်းချရန်၊ အချင်အတွယ်မှန်ကန်စွာရောင်းချကြရန်နှင့် ခွဲတမ်းရရှိသည့်ဆိုင်များအနေဖြင့် ဈေးနှုန်းကို အများမြင်သာသောနေရာများတွင် မြင်သာသောစာလုံးအရွယ်အစားများဖြင့် Vinyl ချိတ်ဆွဲထားရှိရန် အသိပညာပေးပြောကြားခဲ့၍ ကွင်းဆင်းစစ်ဆေးခြင်းများဆောင်ရွက်ခဲ့ကြောင်းသိရှိရပါသည်။

DOCA(ပဲခူး)