ပြည်တွင်းကုန်သွယ်မှုသတင်း

စစ်ကိုင်းတိုင်းဒေသကြီး၊ မုံရွာမြို့နယ်၊ ဆည်ကြီးတောကျေးရွာတွင် ငှက်ပျောတိုးချဲ့စိုက်ပျိုးလာ ကြပြီး အရောင်းအဝယ်သွက်လျက်ရှိ‌ကြောင်းသိရှိရပါသည်။
ဒေသတွင်းတွင် ဖီးကြမ်းငှက်ပျော(ရိုးရိုး)နှင့် ဖီးကြမ်း(ကျောက်စိမ်း) (၂)မျိုးကိုသာ အများဆုံးစိုက်ပျိုးကြပြီး ငှက်ပျောသားပေါက်များကို တစ်ပင်လျှင် ၃၅၀ ကျပ်နှုန်းဖြင့် ကနီမြို့နယ်မှ ဝယ်ယူစိုက်ပျိုးကြောင်း၊ စိုက်ပျိုးပုံမှာ တစ်ဧကလျှင် အပင်ရေ(၈၀၀)ခန့် စိုက်ပျိုးကြောင်း၊ မစိုက်မီ ထယ်နှစ်စပ်ထိုး၍ တစ်ပင်နှင့်တစ်ပင် ၉ပေခန့် အကွာအဝေးဖြင့် ရေသွင်း စိုက်ပျိုးကြောင်း၊ စိုက်ပင် ၁၅ ရက်သားတွင် အရွက်မထွက်သည့်အပင်များကို ထိပ်ဖွင့်ပြီး ၂၀ ရက်သား တွင် အပင်မပေါက်သည်များကို ဖာထေး၍ ၃၅ ရက်သားတွင် ရိုလာစက်ဖြင့် ပေါင်းသတ်ပေးပြီး ၄၅ ရက်သားတွင် ထယ်တစ်စပ်ထိုးကာ ရေသွင်းပေးရကြောင်း၊ ငှက်ပျောစိုက်ပင် (၁၀)လသားအထိ တစ်လတစ်ကြိမ် ထယ်တစ်စပ်ထိုး၊ ရေတစ်ကြိမ်သွင်းပြီး သားပင်များကို တံဇဉ်ဖြင့် ထိပ်ဖြတ်ပေးရ ကြောင်း၊ ငှက်ပျော(၁၃)လသားအရွယ်တွင် ငှက်ပျောပင်အားလုံး အခိုင်ထွက်ပြီး တစ်ပင်လျှင်တစ်ခိုင်၊ တစ်ခိုင်လျှင် (၁၀)ဖီးခန့်ပါရှိပြီး ရောင်းတန်းဝင်(၅)ဖီးရယူကြောင်း၊ မြေဆီမြေသားကောင်းမွန်မှုနှင့်ရေရ ရှိမှုအပေါ်မူတည်၍ ငှက်ပျောစိုက်ပင်သက်တမ်း(၅)နှစ်မှ (၇)နှစ်ခန့်အထိ ရောင်းတန်းဝင်ငှက်ပျောခိုင် များ ထွက်ရှိကြောင်း၊ ထွက်ရှိသော ငှက်ပျောများကို မြို့ပေါ်ရှိကုန်သည်များမှ ခြံအရောက် တစ်ဖီး လျှင် ၈၀၀ ကျပ်နှုန်းဖြင့် လာရောက်ဝယ်ယူကြပြီး မြို့တွင်းလက်လီဈေးများတွင် ပြန်လည်ရောင်းချမှု များ ရှိသောကြောင့် ငှက်ပျောစိုက်တောင်သူများအနေဖြင့် တွက်ခြေကိုက်ကာ အရောင်းအဝယ် သွက်လျက်ရှိကြောင်း သိရှိရပါသည်။

             သာယာဝတီခရိုင်၊ မိုးညိုမြို့နယ်တွင် ပဲပုတ်သီးနှံ ယခုနှစ်စိုက်ပျိုး ဧကမှာ( ၁၁၂၃၄) ဧက ရှိပြီးသာယာဝတီခရိုင်အတွင်း စိုက်ဧကစုစုပေါင်း(၁၆၄၅၃) ဧကရှိသဖြင့် မိုးညိုမြို့နယ်သည် ပဲပုတ်အဆုံး စိုက်ပျိုးထားသောမြို့နယ် ဖြစ်သည်။ ယခုနှစ်တွင် ပဲပုတ်ပေါ်စအချိန်မှ လှိုင်လှိုင်ပေါ်ချိန်အထိ ဈေးကောင်းရရှိနေသည်။

            မိုးညိုမြို့ပေါ်ရှိ ကုန်သည်ကြီးများမှ စိုက်ခင်းများအထိ ယခုလက်ရှိ ပေါက်ဈေး ပိဿာ(၂၀) ဈေးနှုန်း (၅၀၀၀၀/) ကျပ် ဈေးဖြင့် ကွင်းထိ လာရောက် ဝယ်ယူကြောင်း သိရသည်။ ယခင်နှစ် ပဲပုတ်ပေါက်ဈေး ပိဿာ(၂၀) ဈေးနှုန်းမှာ (၂၅၀၀၀/)ကျပ်သာ ပေါက်ဈေးရှိခဲ့ပါသည်။ မိုးညိုမြို့ပေါ်တွင် ယခုလက်ရှိ ပွဲရုံ ပေါက်ဈေး တစ်တင်းလျှင် ( ၅၀၅၀၀/ ) ကျပ်ဈေးရှိနေပြီး၊ ရန်ကုန်ပဲပြားစက်ရုံပေါက်ဈေး တစ်တင်း (၅၂၅၀၀/) ကျပ် ပေါက်ဈေး ဖြင့်၎င်း၊ မန္တလေးပဲပြားစက်ရုံ ပေါက်ဈေး တစ်တင်းလျှင်(၅၄၅၀၀/) ကျပ်နှုံးဖြင့်၎င်း ပြန်လည် တင်ပို့ ရောင်းချကြကြောင်း သိရသည်။ ပဲပုတ် တစ်ဧကကုန်ကျစရိတ်အနေဖြင့် နှစ်သိန်းငါးသောင်းကျော် ဝန်းကျင်ခန့် ကုန်ကျပြီး တစ်ဧက အထွက်တင်းအနေဖြင့် (၁၅တင်း-မှ၂၀) ကြား ထွက်ရှိကြောင်းသိရသည်။ တစ်ဧကဝင်ငွေမှာ (၇၅၀၀၀၀/) ကျပ် ဝင်ငွေရရှိနိုင်ပြီး အကျိုးအမြတ်အနေဖြင့် (၅၀၀၀၀၀ /) ကျပ် နီးပါးအကျိုး/အမြတ် ရရှိနိုင်ကြောင်း သိရသည်။

DOCA(ပဲခူး)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်သောအဖွဲ့သည် ပြည်တွင်းကုန်သွယ်ရေးဖွံ့ဖြိုးပြီးပိုလျှံသည်များကို ပြည်ပတင်ပို့နိုင်ရေး အထောက်အကူပြုရန်၊ ပုဂ္ဂလိကကဏ္ဍဖွံ့ဖြိုး တိုးတက်ရေး ညှိနှိုင်းပူးပေါင်းဆောင်ရွက်ရန်၊ ဈေးနှုန်း၊ဈေးကွက် သုတေသနနှင့် ကုန်စည်စီးဆင်းမှု လေ့လာသုံးသပ်ပြီး၊ သတင်းများ ထုတ်ပြန်၊ ဖြန့်ဝေခြင်းများ ဆောင်ရွက်ရန်အတွက်  ရည်ရွယ်၍ မတ်လ (၂၂)ရက်၊ နံနက်(၉:၀၀)နာရီအချိန်တွင် ပခုက္ကူမြို့၊ စက်မှုဇုန်ရှိ ဆီးခွဲစက်လုပ်ငန်းများသို့ ကွင်းဆင်းလေ့လာခဲ့ပါသည်။

          ပထမဦးစွာ ခရိုင်ဦးစီးမှူးမှ "အောင်သမာဓိ" ဆီးခွဲစက် လုပ်ငန်းရှင် ဦးအောင်ဇော်သင်းနှင့် တွေ့ဆုံမေးမြန်းရာတွင် လုပ်ငန်းရှင်မှ စက်မှုဇုန်တွင် ဆီးခွဲစက်အလုံးရေ(၁၅)လုံးခန့် လည်ပတ် ကြောင်း၊ ပခုက္ကူမြို့ရှိ ဆီးခွဲစက်များမှာ ဆီးသီးခြောက်ကိုသာ ဝယ်ယူကြောင်း၊ ဆီးသီးအစိုမှာ ပျက်ဆီးမှုများနိုင်ပြီး သိုလှောင်ရန် နေရာအခက်အခဲရှိသောကြောင့် မဝယ်ယူကြောင်း၊ ဆီးသီး အစို(၅)တင်း အခြောက်လှန်းလျှင် (၄)တင်းခန့် ကျန်ရှိနိုင်သည်ဟုခန့်မှန်းရကြောင်း၊  ပခုက္ကူမြို့ပေါ်ရှိပွဲရုံများနှင့် အနီးပတ်ဝန်းကျင် ကျေးရွာများရှိ တောင်သူထံမှဝယ်ယူကြောင်း၊ ယခင်နှစ်က ဆီးသီးအစို(၁)တင်း(၂၅၀ဝိ/-)၊ အခြောက်(၁)တင်း(၄၀၀ဝိ/-)ဖြင့် ဝယ်ယူပြီး ယခုနှစ်တွင် ဆီးသီး အစို(၁)တင်း(၃၆၀ဝိ/-၃၇၀ဝိ/-)၊ အခြောက်(၁)တင်း(၅၅၀ဝိ/-)ဖြင့်ဝယ်ယူရကြောင်း၊  ယခုအချိန်ထိ ကုန်ကြမ်းဆီးသီးအခြောက်တင်း(၂၀၀၀၀)ခန့် ဝယ်ယူထားပြီး ရာသီချိန်မကုန်သေးသောကြောင့် ဆက်လက်ဝယ်ယူရန်ရှိသေးကြောင်း၊ ယခုနှစ်တွင် ဆီးသီးအခြောက်တင်း(၃၀၀၀၀) ခန့်သာဝယ်ယူကြိတ်ခွဲနိုင်မည်ဟုခန့်မှန်းရကြောင်း၊ ယခင်နှစ်ဆိုလျှင် မီးမှန်သည့်အတွက် တင်း(၅၀၀၀၀)ခန့် ဝယ်ယူကြိတ်ခွဲကြောင်း၊ မိမိတွင်ဆီးခွဲစက်(၆)ခုံ၊ သန့်စင်စက်(၂)ခုံဖြင့် လုပ်ငန်းလည်ပတ်ကြောင်း၊ ဆီးသီးခြောက်(၁)တင်းကြိတ်ခွဲလျှင် ဆီးဆံ(၂၅)ကျပ်သားခန့်ရရှိပြီး ယခုနှစ်သည် လျှပ်စစ်မီးအားနည်းသည့်အတွက် ကြိတ်ခွဲခုံ(၄)ခုံဖြင့်သာလည်ပတ်ကြောင်း၊ ယခင်နှစ်ထက် ထက်ဝက်ခန့် ထုတ်လုပ်မှုလျော့နည်းကြောင်း၊ ယခုအချိန်ထိ ကုန်ချောဆီးဆံပိဿာ(၂၀၀၀)ခန့် ကြိတ်ခွဲပြီးကြောင်း၊ ကြိတ်ခွဲရရှိသည့် ဆီးဆံကို  တစ်ပိဿာ (၂၄၀၀၀)ကျပ်ဖြင့် မန္တလေးမြို့ တရုတ်ကုန်သည် များသို့ရောင်းချကြောင်း၊  ထိုမှတစ်ဆင့် တရုတ်နိုင်ငံသို့ တင်ပို့သည်ဟုသိရှိရပါကြောင်း၊ ယခင်နှစ်က ဆီးဆံတစ်ပိဿာကို (၂၃၀၀၀)ကျပ်ဖြင့်ရောင်းရပြီး ဆီးဆံဈေးနှုန်းမှာ ပြောင်းလဲမှု နည်းပါကြောင်း၊ ဆီးခွဲခြမ်းကို ပဲကြော်ဖိုများအတွက် လောင်စာအဖြစ် အသုံးပြုရန်လာရောက် ဝယ်ယူကြကြောင်း၊ ဆီးဖတ်နှင့် ဆီးမှုန့်များကို တိရိစ္တာန်စာအဖြစ် ရောင်းရပြီး တစ်ပိဿာကို (၅၀/၁၀၀) ကျပ်ဖြင့် အရည်အသွေးပေါ်မူတည်၍  ရောင်းချရကြောင်း သိရှိရပါသည်။

          လုပ်သားဦးရေမှာ အမျိုးသား(၈)ဦးရှိပြီး ဆီးခွဲခြမ်းများ ပြာတီးသန့်စင်နေသည့် အမျိုးသမီး များအများအပြားတွေ့ရကြောင်း၊ လုပ်အားခမှာ အမျိုးသားတစ်ဦး(၈၀၀၀)ကျပ်ပေးရပြီး၊ အမျိုးသမီးတစ်ဦး(၅၀၀၀)ကျပ်ပေးရကြောင်း၊ အလုပ်ချိန်မှာ နံနက်(၇:၀၀)နာရီမှ ညနေ(၅:၀၀)နာရီထိ လုပ်ငန်းလည်ပတ်ကြောင်း၊ ဆီးသီးရာသီချိန်မှာ (၆)လသာ ဆောင်ရွက်ရသောကြောင့် ကျန်သည့်အချိန်ကို ပဲခွဲစက်များလည်ပတ်၍ အလုပ်အကိုင်ရရှိစေရန် ဆောင်ရွက်ထားပါကြောင်း၊ လုပ်ငန်းရှင်၏အခက်အခဲမှာ လျှပ်စစ်မီးအားနည်းမှုကြောင့် ကြိတ်ခွဲထုတ်လုပ်မှုလျော့ကျပြီးအဝယ်ရှိသလောက် မတင်ပို့နိုင်ကြောင်း၊ စက်သုံးဆီဈေးနှုန်းမြင့်မားမှုကြောင့် စက်သုံးဆီဖြင့် မလည်ပတ်နိုင်ဘဲ လျှပ်စစ်မီးကိုသာ နေ့စဉ်မျှော်၍ လုပ်ငန်းဆောင်ရွက်ရပါကြောင်း လုပ်ငန်းရှင်၏ ပြောကြားချက်အရ လေ့လာသိရှိရပါသည်။

DOCA(မကွေး)

               စစ်ကိုင်းတိုင်းဒေသကြီး၊ ယင်းမာပင်ခရိုင်၊ ဆားလင်းကြီးမြို့နယ်အတွင်းရှိ ကျေးရွာများ တွင် သင်ဖြူးဖျာများ ရက်လုပ်ခြင်းလုပ်ငန်းကို မိသားစု တနိုင်တစ်ပိုင်လုပ်ငန်းအဖြစ် လုပ်ကိုင်လျက်ရှိသည်။

             ကျေးရွာများမှထွက်ရှိသည့် သင်ဖြူးဖျာစျေးကွက်တွင် ကြမ်းချော ၅ပေခွဲ× ၆ပေတစ်ချပ် လျင် ကျပ်၄၂၀၀၀မှ ကျပ်၄၃၀၀၀၊ အချော၅ပေခွဲ× ၆ပေတစ်ချပ်လျင် ကျပ်၄၃၀၀၀ မှ ကျပ်၄၅၀၀၀၊ ကြမ်းချော ၅ပေ×၆ပေ တစ်ချပ်လျင် ကျပ်၂၉၀၀၀မှကျပ်၃၁၀၀၀၊ အချော ၅ပေ×၆ပေ တစ်ချပ်လျင် ကျပ်၃၂၀၀၀မှ ကျပ်၃၅၀၀၀၊ ကြမ်းချော ၄ပေခွဲ ×၆ပေတစ်ချပ်လျင် ကျပ်၁၉၀၀၀မှ ကျပ်၂၁၀၀၀၊ အချော ၄ပေခွဲ ×၆ပေတစ်ချပ်လျင် ကျပ်၂၂၀၀၀မှကျပ်၂၅၀၀၀၊ ကြမ်းချော ၄ပေ×၆ပေတစ်ချပ်လျင် ကျပ်၁၈၀၀၀မှကျပ်၂၀၀၀၀၊ အချော ၄ပေ×၆ပေတစ်ချပ် လျင် ကျပ်၂၀၀၀၀မှ ကျပ်၂၃၀၀၀၊ ကြမ်းချော ၃ပေခွဲ×၆ပေတစ်ချပ်လျင် ကျပ်၁၂၀၀၀ မှ ကျပ်၁၄၀၀၀၊ အချော ၃ပေခွဲ×၆ပေတစ်ချပ်လျင် ကျပ်၁၄၀၀၀ မှ ကျပ်၁၆၀၀၀၊ တရားထိုင် သင်ဖြူး ဆိုဒ်ကြီးတစ်ချပ်လျင် ကျပ်၆၀၀၀၊ ဆိုဒ်သေး ကျပ်၄၅၀၀နှုန်းဖြစ်ပြီး ရက်လုပ်ထား သော သင်ဖြူးဖျာအကြီးအသေးပေါ်မူတည်ပြီး ရောင်းချရသောကြောင့် စျေးနှုန်းကွာဟမှုများ လည်းရှိသည်။ ၎င်းစျေးနှုန်းများသည် အနားကွပ်ပါပြီးစျေးနှုန်းများဖြစ်သည်။

             အိမ်တွင်းမှုလုပ်ငန်းဖြစ်သည့် မြန်မာသင်ဖြူးဖျာရက်လုပ်ခြင်းကို စျေးကွက်အနေဖြင့် မိမိမြို့နယ်မှ ရန်ကုန်၊ မန္တလေး၊ နေပြည်တော်၊ ကလေးမြို့၊ မုံရွာမြို့၊ မြစ်ကြီးနားမြို့နယ်များအထိ တင်ပို့၍ လက်လီ၊ လက်ကားပေးပို့ရောင်းချလျက်ရှိကြောင်း သိရှိရသည်။

DOCA(စစ်ကိုင်း)

                လွိုင်ကော်မြို့၊ မတ်လ တတိယပတ်တွင် ဈေးကွက်အတွင်း ရောင်းချလျက်ရှိသော ခရမ်းချဉ်သီးများမှာ ပြည်နယ်အတွင်း လင်ဖုံလေးဒေသမှ ထွက်ရှိသော ခရမ်းချဉ်သီးများဖြစ်ပြီး၊ ယခင်က မိထ္တီလာ၊ အင်းလေး၊ ပင်လောင်းဘက်မှ ဝင်လာသော ခရမ်းချဉ်သီးများကို မှာယူရောင်းချကြသော်လည်း ယခုအခါတွင် သယ်ယူစရိတ်များ များသောကြောင့် ဈေးကွက်အတွင်း ဒေသမှထွက်သော ခရမ်းချဉ်သီးများကို အလုံး အကြီးအသေးပေါ် မူတည်၍ တစ်ပိဿာလျှင် ကျပ်(၅၀၀၊ ၆၀၀)ဈေးနှုန်းဖြင့် ရောင်းချကြပြီး ဈေးနှုန်းတည်ငြိမ်လျက် ရှိကြောင်း သီရိမင်္ဂလာဈေးအတွင်း ခရမ်းချဉ်သီး ရောင်းချသူများထံမှ သိရှိရပါသည်။

စားသုံးသူရေးရာဦးစီးဌာန

ကယားပြည်နယ်