ပြည်တွင်းကုန်သွယ်မှုသတင်း

             စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်တာဝန်ခံရုံးအနေဖြင့် ၂၀၂၄ ခုနှစ်၊ ဒီဇင်ဘာလ ၉ ရက်နေ့ နံနက်(၀၉:၀၀)နာရီအချိန်တွင် ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကန့်ဘလူမြို့ပေါ်ရှိ ဘိလပ်မြေနှင့် အိမ်ဆောက်ပစ္စည်းရောင်းချသည့်ဆိုင်များသို့ အပတ်စဉ်ကွင်းဆင်းစစ်ဆေးခြင်း ဆောင်ရွက်လျက်ရှိကြောင်း သိရသည်။

         ထိုသို့ကွင်းဆင်းစစ်ဆေးရာတွင် ကန့်ဘလူမြို့ပေါ်ရှိ ဘိလပ်မြေရောင်းချသည့်ဆိုင်များ၏ ဘိလပ်မြေဝယ်ယူရရှိမှုအခြေအနေ၊ လက်ကျန်အခြေအနေနှင့် ဈေးနှုန်း၊ ဈေးကွက်အခြေအနေတို့အား ကွင်းဆင်းစိစစ်ခဲ့ရာ ဘိလပ်မြေနှင့်ဆောက်လုပ်ရေးလုပ်ငန်းသုံးပစ္စည်းများကို မန္တလေးမြို့မှဝယ်ယူရကြောင်း၊ ဈေးနှုန်းအနေဖြင့် “CROWN”အမှတ်တံဆိပ်ဘိလပ်မြေ‌ (50kg)တစ်အိတ်လျှင် ငွေကျပ်(၂၁၀၀၀)နှင့် “ကြံ့နှစ်ကောင်”အမှတ်တံဆိပ် ဘိလပ်မြေဈေးနှုန်းမှာ (50kg)တစ်အိတ်လျှင် ငွေကျပ်(၂၀၀၀၀)ဖြင့်ရောင်းချကြောင်း၊ ယခင်အပတ်ဈေးနှုန်းများနှင့်နှိုင်းယှဉ်ပါက ဒီဇင်ဘာလဒုတိယပတ်အတွင်း ဘိလပ်မြေဈေးနှုန်းများတည်ငြိမ်၍ အရောင်းအဝယ်ဖြစ်လျက်ရှိကြောင်း လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

           ကန့်ဘလူခရိုင်သည် စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှု ဖွံ့ဖြိုးတိုးတက်ရေးလုပ်ငန်းများကိုပါဆောင်ရွက်လျက်ရှိရာ ကျွန်းလှမြို့နယ်၊ ရှမ်းစုကျေးရွာတွင် မိသားစုစားဝတ်နေရေး အပိုဝင်ငွေရရှိရန်အတွက် ကိုက်လန်ပင်ကို တစ်နိုင်တစ်ပိုင် စိုက်ပျိုးလျက်ရှိကြောင်း သိရပါသည်။

              ကိုက်လန်ပင်စိုက်ပျိုးရန်  မျိုးစေ့ကိုအရင်ပျိုးထားပြီး ပျိုးပင်သက်(၁)လအကြာတွင် စတင်စိုက်ပျိုးနိုင်ပါသည်။ ဧက (၀.၂၅) ကို တစ်ကျင်းလျှင် တစ်ပင်ခန့်၊  အရေအတွက် အားဖြင့် (၅၀၀၀)ခန့် စိုက်ပျိုးနိုင်ကြောင်း၊ ထွန်ယက်မြေပြုပြင်ခြင်း၊ စိုက်ပျိုးခြင်း၊ ရေပေးခြင်း၊ ပေါင်းမြက်ရှင်းခြင်း၊ သွင်းအားစုထည့်ခြင်းအတွက် စုစုပေါင်းကုန်ကျစရိတ်မှာကျပ်(၂)သိန်းခန့် ကုန်ကျခဲ့ပြီး  ကိုက်လန်ပင်များကို (၅)ရက်လျှင် တစ်ကြိမ်ရေပေးရပါသည်။

              ကိုက်လန်ပင်ကို တန်ဆောင်မုန်းလဆန်းတွင် စတင်စိုက်ပျိုးကာ ယခုနတ်တော်/ ပြာသိုလ၌ စတင်ခူးဆွတ်ရောင်းချရပြီး  ကိုက်လန်ဖူးများကို ခေါင်ညွှန့်စခူးသည့်အချိန်တွင် တစ်ရက်ကို (၅၀)စီးခန့်သာ ဆွတ်ခူးရရှိပြီး နှစ်ပတ်အကြာတွင် နောက်အတက်ပေါက်များ ခူးဆွတ်ချိန်တွင် တစ်ရက်ကို အစီး(၃၀၀/၄၀၀)ခန့် ခူးဆွတ်၍  တစ်စီးကိုပေါ်ဦးပေါ်ဖျားတွင်(၃၅၀/၄၀၀)ကျပ် ဈေးနှုန်းရောင်းရပြီး ယခုဒီဇင်ဘာလ လှိုင်လှိုင်ပေါချိန်တွင် ကိုက်လန်တစ်စည်းကို (၃၀၀)ကျပ် ဈေးနှုန်းဖြင့် နေ့စဉ်ခူးဆွတ်ရောင်းချလျက်ရှိပြီး ခူးဆွတ်ရသည့် အချိန်ကာလ မှာ(၂)လကျော် ကြာမြင့်စွာစွတ်ခူးရောင်းချရသည့် စားဖိုဆောင်သီးနှံဖြစ်သည့်အတွက် မြေအောက်ရေတင်စနစ်ဖြင့် စိုက်ပျိုးလာကြကြောင်း သိရှိရပါသည်။

DOCA(စစ်ကိုင်း)

            ဒီဇင်ဘာလ (ပထမ) ပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့  ဆန်စီးထွက်မှုမှာ ရန်ကုန်သို့ အိတ်ရေ ၆၀၂၀၁ ၊ မန္တလေး သို့ အိတ်ရေ ၈၀၂၃၃၊ နေပြည်တော်သို့ အိတ်ရေ ၅၁၅၊ ရှမ်း (တောင်)သို့ အိတ်ရေ ၁၄၄၃၃၊ ကျောက်ပတောင်းသို့ အိတ်ရေ ၁၈၅၊ မိတ္ထီလာသို့ အိတ်ရေ ၉၅၀၀၊ တောင်ငူသို့ အိတ်ရေ ၈၃၅၊ ပဲခူးသို့အိတ်ရေ ၄၀၄၅၊ မကွေး အိတ်ရေ ၁၆၆၅၊  ဘားအံသို့ အိတ်ရေ ၁၁၀၇၀၊ ကချင် သို့ အိတ်‌ရေ ၃၂၆၀၊ မွန် သို့ အိတ်‌ရေ ၈၈၀၀၊ ပြည်သို့ အိတ်ရေ ၂၃၀၊ မူဆယ်သို့ အိတ်ရေ ၇၅၅ ၊ ကရင်သို့ အိတ်ရေ ၃၇၅၊  စုစုပေါင်း အိတ်ရေ (၁၉၆၁၀၂)  အိတ်၊ တန်အား ဖြင့် (၉၈၀၅) စီးထွက်ခဲ့ပြီး ယခုဒီဇင်ဘာလ (ဒုတိယ)ပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့  ဆန်စီးထွက်မှုမှာ ရန်ကုန်သို့ အိတ်ရေ ၄၅၆၅၇၊ မန္တလေး သို့ အိတ်ရေ ၇၆၇၉၇၊ နေပြည်တော်သို့ အိတ်ရေ ၈၅၀၊ ရှမ်း (တောင်)သို့ အိတ်ရေ ၁၂၇၂၅၊ ကျောက်ပတောင်းသို့ အိတ်ရေ ၆၃၂၀၊ မိတ္ထီလာသို့ အိတ်ရေ ၁၀၄၁၅၊ တောင်ငူသို့ အိတ်ရေ ၈၆၀၊ ပဲခူးသို့အိတ်ရေ ၁၆၃၅၊ မကွေး အိတ်ရေ ၁၂၉၀၊  ဘားအံသို့ အိတ်ရေ ၈၂၄၀၊ ကချင် သို့ အိတ်‌ရေ ၉၂၉၀၊ မွန် သို့ အိတ်‌ရေ ၅၄၅၄၊ ပြည်သို့ အိတ်ရေ ၂၆၀၊ ဧရာဝတီသို့ အိတ်ရေ ၁၇၀၊  စုစုပေါင်း အိတ်ရေ (၁၇၉၉၆၃)  အိတ်၊ တန်အား ဖြင့် (၈၉၉၈) စီးထွက်ခဲ့သည့်အတွက်  ယခင်ပတ်နှင့် နှိုင်းယှဉ်လျှင် ယခုပတ်တွင် အိတ်ရေ (၁၆၁၃၉) အိတ်၊ တန်အားဖြင့် (၈၀၇)တန် ပိုမိုစီးထွက်ခဲ့ပါကြောင်း သိရှိရပါသည်။

DOCA(စစ်ကိုင်း)

             ပြည်ခရိုင်၊ ရွှေတောင်မြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများ သည်(၉-၁၂-၂၀၂၄)ရက်နေ့တွင် ကျီးသဲကျေးရွာအုပ်စု၊ လိပ်ပုတ်ကုန်းကျေးရွာရှိ ပန်းဂေါ်ဖီ စိုက်ပျိုးထား သောတောင်သူဦးမြင့်လွင်နှင့် သွားရောက်တွေ့ဆုံ၍ ဈေးနှုန်း၊ဈေးကွက် အခြေအနေနှင့် ထွက်ရှိမှုတို့အားသိရှိနိုင်ပါရန် ဆွေးနွေးခဲ့ပါသည်။ အဆိုပါ တောင်သူသည် စိုက်ပျိုးသောပန်းဂေါ်ဖီ မျိုးမှာ ဘူးမန်း (၁၅၃)မျိုး ဖြစ်ပြီး စိုက်ဧကမှာ(၀.၂၅)ဧက စိုက်ပျိုးထားရှိပြီး ယခင်နှစ်ကလည်း အလားတူစိုက်ပျိုးခဲ့ပါသည်။ ပန်းဂေါ်ဖီများအား ဩဂုတ်လလည်ပိုင်းတွင် စတင်စိုက်ပျိုးခဲ့ပြီး နိုဝင်ဘာ လလည်ပိုင်းမှ စတင်၍ခူးဆွတ်ရပြီး အပွင့်ရေ (၃၆၀၀)ပွင့်အထိ ရပြီဖြစ်ပါသည်။ ပန်းဂေါ်ဖီ စိုက်ဧက (၀.၂၅)ဧကတွင် ရောင်းတန်းဝင်ပန်းဂေါ်ဖီ (၃၀၀၀)ပွင့် ထွက်ရှိပါသည်။

            ကုန်ကျစရိတ်အနေဖြင့် ယခင်နှစ်က(၀. ၂၅)ဧကတွင် (၂)သိန်းကျပ်ခန့် ကုန်ကျခဲ့ပြီး ရောင်းဈေး အနေဖြင့် ခြံဈေး တစ်ပွင့်လျှင် (၇၀၀)ကျပ်ဖြင့် ရောင်းချခဲ့ရ၍ အကျိုးအမြတ်အနေဖြင့် (၀.၂၅)ဧကတွင် (၄)သိန်းကျပ် ရရှိခဲ့ပါသည်။ ယခုနှစ်တွင် ကုန်ကျစရိတ်အနေဖြင့် (၀.၂၅)ဧကတွင် (၆)သိန်းကျပ်ခန့် ကုန်ကျခဲ့ပြီး ရောင်းဈေးအနေဖြင့် ခြံဈေးတစ်ပွင့်လျှင် (၁၀၀၀)ကျပ်ရောင်းချရ၍ အကျိုးအမြတ် အနေဖြင့်  (၄)သိန်းကျပ် အကျိုးအမြတ်ရရှိနေပါသည်။ ပန်းဂေါ်ဖီကို ကျီးသဲအုပ်စုတွင် စိုက်ဧက(၆) ဧကရှိပြီး တောင်သူ(၁၅)ဦးခန့်ရှိပါသည်။ ထိုမှထွက်ရှိလာသော ပန်းဂေါ်ဖီများအား နယ်မြို့များအပြင် ရန်ကုန်မြို့သို့လည်းကားများဖြင့် တင်ပို့ရောင်းချကြောင်း သိရပါသည်။

             ထိုသို့အကျိုးအမြတ်အင်မတန်များနေရခြင်းမှာ ပန်းဂေါ်ဖီအနေဖြင့် ပေါ်ဦးပေါ်ဖျားဖြစ်၍ ဈေးကောင်း နေခြင်းဖြစ်ပါသည်။ ပန်းဂေါ်ဖီလှိုင်လှိုင်ပေါ်လျှင် ဈေးကျမည်ဟုခန့်မှန်းရပါသည်။ ယခု အချိန်တွင် အောက်ခြေဈေးကွက်အတွင်း ပန်းဂေါ်ဖီတစ်ပွင့်လျှင် (၁၅၀၀-၁၆၀၀)ကျပ် ရောင်းချကြကြောင်းကိုလည်း လေ့လာသိရှိရပါသည်။

DOCA(ပဲခူး)

             ယခုနိုဝင်ဘာလနောက်ဆုံးပတ်တွင် ပြည်ဈေးကွက်သို့ ရှမ်းပြည် ပင်းတယ၊ ကလော၊ ပင်လောင်း စသည့်မြို့နယ်များမှ ဝင်ရောက်လာသည့် ဂေါ်ရခါးသီးများ အရောင်းအဝယ်များနေကြောင်း သိရှိရပါသည်။ ကုန်ပစ္စည်းဝင်ရောက်မှုမှာ များနေပြီးအရောင်းအဝယ်လည်း သွက်လျက်ရှိပါသည်။ ယခင်က ဂေါ်ရခါးသီးကို ဟင်းချက်ပြီးကြော်စားသလို မုန့်နှစ်များဖြင့် ကြော်၍လည်း စားသုံးကြပါသည်။ ယခုအခါ ဂေါ်ရခါးသီးအရင့်ကို ပြုတ်၍စားသောက်ပါက အသီးမှာစေးပြီး လူကြိုက်များပါသည်။ ဂေါ်ရခါးသီးတစ်လုံးလျှင် ယခင်က (၅၀၀)ကျပ်ဖြင့် ရောင်းချပြီး ယခုနိုဝင်ဘာလနောက်ဆုံးပတ်တွင် အလုံးချော တစ်လုံးလျှင် (၈၀၀)ကျပ်ဖြင့် ရောင်းချကြောင်း သိရှိရပါသည်။

DOCA(ပဲခူး)