ပြည်တွင်းကုန်သွယ်မှုသတင်း

    သရက်မြို့နယ် ပတ်ဝန်းကျင်ကျေးရွာများမှ ထွက်ရှိသည့် ပဲတီစိမ်းနှင့် နှမ်းများ ဈေးကွက်အတွင်းသို့ ဝင်ရောက်လျက်ရှိပါသည်။ ဩဂုတ်လ စတုတ္ထပတ်တွင် ပဲတီစိမ်း(၁)တင်းလျှင် (၅၀၀၀ဝိ/-)နှုန်းဖြင့် အရောင်းအဝယ်ဖြစ်ခဲ့ပြီး ယခုစက်တင်ဘာလ ဒုတိယအပတ် တွင်လည်း ဈေးနှုန်းအတက်အကျမရှိဘဲ (၅၀၀၀ဝိ/-)နှုန်းဖြင့် အရောင်းအဝယ်အေးလျက်ရှိပြီး တောင်သူများ တွင် လက်ကျန်နည်းပါးလာကြောင်း၊ နှမ်းသီးနှံများမှာလည်း ဩဂုတ်လ စတုတ္ထပတ်တွင် နှမ်းနက်(၁)တင်းလျှင် (၈၅၀၀ဝိ/-)၊ နှမ်းနီ(၁)တင်းလျှင် (၈၀၀၀ဝိ/-)နှုန်းဖြစ်ပြီး ယခုစက်တင်ဘာလ ဒုတိယအပတ်တွင် နှမ်းနက်(၁)တင်းလျှင် (၈၈၀၀ဝိ/- မှ၉၀၀၀ဝိ/-)၊  နှမ်းနီ(၁)တင်းလျှင်(၇၈၀၀ဝိ/- မှ ၈၂၀၀ဝိ/-) ထိဈေး မြင့်တက်လာကြောင်း သိရှိရပါသည်။

   သရက်မြို့နယ် ပွဲစားများမှ ဝယ်ယူရရှိသည့် သီးနှံများကို အောင်လံကုန်သည်များသို့ တင်ပို့ လျက်ရှိပြီး နေ့စဉ်တစ်နေ့လျှင် နှမ်းအိတ်ရေ (၈၀-၉၀)ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA( မကွေး)

      မုံရွာမြို့နယ်အတွင်း ခရမ်းချဉ်သီးကို မိုးဦးနှင့် မိုးနှောင်းကာလများတွင် ဒေသအတွင်း တစ်နိုင်တစ်ပိုင် စိုက်ပျိုးကြပါသည်။ ခရမ်းချဉ်သီးသည် အပူပိုင်းဒေသနှင့် သမနွေပိုင်းဒေသတို့တွင် ကောင်းမွန်စွာ စိုက်ပျိုးဖြစ်ထွန်းပါသည်။

     ယခုအချိန်တွင် ဒေသတွင်းခရမ်းချဉ်သီးပေါ်သည့် ရာသီချိန်မဟုတ်သည့်အတွက် ဒေသတွင်း ထွက်ကုန် မရှိသောကြောင့် ရှမ်းပြည်နယ်မှ အင်းလေး၊ အောင်ပန်းတို့ဘက်မှ ခရမ်းချဉ်သီးများကို ဝယ်ယူရောင်းချလျှက်ရှိကြောင်းသိရပါသည်။ ဈေးကွက်အတွင်း ခရမ်းချဉ်သီးများ လှိုင်လှိုင်ဝင် ရောက်လျက်ရှိပြီး မုံရွာမြို့နယ်အတွင်း ဖြစ်ပေါ်နေသော ခရမ်းချဉ်သီးဈေးနှုန်းများမှာ စက်တင်ဘာလ ပထမအပတ်တွင် ခရမ်းချဉ်သီး တစ်ပိဿာလျှင် ကျပ် ၂၀၀၀-၂၂၀၀ မှ စက်တင်ဘာလ ဒုတိယ  အပတ်တွင် ကျပ် ၃၀၀၀-၃၂၀၀ အထိ ဈေးနှုန်းမြှင့်တက်လျက်ရှိပြီး ဈေနှုန်းမြှင့်တက်ရခြင်းမှာ ဒေသတွင်းစိုက်ပျိုးမှု ထွက်ကုန်မရှိသေးခြင်း၊ ဈေးကွက်အတွင်းသို့ အခြားဒေသများမှ ခရမ်းချဉ်သီး များဝယ်ယူရောင်းချရာတွင် စက်သုံးဆီဈေးနှုန်းများ မြင့်တက်မှုကြောင့် သယ်ယူစရိတ်မြှင့်မားလာ ခြင်းဖြစ်ကြောင်း ခရမ်းချဉ်သီးပွဲရုံများထံမှ သိရှိရပါသည်။

DOCA(စစ်ကိုင်း)

      မိမိတို့ဒေသအတွင်း စားသုံးဆီ ဖူလုံပိုလျှံနိုင်ရေးအတွက် ဆီထွက်သီးနှံများ တိုးချဲ့စိုက်ပျိုးသင့်ပြီး ပြည်တွင်းပဲ၊ နှမ်းဈေးကွက်တွင်လည်း ဆီထွက်သီးနှံများ ဈေးကောင်းရရှိနေ၍ လာမည့်ရာသီ တွင်လည်း ဈေးကွက်ကောင်းရနိုင်သဖြင့် ဆီထွက်သီးနှံများကိုတိုးချဲ့စိုက်ပျိုးရန်လို အပ်ပါသည်။

     ရွှေဘိုခရိုင်ရှိ မြို့နယ်များတွင် ၂၀၂၂-၂၀၂၃ခုနှစ် ဆီထွက်သီးနှံ(မိုး) (၂၀၁၇၆၅)ဧက စိုက်ပျိုးရန် လျာထားပြီး ဇွန်လဆန်းပိုင်းမှစတင်၍ စိုက်ပျိုးဆောင်ရွက်ခဲ့ရာ  ယနေ့အချိန်အထိ မြေပဲ (၁၅၉၁၂၉) ဧက၊ နှမ်း(မိုး) (၄၆၆၄၁)ဧက၊ နေကြာ (၆၁၁၂)ဧက စုစုပေါင်း (၂၁၁၈၈၂)ဧက စိုက်ပျိုးပြီးစီး ကြောင်း၊ အလားတူစွာ ၂၀၂၁-၂၀၂၂ခုနှစ် တွင်ဆီထွက်သီးနှံ(မိုး) (၁၉၈၀၁၉)ဧက စိုက်ပျိုးရန်လျာထားပြီး မြေပဲ(၁၅၂၁၀၈)ဧက၊ နှမ်း(မိုး) (၄၃၅၉၂)ဧကနှင့် နေကြာ( ၆၀၄၆)ဧက ဆီထွက်သီးနှံစုစုပေါင်း (၂၀၁၇၄၆)ဧက စိုက်ပျိုးခဲ့သဖြင့် ယခင်နှစ်နှင့် နှိုင်းယှဉ်ပါက ဆီထွက်သီးနှံ (၁၀၁၃၆)ဧက ပိုမိုစိုက်ပျိုးနိုင်ခဲ့ကြောင်း လယ်ယာမြေစီမံခန့်ခွဲရေးနှင့် စာရင်းအင်းဌာနမှ သိရသည်။

        ယခုလအတွင်း  မိုးမြေပဲလှိုင်လှိုင်ပေါ်ချိန် ဖြစ်သည့်အပြင် ရွှေဘိုမြို့ရှိ  ပဲ၊နှမ်းကုန်စည်ဒိုင် အနေဖြင့်လည်း  ဩဂုတ်လ နောက်ဆုံးပတ်မှစ၍ မြေပဲဆံများ အဝင်များခဲ့ပြီး  မြေပဲဆံပေါ်ချိန် တစ်ပိဿာလျင် (၆၁၀၀)ကျပ်ခန့်ရှိကြောင်း၊ ယခုအပတ်တွင် မြေပဲဆံ တစ်ပိဿာလျှင်(၆၆၅၀)ကျပ် ဖြင့် တစ်ရက်လျင်(၉၀၀)တင်းခန့် အရောင်းအဝယ်ဖြစ်နေကြောင်း သိရသည်။

DOCA(စစ်ကိုင်း)

    ကသာမြို့တွင်း ရောင်းချလျက်ရှိသော ကြက်သွန်နီဈေးနှုန်းမှာ ဩဂုတ်လနောက်ဆုံးပတ်တွင် လက်လီတစ်ပိဿာ ကျပ်(၃၈၀၀)ထိ မြင့်တက်သွားပြီး လက်ရှိ ကြက်သွန်နီဈေးနှုန်းမှာ လက်ကား တစ်ပိဿာလျှင် အကြီး၊ အသေးပေါ်မူတည်၍ ( ၃၇၀၀ မှ ၃၂၀၀)ကျပ်၊ လက်လီ တစ်ပိဿာလျှင် အကြီး (၄၀၀၀) ကျပ် ၊ အသေး (၃၅၀၀)ကျပ်ဖြင့် ရောင်းချလျက်ရှိကာ ကြက်သွန်နီဈေးနှုန်းမှာ ဆက်လက်မြင့်တက်လျက်ရှိကြောင်း သိရသည်။

    ကြက်သွန်နီဝင်ရောက်မှုအနေဖြင့် ယခုတစ်ပတ်အတွင်း မန္တလေး၊ မုံရွာဘက်မှ (၃၅)ပိဿာပါ အိတ်(၈၀)ခန့်နှင့် ခင်ဦး၊ ရေဦးဘက်မှ (၃၅)ပိဿာပါ အိတ်(၆၀)ခန့် ဝင်ရောက်ကြောင်း သိရသည်။

DOCA(စစ်ကိုင်း)

       စားဖိုဆောင်သီးနှံတစ်မျိုးဖြစ်သည့် ခရမ်းချဉ်သီးကို ကယားပြည်နယ်၊ မိုင်းလုံးရပ်ကွက်၊ မှုံပြာ ၊ လင်ဖုံလေး ကျေးရွာများမှ အများဆုံးစိုက်ပျိုးကြသော်လည်း ယခုနှစ်တွင် ဒေသအခြေအနေအရ စိုက်ပျိုးနိုင်မူ လျော့နည်းသောကြောင့် ဈေးကွက်လိုအပ်ချက်အရ ရှမ်းပြည်နယ်တောင်ပိုင်းအင်းလေးဒေသဘက် မှတင်းသွင်းရောင်းချလျက်ရှိကြောင်း ယခင်ဩဂုတ်လဒုတိယပတ်တွင် ဈေးကွက်အတွင်းခရမ်းချဉ် သီးဈေးနှုန်းမှာ တစ်ပိဿာလျှင်(၈၀၀)ကျပ်ဈေးဖြင့်သာရောင်းချလျက်ရှိပြီး ယခုစက်တင်ဘာလ ဒုတိယပတ်တွင်ခရမ်းချဉ်သီးဈေးနှုန်းမှာ တစ်ပိဿာလျင်(၁၅၀၀)ကျပ်ဈေးဖြင့် အရောင်းအဝယ်ဖြစ် လျက်ရှိပြီး ယခင်ဩဂုတ်လဒုတိယပတ်နှင့်စက်တင်ဘာလဒုတိယပတ်နှိုင်းယှဉ်လျှင် ခရမ်းချဉ်သီး တစ်ပိဿာလျှင်(၇၀၀)ကျပ်ခန့်မြှင့်တက်လာကြောင့်၊ ခရမ်းချဉ်သီးဈေးနှုန်းမြှင့်တက်လာရခြင်းမှာ စက်သုံးဈေးနှုန်းမြှင့်တက်လာ၍သယ်ယူစရိတ်မြှင့်တက်လာခြင်းဟု ခရမ်းချဉ်သီးရောင်းသူတစ်ဦး ထံမှသိရပါသည်။

DOCA(ကယား)