ပြည်တွင်းကုန်သွယ်မှုသတင်း

    ယခုတစ်ပတ်တွင် ပခုက္ကူကုန်စည်ဒိုင်တွင်အညာဒေသ၏ အဓိကစိုက်ပျိုးသီးနှံများဖြစ်ကြသော ပဲစဉ်းငုံနီ၊ ပဲတီစိမ်းအမျိူးမျိုး၊ ကုလား ပဲမျိုးစုံနှင့်နှမ်းမျိုးစုံတို့ ဥပုသ်နေ့မှလွဲ၍ နေ့စဉ် အရောင်းအဝယ်ဖြစ်လျက်ရှိပါသည်။ စက်တင်ဘာလဒုတိယပတ်တွင် ပခုက္ကူကုန်စည်ဒိုင်၌ အညာဒေသထွက် ပဲတီစိမ်းသေး(ပဲနောက်)မှာ အရည်အသွေးကိုလိုက်၍ တစ်တင်း လျှင်  ၄၆၀၀၀ မှ ၅၂၅၀၀ ကျပ်၊  နှမ်းနက်စမုံရှယ် တစ်တင်းလျှင်  (၉၇၀၀၀ မှ ၉၈၀၀၀) ကျပ်၊ နှမ်းနက်စမုံ(ရိုးရိုး) တစ်တင်းလျှင် (၆၅၀၀၀ မှ ၉၅၀၀၀) ကျပ်၊ နှမ်းဝါ (ယော ) တစ်တင်းလျှင် ၉၃၅၀၀ ကျပ်၊ ယောဒေသထွက် နှမ်းနက်မှာ တစ်တင်းလျှင် (၈၃၀၀၀ မှ ၉၈၀၀၀) ကျပ်ဖြင့် အရောင်းအဝယ်ဖြစ်ကြောင်း သိရှိရပါသည်။

   အရောင်းအဝယ်ဖြစ်မှုအနေဖြင့် ပဲတီစိမ်းသေး(ပဲနောက်) အိတ်ရေ (၂၀၀၀)၊ နှမ်းနက်စမုံ အိတ်ရေပေါင်း (၁၀၀၀) ၊ နှမ်းဝါ (ယော) အိတ်ရေ (၂၀၀)၊နှမ်နက် (ယောစမုံ) အိတ်ရေ (၄၀၀၀) အရောင်းအဝယ်ဖြစ်နေပြီး တင်ပို့မှုအနေဖြင့် ပဲစဉ်းငုံနီ၊ ပဲတီစိမ်း၊နှမ်းနှင့် ပြောင်းဖူးစေ့(CP)တို့ကို ရန်ကုန်သို့ တင်ပို့နေကြောင်း ကုန်သည်များထံမှ သိရှိရပါသည်။

DOCA(မကွေး)

          ရွှေဘိုမြို့နယ်ရှိ တောင်သူအများစုမှာ ယခုအချိန်တွင် မိုးစပါးစိုက်ပျိုးပြီး၍ ပထမအကြိမ် ဓါတ်မြေဩဇာကြဲပက်ချိန်ဖြစ်သဖြင့်  ဈေးကွက်အတွင်းတွင် သွင်းအားစုများဖြစ်သည့် ဓါတ်မြေဩဇာ ဈေးနှုန်းများဆက်လက် မြင့်တက်နေသော်လည်း  ပုံမှန်ထက်ပို၍ အရောင်းအဝယ်လိုက်နေသည်ဟု စိုက်ပျိုးရေးသုံး ဓါတ်မြေဩဇာနှင့် ပိုးသတ်ဆေး အရောင်းဆိုင်များမှ သိရပါသည်။

          ဓါတ်မြေဩဇာဈေးနှုန်းများအနေဖြင့် စက်တင်ဘာလ လဆန်းပိုင်းတွင် အာမို၊ ကျွဲနက် (၁၅:၁၅:၁၅) (၅၀)ကီလိုဂရမ် တစ်အိတ်လျှင် ၁၆၅၀၀၀ကျပ်၊ MC (၁၅:၁၅:၁၅) (၅၀) ကီလိုဂရမ် တစ်အိတ်လျှင် ၁၃၈၀၀၀ကျပ်၊ဇာမဏီ  (၁၃:၅:၁၇)(၅၀)ကီလိုဂရမ် တစ်အိတ်လျှင် ၇၈၀၀၀ကျပ်၊ အာမို၊ပုလဲ (၅၀)ကီလိုဂရမ် တစ်အိတ်လျှင် ၁၂၀၀၀၀ကျပ်၊ ပန်းဖူး (၅၀) ကီလိုဂရမ် တစ်အိတ်လျှင် ၁၁၅၀၀၀ကျပ်ဖြစ်ပြီး၊ စက်တင်ဘာလ ဒုတိယပတ်တွင် အာမို၊ကျွဲနက် (၁၅:၁၅:၁၅) (၅၀)ကီလိုဂရမ် တစ်အိတ်လျှင် ၁၆၈၀၀၀ကျပ်၊ MC (၁၅:၁၅:၁၅) (၅၀)ကီလိုဂရမ် တစ်အိတ်လျှင် ၁၄၅၀၀၀ကျပ်၊ ဇာမဏီ  (၁၃:၅:၁၇)(၅၀) ကီလိုဂရမ် တစ်အိတ်လျှင် ၈၀၀၀၀ကျပ်၊ အာမို၊ပုလဲ (၅၀)ကီလိုဂရမ် တစ်အိတ်လျှင် ၁၂၅၀၀၀ကျပ်၊ ပန်းဖူး (၅၀)ကီလိုဂရမ် တစ်အိတ်လျှင် ၁၁၀၀၀၀ ကျပ်ဖြင့် အရောင်းအဝယ် ဖြစ်နေသဖြင့် စက်တင်ဘာလ လဆန်းပိုင်းနှင့် နှိုင်းယှဉ်ပါက ဈေးနှုန်းများ အနည်းငယ် မြင့်တက်နေသော်လည်း အရောင်းအဝယ်များ ပုံမှန်ထက်ပို၍ ကောင်းမွန်နေကြောင်း သိရသည်။   

DOCA(စစ်ကိုင်း)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသ ကြီး၊ ရွှေဘိုခရိုင်အနေဖြင့်  ပြည်တွင်း၊ ပြည်ပကုန်သွယ်မှုဖွံ့ဖြိုးတိုးတက်ရေးအတွက် ဆန်၊ စပါးထွက်ကုန် များပြည်တွင်းစားသုံးမှုဖူလုံရေးအပြင် ပြည်ပပို့ကုန်မြှင့်တင်ခြင်းဖြင့် နိုင်ငံခြားဝင်ငွေ တိုးတက်ရှာဖွေ နိုင်ရေးတို့အတွက် နှစ်စဉ်စိုက်ပျိုးပြီးစီးမှု၊ ထွက်ရှိမှု၊ စားသုံးမှု၊ ပိုလျှံမှု၊ ဈေးနှုန်းဈေးကွက်၊ စီးဝင်စီးထွက် အခြေအနေ၊ တစ်ဧကကုန်ကျစရိတ်နှင့် အကျိုးအမြတ်အခြေအနေ တောင်သူ၊ ကုန်သည်နှင့် စက်ပိုင် လက်ကျန် အခြေအနေများကို တင်ပြလျက်ရှိပါသည်။

          ၂၀၂၂-၂၀၂၃ခုနှစ် မိုးစပါးရာသီတွင် ရွှေဘိုခရိုင်အတွင်းရှိ မြို့နယ်(၆)မြို့နယ်တွင် စုစုပေါင်း (၆၄၈၃၅၉)ဧက စိုက်ပျိုးရန်လျာထားကြောင်းနှင့် လျာထားဧကအားလုံးစိုက်ပျိုးပြီးကြောင်း သက်ဆိုင်ရာ ဌာန၏ စာရင်းများအရသိရှိရပါသည်။ တောင်သူဦးကြီးများအနေဖြင့် နှစ်စဉ်မိုးစပါးစိုက်ပျိုးရန်အတွက် ဇူလိုင်လတွင်ပျိုးထောင်ကြ၍ ဩဂုတ်လမှ စက်တင်ဘာလထိစိုက်ပျိုးကြပြီး ဒီဇင်ဘာလဝက်ခန့်မှ စတင်၍ရိတ်သိမ်းပြီး ဇန်နဝါရီလထဲတွင် လှိုင်လှိုင်ရိတ်သိမ်းကြကြောင်း၊  ရွှေဘိုခရိုင်အနေဖြင့် မိုးစပါး ရာသီတွင် အခြားသောစပါးမျိုးများထက် နှစ်စဉ်ဈေးနှုန်းနှင့် ဈေးကွက်ကောင်းသည့် ရွှေဘိုပေါ်ဆန်းစပါး စိုက်ပျိုးမှုများသည့်အပြင် ရွှေဘိုပေါ်ဆန်းစပါးပင်သည် အပင်နူပြီးအနံ့မွှေးသည့်အတွက် ပိုးမွှားကြိုက်သည့် စပါးပင်ဖြစ်၍ ပိုးမွှားမကျရောက်အောင် အထူးဂရုစိုက်ကာကွယ်ရကြောင်း၊ ယခုနှစ်မိုးစပါးရာသီတွင် စက်သုံးဆီဈေးနှုန်းမြှင့်တက်ခြင်း၊ ဓါတ်မြေဩဇာနှင့် ပိုးသတ်ဆေးဈေးနှုန်းများ မြှင့်တက်ခြင်းနှင့် လုပ်အားခများမှာလည်း ဈေးနှုန်းပိုပေးရခြင်း စသည့်ဈေးနှုန်းမြှင့်တက်မှုအပေါ် မူတည်၍ တစ်ဧက ကုန်ကျစရိတ်မှာလည်း ယခင်နှစ်ထက် ပိုများနိုင်ကြောင်း၊ ယခုနှစ်တွင် ၂၀၂၁-၂၀၂၂ခုနှစ်ထွက်မိုးစပါး ရွှေဘိုပေါ်ဆန်းစပါးသည် ပေါ်ချိန်၌ စပါးတင်း(၁၀၀)လျှင် (၁၀၅၀၀၀ဝိ/-)နှင့် (၁၁၀၀၀၀ဝိ/-)သာ ပေါက်ဈေးရှိခဲ့ကြောင်း၊ တောင်သူများအနေဖြင့် စပါးပေါ်ချိန်တွင် စပါးရိတ်သိမ်းခ၊ အလုပ်သမားခများ အပါအဝင် သွင်းအားစုများကို စပါးပေါ်ချိန်မှသာငွေပေးချေရသည့်စနစ်ဖြင့် ရောင်းချသည်များလည်း ရှိသဖြင့် စပါးမပေါ်ခင်ကြိုတင်ယူထားသော သွင်းအားစုဘိုးများ ပေးချေရန်အတွက် စပါးများကိုရောင်းချ၍ ပေးချေရသဖြင့် ရောင်းချ၍ကျန်ရှိသော စပါးများကိုသာ သိုလှောင်ရကြောင်း၊ ယခုအချိန်တွင် ရွှေဘိုပေါ်ဆန်းစပါးတင်း(၁၀၀)လျှင် (၂၃၀၀၀၀ဝိ/-)ပေါက်ဈေးရှိခဲ့ပြီး (၁၀)စုနှစ်အတွင်း အမြင့်ဆုံး ဈေးနှုန်းသို့ရောက်ရှိခဲ့သော်လည်း ဈေးနှုန်းမြှင့်ချိန်၌ စိုက်ပျိုးသည့် တောင်သူများလက်ဝယ်တွင် လက်ကျန် မရှိသလောက်ဖြစ်နေသည့်အတွက် လာမည့်မိုးစပါး ရိတ်သိမ်းချိန်တွင် ဈေးကောင်းရနိုင်ရေး မျှော်လင့် လျက်ရှိကြောင်း ရွှေဘိုမြို့နယ်ရှိ တောင်သူဦးကြီးများနှင့် ချိတ်ဆက်မေးမြန်းမှုအရ သိရှိရပါသည်။

DOCA(စစ်ကိုင်း)

    ကယားပြည်နယ်တွင် အခြားဆီထွက်သီးနှံများအပြင် နှမ်းကိုလည်း အဓိကစိုက်ပျိုးလျှက်ရှိပြီး နှမ်းကို လွိုင်ကော်မြို့၊ဘောလခဲမြို့၊ဖားဆောင်မြို့နှင့် ရွာသစ်မြို့တို့တွင် အဓိကစီးပွားဖြစ်စိုက်ပျိုးကြပါသည်။ ယခုလက်ရှိစက်တင်ဘာလတွင်ဈေးကွက်အတွင်းဖြစ်ပေါ်နေသောနှမ်းဆီဈေးနှုန်းမှာ တစ် ပိဿာလျှင်(၁၃၀၀၀)ကျပ်ဖြင့် အရောင်းအဝယ်ဖြစ်လျှက်ရှိပြီး ယခင်ဩဂုတ်လအတွင်းနှမ်းဆီဈေးနှုန်းမှာ တစ်ပိဿာလျှင်(၁၂၀၀၀)ကျပ်သာရှိပြီး ယခင်လနှင့် ယခုလနှိုင်းယှဉ်လျှင် နှမ်းဆီ တစ်ပိဿာလျှင်(၁၀၀၀)ကျပ်ခန့် ဈေးနှုန်းမြှင့်တက်လာရခြင်းမှာ နှမ်းရိတ်သိမ်းရာတွင် ဌားရမ်းရသည့် လုပ်သားခဈေးနှုန်းမြှင့်မားလာခြင်း၊ သယ်ယူစရိတ်မြှင့်မာလာခြင်းကြောင့်ဖြစ်သည်ဟု ဆီစက်လုပ်ငန်းရှင်တစ်ဦးက ဆိုပါသည်။

DOCA(ကယား)

    ကျိုင်းတုံမြို့ မြို့မဈေးကြီးတွင် စက်တင်ဘာလမှစ၍ ရာသီစာအစားအစာတစ်မျိုးဖြစ်သည့် ဝါးပိုးများကို ဈေးကွက်ထဲတွင် ရောင်းချလျက်ရှိသည်ကိုတွေ့ရှိရပါသည်။ ဝါးပိုးကို သဘာဝအလျှောက် အလေ့ကျပေါက်လေ့ရှိသည့် ဝါးပင်များမှရရှိကြောင်း သိရှိှရပါသည်။ ပေါ်ဦးပေါ်ဖျားတွင် ဝါးပိုး အစိမ်း အကောင်သေးလျှင် ၁၀ ကျပ်သားကို ကျပ် ၆၀၀၀၊ ၇၀၀၀၊ အကောင်ကြီးလျှင် ၁၀ ကျပ်သားကို ကျပ် ၈၀၀၀၊ ၉၀၀၀ ဈေးရရှိပါသည်။ ဝါးပိုးသည် ကျိုင်းတုံမြို့နယ် ဝမ်တာပုံ၊ ဝမ်တာပင်း၊ ပန်ကြူ၊ မိုင်းခွန်၊ ပင်းတောက်အုပ်စုများတွင် အလေ့ကျပေါက်သည့် ဝါးပင်မှ ရရှိသော ပိုးတစ်မျိုးဖြစ်သည်။

    ဝါးပိုးသည် စက်တင်ဘာလ ၉ လပိုင်း၌စပေါ်၍ ဝါးပိုး အစိမ်းကို ၁၀ လ၊ ၁၁ လပိုင်းထိသာရရှိ နိုင်ပါသည်။ ဝါးပိုး အစိမ်း ၁၀ ကျပ်သားကို ကြော်လျှင် ၄ ကျပ်သား၊ ၅ ကျပ်သားခန့်ရရှိပါသည်။ ဝါးပိုးကြော် ၁၀ ကျပ်သား တစ်ထုတ်လျှင် ၂၀၀၀၀ ကျပ်မှ ၂၂၀၀၀ ကျပ်ခန့် ဈေးရှိပါသည်။ ဝါးပိုးကို ဆားထည့်ကြော်ပြီး ထားသိုထုတ်ပိုးမှုကောင်းလျှင် ၁၀ လ၊ ၁၂ လခန့် ထားခံကြောင်း အရောင်းအဝယ် ပြုလုပ်သူထံမှ သိရှိရပါသည်။

     စားလို့ရသည့် ပိုးများထဲတွင် ဝါးပိုးသည် အဆိတ်တောက်နည်း၍ သဘာဝပေးသော ဒေသအစားအစာတစ်မျိုးဖြစ်ခြင်းကြောင့် စားသုံးသူများက ဝယ်ယူစားသုံးကြပါသည်။ ဝါးပိုးကို စားသုံးခြင်းဖြင့် လူကိုဘေးအန္တရာယ်မဖြစ်စေနိုင်သည့်အပြင် ဗီတာမင်ဓာတ်များရရှိနိုင်ပါသည်။ ဝါးပိုးတွင် ပရိုတိန်း ၂၆ % အဆီဓာတ် ၅၁% ပါဝင်ပါသည်။ ရာသီပေါ်ဖြစ်၍ စားသုံးသူများအနေဖြင့် အသိမိတ်ဆွေ၊ ဆရာသမားများကို လက်ဆောင်ပေးရန်အတွက်လည်းကောင်း၊ ကျန်းမာရေး ဓာတ်စာအဖြစ် စားသုံးရန်အတွက်လည်းကောင်း ဈေးကောင်းပေး၍ ဝယ်ယူစားသုံးကြပါသည်။ ဒေသနေတိုင်းရင်းသားများအနေဖြင့် ဝါးပိုးရှာဖွေရောင်းချခြင်းဖြင့် ဝင်ငွေရရှိနေကြောင်း သိရှိရပါသည်။

DOCA(ရှမ်း)