သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ မြန်အောင်မြို့နယ်၊ မြို့နယ်တာဝန်ခံသည် မြို့မတဲကြီးကုန်းအုပ်စု၊ အုပ်ချုပ်ရေးမှူးရုံး၌ ကုန်စုံဆိုင်လုပ်ငန်းရှင်(၁၀)ဦးအား (၁၄.၉.၂၀၂၃) ရက်နေ့ ၊ နံနက် (၁၁:၃၀) နာရီ အချိန် တွင် စားသုံးသူကာကွယ်ရေးအသိပညာပေးဟောပြောခြင်း ဆောင်ရွက်ခဲ့ပါသည်။

   ဟောပြောပွဲတွင် မြို့နယ်တာဝန်ခံ ဦးမြင့်အောင်က စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည် အမျိုးအစားကိုလိုက်၍ ကုန်အညွှန်းအမှတ်အသားများ ပြည့်စုံမှန်ကန်စွာ ဖော်ပြခြင်းရှိ/မရှိတို့ကိုစစ်ဆေးခဲ့ပြီး၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ကြေညာထားသော ညွှန်ကြားချက်အမှတ် (၂/၂၀၁၉) နှင့်အညီ မြန်မာဘာသာဖြင့် ပြည်စုံစွာဖော်ပြထားသော ကုန်စည်များကိုသာ ရောင်းချရန်နှင့် စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များ အတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသော ကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များအကြောင်းနှင့် ပြစ်မှုပြစ်ဒဏ်များအကြောင်းကို သိရှိစေရန်၊ စားသုံးသူ မိဘပြည်သူများအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း သိရှိလိုပါက www.doca.gov.mm Website တွင် ဝင်ရောကလေ့လာနိုင်ကြောင်း၊ စသည့်တို့ကို အသိပညာပေးဟောပြောခဲ့ကြောင်း သိရှိရပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ် စားသုံးသူရေးရာဦးစီးဌာန၏ ဦးဆောင်မှုဖြင့် ခရိုင်အထွေထွေအုပ်ချုပ်ရေးဦးစီးဌာန၊ မြို့နည်စည်ပင်သာယာရေးအဖွဲ့၊ ရပ်ကွက်အုပ်ချုပ်ရေးမှူး တို့သည် (၁၂.၉.၂၀၂၃) ရက်နေ့၊ နံနက်(၁၀:၀၀)နာရီအချိန်တွင် လေးမျက်နှာမြို့လမ်းဆုံတွင် ပြည်သူများအား သက်သာသောဈေးနှုန်းဖြင့် စားအုန်းဆီများဖြန့်ဖြူး ရောင်းချပေးလျက်ရှိကြောင်း သိရပါသည်။

    စားအုန်းဆီများရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ ထုတ်ပြန်ပေးလျက်ရှိသော စားအုန်းဆီ တစ်ပိဿာရည်ညွှန်းဈေးအပေါ် အခြေခံ၍ သယ်ယူပို့ဆောင်ခပါ ကုန်ကျစရိတ်တွင် အမြတ် ၂ ရာခိုင်နှုန်းတွက်ချက်၍ ရောင်းချပေးခြင်းဖြစ်ပြီး လူတစ်ဦးလျှင် ၅၀ ကျပ်သား(၂၂၅၀)ကျပ်နှုန်းဖြင့် စုစုပေါင်း ပိဿာချိန် (၂၂၀) ပိဿာခန့်အား အချက်အချာကျသော လူစည်ကားရာလမ်းဆုံ ရပ်ကွက်သို့ ဈေးကားများဖြင့် လှည့်လည်ရောင်းချလျက်ရှိကြောင်း စားသုံးဆီကုန်သည်များနှင့် စားသုံးဆီလုပ်ငန်းရှင်များထံမှ သတင်းရရှိပါသည်။

DOCA(ဧရာဝတီ)

    ၂၀၂၃ခုနှစ်၊စက်တင်ဘာလ (၅)ရက်နေ့၊နေ့လယ် (၁၄:၃၀) အချိန်တွင် စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်တာဝန်ခံသည် ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် စားသုံးသူရေးရာဦးစီးဌာနတို့ ပူးပေါင်း၍ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၌ စားသုံးသူကာကွယ်ရေးအသိပညာပေး Talk Show အစီအစဉ်ကို ပြုလုပ်ဆောင်ရွက်ခဲ့ပါသည်။

       အဆိုပါ Talk Show အစီအစဉ်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဦးတင်ရွှေက Talk Show ပြုလုပ်ရခြင်း၏ရည်ရွယ်ချက်များရှင်းလင်းပြောကြားခဲ့ပြီး၊ စားသုံးသူရေးရာ ဦးစီးဌာနမှ မြို့နယ်တာဝန်ခံ ဦးအောင်သန်းဌေးက စားသုံးသူကာကွယ်ရေးဥပဒေများနှင့် နည်းဥပဒေများအကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ဖော်ပြရမည့် ညွှန်ကြားချက်များအကြောင်း၊ စီးပွားရေးလုပ်ငန်းရှင်၏တာဝန်များအကြောင်း၊ စားသုံးသူအခွင့်အရေးနှင့် တာဝန်များအကြောင်း၊ ဝန်ဆောင်မှုနှင့် စပ်လျဉ်း၍ အာမခံချက်ပေးခြင်းများအကြောင်း၊ တားမြစ်ချက်များနှင့် ပြစ်မှုပြစ်ဒဏ်များအကြောင်း၊ ကုန်စည်(သို့မဟုတ်)ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှုများနှင့် စပ်လျဉ်း၍ ကုစားခွင့်ရရှိခြင်းများအကြောင်း၊ ဦးစီးဌာန၏ လက်ရှိဆောင်ရွက်နေသည့် လှုပ်ရှားမှုများအကြောင်း စားသုံးသူကာကွယ်ရေးအသိပညာပေး အမေးအဖြေများမေးမြန်းခြင်း၊ ဖြေကြားခြင်းတို့ကို ပြုလုပ်ခဲ့ကြောင်းသိရှိရပါသည်။

DOCA(ဧရာဝတီ)

   ပဲခူးတိုင်းဒေသကြီး၊ ကဝမြို့နယ်၊ သပြုကျေးရွာသည် သတ္တုကုန်ချောပစ္စည်းများကို သက်တမ်း(၁၀၀)ကျော်   မိရိုးဖလာလုပ်ငန်းအဖြစ် ရွာလုံးကျွတ်နီးပါး လုပ်ကိုင်ဆောင်ရွက်သည့် ကျေးရွာတစ်ရွာဖြစ်ပါသည်။ ကုန်ကြမ်းပစ္စည်းများဖြစ်သော သံ၊ သတ္တုပစ္စည်းအဟောင်းများ၊ ကျောက်မီးသွေး၊ ရေနံချိုး၊ မီးသွေးနှင့် ဒီဇယ်ဆီတို့ကို ရန်ကုန်တိုင်းဒေသကြီး၊ ရွှေပေါက်ကံမြို့၊ ဘုရင့်နောင်၊ တောင်ဒဂုံ၊ စော်ဘွားကြီးကုန်းမှရရှိပါသည်။ လုပ်ငန်းတစ်ခုလျှင် လုပ်သားဦးရေ(၁၀)ဦးမှ (၂၀)ဦးခန့်လုပ်ကိုင်ဆောင်ရွက်လျက်ရှိပါသည်။ နေအိမ်များတွင် အသုံးပြုနေသော မိုးဗြဲဒယ်၊ သတ္တုဒယ်ဆိုဒ်စုံ ၊ သတ္တုငရုတ်ဆုံ၊ မော်တာပန်ကာဒလက်၊ ကားလက်ကိုင်ဂျက်၊ ဆိုင်ကယ်ခြေနင်း စသည့်ပစ္စည်းများကို သဲပုံလောင်းနည်းပညာဖြင့် ထုတ်လုပ်ပေးလျက်ရှိပါသည်။ လုပ်ငန်းလုပ်ကိုင်သူ (၁၀၀)ကျော်ခန့်ရှိပြီး ထိုလုပ်ငန်းများမှ အလုပ်သမားဦးရေ (၇၀၀) ဦးကျော်ခန့်အလုပ်အကိုင်ရရှိလျက်ရှိပါသည်။ ဈေးကွက်အနေဖြင့် ဒေသတွင်းနှင့် ရန်ကုန်၊ မန္တလေး၊ ဧရာဝတီ၊ မော်လမြိုင်မြို့များသို့ တင်ပို့ရောင်းချလျက်ရှိပြီး  ဒေသတွင်းပြပွဲများနှင့် နိုင်ငံတော်အဆင့်ပြပွဲကြီးများတွင် ပါဝင်ပြသနိုင်သည့်အတွက် လူသိများသည့်ထုတ်ကုန် တစ်မျိုးဖြစ်ပြီး ဈေးကွက်လည်းပိုမိုရရှိလာကြောင်းသိရှိရပါသည်။ လုပ်ငန်းများရေရှည်ရပ်တည်နိုင်စေရန်နှင့် ဒေသတွင်း MSMEs လုပ်ငန်းဖွံ့ဖြိုးတိုးတက်စေရန်အတွက်လည်း သက်ဆိုင်ရာဌာနများက MSMEs ချေးငွေများရရှိရေး ချိတ်ဆက်ဆောင်ရွက်ပေးလျက်ရှိရာ ၎င်းဒေသအတွက် အလုပ်အကိုင်အခွင့်အလမ်းများ ပိုမိုရရှိလာမည်ဖြစ်ပါကြောင်းသိရှိရပါသည်။

DOCA(ပဲခူး)

     ဧရာဝတီတိုင်းဒေသကြီး စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးရုံး ၊ အစည်းအဝေးခန်းမတွင် (၁၁.၉.၂၀၂၃) ရက်နေ့ ၊ နံနက် (၀၉:၃၀) နာရီအချိန်တွင် (၂/၂၀၂၃) ဝန်ထမ်း စွမ်းဆောင်ရည်မြှင့်တင်‌ရေးသင်တန်းဖွင့်ပွဲ ကျင်းပပြုလုပ်ရာ ဒုတိယတိုင်းဒေသကြီး ဦးစီးမှူး ဦးထွန်းထွန်းမှ (၁၁.၉.၂၀၂၃) ရက်နေ့နှင့် (၁၂.၉.၂၀၂၃) ရက်နေ့တို့ဖြင့် (၂) ရက် သင်ကြားမည်ဖြစ်ပြီး ဝန်ထမ်းများ စွမ်းဆောင်ရည်မြှင့်မားစေရန် ရည်ရွယ်ပါကြောင်း အဖွင့်အမှာစကားပြောကြား၍ ဖွင့်လှစ်ခဲ့ပါသည်။

          ဆက်လက်၍ (၁၂.၉.၂၀၂၃) ရက်နေ့ ၊ နံနက် (၀၉:၃၀)  နာရီအချိန်တွင် သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲ ၊ ဦးမင်းမင်းဦး ၊ ဦးစီးအရာရှိမှ ဧရာဝတီတိုင်းဒေသကြီး ၊ စားသုံးသူရေးရာဦးစီးဌာနမှ အမှုထမ်းများအား သတင်းရေးသားရာတွင် (ဘ) (၆) လုံး အခြေခံကိုရေးသားပြီး သတင်းရေးသားနည်းနှင့် ပတ်သက်သည့် အကြောင်းအရာများ  ၊ နံနက် (၁၀:၀၀) နာရီအချိန်တွင် စားသုံးသူရေးရာဌာနခွဲတာဝန်ခံ ၊  ဦးကျော်စိုးရီ ၊ လက်ထောက်ညွှန်ကြားရေးမှူး စားသုံးသူကာကွယ်ရေးဥပဒေ ၊ စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက် ရေးစင်တာ (Consumer Information and Complaint Center – CICC) နှင့် ပတ်သက်သည့် အကြောင်းအရာများနှင့် နေ့လယ် (၁၂:၃၀) နာရီအချိန်တွင် ထုတ်ကုန်လုံခြုံ စိတ်ချရမှုဌာနခွဲ တာဝန်ခံ ၊ ဒေါ်ဖြူဖြူလတ် ၊ လက်ထောက်ညွှန်ကြားရေးမှူးမှ စားသုံးသူများ အသုံးပြုသည့် ကုန်စည်များတွင် ကုန်အညွှန်းအမှတ်အသားများပြည့်စုံစွာ ဖော်ပြခြင်းရှိ/မရှိနှင့် အခြားသက်ဆိုင်ရာဌာနများ၏ ထောက်ခံချက်များ ရယူထားခြင်း ရှိ/မရှိ ဈေးကွက်စောင့်ကြည့် စစ်ဆေးခြင်းနှင့် ပတ်သက်သည့်အကြောင်းအရာများအား Power Point ဖြင့် အသီးသီး သင်တန်း ပို့ချခဲ့ပါသည်။ ညနေ (၁၆:၀၀) နာရီအချိန်တွင် သင်တန်းသူသင်တန်းသားများအား သင်တန်းဆင်းလက်မှတ်များ အသီးသီးပေးအပ်ခဲ့ပြီး သင်တန်းအခမ်းအနား ရုပ်သိမ်းခဲ့ပါသည်။

DOCA(ဧရာဝတီ)