ပြည်တွင်းကုန်သွယ်မှုသတင်း

     တနင်္သာရီတိုင်းဒေသကြီး၊ မြိတ်မြို့ပေါ်တွင် ဗုံလုံသီး(ခေါ်)ပဲလင်းမြွေသီးများ စတင်ပေါ် ထွက်နေပြီ ဖြစ်ပါသည်။ ဗုံလုံသီးသည် သခွားသီး၊ ဗူး၊ ဖရုံတို့လို အနွယ်ပင်ဖြစ်၍ မိုးရာသီတွင် ထွက်ပေါ်လေ့ရှိသော အသီးတစ်မျိုးဖြစ်သည်။ မြိတ်မြို့အနီးတဝိုက်ခြံများတွင် စိုက်ပျိုးကြပြီး နီးစပ် ရာဈေးများတွင် လာရောက်ရောင်းချကြပါသည်။ ထိုအသီးသည် အပေါ်ယံအလွှာကို ဓားနှင့်ခြစ်၍ အရွယ်တော်အတုံးလေးများတုံးကာ အလယ်အူတိုင်ကိုထုတ်ပြီး ချက်စားရသော အသီးတစ်မျိုး ဖြစ်သည်။ ဗုံလုံသီးတွင် ဗီတာမင်နှင့် သတ္တုဓာတ်များပါသဖြင့် စားသောက်ပေးသင့်သော အသီး တစ်မျိုးလည်းဖြစ်သည်။ ဗုံလုံသီးကို ကြက်သား(သို့)ပုစွန်ခြောက်ကို ထောင်းပြီး အစာသွပ်ချက် စားလျှင် အလွန်ပင်ကောင်းသည့် ဟင်းလျာတစ်မျိုးဖြစ်သည်။

          ယခု၂၀၅ခုနှစ်၊စက်တင်ဘာလတတိယပတ်တွင် မြိတ်မြို့ဈေးကြီးများနှင့်တခြားသောဈေး များတွင် ဗုံလုံသီး(ခေါ်) ပဲလင်းမြွေသီးတစ်လုံးလျှင် (၁၂၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

   မွန်ပြည်နယ်၊ ကျိုက်မရောမြို့နယ်၊ ကလိုင်းကနိုင်ကျေးရွာမှ ရာသီမရွေးစိုက်ပျိုးနိုင်သော ခရမ်းသီးစိုက်ခင်းများ အောင်မြင်ဖြစ်ထွန်းလျှက်ရှိကြောင်း သိရသည်။ အဆိုပါ ခရမ်းသီးအစိမ်း ရောင်သီးများ စိုက်ပျိုးရာတွင် မြေမှန်၊ မျိုးမှန်၊ စိုက်နည်းမှန်၊ ရာသီမှန်အောင်စိုက်ဟူသော ဆောင်ပုဒ်နှင့်အညီ ခရမ်းပင်များကို မျိုးစေ့မှ ပျိုးပင်လေးများဖြစ်အောင် စတင်စိုက်ပျိုးပြီး ပျိုးပင်များကို တစ်ပင်နှင့်တစ်ပင်စီခြား၍ စိုက်ပျိုးရကြောင်း အပင်များရှင်သန်ကြီးထွားလာချိန် တွင် အရွက်များ ပိုးမကျစေရန် အထူးဂရုစိုက်၍ အပင်ရွက်ဖြန်းအားဆေးကျွေးပြီး ရေလောင်းရာ တွင်အချိန်ကုန်သက်သာစေရန် ဒလက်ပန်ကာရေပန်းများဖြင့် တစ်ရက်ခြားတစ်ခါ ရေပေးရပြီး အပင်များ အသီးများကြီးထွားစေရန်အတွက် သဘာဝမြေဩဇာများထည့်ပေးရကြောင်း သိရသည်။

   ယခုနှစ်တွင် ခရမ်းသီးဈေးများလည်း ယခင်နှစ်ကထက်ကောင်းသဖြင့် မိသားစုဝင်ငွေပို တိုးလျှက်ရှိကြောင်း ယခုနှစ်တွင် လယ်ကွက်များအတွင်း စပါးစိုက်ပျိုးချိန်ရာသီပြီးလျှင် ခရမ်း၊ ပဲတောင့်ရှည်နှင့် ပိန်းဥပင်များကို တစ်နိုင်တစ်ပိုင် စိုက်ပျိုးရောင်းချသူများပြားလာကြောင်း  အသီးအရွက်စိုက်ပျိုးသူတောင်သူများထံမှ သိရသည်။

DOCA (မွန်)

           စစ်ကိုင်းတိုင်းဒေသကြီး၊ မုံရွာမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးလုပ်ငန်းကို လုပ်ကိုင်စားသောက်ကြရာမှ စားဖိုဆောင်သီးနှံဖြစ်သည့် ခဝဲသီးများနှင့် ကြောင်လျှာသီးပင်များကိုလည်း တစ်နိုင်တစ်ပိုင်စိုက်ပျိုးလျက်ရှိပြီး မုံရွာမြို့၊ သာစည်ဈေးတွင် လာရောက်ရောင်းချလျက်ရှိကြောင်း သိရပါသည်။ ခဝဲသီးအား ခဝဲသီးဟင်းချိုအဖြစ်လည်း ချက်စား၍ရသလို ကြက်ဥနှင့် ကြော်စားပါက အလွန်အရသာရှိသော ဟင်းတစ်ခွက်ဖြစ်ပြီး၊ ကြောင်လျှာသီးမှာ မြေပဲဆံပဲမှုန့်တို့နှင့် သုပ်စားပါက ခံတွင်းမြိန်သော ဟင်းလျာတစ်မျိုးဖြစ်ကြောင်း သိရှိရပါသည်။

          ၂၀၂၅ ခုနှစ်၊ စက်တင်ဘာလ ဒုတိယပတ်တွင် မုံရွာမြို့၊ သာစည်ဈေးတွင် ခဝဲသီးဈေးနှုန်းများမှာ လက်ကား တစ်ပိဿာလျှင် (၂၅၀၀/-) ကျပ်၊ လက်လီတစ်ပိဿာလျှင် (၂၇၀၀/-) ကျပ်တို့ဖြင့်လည်းကောင်း၊  ကြောင်လျှာသီးအကြီး တစ်တောင့်လျှင် (၁၂၀၀)ကျပ်၊ ကြောင်လျှာသီး အသေးတစ်တောင့်လျှင် (၈၀၀)ကျပ်နှုန်းတို့ဖြင့် ရောင်းချလျက်ရှိကြောင်း ကုန်စိမ်းရောင်းသူများထံမှ သိရှိရပါသည်။

DOCA(စစ်ကိုင်း)

           ရွှေဘိုမြို့ပေါ်ရှိ အောင်ဇေယျဈေးတွင် ဆိုင်ခန်းပေါင်း (၁၀၀)ကျော်နှင့် ပျံကျဈေးသည်များအပြင် မိုးကုတ်မြို့သို့ တင်ပို့ရောင်းချသည့် သီးနှံလက်ကားဒိုင်များဖြင့် နေ့စဉ် နံနက် (၆)နာရီမှ နေ့လယ် (၁၄း၀၀)နာရီထိ ပိတ်ရက်မရှိ ရောင်းဝယ်ဖောက်ကားလျက်ရှိပါသည်။

          ၂၀၂၅ခုနှစ် စက်တင်ဘာလ ဒုတိယပတ်တွင် ကသာမြို့မှ  မှာယူရောင်းချသည့် မြစ်ငါးဖမ်းမ(ခေါ်) ငါးဖမ်းဝိုင်း  ငါးများ စတင်ဝင်ရောက်လာပြီး ငါးဖမ်းမ အချို တစ်ပိဿာလျှင် (၂၃၀၀၀)ကျပ်၊ ငါးဖမ်းမ ဆားတစ်ညသိပ် အငံ တစ်ပိဿာလျှင် (၂၈၀၀၀)ကျပ်ဖြင့် အရောင်းအဝယ် ဖြစ်နေပြီး၊ဝင်ရောက်လာသော ငါးဖမ်းမများကို ဈေးအတွင်းရှိ လက်လီ ပျံကျဈေးသည်များကို ဖောက်သည်ပေးသည့်အပြင်၊ ဆိုင်ကယ်ဖြင့် မြို့တွင်း လှည့်လည်ရောင်းချသော ဈေးသည်များ၊ ရွှေဘိုမြို့ပေါ်ရှိ ထမင်းဆိုင်များနှင့် နေ့စဉ် စားသုံးသူများသို့ လက်လီ/ လက္ကားရောင်းချလျက်ရှိကြောင်း  အောင်ဇေယျဈေးအတွင်းရှိ အသား/ ငါးဒိုင်များမှ သတင်းရရှိသည်။

DOCA(စစ်ကိုင်း)

 ကရင်ပြည်နယ်၊ ဘားအံမြို့၏ ဈေးကွက်တွင် ရာသီပေါ်သံပရာသီးများဈေးကောင်းရလျက်ရှိကြောင်း သိရပါသည်။ သံပရာသီးကို ဘားမြို့အနီးတဝိုက်ကျေးရွာများတွင် တစ်နိုင်တစ်ပိုင် စိုက်ပျိုးကြသည့်အပြင် စီးပွားဖြစ်လည်း စိုက်ပျိုးကြပါသည်။ ဘားအံမြို့ ဈေးကွက်အတွင်းသို့ ဝင်ရောက်လာသော သံပရာသီးများမှာ ဘားအံမြို့အနီးရှိ ကျေးရွာများနှင့် ကြာအင်းဆိပ်ကြီး၊ မော်လမြိုင် ရေးမြို့တို့ဘက်မှဖြစ်သည်။ မြန်မာ သံပရာသီးအိတ်ကြီး တစ်အိတ်လျှင် (၂၅၀၀၀၀) ကျပ် ဖြစ်ပြီး တစ်အိတ်တွင်အလုံးရေ ၁၆၀၀ မှ ၁၇၀၀ ထိပါရှိသည်။ သံပရာသီး အလုံးချော (အကြီး) တစ်လုံးလျှင် (၃၀၀) ကျပ်၊ အနေတော်တစ်လုံးလျှင် (၂၀၀) ကျပ် နှင့် ယိုးဒယာ မျိုးစပ်သံပရာသီး သံပရာသီးအလုံး ချော(အကြီး)တစ်လုံးလျှင် (၂၅၀) ကျပ်၊ အနေတော်တစ်လုံးလျှင် (၂၀၀)ကျပ်၊ သံပရာသီးအလုံး ချော(ငယ်)တစ်လုံးလျှင် (၁၅၀ ကျပ် ၇လုံး ၁၀၀၀ကျပ်) တို့ဖြင့် အရောင်းအဝယ် ဖြစ်နေကြောင့်  စိုက်တောင်သူများအနေဖြင့် ယခုနှစ်တွင် ဈေးကောင်းရ၍တွက်ချေကိုက် လျက်ရှိကြောင်း၊ သံပရာသီး၊ ရှောက်သီးကို ကရင်ပြည်နယ် ကြာအင်းဆိပ်ကြီးမြို့နယ်တွင် အများဆုံး စိုက်ပျိုးကြောင်း သိရှိရပါသည်။

DOCA(ကရင်)