ပြည်တွင်းကုန်သွယ်မှုသတင်း

               ရွှေဖရုံသီး၏အ‌ရောင်သည် ရွှေရောင်ကဲ့သို့ ဝင်းဝါနေပြီး အရာသာ အနည်းငယ်ချို သည်။ ရွှေဖရုံသီး၏အသားသည် မချက်ပြုတ်မီ အလွန်မာကျောသော်လည်း  အပူပေးချက်ပြုတ် ပြီးနောက် အင်မတန်နူးညံ့သည်။ အသီးသာမက အပင်၏အရွက်၊ အညွန့်၊ အပွင့်နှင့်အစေ့တို့ကို လည်း စားသုံးနိုင်သည်။ ထားဝယ်မြို့ပတ်ဝန်းကျင်ကျေးရွာများရှိ လယ်ကွင်း စိုက်ပျိုးခြံများတွင် စိုက်ပျိုး၍ထွက်ရှိလာသောအသီးများကို ကုန်စိမ်းသည်များသို့ ဖောက်သည်ပေးကာ ထိုမှတဆင့် အနီးအနားရှိဈေးများတွင် ပြန်လည်ရောင်းချကြပါသည်။ ရွှေဖရုံသီးအသေးတစ်လုံးလျှင်(၁၅၀၀) ကျပ် ရှိပြီး အကြီးတစ်လုံးလျှင်(၃၀၀၀)ကျပ်ရှိကြောင်း ကုန်စိမ်းသည်များထံမှ သိရှိရပါသည်။

DOCA(တနင်္သာရီ)

          ဓနိပင်သည် ထားဝယ်မြစ်ကမ်းတစ်လျှောက်တွင် အများဆုံးတွေ့ရပြီး ထားဝယ်ဒေသခံ အနည်းစုမှာ ဓနိပင်ကနေ ဓနိသကြား၊ ဓနိဖက်၊ ပုအုန်းရည်များထုတ်ယူပြီး အသက်မွေးဝမ်းကြောင်း ပြုကြသည်။ ဓနိပွင့်ယိုပြုလုပ်ရာတွင် ဓနိပန်းကိုခူးပြီး အခြောက်လှန်းကာ ဓနိဦးရည်ဖြင့် ကျိုချက်ကြ ခြင်းဖြစ်သည်။

          ထားဝယ်ဒေသတွင် ဓနိထွက် စားသောက်ကုန်များ ယခုနှစ်တွင် စျေးကောင်းရနေကြောင်း ယင်းလုပ်ငန်း လုပ်ကိုင်သူများထံမှသိရပါသည်။ ဒေသထွက် စားသောက်ကုန်တစ်မျိုးဖြစ်သည့် ဓနိပွင့်ယို တစ်ပိဿာ  လျှင် (၁၂၀၀၀)ကျပ်ခန့်အထိ စျေးရနေကြောင်း ဓနိတောင်သူများထံမှ သိရပါ သည်။

DOCA(တနင်္သာရီ)

          မုန်ညင်းထုပ်သည် မြန်မာနိုင်ငံနှင့်အိမ်နီးချင်းနိုင်ငံများဖြစ်သည့် တရုတ်၊ ဂျပန်နှင့် အာရှတိုက် တစ်ဝန်းလုံးစိုက်ပျိုးကြပြီး  မြန်မာနိုင်ငံတွင်လည်း ဒေသမရွေး စိုက်ပျိုးနိုင်သော သီးနှံဖြစ်သည်။                        ဒေသမရွေးစိုက်ပျိုးနိုင်သော်လည်း သင့်တင့်သောရာသီဥတုရှိသည့် ရှမ်းပြည်နယ်၌ ပိုမိုဖြစ်ထွန်း သည်။ တစ်နှစ်ပတ်လုံး စိုက်ပျိုးစားသုံးနိုင်သောသီးနှံတစ်မျိုး ဖြစ်သည့်အတွက် စိုက်ပျိုးသူတောင်သူ များအနေဖြင့် တစ်နိုင်တစ်ပိုင်စိုက်ပျိုးရောင်းချနိုင်ပြီး ဝင်ငွေကောင်းသော သီးနှံပင်တစ်မျိုးလည်း ဖြစ်ပါသည်။

          ထားဝယ်မြို့ပေါ်ရှိ ကမ်းနားပျံကျစျေးများ၊ မြို့မဈေးကြီးနှင့်ရပ်ကွက်ဈေးများတွင် ရောင်းချနေ သောဈေးနှုန်းများအရ မုန်ညင်းထုပ်တစ်ထုပ်လျှင် (၁၀၀၀)ကျပ်မှ (၁၂၀၀)ကျပ် ခန့်ရှိကြောင်း သိရှိရ ပါသည်။

DOCA(တနင်္သာရီ)

         မွန်ပြည်နယ်၊ သထုံမြို့နယ်တွင် အငြိမ်းစားနိုင်ငံ့ဝန်ထမ်းများအား အခမဲ့ကျန်းမာရေး စောင့်ရှောက်မှုပေးခြင်း၊ အခြေခံစားသောက်ကုန်များအား သက်သာသောဈေးနှုန်းတို့ဖြင့် ရောင်းချပေးခြင်းတို့ကို ၂၁.၃.၂၀၂၅ ရက်နေ့ နံနက်ပိုင်းတွင် သထုံခရိုင်ပြည်သူ့ဆေးရုံကြီး၌ စားသုံးသူရေးရာဦးစီးဌာန၊ သထုံမြို့နယ်တာဝန်ခံ ဦးထိန်လင်းထွန်းသည် တာဝန်ရှိသူများနှင့် ပူးပေါင်းဆောင်ရွက်ခဲ့ကြောင်း သိရသည်။

          ထိုသို့ဆောင်ရွက်ရာတွင် သထုံခရိုင်စီမံအုပ်ချုပ်ရေးအဖွဲ့ဥက္ကဌ ဦးဇော်မိုးစိုး၊ ခရိုင်နှင့် မြို့နယ်စီမံအုပ်ချုပ်ရေးအဖွဲ့ဝင်များက ခရိုင်ဆေးရုံအုပ်ကြီး ဒေါက်တာကျော်ဝင်းဇော် ဦးဆောင်သည့် အထူးကုဆရာဝန်ကြီးများ၊ သမားတော်များ၊ ခွဲစိပ်ဆရာဝန်များ၊ ကျန်းမာရေးဝန်ထမ်းများမှ ကျန်းမာရေးစစ်ဆေးခြင်း၊ ကုသခြင်းနှင့် လိုအပ်သည့်ဆေးဝါးများ အခမဲ့ပေးအပ်ခြင်း၊  မြို့နယ်စားသုံးသူရေးရာဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ဆန်ကုန်သည်ကြီးများအသင်း၊ ဆီကုန်သည်ကြီးများအသင်းနှင့် တာဝန်ရှိသူများ ပူးပေါင်းကာ သက်သာသောဈေးနှုန်းဖြင့် ဆန်၊ ဆီ၊ အသားငါး၊ ဟင်းသီးဟင်းရွက်၊ ကြက်ဥ စသည့် အခြေခံစားသောက်ကုန်များ ရောင်းချပေးခြင်းတို့ကို ကြည့်ရှု့ပေးကာ လိုအပ်သည်တို့ကို ပံ့ပိုးပေးခဲ့ကြသည်။

          အဆိုပါ အငြိမ်းစားဝန်ထမ်းများစောင့်ရှောက်မှုပေးရာတွင် မြို့နယ်အမျိုးသမီးရေးရာအဖွဲ့၊ မိခင်နှင့်ကလေးစောင့်ရှောက်ရေးအသင်းနှင့် ရပ်ကွက်/ကျေးရွာ အုပ်ချုပ်ရေးအဖွဲ့တို့မှ လိုအပ်သည်တို့ကို ကူညီဆောင်ရွက်ပေးခဲ့ကြောင်း သိရှိရပါသည်။

DOCA(မွန်)

မြန်မာနိုင်ငံသည် စိုက်ပျိုးရေးကိုအဓိကထားသည့် နိုင်ငံဖြစ်သည့်အလျောက် ကျောက်ဆည်၊ တံတားဦး၊ မြင်းခြံ၊ ကျောက်ပန်းတောင်း၊ ငါန်းဇွန်မြို့တို့တွင် ဆောင်းရာသီ သီးနှံများဖြစ်ကြသည့် မြေပဲ၊ နှမ်းနှင့်နေကြာတို့ကို ရိတ်သိမ်းပြီးကြပြီး စားသုံးရန်အတွက် ဆီများကို ကြိတ်ခွဲကြသည်။ ပိုလျှံသည့် မြေပဲ၊ နေကြာနှင့် နှမ်းတို့ကို မန္တလေးမြို့ ပွဲရုံများသို့  တင်ပို့ရောင်းချကြသည်။ နှမ်း များကို ကြိတ်ခွဲရာတွင် တစ်တင်းလျှင်ဆီ(၇/၈)ပိဿာနှင့် နှမ်းဖတ်(၇)ပိဿာ၊ မြေပဲဆံတစ်တင်း ကြိတ်လျှင်ဆီ(၈) ပိဿာနှင့် မြေပဲဖတ်(၈)ပိဿာ၊  နေကြာတစ်တင်းကြိတ်လျှင် ဆီ(၄/၅)ပိဿာ နှင့် နေကြာဖတ်(၆)ပိဿာ အထိထွက်ရှိကြပြီး ဆီကြိတ်ခများကို တစ်တင်းလျှင်(၅၀၀၀)ကျပ် နှုန်းဖြင့် ကြိတ်ခပေးရပြီး ဆီကြိတ်သူတို့မှာ မိမိတို့အိမ်ရှိ ကျွဲ၊ နွားနှင့် ဝက်များအတွက် နှမ်းဖတ်၊ မြေပဲဖတ်များကို ပြန်ယူကြပါသည်။ ယခင်နှစ်က ဆီကြိတ်ခမှာ တစ်တင်းလျှင်(၂၅၀၀)ကျပ်မှ ယခုနှစ်တွင်  တစ်တင်းလျှင်(၅၀၀၀)ကျပ်အထိ ပေးရကြောင်း ယခုနှစ်တွင် ဆီကြိတ်သည့် စက်ရုံများမှ နှမ်းဖတ်များကိုဝယ်ယူပြီး မြေပဲဖတ်တစ်ပိဿာလျှင် (၅၇၀၀/၅၇၅၀)ကျပ်၊ နှမ်းဖတ် တစ်ပိဿာလျှင်(၄၅၀၀/၄၆၀၀)ကျပ်၊ နေကြာဖတ် တစ်ပိဿာလျှင်(၃၃၀၀)ကျပ်ဖြင့် ရောင်းချ ကြောင်း ယခင်နှစ်က နှမ်းဖတ်တစ်ပိဿာလျှင်(၃၅၀၀)ကျပ်ဖြင့် ဝယ်ယူရကြောင်းနှင့် ပြည်ပ နိုင်ငံ တရုတ်သို့တင်ပို့ကြောင်း သိရှိရပါသည်။

DOCA(မန္တလေး)